Велöтчись

Анна Петровна уджалiс районас магазинын и лыддиссис бур вузасисьöн. Сiйö пыр ошкисö и быд совещаннё вылын премируйтлiсö да пуктiсö пример туйö. Магазиныс вöлi неыджыт, но тöрöтiс пытшкас быдкодь товарсö. Вöлiсö сэтöн и вурöм платьеэз, и пальтоэз, шёлк да мöдiк материаллэз, а духиэз да одеколоннэз и сякöй поснит товарыс сулалiсö унася-уна колана полка вылын. Кыдз только тöдiс Анна Петровнаыс и вермис сетны небсисьыслö колана товарсö?

— Ме жö ачым тэча, кытчö колö, — баитiс сiя вузасиссес коласын. — Быд торокыслö колö места. Вот и лöсьöта топытжыка, медбы тöрöтны унажык. Небсисьыслö колö сетны быдöс, мый бы мöдiс небны.

Анна Петровнаыс уджалiс не öтiк год ни, тöдiс отирсö, кöда пыравлö магазинас, и мый юасьлöны. Сы сьöртi и сетавлiс заявкаэсö, кытшöм товар колö вайны. И сылö ваялiсö. Сылiсь уджсö донсьöтiсö и планысся унажык керöм выручкаыс понда вештывлiсö прогрессивка. Быдöс мунiс бура и некöр эз вöв нетырмöмыс.

Öтпыр корис сiйö ас дынас райпотребсоюзсис председательыс, кöда дынын пукалiс том да бытшöм нылочка, недыр баитыштiс удж йылiсь да висьталiс:

— Дак вот мыйлö тэнö кори. Миян дынö ыстöмась практика вылö вот этö нывкасö, — сiя качыкнитiс бокын пукалiсьыс вылö. — Велöтчö торгово-кооперативнöй училищеын. Пондан велöтны, кыдз колö уджавны.

— Кытшöм ме велöтiсь? — Анна Петровнаыс гöрдöтыштiс и ачыс повзьыштiс. — Менам только сизим класс. Только и эм, что мывкыднам босьта. Менö эд некин эз велöт.

— Кин дынö сэк тшöктан ыстыны? — серöмтчис председательыс. — Ны дынö, кöдна шаляй-валяй уджалöны? Тэ сьöртi сiдз петö. Дак вот, велöт том мортсö культурнöя вузасьны, верит сылö, кыдз аслыт. Вермас лоны, и öтлаын пондатö уджавны.

Нылочкаыс вöлi бытшöм чужöма, неыджыт, голубöй синнэза и нельки, кöр шыннялыштлiс, öм доррезас петавлiсö неыджыт ямкаоккез. Паськалöм пальто увтас тыдалiсö кофтасö зэлöтöм мороссэз. Ладьбейес вöлiсö тыраöсь и дзескыта зэлöтiсö юбкасö. Аннаыслö гленитчис эта нывкаыс и сiя висьталiс:

— Раз тшöктатö, то ась велöтчас. Вузасьны эд не сiдз просто. Магазинас эд овлö не сiдз, кыдз велöтöны книгаэс сьöртi.

Магазинас мунiкö нiя тöдсасисö. Нывкасö шуисö Иринаöн. Висьтасис невна ас йывсис. Быдмис посад дынсис неылiсь деревняын, велöтчис Юсьваас, и öнi вот кооперативнöй училищеас. Аймамыс олöны посад дынiсь деревняас, и неумöля.

— Ме нылöн öтнам и быдтiсö нежитöмöн, — шуис сэсся нывкаыс, — сiйöн и мöдöрö эг вермы мунны. Но ась, вузасисяс тожö неумöль, товарыс пыр син одзат мымда колö.

— Товарыс то уна, да не аслат, — висьталiс Анна Петровнаыс. — Деньгатöг он босьт. Отвечайтны сы понда колö. Но вот и локтiмö. Эта магазиныс менам кипод увтын.

Кöр нiя пырисö магазинас, нывкаытлöн синнэс баралiсö: полкаэс чегласисö быдкодь товар увтас.

