Олан и öтiк лун

(Иньва, 1971)

Быд морт, кöр сы оланын лоас кытшöмкö событие, обязательно видзöтö бöрас кольччöм туй вылö да сравнивайтö чулалöм кадсö. И вот öнi, кöр Таисья Фёдоровна Полуяновалö присвоитiсö Социалистическöй Уджын Геройлiсь званнё и сылöн нимыс лоис тöдса не только Пешнигортскöй сельсоветiсь Вырова деревняын, но и быдсöн Российскöй республикаын, сiя тожö нёджжавлö кольöм олан туйсö. Охота эшö и эшö пантасьны эта морткöт да буржыка думайтны сы йылiсь, кытшöм жö туйез вайöтiсö сiйö эта подвиг дынö.

Тасялöн судьбаыс уна вачкисьö мамыс, Мария Васильевна, судьба вылö. Челядься годдэс чулалiсö айтöг. Олiсö дедыс керкуын, мамыс уджалiс колхозын. Эз и тыр сизим годыс, кыдз пондöтчис Отечественнöй война.

— Премияэз сетавлiсö колхозсяняс, — висьтасьö Мария Васильевна, — честнöя уджалöмыс понда. Эг жалейт ачымöс, нылö понда старайтчи. Мöдi жö велöтны сiйö, да мылаö эз понды тырмыны. Восьмöй классын велöтчöм понда деньга колiс вештыны, а кысь ме сiйö вая? Колхозсис эд копейкаэз сетавлiсö. Сiдз сiя сизим класснас и кольччис.

Вот сэк и локтас ны ордö да висьталас Тасялöн очавон Николай Егорович:

— Мый тiйö мырсятö, ась локтас ме дынö. Адзза кытшöмкö удж сы понда.

Эз падмöт и мамыс:

— Ветлы, нылöй, поди, кынöмыт пöт лоас и паськöмсö кöть ас вывтат керан. Ен сетас, и вежтiсямö. А эстöн овтöн медбöрья мыгтö бырöтан, а вильсö он вермы босьтны.

Сiдз Тася шедiс Визяйö, пондiс уджавны вöрын. Специальностьтöг и сэтчин вöлi некокнит, но нывка эз норась очавоныслö, кöда уджалiс мастерöн, керис быдöс, мый тшöктасö. Мукöдыс пышшывлiсö или откажитчывлiсö сьöкытжык наряддэзсянь, а Тася мунлывлiс быдлаö. Этаын мыйкö вöлi сылöн аслас, кытшöмкö асныра решительность да ас дынö требовательность. Подружкаэс баитлiсö, что Тасяыс быдторсö тöдö бы, оз брезгуйт и мужиччöй уджöн. Только вот дырöдз ли сiя тырмас? Петас жöник сайö, лоасö челядь — и макнит сэсся кинат. Сэтшöм уж инькалöн доляыс.

— Кык год уджалi вöрас, — висьтасьö Таисья Фёдоровна, — сэсся öтлаасимö Афоняыскöт. Гленитчисö сылö миян местаэс, и сiя локтiс татчö.

Выроваыс гöгöр местаэс и быль гажаöсь. Керкуэс дынö матö сибöтчöм Иньвалöн крут шульга берегыс. Асывся шондiлöн югöррес медперво малыштöны юыслiсь негырись волнаэсö, мыйсянь ва вылас öзйöны уна-уна бичиррез. Иньва саймö, пондö орсны, сьывны и гажöнжыка котöртны шондiыслö паныт. Эта кадö поката веськыт берегас, бадь кусттэз коласын, кайес быдкодь голосöн нюжлалöны ассиныс песняэз. Кытшöм ни эта кадö узьöм? Петан öтöрас, ловзисян сöстöм рунас, и мыдзöмтö кыдз киöн босьтас. Он вермы орöтчыны цветитан видз дынiсь, кытöн туруныс кöвьясьö морскöй волнаöн. А саяс тыдалö Пешнигорт, «Россия» колхозлöн мöс ферма, школаэз, магазиннэз, керкуэз. Эта — олан, ыджыт Советскöй Союзлöн учöтик му торок вылын отирлöн олан. — Куим гожумö, — касьтывлö важсö Таисья Фёдоровна, — бригадасяняс сувтöтлiсö колхознöй столовöйö поварöн. Öтiк год вердi куканнезöс. Тöвнас кери сiйö жö, мый колхозниккез. Меным эд сёравно, мый да кытöн керны, но только бы не гортын пукавны. Колiс кö, и вöрсö пöрöтi, и мешöккез спина вылам новйöтi. Грамотанас одзланьö эг чепöссьы, дак сэтöн некин вылö обижайтчыны. Сёравно эд овнытö колö, кытчöдз оча кок он вачкы.

