Ош вийиссез

Педагогическöй институт кончитöм бöрын менö ыстiсö уджавны севернöй районö, медылiсь деревняö. Деревня, кöдö шуисö Ошйöрöн, районнöй центрсянь вöлi дассизим километра гöгöр. Да и кин сiйö тöдö, быль ли сымда? Деревняын олiсь отир, кöр касьтылам дассизим километра, шыннялöмöн горöтчасö: «Кин тöдö, ош меряйтiс». Эта деревняын ме велöтi челядьöс.

Öтпыр, кöр ми лöсьöтчим челядькöт мунны экскурсияöн вöрö, ме юалi учениккезлiсь, кин бура тöдö вöр, кинöс бöрйыны старшöйöн. Öтiк нылочка перыта сувтiс и гордöя горöтчис:

— Вон тай, Колькаыс, ош вийисьыс. Сiя бура тöдö, и герой...

Ме тшöктi Коляöс сувтны. Восьмиклассник Коля, топытик, синнэз добрöя шыннялiсö, но сiя немымда эз вачкись герой вылö. Сыбöрын эшö неöтпыр кылi, кыдз челядь нимкодялiсö Коляöс и сылiсь вонсö, Ваняöс, ош вийиссезöн. Менö кутiс интерес, мыля нiйö сiдз нимкодялiсö, и вот мый меным висьтасисö челядь...

Война бöрын сьöкыт эшö вöлi овны. Нянь эз тырмы, да и картошка-капуста пöттöдз эз вöв. Колялöн да Ванялöн (öтiкыс сэк велöтчис витöт классын, мöдыс — нёльöтын) пыр сималiсö кынöммезныс, сьöлöммезныс кошшисисö сёйны чöскытжыкö. Но кысь сiйö чöскытжыксö ваян? Магазинiсь он босьт — абу.

Айныс зонкаэзлöн война вотöдз вöлi бур вöралiсь, некöр эз берт вöрсянь пустöй котомкаöн, сё ни мыйкö ваяс: дозмöр, тар, кöч, а кöр и ыджыт сюраöс. Но öнi айыс оз прокмы. Война вылын веськыт коксö снаряд орöтöма. А пишаль-централка öшалö полать вевдöрын, нач весь. Айыс гажтöма видзöтлö весь öшалiсь пишаль вылö, коккезыс вылö и ныр увтас бура видö фашисттэзöс... А мукöдпырся кöрттув вылiсь лэдзас пишальсö, кыдз учöтик кагаöс малалас-любитас, ыш ловзисяс да бöра öшöтас. Думаэзнас горöтчас: «Зоннэзöс бы велöтны вöравны, да кыдз коккезтöг велöтан».

Коля бытьтö тöдiс думаэсö айыслiсь и тожö важын ни видзöтлiс весь öшалан пишаль вылö, но сё полiс юавны айыслiсь — откажитас.

Арнас айыс кынмалiс и пондiс бура шогавны: перво не öддьöн кашляйтiс, а сыбöрын пондiс вирöн сьöвзьыны. Деревняас отирыс баитiсö, что айыслöн пö нёштöм шогöт, медбы веськавны, колö пö бура вердсьыны: яй-кольть сёйны. Сiдзжö отирыс баитiсö, колö пö отсавны мужикыслö — шедтыны кыськö яй.

Пондöтчис ноябрь. Юэз зэлöтiс мороз. Усисö медодзза лыммез. Зонкаэз адззöны, айныслö быд лун лоö сё умöльжык и умöльжык. Öддьöн жаль сы вылö видзöтны, кыдз сiя кусö.

Кыдзкö Коля кытсалiс Ваняöс комö, медбы некин эз кыв и горöтчис:

— Ванька, ветлам вöравны? Пишаль весь öшалö... Тятьö кусö...

— Тэ мый, Колька, — повзис вонокыс. — Айö видчыны пондас, а то вартлас.

Коля сё ассис: видзöт пö, тятюö сё умöльжык и умöльжык, сылö пö колö сёйны яй, а то эд кулас. Да и ми бы сёйим пö.

Кресенняö, кöр только пондiс югдыны, воннэз гусьöника лэдзисö пишаль, петiсö комö и проверитiсö провиант.

— Этна заряддэзыс пöткалö, а этна ог тöд мый понда, — гусьöнмоз баитiс Коля.

— А вон пуляэзöн, — мыччалiс патроннэз вылö Ваня.

— Нiя, натьтö, лоссез понда, — содтiс Коля. Зонкаэз кытсалiсö Тупыльöс, сiдз шуисö поннысö, иньдöтчисö вöрö. Мунiсö огородеччезöт, баняэз сайöт, медбы некин эз адззыв, эз пантась.

Локтiсö вöрö — шы не тöв. Разь только чегас ув или чепöссясö-лэбзясö учöтик кайез. Кык вон, Коля одзас, Ваня мышкас, оськалiсö одзлань. А вот и Нюрвидз чулалiс, эстöн пуягöд да чöд гожумнас челядь öктöны. Кыдз только пырисö вöрö, Тупыль кытчöкö öшис. Эшö мымдакö мунiсö, и поныс пондiс чожа-чожа вувтны. Зонкаэз кинитчисö вувтöм вылö. Тупыль дзöрис, чеччалiс и вувтiс кöз вылö. Челядь нёджжалiсö-нёджжалiсö, некин син вылö эз усь.

