Ситников

Шöрöт мыгöра и эшö не пöрись мужик, бырöм нинкöммезöн пукалiс пайла дорас да жагöника вашöтыштлiс вöвсö, кöда вöлi умöльтчöма и дыша кыскис телегасö. Голяас кышалöм сийöссис тыдалiсö деревичаэс, лёнiсь гардöм гужиэслöн путшалöм доррес öшалiсö летки-петки öтмöдöрас, а унаись вочлöм шлеяыс öдва öшшис вöлыс вылын. Ямщикыс вöлi пасьтасьöма дыр ни новйöм гуняö и дугдывтöг видзöтiс одзас. Телега бöрас гезок вылын пезьдалöмöн мунiс умöлик мöс, кöдалöн öтiк сюрыс вöлi чегöма. Сiйö охотиттöг шатёкöн вашöтiс пондöтчöма ёнмыны инька, видзöтöм вылö эшö бытшöм да не сэтшöм пöрись. Паськöмыс тырис ни буснас, и мыдзöм шыöн сiя юавлiс кöзяиныслiсь:

— Дыр ли эшö пондамö мунны?

— Эшö невна терпитышт, и локтамö, — öткодя шыасьлiс жöникыс.

Вöлыс юрсö öшöтöмöн да пеллесö лэдзöмöн мунiс мыс панытö. Пукалiсьыс пондiс сунавны. Телегаыс шочыника дзуртыштлiс — вот-вот колесоыс киссяс.

— Архип, видзöт одзат, а эн сунась! — горöтiс инькаыс.

Вöлыс кайис ни лун покатсö, и мужикыс одзын тыдалiс неыджыт посад, кöда дорын сулалiс вичку. Велалöм сьöртi сiя перыта пернапасасис да висьталiс: «Молитваöн, тыдалö, локтiмö. Посадыс миян понда и керöм. Сувтчамö эта местаö. Садьыт, натьтö, бырис ни? Эта мымда мунiмö, но норовитышт невнасö».

Мыс покатас вöлыс талис перытжыка, и чожа нiя локтiсö медодзись керкуэз дынö да сувтiсö. Архипыс юскытöг лэдзис вöвсö туй бокись турунок вылас да инькаыслö висьталiс:

— Видзчисьышт эстöн, а ме ветла кошшыны оланiн местасö. Не öтöрас жö пондамö узьны. Миянлö бы учöтик керкуок.

Ветлiс кöзяиныс не сiдз чожа, но локтiс и вайис инькаыслö гажа юöр — öтiк мужиккöт баитчисö овны сы неыджыт керкуын, кöдаын кöзяиныс видзис сякöй инструментсö да сюри-берисö.

— Меным öнi стурементыс только оз тырмы, — баитiс сiя вöвсö бергöтiкö. — Но кутчисямö керны, дак лоас быдöс. Делосö ассим сувтöта медвылын точка вылö. Посадсис эг казяв мастерскöйесö. Некин оз понды мешайтны.

Овны пондiс сiя посад шöрас. Пожиткаэс вöлiсö етша, а унажыксö кытшöмкö инструменттэз. Керкуокыс вöлi öтiк карта вылын, и вöлыслö да мöсыслö адззисис местаыс.

— Абу тэ крестьяниннас вöлöмыт, — качыкайтiс юрнас кöзяиныс, кöр видзöтiс подасö. — Ладан вылö ни чушыктöны.

— Этö городас сэтшöм оланыс, — гажтöма висьталiс Архипыс. — Нем озö лоö. Вот кутчися уджавны и вочмасö. Ме эд фабрикаын уджавлi и велалi öтiк-мöдiкö керны. Аслым дело мöда осьтны.

— Этö кыдз еныс шуас, — кашельтыштiс кöзяиныс.

— Еныс отсöтöн быдöс позьö керны.

Архипыс лунтырöн овлiс гортас да мыйкö мастеритiс и петкöтiс набивайтан станок. А инькаыс эта кежö заптiс дöра, кöдö небис посадас. Лöзöн мичöтöм сöдзыс да печатайтöм сы вылö веж кружоккес бура видзöтсисö. Инькаыс первöй вурис аслыс дубассö да петiс мыччасьны сiйöн посадас. И эта лунсянь Архиплöн станокыс пондiс уджавны чуть не быдса суткиöн. Посадын олiссес дугдывтöг вайисö дöрасö, кöдö кыйлiсö асьныс и тшöктiсö мичöтны виль сернас. Дубассэз вылö модаыс паськалiс и мöдiк деревняэзöт. Закажитлiсö быдса юккезöн. Архипыслö местаыс эз понды тырмыны.

