Пышшалiсь

Вöвлi, что и война коста мукöд мортыс эз куж вермыны ассис повзьöмсö и пырис бы му пытшкас да дзебсисис, медбы не адззыны, мый керсьö фронт вылас. Мортыслöн эзö вермö видзсьыны нерваэс, личалiсö, бырисö, öшисö. Эта коста мортыс ачыс эз тöд, мый керсьö сыкöт, кытчö нуöтöны коккес, думайтiс только сы йылiсь, медбы мунны эта местаись ылöжык да не адззыны ужассö, кытöн мортсö орлалiсö торрез вылö, шенталiсö кусöккезöн, а мукöд коста и нем эзö кольлö. Пуляыс бöбöв, а снарядыс эшö бöбöвжык, но и минаыс да бомбаыс риззьöны-паздöны быдöс, мый эм му вылас, сорлалöны мунас, сотöны мортлiсь керöмсö. Кузьма Шебрасов шедiс фронт вылас, кöр пессисö Сталинград понда. Немецыс кутiс городсö кытшö. Окоппез вевдöрöттяс уялiс сьöд тшын, вевттис шондiсö, каттис ас увтас отирсö. Кузьмаыс эз казяв, кöдöрсянь потiс то ли снаряд, то ли бомба, и быдöс каттиссис туманö. Сылöн öшис юрсадьыс. Одзжык соровтöм муыс гиззьыштiс сы вылö. Вевдöрас кольччис только сапог пыдöсыс. Шебрасовыс оз тöд, мымда куйлiс мусис шебрас увтас, но кöр садясис да петiс аслас «могилаись», то шедiс кыдз мöдiк мирö: сы гöгöр вöлi лöнь, эзö потласьö снаряддэс. Пушкаэс гыпкöтiсö кытöнкö саяс. Сiя нёджжöвтiс ас гöгöрсö да вежöрттöг пондiс оськавны, ачыс эз тöд кытчö. Мунiс вель дыр, колис бöрас сё ылöжык войнаыслiсь гымалöмсö. Медбöрын локтiс станция дынöдз и решитiс пышшыны гортас.

Сылöн деревняыс сулалiс вöр дорись керöсок вылын, а керкуыс вöлi лэбтöма кырас дорын, кöда увтöт котöртiс неыджыт шор, тшöка быдмöм баддяинöн. Деревняас локтiс сайласьтöн, а сэсся пемыт рытöдз олiс вöрас, куйлiс лапыт кöз увтын и только пемыт кадас иньдöтчис аслас керку дынö, кытöн тыдалiс шырби. Инькаыс, кöда лöсьöтчис ни водны, петiс осьтны ыбöссö öтiк мыгнас да сэтчö и пуксис, кöр казялiс жöниксö.

— Только эн шумит, — лöга висьталiс Кузьмаыс. — Да шаньгаöн эн пукав, а игнась, да пырамö керкуас. Ме эд не сiдз, а гусьöн локтi, медбы некин эз адззыв.

Кузьмаыс тшöктiс сайöвтны öшыннэсö и только сэк пуксис пызан саяс. Öддьöн сималiс кынöмыс. Инькаыс лöсьöтiс сылö, мый адззис, пуксис паныт да видзöтiс жöникыс вылö, казялiс, кыдз сiя умöльтчöма, да негорöн висьталiс:

— Аныт тай только кольччöма, синнэт вöйöмась. Тшыгйöн ли мый ли олiн?

— Не праздникын тай пируйтi, — инькаыс вылö видзöттöн шыасис Кузьмаыс. — Сэтчин кромешнöй ад. Менам юрсиö пондiс дзормыны.

Инькаыс дзарнитiс юрси вылас да вöлись казялiс, что жöникыслöн былись петöмась дзор тылöппез. Сiя сьöкыта ловзисис да гусьöн висьталiс:

— Пöрись морт кодь лоöмыт.

— Лоан небось, кöр тэнö ловйöн муас тыртöны. — И пондiс висьтасьны фронт вылас олан йылiсь да кыдз петiс эта свет вылö.

— Мый нö öнi лоас? — полöмöн юалiс инькаыс.

