Коми песня, 1959
Первуись коми-пермяцкöй кыв вылын песняэз вöлiсö öктöмöсь эшö 20-öй годдэзö. Но сэк эз вöв возможность печатайтны нiйö типографскöй способöн. Василий Иванович Субботин, кöда öктiс песняэсö, кынымкö экземпляр печатайтiс нiйö Москваын стеклограф вылын. Сэтчö пырисö коми поэттэзлöн песняэз и народнöй песняэз. Этö сборниксö сьöкыт судзöтны, да и унаöн сiя оз ни отвечайт öнняся требованнёэзлö.
1946 годö Коми-Пермяцкöй книжнöй издательство лэдзис сборник «Песняэз», кöдö составитiсö С. Караваев да Н. Попов. Этчö пырисö кыдз коми поэттэзлöн, сiдз и русскöй кыв вылiсь вуджöтöм песняэз. Сборникын вöлiсö печатайтöмöсь только тексттэз, нотаэзтöг. Этö сборниксö öнi сiдзжö сьöкыт адззыны.
Коми-Пермяцкöй книжнöй издательство медбöрья годдэзö лэдзис кынымкö песня нотаэзöн. «Гажа рыттэз» книжкаын вöлiсö печатайтöмöсь: народнöй песня «Коми нылöй», С. Караваевлöн «Орс, гармонь» да М. Вавилинлöн «Асывся песня». Нотаэзöн жö петiс «Иньва» литературно-художественнöй сборникын быдöнлö тöдса песня «Ой тэ, Иньва». Окружнöй газета «Ленин туй вылöт» печатайтiс нотаэсö «Ыб дорын жельнöг цветитö» да «Никита йылiсь» тексттэз вылö.
Эта виль песенникö пыртöмöсь, конечно, не быдöс коми песняэс, кöдна сьывсисö и öнi сьывсьöны отирын. Народнöй песняэз пыртöмöсь етша сiйöн, что миян народлöн устнöй творчествоыс абу на öктöма. Но эта сборникö босьтöмöсь песняэс тöдчöмöн унажык, нежели первöйезас. И почти быдöс нiя оригинальнöйöсь, коми-пермяцкöйöсь. Переводнöйыс только öтiк («Лёнок»), кöда важын ни комисялiс.
Виль песенникö мийö сетам и нотаэз. Правда, нотаэзнас сетiм только мукöд народнöй песнясö да нiйö тексттэсö, кöдна неважын вöлись мыччисисö и етша тöдсаöсь отирлö.
Мукöд песнясö, кöть и лыддиссьöны нiя народнöйезöн, гижисö либо обработайтiсö коми поэттэз. Шуам, «Нывлöн тöждiсьöм» мунö кыдз народнöй песня, но сiйö гижис поэт Николай Попов. Песня «Пемыт ойöн» обработайтiс Андрей Никифорович Зубов (Питю Öньö). Кынымкö песня вуджисö миян народ коласö Коми АССР-ись. Сэтшöммес: «Коми нылöй», «Уна ныввез чукöртчисö», «Паськыт гажа улица», «Öтпыр вöлi» и «Чужи быдми». Медбöрья кык песнясö гижис коми поэт Виктор Алексеевич Савин (Нёбдiнса Виттор).
Егор-артиллерист
— Полундра! Воздух! — лёк горшöн горöтiс Хамса.
Артиллерийскöй батареяись солдаттэзöс, кыдз тöвчикöн нöбöтiс, кин кыдз кужис-вермис юррезнысö дзебисö. Быль, минута бöртi мыччисисö неприятельлöн самолёттэз, чапкисö кынымкö бомба двести метра ылына батарея сайын. Кöр самолёттэз саясисö, солдаттэз бöр пондiсö чукöртчыны орудиеэз гöгöр. Только öтiк боец пукалiс снаряддэз ящик вылын и, кыдз бытьтö сигнал «воздух» сы понда эз вöв, каттис коккесö нямöттэзöн.