А кадыс чулалiс, мунiс одзлань, мöдкодьсялiс олан. Миян колхоззэс босьтiсö направленнё подавöдитöм вылö. Таисья Фёдоровнаöс вились сувтöтiсö быдтыны куканнез. Петiс этö просто. Сiя дозирайтiс нимöтчись мöссэзöс, кöдна вердлiсö учöт куканнезöс. Колö висьтавны, что «Россия» колхозыс Кудымкарскöй районас медодз пондiс быдтыны подасö вильмоз. (Зоотехник Раиса Васильевна Ладанова веськöтлöм увтын нiя быд виль методсö проверяйтiсö асланыс хозяйствоын.) Эта кадö нимöтчись мöссэсö нуöтiсö мöдiк фермаö, а куканнес кольччисö Таисья Фёдоровна дынö. И эшö учöтик деталь. Öтiк годö порозоккесö эзö ештö кодзны, да сiдз нiя и кольччисö. Ковсис гожумбыт нiйö видзны йöрданын. Бура вердöмсяняс нiя öддьöн чожа зорамисö да содiсö веснас. И ветеринаррезлöн неештöмыс бергöтчис передовöй методö — порозоккесö пондiсö быдтыны кодзтöг, сэк нiя чожажык зорамöны. Часöт тöдвылам, кыдз колхозсис председатель Герман Ильич Радостев эшö тысяча девятьсот шестьдесят пятöй годö отчётнöй собраннё вылын сувтöтiс задача: локтан годдэзö керны да вузавны кыкись-куимись унажык йöв, яй да мöдiк продукттэз. А эд сэк животноводствосянь получитлiсö ни 32 000 руб чистöй прибыль. Но и эта вöлi етша. Яй вылö вердöм порозоккес лэбтывлiсö не унажык 250 килограммся. (Нiя годдэзö подасö дозирайтöм сьöртi мастернас лыддисö Егор Данилович Носковöс.) Öнi жö хозяйствоас быдтöны подасö гожумся площадкаэз вылын, видзöны кöртöтöн, вердöны яй вылö тöв и гожум. Выровскöй фермасис уджалiссез йылiсь славаыс паськалiс округсис быд пельöсокöдз. Не шутка эд дженыт кадö быдтыны куканнесö да сетны государстволö быд юрсö джын тонна сьöкытаöн! Этшöммезнас нiя быдмöны только куим месяцöн.

— Таво мийö уджалiмö куимöн, — висьтасьö Таисья Фёдоровна. — Этö — Ольга Николаевна Хозяшева, Раиса Фёдоровна Фирсова и ме. Быдтiмö порозоккесö тристаö. Содлiсö суткинас тысяча сто двадцать граммöн. Сетiм государстволö кыдз медъён подаöс. Конечно, быд юр понда тöждiсьöмыс сьöлöмын лун и ой.

Подавöдитiссеслö колö чеччыны мукöд отирысся одзжык. Таисья Фёдоровна аслас ёрттэзкöт сизим час кежö локтö ни фермаас. И куимöн, баиттöг, нiя мунöны площадка вылö, медбы видзöтны, ладно ли подаыскöт.

— Сайман асывнас, — баитö Полуянова, — и думайтан, кыдз ойыс чулалiс, эзö ли каттисьö. Ныкöт эд сякöйыс вермас петны.

Ме видзöтi да радуйтчи, кыдз уджалöны инькаэс: не тэрмасьöмöн, но чожа, кужöмöн. Абу учöт мыгöра, паськыт пельпона, шондi вылын сотчöм чужöма, Таисья Фёдоровна кокнита босьтавлiс вилаöн зелёнöй подкормка и ваялiс сiйö кормушкаэз дынö. Тыдалiс, что эм киэзас выныс. А кок вылас не кизьöр. Оськöввес чорытöсь, увереннöйöсь. Ветлöтö подаыс коласöт повтöг да эшö горöтыштлö мукöд порозыс вылö, А пороззэс... Ны видзöтöмсянь лопаткаэз коласöт гилявны пондö. Сюррезныс кыдз тортаэз — кызöсь да йылаöсь. Лöгсяняс синнэзныс бичирöн свиттялöны, кымöссэзныс кыдз горпöданнэз. Шед сэтшöмыслö, дак он и казяв, кыдз сюррез вылас кишкаэтö каттяс.

