Перыт отсöт

Мамыс вердыштiс нимасян кагасö да водтöтiс кроваткаö. Хозяйствоас öтiк-мöдiкö кертöн казявтöг чулалiс кадыс, и локтiс ни ойшöр. Екатерина чöвтiс кофтасö, медбы водны да шоччисьыштны, но пешлыштiс тырöм мороссэсö и решитiс эшö öтпыр вердыштны куиммесяцся кагасö. Кöр сiя локтiс кроватка дынас, сувтчыштiс кытшöмкö миг кежö да радейтан синнэзöн видзöтыштiс кагаыс чужöмö. И сэтöн сiя казялiс, что медодзза пияныслöн мыйкö не сiдз — рожабаннэс бледöтöмась, лолалö перыта и орöтöмöн. Мамыс босьтiс кагаоксö киас и кылiс, кытшöм сiя лоöма сырлёль и бытьтö бы кокнямöма. Сiя люлльöтыштiс киас, но кагаыс вöлi садьтöм и эз шыась. Том мамыс повзис да кинитчис жöникыс дынö, кöда вöлi нюжöтчöма койка вылас.

— Чеччы жö, Толя, — перыта висьталiс жöникыслö, — кагаыскöт мыйкö неладно. Да тэрмась жö тэ! Вöрöтчас, кыдзи гаг...

— А? Мый лоис? — эз вежöрт Анатолийыс, — мый колö месянь?

— Саймы ни тэ, саймы, кагаыслö, мыся, умöль лоöм.

— Дак сiдз бы и висьталiн, а то, — жöникыс чепöссис местасис да босьтiс кагасö ас дынас. — О-о-о, саймы, саймы кагаö, — люлльöтлiс да баитiс сiя. — Мамлiсь нянясö нимав да ло удався-удав, — сэсся бергöтчис иньыс дынö. — Саймöт мамöс, мый сiя паськалö-узьö. Саймöт часöт жö, сiя кужö челядьнас вöдитчыны.

Инькаыс котöрöн мунiс мöд джын керкуас да саймöтiс аньсö, кöда сэк жö кинитчис внучекыс дынö да тшöктiс моньсö чожажык лэдзны мороссис йöвсö. Катерина дрöжитан киэзнас пичкис йöвсö стаканö и сетiс аньыслö. Пöрись мортыс лöсьöтiс посудка бердö соска да мöдiс юктавны кагасö, но сiя эз примит, нельки синнэсö эз осьт. Анатолийыс ветлöтiс джоджöттяс и эз тöд мый керны, а кöр син вылас усис зеркало, босьтiс сiйö да локтiс мамыс дынö и лöсьöтiс сiйö кагаыс öм одзö. Стекло вылас пуксис чуть тöдчана парлöн след. Значит, кагаыс лолалö.

— Котрась телефон дынöдз да звонит скорöйö, — висьталiс зоныслö мамыс. — Менам эттшöмыс эз вöвлы. Пöрисьöдз олi, а ог тöд, мый колö керны...

Вöлi öтiк час кыкдас минута, кöр Анатолийыс корис гортас врачсö. Корöмсö примитiс дежуритiсь Раиса Калигова, кöда висьталiс, что врачыс чожа локтас. Мужикыс эз и понды баитны соседыскöт, бергöтчис да тэрмасис мунны гортас, кытöн инькаыс новйöтiс кагасö ки вылас да качайтiс. Повзьöмöсь пукалiсö и пöриссес.

— Но кыдз сiя, — порогсяняс юалiс инькаыслiсь, — синнэсö кöть осьтiс жö?

— Умöль, — дженыта висьталiс Екатеринаыс да пондiс горзыны.

— Ме кори скорöйсö, — висьталiс Анатолийыс да босьтiс кагасö аслас киö. — Сылö руыс, натьтö, оз тырмы, колö отсавны. Ноко, ме пондыла.

Айыс вайöтiс кагасö öм дынас да, öктiс сöстöм русö и лэдзис шогалiсьыслö öмас. Сiдз керис не öтпырись и кылiс, кыдз учöтыс вöрзьöтчыштiс. Айыслöн лоис надея, что локтас вот врачыс и отсалас, оз сет кувны.

Но мыля сэтшöм перыта чулалöны минутаэс? Кöть бы невна кежö сувтöтлыны кадсö. А сiя, нечистöй дук, каттьö ассис тшакыльсö и оз думайт, мый керсьö эстöн керкуас, мый йылiсь тöждiсьöны.