— И быдлiсь колö тöдны донсö? — юалiс сiя вузасисьыслiсь.

— А кыдз жö, — шыасис Анна Петровнаыс. — Сы понда и сетöма юрыс, медбы асьтö не бöбöтны и босьтасисьсö. Неважын вот керисö ревизия, и этикеткаэсö быдöс вильсьöтiмö, бура тöдчöны.

— Нем он шу, магазиныс сöстöм, быдлаын порядок.

— Культурнöя колö вузасьны.

— Сiйö жö велöтiмö училищеас.

— Вот и велöтчы, кыдз сiя петö практика вылас.

Нывкаыс вöлi кытшöмкö некужись. Сiя эз куж тэчны товарсö, мый босьтлас киас — чапкас кытчö шедас, а сыбöрын кошшö. Анна Петровнаыс простöй инька сьöлöмсянь видлiс сiйö да терпитöмöн висьтавлiс, кыдз колö товарнас бергавны.

— А öнi öтнат уджалышт, — висьталiс медбöрын Анна Петровнаыс. — Менам колö ветлыны контораас сетны отчётсö. Бура вузась, эн дзарьяв öтмöдöрö.

Магазинас практиканткаыс кольччис öтнас и пондiс чувствуйтны асьсö кöзяйкаöн быдöс эта богатство вылын. «А мый, ежели невна чинтыштны эстiсь, то нем оз ло, оз и казяв Петровнаыс, — думайтiс сiя ас пондасис. — Ме татöн дырсö ог ло, а сэтчин и вунöтсяс. Платьеэс бытшöмöсь и кофтаэс серöтöмöсь. Кыдз бы этö керны?»

Но эта кадö пырис Анна Петровнаыс, и думайтöмыс нывкаыслöн дзугсис, но юрсис эз пет. Мöд лунас сiя локтiс уджавны сумочкаöн, кöда вöлi тырмöмöн паськыт, сэтшöммесö новйöтiсö пельпон выланыс. А рытнас магазинсис нуöтiс басöк да дона кофта. Торйöтчытöнняс чöскыта шынньöвтiс Анна Петровнаыслö. Эта бöрын сiя пыр вовлiс магазинас сумканас. Кöр Иринаыс кончитiс практикасö, Анна Петровнаыс тшöктiс керны виль ревизия. Мало ли, мый петас. Кыдз-некыдз, а не öтнас уджалiс, тöдтöм морткöт. Тшöктiс керны, медбы не сомневайтчыны. И керисö. Товарыс эз тырмы чуть ли не девятьсот руб вылö. Анна Петровнаыс эз вермы дивуйтчыны, кытчö лоис товарыс. Сiя повзис, öшис, синнэс баралiсö и аслыс эз адззы местасö, петiсö синваэс.

— Висьтав, Ирина, честнöя ли тэ уджалiн? — юалiс сiя нывкаыслiсь.

— Ме нем эг вöрöт, — синнэсö дзебöмöн шыасис Иринаыс.

Но пöрись мортлö эз гленитчы сылöн очакылыс, и сiя решитiс ветлыны гортас да проверитны, былись ли эта сiдз. Колiс бы сьöрас босьтны правоохранительнöй отделiсь мортöс, но думайтны вöлi некöр, и сiя мунiс деревняас öтнас. Некинлö эз висьтась. Нывкаыслöн вöлi гортас только мамыс. Анна Петровнаыс порогсянь тшöктiс осьтны комодсö, и инькаыс осьтiс. Вузасисьыс сэтöн жö казялiс ассис товарсö. Сiя котöртiс вöв видзан карта вылö, кытчö öксьывлiс отирыс, да пондiс корны инькаэсö ветлыны Яшка Проньыс ордö и лоны свидетельöн.

— Ме вексö эг вöвлы свидетеляс, — шуис öтiк инька.

— И ме тожö, — шыасис мöдiк.

— Тэ председательсö адззы, — советсö сетiс куимöтыс. — Сiя депутат. Отсалас тiянлö. А мийö мый вежöртамö?

