Мынтiсьтöн

Лунся жарыс тöдчöмöн чинiс, и му вылас лэдзчисис чуть тöдчана ыркыток, кöдö вайöтiс рытъяв кадыс. Нельки пöрись кыдзыс пондiс вöрöтыштлыны кузь чикиссесö, а листтэс öшалiсö öшын весьтас и сайöвтiсö керкуас пыран югöрсö. Вот и петiс пöрись кöзяйкаыс öтöрас да пуксис важ лабичок вылö, кöдö керлiс эшö жöникыс война вылас мунтöдз. Кöзяиныс пукавлiс сы вылын, шоччисис да куритыштлiс, а сы дынö öтлаасьлiсö и соседдэс. Кытчö лоис сiя кадыс? Öнi Лукерьяыс петас да касьтылö одзза олансö. Пöрисьмис вот, а челядьыс рознитчисö, öтнас кольччис, нем ни оз вермы керны. Юрас сё частожыка пыравлiс, кыдз пондас овны одзлань. Колхозыс пенсиясö сетö квать килограмм пизьöн, а сьöмыс колiс бы. То тай и картаыс киссьö, крышасö колö вежны. Постройкаэс важмöны, а кысь деньгасö. Кин сетас?

Босьтöм этна думаэзöн, Лукерьяыс пукалiс важ скамейка вылас юрсö öшöтöмöн, рожабансö кырымнас кутöмöн. Öткаса пöрись оланыс сылö мыччассис пемытöн да тупикаöн, кöднаись петанiныс эз тыдав.

— Мый, сваття, тöждiсян? — кылiс сiя бокас юасьöм. Старухаыс дзарнитiс кылöм шы вылас и казялiс Васька

Тюриковöс, кöда пöрисьöдз олiс, а сё серавлiс да шутитiс отирыс вылын.

— А-а, Василей, пуксьы бокам да баитыштамö, — ачыс вешшыштiс лабичок вылас, сетiс местасö пуксьыны.

Тюриковыс оськöвтiс сы дынö да пуксис ордчöн, чавкнитiс пиньтöм öмнас да мöдiс бы мыйкö горöтчыны, а кылыс öшис öмас.

— Мый шатласян, пöрись морт? — юалiс Лукерьяыс да видзöтыштiс соседыс ладорö, кöда жагöника кыскис кисетсö.

— Петi тай нöитчыштны. Мыйкö висьöтны пондiс. Погоддяыс, натьтö, вежсяс. Менам пыр сiдз овлö.

— Мича луннэс сулалыштiсö и — тырмас, колö и честь тöдны. Погоддяыс оз любит дыш мортсö.

— Сiя то сiдз, да кытчö ни тэрмасьны пöрись мортыслö, разь только вон креста деревняас.

— Кувны и овны колö думайтны. Пиннетö эд тув вылö он öшöт.

Тюриковыс керис чигаркасö да öзтiс и пыдына кыскис тшынсö, видзыштiс öмас да вöлись лэдзис, думайтыштiс невна да юалiс старухаыслiсь:

— А тэнö кытшöм тöждiсьöм кутiс?

— Быдкодь ересьыс юрам тай пырö, — сьöкыта ловзисис да макнитiс уялан тшынсö Лукерьяыс. — Бедьöн ветлöттöдз уджалi колхозас, а деньгаö вот абу, эг вермы заптыны. Нельки радиосö кывзöм понда немöн лоис мынтны.

— Öк-ка тэ боль, адззöмыт мый понда тöждiсьны, ― соседыс видзöтыштiс инькаыс вылö, эшö кыскис табак тшынсö да нёджжöвтiс улицасö, абу ли кинкö матын, да негорöна висьталiс: — картошкатö мыйлö жмотитан? Сёравно эд кольччас да сiсьмас, А почтасис начальникыс мынтöмсö примитö натураöн. Ведра-мöдсö кыскан сылö, он эд беднöйсяв? Вукöй морт и то гортас радиосö видзö.

— Вакрамеш бы тай сiйö, картошкасö, — Лукерьяыс тöдчöмöн повзьыштас, да чужöмыс югмыштiс, и кинас макнитiс да содтiс, — джоджулам пырны оз туй. Уна ли öтнам сёя? Мымда мöсыслö вундавла. Мыля жö не сетны, коли отирыс босьтöны? А радиотöг эг велав овны. Отирсис эд не быд юöрсö кылан, а сiя боткö лунтырöн, и эшö сьылöны басöка. Картошкасö ашын жö кайöта.

— Кайöт, но некинлö эн висьтась, а то одзаласö. А меным кад ни гортö мунны, то старухаыс öштас.

