- •М.А.Бяспалая эканамічнае і сацыякультурнае развіццё беларускай вёскі ў гады нэпа (1921–1927)
- •Рэцэнзенты
- •Уводзіны
- •Глава 1 сацыяльна-эканамiчнае развiццё вёскi
- •1.1. Падатковая палiтыка ў вёсцы
- •Як галоўны кiрунак нэпа
- •1.2. Праблемы зямельнай рэформы
- •Глава 2 культурнае жыццё вёскi
- •2.1. Сутнасць I асноўныя кiрункi дзяржаўнай
- •Культурна-асветнiцкай палiтыкi
- •2.2. Палiтычнае асветнiцтва
- •2.2.1. Структура I кадры
- •2.2.2. Унiфiкацыя формаў I метадаў
- •2.3. Культурнае асветнiцтва
- •2.3.1. Тэатральнае аматарскае мастацтва
- •2.3.2. Нацыянальна-культурнае адраджэнне
- •2. 4. Культурна-асветніцкая дзейнасць вандроўнага тэатра пад кіраўніцтвам у.Галубка
- •2. 5. Агракультурнае асветнiцтва
- •2. 6. Iнфармацыйнае забеспячэнне дзяржаўнай палiтыкi
- •Глава 3 успрыманне вёскай дзяржаўнай палiтыкi
- •3. 1. Рэакцыя сялянства на падатковую палiтыку дзяржавы першых гадоў нэпа
- •3. 2. Стаўленне сялянства да пытання аб зямлі і формах землекарыстання
- •3. 3. Адносiны сялянства да сацыяльна-эканамiчнай палiтыкi другой паловы 1920-х гг.
- •3. 4. Савецкая палітыка перасялення і сялянства
- •3. 5. Вёска і савецкая культура
- •Заключэнне
- •Спiс крыніц
- •II. Беларускi дзяржаўны архiў – Музей лiтаратуры I мастацтва
- •III. Дзяржаўны архiў Мiнскай вобласцi
- •IV. Нацыянальны архiў Рэспублiкi Беларусь
- •Дадаткі
- •Натуральныя I грашовыя падаткi
- •Ураджайнасць асноўных культур (у пудах з дзесяцiны)
- •Земленадзяленне I землеўладкаванне
- •Сацыяльная дыферэнцыяцыя вёскi (у %)
- •Колькасць сялянскiх двароў
- •Дзяржаўныя ўстановы палiтасветы ў вёсцы (хаты-чытальнi)
- •Эканамічнае і сацыякультурнае развіццё беларускай вёскі ў гады нэпа (1921–1927)
- •220007, Г. Мінск, вул. Рабкораўская, 17.
- •2 20007, Г. Мінск, вул. Рабкораўская, 17.
2.2. Палiтычнае асветнiцтва
2.2.1. Структура I кадры
Палiтычнай асвеце сярод дарослых дзяржава надавала вялiкую ўвагу. Падрастаючае пакаленне iдэалагiчна можна было выхоўваць у школе, павярнуць жа велiзарную колькасць дарослых на шлях, вызначаны Камунiстычнай партыяй, было складаней. З пераходам да мiрнага жыцця стала ясна, што адных дырэктыў аб змесце асветнiцкай працы, заклiкаў да яе актывiзацыi ўжо недастаткова. Новая сiтуацыя патрабавала, з аднаго боку, стварэння сталай сеткi адпаведных устаноў, якiмi можна было кiраваць i якiя можна было кантраляваць, а з другога, мець пастаяннага праваднiка партыйнай палiтыкi ў вёсцы.
На тэрыторыi рэспублiкi ствараць сiстэму палiтасветы фактычна прыйшлося з чыстага ліста. У канцы лiстапада 1920 г. быў створаны Галоўпалiтасвет БССР. Яго задачы акрэслены ў рэзалюцыi IV з’езда КП(б)Б (25 лютага – 1 сакавiка 1921 г.): “Палiтычная асвета бярэ на сябе галоўным чынам арганiзацыйныя задачы праводзiць навуковую i вытворчую прапаганду. Абслугоўванне ўсiх клубаў, арганiзацыя хат-чытальняў, Дамоў селянiна, беспартыйных, шырокiх канферэнцый i г.д. павiнна быць тэрмiнова перададзена Галоўпалiтасвету” [272, с. 82–83]. На працягу сакавiка 1921 г. замест павятовых пазашкольных аддзелаў Наркамата асветы стваралiся павятовыя палiтасветы. Аднак, як падкрэслiвалася ў адным з цыркулярных пiсем, “палiтасвет ёсць састаўная частка аддзела народнай асветы; загадчык палiтасвета, як i ўвесь аддзел асветы, атрымоўвае дырэктывы ад мясцовага партыйнага камiтэта, якi непасрэдна кiруе ўсёй дзейнасцю палiтасвета. Спробы самастойнасцi i аддзялення з’яўляюцца глыбокiм непаразуменнем, прычына якога – у недастатковым разуменнi кроўнай роднасцi палiтыка-асветнiцкай работы сярод дарослых з усiмi вiдамi работы аддзела народнай асветы, што таксама выконваюць задачу выхавання дзяцей у камунiстычным кiрунку” [17, 218, л. 12]. У сваю чаргу Наркамат асветы клапацiўся аб кадравым забеспячэннi новага органа. Аб гэтым сведчыць адзiн з цыркуляраў, у якiм, мiж iншым, гаварылася: “Там, дзе яшчэ да гэтага часу няма спецыяльных асоб для кiраўнiцтва палiтасветамi, павятовым аддзелам асветы неабходна звярнуцца з хадайнiцтвам у партыйны камiтэт аб выдзяленнi падрыхтаванага работнiка” [17, 218, л. 3].
На пачатак 1921 г. у асноўным была вызначана структура кiруючых органаў палiтасветработы. Прапагандысцкi аддзел кiраваў работай савецкiх i партыйных школ, клубамi, бiблiятэкамi, пунктамi лiквiдацыi непiсьменнасцi, экскурсiйна-выставачнай дзейнасцю. Агiтацыйны аддзел арганiзоўваў шматлiкiя агiтацыйныя кампанii, мастацкi – наладжваў агiтацыю сродкамi мастацтва. Агульныя ўказаннi аддзелы Галоўпалiтасвета атрымоўвалi ад партыйных органаў. Асноўная нагрузка прыпадала на нiзавую структуру – вясковыя хаты-чытальнi i валасныя палiтасветы, якiя складалiся са старшынi валасной партыйнай або камсамольскай ячэйкi, прадстаўнiка аддзела народнай асветы i старшынi культасветнага аб’яднання.
