«Дружбист»

— Ноко, Öрин, вай öнджасö, тово, керны колö, — Устиныс кайис горвыв дорас да пуксис гöбечас коккесö öшöтöмöн, видзöтiс инькаыс вылö, кöдiя куйлiс, коссö шонтiс.

— Мый тэ, мый мöдан керны? — повзьыштiс инькаыс. — Сiйö жö, мый отирыс керö, — кöзяиныс малыштiс дзор тошсö, а синнэзас мыччисисö гажа бичиррез.

— Бесыс ли мый ли ордлы кузят сöтiс? — юалiс инькаыс.

— Ме и сытöг верма керны, — лöга горöтчис Устиныс. — Лэдз ноко чулкитö да видзöтамö.

— Öтöрас эд лун, он жö понды.

— Меным öнi öтiк, что лун, что ой. Сёровно ог уджав.

— Тэкöт эд неразбродно баитны — думайтöмтö керан. Но инö вод бокам.

— Мыйлö?

— А мый нö, коран дак, — иньыс видзöтыштiс сы вылö.

— Вот маччика на! — Устиныс пондiс серавны. — Ме öтiкö баита, а тэ мöдiк йылiсь вежöртiн. Инькаыслöн только сы йылiсь и думаыс. Вот лэбта дубастö да кöс росöн висъя.

— Сэсся кытшöм эшö лёквир тэныт колö?

— Ме тшöкта лэдзны чулкитö, кытöн пуктöма деньгаыс.

— Горшыт ли мый ли пондiс косьмыны?

— Нач тэ бöбмин, пöрись, — Устиныс гыжьялыштiс юрбöрсö. — Кысь тэ кывлiн, что Устиныс деньгасö вежö вина вылö?

— Олiмö, слава богу, эн пируйт, кыдз öнi томмес.

— Миянлö сьöкыт ни лоис «аслыт босьт и меным сетнас» пилитчыны. Колö небны «Дружба». Шарманкаас пö вайöмась. Адззылi, кыдз сiя уджалö. Чуркасö только вж-жик пилитö. Поперечнöйсö колö ки вылын видзны, а сiйö вевдöрсяняс личкöны. Стрась бур машинаыс. Сет деньгасö да котрася, а то мöдiк одзалас небны.

Öриныс пуксис горвылас, лöсьöтыштiс дубассö да малыштiс бöрланяс юрсисö, кöрталiс баличаэсö да вöлись нюжöтчис сёр саяс, кытöн öшалiсö паськöммес, кошшыштiс кинас и кыскис сэтчинiсь ноёвöй важ чулки, кöдаын видзис öктöм деньгасö, да сетiс жöникыслö. Устиныс деловитöя кыскис чышьянокö каттьöм деньгасö и кутчис лыддьыны. Инькаыс гордитчöмöн видзöтiс сы öм вылö. Старикыс лыддис, тырппезнас жагöника вöрöтыштлiс. Кöзяиныс мöдпöв лыддьыштiс деньгасö, торйö пуктiс куим зелёнöйö, а кольччöмсö каттис бöр чышьянокас да сюйыштiс чулкиас и сетiс инькаыслö.

— Мымда öксьöма ни? — юалiс сылiсь инькаыс.

— Дзебны кыкнаннымöс тырмас, — негорöн висьталiс Устиныс.

Сiя чожа лэдзчис горвывсис, пасьтасис да сэк жö мунiс магазинас и дыркодь эз лок, а кöзяйкаыс пондiс тöждiсьны, эз ли ло мыйкö старикыскöт. И только сэк, кöр сiя мыччисис туйвежас, Öриныс мунiс öшын дынсис. Кöзяиныс локтiс да пырис керкуас, а пиласö колис посöдзас.

— Вот эшö запасок сетiсö, — висьталiс сiя иньыслö да пуктiс пызан вылас неыджыт мешöчок. — Ковсясö пö, кöр жугалас дак. Отирыс тай тыр шарманкаас. Мыйла пö да мыйлö тэныт пöрись мортлö? Мыся, хозяйствоас быдöс ковсяс. Öнi вот бензин колö вайны да сотны пö колö быдса бачок. Заправкаöдззас колас котрасьны.

Кöзяиныслö эз терпитсьы пешлыны, кыдз «Дружбаыс» уджалö, но ачыс эз авйы, мый колö сыкöт керны. Сiя сiдз и этадз бергöтлiс инструкциясö, но сiдз и эз вежöрт. Ковсис корны мортöс, кöдiя авйис «Дружбаас». Вайöтiс неылын олiсь Пров Васькаöс, и сiя перво зэлöтлiс быдöс гайкаэсö, а сыбöрын заводитiс. Моторыс уджалiс бура. Колiс только уджöтны, медбы часттес зыртчисö öтамöдныс бердö. Эта понда сувтöтiсö öшын увтас.

— Бачоксис ась сотчыштас бензиныс, — висьталiс Василийыс. — Сыбöрын ачыс дугдас. Сэсся позяс уджавны.

