Веня-министр

I

Министр Вениамин Константинович Чирков депутатскöй делоэзöн локтiс областнöй центрö. Уджавны сувтöтiс чорыт расписаннё: öтiк лун уджавны аслас должность делоэз сьöртi, мöдiк лунö отирлöн сыкöт, депутаткöт, пантасьöм, куимöт лунö — эшö öтi-мöдi и сэкжö ветлыны аслас родинаö, кытöн сiя чужис да быдмис.

Областнöй центрсянь звонитiсö районö, и сэтчинсянь сельсоветiсь председательлö, тiян селоö пö локтас министр, и чорыта висьталiсö, панталö пö кыдз колö, медбы рожаöн не ляпкисьны нятьö.

Сельсоветiсь председатель öктiс актив: совхозiсь директорöс, сельпоись председательöс, школаись директорöс, коммунальнöй службаись заведующöйöс и клубись директорöс.

Эта актив судитiс-рядитiс и сувтöтiс: совхозiсь директор пызан вылö ваяс порсьпиян яй, дзодзоггез. Сельпоись председатель лöсьöтас столовöй: адззас свежöй чери, а вот стуллэз öктас семьяэзiсь, а то кöдна эмöсь — жики-ваки и куим кокаöсь; школаись директор сувтöтас велöтчиссезöс чышкыны улицаэз, кытi мунас министр; коммунальнöй службаись заведующöй кошшас виль чочком баня и лонтас, баняын медбы туиссэзын сулалiс брага; клубись директор дзимлялас клуб пытшксö, гижас лозунг министркöт пантасьöм йылiсь, а сiдзжö öктас медбасöк нывкаэзöс, вочöтас ¹национальнöй паськöмö и нянь-солöн панталасö дона гöсьöс.

Сельсоветiсь председатель юалiс, кинлöн пö эшö кытшöм вопроссэз эмöсь.

— Ме юася, — горöтчис коммунальщик, — банясö мый вылö лонтны?

— Тэ мый, Григорий, он тöд, кыдз панталöны гöссезöс, да эшö министрöс? Адзза, тэ литературакöт он тöдчы.

— Ме эшö юала, — горöтчис клубись директор, — кытшöм лозунг гижам?

Председатель юрсö гыжйыштiс и шваткис: «Натьтö, «Да здравствует министр!» Школаись директор поперегалiс, что оз сiдз лöсяв и шуис ассис: «Добро пожаловать аслат родинаö, министр». Öнi быдöнныс согласитчисö.

Совхозiсь директорыс жöдзис-жöдзис местаас и тожö шытöг эз кольччы: «А кöр сiя локтас?»

― Кин? А министрыс. Мöдлун вертолётöн. Кыдз только пондас гурöтны вертолёт, быдöнныт локтö сельсоветö. Отирсö чукöртам Дом культурыö. А... вот эшö вунöтiм. Вертолёт, натьтö, пуксяс лесничество одзын, сэтчин вертолёт понда площадка. Григорий, эн вунöт, площадка весöт, — медбöрья наказзэз сетiс председатель.

— А кывзы жö, эшö эд вунöтiм öтiк йылiсь, — горöтчис коммунальщик и мыччалiс горш вылас, — сiя кöть министр, а тожö морт.

— Эта заботаыс сельсоветiсь да сельполöн председателлезлöн, — öмалiс сiйö школаись директор, — а сiдз жö эд вунöтö антиалкогольнöй пессьöм йылiсь.

Сельсоветiсь председатель öвтыштiс кинас, кыдз гуттэз вашöтiс и серöмсорöн горöтчис, эта пö миян забота.

Лун пондöтчис мича да гажа. Быдлаын чочком вевтöсöн цветитiсö калина да рябина. Руын дöвьялiс цветтэзсянь коддзöтан дук. Отчаяннöй челядь пешлiсö ни пруд вылiсь ва.

Председатель, сылöн актив да селоын олiсь отир видзчисисö землякöс, дона гöсьöс, министрöс. Челядь патруллез пукалiсö, оз я мыччись вертолёт.

Луншöрлань, кысянькö мöдöрсянь, не сэтчинсянь, кысянь видзчисисö, сибалiс село дынö вертолёт. Селосö гöгöртiс, адззис лесничество крыша вылiсь знаккез и, кыдз ыджыт зелёнöй юрсигусь, пуксис площадка вылö.