Пэўныя захады па ўмацаваннi палiтасветустаноў прымалi кiруючыя органы рэспублiкi. У пачатку 1921 г. СНК БССР прыняў пастанову, дзе прадпісвалася наступнае: “Наркамату асветы i выканкамам правесцi падрабязнае абследаванне ўсiх памяшканняў, раней занятых асветнымi ўстановамi, якiя цяпер знаходзяцца ў распараджэннi ваенных i другiх ведамстваў, дзеля ўстанаўлення, якiя з iх тэрмiнова могуць быць прыстасаваны i перададзены для патрэб НКА. Да 1 верасня неабходна перадаць не менш за 20% памяшканняў, занятых iншымi, не выключаючы i ваенных, а на працягу 1921 г. – усе астатнiя. Памяшканнi, занятыя палiтасветустановамi i вызваленыя для iх, не могуць быць занятыя нiкiм... без згоды Наркамата асветы” [36, 70, л. 21]. На справе нiхто не збiраўся лiчыцца з распараджэннем. Напрыклад, у лiстападзе 1921 г. чырвонаармейцы занялi хату-чытальню ў в. Каланiца Сёмкава-Гарадоцкай воласцi, i ўсе спробы валаснога аддзела асветы вызвалiць яе аказалiся марнымi. Памяшканнi клубаў, тэатраў займалi пад ссыпныя пункты для харчпадатку [17, 226, л. 34]. Пастанова, аб якой гаварылася вышэй, была дапоўнена рашэннем ад 31 снежня 1921 г. Яно забараняла высяляць школы i другiя асветныя ўстановы з памяшканняў у былых маёнтках, з устаноў НКА не дазвалялася браць арэндную плату [24, 172, т. 2, л. 341]. У лiпенi 1922 г. памiж наркаматамi асветы i земляробства было падпiсана пагадненне аб замацаваннi пабудоў у былых маёнтках за школамi i палiтасветустановамi.
Для большасцi насельнiцтва тагачаснай невялiкай Беларусi арганiзацыя палiтасветустаноў аказалася справай новай. Частка насельнiцтва, асаблiва моладзь, з энтузiязмам успрыняла партыйныя заклiкi: пачалося стварэнне хат-чытальняў па iнiцыятыве знiзу. У хуткiм часе ва ўсiх паветах рэспублiкi былi дзесяткi, нават сотнi хат-чытальняў, дзесяткi народных дамоў, валасных i перасоўных бiблiятэк [17, 218, л. 87]. З пункту гледжання сацыяльнай псiхалогii такая сiтуацыя аб’ектыўна была апраўдана. Разумеючы “вялiкi кансерватызм i адсталасць сялянства”, улада рабiла стаўку на вясковую моладзь, якая павiнна была “адыграць значную ролю ў справе замацавання савецкай улады i камунiстычных iдэй на вёсцы” [17, 218, л. 111]. Не трэба забываць, што рэвалюцыя i Грамадзянская вайна ўзмацнiлi рэвалюцыйны энтузiязм моладзi, якая будавала ў сваiм уяўленнi карцiны “новага свету”. Ствараючы хаты-чытальнi, яна лiчыла iх прадвеснiкамi новага жыцця i новай культуры i ўзнёсла заяўляла аб гэтым. Напрыклад, удзельнiкi Мiнскай павятовай канферэнцыi работнiкаў асветы ў рэзалюцыi напiсалi наступнае: “Мы, праваднiкi пралетарскай культуры на беларускай вёсцы, сваёй несупыннай працай творым i безупынна будзем тварыць з кожнай школы, хаты-чытальнi i народнага дома моцныя фарты саюза рабочых i сялян. Аб гэтыя бастыёны разаб’ецца хваля контррэвалюцыйнага наступу” [45, 49, л. 300].
Аб стварэннi хат-чытальняў прымалiся рашэннi на сходах моладзi. Вось прыклад аднаго з iх, прынятага ў Магiльнянскай воласцi: “Ва ўсiх вёсках арганiзаваць хаты-чытальнi, дзеля чаго запрасiць настаўнiка, каб ён увесь свой вольны час аддаваў рабоце па асветнiцтве мясцовага насельнiцтва шляхам чытання газет i ўсемагчымых брашур”. У рашэннi сходу моладзi Сёмкава-Гарадоцкай воласцi чытаем: “Сход моладзi, каля 30-цi чалавек, 17 лiпеня 1921 г. заслухаў даклад аб хаце-чытальнi, якi коратка акрэслiў яе значэнне. Пастанавiлi: адчынiць хату-чытальню i прасiць палiтасвет даваць кнiгi i газеты” [17, 218, л. 21; 226, л. 33 адв.].
Нiчога дзiўнага ў такiх прымiтыўна-наiўных рашэннях няма, яны адбiтак свайго часу, iлюстрацыя выканання нiзамi дырэктыў зверху. Тым больш, што i апошнiя не з’яўлялiся прыкладам логiкi. Звернемся да iнструкцыi аб стварэннi хаты-чытальнi, падпiсанай Н.К.Крупскай: “...Валасны аддзел асветы павiнен добра ўяўляць значэнне хаты-чытальнi. Арганiзатар iдзе перш за ўсё ў мясцовы партыйны орган i выканкам i там вядзе агiтацыю за хату-чытальню. У воласцi цi раёне ён зможа знайсцi каго-небудзь з сялян, хто мае ўплыў i ўмее гаварыць, i разам з iм iдзе цi едзе на вёску. Лепш за ўсё браць такога селянiна, якi сам ужо працаваў па арганiзацыі хаты-чытальнi ў сваёй вёсцы, дзе справа ўжо наладжана i г.д.” [18, 149, л. 22]. Большую неадпаведнасць рэчаiснасцi, чым у гэтай i падобнай ёй iнструкцыях, цяжка нават уявiць. Часта чытальняй аб’яўлялася хата камсамольца або другога мясцовага актывiста, якi адначасова з’яўляўся яе загадчыкам, атрымлiваў газеты цi якi-небудь агiтацыйны матэрыял i лiчыў сваю ролю выкананай. Таму не трэба здзiўляцца вялiкай колькасцi палiтасветустаноў, якiя ў канцы 1920 – пачатку 1921 г. утварылiся на тэрыторыі Беларусi. У хуткiм часе большасць з iх перастала iснаваць, напрыклад, на Барысаўшчыне з 311 на пачатак 1922 г. засталіся 124 хаты-чытальнi [18, 470, л. 49].
У адзiн з самых цяжкiх момантаў у жыццi вёскi, час актыўнага збору харчпадатку, сялянам было прапанавана ўзяць на сваё ўтрыманне ўстановы Наркамата асветы, ад школ да хат-чытальняў. Дзяржава не мела магчымасцi матэрыяльна забяспечваць вясковыя асветныя ўстановы. V з’езд КП(б)Б у кастрычнiку 1921 г. прыняў рашэнне аб пераводзе ўстаноў Наркамата асветы, у тым лiку i палiтасветных, на ўтрыманне сялянства [272, с. 106]. Аднак было ясна, што “сялянства не пойдзе насустрач дзяржаве” [18, 149, л. 4], а тым самым матэрыяльна не падтрымае вясковыя палiтасветустановы.