— Да мый этö, каналья, мать, — лöгасис Анатолийыс да бöра котöртiс звонитны. — Врачыс сунасьö ли мый ли или жö подöн мотырасьö? Мортыслö эстöн кöть и кув. Скорöйыс и сьöкыт кадас оз тэрмась. Видзöт, то и соседдэс локтiсö, а кöда колö, дак абу. Мыйлö сэк нiйö видзöны? Да кытшöм жö эта служба? Эта понда армияас сетiсö бы военнöй трибуналö, а татöн? Сiя звонитiс мöдпырись, и сылö висьталiсö, что врачыс мунiс ни. Анатолийыс котöртiс бöр, пуксьыштлiс веськыта öшын дынас, ветлiс комас, мыйлöкö осьтлiс посуда понда шкафсö, локтiс гор дынас да пешлiс пöдансö, петiс бöр комнатаас и сувтiс джодж шöрас, киэсö морос вылас кресталöмöн, пондiс кывзiсьны — оз ли дзуркнит воротаыс. Кöзяиныс эз адззы аслыс местасö. А часыыс тачкöтiс-мунiс одзлань, чулалiс кык часся унажык ни. Кагаокыс чушыктiс ойтöлöн моз. Сэтöн эз ни терпит соседка Надяыс, кöда локтiс ны ордö, эз вермы терпитны да котöртiс телефон дынас и кыдз кужис, сiдз и видiс дежурнöйсö. Чулалiс чуть ли не куим час гöгöр медодзза звонитöмсяняс, и керкуас вöлiсь мыччисис врачыс. Да не врач, а фельдшер Владимир Скамейкин, кöда вöлi сетыштöма аслыс волясö, и этö сразу казялiс кöзяиныс.

— Доктор, тэ кытöн юин винасö? — юалiс Анатолийыс.

— Мийö уджалiкас огö юö, — нёштöма висьталiс Скамейкиныс.

— Дак эд тöдчö не только рожа вылат, но и кылыт гардсьö.

— Этö эшö колö докажитны.

— Мыля нö сэк дыр эдö локтö?

— Машинаыслöн бöрись мостыс киссис.

Эз чулав и дас минута, кыдз керкуас пырис шофёрыс и Скамейкиныс сылiсь юалiс: — Но кыдз, лöсьöтiн?

— Ме жö висьталi, что лöсьöта и лöсьöтi. Верман кöть кытчö мунны, нем оз ло. Нельки киэз эзö нятьöсьмö.

Скамейкиныс вöлi паськöтöм ассис аптечкасö веськыта пызан вылас да тшöктiс мыччавны кагасö, кöда эз ни вöрöтчы. Минута бöртi сiя висьталiс:

— Сьöлöмыс оз ни уджав. Сылö лекарствоэс озö ни колö. Пуктö вон ен угöлас...

— Кыдз... Мыля!? — горöтiс мамыс да пöрис коробья вылас. — Ог сет некинлö, менам аслам пиыс!..

Катериналöн öшис выныс, и сiя чапкис кисö коробья бокас. Жöникыс повзьöмöн видзöтiс сы вылö, но Скамейкиныс чожа лöсьöтiс шприц да керис укол. Видзчисьышт, кöр локтас кöзяйкаыс сознаннёнас, öктiс инструменттэсö да мунiс. Керкуас лоис лöнь. Кадыс вöлi куим час ойнас.

Инькаыс пукалiс кагаыс юр дынын, а жöникыс — лабич вылас. Сылö вöлi сэтшöм умöль, оз туй висьтавны кыввезöн. Сiя повзис сэтчöдз, что эз тöд, мый керны. Анатолийыс висьталiс инькаыслö:

— Эн тöждiсь, мöдiк лоас, но медодззаыс жаль. Кин тöдiс, что сiдз лоас?

Кытöнкö керку саяс кылiс понлöн шлявгöм, сё ёнжыка и ёнжыка, бытьтö пондiс горзыны. Кöзяиныс пуксис инькаыс дынö. «Вот и орис мортокыслöн оланыс, — думайтiс Анатолийыс. — Прощай, олан. Сылö бы эд овны да овны, а вот еныс эз сет. Только нянясö тöдiс. Эз ешты шондiсö адззывны. А эд быдмис бы морт, кöбы не код Скамейкиныс».