— Егорка, тэ мый, бöбöв? Но тэ быль Куимёгор, а веммезыт öтiклö оз тырмö. Гитлерлöн кöрткырнышшез юр вевдöрын, а сiя коккесö нятьöсь, дука нямöттэзöн каттьö. Тьфу! Нимтöм артист. — Егор одзын вежмасис, китшкис-ваксис сьöкыт мыгöра, кыз кынöма артиллерист,
— Эх, Хамса, Хамса, горöтлан «полундра», бытьтö флот вылын служитан. Натьтö, Курган степпезат ыджыт шорсö эн адззыв. Горöтлан, а самолёттэзыс батарея вевдöрын ни. Тэ быдлаын сёрман, некытшöм расчёттэз тэнат мыр юрат абуöсь. Сiдз жö зенитчиккез узьöны, кыдз и тэ. Пух! Пух! А самолёттэз батарея ни колисö.
Егорка, сылöн быдса нимыс Егоров Егор Егорович, Куимёгор, кыдз сiйö нимкодялiсö батареяись боеццез, мыгöрнас неыджыт, винерик, да сы вылын не сы размер сьöртi пукалан обмундированнёнас вачкисис огородечись повзьöтчан бедь вылö, коккесö каттис нямöттэзöн и стыдитiс Хамса боецöс.
Батареяись боеццез оланiсь эта эпизодыс вöлi шоныт июнь коста. 1943 годö. Неприятель лöсьöтчис ыджыт вермасьöм кежö. Сiя некыдз эз вермы вунöтны сталинградскöй разгром. Öнi керис планнэз вештiсьны ыджыт стратегическöй öштöмсянь. Эта виль, öддьöн вира вермасьöмыс историяö пырис кыдз Орловско-Курскöй битва. А öнi Гитлерлöн и миян войскоэз лöсьöтчисö виль бойез кежö.
Миян особöй, кинкö эшö нимтöм экспериментальнöйöн, артиллерийскöй батарея сулалiс Орёл город увтын, Гостья нима посад дорын. Батареяöн, кыдз баитiсö боеццез, юралiсö Москвасянь, а оперативнöй боевöй уджöн — дивизияись артиллериялöн начальник. Веськыта батареяöн командуйтiс генерал-майор, а бойез коста эшö сылöн заместитель, капитан. А генералыс немымда эз вачкись боевöй генерал вылö. Вон кытшöмöсь генераллэзыс армияас, судачитiсö ас коласаныс артиллеристтэз, томöсь, боёкöсь, волькытöсь, кыдз бытьтö праздник кежö лöсьöтчöмась. А шед кö паныт сэтшöм генераллö, сизимись ньылöмтö чышкан, усьтöдз велöтас приветствуйтны устав сьöртi. Мед ен берегитö, медбы сэтшöм генералкöт пантасьны. Егорка стрась полö воинскöй начальниккезiсь, куим месяц артиллерийскöй училищеын велöтчöм коста сiдз эз и велав приветствуйтны начальствоöс: то должность, то званнё соралас, и кисö оз куж лэбтыны кöсича весьтöдз.
Егор ас кежас думайтiс, а миян пö генералыс дзор не дзор, пöрись не пöрись, невна мышкыра, нач миян университстiсь математика сьöртi профессор вылö вачкисьö. Немöн миян командир — не статьöн, не голосöн оз судзöт боевöй генерал дынöдз. Натьтö, кыдз и ме, оз тöд воинскöй устав, и приветствуйтны, кыдз устав тшöктö, тожö оз куж. Не сiдз кисö лэбтö, каблуккезнас оз жвангы, да и баитö солдаттэзкöт, кыдз миян профессор: «Батенька, лейтенант Шухта, тэ кыным класс кончитiн? Тэныт, батенька, не артиллеристöн колö лоны, а безменöн вузасисьöн. Да тэ, натьтö, и безменсис он куж лыддьыны, сэтöн эд не килоэз, а фунттэз да пуддэз. Тэ некыдз он вежöрт, мый сэтшöм быдса единица и джын единица, вот тэнат снаряддэзыс и лэбзьöны то целься ылöжык, то матöжык, либо нач бокö». Артиллеристтэз гот-гот ваксьыштасö, кыдз генерал лейтенантöс стыдитö. Боеццез эзö радейтö лейтенант Шухтаöс — öддьöн ни пö сiя вышитчö да ошкö асьсö. Генерал бергöтчис ваксиссезлань и грöзитчö: «Цыц, шельмеччез! Адззöмась мый вылын ваксьыны. Миян татöн первокласснöй техника и сыкöт колö кужны баитны и лыддисьны».
