Сьöлöмын бичирöн

(Гора му, 1963)

Кыдз чарньöв косьöвтiс-паськалiс омöн страна пасьта страшнöй юöр: война... Уна отирöс повзьöтiс эта лёк кылыс, кöрталiс нылiсь кикок. Инькаэз падмисö, öшисö, лэдзчисисö нылöн киэз. Мужиккез лöсьöтiсö котомаэз, мунiсö горттэзiсь. Дыр кежö я? Эта йылiсь некин эз тöд. Да и быдöнныс я бертасö?

Жöв керсис и Крохалёв посад, кöр мужик пöлöс колис ассис горттэсö. Öтöрын эз пондö кывны гора сьыланкыввез. Рыттэс, гажа гожся рыттэс, öштiсö ассиныс гажсö.

Быдöс сьöкытыс, мый эм деревняын, колхозын, мый эм оланын — пуксис инька пельпоннэз вылö. Сэк первуись Серафима Алексеевнаöс корисö правленнёö, висьталiсö:

— Примит бригада. Бригадирсö иньдiсö, а уджсö эд он чапкы.

— Кытшöм меись бригадир? — повзис инька. — Ме гортын нем ог письты керны, а эшö бригадирöн уджавны? Да и етша велöтчи, асьныт тöдатö.

— Сьöкытсис повзин?

— Сетö кöть кытшöм удж, но только не этö.

— Сэсся некинöс, Серафима, пуктыны. Давай уджав. Серафима Алексеевна думайтiс-керис, бергöтлiс сiдз и этадз да пондiс бригадиравны. Сiдз колö, сiдз военнöй кад тшöктö.

Эз на ешты инькаыт тöдсасьны хозяйствонас, кыдз ковсис петны турунавны. И видззез вылас, покосас, каждöйлöн пондiс висьны сьöлöмыс эшö öддьöнжык, зубытжыка тöдчис мужиккезлöн мунöмыс. Некинлö вöлi тöчитны косаэз, вартлыны литовкаэз, лэбтыны зороддэз. Но, кыдз баитсьö, нуждаыс быдлаö велöтiс... Кöр пондöтчис вундан кад, машинаэз вылö пуксисö челядь. А нылöн етшажык удж, унажык маитчöм. То куран чегас, то репей пинь чеччöвтас. Колö вежны нiйö, вильöсь пуктыны, да запаснöйес абу. Вот и котрасьö Серафима Алексеевна коккез висьтöдз, садь быртöдз кошшисьö мöдiк бригадаэзöт, пыд ойöдз кузнецкöт лöсьöтö жугалöм деталлез.

— Кытшöм ни эта наказаннё, — горöтчас сьöкыт часö бригадир и синнэзсис чепöссясö сола синваэз. — Кысянь эта ёрдöм войнаыс миян юр вылö киссис?

— А тэ крепитчы, — баитiсö сылö, — синваэзнас эстöн он отсав.

И Серафима Алексеевна крепитчис. Кöть кытшöм ни сьöкыт, кытшöм эд шог мукöдпырся, а сэсся инькаыт эз норась, эз лёкöтчы аслас судьба вылö. Некин эз тöд, мый керсис сы сьöлöмын, кöр сiя одз асывнас саймöтлiс челядьсö, мед иньдыны нiйö уджавны. Сьöлöмсö жмитöмöн ыстывлiс инькаэзöс вöввезöн и кузь туйö, и вöрö песла, и леспромхозö керасьны. И некытшöм беда, некытшöм нужда эз повзьöт отирöс, эз кусiньт, эз чегöт сiйö.

Кöть мунiс война, кöть крохалёвсалöн вынныс вöлi етша, но нiя бура видзöтiсö му сьöрын. Аскадö пыр гöрисö и кöдзисö, дженыт сроккезö дзимлявлiсö сю, лён да карч, тöлöн кыскалiсö назём, кералiсö вöр.

— Мукöд колхозас урожайыс казялöмöн чинiс, — энö годдэсö касьтылiкö баитö Серафима Алексеевна, — а мийö этаöдз эг лэдзö, радейтiм мусö, уджалiм. Да эшö кыдз! Аслат огородечын ась дзимлявтöг ендас, а колхозын — кер. Колiс сiдз.

Инькаэз бытьтö томмисö, кöр кончитчис война да пондiсö бертны гортö солдаттэз. Ныкöт деревняö локтiс гаж, локтiс кокньöт. И некин эз стыдитчы, кöр радувьяс петас шоныт синва, кöдакöт кывтö и войнася зубытыс, и лёк сьöлöмшогыс... Серафима Алексеевна сьöлöмö война годдэз колисö тöдчана след. Сы кымöс вылын мыччисисö гырись чукыррез, пöрисьмыштiс, но вöлi одззамоз боёк да вына. Сiя тожö радуйтчис, кыдз и быдöнныс.