— Спасибо, Василей, что висьталiн.

Соседыс мыйкö бобгыштiс да мунiс. Лукерьяыс пукалыштiс да тожö пырис гортас. Сiя петалiс чуланö да босьтiс мешöк и куралiс сэтчö картошкасö. Мöд асылас котрасис йöв кыскалiсь Мишка дынö баитчыны и лöньсьöм сьöлöмöн бертiс бöр. И тракторыс чожа сувтiс сы öшын увтö. Мешöксö чапкисö тележка вылас, и мöдöтчöм Лукерьяыс кайис тожö сэтчö. Сылöн сьöлöмыс тырис гажöн и эз казяв, кöр мунiсö вит километрасö. Трактористыс сувтöтiс телегасö почтаас пыран ыбöс одзас да кабинасяняс горöтiс:

— Лукерья! Сунасьны эд некор, тэрмась. Йöлыс вермас шöммыны.

— Сулалышт, ме часöт лэдза мешöксö.

Лукерьяыс тойыштiс мешöксö посöдзас и жагöника лэдзчис кузовсис, но сэк жö эз пырт контораас. Сылöн чужöмыс шыннялiс, вöлi гажа, что вайис картошкасö, и некин оз тöд. Кытöн жö öшлiсян вессэс? Видзöтыштiс ас гöгöрсö, но эз казяв. Сыбöрын жагöника пырис да локтiс кассирыс дынö и гусьöника юалiс:

— Тiян кытöн öшлiсьöны?

— Лэдзчö улiсь этажас, — висьталiс кассирыс. — Сэтчин посылкаэсö примитöны. Начальникыс кабинет бокын.

— Спасибо, енöн сетöм нылокиньöй, ужö ветла сэтчин. Нывкаыс дивуйтчöмöн серöмтчис, а Лукерьяыс бергöтчис да оськöвтiс ыбöсланяс. Сiя лэдзчис лисничсö да пырис посылочнöяс, сьöрас кыскис и мешöксö.

— Ноко мыччалö, кытöн вессэзныт, — юалiс томыник нывкалiсь.

— Мыйлö тiянлö? — шыасис нывкаыс.

— Господи, бытьтö одö тöдö. Первöй лун ли мый ли уджалан? Картошкасö эд колö öшлыны. Кöть и тырмас менам, а öшлытöг оз туй. Радиоыс понда колö мынтны. Начальникыс эм жö местаас?

— Начальникыс то местаас да мыйлö сiйö?

— Кин сысся примитас картошкасö?

— Татöн эд не гу и не примитан места.

— Дак эд висьталiсö, что начальникыс примитö радиосö кывзöм понда. Вот ме и вайи. Колхозникыс кысь ваяс деньгасö? А картошкаыс таво шогмис. Кытöн начальникыс?

Неыджыт мыгöра, пельпоннэзас паськыт да шадра чужöма начальникыс петiс кабинетсис да сувтiс бокö и кывзiс, мый баитöны посылочнöяс. Лукерьяыс дзарнитiс бöрас да горзöмви лоöм шыöн горöтчис:

— Пöриссесö мыля бöбöтлан, начальник?

— Почтаыс эд не заготконтора, бабушка, — спокойнöя висьталiс начальникыс. — Мийö картошкасö огö заптö. Или жö насмех мöдатö лэбтыны? Почтаыс не сы понда.

— Кинлöкö, поди, колö сералöм, а менчим сьöлöмöс кырлалö.

— Но дак кин жö тшöктiс или висьталiс?

— Кин кыдз не аслам соседö, Кирив Васькаыс, Понкулисьöн эшö шуöны. Сылöн эта советыс. Ме сiйö, нечистöй дукöс, гортын кута да тошсö öтiк тылöпокöн лета. Ась тöдас, кыдз пöрись мортыс вылын кешитчыны. Пöрись морт, а мывкыдыс дзик челядьлöн.

— Да-а, орсыштiсö тэ вылын, бабуся, — шынньöвтiс начальникыс. — Меным жаль тэнö, пöрись мортöс. Картошкатö бöр эн ни нуöт, ме неба, но мöдiккэзлö висьтав, что почтаыс сiйöн оз занимайтчы.

— Спасибо тэныт, начальник. Ась еныс сетас здоровьетö...