Батареяись личнöй состав пондiс вежöртны, что эта не рядовöй батарея и сэтшöм орудиесö одзжык эз на эшö адззывлö. Вон витöт орудиеись командир первöй лунсянь война вылын, и сiя бойез коста лыйсикö сорасьö расчёттэзöн. Да и особöй отделiсь часто вовлiсö батареяö, а генераллöн ны дынсянь вöлi личнöй охрана. Сiдз жö батареясö караулитiсö автоматчиккез лун и ой, медбы батареяись личнöй состався объект расположеннёö некин эз шед. Неприятель самолёттэзсянь батареясö караулитiсö зенитчиккез. Батареяись боеццез асьнысö лыддисö тожö не простöй артиллеристтэзöн и вышитчисо пехотинеццез одзын: «Мый тiян пехота — пух-пах-тр-р-р керасö винтовкасянь либо автоматсянь. А миян — войналöн ен, рез-паз керас, нельки кымöр пымалас». А пехотаись боецöс куш киöн тожö он кут: «Тi только рез-паз и кужат керны, а посаддэзö, городдэзö ми первöйöсь пырам». Сiдз öтамöдныс коласын вермасисö артиллерияись и пехотаись боеццез.
Но кыдз формируйтчис батареялöн личнöй состав, только командованнё тöдiс. Но, шуам Егор Егорович Егоров кончитiс отлично вылö куим месяцся артиллерийскöй училище, кöть приветствуйтны устав сьöртi сiдз эз и велав. Особöй отделлöн проверка бöрын сэк жö шедiс батареяö. А мöдiккез? Мукöдыс воюйтöмась ни. А Кабыхно? Веськыта татчö Москвасянь. А Хамсоедов, нимкодь сьöртi Хамса, противотанковöй пушкаöн ни воюйтöм, не весь öшалö морос вылас медаль «За отвагу». Сiдзкö, личнöй составись боеццез бытшöмик нем эз тöдö. Батареялöн вöлi квать орудие, тожö не артиллерия устав сьöртi. А каждöй орудие бердö командирöн сувтöтöм лейтенант. Не весь батареяыс шусьö особöйöн.
Кöр локтiсö батареяö Егор — Куимёгор и Хамсоедов — Хамса, ны вылын боеццез шуткаэз, сгаллэз керисö. Егор и Хамса öддьöн разнöй мывкыда боеццез. Егор винерик, кыдз чужмöр, то татöн, то эстöн, весь öтiк кыв сы öмись оз пет. Том, но морт серьёзнöй. А Хамса небытик, тупыль кодь (и кöр война коста кынöмсö ештöм быдтыны?), сылöн сералiсь öмыс некöр эз тупкассьы. Хамса и Егор öддьöн öтамöднысö радейтiсö, но и орöттöг кеслiсö öтамöдныс вылын пиннезнысö.
— Эй, Хамса, тiян Курган лесостеппезас хамсаыс эд оз быдмы, — ваксьö Егор. А Хамса адззö ни паныт öмлöсалан кыв:
— Миян Терень Пальчов, гор вылын быдмöм, аскерöм профессор, не только бур шогдi кöдзыс быдтö, но и нюррезын хамса вöдитö. Вот ме сылöн первöй экземпляр. — Сыбöрын локтö очередь згальничайтны Егор вылын, — но тэ, Куимёгор, ас вылат видзöт, нач огородечись катша-рака повзьöтан. Тэ особöй батареяись боец, а коссит ременьыт умöль газ лэдзанöдз öшöтчöм. — И одзлань шырзьö Хамса, — Егорка, ноко ошшась, кöть öтпыр ас бердат нывкасö зэлöтыштлiн, мороссэсö малыштiн?
Ежели сiйö он öмлöсав, сылöн пизян öмыс оз и тупкассьы.