Вöлi гожумпон и колiс думайтны кöдзыт тöлыс йылiсь. Устиныс лöсьöтчис керавны пес. Керис аскур. Корис отсасьны куим зонкаöс. Вöрыс вöлi деревнясяняс километр гöгöр ылына и мунiсö подöн. Старикыс оськалiс гажöна. «Одзжык керлiмö помеч, — думайтiс сiя, — кытчö корлiмö только пилитчиссесö дасся не етшажык да эшö увсö керавны да дзимлявны сымда жö. Не весись баитлiсö, что быдöс пондас керны техника. Öнi эта помечыс пельпон вылам. Вот кераламö, и висьтала пöрисьыслö, что песыс тырмас кык тöв кежö».

Вöрас нiя пукалыштiсö, шоччисисö да куритiсö, видзöтiсö, кöднö пуэсö пондасö пöрöтны. Устиныс мöдiс бы только кызжыккесö, медбы песыс шогмис унажык, но пилаыс вöлi дженытöв. Мыля бы не керны кузьжыкö?

— Ноко, сувйыштö кöз увтсö, — висьталiс сiя зонкаэслö да ачыс кутчисис «Дружбаыс» бердö, кышалiс цепьсö да заводитiс. Вöрсис сöстöм руас лэбтiсис тшын, кöда каттисис пуэслöн лыс коласас. «Дружбаыслöн» кöзяиныс локтiс пу дынас и полöмöн пондöтiс тшапсö, но качысся нем эз пилитсьы. Устиныс давитiс сэтчöдз, что кымöссис дзулльöн петiс ньылöмыс, а пилаыс эз пыр, эз пилит. «Кытшöм, едрена мать, сылö колö? — думайтiс Устиныс. — Цепьыс виль, а оз босьт». Сiдз и этадз пондылiс пилитны, кöсöдз кулис качсö, но эз вежöрт, мыля пилаыс оз мун. Öтiк пу дынас чулалiс ни быдса час, а только тшыныс каттисис пилитчисьыс гöгöрöт. Садьыс бырис. Сiя пуксис сiсьмöм мыр вылö, а пиласö сетiс зонкаэслö да висьталiс:

— Ноко, пондылö, вынныт тiян унажык, а ме шоччисьышта. Но и зонкаэслöн пилаыс эз пилит, кöть и моторыс рявзiс.

Кöзяиныс думайтiс-керис да висьталiс: «Тырмас мырсьыны, гортö мунамö. Тыдалö, и этчö специалист колö. Юасьыштамö».

Мунiсö бöр гортаныс юррезнысö öшöтöмöн. «Чучаыс бöж увтö сюйыштi то деньгасö, — думайтiс кöзяиныс. — Öнi мый висьтала пöрисьыслö? Бöбöтны некыдз оз туй — казялас. А зонкаэс не виноватöсь. Сёравно колас юкталыштны. Лунсö эд öштiсö». Пиласö кыскис пельпон саяс, цепьсö эз и лöсьöт. Локтiс гортас сьöд кымöр кодь, кöда уйö му вевдöрöттяс да кöсйö зэрсö.

— Лöсьöт пызан вылас да потшшуйт мужиккесö, — лöга висьталiс иньыслö. — Нiя эд не весись кайлiсö вöрас.

— И пессö уна керитö? — юалiс иньыс.

— Только вай да лонт, — эрöстiс сы вылö кöзяиныс. — Кöбы тöдi, дак век бы эг неб пиласö. Весись только деньгасö видзи.

— Да мый лоис? — полöмöн юалiс иньыс.

— Оз пилит, дыгсьö, моторыс уджалö, а оз пилит.

— Господи, помилуй, — сьöкыта ловзисис кöзяйкаыс сёянсö ваялiкö.

— Ковсяс эшö корлыны Пров Васькасö. Поди, сiя вермас висьтавны, кытшöм сулема колö.

Зонкаэс охотиттöг юисö аскурсö да мунiсö, а Устиныс котöртiс неылiсь соседыс дынö да вайöтiс сiйö, пыртiс чуланiсь пиласö да висьталiс:

— Некыдз оз пилит.

Соседыс видзöтiс да павкöтчытöг юалiс:

— Этадз и пилитчин?

— Быдöс — кыдз эм, сiдз и коли.

— Тэ не дружбист вöлöмыт, — серöмтчис соседыс. — Кöр жö сiя пондас пилитны, кöр цепьсö бöрöн кышалöмыт. Обукнас он керав, а сiя сiдз жö, тышнас оз пилит, — и бергöтiс цепьсö. — Ноко петламö да пешлiсямö.

Кöзяиныс петкöтiс пиласö карчйöрас да сувтöтiс косьмöм кыдз мыр дынö. Соседыс заводитiс «Дружбасö» и кынымкö минута бöртi пöрöтiс кольччöм мырсö, орлалiс чуркаэзö. «Он тöд ваыслiсь пыдынасö, дак эн пыр, — думайтiс кöзяиныс. — Не весись баитöны, что он куж вöвсö доддявны, дак немлö и пуксьыны доддяс. Оланас сiдз и петö».

Кöть и пöрись, а колiс велöтчыны.