Кöчка епка

Олiс сiя посад дынсис торйын. Сэтöн вöлiсö только куим керку: öтас олiс Сидор, мöдас — Гусь Семён и куимöтас — Кöчка Епкаыс. Быд мужиклöн вöлiсö инькаэз да челядь, но пöриссес эзö вовлiсьлö öтамöдныс ордö, кöть и челядьыс орслывлiсö öтлаын. Кин тöдö, мый нiя ас коласаныс делитiсö. Натьтö сiйö, что Сидорыс да Семёныс пырисö колхозö и керкуэзаныс вартiсö ни горрез, а Епкаыс олiс öткаса хозяйствоöн и керкуас видзис горсö трубкатöг. Лонтiсикас быдöс тшыныс петлiс оланiнас и только лöсьöтöм осьтаöт матича увтас петлiс öтöрас. Пытшкас вöлi сьöд баня кодь. Кöзяиныс пыр ветлöтiс тшын дукöн да сьöд рожаöн. Паськöмсö новйис умöликö, вочлöмö да киссьöмö. А уджавны эз любит.

— Ась ме понда уджаласö мöдiккез, — баитлiс сiя мужиккеслö. — Уджсяняс и вöввес кулöны. Кынöм сималас, дак инькаöс ыста корны. Мирыс не бур морттэзтöг — сетасö.

Лэдзчисис сэтчöдз, что просто пондiс симулянитны. Этö соседдэс казялiсö эшö одзжык, кöр Епкаыс видзчисьтöг лоис немöй. Вöлi эта сiдз. Корисö Кудымкар посадас (сэк сiя вöлi эшö посадöн) комиссия вылö. Сэк колiсö солдаттэз воюйтны кайзеровскöй Германиякöт. Епкаыс лэдзчисис комиссия кежас немöйö. Сiйö эзö ыстö фронт вылас, бракуйтiсö. Да и кытчö ыстан, кöр мортыс нем оз вежöрт, а только мексö. Бöр гортас локтiс и пондiс мыктавны да киэзнас мыччавны-висьтавны. Отирыс только боккесö клопöтiс да дивуйтчис:

— Сылiсь, натьтö, шысö тшыныс сёйис, — баитiсö ас коласаныс öтiк местаись олiссес. — Керкуас эд оз туй пырны. Неужто эта гленитчö инькаыслö? Кыдз тай обороника лоöма.

Чулалiсö германскöй и гражданскöй войнаэс, а Епкаыс спокойнöя олiс гортас. Некин сылö не начальник. Мый охотитас керны, сiйö и керö, висьтав кöть эн висьтав, кöть майöг юр вылас лöсйы. Медбöрын ассис вöвсö вузалiс, картасö резьöтiс да лонтiс песöн. Кольччис гов, да не соков. Ветлöтiс, кыдз рукйöсь пон. Но, тыдалö, мылаыс бырис немöяс овны и невнаöн пондiс баитны, но умöля. Öтпырись локтiс кузницаö и вайис замок, кöда бердын вöлi пробойыс.

— Мый треситчан замокнат? — юалiс сылiсь кузнецыс.

— М-ме кур-ритi, и ключыс в-вымö м-мунiс, — висьталас Епкаыс.

— Но и ась провалитчö, — серöмтчис кузнецыс. — Юрыс абу дона.

— Н-не, кöз-зяйкаыс руг-гайтö м-менö.

— А кыдз тэ шедтiн замоктö?

— Л-ломöн бергöтi. Пробойыс то т-тай. Д-дор ключсö.

— Ладно уж, дора, нестатнöй немчуралö, — согласитчис кузнецыс тошсö малалiкö. — Только шкаличок ваян. Вежöртiн, немчура несчастнöй?

— М-ме часöт к-котрася, — радувьяс горöтчис Епкаыс да бордпавйöн петiс кузницасис и паджалöмöн мунiс посадланяс. А кузнецыслöн вöлiсö уна важ ключчез, кöднаись сiя бöрйис лöсяланаö, и быдöс лоис бур. Только сiмöмсö зыртыштiс.

Кыдзкö Епкаыс лякасис Сидорыс бердö да тшöктiс висьтавны, мыля сiя дыр новйö сьöд воня нинкöммесö, кöдна вевдöрсяняс сьöдöтiсö ни, но озö бырö. Соседыслö нем эз кольччы керны, кыдз только мыччавны пыдöссэсö, кöдна вöлiсö вурöмась кучикöн.

— В-вот эд к-кытшöм аб-быз, ог в-вежöрт сiйö. А к-кытiсь ме босьта кучиксö? Инькаöлiсь лядьбейсö ли мый ли шуляла? Ку-урöгсис эд кучикыс оз шогмы?