— Невежда тэ, Хамса, — паныт ёткис Егор.
А лейтенант Шухта зубыта жельнöгалiс Егорöс, тэ пö мый, Хамса, он адззы, сылöн öмугöллэзыс абу эшö мамыс йöвсянь косьмöмась, кытчö сылö нывкаэз дынöдз.
Егор думайтыштiс аслас Марина йылiсь, кöда дырни сiя полiс шуны неколана кыв, а сэтöн мороссэз маласьöм йылiсь, сылöн гöрдöтiсö пеллезыс, чужöмыс пондiс биöн сотчыны. Сэтöн жö эшö зубыта чушкис лейтенант, боец лöгасис, вирöн пизис сьöлöм, и мый шедiс кыв вылас, кожгис:
— Гер лейтенант, Туорта, ду бист ферфлюнтер тэйфель.
Боеццезлiсь öммезнысö кыдз кляпöн тупкалiсö, нiя некыдз эз видзчисьö зонкасянь эттшöм чорыт да эшö тöдтöм кыввез. Шухта тожö раммис, сiя вежöртiс только медодзза кыввесö «господин лейтенант», сэсся эз тöд, но догадайтчис, что бöрья кыввезыс нёштöмöсь. А батареяись боеццез веммезö пырис мыйкö эшö тöдтöм, что Куимёгор не нинöн вурöм студентик. Но а Шухта бердö дыр кежö лякасис виль фамиллё — Туорта.
Батареяись боеццез эзö тöдö, что нiя испытывайтöны виль артиллерийскöй системаэз настоящöй бойез вылын. А батареялöн командир — этна системаэзлöн конструктор. Сылöн вöлi мог бойез коста проверитны метитчан приборрез и орудиеэзлiсь жугдан-паздан вын,
Öтiк кадö, кöр бойез эзö вöлö, и фронт вылö лэдзчисис сук туманöн лöнь, неприятель керис виль дислокация, тыртiс ассис часттесö виль пополненнёöн. Миян армия тожö шоччисис и тыртiс ассис вынсö. Но боеццез сьöлöмын вöлi тревога, нiя тöдiсö ни асланыс опытiсь — вот-вот пондöтчасö ыджыт бойез.
Генерал команднöй пунктö öктiс батареяись командиррезöс. Сiя бöра внушительнöя велöтiс, кыдз колö уджавны орудиеэзöн, керны расчёттэз, пользуйтчыны временнöй таблицаэзöн. Сiя тшöктiс чеччыны местасис лейтенант Шухтаöс и сувтöтiс сы одзö задача. Лейтенант сулалiс, пымавтöдз аскöттяс решайтiс задача, керис расчёттэз и полöмöнмоз сетiс ответ.
— Неправильно, батенька лейтенант! — öтöр-мöдöрö шагньöвтiс помещеннё кузя и лöгöн горöтчис генерал. — Тэнат лыддьöм сьöртi снаряд двести метрася унажык усяс цель бокö. Командиррез, кытшöм ошибка керис лейтенант Шухта?
Командиррез, кöть и тöдiсö Шухталiсь ошибкаэз, некин эз висьталö, некин эз охотитчы кöртасьны зынöсь лейтенанткöт.
Кöр командиррез чöлiсö и гыжьялiсö юррезнысö, ыбöс дынсянь кылiс не совсем чорзьöм мужик голос: «Ёрт майор-генерал, лейтенант Туорта, виноват, генерал, Шухта керис кык ошибка. Öткö, неправильно лыддис тöвлiсь вын, мöдкö, вунöтiс öтöрись температура». Генерал адззис — ыбöс дынын сулалiс паськыт гимнастёркаа подросток.
— Этö эшö кин шыасьлö? Кин тэнö татчö корис? — горöтлiс чорыта генерал. А лейтенанттэз гусьöна, но Егор кылiс, китшкисö-сералiсö, вот пö тэ шедiн, Чужмöр кок, уна тöдiсь Куимёгор. А лейтенант Шухта биöн öзйöм синнэзöн лыйис-нилис, сы сьöртi, не уставнöй боецöс.
