Сашенька-хозяйка

I

Тулыс локтiс таво видзчисьтöг. Вылын югыта öгралiс шондi, тырмис неделяся етшажык, мед сылöтны непыдын лым, а öнi шонтiс, ловзьöтiс му.

Мартынов Григорий Петрович, механизированнöй, мелиоративнöй колоннаись инженер-механик, вöлi довольнöй аслас уджöн. Удж конкретнöй, беспокойнöй. Öнi сiя думайтiс, кыдз лэбтыны машинаэзлiсь колана полезнöй коэффициент, да дисциплина механизаторрез коласын. Сiя нёджжöвтiс кабинет стена вылö, кытöн öшалiсö социалистическöй обязательствоэз и аслыс висьталiс, что цифраэз гырисьöсь, но туйö нiйö тыртны, нельки унажык керны, если только быдсöн механизммез пондасö уджавны жугасьтöг. «Да, жугасьтöг, только сiдз», — инженер горöтчис аслыс и стукнитiс карандаш тышнас пызан кузя. Сыбöрын чеччис пызан сайись, нёджжöвтiс ассис уджалан кабинет, дзарнитiс мазутöн лякöсьтöм стенаэз вылö, сьöд джодж вылö, вишкыштiс нырнас табак дук и аслыс строгöя висьталiс: «Но и культура... Эта не дело. Порядок колö пондöтны эта кабинетсянь. Вот сiдз, Мартынов, вежöртiн?»

Мартынов нёджжöвтiс öшынö и синнэз вылас усис чеглалöм, жмитчöм куш уввеза сирень и вдруг сы местö, кыдз кино кадрын, мыччисис гырись зелёнöй листтэза калина куст, кöда быдмис роднöй деревняын, горт öшын одзын. Кин сiйö садитöм калина куст öшын одзö, некин оз вермы бытшöмик висьтавны. Калина куст быд год паськалiс, и быд тулыс сiя пасьтасис зелёнöй сарафанö, а сёрöнжык оссисö сылöн зонтикöн гырись чочком-вежа цветтэз, а арнас öшалiсö-югьялiсö шондi вылын кыдз би дзуллез — ягöддэз. Первöй кынтöм бöрын калина куст вылын празднуйтiс-пируйтiс кай-пöтка. Не весь отир калина йылiсь песняэз сьылöны. Калина тулысöн и арöн, кыдз здоровöй ичмонь, шушкö отирлö: «Пыр ме кодьöсь лоö, сэк и олан лоас кокнитжык и гажажык».

Калина куст Мартыновлiсь думаэсö вайöтiс гортö, и сiя касьтылiс письмо, кöда локтiс тöн. Дядьыс гижис племянникыслö, что сiя важын ни эз вовлы гортö, что ачыс пöрисьмö, а тёткаыс пондiс шогасьны, и колö нылö отсалыштны хозяйство гöгöрын. И письмо конецас, кыдз бытьтö ненароком гижöма, миян деревняын пö öддьöн бытшöм да визыв нывка эм, образованнöй, мöймусянь бригадирöн уджалö.

Мартынов вежöртiс, что колö ветлыны, уважитны пöрись морттэзöс. Кыдз не кыдз, аймам туйö быдтiсö-пестуналiсö, отирö петкöтiсö. И колö öнi ветлыны, кытчöдз эшö досповна эз пондöтчы мелиоративнöй удж.

Лун-мöд бöртi, кыдз только чулалiсö майскöй праздниккез, Мартынов мунiс аслас деревняö.

Дядьыс, Михаил Васильевич, кöть и дзор, но крепыт эшö старик, тёткаыс, пыр ласковöй да добрöй, коккез выланыс ни, панталiсö племянникнысö öддьöн радöн. Нiя суетитчисö, котрасисö, лöсьöтiсö пызан, тэрмасисö юасьны, бытьтö вот-вот племянникныс пышшас.

Кöр пуксисö тыра пызан сайö, дядьыс чикыртiс шульга синсö и лукавитöмöн юалiс: «Гриша, поди, кинöскö вайöтiн ни?» — сiя сералöмöн дзарнитiс племяшыс вылö и чöскыта сюйыштiс öмас сола рыжык.

Гриша эз вежöрт, мый вылö намекайтö дядьыс, и ачыс юалiс:

— Кинöс?

— Кинöссö... Да ме тай юала, эн на эшö адззы невестасö? Чожа эд двадцать семь ни тырас, а тэ сё эшö бобыльöн олан, — дядьыс вежöртанажыка висьталiс ассис юасьöм. Племянник дядьыс тöждiсьöм вылö шынь серöмтчис да шуткаöн горöтчис:

— Прокö эшö абу семья видзны.

Старик некыдз эз мездöтчы племянникыс бердiсь и бöра лукавитöмöн сетiс вопрос:

— Мый, зарплатаыт ли мый ли учöт? Учöт, дак отсалам. Али статьнат эн пет? Ме сьöртi, дак тэнат быдöс эм.

— Мывкыдö эшö оз судз, — сiдз жö шуткаöн отвечайтiс племянникыс.

Михаил Васильевич семьяын эз вöлö зонкаэз. А Гриша — воныслöн зон. Айыс сылöн торксис Отечественнöй война вылын. А мамыс вöлi эшö том, мужикыс понда тöждiсьöмсянь совсем косьмис и видзчисьтöг кусiс. Михаил Васильевич Гришаöс учöтсянь быдтiс зон туйö. И дядьыс и тёткаыс сьöлöмсянь мунiсь шонытсö быдсöн сетiсö Гришалö.

Гриша быдмис добрöй да вежöра. Хозяйствоын вöлi бур отсасись. Быд крестьянскöй удж сы киись петiс: доддез керис, дугаэз кусiньтiс, керку тшупис, пестеррез и корзинаэз гöрдззис. Михаил Васильевич гордитчис племянникнас и аслас соседдэз одзын ошшасис: вот пö и миян родiсь петiс инженер. И удж сылöн серьёзнöй: вильсаэз лэбтö, нюррез косьтö, мулiсь нянь быдтан вын содтö. А мый сэтшöм нянь? Не весь отир коласын баитсьö: «Нянь — быдöслö первöй юр».

Öнi нiя, кык пöрись, ласковöя видзöтiсö Гриша вылö и думайтiсö кытшöмкö кузь думаэз. Гриша вежöртiс нылiсь думаэсö асмознас: «Öтiк зон вöлi, и сiя лэбзис, и кольччисö öтнаныс кык старик».

Гриша пуктiс кисö дядьыс пельпон вылö и ласковöя горöтчис: «Донаэз тi менам. Буржыка сувта коккез вылам, сьöрам овны нуöта».

Этна кыввез бöрын дядьыслöн и тёткаыслöн лэбзисö вывланьö синкыммезныс, и синнэзсиныс быгыльтчисö синваэз. Тёткаыс малыштiс Гришалiсь русöй юрсиэсö и ласковöя, пильскöмöн горöтчис:

— Кытчö ни ми вöрзям? Эстöн миян деддэз, баббез, аймаммез чужисö и кулiсö, эстöн нянь быдтiм, кöть сiя и öддьöн курыта шедiс, эстöн и шойна вылö каям. А вот тэ ичмонька вайöт, внучеккез миянлö чужтö, и бöра миянлö виль свет öзъяс. Вот видзöт, кытшöм керкуэз сувтöтiм, думайтiм тэ ныын лоан хозяинöн... Но, тыдалö, тэ вылö мöднёж судьба видзöтöма.

Мöдiк лунö асывнас Михаил Васильевич и Гриша иньдöтчисö Фрол дед ордö, кöда эшö тöн рытнас кытсалiс ас ордас. Колö пö юасьны городскöй да эшö учёнöй мортлiсь, мый мирас керсьö. Фрол Степанович — морт легендарнöй. Мыгöрнас сажень сувда, не весь царь дырни лейб-гвардияын служитöм. Гвардееццез шеренгаын сулалöм медодзын. Кöр томмес шутитöмöн пондасö сылiсь юасьны, мый, дед, адззылiн ли пö царьсö, эз ли сiя нюжöтлы кисö тэкöт здоровайтчыны, Фрол Степанович лукавöя серöмтчас и горöтчас: «Адззылi. Унаись. Ме эд Зимньöй дворецын охранаын сулалi. А мый царь? Чукыля-викыля, миян Якуня Ваняся эшö учöтжык. Пöльыштан, и усяс. Быгалöм синнэза. И вот сэтшöм недосповна морт ыджыт империяöн правитiс. А здоровайтчыны? Эз. Ме бы сылiсь орсöмöн няпыртi киоксö и сыись только пельнянь яй шогмис и то кöс».

Фрол Степанович гражданскöй войналöн герой. Сiя боевöй Краснöй Знамя орденöн наградитöм. Блюхерсянь сылöн эм именнöй шашка. Да и Отечественнöй войнасянь сылöн эмöсь кык медаль.

Михаил Васильевич, пиджак вылас югьялан орденöн, ордчöн племянникыскöт мунiсö деревня кузя Фрол Степанович ордö. Сiя мунiкас висьтасис, что этö керкусö строитiсö Фрол Степановичлö, колхозлöн первöй председательлö. Михаил Васильевич эз ешты кончитны ассис висьтасьöм, кыдз тöвчикöн локтiс Фрол Степанович виль керку одзö верзьöмöн морт. «Тр-р-р! Тр-р-р! Öй, сулав, чöрс кок!» — боёк вöв вылiсь горöтчис морт. Бура вердöм, чим сьöд том вöв пондiс жöдзны-йöктыны öшыннэз одзын. Вöв вылын басöка пукалiс спортивнöй костюма нывка. Сылöн дзугсьöм, кыдз рудзöг идзасiсь, юрсиэзыс дöвьялiсö шоныт майскöй тöв вылын.

— Эй, деда, Фрол Степанович, кылан, петав жö! Басни менам тэ дынö эм, — ласковöй голосöн горöтчис вöв вылын пукалiсьыс.

Керкуись посöдзö петiс кузь, кöс, нач дзор Фрол Степанович и, диво, том голосöн горöтчис:

— Здравствуй, здравствуй, хозяйка. Бöра жöниккез спокой оз сетö? — старик перыта лэдзчис посöдзись, сибöтчис нывка дынö и, кыдз том мужик, орсöтчöмöн юалiс: — Но дак, кытшöм дело тэнö ме дынö вайöтiс, кытшöм могöн гöнитiн?

Эта коста Гриша дядьыскöт сулалiсö ны дынсянь неылын и дивуйтчöмöн видзöтiсö эта картина вылö.

— Фрол Степанович, совет колö. Да, тр-р-р, тэ сулав, эн жöдз, — нывка öлiс вöвсö. — Идсö пондам кöдзны али эшö одз?

— Ах тэ, Александрушка, да эд тэ ачыт учёнöй. Унажык месся тöдан. А кытшöм ыб вылö мöдат кöдзны? Юдинскöяс?

— Сэтчин, Фрол Степанович. Мöйму эта пора кöдзим ни.

— Э-э, мöйму... Таво мöдiк год. Год год вылö оз вачкись. Да и Юдинскöйö лöсьöтчит кöдзны? — Дед чышкыштiс паськыт, умнöй кымöссö и содтiс: — Эта ыбыс неылын нюрсянь, ой тöв вачкö. Лун кыксö эшö норовитö. Тэ невна видзчись, ме аслам народнöй календарь вылö видзöта.

Старик перыта кайис вылын посöдз вылö и öшис ыбöс сайö.

Гриша дядьыскöт осьтöм öммезöн дзиргисö нывка вылö.

Верзьöма морт только öнi нiйö казялiс. Перыта бергöтчис нылань, зэгнитiс кольта юрнас и серöмтчис. Сылöн чочком ряда пиннезыс югнитiсö шондi вылын.

— А-а, Михаил Васильевич, кытшöм тэ талун бытшöм да важнöй, кытчö сiдз мöдöтчин? Не корасьны ли? Только эд эшö тулыс. Öнi некöр, кöдзны колö.

Михаил Васильевич перво öшис. Но недыр кежö. Кыввез адззисисö.

— Да вот, Александра Васильевна... Племянник... — Сiя лукавöя чикыртiс шульга синсö и висьталiс: — Вермам и видзчисьны, кадыс эшö эм, да и жöник не нач эшö пöрись.

Александра Васильевна меряйтiс Мартыновöс юрсянь кок увтöдз и смелöя юалiс:

— Ылiсь жöник? Городiсь? — сiя дзарнитiс сы виль моднöй туфлиэз да сера фетровöй шляпа вылö и содтiс: — Не миян бульваррез сьöртi мода. Гöститны али могöн?

Гриша эз ешты видзны нывкалö ответ, кыдз дядьыс одзалiс:

— Сякö... Гöститны и могöн... Жöник эд. А эта жöниклö и миян бульваррез тöдсаöсь.

— А-а, — только и горöтчис нывка. Эта коста керкуись петiс старик. Киас видзис митчöм, вежöтöм ученическöй тетрадь и мыйкö бобгис ныр увтас. Сыбöрын висьталiс:

— Дак вот, Александрушка, таво тулыс кöть чепöссис одз, пондiс жагласьны, колö бы лун кык норовитны.