— Да сулав жö тэ, — дзугис менчим думаэзöс челядьлöн вöснитик шыок, — сет нятьсö ас вывсит летны!

Сэк жö шыасис Таисья Фёдоровна:

— Беда ни тэкöт, Люба. Эд вермас тэчкыны, стрöйдны...

— Ме бы весöта, а сiя оз сетчы, жöдзö коккезнас.

— Эн сiйö вöрöт, ме ачым весöта.

— Но ме бы эд тожö уджала!

— Ештан эшö, уджыс и тэ понда тырмас.

Таисья Фёдоровна локтiс нылыс дынö, небыта чышкыштiс ныр увтсö да висьталiс:

— Лок жö мунамö обедайтны, мыдзин, поди, отсалiсь менам.

— Обед дак обед, — согласитчис нылочка, — только ме эд бöр локта.

— Ладно, сэтчин видзöтамö, — висьталiс мамыс, нылочкасö ыбöс дынö кокнитика тойлалiкö.

Сёйисö нiя колхознöй столовöйын. Обед бöрас Таисья Фёдоровна кынымкö минута кежö кежалiс гортас. Олö героиня сiдз жö, кыдз олöны деревняас мöдiк колхозниккес. Только вот керкуыс видзöтö гажöнжыка — хозяиныс, Афонасий Васильевич, уджалö строителлес коласын бригадирöн и, ассис оланiнсö кертöн, тыдалö, пуктöм быд угöлас мастерствосö. Öшыннэс кутöмöсь чочком наличниккезöн, воротаэс краситöмöсь, а крышаыс вевттьöма шатёрöн. Да и пытшкас гöгöрöт сöстöм да гажа: джоджын басöк сера аскыйöм половиккез, комод вылын сулалö телевизор, веськыта угöлiсь пызан тыртöма радиоприёмникöн, тетраддезöн, учебниккезöн, газетаэзöн да журналлэзöн.

— Вот этадз мийö и оламö, — пызан дынас пуксикö баитiс Таисья Фёдоровна. — Дзескытöв жö невна, да мый керан. Надя да Вера быдмисö ни. Нылö бы торья комнатка колö, но одзжык эта йылiсь эгö думайтö, тэрмасим петны виль керкуас. — Сiя чöлыштiс да содтiс: — Но ась, поди, олам жö кыдзкö. Надяыс восьмöйын ни велöтчö, мöдыс — седьмöйын. Меным одзлань эз туй мунны, дак нiйö иньдöтамö. Отирыслöн тай институттэз кончайтöны, а мийö эд абу умöльжыкöсь. Вот только Люба школаас оз эшö ветлы. Квать год сылö.

Нылочка тэрмöтiс бабсö кисьтны бутылкаö квас, медбы босьтны сiйö сьöрас.

— И няньсö пукты, — дзульзис сiя, — поди, гортö дыр ог локтö. Таисья Фёдоровна гажöн, шоныта видзöтыштiс нылыс вылö, серöмтчис да висьталiс:

— Вот этадз пыр. Ыджытжыккес тожö отсасисö, но таво колхозас торйын ни уджалiсö. Мый аймамыс керöны, нiя сэтчö жö кыссьöны.

Тёсовой оградаын сулалö легковöй автомашина. Бур эта штука — шоччисикö позьö мунны, кытчö охота, кöть городö, кöть вöрö. Но хозяйкаыс сы йылiсь висьтасис мöднёж:

— Машинасö босьтiмö да гöняйтны некöр. Нельки эг и казяв, кыдз гожумыс чулалiс. Отирыс ягöд да малина ваялiсö, а меным сё некöр. Таво ноша турун эг керö мöсыс понда. Сё фермаас да фермаас. Обедайтны и то котöрöн мунан... Но, колö тэрмасьны, инькаэс, натьтö, видзчисьöны ни.

Хозяйка чеччис стул вылiсь, иньдöтчис вешалка дынö. Басöка гöрдззöм кофточка вевдöрö сiя пасьталiс халат и сувтыштiс ыбöс дынас — Люба одзалiс кайны порог вылö.