ПИСЬМО

Рядовöй солдат Тимофей Сапыркин неважын ештiс локны штабись и сэтöн жö пуксис гижöт бердö, кöда понда тетрадь шöрись нетшкöвтiс лист, босьтiс лöчыта йывдöм карандаш да пуксис пызан сайö и пондiс думайтны, кыдз, кытшöм кыввезсянь пондöтны инькаыслö гижöтсö. Деревняас олiкö да вöлöн уджалiкö сiя эз велав сьöлöм бурмöтан кыввес дынö, баснисö йитöм понда каттьывлiс крепыт матюксö, енсö, лешаксö, попсö и попадьясö, а гижöтас вот тшöктiсö адззыны сэтшöм кыввез, кöдна бы малыштiсö, шонтiсö, небыта вöрзьöтiсö иньыслiсь тöждiсян сьöлöмсö, тшöктiсö бы думайтны только сы йылiсь, эзö бы лэдзö нёджжавны мöдiккез вылö. Тима дыркодь пукалiс тшöкасö кырымнас пыкöмöн и мырсис адззыны басöк кыввесö, но тöдвылас усисö только нiя луннэс, кöр аслас наука сьöртi велöтлiс Парассясö шупытжыка бергавны гор одзас, медбы сылöн дубасыс лэбалiс бордпавйöн. Сы думайтöм сьöртi петiс, — что инькаыслö колö не басöк кыв, а мужикыслöн вын, кöда одзын и пикнитны эн лысьт.

Но кадыс лоис мöдiк. Кытшöмкö гад пондöтiс войнасö, и сылö, Тимаыслö, колiс лöсьöтчыны фронт вылö. Кин тöдас, кöр сiя бертас гортас? Значит, колö гижны, кыдз висьталiсö. Тима босьтiс пуктöм карандашсö, дульнас кöтöтiс йывсö да пондöтiс: «Здорово, Парасся! Ыста тэныт пымö, кыдз пизян ва, öгралан, кыдз бипур, ассим привет!»

«Ноко сулав, дяв увтырись морт, — думайтыштiс ачыс. — Кытшöм öгралан? Мый тэ сябьян? Вöлiн бы гортын, дак öгралiн, натьтö, бы небыт местаэсö». Тима видзöтiс-керис чорыт кулак вылас да гажтöма серöмтчис: кырым вылас сё эшö тöдчисö косьмöм гаддес, кöдна кольччисö гортсяняс черöн уджалöм бöрсянь. Тöдвылас уськöтiс, кыдз мужиккескöт тшуплiс виль керкуэз, гöрлiс да кöдзлiс сюсö, дзимлявлiс няньсö, а кресенняэзнас ветлöтiс посадöттяс да ювлiс шöма брагаэсö. А татöн мый? Только чаёкöн юкталöны. Васö эд кöть мымда польскы, а толкыс мый? Вынокыт оз сод. Тшöктöны велöтны пушкаэз, нiя пö войнаыслöн ен. Вермас лоны кинлöнкö, но только не крестьяниныслöн. Век бы тай войнаыс эз вöв, сытöг бур овны. Но керны нем и гаддэскöт колö пессьыны. Тимаыс гырчикнитiс пиннезнас.

«...Дак вот, — гижис сiя одзлань, — сет месянь поклонсö пöрисьжык вонöлö, Петралö, Коль Трöпимлö да Гришкаыслö, мельник Ёгорыслö. Öтлаын эд уджалiмö. Ен сетас, дак, поди, эшö пантасямö. А эшö, эн жалейт косоктö, мышкыртчы муöдз Кань Чирей Мавраыслö. Бур сiя мортыс, ась дыр и дыр эшö олас. Ачыт эд тöдан, кыдз сiя германскöй война бöрас кольччис дöваöн да куим нылöс быдтiс и Петрушасö кок йылас сувтöтiс. Сылiсь пуöм раккесö ме бы часöт вильöтыштi. Ежели вöлi гортын, ветлi бы и чериавны. Ох, Парасся, кытшöм эд гажтöм! Пушкаэзнас лыйсям, а сэсся колö «банникöн» уджавны. Этö тэныт не баняö ветлыны да шольöтчыны. Пушкаыслiсь самöм гырксö весöтамö. Свиттявтöдз керамö, медбы командирыслö гленитчис, а то очередьтöг наряд вермас кышавны. Татöн эд дисциплина. Вöлi бы гортын, дак велöтi тэнö, кыдз солдатöс, öтiк половица вылöт ветлöтны. Ойсö ог узь, да сё тэ йылiсь думайта, кыдз олан да мый керан. А картошкатö таво мымда керин? Баляэсö колин жö тöв кежас? Порсьсö даки видзны оз ков — сы понда колö налог мынтыны. Да лэчыт черöс эн ляз — сiя эшö ковсяс. Дольнöй пиласö вöскас лэбты, медбы эз сiм. А фуганоксö да стружсö пукты полатяс. Щёголёкыс ась сэтчин жö лоас. Вежöртiн, Парасся? Ме чожа локта бöр. Или жö моросö лоас орденнэзöн, или жö юрöс пукта Родинаö понда! Он кö кер, мый гижи, сэк юала тэнчит, кыдз менö видзчисин. Ола не тёща ордын, виа блиннас озö вердö. Чожа, натьтö, фронт вылö ыстасö — фашисттэс Москва дынас локтöмась. Пушкасö велöтны сiдз-то абу сьöкыт, да вот тшöктöны ать-два сьöртi ветлöтны, кынöм вылам кыскасьны. А нятьöсьмöм гимнастеркаöс кин миськалас? Конешно, ачым. Вот кытшöм лоис менам оланыс. Быд делосö котöрöн колö керны».