— Спасибо, Фрол Степанович, — нывка ласковöй голосöн благодаритiс старикöс. Сэсся боёка зэлöтыштiс поводдэз, Воронко перво чепöссис местасис, сыбöрын ордчис бöрись коккез вылас и на весь мак чеччöвтiс одзлань. Нывка гöнитiкас бергöтiс кольта юрсö бöрлань и горöтiс: — Михаил Васильевич, сёрöнжык пырав ме ордö, менам тэ дынö мог эм. И гöсьтö сьöрат вайöт.

Куим мужик дивуйтчöмöн видзöтiсö, кыдз нывка верзьöм вöв вылын тöвчикöн нöбасис одзлань бус тшакыль коласын и чинiс син одзын.

Кöр саясис деревня помын Александра Васильевна, Михаил Васильевич лапнитiс кинас племянникыс пельпон кузя и гордöя горöтчис:

— Вот кытшöм миян бригадирыс. Не нывка, а кавалерияись эскадронлöн командир. Эх, Фрол Степанович, одз ми тэкöт пöрисьмим. Гриша, ветлам рытнас, грек откажитчыны, — кыдз заговор керись горöтчис медбöрья кыввесö дядьыс.

Гриша öнi эз пыр öтлаын пöриссескöт, мунiс Берегшор дорö. Берегшор дорын, неыджыт керöс вылын быдмис пöрись кыдззезiсь рас. Эта медгажа места деревняись том отирлöн. Пöрисьмöм, неволькыт, нач потласьöм кыдз пуэз сайын, паськалöм зелёнöй крышаöн уввез увтын, не öтiк том мортлöн первуись сьöлöммезын öзйис, зорамис и быдмис век не чулалан ыджыт чувство — любитöм.

Мартынов гöгöртiс кыдззез и сибöтчис Марья местаö, пöрись кыдз увтын чуть тöдчан мысок дынö. Фрол Степанович висьтасис том отирлö, что гражданскöй война коста Колчаклöн бандиттэз, кöдна звералiсö миян местаэзын, эта кыдз увтын вийöмась гöрддэзлiсь Марья нима разведчицаöс.

Мартынов, эта мысок одзын сулалiкас, думайтiс: «Кин тэ сэтшöм смелöй вöлiн, Марья ныв, если чочкоммез тэись кыдз биись полiсö?» И эта думаэз коста сы син одзын бöра мыччисис верзьöм вöв вылын золотöй кольта юрсиа нывка. Сiя эшö гöгöртiс пуэз, видзöтiс тальöм туёк вылö, кöда кузя эшö неважын деревняись челядькöт котрасис кöмтöм коккезöн, и лэдзчис деревня вылö.

Луныс весь овтöн вöлi кузь, и Гриша неöтпыр касьтылiс дженытик, син кваркыш кузя пантасьöм бригадиркöт, кöда пыртiс сы моросö кытшöмкö тöдтöм чувство.

Сибалiс рыт. Беспокойство содiс. Михаил Васильевич племянникыскöт мунiсö бригадирша ордö. Мартыновлöн, кыдз веж öмугöла зонкалöн, кöсичаэзас молоточикöн шваткöтiс пульс. Ачыс эшö нем эз вежöрт, но мыйкö видзчисис эта виль пантасьöмсянь важнöйö, тöдтöмö.

Сашенька-хозяйка, кыдз мукöд отир величайтiсö сiйö деревняын, панталiс гöссезöс гажöна и ласковöя. Сiя недона ситецись платьеöн вöлi эшö стройнöйжык да бытшöмжык. Сылöн голубöй море рöма синнэзыс югыта сералiсö:

— Олат-вылат, дона гöссез. Ой, кытшöм важнöйöсь... Быль кыдз корасиссез. Ежели корасьны, дак кöть мыйкö шыасьö? — нывка перыта сувтöтiс табуреткаэз, öвтыштiс ны вылiсь чышкöтöн абутöм бус и тшöктiс пуксьыны. — Дарья Петровна, пет жö татчö, видзöт, киннэз миянö локтiсö, — сiя баитiс перыта, гажöна.

Комись петiс старушка. Сiя матiсь синнэзнас дыркодь видзöтiс ны вылö и жеркöтöмöн горöтчис:

— А, кум?.. Кытчö нö сiдз мöдöтчин? Нельки орден кышалöма. А эта нö кин тэкöт? Да не ли тэнат быдтасыт, Гришаыс? Ай-ай, кытшöм сира пожум кайöма. Грек тэныт, кум, ордчöн олам, год ни юртö эн мыччав, вöлi бы мужикö ловья, лöгасис бы. Дак мый, кум, локтiт корасьны? Ай-ай-ай, мый нö ме лёба, часöт сюромка петкöта. — Дарья Петровнаöс, кыдз тöлöн нöбöтiс, швыч петiс керкуись и только жолькнитiс чом ыбöсöн.

Быдöнныс сералiсö Дарья баб сёрни да не годдэз сьöртi боёка котрасьöм вылын.

Пызан вылö, клеёнка вевдöрас, ольсассис только öнi кыскöм заветнöй сундукись, чочком бранöй пызандöра, Дарья баблöн невестася приданöй. Пызан тырис сёян-юанöн.

Пызан сайын сёрнитiсö öтiк-мöдiк йылiсь, кыдз шусьö, не колана басни керисö. Унажык жеркöтiс-сёрнитiс, быдöс йылiсь касьтылiс — важсö и вильсö, Дарья баб. А Сашенька дзар керас то Михаил Васильевич вылö, то Гриша вылö и öмугöввезнас шыннялiс.

Сыбöрын Дарья баб, кыдз бытьтö усис, казявтöг вуджис дзирыт басни вылö. Сiя нёджжöвтiс квартиранткаыс вылö и пондiс тарзьыны:

— Вон тай ме сылö шуа, мыся, не инькалöн эта дело, уджавны бригадирöн. Мымда ни мужиккез бригадиралiсö, некинлöн унажык годся мыла эз судз, пышшисö леспромхозö или отир чапкисö. А тэ пемытсянь пемытöдз öтöр-мöдöрö котрасян, сёйны он ешты. Тэнат годдэзö нывкаэзкöт да зонкаэзкöт хороводитчыны колö, а тэ... Мунiн бы тэ, Сашенька, жöник сайö, — сiдз жö казявтöг Дарья баб кончитiс басни. А Сашенька басöка серöмтчис да бабушкалiсь баснисö шуткаö пöртiс:

— Бабушка, ме понда эшö принц абу на чужöма. А кытчöдз оз чуж, меным наказаннё — бригадирöн уджавны.

— Прынц, прынц... — Дарья баб нерис Сашенькаöс. — Кöр сказкаись прынцыс локтас, бригадиралiкат нач баксялан, ме кодьö жö обороникаö пöртчан. Сэк тэ и баня чудлö он понды ковсьыны.

Быдöнныс этна кыввез бöрын горöна ваксисö.

— Бабушка, менö эн вид, эн кулит. Вот быдтам таво виль урожай и приданöй менам лоас. А кин менö босьтас жöник сайö «бесприданницаöс», — сiдз жö öтмоз шутитiс-сералiс нывка.

Сашенька вились кисьтiс туисiсь быгья сюромка кружкаэзö и сувтöтiс гöссез одзö. Сыбöрын недыр кежö лöньсис, чужöм вывсис öшис шыннялöм, строгöйсялiс и горöтчис:

— Михаил Васильевич, ме эд тэнö не весь кытсалi. Кöть тэ и шоччисян, отсöт тэсянь колö. Нывкаэзöс пуксьöтiмö тракторрез вылö, наставник ны дынö колö. Тэ бур механизатор... Дак кыдз?

Михаил Васильевич малыштiс дзор юрсиэсö, чужöмыс öзйыштiс рöма вирöн и паныт орсöмöн горöтчис:

— Баитöны, пöрись вöв борозда оз тшыкöт, — и этна кыввез бöрын невна кежö виньдiс и одзлань горöтчис уже чорыта: — Конечно, отсала. Ме эшö эг на пышшы. А пондасö менö кывзыны невестаэзыс? — Михаил Васильевич пуктiс кисö племянникыс пельпон вылö и гажöна серöмтчис: — Вот тэныт бы, Гриша, этö должностьсö? А?

Гриша шы эз сет. Сiя пыр пукалiс лöня, кывзiс басни и только сералыштлiс.

Быгья сюромка кильöтiс веммез. Михаил Васильевич öдззис и пондiс висьтасьны, кытшöм сiя вöлi мастеровöй морт.

Кыдзкö нiя Дарья баб мужиккöт адззыласö, кыдз котрасьöны аэросани, и кыкöн тожö куим недель коста мастеритасö машина. Сувтöтасö пропеллер. Бергöтласö сiйö, бергöтласö, но додь сiдз и оз вöрзьы местаись. Сыбöрын челядьлö сетасö и нiя рез-паз только этö машинасö керасö. Сэсся кутчисясö керны вартан машина — тожö нем оз пет. Первöй жö испытаннё коста шестерня пиннес киссясö, а öтiк чегöм кöрттор благодаритас-вазгас изобретательлö кымöс кузяс, и сэксянь сы вылын новйöтö сюр.

— Сэк сьöкыт машинапöлöснас вöлi. А öнi мый? Машина тыр, уджав да уджав только, — Михаил Васильевич басöка, кудриа кыввезöн висьтасис важся история йылiсь, кыдз нiя старайтчисö механизируйтны колхоз, а кывзiссез гажöна сералiсö.

— А öнi мöдiк заботаэз, — горöтчис Сашенька, кöр кончитiс висьтасьны Михаил Васильевич. — Механизаторрез оз тырмö. Механизммез сложнöйöсь — колö грамотнöй инженер, механиккез колöны.

Виль кад — виль заботаэз. Не только гöрны, кöдзны, виль урожай дзимлявны, колö грамотнöя видзны пода, наука сьöртi. Колö детсад, ясли организуйтны, кинлöн челядь школаын кольччöны велöтчöмын — колö отсавны, пенсионеррезлö пес вайны, газ сувтöтны, да быдöс, мый колö, лыддьыны он вермы. Олан эм олан.

Рыт шогмис бур. Александра кужö кывзыны и лöсьöтны басни. Гöссез бертiсö гортö довольнöйöсь, гажаöсь.

II

Тулыс крепыта ни босьтiс ас киас праваэз: ловзьöтiс му, шондi морос вылын быдмис турун, пуэз вылын польдiсö, вежöтiсö почкаэз. Оссисö лымдорчачаэз, вежöтiс бабапель.

Ыббез вылын сё горöнжыка урöтiсö тракторрез. Александра Васильевна аслас верзьöм вöв вылын гöняйтö то тракторрез дынö, то складдэзö, кытöн протравливайтöны кöдзыс, то кузницаö или мастерскöйö, öтiк кылöн шуны — узьны некöр.

Александра Васильевна эта мöдiк тулысся кöдзан кампаниясянь видзчисьö уна, этаын сылöн ыджыт надеждаэз.

Мартынов отсасис дядьыслö хозяйство гöгöрын. Сылöн эшö кольччис кык лун и эта коста сiя ештöтчис гöрдззыны плетеньöн палисадник. Сiя одз асылöн вадöрись кайöтiс небытик бадьшаттез. Кульгора ыб вылын сы синнэз вылö межа дорын усис трактор «Беларусь», кöда кöбывка моз чеччалiс местаись, а одзлань эз мун. Мартынов нельки серöмтчис: «Кыдз бригадирлöн вöлыс чеччалö, сiдз и тракторрез». А кöр сибöтчис матöжык трактор дынö, сы син вылö усис — кабинаын пукалö Александра Васильевна и мыйкö дзирыта велöтö томыник нывкаöс, кöда пукалö руль сайын. Александра Васильевна казялiс Мартыновöс, перыта чеччöвтiс кабинаись, сибöтчис сы дынö и эшö эз «олан-вылан» висьтав, горöтчис:

— Да тэ быль хозяйственнöй, — нето ошкис, нето кулитiс и бöра горöтчис: — Не дело инженерлö корзинаэз гöрдззыны. Отсав нывкаыслö трактор öмлöсавны, а то машинаыс сiйö оз кывзы.

Мартынов пуксис кабинаö. Сiя мыччалiс нывкалö, кыдз плавнöя включитны скорость и ровнöя видзны газ, сыбöрын юалiс:

— Кыдз тэнö шуöны, кинлöн тэ?

— Оля ме, Емельян Ивановичлöн ныв, — висьталiс трактористка.

— Дак вот, Оля, Емельяновна, трактор, кöть сылöн сьöлöм и стальнöй, любитö ласковöй киэз. Эн нервничайт. Небытика уджав рычаггезöн, газ, газ ровнöйжыка видз, — велöтiс Мартынов.

Трактор вöрзис местаись, пондiс ырöтны-мунны ыб кузя, керис веськыт борозда му вылöт. Кöр керисö куим круг и сибöтчисö, кысянь пондöтчисö, Мартынов чеччöвтiс кабинаись да висьталiс нывкалö: «Ни пуха, ни пера». Трактористка мыйкö горöтчис паныт, но тракторлöн урöтöм шы сылiсь горöтчöмсö öтлаын шоныт тöвкöт нöбöтiс.

