Война туйез кузя

Рассказ

Мымдакö кад бöртi Лологовлöн бертiс сознаннё. Сiя кыдз кыз онiсь саймис. Вывтырсö бытьтö матегöн вольдöмась, коккезыс и киэзыс сьöкытöсь. Пондылiс чеччыны, коккезыс вижгыльтчисö ¹и бöр пöрис гатш.

Быдлаын шы не тöв, дзик некытöн некытшöм олан абу. Дзирс пемыт. Сьöд кымöр вылын вирдалöны звездаэз. Кысянькö небосö малалö прожектор. Лологов некыдз эз вежöрт, мыля некытöн шы не тöв, кытöн сiя куйлö и мыля сiя эстöн? Мый сыкöт лоис, мыля сотчö юр и пеллез тупкасьöмась? Сiя, мымда вын, юр поттöдз, зэлöтiс веммез, старайтчис вежöртны ассис состояннё.

Чулалiс эшö мымдакö кад, Лологовлöн пондiсö пеллезыс оссьыны ― кылiс потласян снаряддэзлiсь уалöм, тöвлiсь шумитöм и кытöнкö ылын-ылын лыйсьöм.

Боец киэзнас малыштiс гöгöр: öт бокас сулалiс кöз, мöд бокас ― кытшöмкö кустарник. Конувтас шедiс автомат. Лологов эшö буржыка вынсьöтчис, медбы вежöртны ассис состояннё и жагöник, кыдз кыз туман пыр, пондiсö казьмöтчыны торья эпизоддэз, кыдз сiя шедiс татчö, сэсся бöра асьсö вунöтiс и вдруг саймис. Юрас вöлi невна кокнитжык. Пеллезыс кöть висисö, но нiя кылiсö ни. Кытöнкö сьöд небо кузя уалiсö-лэбзисö сьöкыт бомбардировщиккез. Небо прожекторрезсянь то öтiк ладорын, то мöдiк ладорын югдывлiс. И öнi жö сiя сьöрсьöн-бöрсьöн пондiс касьтывны, мый сыкöт лоис и мыля сiя татöн.

Советскöй армия эз сет ловзисьны гитлеровскöй войскоэзлö: дугдывтöг вашöтiс нiйö миян территория вылiсь Западлань, освобождайтiс ассиным городдэз, селоэз да деревняэз.

Но Гитлерлöн войскоэз вöлiсö эшö вынаöсь. Медбы содтыны вын аслас войсколiсь восточнöй фронт вылын, сiя чапкис татчö виль часттез Италияись да Западнöй Европаись.

Кыным лёкжыка миян армия вашöтiс фашисттэзöс, сыным нiя öддьöнжык лёксялiсö и вынсьöтчисö керны контрнаступленнёэз.

Миян разведчиккез судзöтiсö сведеннёэз, что öтiк местаын фашисттэз пондiсö чукöртны танковöй часттез, строитны база, ыджыт складдэз горючöйöн да мавтан маслоэзöн.

Медбы дзугны фашисттэзлiсь контрнаступленнё кежö лöсьöтчöм, миян командованнё партизаннэз отсöтöн ыстiс бура велöтöм диверсионнöй группа, кöдалö колiс уничтожитны нефтьöн, маслоэзöн складдэз и, если позяс, танккез вочан мастерскöй.

Погоддя нылö отсасис: öтöрын вöлi пемыт, букайтiс тöв, шумитiс вöр и небосянь киссис небыт, шоныт зэр.

Группа кынöм вылас кыссьöмöн сибöтчис база дынö. Базалiсь территория югдöтiсö прожекторрез.

Группалöн командир Краснопёров тöдсасис обстановкакöт и сетiс боеццезлö приказ: куим боец «онмöсьтасö» часовöйезöс, сыбöрын вундаласö проволочнöй загражденнё и кольччасö местаэзаныс. Если немеццез нiйö казяласö, нiя пондасö прикрывайтны подрывниккезлiсь база территория вывсянь бертöм, эта понда öтiк боец кольччас вöр дорö, мöдiк мунас база мышкö.

Куим боец вöр дорсянь сибöтчисö часовöйез дынö. Ветлöтiсö öтöрмöдöрö кык охранник. Нiя ветлöтiканыс пантасясö, мыйкö баитыштасö и бöра öтiкыс öтöрö мунö, мöдыс — мöдöрö. Миян боеццез лыддисö, — колö, кыдз только часовöйес öтамöдныс дынсянь ылöжык янсöтчасö, сэк жö нiйö «онмöсьтны».

Сiдз и шогмис. Гитлеровскöй охранниккез ланьтiсö век кежö.

Разведчиккез жö орöтiсö проволокаись загражденнё и сэк жö командир Краснопёров, Лологов и Шевляков взрывчаткаöн пырисö нефтебаза территория вылö. Кынымкö минутаöн нiя тэчисö горючöйöн ыджыт цистернаэз бердö взрывчатка и öзтiсö бикфордов шнуррез. Командир сетiс приказ петны территория вылiсь. Петiканыс Шевляков кытчöкö кокнас павкис и лэбис шум. Сэк жö пондiс кавгыны пон, вижгыны сирена, бöбмисö прожекторрез, нiя гырись югыт синнэзнаныс малалiсö территориялiсь быд квадратнöй метра.

Касьтылö Лологов: «Фашисттэз миянöс казялiсö. Лыйисö миян кузя пулемёттэзсянь. Миян боеццез, кöдна кольччисö ылöжык база дынсянь, тожö автоматтэзiсь осьтiсö би. Фашисттэз öшисö, нiя эзö вежöртö, кöдöрö кинитчыны. А миянлö колiс рознитчыны и чукöртчыны сiя местаö, кöда йылiсь баитiм операция керöм вотöдз».

Лологов, кöр петiс территория пытшкись, мымда вын котöртiс висьталöм направленнёлань. Сiя котöртiкас падмалiс, усялiс, кулис чужöмбансö уввез бердö.

Кынымкö метра эшö чеччöвтiс одзлань и мышкас чарöтiс воздухсö взрыв, гöгöр öзйис биöн, югмис сьöд небо, дрöгнитiс му.

Лологов кынымкö секунда кежö сувтчыштiс, дзарнитiс бöрланяс и горöтчис аслыс: «Дело керöма», — и одзлань кинитчис. Керис кынымкö оськöв — син одзас мигнитiс да кусiс учитик биок и юрыс пондiс бергавны, сотчыны, и сiйö садь колис.

Лологовлöн юрсис кольмöтыс петiс. Сiя вöрöтiс коккез, киэз — кывзiсьöны, некытiсь оз пет вир, только пеллезас дзик букайтö тöв, и сiя вежöртiс, что контузитöм.

Öнi сiя думайтiс, мый одзлань керны. Сiя бура вежöртiс, что фашисттэз, если не ойнас, то луннас пондасö сынавны вöр, каждöй куст, кошшыны диверсия кериссезöс.

Жагöник чеччис, митiс коккесö, киэсö и, дзик кодззöм морт, турьялöмöн керис кынымкö оськöв.

Эшö оськöв, эшö оськöв и веськытжыка пондiс видзны мыгöрсö.

Но кöдöрлань мунны? Ой пемыт, синнэзö кöть росöн чурскы — нем оз тыдав, быдлаын сулалö сьöд стена. Лологов сувтiс, ныр кузяс вачкис сотчöм да бензин дук, и сыланьын гöрдöтiс небо. Сiя вежöртiс — сэтчин вöлi фашисттэзлöн база. Лологов бергöтчис мöдöрлань и маласьтöн пондiс оськавны одзлань.

Лологов мунiс и мунiс. Данасис ¹мыррез да му вылö усьöм пуэз бердö, кайис кусттэз вылö, усялiс, чеччис и бöра мунiс. «Одзлань, одзлань, ылöжык, ылöжык операция местасянь»,— приказывайтiс Лологов аслыс.