Сельсоветлöн актив местаын ни. Нывкаэз сулалiсö нянь-солöн, цветтэзiсь букеттэзöн. Кыдз только вертолётлöн лопасттез сувтiсö, клубись директор вертолёт ыбöс дынö ольсалiс гöрд дорожка. Активись морттэз кулöм не ловья пукалiсö да видзчисисö, мый лоас одзлань.

Вертолётiсь ыбöс оссис. Сэтчинiсь петiс шляпаа, кучикись курткаа кыз морт. Сыбöрын эшö öтiк морт. Актив сибöтчис вертолёт дынö.

Председатель петiс одзас и пондöтiс:

— Добро пожаловать, дона гöсь. Ми тэнö öддьöн видзчисим. Видзöт, кыдз олö миян отир. Велöт, кыдз миянлö овны. Тi Москваас буржыка тöдат... — сэсся кыввесö эз адззы и кинас мыччалiс нянь-сов вылö, — курччöвтö, пешлö аслат родинаись нянь-сов.

Нывкаэз вайисö гöссез одзö нянь-сов и сетiсö букеттэз.

— Спасибо, спасибо, дона ёрттэз, — горöтчис кучика курткаа морт, — öддьöн спасибо, — и окалiс нывкаэзöс да активись быд морткöт здоровайтчис. Ачыс думайтiс, что сылöн сотрудниккез лöсьöтiсö этö комедиясö.

Кучика курткаа морт актив одзын оссис, ме пö Вöр заптан объединеннёись генеральнöй директор... Актив коласын шушкисö, видзöтö жö пö, сiя эшö и генерал. Министр да эшö и генерал. Ыджыта пö быдмöм миян земляк.

Сельсоветiсь председатель юасис гöсьлiсь, поди пö, перво сёйыштам, а сыбöрын и отиркöт пантасям.

Генерал-министр охотаöн согласитчис, что бур бы перво и сёйыштны, а сыбöрын и уджалыштны. Но мыйкö баитыштiс сiя морткöт, кöдыкöт локтiс и вежис ассис решеннё:

— Но, хозяин, добрöй морт, мыччав инö ассит хозяйство, — генерал горöтчис председательлö.

Председатель митiс киас кепкасö и юалiс: «Перво пруд видзöтам. Быд год леспромхоз кылöтö вöр Кумва кузя, а плотинасö оз воч. Плотинаыс оз ни вермы прудсö видзны.»

Локтiссез и панталiссез мунiсö плотина кузя. Председатель норасис леспромхозiсь бюрократтэз вылö.

Генерал мыйкö баитыштiс аслас морткöт и висьталiс, что отсалас вочны плотина. Сыбöрын мунiсö, кытöн строитсис больница.

Председатель бöра пöртчис казанскöй сиротаö и норасис, что кык год ни строитöны больница и некыдз озö вермö кончитны. То кирпич абу, то цемент, то деньга. Некин оз отсав: не район, не леспромхоз.

— А кытшöм отношеннё леспромхозлöн больница дынö? — чорыта юалiс генерал-министр.

— А кыдз жö? Татöн больницаын не токо селяна лечитчöны, но и леспромхозын уджалiссез. Спасибо Степан Бушуевлö, царство сылö небеснöй, сiя бура отсалiс больницалö, а öнi виль бюрократтэс, — чульс сьöвзис бокас председатель и мымдакö кежö лöнис да бöра горöтчис: — дона гöсь, шуганит жö тэ районiсь и леспромхозiсь начальствосö, мед отсалöны строитны больница.

Дона гöсь сетiс кыв, что отсалас строитны больница. И сэк жö думайтiс, не простöй пö эта председатель, хитрöй руч. Тырмас ветлöтны объекттэз кузя, то сiя эшö не этö корас, и висьталiс председательлö, что локтiс пö кад сёйны.

Председатель гöсьсö пыртiс столовöйö. Кöр нёджжöвтiс гöсь пызан вылö, киэсö павдöтiс, гажöна серöмтчис да горöтчис:

— Ба, да татöн министерскöй пызан.

— Старайтчим, старайтчим, дона гöсь, — паныт видзисö ответ активисттэз.

— Эта эшö не быдöс... Эшö баня лоас сур-брагаöн, — ошшасис коммунальщик.

Генеральнöй директор думайтiс ас кежас, что бертас областьö, «пывсьöтас» баняын ассис уджалiссесö эта спектакль понда.

Пондöтчис пир.

II

Министр Вениамин Константинович вежис ассис решеннё, мунас пö горт селоö машинаöн. Унажык пö адззыла.

