- •I.М. Малашук
- •Беларуская мова. Прафесійная лексіка:
- •Камунікатыўны аспект
- •Вучэбна-метадычны дапаможнік
- •Раздзел 1. Правiльнасць маўлення
- •1.1. Цяжкія выпадкі маўлення і націску
- •Практычныя заданні
- •1.2. Лексічныя і граматычныя нормы
- •Практычныя заданні
- •Раздзел 2. Асноўныя камунiкатыўныя якасцi маўлення
- •2.1. Дакладнасць маўлення
- •Практычныя заданні
- •2.2. Эканамічнасць і паўната маўлення
- •Практычныя заданні
- •2.3. Лагічнасць маўлення
- •Практычныя заданні
- •Раздзел 3. Функцыянальныя стылi мовы
- •3.1. Пісьмовае навуковае маўленне
- •Практычныя заданні
- •3.2. Афіцыйна-дзелавое пісьмовае маўленне
- •Тэматычныя і функцыянальныя тыпы дзелавых папер
- •Практычныя заданні
- •Аўтабіяграфія
- •01.04.2000. П.С. Лазаковіч
- •Iншыя звесткі:
- •Iнтарэсы, схільнасці:
- •Iншая дапаможная інфармацыя:
- •Раздзел 4. Тэксты для перакладу Тэкст 1
- •Тэкст 2
- •Тэкст 3
- •Тэкст 4
- •Тэкст 5
- •Тэкст 6
- •Тэкст 7
- •Тэкст 8
- •Тэкст 9
- •Тэкст 10
- •Тэкст 11
- •Тэкст 12
- •Тэкст 13
- •Тэкст 14
- •Тэкст 15
- •Тэкст 16
- •Тэкст 17
- •Тэкст 18
- •Тэкст 19
- •Тэкст 20
- •Тэкст 21
- •Кароткi тэрмiналагiчны руска-беларускi слоўнiк
- •Лiтаратура
- •Беларуская мова. Прафесійная лексіка: камунікатыўны аспект
3.1. Пісьмовае навуковае маўленне
Гэта мова манаграфій, навуковых артыкулаў, падручнікаў, даведнікаў.
Якасці навуковага маўлення і яго асаблівасці:
-
аб’ектыўнасць, якая праяўляецца ў асвятленні розных пунктаў гледжання на праблему, у адсутнасці суб’ектывізму пры перадачы зместу, у безасабовасці моўнага выражэння, у засяроджанасці на прадмеце выказвання;
-
лагічнасць, якая праяўляецца ў паслядоўнасці і несупярэчлівасці выказвання і ствараецца з дапамогай асаблівых сінтаксічных канструкцый (складаныя сказы з даданымі прычыны, умовы, сказы з пабочнымі словамі: па-першае, такім чынам і г.д.) і тыпічных сродкаў міжфразавай сувязі (лексічныя паўторы, сінанімічныя замены, злучнікі, займеннікі);
-
доказнасць – навуковае маўленне складаецца з ланцуга разважанняў, аргументацыі пэўных палажэнняў і гіпотэз;
-
дакладнасць, якая дасягаецца выкарыстаннем тэрмінаў, адназначнасці слоў, выразным афармленнем сінтаксічных сувязей слоў;
-
абагульненасць і абстрактнасць, якія праяўляюцца ў адборы слоў (перавага назоўнікаў над дзеясловамі, агульнанавуковыя словы, назоўнікі з абстрактным значэннем, канкрэтныя назоўнікі ў абагульненым значэнні), ва ўжыванні формаў слоў (дзеясловы цяперашняга часу ў «пазачасавым» значэнні, зваротныя і безасабовыя дзеясловы, перавага формаў 3-й асобы дзеясловаў, формаў незакончанага трывання), у выкарыстанні сінтаксічных канструкцый (няпэўна-асабовыя сказы, абароты з формамі залежнага стану).
Асноўныя тыпы маўлення ў навуковым стылі – апісанне і разважанне. Чытаючы ці слухаючы навуковы тэкст, вы сочыце за развіццём думкі аўтара (паслядоўнасцю, логікай разважання, вылучаеце галоўную і другасную інфармацыю і г.д.). Спецыяльныя абароты (неабходна ўлічыць, у выніку, з гэтага вынікае, такім чынам і інш.) дапамагаюць аўтару акцэнтаваць увагу на важнейшых момантах разважання.
Віды звязнасці тэксту. У навуковым тэксце інфармацыя павінна перадавацца ў строгай лагічнай паслядоўнасці. Сувязь папярэдняга і наступнага, прычынныя, выніковыя і іншыя адносіны павінны быць абазначаны з дапамогай розных відаў звязнасці тэксту:
1. «Змястоўныя» паўторы, якія дазваляюць узнавіць змест папярэдняга сказа ў наступным. Тут часта ўжываюцца займеннікі, напрыклад: “Стан беларускай мовы ў наш час уяўляе сабой вастрэйшую праблему для ўсёй дзяржавы, для ўсяго грамадства. Гэта тлумачыцца тым, што ў мове зафіксаваны ўвесь гістарычны вопыт народа”.