Боец тэрмасис, оськалiс одзлань, кытчöкö кыкнан кокнас каттисис и забгисис кынöм вылас, юрсö мыйкö бердö люкалiс — нельки синнэзсис чеччöвтiсö бичиррез. Невна куйлыштiс, лэбтiс юрсö и синнэз вылас усис — небоыс öтiк ладорсянь мичамö. Лологовлö сьöлöмас пырис гаж. Сiя вежöртiс: сыланьын асыв, и мунö правильно. Сылöн сьöлöм вылас лоис долытжык.

Нач югдiс, асывладорсянь шондi му кузя тойыштiс ассис биа югöрресö. Пондiсö быдлаын сьывны поснитик кайез, ласковöя шумитiс тöв.

Лологов сувтiс, нёджжасис. Гöгöр несук, сора вöр. Одзланьын дзуз видзис нето кушин, нето ыб. Боец сайласьöмöн, кок шытöг, мышкыртчöмöн иньдöтчис дзузвидзан весьтö. Вöр чулассис и сы одзын мыччисис ыб логгезöн, а ылынжык лöзöтiсö бöра рассэз. Веськытланьын кытшöмкö ыджыт посад. Посад дынöт туй кузя мунiсö — лэбтiсö тшакыльöн бус грузовиккез, ветлöтiсö солдаттэз. «Гитлеровеццез», — аслыс горöтчис боец.

Лологов бергöтчис бöр, пырис вöрö. Кошшис места, кытчö бы буржыка сайöвтчыны гитлеровеццезсянь.

Адззис места. Пуксис. Сималiс кынöмыс, косьмис горш. Продуктаэз, фляжка ваöн, кöднасянь вермис операция керикö лэбны учöтик говк, колисö öтiк местаö. Сэтöн жö нiя баитчисö операция бöрын чукöртчыны. Но кытöн сiя местаыс? А кошшыны — эта йылiсь думайтны оз позь. Быдлаын öнi койöны бöбмöм фашисттэз.

Лологов вевттис асьсö пу уввезöн, лыссэзöн и водiс. Шоччисикас думайтiс, мый лоис группаись боеццезкöт. Сылö эшö тöдвылас усис, кöр сiя петiс база территория вылiсь и котöртiс вöрöт, сылöн пеллез кутiсö командирлiсь шыэз:

— Рознитчö, чожажык рознитчö!

Лологов сiдз жö куйлiкас старайтчас вежöртны, кытшöм местаын сiя? Операция вотöдз нiя топографическöй карта сьöртi велöтiсö фашисттэз база гöгöрись местаэз, направленнёэз, кыдз бертны бöр местаö, кытöн нiйö панталасö партизаннэз.

Сiя уськöтiс тöдвылас топографическöй карта и жагöник пондiс вежöртны — сiя мунiс не ылöжык дасвит километрся. Эта вöрын, натьтö, партизаннэз абуöсь. Этö ыбсö колö ойнас вуджны и иньдöтчыны вöррезлань. Боец невна кежö ланьтiс.

Кöр саймис, сы пеллезöдз локтiс сёрни шы. Жагöника бергöтчис шылань, и синнэз вылö усисö нёльдас метра ылына кык фашист автоматтэзöн. «Кошшисьöны», — думаэзнас горöтчис Лологов и буржыка ляпкисис му бердö.

Сiя кадö, кöр сайласис гитлеровеццезсянь, партизаннэз видзчисисö операция вылiсь боеццезöс. Нiя вежöртiсö, что боеццезкöт мыйкö шогмис не сiдз. Либо шедiсö засадаö, либо сюрисö фашисттэз киэзö. Но нiя видзчисисö и волнуйтчисö.

Лологов не кулöм, не ловья, полiс нельки пыдынжыка лолавны, лунтыр куйлiс вазьöм му вылын. Позялiсö коккезыс, киэзыс, шумитiс юрын, висисö пеллез, сималiс кынöмыс. Öмас перво суксялiс дуль, а сыбöрын нач косьмас. «Юны, юны, юны»,— шваткöтiсö кыввез боец юрын.

Рытнас, но эшö не нач вöлi пемыт, боец петiс аслас нораись и, кыдз зверь, гусьöника, сайласьöмöн петiс вöрись ыб вылö. Кынöм вылас, кыдз уж, веклясис-кыссис логлань, кöда гöгöр быдмисö ловпуэз, баддез да сэтöрпуэз. А юрас сё дугдывтöг шваткöтiс — юны, юны, юны. «Логас, натьтö, эм шорок»,— думайтiс боец.

Лологов сибöтчис лог дынö. Кань моз, шытöг, пырис кустарниккез увтö и дзарнитiс лог пытшкö. Лог кöс. И колö жö, кыдз сiя сэк жö эз казяв: кынымкö метра ылына сы одзын öтöрасис гитлеровскöй солдат.

Сiя кылiс кöс уввезлiсь чегöм, перыта сувтiс, лэбтiс вешьянсö, öтмöдöрö дзарнитiс, но нем эз казяв и бöр пуксис. Бокас му вылын куйлiс винтовка, вещмешок и фляжка. Лологов, кöр дзарнитiс фляжка вылö, сылöн нельки синнэс пемдiсö, юрыс бöбмис. Сiя, кыдз рысь, öтiк секундаöн лэбзис и солдат спинаö мöртiс пурт. Гитлеровец шытöг сунгисис ныр вылас, кыдз йикиöн тöбалöм мешöк. Лологов кватитiс вещмешок, фляжка и чурснитiс-пырис ас местаас. Сылöн токöтiс сьöлöм, дрöжитiсö киэз и коккез. Кыдз невна лöньсис сьöлöмыс, осьтiс фляжка. Лог увтсянь мыччисис эшö гитлеровец, сiя локтiкас кытсалiс: «Ганс, Ганс!» Но кöр сибöтчис ловтöм Ганс дынö, сiя нёштöма горöтчис: «Партизан, партизан», — и тöлöн нöбасис лог кузя увланьö.

Лологов куйлiс шы не тöв. Лöсьöтчис пантавны гитлеровеццезöс, но нiя мылякö сэсся эз мыччисьö.

Боец осьтiс фляжка, перыта пöрöтiс öмас, мый сэтчин эм. Кынымкö гульк умöлик вина сотiс сылiсь öмсö и горшсö. Лологов лöгувьяс швыргис-чапкис фляжка. Сэсся резьöтiс вещмешок и сэтчинiсь кыскис неыджыт няньтор да дука сыр. Чожа, брезгуйтöмöн нiйö сюйис öмас. «Тойöсь завоевателлезöс, видно, не чöскыта вердöны», — горöтчис аслыс Лологов.

Кöр небосвод вылын югйöвтiсö звездаэз, пондiс чивзыны ойся кай, Лологов бöра, кытöн кынöм вылын, кытöн котöрöн, лэдзчис лог дорöт увланьö. Ойбытöн сiя öсилейтiс кузь ыб, кöдö эз туй мунны лунöн. Югдандорас синнэз вылас усис туман, а сы пыр югьялiс ва. Ва вылö видзöтiкö боецлöн бöра пондiс токöтны сьöлöм, и öмас курыта сöдзис сук дуль. Сiя перыта, сайласьтöг лэдзчис ю дорö. Пырис моросви юö и гырись гульккезöн юис кöдзыт, но дука нюр ва. Сыбöрын пондiс вуджны непыдын ю мöд берег вылö, кöда сайын пондöтчисö рассэз, а ылынжык — кузь вöррез.

Кöр Лологов сибöтчис кочкаэза берег дынö и сайöвтчис бадь шаттез увтö, мышкас горöтчисö: «Хальт», — и берег кузя малыштiс фонариксянь би. И сэк жö одзас брызнитiс автоматiсь очередь. Лологов пуксис ваö, дзебис юрсö кочка сайö. Кык фашист одзлань-бöрлань ветлöтiсö ю берег дорöт, кошшисö фонарик биöн, но некинöс эз адззö. Нiя пуксисö и пондiсö куритны. Мыйкö ас коласаныс баитiсö. Сыбöрын öтiк гитлеровец ны коласын горöнжык горöтчис:

— Беднöй Ганс, торксис. Быдлаын партизаннэз, кыдз привиденнёэз. Кöр ни кончитчас война и бертам гортö проклятöй Россияись? Натьтö, чожа ни?