Тым не менш з 1 лютага 1922 г. яны пераводзiлiся на ўтрыманне за кошт вёскi, з дзяржаўнага забеспячэння здымалiся загадчыкi валасных палiтасветаў. Пры ўмове адсутнасцi сродкаў дапускалася закрыццё ўстаноў палiтасветы. Праўда, такi крок прызнаваўся “не зусiм пажаданым”, бо толькi ў iх сяляне могуць развiвацца i забяспечыць свае духоўныя запатрабаваннi” [18, 383, л. 6, 37]. У вынiку на месцах узнiкла поўная неразбярыха, нiхто не разумеў, што i як рабiць. Бабруйскi павятовы палiтасвет, напрыклад, выслаў цыркуляр у воласцi: “...абавяжыце сельскiя Саветы ўтрымлiваць хаты-чытальнi, дзеля чаго правядзiце агiтацыю. Загадчыкамi хат-чытальняў прызначце старшыняў сельскiх Саветаў, якiх абавяжыце працаваць без аплаты... Правядзiце калектыўную падпiску. І (самае галоўнае! – М.Б.) трымайцеся цыркуляраў” [18, 181, л. 27].
Яшчэ больш ускладнялi сiтуацыю распрацаваныя ў кабiнетах ГПА пастановы накшталт наступнай: “Прымаючы пад увагу цяжкi эканамiчыы стан, для выхаду з якога неабходны калектыўныя высiлкi ўсяго працоўнага насельнiцтва, праводзьце агiтацыйныя кампанii, каб азнаёмiць з гэтым рабочых i сялян. Ваша работа павiнна быць пастаўлена на ваенную нагу – дакладная, гнуткая, энергiчная, а таму катэгарычна прапануецца: 1. Узмацнiць i падняць сваю дзейнасць, каб яна адчулася насельнiцтвам воласцi i павета. 2. Да 5-га чысла кожнага месяца прысылайце падрабязныя даклады аб зробленай рабоце. 3. Актывiзуйце культурна-асветнiцкую работу шляхам мiтынгаў, спектакляў. 4. У сувязi з нэпам выпiсвайце калектыўныя газеты i арганiзуйце iх галосную чытку” [18, 383, л. 9, 19].
Безумоўна, можна было прымаць шмат розных пастаноў, развiваць бурную паштовую дзейнасць, аднак факт застаецца фактам: сялянства ўстаноў палiтасветы не падтрымала. Прычыну гэтага дастаткова выразна акрэслiў адзiн з настаўнiкаў Вялiка-Далецкай воласцi: “Сялянства ў масе сваёй стагоддзямi выступала з пазiцыі непарушнасцi прыватнай уласнасцi, таму iснаванне палiтасветустаноў, што знаходзяцца на ўтрыманнi iнакш думаючай масы, асуджана на правал” [18, 181, л.53]. І на самай справе самаабкладанне не прыжылося, хаты-чытальнi пачалi актыўна лiквiдавацца, з сотняў iх засталiся адзiнкi. Сялянству аказалася не пад сiлу вытрымлiваць падатковы цяжар 1922 г. i аддаваць апошняе на ўтрыманне iдэалагiчных устаноў савецкай улады. З велiзарнейшымi цяжкасцямi змаглi заключыць, ды i то не ўсюды, калектыўныя пагадненнi на ўтрыманне школ, а толькi пачалiся размовы аб самаабкладаннi на карысць палiтасветустаноў, то вяскоўцы пачалi гаварыць: “Адкуль жа браць хлеб, гэта ж не пясок?” [18, 158, л. 7].
Правал iдэi быў прызнаны i на дзяржаўным узроўнi. Н.К.Крупская лiчыла, што хаты-чытальнi пачалi закрывацца па прычыне адсутнасцi матэрыяльнай падтрымкi з боку насельнiцтва i што гэты працэс супаў з тым “грозным момантам, калi ў сувязi з нэпам для вёскi ўзнiкла небяспека захлынуцца хваляй дробнабуржуазнай стыхii” [296, с. 55]. Па гэтай прычыне ХI з’езд партыi зняў пытанне аб аднаўленнi дзейнасцi хат-чытальняў на вёсцы. Згодна з яго рашэннямi з 1 кастрычнiка 1922 г. у кожнай воласцi ў асобным памяшканнi павiнна была адчыняцца хата-чытальня, загадчыкам якой прызначаўся цi загадчык валаснога палiтасвета, цi сябра камсамольскай ячэйкi. З’езд рэкамендаваў вясковым палiтасветустановам праводзiць работу ў “арганiзацыйна-гаспадарчым i культурна-асветным кiрунках замест адмiнiстрацыйна-прымусовага i палiтыка-агiтацыйнага” [289, с. 499].
22 лiстапада 1922 г. ГПА Беларусi паведамляў, што ён бярэ на свой баланс 96 хат-чытальняў: па Мiнскiм павеце – 10, Мазырскiм – 13, Слуцкiм – 15, Бабруйскiм – 20, Барысаўскiм – 20, Iгуменскiм – 18 [18, 149, л. 101]. Пры гэтым падкрэслiвалася, што хаты-чытальні будуць знаходзiцца пад сумесным кантролем павятовых палiтасветаў i аддзелаў агiтацыi i прапаганды павятовых камiтэтаў партыi. Пры iх павiнны дзейнiчаць стацыянарныя i перасоўныя бiблiятэкi для абслугоўвання воласцi, арганiзоўвацца гурткi, бюро даведак.
На працягу 1923 г. працэс фармiравання дзяржаўных палiтасветустаноў на вёсцы амаль завяршыўся. Iх кiруючым органам заставаўся Галоўны палiтыка-асветны камiтэт БССР, якi ўваходзiў у сiстэму Наркамата асветы, але дзейнiчаў пад непасрэдным кiраўнiцтвам аддзела агiтацыі i прапаганды ЦК КП(б)Б. Галоўпалiтасвет канкрэтызаваў агульныя партыйныя палажэннi аб мэтах i задачах палiтыка-асветнiцкай работы адносна ўмоў вёскi, вызначаў метады правядзення iх у жыццё, займаўся кадравымi пытаннямi. З 1924 г. структура яго органаў уключала акруговыя i раённыя камiтэты палiтасветы i нiзавыя ўстановы. Гэтая акалiчнасць дазволiла партыйнаму i савецкаму кiраўнiцтву больш настойлiва праводзiць партыйную лiнiю сярод сялянства, каб прыцягнуць яго на бок савецкай улады. Аднак не ўлiчвалася складанасць гэтай задачы з пункту гледжання псiхалогii сялянства, таму што многавяковыя культурныя стэрэатыпы сялянства ў хуткiм тэмпе пераадолець аказалася немагчыма. Трэба дадаць, што дзяржаўныя палiтасветустановы не змаглi таксама справiцца з пастаўленай задачай і па iншых прычынах, якiя будуць разгледжаны нiжэй.