2. Злучнікі, злучальныя словы, пабочныя словы, займеннікі, якія ўказваюць на прычынна-выніковыя і іншыя адносіны, напрыклад: тым самым, па прычыне гэтага, такім чынам і г.д.
3. «Паказчыкі» развіцця думкі аўтара:
- актывізацыя думкі: высветлім, чым адрозніваюцца; пяройдзем да разгляду…
- лагічнае выдзяленне думкі: неабходна падкрэсліць, трэба адзначыць…
- сувязь з вышэйсказаным: як ужо было адзначана…
- сувязь з наступным: далей спынімся на…
- ацэнка інфармацыі з пункту гледжання яе даставернасці: безумоўна, як вядома…
Віды інфармацыі ў навуковым тэксце: асноўная, дадатковая (канкрэтызуючая, ілюструючая асноўную), дубліруючая.
Спецыфікай навуковага стылю з пункту гледжання ўжывання моўных адзінак з’яўляецца тэрміналогія.
Тэрмін – слова ці словазлучэнне, якое абазначае якое-небудзь паняцце. У кожнай галіне навуковых ведаў існуе свая тэрмінасістэма, у якой тэрмін павінен быць адназначным.
Прыёмы тлумачэння тэрмінаў:
-
лагічнае азначэнне;
-
падбор сінонімаў;
-
апісальны спосаб;
-
этымалагічны спосаб.
Кожны тэрмін унутры тэрміналагічнага поля выяўляе цэлы рад сваіх асаблівасцей:
-
адназначнасць;
-
адсутнасць экспрэсіі і эмоцый;
-
сістэмнасць.
Iменны характар навуковага маўлення вызначаецца тым, што тут часцей, чым дзеясловы, выкарыстоўваюцца іменныя часціны мовы, асабліва назоўнікі. Тыпічнымі для навуковага стылю з’яўляюцца ланцужкі назоўнікаў у форме роднага склону, напрыклад: “У сучасным навуковым стылі не прынята, хаця і сустракаецца, выкарыстанне адзіночнага і множнага ліку першай асобы дзеяслова і займенніка”.
Сінтаксічныя асаблівасці.
Для навуковых тэкстаў тыпічна:
- перавага састаўных іменных дзейнікаў, напрыклад: “Мастацкае маўленне – вышэйшая форма творчага выкарыстання мовы”;
- ужыванне дзеяслоўна-іменных словазлучэнняў у якасці выказніка, напрыклад, аказваць уздзеянне, прыходзіць да заключэння;
- ужыванне наступных відаў простых сказаў, напрыклад:
Вылучаюць некалькі відаў…
Устанавілі, што…
Выведзем формулу з…
Лічыцца, што…
Указваецца на тое, што…
Можна вызначыць (устанавіць)…
Аб’ектыўны парадак слоў у навуковым маўленні абазначае, што новая інфармацыя размяшчаецца ў канцы сказа.
Жанры пісьмовага навуковага маўлення:
Анатацыя і рэферат тэксту – гэта другасныя тэксты, якія састаўлены на аснове тэкста-крыніцы ў выніку аналізу і абагульнення інфармацыі.
Рэферат – кароткая, але адэкватная па зместу перадача зместу першакрыніцы. Можна вылучыць рэферат-канспект (інфарматыўны), рэферат-рэзюмэ, рэферат-агляд, рэферат-даклад.
У інфарматыўным рэфераце ў абагульненым выглядзе змяшчаюцца ўсе асноўныя палажэнні першаснага тэксту, прыводзіцца аргументацыя дадзеных палажэнняў, звесткі аб метадах даследавання, падаюцца вывады, да якіх прыйшоў аўтар.
У рэфераце-рэзюмэ коратка падаюцца вывады, вынікі праведзенай работы.
У рэфераце-аглядзе супастаўляюцца існуючыя кропкі гледжання на якое-небудзь пытанне. Гэты рэферат пішацца на матэрыяле 2-х і болей крыніц.
Рэферат-даклад мае на ўвазе аналіз, перапрацоўку і ацэнку інфармацыі, што ўтрымліваецца ў першасных тэкстах, пункт погляду складальніка рэферата на стан праблемы.
Анатацыя – сціслая, кароткая характарыстыка кнігі (зборніка, артыкула), яе зместу і прызначэння. У анатацыі пералічваюцца галоўныя пытанні, праблемы першаснага тэксту, характарызуецца яго структура.