Мартынов и Александра лэдзчисö ыб вылiсь öтлаын. Ны сьöрын, поводдэзтöг, неылын мунiс умнöй вöв, бытьтö сылö недолыт кывзыны нылiсь басни. А нiя деревня дынö локтöдз мунiсö баснитöг, быдыс думайтiс аслыс. Шондi ласковöя сералiс небоын. Небытик ру малалыштлiс нылiсь чужöммез. Ыбшаррез гажöн сьылiсö нылö ассиныс песняэз. Гöгöр вöлi шоныт, гажа, мича. Александра Васильевна и Мартынов сьöлöммезын тожö вöлi долыт.

Мартынов мунiк панытö эшö панталiс Александра Васильевнаöс. Нывкаыс петiс керкуись, кытöн олiсö кык пöрись пенсионерка. Мартынов сiйö видзчисьыштiс, сибöтчис сылö паныт. Александра Васильевна вöлi кымöра чужöм вылас и гажтöма юалiс:

— Мунан ни? Емельян Иванович районö мунас, сыкöт верман мунны, а сэтчин автобусöн...

Мартынов пыдына видзöтiс Александра Васильевна синнэзö и горöтчис совсем мöдiкö, мый йылiсь думайтiс: «Ме подöн, неылын».

Александра Васильевна сылö висьталiс, ачыт пö тöдан, не учöт, а менам персональнöй машина Воронкося абу.

Мартынов веськыт кисö нюжöтiс Александра Васильевналö и сылöн шоныт, крепыт ки водiс зонкалöн ыджыт долонь вылö:

— Адззисьлытöдз, Сашенька. Быдöс тэнат бур лоас. И эшö юала тэнчит разрешеннё: туйö тэныт гижны письмо? — Этна медбöрья кыввез понiсь Мартынов чужöм вылö чепöссис пым вир, кыдз бытьтö керис сiя мыйкö нёштöмö. Александра Васильевна Мартынов юасьöм вылö нем эз висьтав, только юрнас гогиньыштiс да серöмтчис. Мартынов эз вежöрт и иньдöтчис гортлань.

Александра Васильевна сё эшö сулалiс местаас и видзöтiс, кыдз сира, крепыт морт увереннöя шагнялö му кузя.

Кöр рытнас Александра Васильевна бертiс гортас, пызан сайын сёйикö, Дарья баб дзарнитiс квартиранткаыс вылö и горöтчис:

— Кольлалiн?

Александра Васильевна паньсö пуктiс пызан вылö, дивуйтчöмöн видзöтiс Дарья баб вылö и юалiс, бытьтö эз нем вежöрт:

— Кинöс?

— Кинöссö. Бытьтö нем эг адззыв. Кöть ме и матiсь синнэза, кöр колö ― быдöс адзза, ― лöгöнмоз шваткöтiс Дарья баб. Эстöн басни Мартынов йылiсь орис. Да и нем йылiсь вöлi кыввез весь гарддьыны. Но Александра Васильевна талун, ашынас, да эшö уна лун бытьтö мыйкö öштiс, мороссö пидзыртiс тöждiсьöм да и деревняас лоис гажтöмжык.

Но бригадаын быд лунся заботаэз, кöдзан кад сроккез, соревнуйтчись совхозiсь делегация, кöда проверяйтiс, кыдз организуйтчö соревнованнё, жагöник нывкалiсь тöждiсьöм думаэзсö вештiсö сьöлöмас пыдынжык пельöсö.

III

Савельева Александра Васильевналöн биография, кыдз и уна том отирлöн, некузь. Чужис крестьянин семьяын, сiя семьяын вöлi, кыдз шусьö, шöмöскурмöтöн, медбöрья кагаöн. Айыс Сашалöн касьтывлiс, кöр пö вайöтiмö тэнö роддомись гортö, керкуö пырикö горöна, кыз голосöн пондiн горзыны. Чисто зонка голос. Видно, мужикöн мöдöмат чужны, да нывка вермöма. Сысянь тэныт и ним мужскöй-женскöйö сетiмö — Александр — Александра.

Саша не сiдз, кыдз нывкаэз, быдмис. Аканнез эз любит. Унажык котрасис да орсiс зонкаэзкöт, тышкасис ныкöт. Неöтпыр то öтiк, то мöдiк сосед норасис, что

Саша бöра öбидитöм зоннысö. Саша организуйтiс «походдэз челядькöт тöдтöм странаэзö», узис ныкöт охотник избушкаэзын вöрын, ю вылын чери кыйис. Орсiс челядькöт войнаэзöн, футболöн. Семьяын да и соседдэз баитлiсö, что оз ни сыись пет бур морт.

Но кыдзкö видзчисьтöг Саша нюжалiс, быдмисö, гöгрöссялiсö мороссэз, рöма вирöн öзйис чужöм и отир одзын мыччисис бытшöм, веськыт мыгöра, гырись, голубöй синнэза, золотöй сук юрсиа нывка. А походкаыс, походкаыс, кыдз королевалöн — öнi дивуйтчис отир! Зонкаэз, кöднакöт эшö неважын котрасис кöмтöг, сы вылö видзöтiсö кыдз неважын оссьöм тайна вылö.

Саша кокнита кончитiс шöрöт школа. Кык год уджалiс колхозын и эта коста ештiс бöбасьны петавны жöник сайö. Но жöниксö чожа, кык месяц эз чулав, вашöтiс. Эта пö не мужик, а юбка сылö колö новйыны.

Мунiс велöтчыны сельскохозяйственнöй институтö. Институтын велöтчикö айыс нывкалö только кыкись отсалiс деньгаöн. Саша откажитчис, ме пö взрослöй морт и ачым асьöс верда.

Саша велöтчис бура, активнöя участвуйтiс институт общественнöй организацияэзын, любитiс спорт, ештiс и уджавны. Öтiк случай сiйö тшöктiс локны тренируйтчыны не женскöй спорт сьöртi. Öтпыр институтiсь студенттэзкöт городын патрулируйтiкö, Саша и эшö öтiк винерик студент кольччисö группа сьöрись и эта коста ны вылö уськöтчисö кык код мужик. Саша и зонка срамитöмöсь пышшисö ны дынiсь. Эта позорнöй случай Сашаöс вайöтiс самбо секцияö. Мымда тренер сылö баитiс, лöгöн стыдитiс, что эта не женскöй спорт, Саша график сьöртi вовлiс быд занятие вылö. Тренер медбöрын öвтыштiс кинас, ась пö занимайчтö, и петiс нывкаись бур самбист. Институт кончитöм бöрын Саша босьтiс назначеннё уджавны севернöй районö. Сiйö определитiсö главнöй агрономöн «Виль туй» нима колхозö, кöдалöн центральнöй усадьбаыс вöлi куим километра ылына райцентрсянь. Но сiя, кöр локтiс колхозö, агроном должностись откажитчис: менам пö эшö некытшöм опыт абу производственнöй практикася. Колхозын эта коста уджалiс главнöй агрономöн Егор Нестерович, сельхозтехникум образованнёöн. Сылöн ыджыт практическöй опыт и пользуйтчö авторитетöн, но медбöрья годдэзö пондiс норасьны висян коккезыс вылö.

Кöр эта йылiсь мунiс басни председатель кабинетын, кытöн вöлi и партийнöй комитетлöн секретарь, Александра Васильевна висьталiс, что сiя том, здоровöй и быдöс пондас тыртны указаннёэз Егор Нестеровичлiсь и ась сiя кольччö главнöйöн. Сэтшöмö и примитiсö решеннё.

Александра жö перыта кутчисис уджавны. Сiйö быд лун туйис адззывны то öтiк, то мöдiк бригадаын, зерноскладдэзын, ыббез вылын. А кыдзкö пырис председатель кабинетö и висьталiс, что кытшöм бы сiя эз вöв том, транспорттöг, аслас коккез вылын, оз вермы уджавны сiдз, кыдз бы колiс. Председатель сылö шуткаöн висьталiс, эм пö том вöв Воронко, верман кö сiйö öмлöсавны, бось, а мöдiк транспорт абу. Александра Васильевна и синнас эз кваркышт, согласитчис. А кынымкö лун бöртi томыник бöб вöв вылын Александра Васильевна верзьöмöн гöняйтiс бригадаись бригадаö.

Джын год бöртi правленнёын баитiсö колхозiсь медыджыт бригадаись делоэз йылiсь. Бригадаын дисциплина усис, урожайез босьтiсö медучöтöсь, механизаторрез пышшисö леспромхозö и мöдiк уджжез вылö. Важ и öнняся бригадиррез эз вермö уджавны, и нiйö чапкисö.

Правленнёись руководство дыр думайтiс, уна кандидатураэз бергöтлiсö, но сiдз некин вылö эзö вермö сувтчыны. Сэк Александра Васильевна висьталiс, что сiя согласитчас уджавны бригадирöн.

Эта басниыс мунiс райкомись секретарь Лобанов дырни, и если бы не сылöн медбöрья кыв, правленнёись руководство Александра Васильевна предложеннёкöт эз бы согласитчы. Председатель и парткомлöн секретарь öтiк кылöн убеждайтiсö, сэтчин пö колö крепыт морт, а тэнат удж öнi колхозын медколана. Александра Васильевна вежöртiс, что нiя полöны, сiя оз справитчы бригадаöн. Эта басниыс буржыка чорзьöтiс агрономлiсь характер и сулалiс ас пондаас, кытчöдз эз согласитчö.

Лобанов кывзiс, кывзiс, сыбöрын беринь-беринь керис юрнас и горöтчис:

— Но öнi том морттэз... Ог вежöрт. Öтiккез кошшöны шоныт да сöстöм местаэз, мöдiккез юррезнысö сюйыштöны веськыта биö. Александра Васильевна, вежöрт, ме согласитча, но ме тэ понда и отвечайта. Эта не эксперимент.

Сiдз Саша лоис бригадирöн.

IV

Деревнясö, кытöн Александра Васильевна пондiс уджавны бригадирöн, тöдiс одзжык. Но öнi, кöр сiя локтiс татчö, адззис мöдiк синнэзöн. Деревня пукалö кык учöтик Берегшор да Юдинскöй юоккез дорын, и ны сайын сэк жö пондöтчöны вöррез да нюррез. Деревня ыджыт, сто дворся унажык, вит километра ылына райцентрсянь.

Кöр председатель вайöтiс Александра Васильевнасö деревняö бригадирöн, отир эз пантав не маöн, не пирöгöн. Бригаднöй собраннё вылын отир унажык чöлiсö, ас коласаныс ропкисö. А кинкö ны коласiсь горöна вакыштiс да нёштöма шутка чапкис:

— А оз пышшы, оз бöжнас викыльт? Öддьöн ни ручыс волькыт, медбы кык кока кöиннэз эз сёйö. — Отир коласын лэбис недовольнöй шумок, ваксьöм.

Не чожа деревняын отир пондiсö бытшöма величайтны виль бригадирöс. Перво синпöлöн видзöтлiсö сы вылö, сы удж вылö, мый пö ноко сыись петас. Мужиккез öтамöдныс коласын кеслiсö пиннезнысö, кытшöм пö инькаись петас бригадир. Кöть сiя и учёнöй и брюкиэз новйö, всё равно инька. Вон пö Петров Коля кытшöм мужик, фронтовик, чарньöв кодь, и голосыс, кыдз генераллöн, и то нильдiс. Пешлас, кыдз бригадирыслö нянь шедö, и тожö бöжнас öвтыштас.

Александра Васильевналö не кокнит вöлi пондöтчыны уджавны бригадирöн. Отир уджавны петiсö сёрöн, кöть и бригадаын список сьöртi уджалiссезыс унаöсь, удж вылö петiсö етша. Механизаторрез коласын дисциплина тожö эз вöв, и мукöдыс асывсянь ни вöлiсö кодöсь. А петасö уджавны, керасö кынымкö рейс, юасьтöг мунасö шабашкаэз вылö: кинлöкö пес, турун ваясö, вöр петкöтасö — вештiсьöны нылö бöра дурман ырöшöн. А бригадаын уджыс тыр: колö назём, удобреннёэз ыбö петкöтны, сёян фермаэзö кыскыны, кöдзыс весöтны, сельхозмашинаэз кöдзан кежö вочны, пенсионеррезлö пес вайны, да разь позьö лыддьыны, кытшöм только удж оз ков керны бригадаын. Бригада — ыджыт семья, сылöн быдлунся заботаэз корöны бригадирсянь быдлаö син, аскадö адззыны, примитны правильнöй решеннё.

Дыр думайтiс Александра Васильевна, мыйсянь пондöтчыны, мый керны, медбы сылö, да эшö инькалö, отир веритiсö.

Кыдзкö сёрöн Александра Васильевна бертiс гортö, а олiс сiя Дарья Петровна баб ордын, чöвтчис, уськöтчис кровать вылö и сiдз сылö лöгувьяс отир вылö, ас вылас вöлi охота горзыны, но синваэз эзö петö.

Дарья баб комись петкöтiс пуöм картошка, капуста да кувшинöн йöв и ласковöя корис квартиранткасö ужнайтны. Квартиранткаыс сёйикас пондiс норасьны, что отир сiйö озö вежöртö, оз кывзö, нарошно кешитчöны сы вылын, удж вылö петöны сёрöн или совсем оз петö. Александра Васильевна лöгöн видiс отирöс:

— Не отир, трескöны-юöны бы бура, а уджись, кыдз ошись, полöны.