— Дыш тэ лоин вöдитны подасö, — серöмтчис Сидорыс. ― Дышыслö споринаыс ачыс эд оз лок. Дышсö нуждаыс ляпкöтö. «Кытчöдз тэ кыскан эта дышöн? — думайтiс ас пондас Сидорыс. — Лэдзчисин бытьтö немöйö, а öнi велöтчан баитны. Челядьлö висьталан, дак озö веритö. Хитрöй тэ мортыс, да дышыт шогмöма ассят одзжык. Босьтны бы кызжык нагайка да вурны тэнö вирöдз, сэк бы лöсялiн». Но эта туйö висьталiс: — Вежин бы мывкыдтö, Епим. Тэ понда эд некин оз кер и оз лöсьöт. Тэнö только сералöны.

— К-кинлöн öм-ыс паськыт ась и сер-ралас, — чеччикас горöтчис Епкаыс да сьöвзис. — В-ветла ужо С-сеняыс ордö. Можот, сiя мый вильсö висьталас. — Петiс да мунiс, эз и прощайтчы.

Семёныс пукалiс поспуэз вылас да куритiс трубка. Епкаыс пуксис сы бокö кортöг и сэк жö юалiс:

— К-кыдз думайтан, Сеня, мыля вöлыс кашляйтлö?

— Кыдз и мортыс, простудитчас да, — Семёныс дивуйтчöмöн видзöтiс соседыс вылö. — Сэсся немись бы.

— О-о, нем тэ он вежöрт, Сеня, — висьталiс Епкаыс да кривöя шынньöвтыштiс. — Сiйöн, что сьöкыта уджалö. Кöр кольччас только нырвылас усьны. Веж-жöртiн? Тэ вот сiдз жö чожа пезьдан. Спасибосö некин оз висьтав. Крест туяс важ пинятö сувтöтасö.

— А меным буржыкыс оз и ков, — тшынсö лэдзöм бöрын жагöник висьталiс Семёныс. — Ме ола ас пондаам. Гöрд звездаыс меным оз ков. Ась сiйöн мöдiккез гöрдласö.

— Мый жö этö Сидорыслöн Танькаыс керö? Стариккöт то каттисьö, кöдiя айлö ни туйö. Не стыд, не опас абу.

— Аслас эд товарыс, — висьталiс Семёныс. — Тэныт-то кытшöм дело?

— Дак эд отирас баитöны, а меным-то мый.

— Отирыс баитас да дугдас, а тэ öзтан. Тэ кыдз сир, лякасян да мавтан нятьнас. Öвсьы жö, Епим, öвсьы. Или тэныт деньга мынтöны?

— Видзчись, вöтч-часö да эшö содтасö. А тэнат заптöм потш эм, сетышт жö меным. Йöрсö колö лöсьöтыштны.

— Не китöм, ачыт ветлан вöрас.

— Да эд сэтчинiсь колö вайны, а тэнат весь сiсьмöны.

— Ась и сiсьмасö, но тэ кодь дышыслö ог сет.

Епкаыс чеччис да мунiс соседыс дынiсь. И сiдз лунiсь лунö. Нем эз кер, а шатласис. Керку юрсис нельки стропилаэс сiсьмисö, и крышаыс пуксис керку вылас. И сiя олiс сэтöн, кытчöдз эз кув.

ВНУЧЕК

Неыджыт Васёва деревняын олiс не том ни морт Пиля Сабанов, кöдалöн керкуыс сулалiс медвылын, гажа местаын, и позис адззыны быдöс, мый керсьö соседдэслöн. Кöзяиныслö мунiс ни кыкьямысдасöт год и лоис сьöкыт керны гортсис уджсö. Инькасö дзебис кыдз дас год гöгöр ни лоас, олiс только внучеккöт, кöда вöлi бöб да некывзiсь, но кöть сiя бур, что старикыслö эм кинкöт баитны. Пöрись мортыс карчйöрас вöдитiс картошкасö, луксö, капустасö да эшö уна öтiкö-мöдiкö. Колхозсис делоэс дынö эз ни павкöтчы. Зоныс, кöда олiс городын, вовлывлiс шоча, да и то сы понда, медбы айыслiсь калькöтны керöм карчсö и нуöтны гортас. Моньсö эз ошкы, мыля сiя эз лысьт кутчисьны нятьöсь удж бердас, полiс марайтны краситöм гыжжесö. Деревнясис инькаэс кортöг вовлiсö да миськалiсö джоджсö, бекöрпаньсö старикыс ачыс гывьявлiс, а васö ваявлiс внучекыс, кöда велöтчис шöрöт школаын, новйöтiс сьöрас только öтласа тетрадь, а книгаэсö колявлiс классис гор сайö. Видлiс сiйö дедыс, а внучекыс только серавлiс:

— Мыйлö книгаэсö кыскавны, кöр менам быдöс юрам? Мывкыдтöм нывкаэс ась сьöраныс новйöтöны библиотекасö.

— Но тэ, Митька, шулер вöлöмыт, — дивуйтчис дедыс. — Мыля нывкаэсö обижайтан? Асьтö гöгöр видзöт да вöлись баит.

— Меным оз тырмы только мотоцикл, а сэсся быдöс эм. Дедок, а не босьтны ли миянлö этö коляскасö?