Вузасисьыс котрасьöв-керис деревняöттяс, но адззис и председательсö. Кыкöн нiя эшö öтпыр видзöтiсö товарресö да гижисö список, и Анна Петровнаыс босьтiс сьöрас виль платье и горзытöн петiс керкусис да жагöника мунiс деревня саяс. Тöдчис ни рытъяв кад, и додьöн мунан туйсö инькаыс öштiс. Кöдзытыс пондiс пырны паськöм увтас, киэсö чеплялiс. Эшö öддьöнжык кутiс обидаыс да чепöльтiс сьöлöмсö, и нельки синваыс кынмис рожабанас. Кыдзкö локтiс сэтчö мужичок дровни додьöн и тöдiс инькасö.

— Кытчö иньдöтчин, Анна Петровна? — юалiс сiя да видзöтiс горзöм рожа вылас, кытöн тöдчисö кынмöм йы жолёккез.

— Да вот, тыдалö, öши эд.

— Не сiя туй вылöт мунан, этiя вöрас нуöтö.

— Ме нем ни ог тöд, юрö бергöтчис, — и пондiс висьтасьны, кыдз шедiс деревняас да мый сэтчин керис. — Öнi вот муна и ог тöд, кытöн кежи эта туй вылö.

— О-о, да тэ шедiн бы вöрас, — шуис мужикыс. — Вот кытшöм петiс бы оказияыс. Ойнас вöрын и туйсö он тöд. Бур, что пантасин. Чожа локтамö посадас.

Анна Петровнаыс локтiс гортас дзирс пемытöн и только ашынас мунiс прокурорыс дынö, кöдiя сэкжö примитiс важын ни тöдса вузасисьсö, а сэсся дыркодь думайтiс юрсö öшöтöмöн.

— Ме эд видзчися, мый висьталатö, — шыасис Анна Петровнаыс.

— Петö сiдз, — горöтчис прокурорыс, — что и тэ законсö дзугин. Колiс жö милицияись кинöскö босьтны, и сiя бы быдöс этö керис.

— А гусясисьыс законсö эз дзуг? Значит, вермас магазинсö быдöс грабитны? Значит, сы понда меным колас мунны тюрьмаас?

— Но вежöрт, что кошшисьöмыс понда колö санкция, — висьталiс прокурорыс да веськöтчис. — Часöт мунö милицияö, а сэтчин висьталасö, мый керны.

— Прокурор эшö шусян, — бобгыштiс Анна Петровнаыс чеччикас. — Мыйлö нö сэк прокуратураыс?

— Миян функцияэс мöдiкöсь.

Милицияас сiйö ыстiсö ОБХСС-ö, кытöн пукалiс не том ни мужик, и сылö бöра ковсис висьтасьны ассис злоключеннёэсö. Но сэтчинiсь уджалiсьыс вниманнёöн кывзiс Анна Петровнаыслiсь баснисö и медбöрын висьталiс: — Видзчисьышт невна коридорас, ветламö, огö бокö кольö. Ме часöт пырала начальникыс дынö. Сылiсь колö юасьны.

А Иринаыс казялiс, что делоыс сылöн умöль, и мунiс городас, веськыта висьтавны, пышшис. Потребсоюзсис председательыс только киэсö паськöтлiс да боккесö клопöтiс. Сiя ветлöтiс кабинетöттяс и аскöттяс баитiс:

— Вот и верит томмеслö. Видзöтны, нывкаыс бытшöм, а мывкыдыс мöдöрö кöстöма. Характеристикаас колас гижны, кыдз сiя уджалiс практика вылас. А синнэзыс... лешакыс бы сiйö босьтiс, сiдз и лыйлöны. Вöлi бы томжык, дак...