— Э-э, эн тэрмась. Дыр эшö миянöс роч тойез, пытшшез да лудыккез сёясö. Гитлерöс бы миян местö, сiя пондöтiс война, мед сiйö и сёйöны.

Лологов пукалiс кöдзыт ваын. Сiя дрöжитiс, чакöтiсö пиннезыс. Коккезыс и киэзыс вугмисö, голяыс висис. Вöрзьöтчыны эз туй, сэк жö казяласö тойöсь гитлеровеццез.

Асывланьын пондöтчис петны шондi, и эта коста солдаттэзöс кинкö кытсалiс, кыдз вежöртiс Лологов, сёйны. Нiя чеччисö местаэзсиныс, эшö öтпыр нёджжöвтiсö ю вылö и мунiсö. Кыдз только нiя саясисö, Лологов перыта кайис берег вылö и саясис сук кусттэз увтö. Коккезiсь кыскалiс сапоггез, кисьтiс ныись ва и пондiс митны вугмöм коккесö и киэсö. Сыбöрын сувтiс, öтöр-мöдöрö нёджжöвтiс и кусттэз пöлöн турьялöмöн котöртiс ылöжык эта местасянь. Адззис сук кусттэз и сайöвтчис ны пытшкын.

Шондi перыта кайис небосвод вылö. Кисьтiс му вылö ассис шоныт, ловзьöтан югöрресö. Боец чапкис ас вывсис паськöм, ольсалiс му вылö косьмыны. Кöр Лологов шоналiс, пасьталiс недосповна косьмöм паськöм, сы пеллезöдз локтiсö морт шыэз. Сiя нёджжöвтiс кусттэз увтсянь — неылын сы дынсянь кидласьö-котрасьö бöбмöм мöс, а сы сьöрын вöтлiсьöны фашисттэз. Мöс кинитчис то öтiк ладорö, то мöдiк ладорö, а сэсся пондiс котöртны Лологов вылö. «Вот сюра чёрт, вайöтiс ме юр вылö смертьсö»,— котöртiсö думаэз сы юр пытшкын и лöсьöтiс лыйны автомат. Но мöс вишнитiс, мыйиськö повзис, бöжсö лэбтiс и чепöссис тыдалан расоклань. Гитлеровеццез сё чепсасисö, вöтлiсисö мöс сьöрын, сыбöрын панöвтiсö, мöс юр вылö чапкисö петляöн гез, мöсыс кышасис сюррезнас и татшкисис-сувтiс. Гитлеровеццез полöмöн сибöтчисö мöс дынö, малалiсö сылiсь юрсö, боккесö, медбы лöньсис, и öтiк гитлеровец лöсьöтчис высьтыны йöв солдатскöй котелокö. Мöс пессис, жöдзис и, кöр гитлеровец кутчисис няняэз бердö, бöрись кокнас тэчкис, и гитлеровец берездасис. Сувтiс коккез вылас и пондiс чужьявны мöс боккез кузя.

Лологов эта сцена видзöтöм вылö чуть эз серöмтчы горöн. «Вот завоевателлез, йöв охота лоис сёйны? Молодец, сюра! Да тэ сюррезнат нiйö пышнав, воюйт бура», — сералiс Лологов.

Гитлеровеццез адззöны, что нылöн нем оз пет, гезйöн сюррезöттяс пондiсö кыскыны посадлань. Мöс тарашитчис, эз мун. Сыбöрын чепöссис и татшкисис бы сюррезнас одзись мунiсь гитлеровецö, но сiя ештiс бокö чеччöвтны и усис. Кисис лэдзис гез, мöс казялiс воля и кинитчис раслань. Гитлеровеццез мöс кузя койыштiсö автоматiсь очередьöн. Мöс турьялiс, турьялiс и пöрис. Нiя вундыштiсö мöслiсь горш, сьöлöмись лэдзисö вир и дыр гуддисисö, кулисö кучик. Вундалiсö небыт местаись яй и мунiсö. Кытшöмкö кад бöртi нiя жö локтiсö бöр, но уже телегаö доддялöм вöлöн и мöс туша нöбöтiсö.

Кöр саясисö, Лологов чеччöвтiс местасис и кусттэз коласöт кинитчис рассэзлань.

...И вот Пётр Лологов куимöт лун ни, партизаннэзöс кошшикö, шатласис вöррезын, сымда жö ой почти синнэзыс эзö куньсьывлö. Эта кадö желудокыс нач косьмис, кынöмыс спина бердас лякасис. Только сiйöн и вердчис: кытшöмкö туруннэз сёйис да дука нюр ваöн гырксö гывьялiс. Выныс совсем ни пондiс петны, а колö кошшыны, кошшыны и мунны. Коккезыс гардчисö, падмалiсö. Усялiс, чеччис и бöра ляшмалiс.

Лологовöс вот-вот выныс коляс, печиктан — и усяс. Бырöм сапоггезсис петöм коккес каттисисö турун бердö, и сiя сапкисис кынöм вылас. Öдва бергöтчис спина вылас и думайттöг видзöтiс лöз кымöр вылö.

Июньскöй шондi орсiс кымöрын, ёрис синнэз и некытшöм сылö дело эз вöв, что кытшöмкö Петя Лологов öтнас, тöдтöм местаэзын, вынтöг куйлö му вылын. Быдлаын лöнь, только гуттэз быдлаын öткодьöсь, нахальнöйöсь, лякасисö ньылöма кымöс вылö, пырисö нырö и öмö, а сiдз жö лэбалiсö гöгöр перыт борда бабыввез. Асывсянь вайöтлiс тöлок и небыта нильдiс чужöм кузя.

Петя Лологов онмöссьылiс, нето сознаннё öшлiс невна кежö, сылö вöлi сэтшöм шог, кыдз бытьтö кулавлiс и бöр ловзис. Сы синнэз одзын, небоын уялiсö миян бомбардировщиккез. Лологовлö этасянь кыдз бытьтö лоис долытжык.

Боецöс одолейтiс он, но сiя пессис эта чöскыт желаннёкöт. «Эн онмöссьы, зонка, эн онмöссьы. Кылан, Петя? Онмöссян — тэныт конец», — шытöг, косьмöм, потласьöм тырппезöн вöрöтiс сiя. Но ляпкöтiс он. Сы синнэз одзын, кыдз рытся туман пыр, мыччисисö аслас роднöй коми крайлöн местаэз. А вот и Гладьвидзувт. Кытшöм волькыт да веж, быдкодь рöма цветтэза видз. А вот Берегшор, векнитик, чукыля, пыдын юок. Визывтö сiя пöрись да кыз кыдззез коласöт. А вот и Настенька — мича чужöм. Сiя веськыт, нюдз, кыдз пöлян. Берегшор дорын сыналö золотöй юрсиэсö. Настя казялiс Петяöс и стыдитчöмöн вевттис киэзнас куш мороссэсö: «Мый видзöтан, бергöтчы». И Настенька аслас сьöд туся платьеöн, кöдö сiя первуись пасьталiс выпускнöй школьнöй бал вылö, сералiс Петя вылын. Сыбöрын сибöтчис Петя дынö, пуктiс кисö сы пельпон вылö и шушкис пель одзас: «Дыр кежö ли локтiн? Мыля öтiк юöр эн гиж?» Сыбöрын сiя кутiс Петяöс киöттяс, и нiя пондiсö котöртны Берегшор дорöт. Казявтöг лэбис тöв, нёкралiс пöрись кыдззез, чеглалiс нылiсь уввез. Настя котöртiс одзлань, джöмдiс и пондiс вöйны зыбунö. Сiя корис отсöт, но Петялöн коккез эзö кывзö, эз вермы керны öтiк оськöв.

И эстöн Лологов саймис.

Кытöнкö кылiс бомбаэзлöн потласьöм. Му дрöжитiс, нырö вайöтiс порок дук.