— Хозяйствосö кианым видзим, — висьталiс сiя виль бригадирлö. — А мый петiс не сiдз, дак öнi тiйö, мужиккес, лöсьöтатö.

Чапкис Серафима Алексеевна сьöкыт ношасö мыдзöм пельпоннэс вылiсь, кокнита ловзисис: öнi пондас думайтны ас пондасис, аслас удж йылiсь, оз понды лун и ой думайтны, жугдыны юрсö бригада понда.

Но правленнёас думайтöмась мöднёж.

— Миянлö колö куканьвöдитiсь, — висьталiсö сылö правленнёын. — Уджыс, конечно, не сöстöм, но сэтчö не каждöйсö сувтöтан.

— Конечно, — согласитчис сiя. — Гортын тай кыдз синöс берегитан подасö, а колхознöйыс эд донажык...

И подмис Серафима Алексеевналöн туёк мöс ферма дынö. Отирыс эшö узьö, а сiя котöртö ни аслас куканнез дынö. Гажа и кокнит сы сьöлöм вылын. Уджалiкас казявтöг пондас сьывны нывкася песняэз, и сiдз чулалас быдса лун. Куканнес быдмисö сöстöмöсь да ёнöсь, гöнныс свиттялiс.

Быдтiс нiйö, быдöннысö берегитiс, а сэсся петiс фермасис: семьяаныс прибыль лоис, эшö öтiк «работник» чужис. Сэк Серафима Алексеевна пондiс уджавны бригадаас.

Чорзьöм, вартсьöм киэс Серафима Алексеевналöн кужисö быд уджсö керны, быдлаö сидзисö. Сiя кужис вундыны чарлаöн, кокнита ытшкисьны косаöн, проворнöя лэбтавны турун да новйыны сю мешöккез.

— Колхозас, небось, велалан керны быдöс. Няньыс эд оз шогмы буханкаэзöн, — любитлiс сiя баитны дышшезлö да чочком киэза отирлö. — Сiйö колö быдтыны. Кöр ньылöмтö чапкан, сэк и няньыс чöскытжык да пöтöсжык. Сьöд уджись нем повны. Сьöд вылас и няньыс быдмö — муын да назёмын.

Кöр Серафима Алексеевна пондöтчас баитны му йылiсь, чужöмыс сэк югмö да ловзьыштö, синнэзас öзйöны свиттялан бичироккез. Да и ачыс дöс керсьö мöдкодь, лоö томжык да рамжык. Нельки голосас пондö кывны ласка да шоныт.

— Муыс, кыдз копилка, — баитö сiя, — пуктан сыö öтiк тусь, а босьтан дасö. Но тэчны сы пытшкö колö сьöлöмсянь и не кыдз шедас, а кужöмöн. Мыля соседдэзнымлöн оз быдмы сюыс? Нiя тэрмасьöны только план тыртны, а качество йылiсь оз думайтö.

Да, заботливöй морт сiя, Тудвасеваыс. Уджалiсь морт, кытшöмöсь не сiдз ни уна бригадаас. Сэтшöмыслö кöть мый доверит.

...И Серафима Алексеевналö сетiсö звено, кöда вöдитiс лён. Эта кадöдз колхозын быдтiсö лёнсö только сымда, мымда колiс геззэз да мешöккез понда и эшö сетавны колхозниккезлö. Да и умöля быдмис сэк лёныс. И доходсö почти эз сетлы. Бытшöмика, кыдз колö, пондiсö вöдитны лёнсö только 1957 годö.

— Одзжык лёнокнымöс кöдзлiм-керлiм сiдз, кыдз прадеддэзным вöдитлiсö. Но и кайлiс четверть кузя, — висьтасьö Серафима Алексеевна. — А мукöдлаас, кывсис, рудзöг сувда пö кайö. Вот и мунiмö агроном дынö юасьны. А сiя керис семинар, дыр миянöс велöтiс.

Первöйся годас, кыдз Тудвасева лоис звеньевöйöн, сылö сетiсö план: кöдзны 25 гектар. Сымданас одзжык некöр лёнсö эз вöдитлö. Вöлi мый понда тöждiсьны, мый понда ойлунсö öштыны: эта ыжда мусö колö эд дозирайтны! Гöрны да кöдзны, шуам, абу ыджыт беда — тракторрез керасö. А кытшöм быдмас? Бöра четверть кузя? Да, вермас сiдз лоны, если не удобритны мусö. А мыйöн? Джын му вылас коялiсö и сэсся абу. Бур не бур сiя, но ковсис мунны школаö. Сiдз пö и сiдз, локтi корны отсöт. И уроккез бöрын челядьыс, дзик кöдзыв, пондiсö котрасьны-шастайтны керкуись керкуö, öктыны пöим.