Дарья баб видзöтiс, видзöтiс квартиранткаыс вылö да чорыта горöтчис:

— Весь, нывка, миян деревняись отирöс кулитан. Миян отир бур, уджавны кужöны. Видзöт деревняыс миян кытшöм, стося унажык двор, а быдöс керöм-тшупöм бур хозяин киöн.

Александра Васильевна курччöвтiс небыт рудзöговöй нянь, нёджжöвтiс Дарья баб вылö и падмалiс сылiсь баснисö:

— Дак нiя ас понда уджалöны. А эм эшö общество, государство.

Дарья баб уже лöгöн пондiс баитны: кыдз этö кытшöмкö тöдтöм нывка кулитö сы деревняись отирöс.

— Тэ менö эн öмав, — горöтчис старуха, — кывзы, мый ме тэныт висьтала. Ежели бур двор — хозяин не дыш, ладнöй хозяйство — хозяин уджалiсь. Уджалiсь хозяин и обществолö, мый колö, керас, только умöн туйдöт. Öнi деревняын отирыс вельмис, дак только тiян коддез виноватöсь. Мымда ни медбöрья куим год сьöрна бригадиралiсö, то отир вашöтасö, то асьныс оз прокмö юравны, пышшасö. А мыля сiдз? Кыдз бöрьясö бригадирö, сэтчö начальникö пöртчö, отир вылö горöтлö, гöститны корсьö. Лунтырöн то öтiк ордын, то мöдiк ордын самогонка чурскö, а сыбöрын лун-мöд кыдз порсь валяйтчö. А мукöд умöлик отирлö только эта и колö. Вон Петров Коля, кöда тэ вотöдз уджалiс, перво тожö бур вöлi бригадир, отир кывзiс, а сыбöрын и сiя шыбыльтчис, пондiс юны, нельки аслас инькаыс умöль лоис, и отир вашöтiс. Может, нывка, ме и не быдöс вежöрта, ме мый, кöс вема старуха, но ме сьöртi колö отиркöт öтлаын овны, тöдны нылiсь заботаэз, мича луннэз и шогöттэз. Тöдсась отирыскöт, тöдсась, быдыслiсь думаэсö вежöрт, сэк и тэнö пондасö вежöртны.

Дарья баб малыштiс косьмöм киэзнас золотöй юрсиэсö квартиранткаыслiсь да норöн горöтчис:

— Вермöм жö шогмыны сэтшöм бытшöм да статя нывка. И кытшöм куллез тэнö тшöктöмась уджавны бригадирöн. Тэныт аскодяöсь жö колö кагаэз ваявны, семья видзны, а не гöняйтны верзьöм вöв вылын, кыдз кавалерист, пемытсянь пемытöдз да каждöй осьтаö юртö сюйыштны. Но ладно, ме вылö эн лöгав. Пуксин бригадиравны, дак бригадирав. Мый нö тэ, бöра йöвсö абу юыштöмат? Умöля пондан сёйны, прокыт чожа бырас.

Александра Васильевна эта басни бöрын дыр эз вермы онмöссьыны, юрас пырисö быдкодь думаэз, керис планнэз, кыдз уджавны бригадаын. Сiя аслыс шуис, что Дарья баб правильно баитö, быд мортлiсь нутросö колö тöдны, сэк кокнитжык и морткöт лоас баитны. Александра Васильевна юрö уна эшö пырисö быдкодь думаэз, но том мортлöн чöскыт здоровöй он жагöника ланьтöтiс нывкасö.

V

Александра чеччис одз. Кöть рытнас и дыр эз вермы онмöссьыны, юр вöлi сöстöм. Сiя ас одзас сувтöтiс задача: перво-наперво сувтöтны дисциплина механизаторрез коласын. Сiя тöдiс ни, что механизаторрез коласын дзугис дисциплинасö Быздылёв Степан Михайлович, кöркöся танкист, механик-водитель.

Александра Васильевна невна сёйыштiс, мунiс контораö, сетiс наряддэз и сэк жö иньдöтчис гаражö механизаторрез дынö. Кöр сiя пырис гаражö, трактористтэз орсiсö картiэзöн. Здоровайтчис ныкöт. Öтiк-мöдiк негорöн паныт видзисö ответ. Бригадир сибöтчис орсiссез дынö, шытöг öктiс колодаись картiэз, сюйыштiс карманас и горöтчис:

— Талунсянь удж местаын эта орсöмлö пуктам конец.

— А тэ не полiсь, горадзульчик, — пызан сайись чурка вылiсь чеччис неыджыт, топытик тракторист. Сылöн учöтик, нач сьöд синнэзыс лукавöя, орсöмöн бергалiсö сингöппезас. Сы гыркись вачкис вина дукöн. Александра Васильевна видзчисис, мый бöра керас кöркöся танкист Быздылёв Степан.

Тракторист сувтiс Александра Васильевна одзö, векыштiс пиннесö и пондiс изгиляйтчыны:

— Здорово, горадзульчик! Мыля тэ сэтшöм басöк да лöг. Но лок жö ме дынö, голубöй синока, ас бердам шонтышта.

Механизаторрез дивуйтчöмöн видзöтiсö да полöмöн видзчисисö, кытшöм бöра згал мöдö керны Степан. Кинкö ны коласiсь öлiс:

— Степан, дугды кешитчыны, эн стыдит миянöс. Быздылёв, кыдз рысь, бергöтiс юрсö шы вылö и лöгöна орöтiс:

— Тэ, веж öмугöла, пиннетö курччöвт. Аслат толк абу басöк иннезкöт орсöтчыны, пöрисьжыккезöс эн öмав, — Быздылёв эшö матöжык сибöтчис бригадир дынö и киэсö нюжöтiс сы мороссэз дынö. Но трактористтэз син одзын сэтшöм картина петiс, что сэк жö он куж и висьтавны. Нывкаыс кыдз бытьтö кисö сетiс здоровайтчыны, мöднас кутiс фуфайка воротöттяс, и Быздылёв, кыдз куль, берездасис бригадир спина вевдöрöт му вылö. Тракторист куйлiс му вылын и барöтöм синнэзöн нёджжалiс гаражись потолок.

Механизаторрез, кыдз öманыс ва босьтiсö, видзöтiсö то бригадир вылö, то джоджын куйлiсь тракторист вылö.

Александра Васильевна лэчыта видзöтiс трактористтэз вылö да горöтчис:

— Висьтала быдöннытлö, медбы некин сэрпöсь киэз эз нюжлав, кытчö оз ков.

Быздылёв чеччис му вылiсь и, кыдз вузалöм пон, кинитчис гаражись, а петiкас горöтчис:

— Горадзульчик, один ноль тэнат польза вылö. Бригадир мунiкö висьталiс, что сетö нылö срок öтiк лун, медбы гаражын, мастерскöйын и ны гöгöр öтöрын быдсöн вöлi дзимлялöм хлам, сувтöтöмöсь, кыдз колö, машинаэз.

Эта история Быздылёв Степан йылiсь тöвчикöн паськалiс деревня кузя. Öтiккез ошкисö бригадирöс, мöдiккез кулитiсö. Но и но пö, эттшöмыс эшö некöр эз овлы деревняын, медбы нывка забгис му вылö мужикöс, да эшö кинöс — Быздылёвöс. А кинкö абу дышöтчöм, бригада контора стена вылö öшöтöм молния, да эшö рисуйтöм, кыдз Быздылёв Степан виклясьö бригадир коккез увтын. Быздылёв быдса неделя кымöссö эз мыччав деревня вылын, нюшкис табак и думайтiс. Думайтiс, кыдз вештiсьны бригадиркöт, но нем юрас эз пыр. Только уж стрась сылö вöлi стыд: не кытшöм-нибудь мужик, а инька сiйö забгис му вылö.

Кытшöмкö лунö Александра Васильевна лöсьöтчис мунны зерноток вылö, кытöн весöтiсö сю кöдзыс. Керкуö пырис Настя, Быздылёвлöн иньыс, а сы мышкын ачыс. Степан видзöтiс коккез вылас и митiс шапка. Александра Васильевна синпöлöн видзöтiс здоровöй, крепыт тракторист вылö, а мöдыс, кыдз шкодливöй ученик, митiс шапкасö, и сы вылын охота вöлi ваксьыны. Степанлöн инькаыс сувтiс бригадир одзö, чышьян угöввезöн чышкыштiс синваэсö и корис:

— Александра Васильевна, кытшöм стыд, кытшöм позор, но простит менчим иродсö. Сiя эд не торксьöм морт и характернас не умöль, но вот шедас бöж увтас и згальничайтö. Эн вашöт трактор вылiсь — ачыт эд адззылiн, мымда миян кушкынöммезыс, вердны-быдтыны колö. — Ирод тэ ме юр вылын, — лöгöн вирдыштiс иньыс мужикыс вылö.

Корис проститны и Быздылёв и висьталiс, что вештiсьны сiя оз понды, сiдз кыдз бригадирыс не мужик. Александра Васильевна висьталiс, уджав пö, а только керан öтiк прогул и петан сёрöн удж вылö, сэк ас вылат горзы.

Быздылёв Степан керкуись петiкас ни юалiс:

— Александра Васильевна, а сё жö висьтав, если абу секрет, кыдз тэ менö забгин? Менö нельки кодувья öтiк мужик деревняись оз вермы пöрöтны кок вывсим.

Александра Васильевна серöмтчис да горöтчис:

— Вежöрт, Быздылёв, кытшöм бы вына эз вöв морт, если сылöн юрас мыйкö недобрöй, усяс кок вывсис, кыдз куль мешöк.

Эта бöрсянь Быздылёвöс и механизаторрезöс кыдз вежисö. Уджалан график, кöда öшалiс гаражын, пондiс тыртсьыны. А Степан, кöр сы вылын кытшöм-нибудь мужиккез пондасö кеслыны пиннез, горöтчас:

— А тэ нюжöтан сэрпöсь киэтö, сiдз жö мусö окалан. Гаражын и мастерскöйын лоис порядок: хлам вöлi дзимлялöм, машинаэз сулалiсö навессэз увтын. Механизаторрез ас кадö петiсö уджавны и этасянь бригадир сьöлöмын лоис долытжык и гажажык.

Александра Васильевна уна ни тöдiс отирöс деревняись. Медодз сiя матынжыка тöдсасис деревняись уважаемöй морттэзкöт. Сылö öддьöн гленитчис Фрол Степанович Пономарёв, колхозiсь первöй председатель. Сiя висьтасис, кыдз эта деревняын организуйтiсö коллективнöй хозяйство, кытшöмöсь вöлiсö трудносттез, сетiс бригадирлö бур советтэз. Фрол Степанович сiдз жö висьталiс Александра Васильевналö, частожык пö пыравлы, ми пö, пöриссез, эшö пригодитчам. Бригадир тöдсасис и Михаил Васильевичкöт, деревняись первöй трактористкöт, изобретатель-самоучкакöт.

Нывкаыс досуг коста сералöмöн и лöгöн касьтывлö и мöдiк пантасьöммез.

Кыдзкö сiя могöн пырис Емельян Иванович Рудов ордö, кöда деревняын лыддиссис медбур плотникöн. И быль, сылöн керкуыс строитöм, кыдз сказкаись теремок: крыша вылын пукалö пуись керöм петух, карниззэз — кружеваэз, öшын наличниккез орсöны быдкодь узöррезöн, посöдз крышаыс сулалö витöй столббез вылын.

Емельян Ивановичлöн семья öддьöн гленитчис Александра Васильевналö. Хозяин-хозяйка эшö не пöрисьöсь, добрöйöсь, быдтöны кык зон и öтiк ныв.

Нылыс, Оляыс, кончайтö шöрöт школа. Неважын бригаднöй керкуö вовлiсö куим зонка и кык нывка, кöдна висьталiсö, что шöрöт школа кончитöм бöрын кольччасö уджавны колхозын, ны коласын вöлi и Оля.

Кöр пырис Александра Васильевна керкуö, Емельян Васильевич видiс, повзьöтлiс шатёкöн медучöт витгодся зонсö.

— Александра Васильевна, эта менам не зон, а öтiк печаль. Мый эд только сiя оз кер, шельма. Пыри тай картаö, адзза му вылын быглясьö кукань, синнэзыс бугыльтчöмась, öмсис лэдзчö быг. А эта шельмецыс сулалö молотокöн. Ме сылiсь юала, мый тэ керин куканьыскöт, Васятка? А сiя и шуö: «Тятю, нем унасö эг кер, только кымöсас учи-илик кöрттулок дори, а сiя, ылöстöм, водiс му вылö и пондiс изгиляйтчыны, думайтö ме повзя». Мый тэ сыкöт ылöстöмкöт керан, ковсис начкывны.

Кöр пондiс петны керкуись, Александра Васильевнаöс кольлалiсö öтöрöдз, корисö частожык пыравлыны. Эта тöдсасьöмыс Емельян Иванович семьякöт Александра Васильевна сьöлöмö пырис шоныта.

А вот Егор Коликакöт тöдсасьöм пидзыртiс сылiсь сьöлöмсö. Инька эшö том, а уджавны петö не каждöй лун, пыр сёрмö. Кöр бригадир пондiс сiйö кöритны, мыля не отир моз уджалö, сiя кыдз бöбмöм петух кинитчис сы вылö, пондiс горзöмöн тарзьыны:

— Мыля, шуан, каждöй лун удж вылö ог пет? А видзöт, мымда пукалöны сёйиссезыс, а кытчö нiйö кольнытö? Ясли-детсад абуöсь. Гожум кежö осьласö да бöра игналасö.