Лологов шардiс. Чеччöвтiс бы коккез вылас, но нiя вижгыльтчисö, и бöр пöрис, кыдз йикиöн тöбалöм мешöк. И бöра пондiс нырыштны он. Куйлiкас сы синнэз вылö усис кытшöмкö гаг, кöда кайис турун кузя вевдöрö, но некыдз эз вермы вуджны учöтик препятствие. Каяс, каяс и бöр усяс. Лологовöс досада кутiс, что сiя сэтшöм жö гагö пöртчö. Лöгувьяс Петя гырчигалiс пиннезнас, зэлöтiс мымда вын мышцаэсö и горöтiс: «Эн бöбöтчы, ме не гаг!» И вдруг неылын, бокас, пондiс кывны роднöй, роч сёрни. Да эшö женскöй сёрни, сiя вачкисис музыка вылö. «Ме кöк, ме кöк... Кылат? Ме кöк, ме кöк... Координаттэз... Бур... Веськыта цель кузя... Ай да соколлэз», — киссисö кыввез. А кытöнкö уалiсö бомбаэз, дрöжитiс му.

Лологов чеччöвтiс, но коккес бöра, кыдз макароннэз, кусiньтчисö. Сувтiс пидзöссэз вылö, сыбöрын öдва лэбтiсис коккес вылö и турьялöмöн иньдöтчис сёрни вылö. Эта коста öтмöдöрсянь пондiс кывны лыйсьöм.

Кусттэз увтсянь перыта чеччöвтiс рацияöн неыджыт нывка. «Асланым, асланым морт. Партизанка. Партизаннэз адззисисö, öнi лоа спаситöм», — аслыс горöтчис Лологов. Сылöн сьöлöмыс öзйис гажа биöн и синнэзсис счастьесянь быгыльтчисö кортöм синваэз.

Лологов иньдöтчис сылань, но кыдз гуö вöйис партизанка. И сэк жö öтöрмöдöрсянь пондiсö гöгöртны фашисттэз. Боец нывкалö мышкас ни горöтiс, кöть сiйö эз адззы, мед пышшис чожажык, что сiя падмöтас фашисттэзöс и эшö мöдiс сылö висьтавны ассис пароль, кöда сьöртi нiйö видзчисисö партизаннэз, но некöр ни вöлi.

Фашисттэз Лологовöс гöгöртiсö. Сiя пондiс нiйö пышнавны автоматiсь. Гитлеровеццез пöрласисö, но мыччисисö сё вильöсь и вильöсь. Боецлöн патроннэз автоматiсь бырсисö. Мый керны? А, эшö эмöсь кык граната. Сэк кысянь сылöн и вын содiс, чапкис граната и кольлалiс сiйö кыввезöн: «Лэбзьы, матушка. Нате, гаддэз, сёйö миянлiсь зöровöй кисель, вот тiянлö кушман-хрен».

Фашисттэз Лологовöс гöгöртiсö быд ладорсянь. Кольччис öтiк граната. Петя окалiс сiйö и горöтчис: «Тi, кикимораэз, тойöсь завоевателлез, менö весь од босьтö». Лологов дернитiс гранаталiсь кольцо и чапкис кок увтас. Граната перво жвангисис му бердö, сыбöрын невна тарöвтчис и лöньсис местаас. Петялöн нельки синнэзас пемдiс, сiя бöбсялöм зверьöн кинитчис граната дынö, но эта коста кыдз оглобляöн вурыштiсö сы сивилён кузя. Лологов синнэз одзын перво небоыс пöлiньтчис, сыбöрын вöрыс пондiс бергавны, сэсся кырныш-рака юр вылас пуксис и кок увтсис муыс нильдiс.

Лологов, кöр сылöн бертiс сознаннё, вежöртiс, что сiйö чужьялöны. Кöр оссисö синнэзыс, ны вылö дзардiсö фашистлöн сералан дзуту синнэз. Пётр вились öштiс сознаннё. Но чожа бöр саймис. Фашист пукалiс кекеркаöн и фляжкаись кисьтiс васö кымöс вылö.

Петя бы чепöссис и пиннезнас орöтiс фашистлiсь горшсö, но сылöн öтiк мускул эз вöрзьы. Лологовлö öнi вöлись вемас пырис, кытшöм сылöн трагическöй положеннё. Сiя шедiс пленö. Кытшöм эшö солдатлö ыджытжык позор, кыдз не плен?

Петяöс кутiс сэтшöм досада бракодел вылö, кöда керис этö гранатасö, и колана минутаö гранатаыс эз пот. Сiя öнi öткодялiс бракоделöс предателькöт.

Чожа эшö локтiс öтiк фашист. Нiя гажöна баитiсö, что кутiсö ловйöн партизанöс и лоас нылö начальствосянь награда и отпуск. Фашисттэз лэбтiсö Лологовöс му вылiсь, кöрталiсö киэсö гезторрезöн, синнэзсö домалiсö трепичöн и чапкисö мотоцикл коляска вылö.

Мымдакö чулалöм кад бöртi Лологов вежöртiс, что сiйö вайöтiсö населённöй пунктö. Гöгöр кылiс пон вувтан немецкöй сёрни. Лологовöс тойыштiсö мотоцикл коляска вылiсь. Сiя кылiс, что ны дынö кинкö сибöтчис. Фашисттэз öтамöднысö приветствуйтiсö: «Хайль Гитлер!» Кинкö ны коласiсь гажöна и небыта горöтчис: «О, Шварцкопф, тэ молодец, инькатö гажöтан наградаöн. Фюрер аслас доблестнöй солдаттэзлö нем оз жалейт. А менчим, том немецкöй офицерлiсь, сьöлöм гажöтат. Ме эд первуись пантася советскöй разведчиккöт».

Эта бöрын кытчöкö тойыштiсö Лологовöс. Сiя кынымиськö берездасис и сунгисис из вылö. Мымдакö куйлiс, сэсся пуксис, пешлiс киэсö и коккесö — дзоньöсь, малыштiс кымöссö — сэтiсь визывтiс вир.

Сувтiс коккез вылас, гöгöр нёджжöвтiс: изiсь керöм подвал, угöлын сулалö неыджыт пустöй бочка и сэсся нем абу. Ныр патшкыртö багсялöм да эшö кытшöмкö нёштöм дукöн.

Веськыт стенаын, потолок бердас ни, дзуз видзö учöтик öшынок. Лологов угöлiсь кыскис стена бердö бочка, сувтiс сы вылö и нёджжöвтiс осьтаö, но нем эз тыдав. Öшын весьтын вöлi керöма изiсь невылын ограда. Только позис вежöртны, что öтöрын шондiа да югыт.

Лологов лэдзчис бочка вылiсь, пуксис сы вылö и юалiс ассис, мый сыкöт шогмис? А эшö думайтiс, вермис ли мезмыны партизанка рацияöн? Сыбöрын водiс кöдзыт, цементiсь керöм джодж вылö и бöра пондiс думайтны.

Партизанскöй отряд олiс аслас законнэз сьöртi. Керисö диверсияэз кöрттуй вылын, видзчисьтöг уськöтчывлiсö посаддэзiсь фашисттэз гарнизоннэз вылö. Тöн только фашисттэз ныр увтын öшöтiсö посад шöрын полицейскöйöс да староста-предательöс.

Партизанскöй отрядын вöлiсö асланыс геройез. Медöддьöн нiя уважайтiсö разведчиккезöс, нылiсь командирöс — лейтенант Петровöс, кöда войналöн первöйся луннэзсянь жö шедiс партизанскöй отрядö. Ны смелöй удж йылiсь висьтасьлiсö легендаэз...

Отрядын вöлi öддьöн смелöй, Наташа нима нывка. Партизаннэз сiйö ласковöя величайтiсö уралочкаöн. Чужанiннас сiя вöлöма Уралiсь. Öтiк сьöкыт операция коста гусялiсö немецкöй офицерöс. Наташалöн эстöн вöлi медглавнöй роль. И уже операция кончайтiкö партизанка вöлi ранитöм, шедiс фашисттэз киэзö. Гитлеровеццез быднёж сы вылын издевайтчисö да сыбöрын сiйö öшöтiсö. Партизаннэз сетiсö аслыныс клятва — жалейттöг вештiсьны Наташа понда, резны-паздыны фашисттэзöс.