Генерал эшö видзöтiс вель том боец вылö, зэлöтiс тырппесö, медбы не серöмтчыны, рамöн ни юалiс:
— Кин тэ, батенька, висьтась?
Егор веськöтчис, смевсялiс и пондiс гарддьыны-сорасьны: «Ёрт майор-генерал, виноват, сораси, генерал-майор, ме рядовöй артиллерист, Егоров Егор Егорович, прозваннё сьöртi Куимёгор. Письмо тiянлö, генерал». Боец шагньöвтiс пызан дынö и генерал киэзö сюйыштiс конверт.
— Молодец, Егор Егорович! — боец первöй раз кылiс, кыдз сiйö величайтiсö быдса нимöн. Генерал бергöтчис командиррезлань, — лейтенант Шухта, а Егор Егоровичыс правильно адззис тэнчит ошибкаэз, — серöмöн видзöтiс сiя командиррез вылö.
Вöлi сэтшöм жö лун, кыдз одззася, гажа, чöскыт руа, только бöбмöм гуттэз пырисö öмö, кильöтiсö ныр и кыскис несйыны. Батарея расположеннёын кинкö горöтiс: «Боец, Егоров, генерал дынö. Пондас тэнö матегавны». Егор кöмтöм куйлiс вуджöра куст увтын и думаэзнас гижис письмо: «Дона Мариночка, вот ме и артиллерист. Но солдат, не солдат, ачым эшö ог вежöрт. Мунi дорйöны ассим Родина, а кыдз ме дорья? Эшö öтiк фашистöс эг адззыв...» Эта думаэз коста и кылiс генерал дынö кытсалöм.
Егор чеччис, зэгнитiс паськыт гимнастёрка, дернитiс вывланьö брюкиэз, буржыка зэлöтiс ремень, пуктiс юр вылас нöитчöм пилотка и мунiс генерал дынö думаэзöн, натьтö, быль пö менö матегалас одззася пантасьöм понда.
Егор локтiс генераллöн команднöй пунктö и приветствуйтiкас бöра сорасис. Генерал вежöртöмöн, кыдз ай, видзöтiс томыник морт вылö и жалейтöмöн аскежас думайтiс, мымда пö весь торксяс отир эта неправеднöй война вылын. Эта зонкалö бы эшö пондöтчыны тöдны мир, вежöртны сiйö, радуйтчыны, любитны, а сiя локтiс вийны сэтшöм жö том отирöс, и ачыс торксяс.
— Боец Егоров, тэныт кыным год? — видзчисьтöг юалiс генерал.
— Ёрт майор-генерал — только и ештiс горöтчыны боец, генерал сiйö öмалiс. Тырмас пö, Егоров, козыряйтны, ежели тэ Уставас эн велав, кыдз и ме, кöть и генерал. — Мöдлун тырас даскыкьямыс год.
— А кыдз тэ шедiн армияö, несовершеннолетньöй?
— Миян курсiсь быдöнныс зонкаэс мунiсö фронт вылö. А ме нысся умöльжык? Öтнам кольччи нывкаэзкöт. Бöбöтi военкомсö, меным, мыся, тырис даскыкьямыс год.
— Егоров, бöбöтчыны грех. Война — не театр. Война вылын отирöс вийöны, — горöтчис генерал и одзлань юасис: — Кытöн велöтчин?
— Университетын, ёрт генерал. Нёль курс татчö локтöдз досрочно помалi.
— Нёль? Дак тэ мый, даснёльгодсяöн, семилеткасянь пырин университетö?
— Так точно, генерал. Шöрöт школа сизим годöн кончитi.
— Кинö велöтчин?
— Математикö. Ме неыджыт научнöй удж кери, академическöй журналын печатайтiсö. Медбöрья кыввесö боец висьталiс невна ошшасьöмöн, медбы генерал öддьöн сы вылö эз лöгав.