— Умöльжыкыс нем оз ло, — дыша макнитiс кинас кöзяиныс. — Понда овны сайласьтöн. Тэ только некинлö эн баит, а то умöль лоас. Сэтчин эг шед, дак гортын арестуйтасö и виясö.

И инькаыс пыр полöмöн олiс. А сэсся сылö локтiс юöр, что Кузьма Шебрасовыс öшис фронт вылас. Кузьмаыс лыддьöтiс юöрсö да öмсö пиньöвтöмöн серöмтчис, нем эз висьтав. Сiдз чулалiс быдса тöв. Инькаыс етша петавлiс соседдэзас, но кöр сы ордö кин пырас, кöзяиныс пукавлiс джоджулын да кывзiсис, мый баитöны. А тулыснас керöс увтас керис банясяняс му пытшкöттяс туннель, кытi позис казявтöг петны шор дорас, а баддез коласöттяс шедны вöрас. Гарйöм мусö ойезнас лэдзчöтлiс да чапкалiс юокас.

Мылаыс сылöн бырис пукавны гортас, а охота вöлi петавны öтöрас да чушыктыны сöстöм рунас, видзöтны, мый керсьö деревня гöгöрас, мыйöн олö отирыс. Кöр петiс баддез коласас, ловыс нельки пöднассис, юрыс бергöтчис. Шондiыс вылiсянь хитрöя шынньöвтыштiс да кыдз бытьтö висьталiс привет. Кузьмаыс нёджжöвтiс öтмöдöрö и казялiс, что туруныс шондi югöррез увтас тыдалiс зелёнöй-лöзöн, ваыс котöртiс шорас кыдз зеркало, сöстöм. Природаыс вöлi сэтшöм жö, кыдз войнаöдззас. Только вот Кузьмаыслöн вежсис оланыс. Локтiс гортас и бытьтö не кöзяин, нельки ракаыслiсь колö повны, быдлаö дзарьявны, медбы не шедны. Асьсö ровняйтiс шыркöт, кöда петавлö норасис только сёйны. Сiя иньдöтчис вöрокланяс, кöда дынöдз вöлi не унажык дас саженься. Мунiс кань моза гусьöн, медбы и кок увтас улокыс эз ризьнит. А йöрйöм вöрыс вöлi неыджыт, кытöнкö десяток гектар гöгöр, кытöн гожумнас деревенсаыс видзисö подасö.

И некин эз думайт, что мöсыс или баляыс вермас öшны, не локны гортас. Эз вöвлы сэтшöм случайыс. Только разь локтöм кöин вермас джагöтны поснит подасö, но сэк адззывлiсö кöть коскаэсö. Но вот медбöрья кадас лоис вежöрттöм — öшас баляыс и кыдз ваö вöяс. Сэк инькаэс решитiсö ветлыны вöрас öтлаын и видзöтны быд уголоксö. Заптiсисö черрезöн, медбы не повны. Ветлöтiсö торйын, гусьöна баитiсö öтамöд коласаныс, петалiсö ойвыв ладорас, а сэсся решитiсö мунны шöрöттяс. И удачаыс вайöтiс ас дынас: тшöк вöраин коласiсь нiя адззисö виль шалашок, но полiсö локны матöжык. Öтiкöс ыстылiсö гортаныс корны мужиккесö. И нiя локтiсö куим ружьёöн, гöгöртiсö шалашоксö.

— Ноко, Авдей, бузгы шалаш кузяс, — советуйтчöм бöрас висьталiсö деревнясис медбур вöралiсьыслö.

— А-а, мать сiйö, — горöтчис Авдейыс да малыштiс кырымнас тошсö и лэдзис пельпон вывсис ружьёсö, — кöть и ог адззы, но сёравно зверь. Баляыс тожö не понпиян.

Гыпкис лыйöм, и порох тшыныс öшöтчис руас. Мужиккес сулалiсö да видзöтлiсö öтамöдныс вылö, видзчисисö. «Этадз вермасö и вийны, — сöтiс юрас пышшалiсьыслö. — Мый тэ нылiсь босьтан? Неужто эстöн ковсяс кувны? Но ме бы эшö ола. Казяласö мортсö, дак, поди, озö жö лыйö», — думайтыштiс Кузьмаыс да кыссьöмöн петiс шалаш увтсис и лэбтiс киэсö.