Александра Васильевна нёджжöвтас öтöр-мöдöрö: пызан увтын куш кынöма пукалö год кык мымдася зоночка, лабич дорöт велöтчö ветлöтны нылочка, комын бекöрпань миськалö эшö нылочка. Колика адззö, что бригадир видзöтö комлань и горöтчис:

— Вот сiя менам медыджыт, мöдöдз классын велöтчö, менам отсасись и пестуння.

Александра Васильевна юалiс, а кытöн пö хозяиныс. Колика синваэсö чышкис да горöтчис:

— А, летуныс?.. Кытчöкö мунiс кузь деньгаэз кошшыны, да сiдз и öшис. Тэ менö простит, Александра Васильевна, что ме тэкöт сiдз, ме мыдзи.

Öнi Александра Васильевна думайтiс, кыдз отсавны эта инькалö.

Деревняын уна мунiсö басниэз басöк Парась йылiсь. И кыдзкö луншöр бöртi Александра Васильевна лöсьöтчис пырны сы керкуö, но только кутчисис ыбöс вуг бердö, кыдз пашмöм гöрд юра том инька, кöда öмись вачкис вина дук, ыбöссö каличалiс. Александра Васильевна пеллезöдз локтiс сылöн кижган голос: «Сякöй кульсö новйöтö, нюкайтчö». А керку пытшкын кылiс сьылöм. Александра Васильевна аслыс висьталiс, мымда пö тэ басöк Парась эн дзеблась, но сöстöм ва вылö петкöтам.

А отиркöт да ны сьöлöм моггезöн тöдсасикö Александра Васильевна керис медодзза оськöввез сьöкыт, дзирыт бригадир уджын.

VI

Уджалiкö кад чулалö чожа. Александра Васильевна, локтiс бригадаö уджавны, кöр вежöтiсö пуэз вылын листтэз. Ар быдлаын босьтiс ассис праваэз, а вот чожа тулыс ни.

Колхоззэз да совхоззэз лöсьöтчисö кöдзан кежö. Райкомись секретарь Михаил Тимофеевич Лобанов колхозiсь председателлезкöт, совхозiсь директоррезкöт да главнöй специалисттэзкöт кöдзан кампания йылiсь совещаннё бöрын, кöть и сёр ни вöлi, сё эшö уджалiс. Öтiк-мöдiк делоэз керöм бöрын колiс эшö видзöтны лунся почта.

Отирсянь локтiсö быдкодь письмоэз предложеннёэзöн, кыдз буржыка уджавны. Локтiсö и заявленнёэз, жалобаэз умöля уджалiсь торговля вылö, быткомбинат вылö. А вот норасьö Отечественнöй войналöн инвалид, что сылö кык неделя кыдз оз вермö сувтöтны газовöй плита. Норасисö колхоз вылö, кöда челядьöс оз кыскав школаö. А вот эшö öтiк нöитчöм конверт. Мый сэтчин гижöма? Михаил Тимофеевич аккуратнöя вундыштiс конверт и сэтчинiсь кыскис чеччалан букваэзöн лист. Öтпыр, мöдöтпыр лыддьöтiс жалоба «Виль туй» колхозiсь бригадир вылö, кöдö ачыс благословитiс бригадирöн Красникова деревняö. Письмоын гижöмась, что бригадир Савельева Александра Васильевна деревняын керö самоуправство. Тышкасьö мужиккезкöт, вартлöм трактористöс, керкуэзын керö обысккез, гöтыра мужиккез бердö лякасьö. «Ну и ну-у. Но и клевета! А чёрт сiйö тöдö, а может, и сiдз? А тэ сiйö тöдан? Он, — аслыс горöтчис Михаил Тимофеевич. — Колö ветлыны. Ашын жö».

Одз асывнас Александра Васильевна гаражын нуöтiс механизаторрезкöт оперативка. Сiя керис итоггез кольччöм месяц сьöртi, сувтöтiс ны одзын задачаэз, мый колö керны мöдiк месяц коста.

Эта коста гараж дынö локтiс легковöй автомобиль, и машинаись перыта петiс Лобанов. Сiя чож кокöн пырис гаражö, горöна здоровайтчис механизаторрезкöт и сэк жö юалiс:

— Но, стальнöй вöввез вылiсь кавалеристтэз, кöдзан кежö готовöсь?

Сiя гöгöр нёджжöвтiс гараж, видзöтiс пырöтан синнэзнас саöсь механизаторрез чужöммез вылö и эшö горöнжык юалiс:

— Мый чöлат? Мый öманыт ва босьтiт? Секретарь одзö, кыдз му пытшкись петiс, сувтiс тракторист.

— Михаил Тимофеевич, запчасттез бы, — горöтчис Быздылёв, — а сiдз, кöть ашын ыб вылö пет.

— Видзöтö жö, кытшöм чож, видзöтам, кыдз готовöсь, — чорыта горöтчис секретарь и сибöтчис Александра Васильевна дынö. Михаил Тимофеевич мыйкö невна баитыштiс бригадиркöт, öтмöдöрö нёджжöвтiс и бöра горöна юалiс:

— А ноко, висьталö, кинöс эта красавицаыс тiян коласiсь вартлiс, — сiя мыччалiс бригадирлань.

Михаил Тимофеевич одзö бöра сувтiс Быздылёв Степан и шваткис:

— Менö, секретарь.

Механизаторрез быдöнныс гот-гот ваксьыштiсö, нельки воробейез повзисö и быркнитiсö-лэбзисö гаражись.

— Тэнö-ö? — неверитöмöн юалiс Михаил Тимофеевич.

— Так точно, секретарь, менö, — кыдз рапорт сетiс тракторист.

— И тэнö öсилейтiс нывка, кöркöся танкистöс? — гажöна сералiс секретарь.

— Эг и казяв, кыдз му вылö забгис, только синнэзсим бичиррез резсисö.

Гаражын бöра механизаторрез пондiсö горöн ваксьыны.

— И тэ жалоба сы вылö гижин? — юалiс чорыта секретарь.

— Кытшöм эшö жалоба? Ме сiдз татöн деревняын позор примитi да медбы эшö менчим позорöс быдса район тöдiс?

— А вот эм жалоба, — Михаил Тимофеевич кыскис писис конверт и мыччалiс механизаторрезлö.

— Ме кö адзза этö анонимщиксö, бöрись коккезнас пу ув вылö öшöта и рожаас понда сьöлавны, — лöгöна горöтчис Степан. — Ёрт секретарь, ме кöть и Быздылёв, менам эм аслам достоинство. А Александра Васильевнаöс некинлö обидитны ог сет. Ми быдöнным огö сетö. Сiя миян, кыдз шусьö, свой парень, кöть и нывка мыгöра, — Быздылёв перыта бергöтчис и мунiс аслас трактор дынö.

Михаил Тимофеевич и Александра Васильевна мунiсö гаражись.

Пуксисö машинаö. Мунiканыс секретарь юалiс бригадирлiсь, кыдз пö сiдз шогмис. Александра Васильевна висьтасис. Михаил Тимофеевич дыр, виньдöмöн, ваксис и ошкис:

— Вот молодчина, тэись бы бур борец петiс. Вежöрта, не чöскыт лоас тэсянь жöникытлö. А тэ вот мый эшö висьтав, кыдз обысккез керкуэзын керан? Тэнат мый, эм право? — секретарь эз тэрмöт, мый висьталас бригадир. Александра Васильевна дыр шы эз сет, сыбöрын юасьöмöн горöтчис:

— Обысккез? Если этiя, кöдö висьтала, шусьö обыскöн, то кери. А вот кыдз делоыс вöлi ...

Деревняын олö том инька, вдова не вдова, волькыт, бытшöм, не весь деревняын басöк Парасьöн шуöны. Некытöн оз уджав, олö бура, сёйö-юö чöскыта. Каждöй рыт сы ордын мужиккез, юкталö нiйö самогонöн, а нiя сылö самогон понда вештiсьöны песöн, сюöн и эшö öтiк-мöдiкöн, а иннезныс герьялöны-горзöны. Ме босьтi сьöрам кык комсомолецöс и рытнас пырим Парась ордö. Пызан сайын пукалöны кык мужик, юöны самогон. Мужиккез казялiсö миянöс, конувтаныс сюйыштiсö шапкаэз и, кыдз вузалöм поннэз, пышшисö. А комын сулалö самогон аппарат. Ме комсомолеццезöс тшöктi петкöтны этö яд керансö öтöрö и сэтчин паздыны. А лун бöртi Парасьöс обсуждайтiм бригаднöй собраннё вылын. Михаил Тимофеевич, адззылiт бы, кыдз инькаэз сiйö матегалiсö. И мужиккезлö нысянь бура шедiс. Öнi деревняын Парась абу. Кытчöкö нöбасис. Но и мед, мужиккезöс оз понды тшыкöтны, и семьяэзын покой. А гöтыра мужиккез бердö лякася? Эта уже клевета. Быль, öтпыр öтлаын ветлiм Быздылёв Степанкöт райцентрö. Сiя кöть аскодя мужик, но бур специалист, ва насоссэз вайим. Вот быдсöн менам греххез, Михаил Тимофеевич.

Александра Васильевна чышкыштiс чужöм вывсис кортöм синваэз и бергöтчис, медбы эз казяв секретарь. Но секретарь синнэзiсь нем эз туй дзебны, сiя адззылiс сылiсь синваэз.

— Но-но, бригадир, он ли горзы? — секретарь шоныт голосöн пальöтiс нывкаöс.

— Тi мый, Михаил Тимофеевич, горзыны меным эшö одз. Мед перво месянь умöль морттэз синваэзнысö кисьтöны, — чорыта шуис секретарьлö.

— Вот тэ кытшöм вöлöмат? — не то ошкöмöн, не то кулитöмöн горöтчис Михаил Тимофеевич.

Сыбöрын сiя юасис, кыдз мунö удж бригадаын, кыдз отир олöны, оссис ли детскöй сад. И медбöрын висьталiс, что самогоннöй аппараттэз керкуэзiсь петкöтны — дело милициялöн. И эшö, бытьтö басни коласас, юалiс, кыдз пö олö Михаил Васильевич Мартынов, вовлö ли гортö сылöн племянник.

Секретарь районö мунiкас ни горöтчис: — Александра, тэ öддьöн дзирыт да боёк. Умöн берегит асьтö. А эшö и фермаын порядок сувтöт, асьтö эн стыдит.

Секретарьлöн машина саясис Берегшор ю сайö. А Александра Васильевна мунiс детсадö, кытöн мöдiк лун только эшö пондiс уджавны воспитатель, кöдö ыстiсö районiсь.

VII

Сибалiс первöй кöдзан кампания, кыдз пондiс уджавны Александра Васильевна бригадирöн. Эта сылöн первöй экзамен. Сiя этö кадсö видзчисис надеждаэзöн, но и полöмöн: вермас ли лоны сiя организаторöн, руководительöн. Бригадир эшö и эшö проверяйтiс, готовöсь ли чожа, агрономическöй сроккезö, кöдзны. Татöн севернöй климат оз терпит дыш уджалiссезöс, кыдз шусьö пословицаын: одз чеччан — богатство адззан, сёрман — котомка пельпон сайö кышалан. Александра Васильевна нельки сымдасö эз видзчись — отир дружнöя петiсö ыб вылö.

Механизаторрез уджалiсö организованнöя. Быздылёв Степан некинлö эз сет покой: ачыс медодз петiс ыб вылö: видiс механизаторрезöс, если мылякö нiя сёрмисö, отсалiс томмезлö.

Колхозын бригада кöдзис медодз. Бригадиррез мöдiк бригадаэзiсь кеслiсö пиннезнысö, видзöтам пö, кытшöм урожай быдтасö.

Кöдзан бöрын погоддя, кыдз нарошно, бöбмис. Кык месяц небосвод вылын биöн öгралiс шондi, сотiс му и быдöс, мый сы вылын быдмис. Кымöррез кайисö и пышшисö кытчöкö одзлань и öтiк воть эз уськöтö му вылö.

Сюэз петалiсö басöка, но шондi сотöм увья кельдöтiсö, видззез вылын турун чорзис, нельки пуэз вылын листтэз, кыдз ар коста, пондiсö вежöтны. Бригадир юрсö öшöтiс. Отир бригадаын кымöртчö, пондö гусьöнжык баитны, рыттэзнас етшажык пондiс кывны гармоннялöн орсöм да гажа сьылöм. Адззисисö эта сьöкыт кад коста и сэтшöм отир, кöдна винитiсö космонавттэзöс да спутниккезöс, нiя пö сорисö погода, да кеслiсö пиннезнысö и Александра Васильевна вылö, что бригадир виноват, мыля сiя женскöй и, кыдз мужик, вешьян новйö. А вежöртiсь отир, кöр пантасясö бригадиркöт, сiйö öлiсö, мый пö тэ асьтö виян, не тэ виноват. И только турун керан кадö пондiс зэрасьны, и пондiсö вочмыны сюэз. Но кöр дзимлялiсö урожай, эта бригадаын сю босьтiсö медуна.

