Трактористка

Андропово деревняын олiсь Павел Васькин коннöй дворсис мырддис колхозниккеслiсь кык вöв и видзис ас пондаас. Лöгасьлiсö отирыс, но нем эзö вермö керны. Нельки конюххесö эз лэдз кутны, грöзитчис вийны нiйö, ежели вöввесö сетасö мöдiклö.

— Кин доддялас менчим вöвсö, — лöгöн баитiс сiя отирыслö, — вирöн пондас кашляйтны. Сiдз и тöдö.

Быдöс мунiс сысянь, что Павелсö сувтöтiсö кöдзан машина дынö да сетiсö кык медбур вöв. Сысянь и лоис кöзяинöн, кöть кöдзан кадыс важын ни чулалiс.

— Лоас вундан кад, и меным колас эшö уджавны, — небытжыка ни висьтавлiс сiя. — Ог уджав ачым, дак и вöввес ась шоччисясö.

— Да мый тэ кучикат он тöр вöввет понда, — дивуйтчöмöн висьталiс öтпырись сылö Мария Ильинична Зубова да макнитiс кинас, — менам вот трактор, и то сетi бы. Дак некин эд оз босьт. Поди, босьтан?

— Тракторнас ветлыны колö кужны, — гажтöма горöтчис

Павелыс да гыжьялыштiс юрбöрсö. — Тракторыслöн эд вы-ын! Только вына морт вермас веськöтлыны, а вöвсö недыр пезьдöтны.

Мария Зубоваыс уджалiс трактор вылас кыкдас куим год ни и некöр вöлi шоччисьны, мымда тöвнас, кöр колiс лöсьöтны сылiсь ёрдöм гырксö кöдзан кежö. Мый тай и лоас, оз висьтав, а сувтас. Да не кытöн-нибудь, а веськыта бороздаас. Плетьнас эд он вур сiйö. Кöть сэтöн горзы или сьыв. Первöй годдэзас, кöр Марияыс пондöтчис уджавны медодзза тракторрез вылас, уна и синва сiя чапкис. Пуксяс тракторыс одзö да герьялö: «Кöбы тэ кага вöлiн, дак висьталiн кытi висьö, а то чöлан, шы он сет. Ёрдöм тэ коска, кытöн неладноыс? Провалитчин бы син одзись, пöдiн ваö. Нывкаэс эта кадö гажöтчöны, а ме тэ дынын пукала. Садьö ни бырис. Чапка быдöс да бригадаас понда уджавны. Кинлö ме эттшöмыс кола?»

Трактористкаыслöн паськöмыс пыр вöлi мавтöма маслоöн, чорыт и дука, нельки яйыс тырис керосин дукнас. Зонкаэс матö эзö локтö сы дынö. Только напарник Иваныс öтнас жалейтiс сiйö да жугалöм тракторсö отсавлiс лöсьöтны, ачыс синнэзнас малалiс Мариялiсь вывтырсö, лэбтасян мороссö»

— Мый сiдз видзöтан? — стыдитчöмöн гöрдöтлiс да юавлiс Марияыс. — Нем эд сэтчин абу пуктöма.

— И пуктытöг гленитчан, гöтрасямö жö, и лоас бур. Марияыс паныт эз шу нем, но кыввес йиджисö сьöлöмас.

«Нывкалö колö петны жöник сайö, — думайтiс сiя, кöр вöвлi öтнас паськыт ыб вылас. — Век эд он понды öткöн мотырасьны. Пöрисьсö етша босьтöны, да и кинлö чукыртчöмыс колас? Кытчöдз абу сёр — öм нем паськöтлыны, а то мöдiк кватитас Ивансö. Зонкаыс сiя интереснöй, тракторсö тöдö, уджавны лоас гажажык. Оз жö, поди, мывкыдсö öшты. Мортыс ассяма, любитö уджавны, оз лэбав öтмöдöрö. Паськöмыс менам етша, дак наживитамö. Ась, мый лоас, оз ло, а согласитча».

Иваныс лунiсь лунö лоис настойчивöйжык и öтпыр, кöр ыб вылас вöлiсö только кыкöн, босьтiс, мый бы мöдiс. Марияыс эз ни вермы панытасьны, выныс кöсöдз бырис, киэс эзö лэбö пессьыны. Нiя куйлiсö межа вылас, а тракторыс гурöтiс неылын. Иваныс кисö эз и мездöт Марияыс голя увтiсь, видзöтiс сöстöм небоас и син одзас шогмис одзланься оланыс, кыдз пондасö овны тракторист да трактористка.

— Тöдвылат мый усис? — гусьöн юалiс Марияыс да жмитчыштiс бокас.