АЙ

Маланья жагöника лэбтiсис постелля вывсис, пыкöтасис гырдззаэзнас да видзöтыштiс бокас пукалiсь нылыс чужöмбанö, а сыбöрын синнэзнас малыштiс керкусö и лöня, чуть вежöртана шыöн висьталiс:

— Вот менам и овсис. Простит менö, нылöй. Уна ни тэныт кери тöждiсьöмсö. Да мый керан? Шогöтыс миянлiсь оз юась. А öнi вот лоис кокнитжык, лич лэдзыштiс, и висьтала тэныт. Кöть айыт и нероднöй, кывзы сiйö, эн мугсьы. Хозяйствоыс тэнат киэз вылö кольччö. Сьöкыт лоас, но кокнита некин оз ов. Тэ эд невеста ни лоин. Ов бытшöмика, эн вольничайт. Шебрав менö, каттьы. Ме кыла, кыдз коккезö сайкалöны, шонытыс эз ло.

Мамыс нюжöтчис да кунис синнэсö, киэсö тэчис морос вылас. Керкуас лоис сэтшöм лöнь, что кылiс гутыслöн лэбзьöмыс. Нылыс, Дусяыс, чирöстiс да пондiс причитайтны. Эта кадö öтöрсяняс, пырис айыс да сувтiс порог дорас и юасьтöг вежöртiс, мый лоис. Сiя лöня локтiс кулöмыс дынö да пуксис юр дынас. Мужикыслöн шытöг петiсö синваэс. Кöть ачыс и тöдiс, видзчисис, что локтас эта часыс, но эз думайт, что сэтшöм чожа. Пукалыштiс невна, но чеччис бöр и локтiс нылыс дынö да кутiс пельпоннэзöттяс: «Ноко öвсьы, Дуся, мый лоис дак, он ни бергöт. Колö думайтны, мый керны. Медодз мамтö колö нуöтны енугöлас, а сэсся корны старухаэсö да миссьöтны».

Юöрыс чардбиöн кытшöвтiс деревнясö, и быд конецись пондiсö кыссьыны Микаль Лёнькаыс керку дынö пöрисьыс и томыс. Быдöнныслö вöлi жаль том инькасö, кöда уджалiс öтлаын и некöр эз кольччы бöрас. Пöриссес судитiсö-рядитiсö да тшöктiсö Вавил Олёшикаöс кольччыны да миссьöтны покойницасö, кöда эшö ловьянас вöлi лöсьöтöма кулiк кежас сöстöм паськöмсö. Дусяыс, кöть вöлi личкöма тöждiсьöмнас, дугдывтöг горзiс, вынтöг ваялiс быдöс, мый корис Олёшикаыс. Вöвлöм эта делоын морт, сiя тшöктiс лöсьöтны ваöн кашник да небытик трепич, а ачыс чöвтiс покойницасö да дивуйтчис, мыля инькаыс лоöма сэтшöм кокнит.

— Сiя жö нем эз сёй медбöрья кадас, — висьталiс нылыс. — Только ва корлiс юны. Менам пö гыркö сотчö.

— Тыдалö, сёяныс лолыслö эз ни ков, — содтiс миссьöтiсьыс. — Мортыслöн тырис нормаыс. Миян сiдз вот овлö.

Эта жö кадö Леонидыс адззис кык старикöс, кöдна кутчисисö керны гроб. Рыт кежас кöзяйкасö водтöтiсö аслас местаö. Сiя куйлiс лöня, кыдз бытьтö узис. Только куимöт лун кежас вывтырыс, пондiс пятакöн лöзöтны. Видзны сэсся эз туй, колiс дзебны. И дзебсян обрядсö керисö быдöс сiдз, кыдз овлö отирас. Керкуас стряпайтiсьнас лоис Евдокияыс. Сiя кывзiс, мый висьталiсö пöриссес, и öкмысöт лунас касьтылiсö мамсö. Кольччис эшö видзчисьны кыкдасöт да нёльдасöт лунсö...

И нывкаыс пондiс повны, нельки ачыс оз тöд мыйсянь. Керкуыс лоис гажтöм, öтнас эз лысьт кольччыны. Мыйкö шватнитас стенаас, и сiя думайтö, что этö мамыс явитчö. Öтпыр кайыштiс гöбечас да дзарнитiс аслас ольпась вылö, кöда вöлi полатяс, а сэтчин куйлö мамыс. И гор дынас пыр быкышасьö, залавканас гольöтö. Подаыс дынö öтнас эз понды петны — айсö сьöрас корис, а ойнас полiс торйö водны. Мый лоис нывкаыскöт? Некин эз вермы тöдны. Сiя пондiс вайöтлыны гортас деревнясис нывкаэсö, медбы нiя узисö.