Эта бригадалöн, бригадирлöн, кöть учöтик, но вöлi победа. Неыджыт победа буржыка сылöтiс йы отир да Александра Васильевна коласын. Бригадаын уджалiссез буржыка пондiсö вежöртны ассиныс юралiсьöс, веритны сылö.

Сьöкыт вöлi, öддьöн сьöкыт том нывкалö пондöтчыны уджавны бригадирöн, сiя эз и думайт, что сы одзö усясö сымда заботаэз.

Александра Васильевна ас гöгöрас чукöртiс актив и ны отсöтöн бригадаын пондiсö керны сэтшöм делоэз, кöдна йылiсь одзжык и басни эз мун. Примерö босьтам водопровод. Деревняын только öтiк öшымöс: кöс гожумö и кöдзыт тöв коста ва ныын бырсьö, и инькаэз да мужиккез сулалöны очередьын, медбы гумавны нятьöсь ва. Öнi заптöны трубаэз, колонкаэз, насоссэз, и гожумöн пондöтасö строитны и керны монтаж.

Отир бригадаын мöдкодьсялiсö, раммисö, мичамисö чужöммез выланыс. Механизаторрез, кыдз главнöй вын бригадаын, лоисö степеннöйжыкöсь, етшажык пондiсö нёштöма баитны.

VIII

Локтiс ар. Мöдiк ар Александра Васильевна бригадиралöм дырни. Ыббез кушмисö, юэз кынмисö, ойланьсянь пöльтiс кöдзыт тöв. Му ольсассис чочком, небытик одеялоöн. Сельхозмашинаэз дзебисö навессэз увтö. Бригада лöсьöтчис тöв кежö.

Армиясянь бертiсö том отир, кольччисö уджавны колхозын. Öддьöнжык ны коласiсь гленитчис Александра Васильевналö Калашников Николай, кöда куим лун бöртi, кыдз бертiс армиясянь гортö, локтiс бригаднöй керкуö и висьталiс, что сiя пö шофёр и механик, киэз лудöны, корсис уджавны. Бригадир сылö висьталiс, что эм киссьöм важ машина, если вермас вочны, ась уджалö. Калашников согласитчис. Куим неделя ой и лун гуддисис машина гöгöр и гöнитiс «драндулетнас», кыдз ачыс нимкодялiс машинасö, бригаднöй керку одзö. Калашников пырис керкуö и гажöна рапортуйтiс: бригадир, примит пö машина.

Калашников Николай, неыджыт, паськыт пельпона, топыт мужик, кыв вылас боёк, армияын служитöм куим год, öтiк год срокся унажык, крепыта кутчисис уджавны.

Деревняын лоис гажажык, сiя кыдз бытьтö паськалiс, нельки öшын наличниккез мичöнжыка видзöтiсö улицаэз вылö. Рыттэзнас бöра пондiс кывны деревня вылын смех, горöнжыка — гармонняэзлöн шыэз да песняэз.

Кыдзкö Александра Васильевна мунiс деревня кузя и паныт сылö шедiс Быздылёв Степанлöн иньыс, Настя. Сiя ласковöя кутiс конувтöттяс бригадирöс и пыртiс гортас. Кöр пырисö керкуö, Настя бичирасян синнэзöн нёджжöвтiс Александра Васильевна вылö, павдöтлiс киэсö и горöтчис:

— Видзöт, и мийö отирö пöримö. — Александра Васильевна нёджжöвтiс гöгöр: стенаэз белитöмöсь, пуовöй полированнöй кровать весьтын öшалö недона ковёр, угöлын сулалö телевизор, джоджын ольсалöмöсь аскыйöм половиккез. Челядь пасьтасьöмась кыдз колö.

Настя зэлöтiс Александра Васильевнаöс ас бердас и благодарнöя горöтчис:

— Спасибо тэныт.

Александра Васильевна петiс керкуись кокнит сьöлöмöн, вежöртiс, что отир пондiсö сылö веритны, и сiя кыдз кай лэбзис деревня кузя, нельки охота вöлi сьывны. Но сiя асьсö öмалiс, что сьывны одз эшö.

Вöлi тöвшöр. Öтöрын öддьöн кöдзыт, отирыс баитöны, важын ни пö сэтшöм мороззэзыс эз вöлö, нельки кайез лэбзикö кынмöны. Но олан мунiс, не мороз, не падера сылö эз мешайт. Том отир керисö свадьбаэз, шогмисö виль семьяэз, чужтiсö челядь.

Вот и талун Александра Васильевна корис, доказывайтiс правленнёын, колö пö сувтöтны керку Калашников Николайлö. Сiя гöтрасьö, босьтö ас саяс Емельян Ивановичлiсь нывсö, Оляöс, но овны нылö лоас дзескыт — Калашниковвезлöн да Емельян Ивановичлöн семьяэз гырисьöсь.

Председатель и сылöн заместитель пыксисö, что Калашников Николай только неважын бертiс и кин тöдö, кыдз пондас уджавны.

— Да вежöртö жö тi, Калашников — золотöй киэза морт. Образованнё эм. Сыись бур бригадир, механик петас, а может, и председатель, — баитiс Александра Васильевна и жалейтiс, что сы öмись лэбзис медбöрья кыв « председатель».

Эта кылыс чушкис председательöс, сiя перыта чеччис пызан сайись, бöр пуксис местаас, вештiс ас одзись бумагаэз и нервнöя горöтлiс:

— Золотöй... Образованнöй... Ме эшö эг на адззыв, что бур уджалiсь... Машина вочис — эта эшö не быдöс. Александра Васильевна, тэ кыдз локтан правленнёö, тэись работниккез дзебсисьöны, каждöйлiсь горш орöтан, самоуправство бригадаын керан. Тэнат бригадаö быдöс, мöдiккезлö нем. Калашников ачыс лэбтас керку, деньга сылöн карманас тыр.

Александра Васильевна мöдiс петны ни председатель кабинетiсь, но бöр бергöтчис, решительнöя сибöтчис председатель дынö и лöгöн горöтчис:

— Тi армиясянь бертiт, уна деньгасö вайит? А ме Калашниковöс ог лэдз пышшыны гортiсь, — Александра Васильевна перыта бергöтчис и петiс кабинетiсь.

Председатель жöдзис-жöдзис местаас и чорыта горöтчис:

— Не нывка, а сатана. Да эшö басöк сатана. Он сiйö öмлöсав — воля босьтас.

А парткомлöн секретарь председательлö паныт горöтчис:

— А весь тэ сiдз. Керку лэбтасö — а миянлö дулю мыччаласö.

— Дак тэ мый, ныкöт öтiк заговорын? — кымöс увтсяняс нёджжöвтiс председатель секретарь синнэзö. — Сiя горш орöтö, а тэ сылö потакайтан?

— Нем сiя лишньöйсö оз кер. Вот куимöт бригадаись бригадир некöр нем оз кор, сылö быдöс ладно, а ныр увтсис отир сё чинö и чинö.

Эта басни коста пырис районiсь уполномоченнöй, и парткомись секретарь петiс кабинетiсь.

Александра Васильевна бригадаö бертiс лöг. Сiя жö рытö бригаднöй керкуö чукöртiс только мужиккезöс. Отирыслö дыр эз ков тотьны Калашниковлö керку строитöм йылiсь. Мужиккез согласитчисö и висьталiсö, что деревняын век-вексянь сiдз, если томмез янсöтчöны аймам позiсь, мирöн отсалöны сувтöтны керку. Туйис бы öнi жö пондöтчыны сувтöтны керку, но вöрыс абу. А виль уськöтöм вöрись он керку тшуп. Кинкö сэтöн жö висьталiс, что Шарыбын кыдз кык год ни уськöтöм вöр куйлö, мöдiсö пода карта строитны, да сiдз и сiсьмö. Колö юавны правленнёын, медбы сетiсö этö вöрсö. Александра Васильевна, конечно, правленнёö сэсся эта йылiсь баитны эз ветлы.

Эта бöрын чулалiс нёль месяц. И председатель важын ни вунöтiс Калашников керку строитöм йылiсь. Но кыдз сылiсь быдсöн гырксö бергöтiс, кöр почтальон сылö киас сюйыштiс басöк конверт, а сэтчинiсь кыскис приглашеннё: Калашников корис сiйö виль керкуын свадьба орсны.

Председатель свадьба вылö эз мун, но панытас, сёрöн рытнас, медбы сiйö некин эз казяв, ветлiс бригадаö. Быль, виль улицаын сулалiсö öтiк крыша увтын вильöсь керку и двор.

Свадьба вöлi тырдоза. Александра Васильевна гажöна чапкис ас вывсис полукомбинезон и пасьталiс медбасöк платье. Сiя öтлаын отиркöт гажöна йöктiс и сьылiс. Зонкаэз и мужиккез прокод сiйö корисö танцуйтны. Инькаэз гусьöн, завидуйтöмöн, видзöтлiсö сы веськыт мыгöр да вира чужöм вылö, а нывкаэз сiйö öтмöдöрсянь нёджжалiсö и веськыта ошкисö.

Председательлöн лöгсянь пизис вир, да эшö кинкö норасьöма сылö, бригадир пö разрешеннётöг видзис колхознöй вöр, кöда вöлi лöсьöтöм пода карта строитны.

Öктiс правленнё. Ыджыт вöлi шум. Кöть и не быдöнныс, правленнёлöн членнэз голосуйтiсö Александра Васильевнаöс бригадирись вежны и сувтöтны рядовöй агрономöн.

Бригадаись отир кылiсö, что Александра Васильевнаöс вежöны, деревня лоис кыдз зiпоз. Нiя грöзитчисö, что мунасö райисполкомö, райкомö, а бригадирöс обидитны некинлö оз сетö.

Эта история кывсис Лобанов пеллезöдз. Михаил Тимофеевич пантасис «Виль туй» колхозiсь председателькöт райисполкомын и лукавöя сылiсь юалiс:

— Но, кыдз, старина, Калашниковыс свадьба вылын бура гуляйтiн? Или сур-ма уссэз кузя визывтiсö, а öмö эз шедö?

Председатель юрсö öшöтiс и шы эз сет.

— Пöрисьман, пöрисьман, старина. Александра тэнчит ныр увтсит чышкис. А эд панытас тэ бригадаö натодиль вовлiн, видзöтiн керку, — лукавöя, чикыра синнэзöн внушительнöя баитiс секретарь.

— И эшö самоуправство бригадир вылын керин. Вон тöн бригадаись быдса делегация райкомын вöлi, быдöнныс бригадир дор сулалöны.

— Конечно, бригада сы дор. Сiя нылö потакайтö, — горöтчис председатель.

— Уджалö ныкöт, а не потакайтö. Öкты правленнё и исправит ассит ошибка.

— А кыдз? А менам авторитет?

― Кöр керин, тэ менчим эн юась. Кыдз лякöсьтiн ассит авторитетсö, сiдз и весöт. Колö кужны аскадö ошибка исправитны, тэ коммунист и не том ни... И бригадир одзын и отир одзын извинитчан. Ыста инструкторöс, сiя тэныт отсалас.

Председатель вежöртiс, что тэрмасис выводдэзöн Александра Васильевнакöт, ошибка керис — кывзiс ассис вирöн пизян сьöлöмсö, а не веммезсö. Сылö вöлi стыд, что сiдз срамитiс асьсö.

IX

Тöв чулалiс кöдзыт, падера. Сьöкыт вöлi ремонтируйтны тракторрез, сельхозмашинаэз, аскадö вайны сёян фермаэзö, уськöтны строительство понда вöр, кыскыны назём да удобреннёэз ыб вылö. Александра Васильевна пемытсянь пемытöдз чылiс öтмöдöрö: фермаö, мастерскöйö, вöр делянка вылö, правленнёö, районö. Отир жалейтiсö да дивуйтчисö, кытiсь только адззисьö эта нывкалöн вын.

Удж коласын ачыс эз казяв, кыдз куимöт тулыс ни панталö Красникова деревняын. Бöра локтiс виль кöдзан кампания. Пондöтчис некокнит, беспокойнöй страда, кыдз сiйöн отир справитчас, сэтшöмöсь лоасö результаттэз. И этадз крестьянин быд год, сотня, тысяча год быд тулыс кöдзö, видзчисьö виль урожай, кöда сетас вын, олан, счастье.

Таво кöдзан кежö лöсьöтчисö буржыка. Буржыка удобритiсö муэз. Эшö арнас Александра Васильевна быд ыблö керис ревизия, быд ыб вылiсь босьтiс почва да сетiс лабораторияö, мед тöдны, мыйöн шогалö почва, мыйöн сiйö колö лечитны. Быдса тöв весöтiсö, пестуналiсö, берегитiсö кöдзыс, вайöтiсö сiйö класснöй кондицияöдз.

Александра Васильевна öддьöн благодарнöй колхозiсь главнöй агрономлö, Егор Нестеровичлö, сы отсöт понда. Отсалiс бригадирлö парткомись секретарь, кöда часто вовлiс бригадаö.