Каждöй операция бöрын разведгруппа или партизанскöй отряд ас бöрас колис почерк — гижисö стенаэз вылö, либо лякалiсö ыбöссэз вылö, нето казнитöм фашист спина вылö гижöт: «Наташа».

Отрядiсь партизаннэз öддьöн гажöна панталiсö радистка Ольга Черепановаöс и сыкöт локтiссезöс, тожö партизаннэзöс.

— Ловьяöсь? — партизаннэз нiйö зэлöтiсö берданыс, нывкаöс окалiсö.

Ольга Черепанова докладывайтiс партизанскöй отрядлöн командирлö, что фашисттэз пеленгуйтiсö сылiсь рация, кöть сiя каждöй передача коста вежис места. Сiя чуть эз шед фашисттэз киэзö, но сылö отсалiс кытшöмкö тöдтöм боец, кöр сiя пышшис рациянас местасис. «Мый сыкöт лоис, ме ог вермы висьтавны. Ме сiдз вежöрта, что эта боецыс сiя группаись, кöда уничтожитiс фашисттэзлiсь горючöйöн база», — медбöрын шуис Ольга.

Командир шытöг кывзiс радисткалiсь доклад, сыбöрын висьталiс, что сылö сэсся городын оз туй мыччасьны, колас вежны. А сiя пондас уджавны татöн.

Сiя сiдзжö висьталiс, что эмöсь сведеннёэз: боец, кöда падмöтiс фашисттэзöс, шедiс пленö. Пондасö примитны мераэз, эд надёжнöй отир сэтчин уджалöны.

Абвер формаын капитан пукалiс ыджыт канцелярскöй пызан сайын и нервничайтiс. Сiя нем эз вермы керны партизаннэзкöт, кöдна быд лун лэдзисö рельсаэз вылiсь вооруженнёöн да солдаттэзöн составвез. Неважын партизаннэз фашисттэз ныр увтiсь гусялiсö пленнöйезöс, сотiсö электростанция и продовольствиеöн склад. А тöння бомбитöм? Веськыта цель кузя? Эм мый йылiсь думайтны и нервничайтны капитанлö. Сiя вежöртiс, что эстöн уджалöны разведчиккез, но кыдз инмыны ны след вылö? Сэтöн эшö полковник фон Вольфман быд лун грöзитчö, что если оз кутö «Наташаöс», кöда кыдз тöвчик пö то эстöн, то сэтчин койö фашисттэзлö смерть, погоннэз куляс и маршевöй батальонö ыстас. Кин сэтшöм Наташа? Эм ли сэтшöм морт? Или миф? Русскöйезлöн тактика? Капитан горöтчис кынымкö видчан кыв. Сэсся перыта чеччис пызан сайись, бергöтiс кузьмöса юрсö öшыннэзлань, кытöн сулалiс гестапоись офицер и волькöтiс инструментöн ассис гыжжесö:

— Курт, чёрт тэнö босьт, бур тэнат олан, гöняйтан первокласснöй машина вылын, öктан факттэз и тэнат докладдэз сьöртi миянöс вашöтöны передовöй вылö, а мукöдпырся... — капитан чуньнас тюкнитiс юрбöр кузяс.

Гестаповец и юрсö эз лэбты, сё сiдзжö волькöтiс гыжжесö и дыша видзис ответ:

— Капитан, тэнат веммезыт личалöмась... Вежöрт, менам докладдэз сьöртi и наградаэз сетöны, если...

— Мый если? Мый этö лоö? — пизис капитан.

— Этö лоö, что колö действуйтны, капитан, — орсöмöн горöтчис гестаповец.

— Тэ сьöртi лоö, что ми вешьяннэз ниртам стул вылын?

— Мыля жö? Капитан, тэ он пов, что öтiк лунö тэнчит орöтасö горштö? И вежöрт, пызан сайын. И эшö гижасö спина кузят ласковöй русскöй ним «Наташа».

— Бöра «Наташа»! Чёрт, кин сэтшöмыс Наташа? Партизаннэзлöн орсöм?

Гестаповец веськöтiс мыгöрсö, чапкис öшын подушка вылö инструмент и грöзитчöмöн горöтчис:

— Капитан, дугды нерваэтö кеслыны. Колö действуйтны, а не паникуйтны. Чожа неприятельлöн войскоэз миян порог дорöдз локтасö, а тi философияöн занимайтчатö. Подвалын пленнöй, а то допростöг и сiйö гусяласö партизаннэз.

Капитан тшöктiс вайöтны пленнöйöс и бöра пондiс споритны гестапоись офицеркöт. Сiя кадö, кöр споритiсö немецкöй офицеррез, быль ли эм «Наташа» или миф, Лологов нюжласис кöдзыт подвалын. Кысянькö пемыт угöвсянь вайöтлiс нёштöм дук и сылiсь патшкыртiс нырсö. Вевдöрын стукöтiсö дорöм немецкöй сапоггез. Неылын кыз голосöн вувтiсö овчаркаэз. Öтöрын кижгисö фашисттэз.

Подвалiсь оссис ыбöс. Лологов синнэз кузя зубыта вачкис гожумся шондiлöн югöр. Сылö рякöстiсö:

— Хо, швайн русь, ам-ам! — И дзуту синнэза фашист сералöмöн нюжöтiс Лологовлö боль ваись шыдöн котелок да кусöк нянь.

Петя перво мöдiс койыштны шыдсö фашист синнэз кузя, но тшыг — не тётка, да и сылöн эшö быдкодь планнэз, кыдз пленiсь мезмыны. И вын сылöн эшö пригодитчас.

А кынымкö час бöртi сiя жö фашистыс Петялö киэзнас мыччалiс öтöрлань.

Петяöс пыртiсö керкуö. Ыджыт комната. Джодж паркетiсь. Сы вылын косьмöм вир воттез. Стенаэз лякöмöсь нятьöсь цвета лöз обойезöн. Пызан сайын пукалö кöсыник, куш юр пыдöса, неöткодь синнэза (öтыс ыджытжык, мöдыс учöтжык) капитан. Сы юр вевдöрын öшалö Гитлерлöн портрет. Решёткаöн вевттьöм öшын одзын сулалö офицер.

Кöсыник капитан мыччалiс Лологовлö табуретка вылö. Петя, кöть öдва ни сулалiс, керис вид, бытьтö нем оз вежöрт.

Немец вились мыччалiс табуретка вылö и вежливöя горöтчис, что немеццез отир вежливöйöсь и цивилизованнöйöсь, и если пö менам солдаттэз не вежливöя панталiсö, то... война, сэтшöмöсь сылöн законнэз.

Эстöн колö висьтавны: немецкöй капитан пыр ошшасис и велöтiс ассис подчинённöйесö, медбы пленнöй öмись кыскыны колана кыв, колö юасикö аслыт вöвны спокойнöйöн, убеждённöйöн и, кыдз гипнотизёр, действуйтны психика вылö.

Плеша переводчик чегласьöм роч кыв вылын вуджöтiс капитанлiсь басни, кöть Лологов уна буржыка вежöртiс переводчиктöг — не весь университетын велöтiс немецкöй кыв.

Но Петя Лологов местаись эз вöрзьы. Сэк капитан пондiс пизьны и баитны, что русскöй солдат оз почитайт немецкöй гостеприимство. Лологов ас кежас думайтiс: «Гостеприимство шуан, корчага кынöм, кортöм гöссез, локтiт миянлiсь сотны городдэз, деревняэз, вийны пöриссесö и челядьöс — эта и эм тiян немецкöй цивилизация? Гостеприимство? Вот кытшöм адззисьöм хозяин. Миян му вылын хозяин? Эшö видзöтам, мый лоас одзлань». Вирöн пизян лöгсянь нельки пиньöвтчис Лологовлöн чужöмыс. Капитан сувтчис, синкыммесö вайöтiс оча и гадюка синнэсö иньдöтiс Лологов вылö. Петя тожö сы вылö дзардiс сэтшöм вир пизян лöгöн, что капитанлöн косöй синнэс пондiсö кваркышавны.