Пасля першага ўзбуйнення БССР у 1924 г. пачалася новая адмiнiстрацыйная рэформа, яна пацягнула за сабою змены ў структуры палiтыка-асветных устаноў. Адпаведна ёй у кожным раёне стваралiся народны дом цi паказальная хата-чытальня, акрамя гэтага, не менш яшчэ за 2 хаты-чытальнi. У тым выпадку, калi насельнiцтва раёна перавышала 35 тыс. чалавек, там адчынялася яшчэ адна, дадатковая хата-чытальня. Як i ў многiх iншых выпадках, лiчбавыя даныя не супадаюць нi ў архiўных дакументах, нi навуковых даследаваннях, аднак дынамiка росту сельскiх палiтпрасветустаноў прасочваецца. Можна дадаць, што ў 1925 г. спрабавалi падлiчыць установы палiтасветы (на гэта адводзiўся тыдзень), аднак з месцаў нiхто не даслаў статыстычных справаздач [39, 155, л. 3, 8]. Тым не менш па архіўных дакументах можна прасачыць пэўную дынаміку, згодна адных даных у канцы 1924 – пачатку 1925 г. у рэспублiцы дзейнiчалі 249 хат-чытальняў i 67 народных дамоў [38, 1277, л. 34], па другiх апошнiх было 79 i нават 87 [52, 19, л. 840], а на пачатак 1926 г., па звестках Галоўпалiтасвета, дзейнiчалi 273 хаты-чытальнi i 55 народных дамоў [350, с. 296]. У канцы 1927 г. у рэспублiцы iснавалі 307 хат-чытальняў i 57 народных дамоў [23, 136, л. 149].
З разгортваннем палiтыкi беларусiзацыi нацыянальныя меншасцi атрымалi магчымасць карыстацца роднай мовай у школах, установах палiтасветы. У месцах кампактнага пражывання нацменшасцей адчынялiся нацыянальныя хаты-чытальнi. У 1925/26 г. у рэспублiцы дзейнiчалі 8 польскiх, 5 яўрэйскiх, 1 латышская хата-чытальня, праз год адпаведна – 19, 10 i 4 [23, 136, л. 152]. Некаторыя з iх стваралiся шэфамi. Напрыклад, Маскоўскiм польскiм рабочым клубам была адчынена хата-чытальня ў ваколiцы Пушча на Лагойшчыне. Шэфы дапамагалi лiтаратурай, накiроўвалi студэнтаў падчас канiкул, каб наладзiць працу хаты-чытальні [123, 65, л. 3–6].
Досыць цiкавая з’ява – узнiкненне так званых нясеткавых, цi дагаворных, хат-чытальняў. Яны стваралiся часцей за ўсё па iнiцыятыве камсамольцаў цi шэфаў i адлюстроўвалi арыентацыю моладзi на падтрымку мерапрыемстваў савецкай улады. Нагадаем вытрымкi з пiсьма аднаго са стваральнiкаў такой хаты-чытальнi з вёскi Якубы Гомельскага раёна: “Уся вёска спала непрабудным сном. За сталом сядзелi тры партыйцы, два камсамольцы, школьны работнiк i стары рабочы. Сядзелi i абмяркоўвалi, як арганiзаваць хату-чытальню. Хаця наша вёска i недалёка ад горада (усяго 2 вярсты), але за 6 гадоў, якiя прайшлi перад намi, на вёсцы не вiдаць яснага разумення перавароту ў нашай краiне, Савецкай улады, яе значэння, яе iмкнення правесцi ў жыццё iдэi У.I.Ленiна” [416, с. 4].
Дагаворныя хаты-чытальнi ўзнiкалi спантанна, але i хутка знiкалi, таму статыстыка гэтай з’явы не можа быць дакладнай. Выкарыстаем некалькi лiчбаў у якасцi iлюстрацыі тэндэнцыi развiцця названага працэсу: на 1 студзеня 1925 г. iснавалі 359 дагаворных хат-чытальняў [22, 5, л. 46], на 1 кастрычнiка – 346, з iх 123 шэфскiя [22, 19, л. 294]. Такiя ж абставiны характэрны i для ўзнiкнення дагаворных чырвоных куткоў, назва якiх гаворыць сама за сябе. Становiшча дагаворных устаноў было катастрафiчным, таму што ў мясцовых iнiцыятараў сродкаў не хапала, шэфы часта забывалiся наведваць падшэфныя хаты-чытальнi, часта наогул адмаўлялiся даваць грошы [14, 216, л. 38].
Дырэктывамi адпаведных устаноў прадпiсвалася мець сцэны ў кожным народным доме i куткi У.I.Ленiна ва ўсiх хатах-чытальнях. У сувязi са стварэннем у кожнай акрузе паказальных раёнаў для мясцовых хат-чытальняў прадугледжвалася выпiска дадатковай перыёдыкi [23, 19, л. 83]. Аднак у цэлым матэрыяльны стан палiтасветустаноў заставаўся вельмi цяжкiм. У 1924 г. толькi 45% хат-чытальняў знаходзiлiся ў спецыяльна адведзеных будынках. Па другiх даных – 23%, 12% – у адным памяшканнi з сельскiм Саветам, астатнiя ў сялянскiх хатах [38, 1277. л. 35]. У раённым бюджэце не прадугледжвалася спецыяльнага каштарысу на ўтрыманне хат-чытальняў, быў адзiн агульны на ўсе вiды палiтустаноў. Суадносiны памiж каштарысамi палiтасветы i народнай асветы ўстанаўлiвалiся як 1 да 5, аднак нi ў адной акрузе гэтыя суадносiны не вытрымлiвалiся [22, 19, л. 299]. Адпаведна бюджэту 1924/25 г. на народную асвету выдзялялася каля 2,5 млн. рублёў, з iх на працу ў вёсцы каля 25 тыс., аднак заўважым, што з гэтай сумы, па даных НК Рабоча-сялянскай інспекцыі, было выкарыстана чамусьцi толькi 10 тыс. руб. [38, 2178, л. 66].
Акругi таксама не выдзялялi сродкаў на хаты-чытальнi, што, безумоўна, не садзейнiчала развiццю iнiцыятывы хатнiкаў. У 1924 г. на гаспадарчыя расходы прадугледжвалася толькi 5 руб., на гэтую суму нельга было забяспечыць рамонт, ацяпленне i iнш. Некаторыя раёны задавальнялi гаспадарчыя патрэбы хат-чытальняў па чарзе [38, 1277, л. 11]. У паказальным Шклоўскiм раёне палiтасвет спынiў работу, заняўшыся рамонтам i абсталяваннем трох хат-чытальняў [24, 541, л. 54]. Некаторыя загадчыкi непасрэдна выходзiлi на шэфаў i прасiлi заплацiць пэўную суму за рамонт, таму што “раённы палiтасвет сродкаў не мае” [20, 6, 4 адв.]. Чэрвеньскi РПА прапанаваў перадаць хатам-чытальням усе сады, агароды, лугi, якiя знаходзяцца непадалёку, каб хатнікi змаглi перайсцi на самазабеспячэнне [19, 216, л. 82]. Загадчык Хутарской хаты-чытальнi гэтага раёна, каб знайсцi сродкi, планаваў зрабiць падпiсны лiст i распаўсюдзiць яго сярод грамадзян [14, 187, л. 21].