— Делоыс вöрзис сулалан местасис, — баитiс сiя инькаыслö» — Öнi колö думайтны мичöтчан краска йылiсь да виль места йылiсь. Колас ветлыны городöдз, а сыбöрын понда строитчыны. Лэбтамö виль керку и сэтчин паськöтамö хозяйствосö.

— Тэныт тыдалöжык, — жöникыс вылö видзöтiкö баитiс инькаыс. — Кыдз колö, сiдз и кер. Меным эд тожö некокнит мичöтчыны да пар пытшкас овны.

— Ме сы йылiсь жö вот думайта.

Сiдз кыдз Архипыс вöлi деловöй, то мöд годас жö и пондöтiс строитны виль керкусö. Но перво колiс вöрсö керавны да ваявны, тырмöмöн пилитны тёссö да плахасö, адззыны кöрттувсö, дорны шавньöрсö*, быдкодь вугсö, керöтны рамаэсö да косяккесö. Заботаыс тырмис, кöть ойсö эн узь, а уджыс эшö кольччис. Уджалiссеслöн быд чер тюкöтöмыс кокалiс кöзяиныс кошелись деньгасö.

[* шавньöр (разг.) — шарнир]

Эта кадö Архипыс ветлiс городö небны краскаэсö и эз вöв гортас кык лун. Панталiс сэтчин купчишкаöс, подаок вузасисьöс, тöдсасис сыкöт и бура чулöтiс кадсö. Но мöд лунас лоис беда — видзчисьтöг кулiс тöдсаыс. Архипыс адззис сылiсь деньгаöн тöбалöм кöшельсö, босьтiс сiйö да пышшис местасис и иньдöтчис гортас. Некинлö, нельки инькаыслö, эта йылiсь эз висьтась и пондiс овны. А кыксувда керкуыс лэбис ни да сувтiс крыша увтö.

— Тэрмасьö мужичоккез, тэрмасьö, — шыннялöмöн баитiс кöзяиныс. — Аскадö керыштатö и ме сувтöта четверть вина. Ме сайын делоыс оз сувт. Керö крепыта да бытшöма, медбы отирыслiсь син гажöтiс.

Мужиккес уджалiсö совесть вылö, кöзяиныс ачыс видзöтлiс быд керöм уджсö и ошкис плотниккесö. Ошкöмсяняс плотниккес керисö уджсö, позьö висьтавны, шоччисьтöг, тэрмасисö, медбы юны кöсйöм винасö. И ар кежас керкуыс сувтiс. Увдöрись этажас öт джынас Ситников керис лавка, кытöн пондiс вузасьны матерьёöн, ситецöн, сатинетöн, шаллезöн, чышьяннэзöн да чöскыт товарöн, а мöдас — мичöтöм да набивайтöм дöраэзöн. Вевдöрись этажас лöсьöтiс аслыс оланiнсö. Керис и мичöтчан керку, кытöн мичöтiс да набивайтiс дöрасö. Делоыс мунны пондiс перыта. Быдöс эта хозяйствоöн öтнас эз ни вермы бергавны и ковсис медавны мужиккезöс Сэтчö жö аслас шогмис зон. Инькаыс, медбы весь не овны вöдитчикас, садитiс керку гöгöрас рябинаэз, льöмпуэз, сирень, сэтöр да малина. Керисö и ва нуöтан öррез. Сыбöрын быдöс эта лоис неыджыт, но бытшöм садöн, кытöн позис пукалыштны да шоччисьны, лолавны чöскыт рунас, öктыны вынсö.