Айыс пондiс думайтны, кытчöдз эта вермас вайöтны. Кöзяиныс сiдз бергöтлiс и этадз: озö тырмö только зонкаэс, кöдна бы вовлiсö нывкаэс сьöрö. Мый жö сэк керны? Нем эз адззы. И кыдзкö рытъявнас сiя кыскис бутылка вина да джыннялiс и нывсö корис öтлаö пуксьыны пызан саяс. Дусяыс эз мöд бы юны.

— Эта зеллёыс медбур лекарство, — висьталiс сылö айыс. — Чарöт стопкасö и быдöс вунöтан. Узьны пондан крепытжыка. Миянлö эд некин оз мешайт, юышт, стряпка менам, да мамтö касьтыв. Ась муыс сылö лоас пухöн.

— Дак ме жö кодзза...

— Ась, еныс проститас. Тэ эд ыджыт ни лоин и колö тöдны вина кöрсö. Уж сiдз миян ним вылö гижöма.

Нывкаыс кезöтчис, но юис. Минута-мöд бöртi сылöн рожабаннэс öзйыштiсö да гöрдöтiсö, моросас лоис шоныт, сьöлöмас сидзис вежöрттöм гаж. Айыс тшöктiс сёйны, но сiя эз бы мöд. А одзас сулалiс ни мöдпырись тыртöм стопкаыс, кöда вöлi юöма думайттöг. Недыр пукалöм бöрын горöтчис:

— Вот эд и кодззи... Öнi вода узьны...

— Полатьыс паськыт, местаыс тырмас, — висьталiс айыс. Нывкаыс дзуглясьöмöн мунiс западня дынас да кыдзкö эд вермис кайны ольпась дынöдззас и валитчис сэтчö. Ланьтiс сiя сэк жö, но узис неспокойнöя: бергалiс, чужьясис да мыйкö аслыс баитiс-бобошитiс. Леонидыс гажтöма пукалiс пызан саяс, думайтiс аслас öткаса олан йылiсь да эшö юыштiс стопка. Алкогольыс жагвыв кайис юрас. Синнэс пондöтчисö люммыны. Бутылка пыдöсас кольччöм винаыс пондiс тыдавны гудыртчöмöн. Сiя сувтöтiс посудасö енугöлас. А оныс паськöтiс öмсö. Кöзяиныс жагöника кайис полать дорас и казялiс нывкасö, кöда вöлi кушöтчöма да киэсö чапкалöма öтмöдöрö. Мужикыслöн вирыс брызнитiс рожаас, пондiс пизьны быд сöнас, асьсö кутiс дрöж. Ачыс оз тöд, кыдз сiя лоис нывкаыс бокын, шамыртiс сiйö ас увтас. И только асывнас нывкаыс казясис, мый сыкöт лоöма, но ассис бедасö некинлö эз висьтась, эз явит, полiс, что отирыс осудитас. Öтлаасьöмыс шогмис сэк, кöр эшö эз тыр мамыс кулöмсянь нёльдас луныс. Нывкаыс кöстiсис аслас судьба увтын. Сiя лöсьöтiс быдöс, мый колö касьтывны мамсö, и касьтiсиссес кольччисö довольнöйöсь. Поверьё сьöртi лöсьöтiс и котомкасö, кытчö пуктiс мамыслiсь паськöмсö да бутылка вина, — кольлалiсö няньöн-солöн. Эта бöрсянь нывкаыс эз пыр не эз пет некин ордö и гортас эз кор подружкаэсö.

— Асьсö бура видзö нывкаыс, — баитiсö инькаэс. — Мамыслiсь кöзяйствосö оз чапкы. Сылö бы бур жöник...

Басниэс павкисö и айыслö, но сiя кывзывлiс чöлöмöн, а гортас негорöна баитiс:

— Дуся, мыля соседкаэскöт он вовлiсь?

— Мый ме ны ордiсь эг адззыв?