Öтöрас пöльтiс вына тöв, летiс пуэз вылiсь вежöтöм листтэсö. Полуянова оськалiс тöлыслö паныт. Тöвныр кадiсь кадö паськöтлiс сылiсь халат полаэсö, кушöтлiс цветтэза бытшöм платьесö, бытьтö мöдiс тöдны, мый новйö мортыс. И эта кадö думайтсис, что сiя мунö уджö кыдз праздникö, оз ни пасьтав медумöль паськöмсö. Сэтчин, фермаас, öнi благодать: подаыс кок увтын джодж, ваыс локтö быд кормушкаö, сотчö электричество. Фермаас ни Таисья Фёдоровна висьталiс:

— Эдö дивуйтчö, что кормушкаэс важöсь. Таво эзö ештö керны. Председательыс висьталiс, что нiйö бергöтасö шöрись коридорыс ладорö. Сэк пондас туйны подкормка ваялан тележканас пырны коридорас и öтмöдöрö сетавны сёянсö. Правленнёас эд тожö тöждiсьöны миян понда, миянлiсь уджсö кокньöтöм понда.

Уджыс механизируйтöма, но фермасис уджалiссеслö адззисьö мый керны, весь некöр овны. Босьтамö тавося гожумсö. Куим морт быдтiсö да вузалiсö государстволö триста юр. Ны понда ковсис эд ваявны вердассö. Кöть и подкормкасö ваялöны тракторöн, но öтiк вердiссес коласiсь кöть кöр ветлö трактористыскöт, медбы тележкаас тальны турунсö, унажык тöрöтны.

— Миян сiдз керсьö, — висьтасьö Таисья Фёдоровна, — асывнас сеталамö сёянсö и кыкыс кольччамö дозирайтны подасö. Не ыстыны кö мортсö ыб вылас, то рейссэс лоасö уна, а туруныс етша. Не кинöс-нибудь, а асьнымöс бöбöтамö. Абу интерес сiдз уджавны. Миянлö колöны привессэз, а нiя сiдз просто озö содö. А колö кö привес — пöттöдз верд подасö.

Яй вылö вердöм понда Выровскöй фермаын сетöны кык килограмм пятьсот грамм концентраттэз и пöттöдз ыб вылiсь зöра анькытшсора турун. Асывнас медодз сетöны подкормкасö, сэсся 10 час гöгöр вердöны концентраттэзöн, кык час бöртi содтöны кормушкаэзас турун, кöда оз бырсьывлы вит часöдз, кöр вились сетöны концентраттэз. Ой кежö бöра сёдöны небыт да пöтöса подкормкаöн.

— Инькаэс уджалöны дружнöя, — висьтасьö фермасис заведующöй Николай Яковлевич Фирсов, — озö дышöтчö, быдöс кужöмöн керöны. Бур меным ныкöт. Не весь эд баитöны, что бур отирыскöт бур и уджавны.

Бур отир... Ме уна ветлöтi колхознöй деревняэзöттяс и сё шочажык и шочажык кывла дыш морттэс йылiсь. Син одзын вежсьö да бурсялö оланыс, вежсьö и ачыс мортыс, сылöн сознаннёыс. Эта вылö позьö только радуйтчыны. Быд морт, кытöн бы сiя эз уджав, берегитö социалистическöй собственность, старайтчö содтыны народнöй добросö. Ны коласын достойнöй места занимайтö Таисья Фёдоровна Полуянова. Сылö только тридцать семь год. Не сэтшöм кузьö олансис туйсö мунiс, но керöма ни не етша. Кöр ме вовлi фермаас, сiя асывсяняс котöртiс мöдiк картаö, кытчö йöртiсö куканнесö тöв кежас. Кытшöвтiс подасö, видзöтiс быд кормушкаö — эм ли сэтчин туруныс. Кöдаын эз вöв, стена бердiсь чапкис рытся запас. Киськалöм турунсö тожö öктiс. Оз жö туй бур вердассö чапкыны назёмö. Кöть и уна нылöн туруныс, да эд сiя отир вынöн быдтöм, сэтчö уна кад öштöм. А сэсся сетiс подаыслö концентраттэз да котöртiс гожся площадка вылас, кытöн сулалiсö племеннöй пороззэс — нiйö лöсьöтöмась сетны мöдiк колхоззэзлö. А сэсся эшö öтiк да мöдiк, и казявтöг чулалö луныс.