Эта юасьöм бöртi генерал дыр, вель дыр мыйкö думайтiс и шы эз сет. Сiя видзöтiс öшын пыр батарея расположеннё вылö, пожуммез вылö, кöдна гöгöртiсö сiйö, небо вылö, кытöн öтiк кымöрок эз вöв. Чеччис пызан сайись, öтöр-мöдöрö керис кынымкö оськöв кабинет кузя и, ай моз горöтчис: «Дак вот сiдз, батенька Егоров, тэ лоан менам помощникöн». Боец мыйкö мöдiс паныт висьтавны, но генерал чорыта ни жвангис: «Эта приказ!»
Боец дыр, быднёж, кыдз тöдтöм уравненнё решайтiс, лыддис, вежис-панiс генераллiсь приказ, кытшöм пö ме сылö помощник, некыдз досповна эз артав. Армияын командир — ен, начальник и судья, мый тшöктас — сiйö и керан.
Кытшöмкö кад бöртi Егор пуксис аслас дона нывкалö гижны письмо: «Дона Мариночка, менам олан армияын нач дзугсис. Господи, генерал менö керис техничкаöн, сылiсь кабинет чышка да миськала, письмоэз да распоряженнёэз генераллiсь батареяö новья, сёян сылö походнöй кухняись ваяла. Только сэки сьöлöмын гаж овлö, кöр генерал тшöктö капризнöй уравненнёэз решайтны. Мариночка, неужто ме сэтшöм несчастливöй морт?» Егор лöг ас вылас, письмо косялiс, нöитiс, сьöвзис бокö и чапкис гор öмö кыввезöн: «Кинлö колö тэнат горзана письмо». Сэксянь неетша кад чулалiс. Вот-вот пондöтчасö ыджыт бойез. Быдлаын ни эта йылiсь кывсис. Каждöй, ыджыт и учöт, воинскöй начальниклöн и рядовöй боецлöн зубыта пидзрасис сьöлöм эшö тöдтöм чувствоэзсянь.
Боец Егоров батареяö ваялiс письмоэз, пакеттэз. Сiйö панталiсö бытшöма, радöн, юасисö, мый пö кывсьö вевдöрас, мый пö баитöны генераллэз. Егор нем эз кыв, нем эз тöд. А öтiк-мöдiк пиннезнысö кеслiсö, но кыдз пö, артиллерист-техничка, генерал пызан вылас сёяныс чöскытжык?
Егоров учебнöй и боевöй лыйсьöммез коста мукöд командиррезлö отсалiс керны расчёттэз. А медумöля командуйтiс лейтенант Шухта. Сiя лöгöн видзöтiс «генеральскöй техничка» вылö и бытьтö эз кыв сылiсь подсказкаэз, но сёравно керис Егор сьöртi. Öтчид генерал кылiс лейтенантлiсь Егор йылiсь нёштöм баитöм и лöгöна горöтчис: «Батенька, лейтенант Шухта, тэнат кодь тысяча юр оз вермö вежны Егоровлiсь öтiк юр». А кыдзкö генерал аслас заместительлö висьталiс, берегитö пö Егоровсö, мед пö пуляэз да бомбаэз увтö весь юрсö эз сюйышт. Сылöн пö донаöсь юрас веммезыс. Но а Шухта эшö öддьöнжык киэсö пидзралiс Егоров вылö, мыля генерал сiйö лэдзис улöжык рядовöй солдатся.
Кыдзкö неыджыт бой бöрын гажöн локтiс гöгрöса, жаритчöм шаньга чужöма, кыдз сьöкыт инька, батареяись старшина, и радöна юöртiс, талун пö каждöй боецлö полагайтчö паёк. Боеццез гажöна панталiсö старшинаöс, пöрччалiсö вещмешоккез, чурскыштiсö паёк и сёйыштiсö нянь госöн. Боеццез гыркö пырис видзчисьтöм праздник. Егор Егорович несйис спирт дуксянь, но кыдз кылiс Шухталiсь горöтчöм «генеральскöй техничка», сiя лöгувьяс пöрöтiс öмас нечöскыт дука ва. И, быль, чожа юрас кайис долыт, югыт кымöрок, и быдлаын лоис сэтшöм гажа, и ачыс эз казяв, кыдз сы öмись петiсö дона сьылан шыэз: «Кытчö тiйö мунатö, мыля менö колятö? Кыдз ме понда овнытö, ойлунсö чулöтнытö?». Боец эз ешты тупкавны öм, кыдз сы одзö сувтiс шардöм Хамса. «Егорка, тэ кин, япона мать? Тэ кинлiсь песня сьылан? Япошкаэзлiсь?» — вежмасис Хамса.