«Не унаöв ли пондi лёбны? — точкасö сувтöтöм бöрын думайтыштiс Тимаыс да гыжьялыштiс юрбöрсö. — Колiс ли быдöс эта йылiсь гижны? Кадыс эд военнöй. Но и ась, мый лоны дак лоас. Ась и Парассяыс тöдас».

«Дак вот, — содтiс сiя гижöтас, — талун корлiсö полковöй штабö. Этö сы бöрын, кöр меным стройыс одзын благодарность висьталiсö бура лыйсьöмыс понда. Повзьыштi, кытшöм мыся, налькйö эшö шедi? Татöн эд кыдз кага сьöрын видзöтöны, медбы некытчö эн как. Видзчисьтöг корисö. Кытöн, думайта, не сiдз оськöвтi? Полöм петö мунны. Сьöлöм кыдз баля бöж треситчö. И тöдвылам усис, кыдз обедöдззас взводнöйыскöт невна споритыштi. Веськыта висьтала — нем понда. Вот, думайта, проктöм враг, мывкыдыс мöдiклаö оз тырмы, дак сiя норасьö. Училищеас начальникыс — не Марьявуж председательыс, каракулись папаха новйö, машинаöн, а не Саватейыслöн умöлик кöбылаöн, ветлö. Сапоггес хромись вурöмöсь — тэнат синнэзся буржыка свиттялöны. Вот сы дынö и корисö. Менам кöть и сапоггезö кирзаись, мунтöнняс сайöвтчи да эшö öтпыр шинель дорнас чышкыштi буссö. Татöн ромозь пöлöссö озö любитö, наказывайтöны. Не весись эд сiйö шуамö батяöн. Кöть и не Назар, но покойнöй айöс вежö. Дак вот, муна и тöждiся, пола. Батяыс одзын он ывсöтчы и он висьтав, что не сiдз. Колö только кывзыны. Вежöртан тэ, он, а штабсис ыбöс вугсö эг адззы, киö сюксьö. Ачыт эд тöдан кытшöм гортын вöвлi, а эстöн öши. Вежсьö мортыс, вежсьö. Одззася Тимка — сьöд детинкасис нем эз кольччы. Лои кыдз балалайкалöн зэлöтöм струна. Ештi пырны штабас, а дежурнöй офицерыс видзчисьö ни менö. Давай-ко, шуö, Сапыркин, зэлöтчышт, дзимляв чукырретö кынöм весьтсит да юртö вылöжык лэбты, ло кыдз масiсь. Бергöтыштiс менö одзас, донсьöтöмöн видзöтыштiс, лöсьöтыштiс погонöс да висьталiс: «Тэнö тшöктiс корны военнöй округлöн штабсис полковникыс. Перво аслат начальниклiсь юась, а сыбöрын вöлись сы дынö мун. Быдöс кер устав сьöртi, асьтö эн срамит».

Вот кытшöм историяыс петiс. Пыри кабинетас да киöс лэбтыштi пель дынам и мöда бы висьтавны, что приказ сьöртi локтi, но öмам кылö лоис кыдз тувдöм, нем ог вермы висьтавны. Видзöта полковникыс вылö, и бытьтö чужöмыс тöдса. Шыася бы, да ог вермы. Гöрдöтi, кыдз пуöм рак, синнэзö паськалiсö. Кералi бы кылöс, да немöн. А тöдтöм полковникыс и шуö:

— Оз ков, Тимофей Назарыч, докладывайтны. Буржык лоас, кöр киасямö, — локтiс ме дынö да кисö сетö.

Ме, дурак, шульга киöс сета, а веськытöс кöсича дынам видза. Рожабаннэзöттям ва лэдзчö. Полковникыс серöмтчыштiс да и баитö:

— Лöньсьы, да лок матöжыка, баитыштамö, висьтасян, кыдз гортын олöны.