Бригадир талун мунiс Кульгора ыб вылö, кытöн кöдзисö ид. Мöйму эта кадö сiя пантасис Мартыновкöт. Эта пантасьöмыс пырис сы сьöлöмö кытшöмкö тöждiсьöмöн. Сiя, кöр кольччас öтнас, касьтывлiс Мартыновöс, сылiсь спокойнöй голос, сылiсь синнэсö, кöдна доверчивöя видзöтiсö морт вылö. Сы тöдвылö часто усьлiс, кыдз зонка кайöтiс бадьшаттез вадöрись, велöтiс Оляöс веськöтлыны машинаöн.

Мукöдпырся бередитiс сылiсь сьöлöмсö Дарья Петровна. Сiя часто сылö баитiс, локтiс пö кад и ас йывсит ни думайтны, колö керны семья. А то горöтчас, мыйöн пö не жöник Михаил Васильевичлöн племянникыс: и тушаöн петöм, и чужöмнас не нёштöм, образованнöй морт.

— Вот эд тэ кытшöм гордячка, ме эд быдöс адзза: сы письмо вылö паныт ответ эн гиж, — кöритiс Сашаöс Дарья баб.

— Бабушка, да мый ме сылö гижа, аслам бедаэз йылiсь? Да сiя менö оз и корась, — шутитöмöн горöтчис Александра Васильевна.

— А тэ гиж, сiдз пö и сiдз олам, — велöтiс-шваткöтiс Дарья баб. — Öтпыр тэ гижан, сiя тэныт паныт гижас и сiдз сыспотека тiян коласын басни да любитöм шогмас.

— Бабушка тэ, бабушка, кытшöм тэ добрöй, да кыдз учöт кага — письмоэзнас любитöмсö он кöртав. Если бы ме сылö ковси, сiя бы адззис кад вовлыны. Сiя эд быдса год ни гортö кымöссö эз мыччав, ― горöтчас Александра Васильевна баблö паныт.

Кульгора ыб вывсянь бригадир гöнитiс заправкаö. Заправщик юöртiс, что солярка вайисö не быдсöн и, если эшö пондас зэрасьны, кöдзан кад кежö оз тырмы. Сiя аслыс отметитiс, что колö эшö ветлыны леспромхозö, кöда шефствуйтiс бригада вылын. Директор кöсйис сетны, кöть и важ ни, вагончик, кöдö позис пöртны полевöй стан вылын столовöйö.

Бригадир этна думаэзöн, заботаэзöн гöняйтiс вöв вылын öтiк местасянь мöдiк местаö, сылö быдлаын колiс видзны син.

Кöдзан кад чулалiс бура. Сашалöн бригада ештöтчис кöдзаннас медодз. Тулысöн и гожумöн погода вöлi бур: шоныт, часто зэрасис. Сюэз, туруннэз быдмисö бытшöмöсь. И арнас Саша бригадаын урожай вöлi бур, медыджыт районын.

Отир гордитчисö асланыс бригадаöн и кыдз пантасясö бригадиркöт, величайтiсö сiйö Сашенька-хозяйкаöн.

* * *

Локтiс пыдын ар. Мартынов, кöр бертiс деревняись, часто касьтывлiс Александра Васильевнаöс. Гижис сылö письмо, но сiдз и эз вермы сысянь видзчисьны ответ. А сыбöрын, кыным унажык чулалiс кад, нывкалöн образ ылöжык дзебсисис сьöлöм пельöсö.

Но неважын сылiсь сьöлöмсö бöра вöрзьöтiс Александра Васильевна. Кыдзкö арся кузь рытö Мартынов краснöй уголокын видзöтiс пресса и киас шедiс газета, кытöн мöдiк страница вылын вöлi печатайтöма öддьöн бытшöм нывкалöн портрет. «Александра Васильевна?» — гажöна, дивуйтчöмöн горöтчис Мартынов. Сы синнэз одзын шыннялiс золотöй юрсиа, спортивнöй костюма, воронöй вöв вылын пукалiсь нывка.

Сы йылiсь висьтасис ыджыт статья. Мартынов перво перыта, а сыбöрын быд предложеннёсö лыддьöтiс неöтпыр. Статьяын гижöмась, кыдз том агроном мунiс уджавны кольччись бригадаö бригадирöн, мымда ковсис пуктыны вын, медбы сувтöтны дисциплина, делоöн мыччалiс, что и эта бригадаын муэс вермасö бытшöма уджалöм понда чужтыны бытшöм нянь.

И статья конецас поздравитöмась Александра Васильевнаöс правительственнöй наградаöн и желайтöмась виль успеххез ыджыт урожай быдтöмын, крепыт здоровье да бур олан.

И бöра Александра Васильевна йылiсь думаэз эз кольччö сы сьöрись öтiк оськöлын.

Кытшöмкö кад бöртi Мартыновлö петiс командировка гортланьö.

Колхозiсь центральнöй усадьба вылын мунiс отчётно-выборнöй собраннё. Мартыновöс тожö корисö собраннё вылö. Эстöн сiя и пантасис Александра Васильевнакöт.

Перерыв коста Александра Васильевна сибöтчис Мартынов дынö, здоровайтчис, видзöтiс сiйö вывсянь кокувтöдз, сыбöрын мичöна серöмтчис, сiдз серавны кужис только сiя, и горöтчис: «Но и но», — и кинкö эта коста сiйö горöна кытсöвтiс. Александра Васильевна сiдз эз ешты кончитны басни, перыта мунiс шы вылö.

Сашенька эта коста эшö бытшöмжык лоöма, бытьтö ыджытжык быдмöма, и чужöм вылас мичöна орсö вир. Мартынов сэсся эз вермы сыкöт баитны собраннё коста. Кончитiсö обсуждайтны доклад. Пондiсö бöрйыны председательöс, правленнёлiсь членнэзöс, ревизионнöй комиссия.

Сувтiс районiсь секретарь Лобанов. Сiя нёджжöвтiс отир вылö, президиумын пукалiссез вылö и пондiс баитны, что одззася председатель петiс пенсия вылö. Öнi колö бöрйыны виль председательöс и юалiс колхозниккезлiсь, кытшöмöсь лоасö кандидатураэз. Отир чöлiсö. Колхозниккез велалiсö ни, что одзжык райком вайöтлiс, нельки ылiсь местаэзiсь, виль председательöс. Лобанов видзчисис. Эта коста кинкö горöтчис:

— Товарищ Лобанов, а тi разь сьöраныт эд вайöтö виль предсö?

Секретарь серöмтчис и висьталiс, эг пö вайöт, тiян ас коласаныт быдмисö ни отир лоны председательöн.

Сiя жö голосыс (да эта жö Быздылёв, казялiс Мартынов) шыасис: «Но дак, сiдз инö. Сэк бöрьям Александра Васильевнаöс. Характеристика колö? Быд удж сылöн тiян одзын. А эшö сiя мужикся мужик. И öддьöн бытшöм нывка, сы бердö нятьöсь китö нюжöт, берездасян».

— Отирыс этна бöрья кыввезсянь кузя да жагöна пондiсö ваксьыны и пондiсö горöтлыны бöрьям пö, бöрьям. Сыбöрын кыв босьтiс парткомись секретарь, сiя висьталiс, что партийнöй организация сiдзжö, кыдз Быздылёв, предлагайтö председательöн бöрйыны Савельеваöс. И сы вылö сетiсö производственнöй да партийнöй характеристика. И петiс Александра Васильевна собраннё вылiсь председательöн. Сiйö поздравляйтiсö, мукöд инькаэз окалiсö, а мужиккез зэлöтiсö сылiсь киэзсö. А кинкö горöтлiс качайтны, качайтны пö колö.

Петiкас Александра синнэз вылö усис Мартынов, и сiя горöтчис:

— Лэдзчам гортö, — öвтыштiс кинлöкö кинас и петiс клубись. Мартынов сы сьöрын.

Виль председатель эз ешты мыччисьны öтöрö, кыдз сы дынö котöрöн сибöтчис колхозiсь легковöй машина вылiсь шофёр, ме пö готов, кытчö колö мунны? Александра Васильевна висьталiс шофёрлö шоччисьны и иньдöтчис кошовкаö доддялöм вöв дынö.

Мунiканыс Красниковаö Александра Васильевна юалiс Мартыновлiсь, кытшöм пö могöн локтiн миян местаэзö?

Мартынов ачыс эз казяв, кыдз кватшкис:

— Корасьны. Ме жö жöник...

— Корасьны? Кинöс жö? — дивуйтчöмöн юалiс Александра Васильевна.

— Тэнö, Сашенька, тэнö. Али сёр ни?

— Невночка сёрмин. Вот эд только свадьба вöлi, ачыт адззылiн.

Эстöн басни орис. Мымдакö кыкнанныс чöлiсö, а сыбöрын пондöтiсö басни öтiк-мöдiк йылiсь и асьныс эз казялö, умнöй Воронко сувтiс Дарья баб керку воротаэз одзö.

Вöв дозирайтöм бöрын Александра Васильевна эз ешты вуджны керку порог, горöтчис Дарья баблö: поздравляйт пö менö, бабушка. Дарья баб синпöлöн видзöтiс Мартынов вылö и горöтчис: «Слава Енлö, мывкыдсялöма». Александра Васильевна вежöртiс, что Дарья баб совсем мöдiк йылiсь думайтiс, пондiс гажöна ваксьыны:

— Дарья баб, менö председательöн бöрйисö. Кытсав Фрол Степановичöс и Михаил Васильевичöс, пируйтны пондам. — Александра Васильевна сiдзжö чöскыта сералiс.

Бабушка шай-пай керсис.

— А эта кин тэныт лоö, охламоныс?

— А сiя жöник, — горöна ваксьыштiс Александра Васильевна. — Чöвтчы, Гриша, мый сулалан, кыдз мыр.

— Тьфу, тьфу тэнö, кытчö юрсö сюйыштöма. Чёрт ли мый ли тэнат гыркат пукалö. Старöй деваöн ли мый ли мöдан пукавны? Ладно, ветла... Сёян-юаныс комас. Тьфу, а ме думайтi... — сiя лöчыт синнэзöн дзарнитiс Гриша вылö и клопнитiс петiкас керку ыбöс.

Öткадö, сьöрсьöн-бöрсьöн локтiсö Фрол Степанович и Михаил Васильевич. Кöр пырис Михаил Васильевич, сы синнэз вылö усис Гриша. Сiя эз верит аслас синнэзлö, кыдз татчö шедiс племянникыс. Сыбöрын нёджжöвтiс пызан вылö, кытöн сулалiсö бутылкаэз винаöн, серöмтчис и гажöна горöтчис:

— Ба, каналья кок, да тiян бур пир шогмö. Кытшöм жö мог понда?

Александра Васильевна ваялiс пызан вылö сола тшаккез, огуреццез, яй капустаöн да мöдiк сёян, и, кыдз заговор керись, баитiс: деддэз, эд тэрмасьö пö, кад лоас, быдöс тöдны пондат.

Кöр пуксисö пызан сайö, Александра Васильевна тшöктiс босьтны рюмкаэз винаöн и горöтчис:

— Поздравляйтö менö, деддэз, — и лукавöя сiя дзарнитiс Мартыновлань.

— Мыйöн жö, Александрушка? — öтiк кылöн юалiсö деддэз.

— Председательöн деддэз, председательöн.

— А ми думайтiм... — горöтчис Фрол Степанович. Деддэз да Мартынов поздравляйтiсö Александра Васильевнаöс, быдöс пö керöм закон сьöртi и кöсйисö бур удж. А Дарья баб бобгис, кытчö пö только юрсö оз сюйышт. Оз ни пö сыись инька пет. Сё сылö етша, сё сылö оз тырмы. Сiя лöгöнмоз дзарнитiс Александра мича чужöм вылö и бöра горöтчис: «Лоан ли тэ кöркö инькаöн? Али öнi инькаэз мужиккезö пöртчöны, а мужиккез кагаэз пондасö ваявны?»

Гриша эшö öтiк лун гöститiс гортас. Мунiк панытас рытнас сiя пырис Александра Васильевна ордö. Дарья баб эз вöв гортын. И Гриша веськыта висьталiс Александра Васильевналö, что сiя локтiс татчö только сы понда и содтiс: «Ме не веж öмугöла зонка и тэ не нылочка, нем миянлö асьнымöс бöбöтлыны и сiдз вот пантасьлыны. Мун ме сайö жöник сайö!»

Александра Васильевна видзöтiс ласковöя Гриша синнэзö и думайтiс: «Вот и ме понда принц адззисис», — но горöтчис совсем мöдiкö:

— Господи, кышасин жö тэ менам юр вылö. Мый, тэныт нывкаэз ли мый ли абуöсь? Ме обыкновеннöй баба, да эшö умöль характера. Вот Наташа, сiя совсем мöдiк. Интеллигентнöй.

Гришалöн, кöр кылiс Наташалiсь ним, чужöм вылас чепöссис вир и горöтчис:

— Ме не Наташа дынö локтi, а тэ дынö. Мыйлö весь касьтывлыны Наташаöс?

— Да тэ вежöрт, кытчö тэ юртö сюйыштан, ме инька ни, ме жöник сайö петалi.

— А ме быдöс тöда. — Мöдiс висьтавны, что Наташасянь и кылiс, но аскадö сувтчис.

— Гриша, милöй, тырмас эта йылiсь баитны. Олам — видзöтам. Проверит ассит чувствоэз, медбы не бöбасьны.