Сотня гöгöр километр катыльтчисö машина вылын асфальта туй кузя. Мелькайтiсö челядьсянь тöдса ыббез, видззез, расоккез, юоккез. Моросын ёткöтiс сьöлöм. Важын ни эз вовлы гортö, причинаэз вöлiсö, и вот только öнi шедiс кад видзöтны ассис посад, ветлыны аймамыс шойна вылö, сетны зонсянь поклон.

Неыджыт мыс вывсянь мыччисис дона горт Кумва. Гöрд, зелёнöй, чочком крышаэза керкуэз вöйисö зелёнöй сад пытшкö. А вот графскöй парк. А вот югьялö пруд, ордчöн «Учöтик Швейцария», сэтчин, саясжык, сад.

Сибöтчисö Кумва дынö. Вениамин Константинович шофёрыслö висьталiс, кай пö селоö и сувтöт машинатö школа дынö.

Министр петiс машинаись и кайис невылын мысок вылö, кытöн кöззэз, нинпуэз да баддез коласын тыдалiсö шойна кресттэз. Могильник вылын мужикыс недыр сулалiс аймамыс шойна одзын, сувтiс пидзöс вылас и сетiс лажмыт поклон, пуктiс ыбись летöм цветтэз и иньдöтчис посадö.

Мый сiя адззис, аслас синнэзлö эз верит. Керкуэз пиньöвтчöмась, палисадниккез пöрöмась. Главнöй улица вылын гырись ямаэз. Вились строитöм керкуэз комолöйöсь, наличниккезтöмöсь. Вениамин Константинович думайтыштiс, что эстöн сулалiсö кудриа баддез, ны местын токо сiсьмöм мыррез. Пруд тырöма осокаöн, лоöм учöтик. Плотина вылын вöлi садитöм нинпуэзiсь, горзiсь баддезiсь аллея. Сы местаын бöра жö только мыррез.

Пыралiс сельскöй паркö, кöдö эшö графлöн лесничöй садитöм быдкодь пуэзöн да кустарниккезöн. Быд пу сулалö линия вылын. Парк тожö пöрисьмöм. Весöттöм. Гражданскöй да Отечественнöй войнаэз вылын вийöммезлö памятниккез пиньöвтчöмась и тырöмась ёгтурунöн. Некинлöн татчö не кок не ки абу сибалöм.

Только öтiк строеннё сё сэтшöм жö гажа, мича, кöдалö сотня годся унажык ни — школа. Сiйö строитöм граф Строгановлöн управляющöй крестьянскöй челядь понда. Торговöй ряд разьсьöм. Магазиннэз вöйöмась муö. Арболит плитаэзiсь виль магазин вачкисьö сарай вылö. Эстöн жö сулалö пожарнöй каланча, кöдалöн юрыс вот-вот усяс.

Вениамин Константиновичлö лоис недолыт. Моросыс измис, горшас кайис комок.

Министр мунiс школаö. Сэтöн порядок. Быдлаын сöстöм, öшыннэз вылын цветтэз. Челядь перемена коста гöгöртiсö тöдтöм мортöс и юасисö кин сiя. Мортыс висьталiс, что уна год ни чулалiс, кöр сiя эстöн велöтчис, но нельки партасö, кöда сайын пукалiс, öнöдз тöдö. Челядь сералiсö, горöтлiсö, что партаэз нылöн нач вильöсь, öнi важжес абуöсь ни. Челядь висьтасисö, что нылöн эм школьнöй музей и сэтчин быдöнлöн, кин кончитiс школасö медальöн, эмöсь фотографияэз, и кыскисö сiйö сэтчин.

Челядь ватагакöт тöдтöм морт пырис музейö, и быль казялiс учöтик фотография, сы увтö гижöмась: «Чирков Веня, — и дженытик биография: профессор, лауреат, министр».

Сьöд синока боёк нылочка чуньнас тюкнитiс фотография вылö и гажöна горöтчис:

— А ме тöда кин! Тэ Веня-министр.

Нывкалöн кыввез «Веня-министр» кыдз тöвчикöн паськалiсö школа пыр. Челядь сiйö гöгöртiсö, чирзiсö, сералiсö, горöтлiсö: «Миянö Веня-министр локтiс!» Учительскöйись петiсö велöтiссез и казялiсö тöдтöм мортöс. Томыник учительница сибöтчис тöдтöм гöсь дынö, здоровайтчис и юалiс, кин сiя.

Мöдыс отвечайтiс: «Ме тiян велöтчись, не лично тiян, а эта школалöн».