Вынiкi праверкi поўнасцю адпавядалi паведамленням з месцаў. Напрыклад, у справаздачы Мiнскага акруговага палiтасвета канстатавалася, што “зiмовы перыяд 1924/25 г. для многiх хат-чытальняў аказаўся вельмi цяжкiм. У некаторых раёнах яны засталiся без дроў i святла, з-за адсутнасцi сродкаў не маюць дастаткова мэблi. У большасцi сваёй хаты-чытальнi брудныя, няўтульныя, некаторыя па сваiм знешнiм выглядзе ўбогiя i не прыцягваюць наведвальнікаў” [14, 64, л. 141]. Надзвычай важнай i адначасова складанай аказалася праблема кадраў. Ад iх iнiцыятывы i квалiфiкацыі залежаў поспех партыйнай лiнii. Як вядома, на той час спецыялiстаў палiтасветработы не iснавала зусiм, ды i больш-менш адукаваных людзей не хапала. Прынцып “чыя хата прызнана чытальняй, той яе i ўзначальвае” не мог быць эфектыўным, таму што ўся дзейнасць такой установы заключалася ў атрыманнi газет.
ЦВК БССР быў вымушаны звярнуцца да работнiкаў культуры, ураджэнцаў Беларусi, з заклiкам: “Ваша вызваленая Радзiма кліча вас да сябе”. На першым часе кадры папаўнялiся з лiку былых чырвонаармейцаў, членаў батальённых цi палкавых культурна-асветных аб’яднанняў. Большасць з iх не ведала ўмоў Беларусi, асаблiвасцей яе вясковага ўкладу i народнай культуры, аднак дакладна выконвала лiнiю партыi. Была спроба стварыць сiстэму падрыхтоўкi кадраў для палiтасветных устаноў. У красавiку 1921 г. ЦК РКП(б) накiраваў цыркуляр у рэспублiканскiя партыйныя арганiзацыі, якi быў прадублiраваны на месцах. Згодна з iм у Мiнску “ў сувязi з выкананнем важнейшых задач камунiстычнай асветы мас” з 20 жнiўня 1921 г. адкрывалiся 6-месячныя курсы для палiтасветработнiкаў. Яны павiнны былi рыхтаваць з рабочых i сялян работнiкаў па асобных вiдах палiтасветы: клубнай справе, бiблiятэчнай, музейна-экскурсiйнай, па лiквiдацыі непiсьменнасцi. У нiзавыя арганiзацыi спускалася разнарадка [18, 148, л. 117]. Аднак трэба прызнаць, што дадзены дакумент – яшчэ адна iлюстрацыя адарванасцi партыйных органаў ад рэальнага жыцця. Не хапала сродкаў для таго, каб наладзiць работу курсаў, ды кандыдатуры слухачоў курсаў таксама падабраць было складана. Праўда, некаторыя даследчыкi [391, с. 22] прыводзяць лiчбы некалькiх соцень i нават тысяч падрыхтаваных палiтасветработнiкаў у Беларусi, што, на наш погляд, малаверагодна.
У пачатку 1920-х гг. асноўнай крынiцай кадравага папаўнення аказалася армiя. Многiя палiтасветработнiкi павятовага i валаснога ўзроўняў з’яўлялiся ўчарашнiмi чырвонаармейцамi, i метады iх дзеянняў былi адпаведныя. Дастаткова выразны дакумент – наступная заява з неразборлiвым подпiсам: “Як член РКП(б) 38-га стралковага палка, маючы прызванне да культасветработы, добраахвотна прыняў на сябе вядзенне спраў палiтасвета Крайскай воласцi” [18, 406, л. 3]. Адзiн з такiх работнiкаў, Я.Лукiн, паведамляў вышэйшаму начальству, што насельнiцтва супраць яго “довольно обострилось, и этим затруднялась газетная агитация”. Праз некаторы час ён жа паведамляў з другой воласцi: «За жнiвень 1922 года асабiста мною распаўсюджаны па вёсках на мiтынгах лiстоўкi “Што павiнен ведаць селянін аб адзiным натуральным падатку” i “Зварот да сялян наркама земляробства Якавенкi”. Лiстоўкi пра халеру таксама размеркаваны, а з удзельнікаў культасветгуртка выдзелена сантройка, якая абавязана кантраляваць чысцiню на вёсцы... Выпiсваем газету “Бедната”, але на рукi не даём, бо сяляне рвуць яе на цыгаркi, а не карыстаюцца друкаваным словам» [18, 165, л.181].
Пытанне аб падборы кадраў, якія адпавядалі б вылучаным задачам, паўстала вельмi востра з 1924 г., калi сфармiравалася структура i вызначылася мэта сельскiх палiтасветустаноў. У плане работы ГПА на 1924/25 г. першым пунктам стаяла неабходнасць сур’ёзнага падбору кадраў палiтасветы на вёсцы шляхам гутарак, знаёмства з анкетамi, перапiскi [19, 23, л. 125]. На падрыхтоўку кадраў звярталi ўвагу розныя iнстанцыі. Не выпадкова нарада старшынь райвыканкамаў у лютым 1925 г. вырашыла ў 1925/26 навучальным годзе адчынiць пазашкольны тэхнiкум i пачаць перападрыхтоўку хатнікаў [26, 1766, л. 28]. Большасць загадчыкаў сельскiх палiтасветустаноў з’яўлялiся членамi партыi цi камсамола. Згодна даных партыйных органаў, члены КП(б)Б складалi сярод iх 13,7%, кандыдаты ў члены партыi – 18%, члены КСМ – 45,5%, беспартыйныя – толькi 22,8% [23, 19, л. 295]. Безумоўна, лiчбы не могуць быць дакладнымi па прычыне значнай цякучасці кадраў. Кадравая сiтуацыя мянялася штодня, аднак прынцып падбору па партыйнай прыналежнасцi прасочваецца досыць выразна. Што тычыцца агульнаадукацыйнага ўзроўню, то, напрыклад, большасць загадчыкаў народных дамоў i хат-чытальняў Мiнскай акругi мелi толькi пачатковую адукацыю [14, 159, л. 74, 75].
Па гэтай прычыне пажаданага эфекту не прынеслi летнiя курсы перападрыхтоўкi хатнiкаў, арганiзаваныя ў 1925 г. у Вiцебску, Магiлёве, Мiнску. Як сведчаць афiцыйныя дакументы, яны не далi належных вынiкаў. Дарэчы, з 60 слухачоў мiнскiх курсаў 54 мелi дамашнюю цi пачатковую адукацыю, лекцыi iм чыталi выкладчыкi з вышэйшай i сярэдняй спецыяльнай адукацыяй. Мiнскiя курсанты выпусцiлi нумар насценгазеты, падрыхтавалi матэрыял для часопiса, аднак выпусцiць яго не змаглi. Пры закрыццi курсаў паставiлi спектакль [29, 529, л. 76, 77, 78]. Адзначалася, што да “метадычнай працы хатнiкi абсалютна не падрыхтаваны, адсутнiчае належная iнiцыятыва, многiя не ўмеюць арганiзаваць свой актыў i з’яўляюцца адзiночкамi” [38, 1277, л. 23]. Акрамя гэтага, хатнiкi не займалiся i самаадукацыяй. Як паведамлялася ў адным з дакументаў, “некаторыя нават не чытаюць газет, што адбiваецца на рабоце хат-чытальняў. Метадычную лiтаратуру не перапрацоўваюць i нават не разразаюць самай неабходнай” [14, 208, л. 148].