— Бöбöтчан тэ, Тупыль, — горöтчис Коля, и мöдiс мунны ни, кыдз син вылас усис ылiсь ур. Коля лэдзис пельпон вылiсь пишаль и лöсьöтчис лыйны, но Ваня падмöтiс, весь пö эн торк зарядсö, кытшöм пö сыись яй, да и кин сылiсь, понся, яйсö сёйö. Колька кывзiс, быль пö, колö ли торкны заряд, поди, дозмöр ли, кöч ли шедас. Тупыль адззö, что весь сiя горшсö летiс, никöстiс, викыльтiс бöжнас и котöртiс одзлань.

Зонкаэз дыр ни шатласисö вöрын, сэсся некин паныт эз шед: не кай, не ур. Мыдзисö, коккез вугмисö. Ванялöн öшис интерес вöралöм дынö. А Коля думаэз вылö усис шогалiсь айыс и синваэз петiсö: весь кывзiс вонсö и эз уськöт урсö. Мукöд отирыс тай и урресö сёйöны — лекарство понда. Да и казялас айыс, что босьтiсö пишальсö юасьтöг — видас, а сiдз бы, может, и эз.

Коля висьталiс воныслö, петам пö Шарыбланьö и, если некин паныт оз шед, мунам гортö. Только горöтчис медбöрья кыввезсö, кывсис горзöмöн, нёштöма Тупыльлöн вувтöм. Зонкаэз котöртiсö понлань. Кöр сибöтчисö, Тупыль чеччалiс то öтöрö, то мöдöрö, то петитчас, то кинитчас пöрöм ыджыт коряга вылö.

Коряга одзын нораö осьта, а осьтасис петö кымöрокöн ру.

— Колька-а, кинкö сэтчин эм, — полöмöн нюжöтiс Ваня, и аслас юрсиэзыс пондiсö лэбтыны шапка. — Поди, ош?..

— Эн кижгы, — дразнитöмöн горöтчис Коля, — поди, ош... Кытшöм татöн, деревня дорын, лоас ош? Мало ли кин нораас оз дзебсись.

Но сё жö Колька пишальсö зарядитiс. Мало ли, думайтiс зонка.

— Ванька, чувйышт норасö, — шушкöмöн сiя мыччалiс кузь чегöм ув вылö.

Ваня жагöника, дрöжитан коккезöн сибöтчис нора дынö и полöмöн чувйыштiс осьтаас. Шы не тöв. Коля сайöвтчис пожум сайö, лöсьöтiс пишаль и видзöтiс Ванялань. Сiя перытжыка пондiс чувйыны норасö. Тупыль горшсö летiс, чеччалiс нора одзын. И сэсся, кыдз вöтын: мыччисис нораись ыджыт, кыдз кык ведра тöрик сьöд чугун юр и ньылыштiс Ваняöс öтлаын бедьнас, а Тупыльлöн только юр-кокыс резсис. Колька метитчис или эз метитчы, сiя ачыс оз вермы висьтавны, — пишальыс кожгис-лыйис. Сы коста жö Коля моросö мыйöнкö дангисö и сiя берездасис пожум бердö. Сэсся быдлаын лоис лöнь. Не ош, не Ванька, не Тупыль — некин абу.

Колялöн веммезыс пемдiсö, и ачыс эз казяв, кыдз сiя локтiс деревняö, ышки-пойки пырис гортас, чöвтчис-пöрччасис и водiс горвылö.

Мамыс, кöда лöсьöтчис пуны картошка, кинитчис зоныс дынö:

— Ах тэ, каналья, бöра кинкöткö тышкасин, вот ме тэнö, — шедiс киас рос, и мöдiс вачкыны. А зонка туплясис, сыркьялiс-горзiс. Комись петiс айыс и тожö сибöтчис зоныс дынö.

— Колька, мый тэкöт? Кытöн бöра, мый бöбалiн? — видчöмöн юасис айыс.

Коля кыв эз вермы горöтчыны, дрöжитiсö коккез, киэз, кыдз бытьтö зэгйис лихорадка. Сыбöрын сорасьöмöн горöтчис:

— Тять, сэтчин... ош... Ванькасö ньылыштiс...

— Кытшöм эшö ош? — мамыс хлоп вачкис киэзнас боккез кузяс.

— Сэтчин, Шарыбас... — сыркьялiс Коля.

Айыс вижгыльтчöмöн уськöтчис ыбöсö, котöртiс деревняö. Чожа öксисö кынымкö вöралiсь. Доддялiсö вöввез, Коляöс пуксьöтiсö додьö и гöнитiсö вöрö.

Локтiсö сiя местаö, кытöн только неважын шогмис трагедия. Перво вöралiссез синнэз одзö мыччисис понлöн юр, а тушаыс öшалiс коряга вуж вылын. Кöр жагвыв мöдöртiсö, адззисö коряга увтiсь ыджыт ош гу, асланыс синнэзлö эз веритö: пукалö ыджыт пöрись ош и, кыдз бытьтö ассис пиянсö, ласковöя ыжмитöм ас бердас зоночкаöс — Ваняöс. Ош абу ловья. Шульга лопатка увтiсь сё эшö сöдзö вир. Ваня нето узьö, нето садьтöм. «Но и но, — только бергöтлiсö юррезнаныс вöралiссез, — но и история...»

Недыр мыйись зонкаэз повзьöмсянь веськалiсö. Ош яй да гос содтiсö вынсö айныслiсь и сiя пондiс веськавны. А зонкаэзöс деревняын нимкодялiсö «ош вийиссезöн».