Да, медбы босьтны бур лён, колö бура дозирайтны сiйö. И öтнатлöн оз тырмы вын керны быдöс уджсö. Но колхозын сэтшöм отир олö, что кор только — сёровно отсаласö. А челядьыс? Нiя медбур отсалiссезöн лоисö. Вот кытшöмкö годö звено бöбасис ыб вылас петкöтны свежöй назём — нем вöлi сэсся кыскавны. Дак мый петiс — ёгтуруныс пондiс пöдтыны лёнсö! Сэк эшö некытшöм гербициддэз эз вöлö, и лён му вылын гожумбыт весöтчисö челядь. Но и, конечно, не весь: сэтшöм лён ыпкис-кайис — диво да и только! А бур лён — ыджыт доход колхозлö.

— Сэк доходсö быд гектар вылiсь получитiм 1420 рубöн, — висьтасьö Серафима Алексеевна, — а мöйму — 1570 рубöн.

Чулалöм годö звено сетiс колхозлö не уна не етша, а 5200 рубся унажык. Эттшöмыс ачыс оз лок карманö. Сы понда колö пессьыны, кисьтны ньылöм, кыдз и нянь понда жö. Кин оз тöд, что Серафима Алексеевна ваявлiс вöркерассэзiсь пöим да коявлiс сiйö лён му вылö? Кыдз только петалас лёныс, Серафима Алексеевна сэк, натьтö, етша ни узьлö. Öктас звеноись отирöс и нуöтö кöдзны аммиачнöй селитра. Нюжалыштасö кудриа тылöпоккес — керö виль подкормка, мöдiк удобреннё коялö. И сiдз неделяись неделяö мунö удж, и ыб вылын читкылясьö лёнок, гартчöны зелёнöй юроккез. А Серафима Алексеевналöн эд гортас öкмыс челядь. Быдöннысö нiйö колö вердны, юктавны, пасьтöтны, кöмöтны. Да етша я мöдiк заботаэс!

— Кыдз только, Алексеевна, тэ ештан керны и гортат, и ыб вылас! — дивуйтчöны соседдэс.

— Колö кö керны — быдöс ештан, — шуö Серафима Алексеевна. — Вот быдмасö челядьö, дак вöлись и шоччися. Да и позьö я овны уджавтöг эттшöм кадас? Öнi быдлаын отсалöны машинаэз, уджав да радуйтчы!

Серафима Алексеевна сiдз и керö — гажöтчö-уджалö. Этасянь и мылаыс оз быр, выныс содö, гажыс горалö. И сы удж понда отир сылö спасибо висьталöны.

Ыджыт, гажа юöр Тудвасева керкуö локтiс куим год бöрын Женскöй лун праздник панытö. Керкуын баитiс радио, челядь лöсьöтiсö мамныслö подароккез, баитiсö мамныс орденнэз йылiсь, юасисö, мыля сiя оз новйы нiйö. Вдруг нiя кылiсö: «Трудовöй Краснöй Знамя орденöн... Тудвасева Серафима Алексеевна...»

Челядь уськöтчисö мамныс дынö:

— Кылiн, мамук? — тэрмасьöмöн дзульзисö нiя. — Тэныт сетöны эшö öтiк орден!

— Мый тiйö и сюльтыртатö, — öшöмöн горöтчис Серафима Алексеевна, — кытшöм, поди, меным орден?

— Да радиоыс öнi баитiс!..

Ашынас Тудвасева ордö сьöрсьöн-бöрсьöн локтiсö соседдэз да öдззисö поздравляйтны инькасö виль наградаöн.

— Не весь, тыдалö, эн тöд спокойсö, лун и ой прокод вöлiн кок йылат, — баитiсö нiя. — Мый заробитiн — босьт.

— Наградаыс ыджыт, — шыасис хозяйка, — да верма я ме сiйö оправдайтны? Пöрисьма ни то...

— Верман, Алексеевна, верман!

И вермис. Кыдз сельскöй хозяйствоын одзын мунiсьöс одззуну Серафима Алексеевнаöс ыстылiсö Москваö выставка вылö.

Гортас, кыдз дона козин, öшын вевдöрын бур рамкаын öшалö ыджыт фотография, кытöн Н.С. Хрущёв фотографируйтчöм Уральскöй зонаись совещаннё вылын участниккезкöт.

— Вот эстöн и ме эм, — висьтасьö Серафима Алексеевна. — Сэк Никита Сергеевич менчим киöс жмитiс, кöр здоровайтчим... Думайтны только, кытшöмкö коми-пермячка, кöда тöдiс одзжык только латтянсёр да печкан, öнi вон кытшöм отиркöт снимайтчö! — радöн горöтчис сiя да содтiс: — Вот эта олан! А эд ашын сiя эшö буржык лоас!..

Мыйö-мыйö, а этаö Серафима Алексеевна бура веритö.