А кытшöмкö зоночка, кыдз чужмöр, горöтлiс: «Веня-министр, ми тэнö пантавны лöсьöтчим, нельки школа гöгöр и улица чышким».

— А если бы министр эз лок, сэк бы эд чышкö?

— А эгö бы. Ми праздниккез кежö токо весöтам, — кинкö горöтчис челядь коласiсь.

Учителлез школаись неöтпыр, стыдöн, жалейтöмöн висьтасясö, кыдз школаö вовлiс министр.

Школаын ветлöтöм бöрын министр мунiс больницаö. Главнöй врач, Пётр Семёнович, ен вылö вачкисись морт, ласковöя панталiс гöсьöс. Сiя сэкжö тöдiс коллегаöс, кöдакöт öтлаын велöтчис. Нiя дыр баитiсö, касьтылiсö, кыдз быдмисö, велöтчисö, кыдз öнi олö село, норасис, что виль больница озö вермö строитны, медоборудованнё важ, умöль. Здравоохраненнё вылö правительство етша сетö деньга. Сiя жö висьталiс, что талун вовлöм ни кытшöмкö министр, видзöтöм виль строиттöм больница и мöдöм отсавны. Ачыс эта пора керöм операция, и абу вермöм сыкöт пантасьны.

Вениамин Константинович видзöтiс аптека, пыралiс йöв заводö.

Луншöр бöрын отир öксьöмась Дом культурыын пантасьны асланыс земляккöт. Томмез сiйö озö тöдö, а пöриссес, кöдна сыкöт велöтчисö, нiя сэк жö сiйö тöдiсö.

Вениамин Константинович эшö эз ешты пырны клубö, сiйö гöгöртiсö селяна, здоровайтчисö, дивуйтчисö, юасисö. Молодец пö тэ, Веня, эн вунöт горттö, эн вунöт аймамытлiсь могилаэз.

Селяна, мый вöлi сьöлöм вылын, веськыта пöрöтiсö министр одзын. Ачыт пö адззан, мый кольччис кöркö зелёнöй, город кодь селоись. Туйез, улицаэз разьсисö, керкуэз сувтöтöны, кинлö кытчö гленитчö, некытшöм лад абу. Важ керкуэз пöлiньтчöны, некин оз воч. А эд миян селоыс сералiс, городiсь нарошно вовлiсö шоччисьны, саддэзын гуляйтны, купайтчыны, пруд вылiсь чери вугравны.

Эта коста кинкö горöтчис, кытöн нö пö председательыс, кык лун модис, министрöс пö колö буржыка пантавны.

Зоночка, даскык годся не унажык, петiс отир одзö и висьталiс: «А ме тöда кытöн! Сiя мöдiк министрöс, генералöс гöститöтö. Вина столовöйын юöны».

Пётр Семёнович, больницаись главнöй врач, котöртiс столовöйö. Гöссез, актив да председатель пукалiсö, гажöна баитiсö, öмтырöн сёйисö пызан вылiсь и юисö вина.

— А, здорово, Пётр Семёнович, как раз только локтiн, пуксьы пызан сайö, — код кодь ни председатель приглашайтiс врачöс.

— Ёрттэз, извинитö менö, что ме сора тiянлiсь компания. Министр, Вениамин Константинович Чирков, миянö локтiс. Öнi сiя клубын, отиркöт сёрнитö.

Морттэз, кöдна пукалiсö пызан сайын, öммезнысö осьтiсö и некытшöм кыв эз вермö горöтчыны. Председатель кыдз кыз онiсь саймис, юрсис нöбасис кодыс, мыкталöмöн юалiс, кин пö локтiс. Врач эшö öтпыр висьталiс.

Гöссез чожа чеччисö пызан сайись, крест-накрест «спасибо» висьталiсö и чожа нiйö вертолёт лэбтiс небоö.

— Ох, и ляпитчим, стыд и срам, — кинкö актив коласiсь лёбис, — этö тэ, председатель, виноват, быд шляпаын министрöс адззан, — кöритiсö председательöс.

Сё жö председатель, сылöн актив мунiсö пантавны министрöс. Но клуб дынын вöлiсö только нёль-вит морт, и нiя горöна ошкисö ассиныс дона землякöс.

Председатель гусьöнмоз, кыдз сурттöм пон, сибöтчис морттэз дынö и сiдз жö гусьöна, мыкталöмöн, юалiс, кытöн нö пö министрыс? Кинкö лэчыт кылöн вундыштiс: «Кöр тэ пируйтiн, сiя тю... тю... машина вылын нöбасис».