Дзеля паляпшэння работы хатнiкаў у многiх месцах практыкаваўся абмен вопытам на больш-менш рэгулярна праводзiмых канферэнцыях з папярэдне вызначанымi тэмамi. На iх абмяркоўвалiся пытаннi ўдзелу палiтасветработнiкаў у агульнадзяржаўных кампанiях, масавай рабоце, у працы настаўнiцкiх гурткоў, антырэлiгiйнай прапагандзе, выпуску насценных газет, iншых вiдах работы [14, 4, л. 125]. Аднак на адной з нарад засведчана, што “за 9 год Галоўпалiтасвет не выхаваў майстроў-хатнiкаў, бо гэта нялёгка” [8, 300, л. 71].
Намi адзначалася вышэй цякучасць кадраў. Адной з прычын гэтага з’яўлялася дрэннае матэрыяльнае забеспячэнне хатнiкаў, аклад якiх у сярэдзiне 1920-х гг. вагаўся ў межах 12–26 руб., хаця згодна ўрадавых пастаноў павiнен быў раўняцца зарплаце настаўнiка, 30–36 руб. у месяц. Цякучасць сярод загадчыкаў хат-чытальняў, напрыклад Магiлёўскай акругi, выражалася наступнымi данымi: з 40 работнiкаў толькi трое мелi стаж 4 гады, 13 чалавек – 2 гады, адзiн – 3 гады i 23 хатнiкi працавалi менш года [23, 5, л. 40]. Пытанне цякучасці кадраў абмяркоўвалася на розных узроўнях. У лiку мер яе лiквiдацыi разглядалiся магчымасць павелiчэння зарплаты, адкрыццё спецыяльнай навучальнай установы, умацаванне iснуючых хат-чытальняў без пашырэння iх сеткi i iнш. [23, 19, л. 298].
Большасць хатнiкаў з’яўлялiся сакратарамi камсамольскiх ячэек i таму ператваралi сельскiя палiтасветустановы ў клубы моладзi. Старшыня ГПА, адзначаючы гэты факт, канстатаваў, што “работа iдзе па лiнii найменшага супрацiўлення, робяцца спектаклi i танцулькi” [23, 11, л. 62]. Сялян сталага ўзросту хата-чытальня не прываблiвала. Вырашыць iх праблемы гэтыя ўстановы не маглi па прычыне сваёй матэрыяльнай i кадравай слабасцi. Культурная рэвалюцыя на вёсцы прывабіла толькi моладзь, якая стала яе актыўным удзельнiкам i праваднiком.
На нашу думку, самага падрабязнага вывучэння патрабуе пытанне аб ролi сельскага настаўнiцтва ў жыццi вёскi, у тым лiку i ў культурным. Безумоўна, настаўнiкi з’яўлялiся галоўнымi выканаўцамi ўсiх партыйных i савецкiх дырэктыў. Каб уявiць ролю настаўнiцтва ў тагачасным жыццi, працытуем справаздачу М.Лiпскага, настаўнiка Пухавiцкай сямiгодкi: «10 дзён працаваў па сельскагаспадарчым падатку, у камiсii па праверцы пiсьменнасцi дапрызыўнiкаў, па перавыбарах сельсаветаў, з’яўляюся членам i санiтарным апекуном Пухавiцкага сельсавета, старшынёй рэвiзiйнай камiсii камiтэта сялянскай узаемадапамогi, выступаў з дакладамi “Лясы мясцовага значэння” i “Карысць страхавання” на сходах грамадзян, 2 разы на тыдзень праводзiў заняткi ў вячэрняй школе, пiшу артыкулы ў насценную газету» [44, 127, л. 25]. Вiдавочна, што работа праводзiлася значная, прычым у вольны час i без матэрыяльнага заахвочвання [141]. Аднак партыйныя органы дзеля надання ўсёй рабоце палiтычнага зместу распарадзiлiся арганiзаваць курсы палiтпадрыхтоўкi для сельскай iнтэлiгенцыi. Па Мiнскай акрузе праз iх прайшло каля 70% настаўнiкаў, а вось урачы, аграномы палiтпадрыхтоўку праiгнаравалi [14, 197, л. 30].
Вышэй адзначалася, што адной з умоў поспеху культурнай рэвалюцыi з’яўлялася ўсямернае развiццё самадзейнасцi мас. Як адну з праяў такой палiтыкi можна расцэньваць стварэнне савета хаты-чытальнi, у якi ўваходзiлi загадчык, тры прадстаўнiкi ад сялянства i па адным прадстаўнiку ад ячэек. Савет быў справаздачны перад раённым палiтасветам. Аднак моцных саветаў iснавала мала, на думку кiраўнiцтва, усяго толькi каля 20% [23, 19, л. 296].
Метады кіравання нiзавымi палiтасветустановамi – яшчэ адна праблема. Шматлiкiя архiўныя дакументы сведчаць, што быў абраны стыль каманды, загадаў, пасылкi ўпаўнаважаных, якiя не аказвалi нi практычнай, нi маральнай падтрымкi, толькi праводзiлi “накачку”. Асаблiва вызначалася кiраўнiцтва Барысаўскага павятовага палiтасвета, якое патрабавала рэгулярных справаздач з валасцей, таму што “інакш немагчыма арыентавацца, у якiм стане работа i ў якiм кiрунку рабiць агульныя кiруючыя ўказаннi. Невыкананне загаду пацягне за сабою суровыя меры пакарання, аж да арышту загадчыка валпалiтасвета i перадачу яго пад суд за бяздзейнасць на службе” [18, 381, л. 21, 41].
Паўстае пытанне: чаму ўзнiкла такая схема адносiн у сiстэме палiтасветы? На нашу думку, па-першае, яна з’яўлялася часткай структуры савецкага грамадства і пазбегнуць уздзеяння камандных сродкаў кiравання не магла; па-другое, як кiраўнiцтва, так i радавыя работнiкi палiтасветы аказалiся маладасведчанымi людзьмi ў сваёй галiне, а некаторыя – нават i малаадукаванымi, таму яны больш спадзявалiся на сiлу загаду i пагрозы, чым на свае веды i аўтарытэт. Па-трэцяе, увачавiдкi праяўляўся “астаткавы прынцып” пры размеркаваннi сродкаў, iнакш не з’яўлялiся б наступныя рэзалюцыi: “Служба ў хатах-чытальнях не патрабуе цяпла цi спецыяльнага адзення, расходаў на ацяпленне i асвятленне” [18, 383, л. 416].