Отирыс дивуйтчис, кыдз сэтшöм чожа Архипыс вермис строитчыны? Конечно, купецыслiсь куртыштöм деньгаыс, кöда йылiсь некин эз тöд, сетiс ыджыт отсöт, но главнöйыс вöлi кöзяиныслöн крепыта кутчисьöмыс. Сiя локтiс посадас не вольнöя олöм понда, а керны ассис уджсö, кöда йылiсь важын ни думайтiс. И сылöн мечтаыс тырис. Одзжык кö уджавлiс только сеталöм сырьё вылын, то öнi Архипыс пондiс небны отирыслiсь дöрасö и керны сiйö товарö да вузавны аслас сувтöтöм донöн. Конкуренттэс посадас эзö вöлö, ежели не лыддьыны Панинсö, кöда торгуйтiс быдöс вайöмöн.

— Этадз тэ верман менö розоритны, — пеняйтiс сiя Архипыслö.

— Пондан сунасьны, дак былись эд путнöйыс нем оз пет, — нелöга висьталiс сылö Архипыс. — Торгуйтöмас колö сюриöн бергавны ой и лун. Ежели тэ он одзав, то тэнö орддясö.

— Дак менчим жö не сiдз небöны товарсö, кыдз тэнчит, — норасис Паниныс да видзöтiс баитiсьыс вылö. — Öнi тай видзöта, да быд инькаыс набивнöй дубасöн мунö вичкуас.

— Вот сыын и делоыс, — шыннялöмöн видзис очакывсö Архипыс. — Колö тöдны, мый колö отирыслö, да сiйö и пуктыны прилавок вылас.

— Тэнат вот петö кисит, а менам оз.

— Мыйлö нö сэк кутчисин вузасьны? Не пельпоныт сьöртi ношаыс, дак оз и ков босьтны. Лэдзчисьöм кынöмоктö колö чинтыштны. Вузасикас сiя абу отсалiсь. Нельки инькаэс одзын умöль, ветлöтан кыдз некодя. Эта оз лöсяв мужикыслö.

Архипыслöн лоисö кык вузасись, и сiя велöтiс нiйö, медбы тöдiсö, мый колö небисьыслö, и висьталiсö кöзяиныслö. Сiдз жö висьталiс, кыдз колö пантавны небисьсö, кыдз сiйö кольлавны, медбы мöдпырся эшö пырис лавкаас.

— Мортыслö сетöма кыв и колö баитны, — велöтiс сiя. — Кöр лавкаас пырöны отирыс, вузасисьыслö гажажык. Керö сiдз, медбы менам лавкаö пыр локтiс посадсис отирыс. Долгас ог кольччы.

Эз чулав неделя, медбы Архипыс эз ветлы городас да мыйкö эз вай вузавны. Вузасьöмыс сылöн паськалiс. Делоö пуктöм быд рубыс сетiс прибыль.

— Тэнат, Архипушко, делоыт лöсялiс, — быдмыштöм зоныскöт бöбалiкö пондöтiс баснисö иньыс. — Öнi кад ни подасö наживитны. Кагаыслö эд йöв колö. Кыдз думайтан?

— Правильнöя баитан, Öнисся, — шыасис Архипыс да гыжьялыштiс юрбöрсö. — Мöсыс пöрисьмис ни, колас кукань небны, а то и кыкö. И вöлыс кок вылас лоис сьöкыт. Бур чаньöн колö вежны. Öнi позяс и мöдiк пода заводитны, медбы пызан вылас быдöс вöлi асланым. Кад ни овны морт моза. А ачыт мыля сiдз лэдзчисин? Веж паськöмтö, эн пöр ромозяс.

— Меным тай гортын олас, — инькаыс макнитiс кинас.

— Эн кешитчы, а пасьтась кыдз бур инька. Лавкаас бöрйы, мый тэныт колö да лöсялö. Быдкодь рöмыс сэтчин эм. Мöдпöв эн тшöкты висьтавны, ог любит. Вунöтiн разь, кыдз пасьтасин городас? Мöдiккез ась тэ вылö видзöтöны, ась велöтчöны.

Инькаыс локтiс öшын дынас да видзöтыштiс сад вылас, кöдаын паськалiсö пуэс.

— Быд шатёкыс лэдзис вужсö, — негорöна висьталiс сiя. — И увтырыс миян содö. Еныслö колö спасибо висьтавны. Ветла вичкуас да масiсь сувтöта, ась и одзлань отсалас.

А лöсялöм оланыс кыссис революцияöдз.