Боец Егоров талун некин вылö эз вермы лöгавны, сiя Маринасянь босьтiс письмо, кöда вылын гижöмась медбур кыввез, медгажа кыввез, медчöскыт кыввез. Боеццез тöдöны любимöй нывка кыввезлiсь дон. Война вылын сьöлöм понда эта меддона лекарство. Боецлö мый сэсся унажык колö, кöдалöн каждöй лун лыддьöм: талун — ловья, ашын — абу.
— Хамса, тэ мый синтöм? Паёксянь веммезыт пакмисö? Ме ассим коми песня сьыла, — только и горöтчис Егор.
Кад котöртiс одзлань. Шоныт гожум пондiс кöдзыт руöн лолавны. Пуэз вылын мыччисисö первöй вежöтöм листтэз.
Генерал мунiс армия штабö и сэсся кыдз гуö вöйис, батареяö эз берт. Артиллеристтэз коласын гусьöн моз мунiсö басниэз, что генерал шедöм неприятельскöй засадаö. Мукöдыс лёбисö, генералсö пö особöй отделiсь отир арестуйтöмась. Но правдасö некин эз висьтав, а юасьны, вöлi некинлiсь.
Чожа батареялöн лоис виль командир — майор. Том, бытшöм, статнöй, настоящöй боевöй офицер. Егор завидуйтöмöн видзöтiс виль командир вылö и думаэзнас ошкис, вот пö настоящöй офицер. Виль командир видзöтiс бумагаэз, уна цифраэза расчёттэз, таблицаэз, кöдна кольччисö важ командирсянь. Егор юасьтöг, смелöя, кыдз генерал дырни, пырис виль командир дынö.
Командир сьöкыта лэбтiс юрсö, вирдыштiс синнэзнас боец вылö и чорыта горöтчис: «Отставить! Устав вунöтiн? Безобразие!»
Солдат петiс кабинетiсь рушмöм, но смевсялiс, стукнитiс ыбöс кузя и перыта пырис бöр:
— «Ёрт майор-генерал...» — и эстöн Егор юр кузяс кыдз öшöпекöн вачкисö, виньдiс, повзьöмсянь бледöтiс и видзчисис, мый сыкöт керас виль командир.
Майор мöдiс только горöтчыны «отставить!», но мыйкö сiйö сувтöтiс. Сiя внимательнöя видзöтiс солдатик вылö, а боец повзьöмсянь дрöжитiс, кыдз тöв вылын бабапель. Майор ас кежас шытöг горöтчис, детскöй пö сад, и чуть эз серöмтчы, юалiс боецлiсь, кытшöм пö могöн локтiн. Егоров висьталiс, что важ командир дынын служитiс почтальонöн, техничкаöн, официантöн, а сiдзжö генералкöт уравненнёэзöн занимайтчисö.
— Мыйöн, мыйöн?
— Расчёттэз, таблицаэз, кöднö киат видзан, отсалi керны. Генерал кытшöмкö научнöй удж керис — ме уравненнёэз отсалi решайтны. Ыстö менö служитны батареяö, а то письмо гортö стыдитча гижны. Да и боеццез ме вылын сералöны, генеральскöй техничкаöн видöны, — норасьöмöн корис Егор.
Майорлöн оссис интерес эта том солдат дынö. Мыйлö генераллö колiс видзны этö боецсö ас дынас? Только ли джодж чышкыны? Эстöн мыйкö эм. Знаменитöй учёнöй не джодж чышкыны видзис ас дынас солдатикöс. Расчёттэз, таблицаэз — вот кытöн загадкаыс. Но кытшöм ны дынö эм дело боецлöн, некыдз эз вежöрт майор.