— Кöть бы приличиеыс понда.

— Меным и нытöг неумöль.

— Вежöрт, мöдiк басниэз вермасö лоны. Инькаэс сплетничайтны эд любитöны. Этö эн вунöтлы.

— Ась тай лёбöны, сьöлалi ме бы ны вылö...

Сибалiс ар. Колiс лöсьöтчыны тöв кежас. Леонидыс пондiс лöсьöтны керку гöгöрсö. Сiя весöтiс гидсö и картасö, петкöтiс назёмсö огородечас. Пöдналiс быд осьтаоксö, кытi вермис бы пырны лымыс. Кольччис только вежны отливсö, кöдö керлöма айыс ой ладор стенаас. Сэтчö зэрыс вартiс, а тёсоккес сiсьмöмась. Сiя кайис лестница вылöт да пуксис сэтчин, пондiс вежны виллез вылö. Местаыс вöлi векнит и уджавны умöль. Мöдiс вежны крыша увтсис, но... мезмис и лэбзис улö да брякнитчис джек вылö. Дусяыс öдва-öдва кыскис сiйö гортас. Нывкаыс понда лоисö сьöд луннэз, эз чулав лун, медбы эз горзы.

— Он кö лэб, дак мый нö лоас мекöт, — юасис сiя Леонидыслiсь.

— Быдöс еныс киын, — сьöкыта баитiс кöзяиныс. — Сiя быдöс адззö и тöдö. Вот менö и накажитiс.

— Лöсялан, лэбтiсян и сувтан кок йылат.

Но мужикыслöн шогыс эз чулав. Инькаыс кулöмсянь годыс тыртöдз оча кок вачкис. Дусяыслö петiс виль тöждiсьöм, кöда чулалiс öддьöн сьöкыта. Деревняас баитiсö, что нывкаыс öтнас кольччис, гажтöм лоас, некинкöт баитны. Дзебсьöм бöрас узьлiс öтiк старуха, а сэсся благословитiс овны öтнаслö. Нывкаыс быд вынiсь крепитчис, медбы не повны, но сылöн нем эз пет. Быдкодь думаыс вайöтiс полöмöдз, а эта коста эшö тöдвылас усисö счастьеöн тырöм луннэс, кöр сiя ньылалiс медодзза блаженство. Касьтылiс быд оськöвсö. «Кин да мыля нiйö мырддис? — аскöттяс бура думайтiс нывкаыс. ― Кытшöм лöг ки босьтiс? Адззи бы дак пиннезнам йири». И видзчисьтöг, кыдз только ойшöрыс локтас, Лёняыс пондiс локны гортас. Кöть кытшöм калич вылö эз бы пöднав ыбöссэсö, нем оз видз. Локтас и киэсö нюжöтö нывкаыс дынö. Дусяыс ойсö эз понды вермыны узьны. Нывкаыс пессис-керис öтнас да и висьтасис инькаэслö эта йылiсь. Нiя советуйтiсö ветлыны тöдiсь Наталь ордö. Старухаыс вöлi пöрись ни, и умöля кылiс. Нывкаыс вайис сылö гöснеч да висьтасис ассис бедасö. Пöрись инькаыс лэчыт синнэзнас дыр видзöтiс нывкаыс вылö, мыйкö шушкис ас пондас, а сыбöрын малыштiс локтiсьыслiсь юрсисö да горöн висьталiс:

— Беднöй чадо! Еныс проститас тэнчит греххетö! Ноко висьтась меным нiйö.

— Да кытшöмöсь менам лоасö? — нывкаыс невна стыдитчöмöн гöрдöтыштiс. — Лёнясö любитi... кыдз айöс.

— Вот эта любитöмыс тэнат и мыччасьö. Молитва колö, молитва сы коста лыддьыны. Часöт пуксьы да гиж аслыт и велöт.

Нывкаыс етша вежöртiс пöрись мортöн висьтавлöмсö, но гижис.

— Öнi мун гортат да велöт, а кöр пондас мыччасьны — лыддьы да тэч пернапастö. Быдöс лоас бур.

Молитваэс отсалiсö том мортыслö.