Гриша мунiс Александра Васильевна дынiсь кымöра. И Александра Васильевна сьöлöмын тожö кольччис чушкасян зi. Сiя асьсö видiс, что Гришакöт баитiс чорыта и охота вöлi инькаэз моз горзыны, горзыны.

Х

Мартынов бертiс аслас удж вылö. Сы сьöлöм пытшкын Александра Васильевнакöт пантасьöм бöрын сё мыйкö чушкис и кытчöкö сiйö корис, нуöтiс, лэбтiс, и некыдз эз позь эта чувство бердiсь мездiсьны. «Но удж эм удж, кад эм кад — нiя лечитöны быдкодь шогöтiсь», — сiдз ас пондас думайтiс Мартынов.

Сотрудниккез, механизаторрез панталiсö Мартыновöс приветливöя, кыдз бытьтö сiя дыр кежö кытчöкö ветлiс и гажтöмтчöмась сы понда. Эта сiдз и вöлi. Кык год коста том инженер — спокойнöй, рассудительнöй, а кöр колö керны дело, дак чорыт — гленитчис нылö. Удж сiя ассис тöдiс и корис, медбы быдыс, кыдз колö, уджалiс аслас местаын.

Кыдз только Мартынов мыччисис контораын, медодз сiйö панталiс Наташа Неверова, лаборантка. Гришалö гленитчис эта нывка, сылöн рам характер, небыт голос, неперыт басни, гырись зелёнöйкодь синнэз, кöдна пыр мыйкö видзчисисö, и нельки мампас, кöда точкаöн сьöдöтiс шульга öмугöв увтас. Ветлöтiс сiя басöка, шытöг. Механизаторрез, кöдна ас коласаныс грубöя, мукöдпырся нёштöма шутитiсö, Наташа дырни чöлiсö. Нiя сы дырни нельки сералiсö-ваксисö гусьöнжык.

Мартынов тожö гленитчис Наташалö. Нiя неöтпыр öтлаын ветлiсö театрö, киноö. А кыдзкö Мартынов недыр кежö пыралiс Наташа ордö, кöда олiс том специалисттэз общежитиеын. Может бы, ны сьöлöммезын быдмис ыджыт чувство, если бы Мартынов эз пантав Александра

Васильевнаöс. Сыкöт пантасьöм бöрын Мартыновлöн гыркас быдсöн бергöтчис, сорасис.

Механизированнöй колонналöн мелиоративнöй отряддэз уджалiсö план сьöртi. Мартынов уджалiс, кыдз зверь, быд лун командировкаын — то öтiк отрядын, то мöдiкын. Узис етша. Умöльтчис. Мукöдпырся нельки бритчытöм пыравлiс контораö.

Наташалöн сьöлöм кылiс, что Мартыновкöт мыйкö керсьö. Öддьöнжык кымöра сiя вöвлi сэк, кöр ветлас гортас, но сiя полiс юасьны. Да и Мартынов дынас эз сибöт некытшöм юасьöмöн, пантасяс Наташакöт, висьталас «здравствуйте» и бöра котöртö гаражö, мастерскöйö или эшö кытчöкö.

Кыдзкö Наташалö локтiс письмо Савельева Сашасянь (Александра Васильевнасянь), кöда гижис аслас олöм йылiсь, юалiс, кыдз сiя уджалö, кöр мöдö жöник сайö петны, и сэтöн эшö гижöма, кыдз пö тiян сэтчин олö-вöлö Мартынов. И Наташа пондiс догадывайтчыны, что не Саша ли кидтiс Мартыновöс?

Наташа Неверова и Саша Савельева велöтчисö öтiк институтын, только Наташа кончитiс институт годöн бöрынжык. И кöр нiя пантасисö öтiк совещаннё вылын, нiя öтамöдныслö, кöть и не часто, гижисö письмоэз.

Сёр арöн Мартынов ветлiс областись совещаннё вылö. Кöр локтiс, мехколонналöн начальник корис сiйö аслас кабинетö. Начальник, эшö не пöрись, перыт мужик, орсан синнэзöн нёджжöвтiс Мартынов вылö и пондiс юасьны, мый бурсö вайис совещаннё вывсянь, и вдруг шваткис-горöтчис:

— Мартынов, кывзы, тэнат эшö пиннезыт озö висьö котрасьны рядовöй инженерöн?

Мартынов эз вежöрт, мый мöдö висьтавны начальник. «Уджала, ог дышöтчы. Механизаторрез кывзöны. Стул меным сылiсь оз ков», — котöртiсö думаэз сы юрын.

— Мартынов, жаль меным тэнö ас дынсим лэдзны. Но колö, — чорыта висьталiс начальник. — Тэ вежöртан, тэнат роднöй районын организуйтчö миян колонналöн виль участок. Управленнё тшöктö ыстыны тэнö сэтчин начальникöн. Партийнöй власттезкöт тожö согласуйтöм. Но дак кыдз, Мартынов? — начальник сибöтчис сы дынö, кисö пуктiс сы пельпон вылö и эшö содтiс: — Кад ни тэныт уджавны самостоятельнöя.

Мартынов чепöссис, синнэзыс гöгрöссялiсö и чорыта горöтчис:

— А тi менчим юалiт? Кыдз шусьö, менö метöг гöтралiт. А ме босьта и ог согласитчы. Сэк мый?

— Сэк мый? А нем. Ме тöда, тэ морт принципиальнöй. Да тырмас синнэтö сувтöтнытö, менö он сёй, абу чöскыт. Сэк, шуан, мый? А тэ коммунист, вот мый, — начальник паныт Мартыновлö видзис ответ и пуксис пызан сайö. — Вот эшö мый, талун-ашын шоччисян, мöдлун босьт менчим машина и гöнит аслат районö: тэнö райкрмись секретарь видзчисьö. А эшö, если панталан Александра Васильевнаöс, басöк сатаналö месянь поклон.

Этна бöрья кыввез начальниклöн кыдз öшöпекöн сöтiсö Мартынов спина кузя. Сiя перыта осьтiс кабинетiсь ыбöс, пуляöн петiс коридорö и чуть оча кымöс эз люкась Наташакöт. Мартынов эз и кор извиненнё, уськöтчис öтöрö. Наташа кинитчис öшын дынö и адззис, кыдз Мартынов кузь шаггезöн перыта мунiс улица кузя. «Но и но», — только и горöтчис сiя аслыс Мартынов йылiсь.

Мартынов локтiс гортö, кыскис холодильникись чорзьöм колбаса, кисьтiс рюмкаö коньяк, öтiк гулькöн сiйö ньылыштiс, курччöвтiс колбаса тор и водiс кровать вылö. Начальниккöт видзчисьтöм баитöм понiсь сылöн öшис душевнöй покой.

Мартыновлö быдöс вöлi вежöртана: отрядлöн начальник, виль удж, роднöй район. А кытшöм боксянь эстöн Александра Васильевна? Вот этö сiя некыдз эз вежöрт.

А дело вöлi сiдз. Округын мунiс партийно-хозяйственнöй актив и эстöн Александра Васильевна сувтöтiс вопрос севернöй районнэзын мелиоративнöй отряддэз организуйтöм йылiсь. А окружкомись секретарь висьталiс, что предложеннё лоас видзöтöм.

И этасянь виль организация керöмлö оссис туй. А кин лоас начальникöн, рекомендуйтiс мехколонналöн начальник.

Сы коста, кöр Мартынов куйлiс кровать вылын и одолейтiсö сiйö думаэз, кыдз пондас уджавны виль местаын, кыдз сiйö панталас Александра Васильевна, райкомын мунiс сы йылiсь басни.

Секретарь Лобанов сибöтчис Александра Васильевна дынö, нуöтiс сiйö отир дынiсь ылöжык, чикыртiс учöтик синнэсö и жагвыв горöтчис:

— Александра, — секретарь некöр эз величайт айнимнас председательöс. — Миян дело шогмö. Мелиоративнöй отряд миян лоас. И начальник эм ни. А тэ тöдан кинöс? Мартыновöс. Ме кылi, тэ сылö тöдса? — секретарь бöра чикыртiс лэчыт синнэсö и серöмöн видзöтiс Александра Васильевна вылö, видзчисис, кыдз примитас председатель сылiсь кыввесö. Кылöм тöдса фамиллё Александра сьöлöмö кыдз бытшкис, но не зубыта, а долыта, и сы чужöм кузя пондiс шоныта паськавны вир.

XI

Мартынов кык месяц ни уджалiс виль местаын. Виль дело пондöтiкö уджыс вöлi уна, но райком и райисполком отсалiсö сылö. Да и мехколоннаись начальник неöтпыр ни вовлiс районö, видзöтiс, кыдз уджалö сылöн «крестник» — сiя сiдз ас коласаныс шуис Мартыновöс.

Сибалiс Виль год. Отир мöдöтöны гортаныс ёлкаэз, лöсьöтчöны кольлавны не умöль важ год, пантавны вильö, кöдасянь видзчисьöны эшö унажык.

Мартынов, счастливöй, гордöй, райцентрсянь подöн лэдзчис гортö. Кöть öтöрын вöлi бимороз, сылö вöлi шоныт. Мороз вылын сылöн чужöмыс öгралiс пым вирöн.

Кöр сiя локтiс гортö, рытнас тшöктiс дядьсö пасьтавны виль костюм, кышавны орден, мöдöтчыны тёткасö. Кöр тёткаыс юалiс племянникыслiсь, мый понда нiйö сiдз тшöктö лöсьöтчыны, Гриша хитрöя серöмтчис: «Корасьны, тётка, корасьны».

Рытнас öкмыс-дас час гöгöр, Гриша дядьыскöт да тёткаыскöт мунiсö Александра Васильевна ордö.

Кöр пырисö керкуö, сэтчин пукалiсö ни колхозiсь парткомлöн секретарь, дед Фрол Степанович, Ольга, Емельян Ивановичлöн ныв, жöникнас, и эшö тöдтöмöсь старик да старуха. Гöссезöс панталiс ачыс Александра Васильевна, сiя тöдсöтiс Гришаöс айыскöт да мамыскöт.

Одзись керку угöлын сулалiс ёлка. Пызан вылын тырдоз: пежьялö госöн ососок, поднос вылын куйлö дзодзог, ордчöн — öмсö осьтöм, чуть не аршин кузя, фаршируйтöм судак, сэтöн жö ельдöггез, рыжыккез, огуреццез, яйöн шöма капуста, веж быгья сур, сюромка и уна мöдiк сёян-юан.

Но вот и эшö гöссез локтiсö — Егор Нестерович, колхозiсь главнöй агроном, иньнас.

Александра Васильевна висьталiс, что быдöс гöссез локтiсö, и корис пызан сайö. Мартынов пуксикас кыскис портфелись куим бутылка шампанскöйöн, сувтöтiс пызан вылö и пуксис ордчöн хозяйкакöт. Сашалöн аймамыс пуксисö нылö паныт. Кольлалiсö важ год, юисö шампанскöй, а кин и курытö. Шоналiсö. Горöнжыка пондiсö баитны. Сашалöн аймамыс видзöтiсö то Гриша вылö, то нывныс вылö, Дарья баб гусьöника сералiс öмугöввезнас.

Вдруг öтöрын кылiс машина шы и сувтiс öшыннэз одзö. Керкуö шумöн пырис Лобанов. Сiя ыбöс дынсянь горöтчис:

— У-у, невна эг сёрмы. — Часыэз вачкисö даскык час. Михаил Тимофеевич лэбтiс шампанскöйöн бокал, тшöктiс лэбтыны гöссезöс и висьталiс:

— Александра Васильевна, дона ёрттэз, гöссез, поздравляйта Виль годöн тiянöс. Эта годö миянлö колö керны унажык, нежели кольöм годö. Здоровье тiянлö, счастье тiянлö виль годын.

Гажöна панталiсö Виль год. Сёрнитiсö, шумитiсö. Гöссез буржыка тöдсасисö öтамöдныскöт.

Шыасис Мартынов. Тшöктiс рюмкаэзö кисьтны вина. Гöссез внимательнöя видзöтiсö сы вылö. Гриша чужöм вылын орсiс том, здоровöй вир, синнэз югьялiсö. Сiя сувтiс, сетiс поклон Александра Васильевна аймамлö, сыбöрын гöссезлö и горöтчис:

— Дона Василий Захарович, дона Ирина Гурьяновна (аймамыс Сашалöн), Дарья Петровна, гöссез, ми Александра Васильевнакöт (сiя тожö сувтiс) öтамöднымöс любитам и тiянлiсь корам соглассё йитны миянлiсь олан.

Гöссез коласын лэбтiсис шум. Нiя горöтлiсö:

— Благословитам, счастье да любитöм тiянлö.

Александра Васильевналöн аймамыс окалiсö нывнысö и Гришаöс. Дарья Петровна пернапасалiс, синнэзсис быгыльтчисö синваэз и бобгыштiс ныр увтас: «Енлö слава».

Александра Васильевна пуктiс кисö Гриша пельпон вылö, гажöна нёджжöвтiс гöссезлань и горöтчис: «Вот, донаэз, и менам принц локтiс. А тэ, Дарья баб, весь тöждiсин». Сiя окыштiс Гришаöс и корис юны ны счастье понда.

Öтöрын вöлi бимороз. Но быдлаын кылiсö гажа шыэз, сьыланкыввез, кытöнкö горöна орсiс гармонь.