Жетіліп туған нәрестелердің күтімі

Бала нәрестелер палатасына түскеннен кейін медбике үнемі оның тәртібін, дауысын, сору, құсып тастау ерекшелігін бақылап отырады. Тері, шырышты қабат, кіндік тұқылының күтіміне ерекше назар аударылады.

Күн сайын таңғы ас алдында белгілі бір жүйелілікте нәрестені жуындырып отырады: көз, мұрын, құлақ, тері, ең соңында бұт аралығын жуып, өңдейді. Баланы ағынды жылы сумен жуындырады. Конъюктивасының тітіркенуі мен көздерінен бөлінділер байқалса, фурацилин ерітіндісімен (1:5000) өңдейді. Өңдеу барысында әр көзді бөлек мақта тампонымен көздің сыртқы бұрышынан ішкі бұрышына қарай сүрту керек. Мұрын мен құлақ тазалығын фурацилин ерітіндісіне немесе стерильді майға (күнбағыс немесе вазелин) малынған мақталы таяқшалармен тазалайды.

Тері қыртыстарын (мойын, қолтық, тізе асты) алғашқы 2 күнде йодтың 1% спиртті ерітіндісіне малынған мақтамен, ал қалған күндері стерильді маймен сүртіп отырады.

Нәрестенің астын жуу үшін медбике оны сол қолына арқасымен жатқызады. Бөксесі мен аралығын жылы ағынды сумен балаларға арналған сабынмен жуады. Жуу қимылының бағыты алдынан артына қарай болу керек. Соңынан кептіріп, стерильді вазелин майын жағып қояды.

Кіндік қалдығының күтімі ашық тәсілмен жүргізіледі. Кіндік тұқылын тәуілгіне 1-2 рет 70% этил спиртімен, 2 % су тотығы ерітіндісімен өңдеп отырады. Кіндік жарасын толығымен жазылғанша (орта сесппен 10 күннен 2 аптаға дейін) өңдейді.

Нәрестені әр тамақтандыру алдында және тері күлбірлеуінің алдын алу үшін әр зәр шығарғаннан кейін жаялықпен орап отырған дұрыс.

Бала киімі жеңіл, ыңғайлы, жылы болуы керек. Нәрестенің бірінші киімдерінің құрамына 4 стерильді жаялық, жейде және көрпеше кіреді.

Нәрестені күн сайын бірінші тамақтандыру алдында өлшеп отырады. шешіндірілген баланы жаялыққа салып, өлшейді, сосын алынған саннан жаялық салмағын алып тастап, таза баланың салмағын шығарады.

Жаңа туған нәрестені тамақтандыру

Жаңа туған нәрестені тамақтандыруға анағұрлым бейімдендірілген тағам – ана сүті. Сүт - құрамында ақуыз бен оның фракцияларының, көміртегі мен майлардың нәрестеге қажетті мөлшері бар теңдессіз өнім. Сүт компоненттері нәресте ішегінің ферменттік және микроптық құрамының ерекшеліктеріне дағдыланып, перистальтиканы қалпына келтіреді, газ түзілудің азаюына ықпал етеді. Соңғы кезде нәрестені жұқпалардан сақтап қалу үшін туғаннан кейінгі бірінші сағаттардан бастап төске салу ұсынылып отыр.

Гемолитикалық аурудың жіті кезеңдерінде, анасындағы цитомегамияның жіті түрінде, АИТВ жұқпасы, С гепатитінде төс сүтімен тамақтандыру қарсы көрсетілген.

Жетіліп туған нәрестені 6-7 рет тамақтандыру ұсынылады. Тамақтандыру алдында анасы қолын сабындап, жылы сумен жуады, басына орамал және бетіне маска тартады. Сүт безінің ұшын фурацилин ерітіндісімен (1:5000) сүртеді.

Медбике анаға баланы төске дұрыс салу техникасын көрсетіп, тамақтандырудың дұрыстығын қадағалауы керек. Нәрестені анаға параллельді жатқызып, басын қолдың шынтақ бүгісіне орналастырады. Әр тамақтандыру кезінде баланы тек бір сүт безіне қана салады. Тамақтандыру ұзақтығы 20-30 минутқа созылады. Сорылған сүт мөлшерін анықтау үшін нәрестені бір киімде тамақ алдында және соңынан өлшейді. Егер бала қажетті мөлшерді сормаған болса, оны сүзілген сүтпен, сүт қоспасымен немесе әйел сүтінің жасанды алмастырушысымен тағы да тамақтандырады.

Нәрестеге тәулігіне қажетті сүт мөлшерін келесі тәсілмен анықтайды: нәрестенің өмір сүру күнін 10-ға және тамақтандыру санына көбейтеді. Мысалы, өмірінің үшінші күнінде оған (6 рет тамақтандырса) қажет болады: 3 х 10 х 6 = 180 г сүт.

Қосымша тамақтандыру дәрігер тағайындауы бойынша жүргізіледі. Сүт немесе сүт қоспасын 37-38⁰С жылытады, ал қажетті өнімдерді арнайы тоңазытқышта сақтайды.