О московском пожаре и восстании 1547 г.

… месяца (июня) 21, во вторник, в 10 час дни … загореся храм Воздвижение честнаго креста за Неглимною на Арбатской улице на Острове. И бысть буря велика, и потече огнь, якохе молния, и пожар силен промче во един час Занеглимение огнь и до восполия… И обратися буря на град болший (Кремль), и загореся во граде у соборные церкви Пречистыя верх, и на царском дворе великого князя на палатах кровли, и избы древяные и полеты, украшенные златом, и Казенной двор с царьскою казною, и церковь на царьском дворе у царьскые казны Благовещение златоверхая, деисус Андреева писма Рублева, златом обложен, и образы, украшеныя златом и бисером, миогоценныя, греческаго писма, прародителей его от много лет собранных; и казна великаго царя погоре, и Оружничая полата вся погоре с воиньскым оружием, и Постелная полата с казною выгоре вся; и в погребех на царьском дворе под полатами выгоре вся древяная в них, и конюшня царьская. И по многом церьквам каменным выгорели деисусы и образы и сосуды церковныя, и животы многое людскые, и двор митрополичь...

А митрополите Макария едва вызваша из церкви, великого для попущения божия дымнаго духа мало не позадохшася во церкви: и поиде митрополит из церкви (и нес на собе и пречистые богородицы Петрова чюдотворцова писма, а протопоп Гурей нес за ним правила) и с ним шел Кекса Татищев, княже Владимеров яселничей, да священник соборной Пречистеньской же Жижелев Иван, и те оба згорели на плошди, а митрополит уйде на город на тайник к реке Москве ... И тамо ему бысть дымный дух тяжек и жар велик, и за невозможение от жару и от дымнаго духу начата его с тайника спущати, обязав ужищем за взруб к реке Москве; и перервася ужище, и разбися митрополит и едва отдыхал… И отвезоша его в его монастырь на Новое еле жива. /…/

Сие бысть грех ради наших, в наказание нам от Бога послася, за умножение наших согрешений не пощади Бог толико множество святых церквей и образов святых своих; божиим гаевом сие бысть огненое пламя. Во един чяс многое множество народу згореша, 1 700 мужеска полу и женска и младенец…

О убиении князя Юрья Глиньскаго. И после пожару на 2 день приехал царь и великий князь навещати Макария митрополита на Новое …. и бояре с ним, и вражиим наветом начаша глаголати, яко вълхвъванием (колдовством) сердца человеческия вымаша и в воде мочиша и тою водою кропиша и оттого вся Москва погоре; начаше же словеса сия глаголати духовник царя и великого князя протопоп Благовещенской Федор да боярин князь Федор Скопин Шуйской да Иван Петров Федоров. И царь и великий князь велел того бояром сыскати.

И того же месяца 26 день, в неделю, на пятый день после великого пожару, бояре приехаша к Пречистой к соборной на площадь и собраша черных людей и начаша выпрашати: кто зажигал Москву? Они же начаша глаголати, яко княгини Анна Глинская з своими детми и с людми вълхвовала: вымала сердца человеческия да клала в воду да тою водою еэдячи по Москве да кропила, и оттого Москва выгорела.

А сие глаголаху чернии людие того ради, что в те поры Глинские у государя в приближение и в жалование, а от людей их черным людем насилство и грабеж, они же их от того не унимаху. А князь Михаиле Глинской тогда бяше и с материю на огосударском жалование на Ржеве; а князь Юрьи Глинской тогда приехаш туто же, и как услыша про матерь и про себя такие неподобные речи, и пошел в церковь в Пречистую. Бояре же по своей к Глинским недружбе наустиша черни; они же взяша князя Юрия в церкви и убиша его в церкви, извлекоша передними дверми на площадь и за город и положиша перед Торгом, идеже казнят…

А людей княже Юрьевых безчислено побиша и живот княжей розграбиша, ркуще безумием своим, яко «вашим зажиганием дворы наши и животы погореша»…, а мать твоя княгиня Анна сорокою летала да зажигала… Много же и детей боярских незнакомых побиша из Северы, называючи их Глинского людми. А после того …убийства на третей день приходиша многия люди чернь скопом ко государю в Воробьево, глаголюще нелепая, что будто государь хоронит у себя княгиню Анну и князя Михаила и он бы их выдал им. Царь же и великий князь повеле тех людей имати и казнит; они же мнози разбегошася по иным градом, видяще свою вину, яко безумием своим сие сотвориша.

(Из «Царственной книги»)

Хрестоматия по истории России. М., 2004. С. 110-112.