Кöр батареялöн командир думайтiс эта йылiсь, Егор веськöтчис, чорытжыка сувтiс и, бытьтö тöдiс командирлiсь думаэз, шваткис: «Ёрт майор, расчёттэз сэсся озö колö, ыстö менö батареяö».
Командир дзар керис солдат вылö и жвангис приказ:
— Пондан обслуживайтны куимöт орудие. И эшö — веж обмундированнё. Öнi жö мун старшина дынö и висьтав месянь приказ.
Егор радöн петiс командир дынсянь и перво-наперво гижис письмоэз аймамыслö и аслас нывкалö, Мариналö, и котöртiс батарея расположеннёö. Батареяись боеццез гажöна примитiсö асланыс боевöй семьяö, а медöддьöн вöлi рад Хамса.
Старшина вежис Егорлiсь обмундированнё, сетiс, кöть и женскöйöсь, дзуртана хромовöй сапоггез, лöсяласö пö, коккезыт учöтöсь, и кучикись ремень бляшкаöн. Боец нач мöдкодьсялiс: веськалiс, волькамис и кыдз бытьтö син одзын нюжалiс — настоящöй жöник.
Мунiсö, кöть неыджытöсь, бойез. Неприятель нервничайтiс, что кольö ассис позицияэз. Гитлеровскöй самолёттэз бергалiсö батарея гöгöр. Вынсьöтчисö уничтожитны миянлiсь грознöй оружие, но миян зенитчиккез вашöтiсö бöр. Вот только час мымда чулалiс, кыдз батарея вылö уськöтчис бöбмöм миян зениткаэзсянь неприятельлöн самолёт, чапкис кынымкö бомба, ачыс öзйис и кожгисис-усис километр ылына батарея дынсянь. Майор этна луннэзö босьтiс письмо генерал-майорсянь и ыджыт военнöй начальниксянь приказ командируйтны Москваö генерал-майор расположеннё увтö рядовöй солдатöс Егоров Егор Егоровичöс. А генерал ассяняс гижыштöм, что эттшöм талантливöй морттэзöс, кыдз Егоров, колö берегитны и быдтыны Россия наука понда. Майор только öнi вежöртiс, мыля генерал ас дынас видзис Егоров боецöс. Майор ачыс мунiс батарея расположеннёö пантасьны Егоровкöт. Кöр сiя сибöтчис матöжык батарея дынö, казялiс: боеццез чукöртчöмась куимöт орудие гöгöр. Кинкö ны коласiсь пильскис-горзiс, Хамса матясис, кинкö вылö грöзитчис и чышкис синваэсö. Майор сьöлöмö зубыта мöртчис йыла ёсь, и сiя перыта юалiс, мый пö лоис. Егор, кыдз чочком чышьян, куйлiс му вылын и перыта чушыктiс, сы öмись сöдзис вир. Боец осьтiс гудыртчöм синнэсö и нёджжöвтiс майор вылö. Батареяись командир боец Егоровлö висьталiс, генерал-майор пö тэныт ыстö привет и корö тэнö ас дынас Москваö. Егоров пыдына-пыдына ловзисис и сотчöм тырппезнас гусьöна, торьясьöмöн горöтчис:
— Спасибо... Ловья... Сiдз и тöдi. — Эта кыввез бöрын боец век кежö кунис синнэсö. Майор только öнi вежöртiс, что генерал берегитiс зонкасö, сылiсь талант. Если бы сiя эшö тöн локтiс батареяö, дзугис бы этö трагедиясö.
Солдаттэз боевöй условиеэз коста Егоровöс дзебисö скромнöя. Кынымкö винтовкаись керисö медбöрья салют и стружитöм тёссэзiсь керöм гроб лэдзисö гарйöм могилаö. Хамса дзебсисьтöг сыркьялiс-горзiс, майор и боеццез чышкисö синваэз. Сiдз, неылын батарея дынсянь, Гостья посад бердын, читкыля нинпуэз увтын быдмис неыджыт мысок. Солдаттэз сувтöтiсö, кытшöм вöлi кипод увтын материал, стальнöй листiсь памятник и гижисö кыввез: «Егоров Егор Егорович, рядовöй артиллерист. 23 сентября 1943 г.».