Памiж кiруючымi i нiзавымi кадрамi палiтасветаў адбывалася як бы нейкая гульня: адны аддавалi загады, другiя (асаблiва тыя, хто меў некаторы жыццёвы вопыт) пiсалi аптымiстычныя справаздачы. Вось, напрыклад, як выглядала справаздача Крайскага валпрасвета: “Работа вялася быццам бы нармальна, але справаздачы не высылалiся з-за адсутнасцi хоць трохi адукаванага загадчыка. У сакавiку быў пастаўлены спектакль з канцэртам на карысць Чырвонай Армii. На выпiску газет сродкаў не было... Школьныя работнiкi ў прыватным парадку куплялi газету i арганiзоўвалi галосныя чыткi. Чыталi вечарамi ў школе i ў заключэнне пад шумок праводзiлi мiтынгi, якiя не рэгiстравалiся, але прыкладна 12. Большая частка сялян цiкавiцца газетай, i пасля чытання свежай газеты лёгка правесцi мiтынг” [18, 406, л. 78]. На нашу думку, справаздача была разлiчана на кiраўнiцтва павятовага палiтасвета i выканана ў жанры лепшых бюракратычных узораў, што характарызуе дастаткова высокi адукацыйны ўзровень яе аўтара, а не сапраўдны стан палітыка-асветніцкай работы ў воласцi.
Захавалася зводка работы Лагойскай хаты-чытальнi з 1 па 15 студзеня 1923 г. Згодна з ёй праца кiпела кожны дзень: 1-га – палiтычны агляд за 1922 г.; 2-га – лекцыя аб паходжаннi жыцця на Зямлi; 3-га – лекцыя аб паходжаннi чалавека; 4-га – лекцыя аб рэвалюцыі 1905 г.; 5-га – свабодная вечарына; 6-га – аб свяце КСМ, аб арганiзацыі драмгуртка; 7-га – святкаванне гадавiны КСМ, даклад аб значэннi Камуністычнага саюза моладзi, канцэрт i г.д. Загадчык прыводзiць вялiкiя лiчбы наведвальнiкаў – ад 20 да 100 чалавек [18, 193, л. 18], што павiнна засведчыць значную папулярнасць хаты-чытальнi. Аднак калi яна i была, то толькi сярод моладзi, таму што справаздача адлюстроўвае палiтыка-асветны характар работы, якая прываблiвала ў асноўным моладзь i ператварала хату-чытальню ў камсамольскi цэнтр.
Пры аналiзе выступлення на шматлiкiх канферэнцыях, нарадах ствараецца ілюзія бурнай дзейнасці. Напрыклад, на нарадзе прадстаўнiкоў павятовых палiтасветаў у снежнi 1921 г. па Мiнскiм павеце прыводзiлiся такiя лiчбы: “Арганізавана 249 мiтынгаў, 131 лекцыя, 37 беспартыйных канферэнцый, 13 спектакляў. Другiя паветы давалi значна меншыя лiчбы, а прадстаўнiк Мазыршчыны наогул заявiў, што хаты-чытальнi існуюць толькi на паперы”. Загадчык Бабруйскага палiтасвета паведамляў аб слабай рабоце хат-чытальняў, таму што “іх загадчыкi не атрымоўваюць зарплаты, аднак апошнiм часам сталi прызначаць чырвонаармейцаў i работа пачала наладжвацца”. Звярталася ўвага на “контррэвалюцыйныя настроi сярод школьных работнiкаў” [18, 149, л. 4, 5]. Гэтыя выступленні адлюстроўваюць розныя падыходы да справаздачы, прама супрацьлеглую ацэнку дзейнасцi хат-чытальняў i тым самым розную ступень падрыхтаванасцi i кемлiвасцi мясцовага кiраўнiцтва.
Галоўпалiтасветам у 1925 г. для загадчыка была распрацавана даволi цiкавая iнструкцыя. Напрыклад, у §7 гаварылася: “Перад адкрыццём хаты-чытальнi ўсё павiнна быць падрыхтавана: запалена святло, чыста вымыта i падмецена, перыядычны друк раскладзены на сталах, плакаты i лiстоўкi развешаны па сценах”. У §8 загадчыкаў заклiкалi зрабiць хаты-чытальнi “як мага больш зручнымi i ўтульнымi для наведвальнiкаў. Пры наяўнасцi некалькiх наведвальнiкаў прыступаць да чыткi газет i абмеркавання”. Мабыць, зверху ўяўлялася, што як толькi сяляне пачнуць чытаць, дык адразу стануць падтрымлiваць палiтыку савецкай улады. Па гэтай прычыне ў §12 гаварылася пра абавязак хатнiка “цесна злiцца з масай, блiжэй да яе падысцi, прыслухоўвацца да яе патрэб, культурна-бытавых патрабаванняў”. Самае галоўнае заключалася ў апошнiм параграфе: “Загадчык хаты-чытальнi сумесна з яе саветам адшуквае сродкi з мясцовага фонду для задавальнення патрэб хаты-чытальнi, рамонту, ацяплення, асвятлення, утрымання тэхнiчнага персаналу. Аб вынiках пажадана рабiць справаздачы на валасных выканкамах, копіі iх адсылаць у павятовы палiтасвет” [18, 151, л. 249].
У адносiнах да ўсёй сiстэмы палiтасветы на справе пераважала думка аб яе другараднасцi, хаця на словах прызнавалася вялiкае значэнне. Доказам гэтага факта можа быць астаткавы прынцып матэрыяльнага забеспячэння, аб чым ужо гаварылася раней. Дарэчы, раённае звяно палiтасветы таксама слаба ўяўляла сваё месца памiж прафсаюзам i камсамолам [14, 216, л. 39]. У самой структуры палiтасветы квiтнела “камчванства” ў адносiнах да нiжэйшых устаноў. У канцы 1926 г. старшыня ГПА С.А.Шамардзiна на пасяджэннi iнспектуры настойвала на “закручванні гаек”, на высвятленнi “фактычнага становiшча”. Была распрацавана падрабязная схема праверкi ўстаноў палiтасветы, якая ўключала блокi пытаняў аб матэрыяльным стане, усiх кiрунках працы, адносiнах насельнiцтва, справаздачнасцi [14, 211, л. 94, 121]. Аднак трэба прызнаць, што нiзавыя работнiкi не спяшалiся выконваць загады, аб чым сведчаць шматлiкiя грозныя распараджэннi ў iх адрас. Напрыклад: “...пры абследаваннi палiтасветпрацы высветлiлася, што некаторыя дырэктывы райпалiтасветкамамi не выконваюцца... Таксама (што асаблiва характэрна) не выконваюцца тыя планы, якiя складаюцца самiмi ж РПА. Такiм асобым гонарам ад РПА да выканання дырэктыў заражаюцца i некаторыя хаты-чытальнi. Напрыклад, загадчыкi Жодзiнскай, Грабенскай хат-чытальняў не прачыталi нiводнага лiста, якiя iм пасылаліся, нягледзячы на жыццёвую iх неабходнасць для працы” [14, 166, л. 152]. Падчас раённых канферэнцый хатнiкаў усе выступоўцы скардзiлiся на адсутнасць увагi i дапамогi з боку раённага начальства, на бессiстэмную і бязмэтавую перакiдку загадчыкаў вясковых палiтасветустаноў з месца на месца, нават без iх згоды i ведама акруговага кiраўнiцтва [14, 444, л. 12].