Мужиккес кинитчисö сы дынö, уськöтiсö кок йывсис и пондiсö вартлыны, кин мымда вермис. Кöть и тöдiсö ассиныс соседсö, но лöгнысö öштiсö асланыс пода понда. Инькаэс мöдiсö обукавны пышшалiсьсö, но мужиккес эзö сетö.

— Колö кыскыны милицияö, — висьталiсö нылö. — Ась сэтчин керасö закон сьöртi. Сэтчин юраöсь морттэс пукалöны.

Отделас сiйö вайöтiсö телегаöн, йöртiсö торья жырö. Чулалiс быдса лун, но некин эз вöрзьöт. Только куимöт лунас корисö лейтенант дынö, кöда дыр юасис, кыдз сiя локтiс гортöдз.

— Товариш лейтенант, — пондылiс Шебрасовыс, но сылö эз сет баитны следовательыс.

— Ме тэныт не товариш, — орöтiс сiя баснисö. — Тэ вузалiн Родинатö и народсö. Вунöт этö кывсö. Тэ понда ме гражданин следователь и отвечайт только менам вопроссэз вылö.

Пемыт рытнас ни Кузьмасö кайöтiсö мöд этаж вылö да пыртiсö неыджыт кабинетö, кытöн пызан саяс пукалiс дзор юрсиа, топыта тэчöм да паськыт пельпона капитан. Кынымкö минута сiя синкым увтсяняс видзöтiс арестованнöйыс вылö и мöдiс бы тöдны, мый сiя думайтö эта кадö, а сэсся кашельтыштiс, пуктiс ручкасö да лöня горöтчис:

— Ме эг думайт, что миян отир коласын вермасö лоны предателлес. И петö, что сораси. Öнi адзза, кытшöм овлö предательыс.

Шебрасовыс чöлiс. Сiя эз видзчись эттшöм юасьöмсö, эз тöд мыйын винитöны, мый сысянь корöны, НКВД-лöн уполномоченнöй Пугаевыс шуис сiйö диверсантöн, враглöн агентöн, шпионöн, тшöктiс висьтавны, кытшöм заданнё сетiс врагыс. И весись баитiс Кузьмаыс, кыдз петiс тыртöм окопсис да мунiс ачыс оз тöд кытчö, туйтöг, тшыгйöн, öтнас.

— Тырмас тотьны öтiксö, — Пугаевыс чеччис пызан сайсис да кыскис кобурасис нагансö и локтiс Кузьмаыс одзö. ― Висьтась чистосердечнöя, или ме петкöта тэись быдöс правдасö.

— Сэсся нем ог тöд, — мыдзöмöн горöтчис Кузьмаыс. Пугаевыс кватитiс сiйö моросöттяс да дернитiс дынас и нагансö лöсьöтiс öм весьтас. Кузьмаыслöн синнэс паськалiсö и кылыс öшис. А Пугаевыс горöтлiс, треситiс мороссö, грöзитчис зыртны порошокö, чышкыны му вывсис заразасö.

Вартлöм бöрас Кузьмаыслöн эз вöв выныс мый-нибудь керны, и сiя чöлiс, эз вермы панытасьны и только бергöтлiс юрнас.

— Мый мурлотö бергöтлан? — горöтiс Пугаевыс. — Оз гленитчы? Ноко нимав дулосö! Сiя тэ понда горзö. — И сюйыштiс дорсö öмас. Сэтчö гыпкис лыйöм... Кузьмаыс дыша пöрис бок вылас, минута гöгöр харчитыштiс, öмыс тырис вирнас, петiс джоджас да паськалiс юр гöгöрас. Кузьмаыс зэгнитчис да лöньсис. Кабинетас, пырис сопровождающöйыс.

— Дзимлялö пон тушасö, — висьталiс сылö Пугаевыс. — Некинлö нельки öтiк кыв эдö баитö. Ме висьтала мый керны.

Ойнас лэбтiсö милиционерресö да дзебисö трупсö могильникö кресттöг и гробтöг. Могилаас сюйыштiсö и нимсö, кыдз бытьтö Кузьмаыс эз и вöв отир коласас. Дело гöгöрас каттисис тшöк да пемыт туман.