Фашистлöн психологическöй атака чездiс. Гестаповец öтiк синугöвнас сералiс капитан допроссэз методика вылын.

Капитан нервнöя чеччöвтiс местасис и, кыдз наковальня кузя, пондiс жванöтны-баитны, что нiя сiйö тöдöны, разведгруппа быдсöн кутöма. Если сiя висьталас, кин сэтшöм «Наташа» и мыччалас партизаннэз дынö туй, то сылö свобода. Конечно, сылö гортö не бертны — пленнöйезлö НКВД керö капут. Но сылö лоас свобода немецкöй цивилизованнöй му вылын. Сысянь колö öтiк кыв: кин сэтшöм «Наташа», кöть нiя сiйö и тöдöны ни. Колö думайтны, эта — присягалöн совсем учöтик нарушеннё.

Капитан, кöть лыддис асьсö спокойнöй разведчикöн, керис ошибка. Лологов этö бура вежöртiс, что немеццез озö тöдö сы йылiсь нем. И сiдз жö вежöртiс, что эстöн, фашисттэз ныр увтын, уджалöны партизаннэз. И Петяöс тожö лыддьöны партизаннэз разведкаись. Эта вывод бöрын Лологовлöн веммезыс югмисö. Сы юрын пондiс гильöтны надежда, кöда йылiсь сiя аслыс эз лысьт горöтчыны.

Капитан кыскис кармансис портсигар, öмас пешалiс сигарета и пондiс куритны. Кынымиськö öмсис лэдзис тшакыльöн табак тшын и пондiс шваткöтны:

— Но войналöн законнэз лöгöсь, киннэз нылö озö подчиняйтчö, нылö смерть. А öддьöнжык — шпионнэзлö да диверсанттэзлö. Кытшöм заданнё тэнат вöлi медбöрья операцияын? Кин сэтшöм «Наташа»? Кин самолёттэзлö сетiс координаттэз?

И сё эшö капитан орсiс вежливöй мортлiсь роль. Эстöн фашист мöдпырся сорасис, вежöртiс Лологов. Петö, радисткаöс кутны эз вермö. А «Наташа» йылiсь сiя нем эз кыв.

Сэк Лологов беринь керис юрнас и кыдз бытьтö сьöлыштiс-горöтчис роднöй кыв вылын: «Скöтинаэз, тiянлö бöж увтаныт биа гормöччан. Вежöртат, ме тiянлö нем ог висьтав».

— Мый пленнöй висьталiс? — юалiс капитан переводчиклiсь. Переводчик павдöтiс киэсö и висьталiс, что сiя оз вежöрт кыв, кöда вылын баитö пленнöй.

Лологов аслыс сетiс кыв, что сiя пондас баитны только коми кыв вылын, етшажык фашисттэз сы вылын пондасö кешитчыны да кыскавны допроссэз вылö.

Капитан тшöктiс переводчиксö эшö юавны, что если пленнöй пондас орсны, то касьтыв, сiя эшö том мунны мöдöр светö. Сiя сiдз жö висьталiс, что Россияын государственнöй кыв — роч и быдöс сэтчин олiсь отир вежöртö и вермö баитны роч кыв вылын.

Переводчик матöжык сибöтчис Лологов дынö, висьталiс, мый шуис капитан, и пондiс юасьны, кытшöм кыв вылын сiя баитö. «Поди, тэ мордвин, башкир или татарин?» — шляпкöтiс переводчик.

Петя дзирыта видзöтiс переводчик вылö и лёбис ас кыв вылас: «Аха, лёшмöм гоб, морт вузалiсь, шедан тэ партизаннэзлö, вот мый тiянöс керасö», — Лологов мыччалiс, кыдз джагöтöны виселица вылын.

Капитан вежöртiс, мый вылö намекайтö пленнöй, чочкоммис и кытчö сылöн öшис «немецкöй вежливость», горöтiс: «Тырмас! Сетö лён кузяс! — и ыджыт досадаöн содтiс: — Майн гот, мымда быдкодь сёрни тэ сетöмат миян планета вылö. Мыля эн кер только миянлiсь великöй немецкöй кыв? Кылан, Курт, миян великöй немецкöй нациялöн ыджыт миссия — исправитны Енлiсь ошибка!»

Петя дынö сибöтчис ыджыт, бульдог чужöма немец, сöтiс юр кузяс, кыдз оглобляöн, и сiя сунгисис гатш. Лэбтiсö и бöра, и бöра сöталiсö, только синнэзсис бичиррез чеччалiсö. Немец чужьялiс Петя боккез кузя, но пленнöй öтiк шы эз сет. Сылöн нырись и öмись петiс вир, лыйис пеллезас, шумитiс юр. Лологовöс, кыдз куль мешöкöс, чапкисö подвалö.

Лологов Петялö таво тырис 21 год. Чужис, кыдз одзжык песняын сьывсис, сьöд вöр шöрын, деревняись петiс.

Быдмис крепыт, топыт мужик. Велöтчис не бура, не умöля, кончитiс посадын шöрöт школа. Мунiс велöтчыны Перемö университетö. Велöтчис филологическöй факультетын. Бура любитiс литература, велöтiс йöз кыввез, öддьöнжык — немецкöй.

Деревняын, кытöн чужис да быдмис Лологов, олiс австрияк Карл Шмутке, немец. Сiя эшö империалистическöй война коста сетчöма пленö, мед воюйтны советскöй власть понда гражданскöй война вылын и пыр кежö миян страна сылö лоöм мöдiк чужанiнöн.

Петя часто ветлывлiс добрöй дядя Карл ордö и кывзiс сылiсь басниэз тöдтöм страна йылiсь. Дядя Карл любознательнöй зонкаöс велöтiс радейтны немецкöй народлiсь культура, сылiсь кыв. Сiдз сiя бöрйис аслыс специальность — лоны филологöн.

Пондöтчис война.

Лологовлöн айыс, ёрттэз мунiсö война вылö. Петя тожö нöбöтiс ассис заявленнё военкоматö, мунны доброволецöн фронт вылö. Но сiйö ыстiсö велöтчыны авиационнöй училищеö. Медицинскöй комиссия сiйö бракуйтiс и бергöтiс гортö. Гортын эшö öтiк несчастье сыкöт шогмис — вундыштiсö аппендицит. И сiдз сылöн почти быдса год торксис: эз велöтчы, эз воюйт. Мымдакö уджалiс колхозын, плотбищеын «глухаррез ньöрис». Гортын жö сiя тöдсасис Настенькакöт, соседскöй деревняись мельник нывкöт.

Эта жö кадö фронт вывсянь локтiсö нёштöм юöррез, то öтiкöс вийöмась, то мöдiкöс. Горе эз орддьы и Лологовлiсь керку. Локтiс юöр, что айыс век кежö пуктöм юрсö фашисттэзкöт пессьöм коста.

Лологов Виль год бöрын, 1942 годын, бöра мунiс военкоматö, пуктiс заявленнё. И сiйö босьтiсö.

Фронт вылö мунöм вотöдз куим месяц Лологов велöтчис артиллерийскöй училищеын. Но локтiс вылiсянь приказ, и срок петтöдз, март конецын, курсанттэзöс ыстiсö фронт вылö.

Перво курсанттэзлöн эшелон локтiс Москваö, сыбöрын вайöтiсö станция Сухаяö. Станциясянь маршöн мунiсö одзлань, рытлань. Лологов аслас синнэзöн адззис войналiсь удж: сотчöм деревняэз, жугдöм техника, танккез, автомобиллез, доддез, паздöм пушкаэз. Трактыс пöлöн то эстöн, то сэтчин сулалiсö кузь ряддэзöн кресттэз — фашисттэзлöн могилаэз.