Падчас праверкi стану вясковых палiтасветустаноў быў занатаваны ў афiцыйных дакументах вывад, што некаторыя кiраўнiкi глядзяць на культработнiка як на «выканаўцу іх волi i задання, а не як на роўнага сабе работніка ў агульнай справе. Прычым найбольш актыўная частка нагружаецца “да адказу” на шкоду сваёй асноўнай рабоце. Адносіны да неактыўнай часткi адмоўныя, нават момантамi пагардлiвыя, не наш, маўляў, элемент» [38, 2175, л. 39]. Асобныя кiраўнiкi лiчылi, што вылучэнне хатнiкаў на грамадскую працу “служыць доказам iх аўтарытэту ў вачах насельнiцтва” [14, 159, л. 65 адв.]. Перапiска памiж загадчыкамi вясковых палiтасветустаноў i раённым начальствам адлюстроўвала толькi патрэбу ў статыстыцы, але як ажывiць работу, прыстасаваць да інтарэсаў вёскi, рэкамендацый не давалася. Фактычна загадчыкi хат-чытальняў працавалi самi па сабе.
Каб трымаць палiтыка-асветнiцкую работу на вёсцы пад кантролем, раёны практыкавалi выклiкi хатнiкаў з вуснымi дакладамi. Уводзiлася спецыяльная справаздачнасць. На чатырох вялiкiх старонках размяшчалiся самыя падрабязныя пытаннi па раздзелах “Агульныя звесткi”, “Масавая работа”, “Гурткі”, “Бiблiятэкi”, “Газеты”, “Куткi”, “Даведачная праца”, “Кааператыўная прапаганда”, “Лiквiдацыя непiсьменнасцi”, “Пажаданнi хатнiкам”. Для многiх вясковых работнiкаў стымулам для запаўнення справаздачных формаў з’яўляўся “страх перад начальствам” [15, 9, 72, 73]. Запаўняць iх трэба было ў двух экзэмплярах штомесячна, i, безумоўна, малапісьменныя хатнiкi рабiлi гэта як маглi. Аднак сустракаюцца i досыць цiкавыя справаздачы, аб якiх будзе сказана нiжэй. Трэба заўважыць, што раздзелы справаздачнай ведамасцi адпавядаюць асноўным кiрункам асветнiцкай работы на вёсцы, канчатковае вызначэнне якiх прыпадае на 1924 г. Акрамя гэтага, кожная хата-чытальня павiнна была складаць каляндарныя планы, кантраляваць дзейнасць гурткоў, весцi ўлiк актыву, культурных сiл, справаздачныя кнiгi i дзённiк.
Пры абмеркаваннi працы вясковых палiтасветустаноў заключэнне рабiлася не на iх карысць. Як сведчаць архiўныя дакументы, яе прызнавалi нездавальняльнай у пераважнай большасцi выпадкаў. Падставай для такiх рашэнняў з’яўлялiся розныя ўмовы: адсутнасць планаў, невыкананне дырэктыў вышэйшых органаў, бяздзейнасць гурткоў, слабы кантакт з настаўнiцтвам. Абмяжуемся толькi дзвюма крынiцамi – пратаколамi пасяджэння Магiлёўскай саўпартшколы i iнспектарскай нарады Мiнскага акруговага аддзела народнай асветы. У першым на падставе вынiкаў зiмовай практыкi курсантаў у 24 раёнах 10 акруг зазначалася: “Вельмi малая ўвага надаецца палiтасветустановам з боку партыйных i савецкiх устаноў. Палiтасветустановы ў загоне, шмат у прахадных пакоях, сумесна з сельсаветамi, у сялянскiх дрэнных хатах або ва ўласным заняпалым будынку. Слабы падбор хатнiкаў, калi ёсць здольныя, дык яны перагружаны... Працай хат-чытальняў нiхто не цiкавiцца i не кiруе, працуюць як давядзецца. Адсутнасць улiку i планавасцi, таму не можа быць i пераемнасцi... Абсталяваны хаты дрэнна” [14, 187, л. 398]. Другi дакумент, на нашу думку, – дадатковая iлюстрацыя да першага. Ён напiсаны на аснове абследавання хат-чытальняў у Смалявiцкiм i Лагойскiм раёнах i канстатуе: “Верхменьская хата-чытальня зусiм не ацяпляецца, Кораньская знаходзiцца ў былым ксяндзоўскiм доме, дом вялiкi, яшчэ моцны, але дах згнiў, цячэ, столь гнiе, комiны развалiлiся. 100 руб., якiх патрабаваў загадчык на рамонт даху, не было адпушчана, а цяпер i 500 руб. будзе мала. У адным памяшканнi i бэлькi абвалiлiся, наогул увесь дом пад пагрозай. Дах над чытальняй так цячэ, што дажджом змывае плакаты са сцен, а з плакатаў – фарбу. Комiну вышэй столi няма, дым сцелецца пад дахам, а iскры сыплюцца са столi...” [8, 300, л. 153]. Вывад з гэтых фактаў быў зроблены адпаведна прынятым у той час правiлам: загадчыку хаты-чытальнi аб’явiлi вымову, а раённыя арганiзацыі абавязалi зрабiць рамонт.
Хацелася б засяродзiць увагу на тым, што мы спецыяльна не падбiралi адпаведныя негатыўныя факты, каб адлюстраваць дрэнны стан вясковых палiтасветустаноў i нiзкую эфектыўнасць iх працы. Такiх матэрыялаў архiўныя фонды захоўваюць вялiкае мноства. Большасць з iх напiсаны хаця i не вельмi адукаванымi, аднак адказнымi за справу людзьмi i не могуць не хваляваць сённяшняга чытача. Калi даследуюцца такiя дакументы, калi сустракаецца характарыстыка палiтасветработы “нi к чорту не гадзiцца”, то ствараецца абгрунтаванае ўражанне яе нездавальняльнага стану. І не таму, што яна адставала ад тэмпаў гаспадарчага будаўнiцтва, патрэб сялянства i часта зменлiвай партыйнай лiнii, а перш за ўсё па прычыне яе неадпаведнасцi сацыяльна-псiхалагiчнаму настрою вёскi.
Такiм чынам, працэс вызначэння структуры сельскiх палiтасветустаноў у асноўным завяршыўся да 1923 г., у далейшым адбывалася яе ўдасканаленне. Аднак нi матэрыяльнае, нi кадравае забеспячэнне хат-чытальняў не адпавядала пастаўленым перад iмi задачам. Вясковыя ўстановы палiтасветы не атрымлiвалi неабходнай метадычнай, iнфармацыйнай i псiхалагiчнай падтрымкi з боку кiруючых органаў.