— Одзöв тэныт эшö, зонка. Вот быдмыштан и вöлись...

— Дак миян жö мукöдыс ветлöны ни?

— Кöдналöн айезныс богатöсь.

— Но тэ жö, дед, не беднöй, тöда эд, что деньгаыт эм.

— Менам сiя пуктöма руб дынö руб и не öтiк годöн, а тэ бы кабырнитан öтiк часö. Перво колö шедтыны да вöлись видзны.

— Кинлö тэ заптан, дед? Кулан да сiдз жö кольччас.

— А тэныт кытшöм тöждiсьöм?

— Ме бы кöть мотикнас гöняйтi, — думайтöмöн шыасис внучекыс.

— А ме тэнат годдэзö кортöн ветлöтi, — висьталiс дедыс да малыштiс сивöй тошсö. — Зимогорöн уна ветлöтi. Муна Майкарö или Пожваö, а то и Чёрмозöдз и шедта куим руб да сiйö гортö вая. А тэ гортiсь только бы нильдöтан. Кыдз тэ пондан овны?

— Ме то ола, дед. Тэ только мотоциклсö неб.

— Вот керамö картошкасö да вузалам и сыбöрын небамö.

Старикыслöн вöлi гу, кöдiйö колiс косьтыны картошка кисьтан кежас. Пиляыс чапкалiс гуас пессэз да ачыс пырис сэтчин вадзöтны бипурсö. Уль му вылас биыс умöля кутчисис пессэз бердас, унажыксö только тшынöтiс. Внучекыс видзöтiс вевдöрсяняс и видзчисьтöг пöдналiс ыбöссö, ачыс пуксис сы вылö.

— Бориско, мый тэ керан? — горöтiс пытшксяняс дедыс. — Осьт часöт жö, а то менö пöдтан!

— Деньгасö сетан мотоциклсö небны, дак осьта, — сералöмöн горöтчис внучекыс. — Он кö сет — ог и осьт, ась пöдан тышнас.

— Осьт чожажык, лешак пиян! Кинлö висьталi! Часöт пета и куля вöлись кучиктö, нечистöй дуклiсь.

— Норовитан петны, кытчöдз ме эстöн. Дак сетан или он деньгасö?

— Сета, мыся, сета, только лэдз петны.

Внучекыс лэбтiс ыбöсоксö и гусис путриктöмöн петiс тшыныс, кöда коласын мыччисис и дедыслöн дзор тошыс. Сы гöгöр каттисис йöв кодь пар. Пиляыс кашыктöмöн петiс гусис да тупыльтчыштiс бокö и пондiс кашляйтны. Но шоччисьöм да сöстöм русö лолалöм бöрын сiя пуксис и негорöна шыасис:

— Тэ эд, розбойник, этадз и вийны верман. Только чуть ни ловö эз пет. Локтас айыт дак, быдöс норася. Мый тэ думайтан?

— Кöр небан мотоциклсö... Сэсся юрам нем оз пыр.

— Да провалитчы тэ псикнат, сета деньгасö.

— Важын ни сiдз бы, а то нюжлалан резинасö.

— Нюжлалан небось, кöр быд копейкаыс ньылöмöн сюрö. Борисыс эз адззыв, кытiсь дедыс кыскис кöшельсö, видзöтiс только купюраэс вылö, кöдна вöлiсö бура тэчöмöсь да ыджытöсь. Пиляыс лыддис, мымда колiс, сетiс внучекыслö, а кольччöмсö петкöтiс чуланö. Зонкаыс сэк жö котöртiс посадас и мымдакö кад чулалöм бöрын локтiс небöм машинаöн. Школа бöрсянь рыттэсö пондiс чулöтлыны только гöняйтöмын. Öтпыр пантасис сылö тöдтöм зонка да корис гöняйтны мотоциклнас. Борисыс сетiс машинасö да пуксис тракт бокас видзчисьны. А зонкаыс пöльтыштiс городланяс, и сымда сiйö и адззылiсö. Борисыс сёр рытöдз пукалiс канава дорас да вöлись горзытöн мунiс гортас. Сiя некинкöт эз бы баит, эз бы и шыась дедыслö, но пöрисьыс, кыдз ном, пельсадь бырöтiс юасьöмнас: кытчö воштiс машинасö? Зонкаыс вежöртiс, что старикыс оз мездöтчы сы дынiсь сэтчöдз, кытчöдз оз понды тöдны быдöс, и висьталiс, кыдз петiс делоыс.

— Тэнат не юр, а сiсьмöм баклаш, — видiс дедыс внучексö. — Кыдз жö тэ сетiн тöдтöм мортлö машинасö? Да только сiйöн, что не аслат вöлi деньгаыс. Эн мырсьы сiйö шедтыны. Йöз горб вылас райö бы мунан. Сiдз оз овлы. Мый öнi айытлö висьталан? Мун да кошшы, кытчöдз юртö озö пиньöвтö.

Тшын, чад сулалiс керкуас, но Борисыс шы паныт эз сет, тöдiс ассис винасö.