Едрёна тэ мать! Да эта жö Мавраыслöн Петраыс! — вöлiсь кыдз онiсь сайми. — Здорово, мыся, Пётр Иванович!

Вот тэныт и строшнöй Петрусь. Казялiн бы, дак öмтö паськöтiн.

И, юасис сiя, кыдз овсьö гортын, да кин колхозас председательнас уджалö. Нельки Кöчка Васькасö абу вунöтöма и тöдвылас öнöдз сылöн сьöд керкуыс. Пöрись морттэсö быдöс тöдö, и ны йылiсь тшöктiс висьтасьны. Сылö бы, шуö, гортö колö ветлыны да войнаыс мешайтö. Москвасяняс татöн уджалö. Баитiмö, кыдз кык важся сосед. Интересуйтчис, кыдз служита. Поди, сьöкыт, шуö, военнöй наукаыс? Велöтчыны, мыся, не зырöн му чапкавны. Ме, мыся, колхозас мешöккез бергöтлi да вöрын уджавлi. Юалiс, и кыдз вердöны. Татöн, мыся, бöрйисьны озö сетö — мый лöсьöтасö, сiйö и сёян. Солдатыслö оз лöсяв норасьны. Дыр и дыр баитiмö. Менам жö юрам öтiк дума каттисис, да висьтавны эг лысьт. Тэ эд, Парасся, тöдан, кыдз миян овлö, кöр кык мужик пантасясö. А сылöн шкаликыс и тöдвылас абу. Сетсисö тэныт, думайта, кузнец Коляыс да Митиперыс, Сеня Егорыс да хуторянин Мишкаыс. Вот керыштiмö бы гультымсö, сэк и басниыс бы лöсялiс. Менам чисто кымöсö вазис, кавтыкö косьмис. Ну да на пондi шувлыны. Эта бöрын то не то менö нуöтiс столовöйö, да не сiяö, кытöн мийö сёйламö, а кöдаын офицеррес обедайтöны. Бытшöм официанточка ваялö сёянсö. Мыйыс только сэтöн эз вöв! Но яйсö даки абу ештöмась пуны, а луксорнас проволока вылö кышалöмась да жаритöмась. Не сiдз, кыдз отирас лöсьöтöны. Но ме даки акляли-сёйи. Солдатлö кысь сэсся вайны? Кöр ме пöттöдззам кынöмöс тöбалi ни, вöлись пызан вылас вайисö свиттялан голюкöн винасö. Синнэзö пондiсö öгравны: мöдöны жö, думайта, юктавны. Винасö стаканас кисьтöны, а сiя пизьö. Перво пешлыштi, дак веритан он, сiя шöма квас кöра. Но раз начальниккес юöны, то и ме пичкиси да юи...»

Тима эз гиж сы йылiсь, кыдз полковникыс видiс сiйö, мыля шоча гижö инькаыслö, что сiя гажтöмсяняс вермас бокö тальччыны, а сэсся мöдiкöс адззыны.

«Былись эд сiя вермас шогмыны, — казармаас койка вылын куйлiкас думайтiс Сапыркиныс, — Парассяыс том да бытшöм вывтыра и пизян вира. Вермас и сiйö керны. Мый тэ сылiсь босьтан?»

«...Дак вот, аслам Парасся, — петкöтiс гижöт вылас Тимаыс, — кöть и сьöкыт, но овны колö, бытшöмжыка и честнöя. Оз ков чепсасьны. Вежöртiн, Парасся? Он кö вежöрт, да пондан вельмавны мужиккезкöт, дак сiдз и тöд — бурсö он адззыв. Тöдан мый керис Дзелёв Гришкаыс каньыскöт, кöда лонтiсян печка вылiсь чугунсис яй кусöксö гусявлiс? Бöбалiсь каньыслöн местаыс только муын. Он кывзы, дак сiя жö лоас. Назар Тимаыс шутитны оз любит. Видз этö тöдвылат».

Тима сувтöтiс точка да кулакнас сiдз сöтiс пызан кузяс, что и тетрадьыс чеччöвтiс. Ась и ылынiнсянь, но порядоксö колö видзны. Ась тöдас кинлöн сiя инькаыс! А то тшöктöны лю-би-тöм йылiсь гижны. Инькаыслö аслыс колö тöдны, кинлöн сiя, кöда сайö мунiс. Вирвужьясö оз я ков? «Любитi бы тэнö, Парасся, — лöгувьяс думайтыштiс Тимаыс, — то вот этöн да небыт местаэтö».

Тимаыс видзöтiс аслас жмитöм кулак вылö.