Книга четвертая и последняя

О показателном слове и о начале его и характире (изображении)<…>

Глава 1. О веществе пахвалы или о тех, им же отдается похвала

Начинаем убо от дия, сиречь от Бога, яко же рече Феокрит, на похвалу Бога (Божию) две вещи смотряются: вещество и вид. Зде вещество именую епихириму (силлогисм) похвалы, сиречь пространнейшыя добродетели Божия, вид же – образ и характер (начертание, изображение).<… >

Глава 2. Похвала от человека отлученным (отделенным) вещем

Вещы сия, понеже числом неисчетны суть, невозможно ми вся обяти, тем же от разных (многых и) малы некия предложу изрядны роды, в них же изявлю (покажу) главы похвалы, сиречь сущыя доводы похвал, ко оных отдаемых.<… >

Похвала художества или ромесла родственне

Убо похвалятися от медоточнаго ритора художество коеждо сими главы:

1) благородие того, толико от достоинства, вещества доводимаго, елико и от снискателей того, и учителей и прочая;

2) полза того, исчисляюще ползы и честная радования (и веселия), от него бывающия;

3) удобство ко онаго стяжанию, еже и в похвалу полагается (яко во образ зриши).

Тожде (древо) служити может и на (частную) похвалу коего либо ремесла или художества видственно, яко же (на похвалу) риторики или философии или и самыя феологии (богословии).<… >

Похвала града. Аще похощеши похвалити кий либо град или страну, сказати подобает (настоящыя) главы сия:

1) начало того (града или страны): когда, от кого и чесого ради основася, елико время пребывает и восцвете невредим, цел и славен и прочая;

2) местоположение того, аще на версе горы или на пространном поле обретается (и под которую планетою) и под которым владением небес зрит: под востоком ли, или под западом, или под севером ли, или под полуднем и прочая;

3) начертание того каково есть: продолжено ли в долготу, или четвероуголно (простерто), или сферовидно (окружено) и прочая;

4) сущая в нем жилища какова суть вещества и вида, какови в нем стогни, пути и стези и торжища, какови храми и палаты;

5) стражи того, грады, вежи, стены, забрала, валы, предградия и прочая;

6) нивы и сады и вертограды того (и яко) благоплодни и плодоносни и каков плодоносящь;

7) жители того, в них же подобает разсмотрити благочестие и веру, благость нравов, закона хранение и проч.

Глава 3. Похвала лиц

Похвала младенцу. На похвалу младенцу (коего‑либо) подобает сказати главы сия:

1) род его‑толико отеческий, елико матерний и сравнение добродетелей обоих, яко же рещи: сияние благородия, приятаго от родителей (своих) паче сияет на челе отрочати, в нравах же отеческая доблесть блистает пред очами, матерняя честность дышит на челе его;

2) вид избранный притворити, глаголя, яко сие отроча естественно есть чюдно благодатию, избраннейшо достоинством, честностию радостнейшо, в наслаждениих добродетелнейшо;

3) остроту ума и чудную сладость, юже оттуду износит, или во еже восхити начала изрядных художеств, и во еже глаголати остро, сравнити же ум его чистейшему алавастру, отверсту присно во еже изливати сладчайшую воду учителств и прочая;

4) движений или начертаний его красоту, яже раждает ему от всех любовь и прочая;

5) добродетели, случавшыяся в младом возрасте, яко стыд (говение), нравов чистоты, детских играний презрение, мудрование, тягость и прочая;

6) надежду великих вещей, глаголя, коликий свет славы излиет сия пресветлая звезда и самый полуднь лет, яже толико возблиста на возсияние своего возраста. Но довлеет сия лицу отрочати реченая, да приидем же на похвалу отрочате, удобно избереши и иным приличная.

Похвала юноши. О юноше можеши похвалити (по главам сим):

1) добродетели душевныя;

2) силы умныя, яже показует;

3) телесныя дары;

4) еще добродетель юноши благая будет, аще лишится злоб юности естественных сущых.

Похвала мужа. Понеже возраст мужа есть крепкий и цветнейший и изобилен великих добродетелей и ниже удобно похотем работает, невозможно лучше и похвалити, разве аще покажеши в нем добродетели великия и многия и никакому злу и подлежаща или зело малым, яковым же быти оным добродетелем мало после научу.

Похвала старым. Старого похвалити:

1) от твердости ума; яко не повреждается немощию злых от недугов и от повреждений старости;

2) от свойственнаго благочестия и от превосходящаго мудрования;

3) от разума сравняти с великим обычаем вещей;

4) совершенства совершенныя добродетели;

5) к сим приложатся и иные похвалы, яко: аще не разрушится киим‑либо тлением злых, им же возраст оный подлежит.

Похвала царю или царице. Мужие и жены, царие или царицы свойственныя имут похвалы, их же не имат кииждо простый человек. Тем же аз изочту их благо особно.

Похвале цареве от сих добродетелей леть составлятися:

1) еже к Богу благочестия, от еже к подданным свободы, от еже к повинным благоутробия, от еже ко всем человеколюбия и прочая;

2) от прилежания, еже управляти жителство; от правды во еже защищати неповинныя и мучити злыя; от воинския добродетели, во еже сокрушати враги; от мерности, во еже обуздати похоти; от великолепия в градския здания и в дарования и прочая. Царицы похвалы сия суть:

1) от светлости рода;

2) от перваго воспитания возраста благочестна и свята;

3) деторождение и чад изрядное воспитание;

4) еже к мужу покорение;

5) ума мерность, стыд, жизни совершенность, свобода, равность в благополучных вещех;

6) твердость в противных, теплое тщание, ко еже распространити благочестие и прочая.<… >