Ойнас локтiсö тöдтöм деревняö, и сы сайын полк бöрйис позицияэз. Пондiсö гарйисьны эшö сывтöм муö.

Кытöнкö бокын кылiс пушкаэзлöн букайтöм. Фашисттэз вывланьсянь лэдзисö деревня весьтö югдöтан ракетаэз.

Противник, кöр сiйö советскöй войскоэз паздiсö Москва увтын, вынсьöтчис керны виль контрнаступленнё, старайтчис бергöтны öштöм позицияэз. Зверсялöм гитлеровеццез лун и ой наступайтiсö миян позицияэз вылö, но ураганнöй бисянь катыльтчисö бöр.

Лологов эстöн первуись вежöртiс, мый сэтшöм война: сылiсь вийисö ёртсö, кöдакöт тöдсасис училищеын, уна том боеццезöс, первуись адззылiс бомбаэзöн, снаряддэзöн бергöтöм, гарйöм ямаэзöн му, разьöм-паздöм техника. Эстöн жö, Сухая увтын, сы сьöлöмö мöртчис сэрпöсь жель. Жель, кöда дыр зубыта кильöтiс сылiсь веммесö.

Öтiк рытö взводлöн командир Лологовöс да эшö Дубаевöс тшöктiс позиция весьтын флаг вылын нёджжавны фашисттэз сьöрын. Лологов Дубаевкöт пукалiсö окопын. Вöлi кöдзыт. Дубаев шваткöтiс оча кок и мыйкö öддьöн нервничайтiс. Эта коста фашисттэз кыдз бöбмисö: видзчисьтöг пондiсö миян окоппез кузя жаритны миномёттэзсянь. Лологов синнэсö мöртiс, старайтчис вежöртны, кöдöрсянь лыйсьöны, а сыбöрын бокас нёджжöвтiс — Дубаев абу. Кытчö сiя воштiсис? И вдруг синнэз вылас усис — ёртыс кынöм вылас гужгö фашисттэзлань. Лологов горöтiс: «Дубаев, тэ кытчö? Бергöтчы!» Но сiя веклясис одзлань. Лологов эшö горöтiс, медбы ёртыс бертiс, но трус гужгис неприятельлань. Сэк Лологов сы кузя винтовкаись лэдзис не öтiк пуля. Эта жö коста фашисттэз пондöтiсö наступленнё миян позиция вылö, но шедiсö миян кромешнöй би увтö и катыльтчисö бöр. Гитлеровеццезлöн эта вöлi бойöн разведка.

Сiдз Лологов аслас киэзöн ассиным мортöс век кежö водтöтiс му вылö. «Трусöс, предательöс война вылын только сэтшöм наказаннё и видзчисьö», — сiдз думайтiс Лологов, кöть сьöлöм вылас вöлi öддьöн недолыт.

Югдан дорас фашисттэз миян рота позиция вылö вились пондöтiсö наступленнё. Мыччисисö сизим мымда танккез. Ны мышксянь код гитлеровеццез кижгисö, ряксiсö, прокод метитчытöг койисö автоматтэзiсь би. Миян позициясянь тожö пондiсö стукöтны-орсны «максиммез» — ручнöй пулемёттэз, лыйны автоматтэзсянь и винтовкаэзсянь.

Сетiсö команда готовитны противотанковöй гранатаэз, горючöйöн бутылкаэз.

Гитлеровеццез пöрласисö миян пуляэз увтын. Нiя сувтчöмöн, мукöдыс öманыс гармошкаэзöн, сё матöжык и матöжык сибöтчисö миян окоппез дынö. Кинкö миян боеццез коласiсь лёк горшöн чанöтiс воздухсö: «Васька, сволочь, мый узян? Лый танккез кузя оглоблясянят!» Недыр мыйись пондiс кывны противотанковöй пишаллезсянь ковгöтöм. Чожа öтiк танк öзйис. Сiя жö голосыс шыасис: «Молодец, Васька! Оглобляэзлöн толк эм. Виньдiс гад, виньдiс! Одзлань сiдз жö уджав!»

И эта биа кад коста боеццез вермисö лэдзны шутка.

Фашисттэз джöмдiсö, но недыр кежö. Гитлеровеццез одзлань пырисö би пытшкö. Танккез невна кежö сувтчывласö, кожгасö-лыясö пушкаэзсиныс и бöра жольгöтöны одзлань.

Стальнöй гаддэз сё матöжык и матöжык сибöтчöны, гужгöны, гымалöны, жолькöтöны гусеницаэзöн, кöдзöны смерть. Нылö кольччис сто метра мымда окоппезлöн первöй линия дынöдз и вот пондасö утюжитны, прессуйтны, тальны и давитны линия. Эта кадö кывсис команда: «Танккез кузя веськыт наводкаöн: би!» Пондiсö керны ассиныс дело противотанковöй пушкаэз. Öтiк танк öзйис, мöдiк пондiс местаас бергавны, куимöт — тшынасис.

Миян боеццез смевмисö. Нiя эшö точнöйжыка пондiсö койны фашисттэз кузя смерть. А кытшöмкö боец чеччöвтiс паныт немецкöй танклö противотанковöй гранатаöн, но эз ешты чапкыны, век кежö водiс му вылö. Жаль, неколана геройство керис, но сылöн поступок эшö буржыка чорзьöтiс сьöлöммез боеццезлiсь. Öнi быдыс вöлi готов аслас телоöн йöрйыны фашисттэзлö туй.

Лологов син вылö усис, кыдз öтiк бöбмöм танк ыджыт скорость вылын нюжöтöм кузь чукнас гымалö смертьöн, веськыта катыльтчö сы вылö. Сiя кватитiс одзсис противотанковöй граната, перыта чеччöвтiс окопись, кынöм вылас гужнитiс паныт танклань, сэсся öтiк секундаö чапкис телосö боклань керöм ямаö, и стальнöй гад гусеницаэз увтö вынöн швыргис граната. Граната бузгис-потiс. Биöн кутöм танк пондiс бергавны öтiк местаас. А Лологовöс взрывнöй волна тойыштiс ямаись и забгис неылö бергалан танк дынсянь окоп бердöдз.

Лологовöс глушитiс взрывнöй волна, и сiя невна кежö öштiс сознаннё. Сiя эз тöд, кин сiйö кыскис окопö и кöр фашисттэзлöн виньдiс наступленнё.

Неделя бöртi дивизиялöн командир строй одзын танк уничтожитöм понда, смелость да храбрость понда Лологов морос вылö öшöтiс медаль «За боевые заслуги».

Кыдзкö öтiк ыджыт бой бöрын, кöр ротаись боеццез шоччисисö, локтiс тöдтöм майор. Сiя боеццезлiсь юасис, кин тöдö немецкöй кыв. Лологов висьталiс, что небура, акцентöн кужö сёрнитны.

Сiйö майор нуöтiс полковöй штабö, оформитiсö документтэз, и нiя мунiсö мöдiк местаö.

Сэксянь Лологовöс вайöтiсö особöй группаö и пондiсö велöтны сiйö, кыдз буржыка баитны немецкöй кыв вылын, уджавны топографическöй картаöн и кужны ориентируйтчыны ойнас компастöг тöдтöм местаын, воюйтны пуртöн, инмыны цельö шы вылö, кыдз керны взрыввез и уна эшö öтiкö-мöдiкö. Тренируйтчисö кык месяц. Группаын боеццез вöлiсö крепытöсь, смелöйöсь, мукöдыс ветлöмась неöтпыр ни враггез тылö заданнёэз вылö. Ны мороссэз вылын югьялöны наградаэз — орденнэз да медаллез.

Эстöн сiя тöдсасис Шевляковкöт, кöда чужанiннас вöлi Челябинск увтiсь, боевöй лейтенант Краснопёровкöт, кöда сыбöрын лоас ны группаын командирöн.

Вöлi шоныт ар. Пуэз пондiсö вежöтны. Чорзис, быгалiс турун. Мукöдпырся ойланьсянь вайöтлiс сöстöм, кöдзыт ру. Ойез лоисö пемытжыкöсь.