Природа сетöма Полуяновалö ёся синнэз, кöдна адззöны и бурсö и умöльсö. Мукöд мортыс мунас боки и золотöй киа мастер дынöт, но и дзар оз кер сы вылö, а сiя казялас и аслас уджö бурсö пыртас. Кöр пондöтчис быдтыны куканнесö, то уна юасис да следитiс, кыдз да мый керöны пöрисьжык инькаэс. Ольга Николаевнаыс да Раиса Фёдоровнаыслöн вöлi ни опытыс, а сiя только велöтчис уджавны.

— Öтлаын уджавтöн, — баитiс Таисья Фёдоровна, — совестно кольччыны бöрланяс. Но овлö сiдз, что делоас быдсöн асьтö пуктан, пессян жö мыдзтöдз, а толкыс етша. Вот и колö юасьны да висьтасьны, если öтiк местас абу охота жöдзны.

Овлö и сiдз, что отирыс видзöтö эта недышöтчись морт вылö и оз ошкы, а осудитö: «Сылö мый, быдöннысся унажык ли мый ли колö?» А мыля бы и не сiдз? Этö жö бур черта миян современниклöн! Мортыс тэрмасьö одзлань, медбы унажык сетны страналö пользасö, сiя и ассис интерессэсö вунöтö, и только сэк öзйыштас чужöм вылас шынньöв, кöр казялас, что керöма уна, и ордчöн мунiссес довольнöйöсь.

— Вот, шуам, быдöс ни бы тöда, — Таисья Фёдоровна серöмтчыштiс да пондiс висьтасьны. — Боксянь видзöтан — и подасö вердны грамотаыс уна оз ков. Не, батя, уна эстöн колö тöдны. Подаыс эд не пес, сiя эд ловья, а ловьяыслö уна сякöйсö колö. Оз туй зоотехния да ветеринариятöг. Мöдiк животноводдэзлiсь колö тöдны опытсö. Ме вот пыр советуйтча специалисттэскöт и книжкаэсö лыддьöтыштла. Оланыс эд оз сулав öтiк местаын, а мортыслö колö оськавны оланыскöт.

Мортлöн öддьöн бур черта — оськавны кадыскöт ордчöн. Отасялöны возможносттез, лэбöны и требованнёэс. Эта пятилеткаö колхозниккес босьтiсö виль обязательство — вузавны государстволö эшö унажык чулалöм годдэзся йöв, яй, кольть, нянь да мöдiк продукттэз. Уна йылiсь баитöны деревняэзас этна луннэзö. Партиялöн XXIV съездыс осьтiс коммунистическöй строительствоас виль туйез. Но, кыдз мийö баитiмö одзжык, медбы мунны одзлань, колö видзöтыштлыны и бöрö кольöм туй вылö, медбы мöдпöв не керны ошибкаэсö.

Удивительнöй сёжö мортлöн натураыс. Аслас уджöн сiя быдсöн бергöтö производствосö, лэбтö сiйö, аслас вынöн вештö одзлань и оз баит гора кыввез. Талун эшö сьöкыт уджавны подаыс дын — эд механизируйтöма фермаас эшö не быд уджыс. Унажыксö колö керны киöн, но Таисья Фёдоровна эта йылiсь оз баит. Сiя веритö, что чулалас кад, и мортыс пондас только веськöтлыны машинаэзöн. Но кöр — талун или ашын сiдз лоас? А кытчöдз абу, то не киэз лэдзöмöн жö пукавны. И Полуянова мунö, кыдз солдат пост вылö, пыр öтiк кадö аслас питомеццез дынö. Мунö и шыннялö шондiыслö, югытыслö, шыннялö тöлыслö, если эм тöв, морозыслö, если öтöрас шваткöтö мороз. Мамыс мукöд кадас жалейтö:

— Пасьтась шонытжыка, простудитчан.

А сiя:

— Уджавтöнняс некöр кынмыны.

Шочыника сiя кывзывлö советсö, а унажыксö оз. Шогавны сiя оз пов, просто оз тöд, мый сiя сэтшöмыс. Öнi вильмоза видзöтö аслас удж вылö, кöдасянь сылö честьыс, кöдасянь почётыс. И керны охота эшö унажык. Отирлöн признаннёыс корö этö.