— Думайта тай, кыдз пондамö овны.

— А-а, вот этадз и пондамö.

— Талун гортö пырта и лоас о-о-о!

— Он жö отир смехсö кер, — повзьыштiс Марияыс.

— Не отирыслö овны, а меным. Öнi тэ лоин менам, ― Иваныс бергöтчис Марияысланьö да кутiс пельпоннэзöттяс. — Менам, вежöртiн?

— Норовитышт невна, сыбöрын...

— Невнасö позяс, но тöд, что ме ог шутит.

Чожа нiя öтлаасисö, и Марияыслöн лоисö челядёккез, кöднiйö быдтiс пöрись аньыс, кöть и мукöдпырсяс жебгис:

— Инькаэс некин тай озö уджалö трактористкаэзнас, а тэ кыдз лякасин кöрт бердас, он вермы мездiсьны. Меным эд сьöкыт челядьыскöт.

— Терпит, мамок, терпит. Ме жö нянь шедта. Оламö, слава еныслö, неумöля, бедатöг, нуждаыс боки мунö.

Кöть и челядьыс вöлiсö ни сизима, гозъяыс получайтiсö сорок, а то и витдас центнерöн сюсö и отсавлiсö соседдэзныслö. Он эд понды солавны или сiсьтыны. Сiдз и олiсö.

Öтпыр арьявнас, кöр вöлi кöдзыт ни, Иваныс кайис ыб вылас, кытöн уджалiс инькаыс, медбы видзöтны, кыдз сiя гöрö да эз ли нем ло тракторыслöн. Керис биок, лöсьöтiс потшшезiсь куйланiн и водiс сэтчö да ланьтiс. Кульыс, натьтö, чапкис потшшес вылiсь, эз и кыв, кыдз и узис куш му вылас, оз тöд мымда. Только сэксянь пондiс шогавны и сетiс еныслö ловсö. А уджавлiс пыр гöрд флажокöн трактор вылас. Колхозас кусiс öтiк звезда. Но Марияыс эз коль ассис тракторсö сэтчöдз, кытчöдз эз личкы шогöтыс. Месяц мымда куйлiс постелля вылас, эз вермы чеччыны. Кыдзкö пырис сы ордö колхозсис председательыс да юасьö:

— Мый тэкöт лоис? Оз ли ков отсавны? Ме вот кассасис öктi кыкдас руб, а сэсся абу. Ачыт тöдан, кытшöм колхозыс, гов, карманыс бырöм. Примит кöть невнасö.

— Пукты пызан вылас, лекарствоэз вылö ковсяс.

— Но дак инö лöсяв, куйлыны эд некöр, — и петiс ыбöс саяс.

«Кысь сiя колхозыс богатсялас? — куйлiкас думайтiс Марияыс. — Вон тай анькытшсö быдöс сiсьтiсö. Кин тшöктiс зэр увтас ытшкыны? Председательыс! Сiдз жö рудзöгсö. Сюыс багсялö гуна вылас. Кытшöм эта кöзяин? А сысянь мый босьтан?»

Не весись баитiсö колхозниккес, что колхозыслöн тырмас сiсьтыны, и думайтiсö унажыксö ас понда кыскыны.

«Мый жö этö керöны? — бергалiс Марияыслöн юрас, кöр шогыс чинлiс и зубытыс лöньсьылiс. — Колхозниккеслö сеталiсö сюсö косьтыны быд керкуö. А Черемноваас öтiк öвин да и сiя сулалö. «Деснаыс» тожö оз уджав. Кин только мый вермö, сiйö и керö. Нельки сторож, Пашка Зубов, фермасис гусялiс куим мешöк пизьсö, и нем эзö керö. Ох, гусяласö быдöс колхозсö, немöдз вайöтасö. Мийö гöрамö, кöдзамö, а кинкö олö миян добронас. Председательыслöн быдлаын вон, сват, зять да увтыр и быдыс начальникалö. Деддэзным этадз эзö уджалö. Нылöн порядок вöлi. А öнi лэдзисö отирсö».

Керкуыс инькаыслöн сулалiс лог дорись вылынiн местаын, и öшын увтас пыр сулавлiс тракторыс, гажöтiс сьöлöм. Кöр Марияыс лöсялыштiс да вермис чеччыны, сiя вермис лунтыр пукавны öшын дынас да видзöтны, мый керсьö öтöрас. Гажтöмтчис нельки улицаыс. Тракторыслöн кольччис только местаыс, кытöн тöдчисö маслосö киськалöмсянь пятноэз да гусеницаэзiсь киссьöм комоккез.