Эта кадö Краснопёровöс, Лологовöс, Шевляковöс и эшö кык боецöс назначитiсö Н-скöй полкись особöй разведывательнöй отрядö. Виль пополненнё панталiсö радöн, гöгöртiсö вниманнёöн, пондiсö велöтны нiйö асланыс искусствоö.

Особöй отрядлöн командир, бытшöм, гажа капитан Бармин Григорий Сидорович, виль пополненнёись быд боецкöт дырöн беседуйтiс. Лологов öнi тöдiс, что командир сибиряк, университетскöй образованнёöн, первöй война луннэзсянь уджалö разведкаын.

Виль боеццезöс заданнёэз вылö эз босьтö, нiйö тшöктiсö буржыка тöдсасьны обстановкакöт, отрядiсь боеццезкöт, буржыка ныкöт ёртасьны.

Каждöй операция бöрсянь командир керис разбор. Сiя тшöктiс внимательнöя кывзыны виль боеццезöс, вежöртны, что разведчиккез уджын мелоччез абуöсь. Самöй учöт ошибка вермас шогмöтны беда.

Но локтiс кад, и Лологовöс да мöдiккезöс пополненнёись пондiсö босьтлыны неыджыт заданнёэз вылö. А öтпыр Лологов и эшö öтiк боец-ветеран, сiйö сувтöтiсö старшöйöн, мунiсö фронт линия сайö, фашисттэз тылö.

Нылö вöлi сувтöтöм задача, тöдны, кытшöмöсь и кыдз керöмöсь оборонительнöй рубежжез враглöн, кысянь и кытчö локтö боевöй техника. Разведчиккез куим лун, кыдз осторожнöй зверрез сайласисö, вöйсалiсö, примечайтiсö, мый керсьö фашисттэз тылын.

Нiя вежöртiсö, что фашисттэз строитiсö, буржыка лöсьöтiсö кык оборонительнöй рубеж. Западлань локтiс боевöй техника, виль, тöдтöм вооруженнё, сьöкыт танккез.

Кöр нiя бертiсö частьö и керисö доклад, мый нiя адззылiсö, командованнё висьталiс, что вайисö дона сведеннёэз. Лоис вежöртана, что фашисттэз дыр кежö лöсьöтчöны кольччыны эта позиция вылын, öктöны вын виль наступленнё кежö. Гитлеровеццезлiсь колö дзугны планнэз. Миян командованнё сувтöтiс задача: öнi жö вашöтны фашисттэзöс эта местаись, — и чожа пондiс чукöртны войскоэз.

Неделя бöртi, одз асывнас пондöтчис артиллериялöн канонада. Джын час артиллеристтэз паздiсö гитлеровскöй частьлiсь оборонительнöй рубежжез. Сыбöрын пондiсö штурмуйтны стрелковöй батальоннэз, и лун конецын фашисттэз колисö ассиныс позицияэз.

Лологов эта бöрын унаись ветлiс быдкодь заданнёэз вылö и медбура сылö юрас пуксис, кыдз сiя первуись судзöтiс «языкöс».

Миян командованнёлö öддьöн колiсö виль сведеннёэз, и этö вермис сетны только ловья фашист. Но медбöрья кадö сьöкыт вöлi гусявны передовöй вылiсь фашистöс: гитлеровеццез осторожничайтiсö.

Капитан Бармин корис ас дынас Краснопёровöс, Лологовöс, Шевляковöс — богатырь мыгöра мортöс, Кобыхноöс — öддьöн боёк украинецöс да ны одзын сувтöтiс задача: талун ойнас гусявны фашистöс.

Группаись старшöй Краснопёров öтлаын ёрттэзкöт сувтöтiс операциялiсь план. Мунiс отрядлöн командир дынö, и сiя эшö керис уточненнёэз и утвердитiс план.

Лологов сiдз касьтывлiс аслас «язык» йылiсь: «Кöр нач пемдiс, ми витöн мунiм передовöй вылö кошшыны «языкöс». Ойбыт кыссим кынöммез выланым нейтральнöй полосаэз кузя. Кыдз только пондiм сибöтчыны фашисттэз передовöй линия дынö, нiя пулемёттэзiсь пондiсö койны смерть. Либо миянöс казялiсö, либо сiдз, гажтöмсянь, миян передовöй кузя лыйисö. Ми ляпкисим лым вылö не кулöмöсь, не ловьяöсь. Куйлiм джын час гöгöр, лыйсьöм дугдiс. Ми одзлань пондiм кыссьыны. Фашисттэз юр вевдöраным «öшöтiсö» югдöтан ракетаэз. Бöра ляпкисим. Недыр мыйись вились кыссим кынöммез выланым. Сибöтчим нач матö ни фашисттэз передовöй дынö, саясим керöсок сайö. И колö жö, пулемёт дынын гуддисьöны кык фашист! Нiя öтамöдныскöт негорöн баитöны. Лологов пеллезöдз локтiс, кыдз öтiк фашистыс горöтчис: вот бы пö öнi сёйыштны дзирыт похлёбка, юны настоящöй кофе и нюжöтчыны узьны. А мöдыс горöтчис паныт, эта пö мый, похлёбка, ме бы Ева бокын узьыштi. А тэ тöдан, кытшöм нылочка? Ох и нылочка! Синнэс гырисьöсь, зелёнöйöсь, чужöмыс гöгрöса и öмыс сералö пыр. Берегитi ме сiйö, мöдi гöтрасьны. А öнi менам Евалiсь сьöлöмсö бурмöтö гестаповскöй офицер, сволочь Мюллер. Война чожа кончитчас, локта гортö, кыкнанныслiсь юррезнысö керала». Эта басни бöрын похлёбка сёйисьыс китш-китш гусьöник ваксьыштiс да горöтчис: видзчись пö, кöр войнаыс кончитчас, мийö Россия ыббез вылын назёмö пöрамö.

«Ми сё сайласим бугор сайын. Видзчисьны нем, колö действуйтны. План сьöртi перво колö чеччöвтны Безбородовлö и Кобыхнолö. Нiя öтiк фашистöс долженöсь вийны, а мöдсö глушитны и кыскыны асланым частьö. А ме да Шевляков прикрывайтны нылiсь ас ладорö бертöм.

Краснопёров только мöдiс сетны Безбородовлö и Кобыхнолö знак, кыдз кинкö кытсалiс гитлеровецöс. Похлёбка сёйись чеччис, мунiс земляккезлань. Но сэк жö локтiс кытшöмкö кыз тушаа мöдiк гитлеровец. Краснопёров öнi примитiс мöдiк решеннё: кыкнаннысö глушитны и кыкнаннысö кыскыны. Сiя сетiс знак, и боеццез секундаöн чепöссисö фашисттэз вылö. Безбородов кыз гитлеровецöс сэк жö глушитiс, а Кобыхнолöн мыйкö эз шогмы и кыкнанныс усисö. Колiс отсасьны Кобыхнолö. Фашисттэзöс домалiмö, öммезнысö тупкимö и пондiмö кыскыны-гужгыны лым кузя асладорö. Бöраным кольччис пыдын предательскöй борозда.

Фашист землянкаись бертiс пулемёт дынö. Кöр адззис, что напарникыс öшис, а лымыс гöгöр бура тальöма и казялiс борозда, пондiс горöтлыны и тарзьыны-лыйны пулемётiсь. Гитлеровеццез прокод нейтральнöй полоса вылö лэдзисö югдöтан ракетаэз. Ми ляпкисьлiм му бердö. Кöр ракетаэз кусасö, бöра кыссямö сьöкыт ношаэзöн. Бöра ракетаэз. Фашисттэз казялiсö и миян борозда сьöртi пондiсö лыйны миянлань, но пуляэз кытчöкö лэбзисö одзлань. Миян тожö пондiсö лыйлыны фашисттэзлань. И сё жö локтiм асланым передовöй вылö. Боеццез отсалiсö кыскыны фашисттэзöс колан местаö. Кöр локтiмö, доложитiмö командирлö, что заданнё тыртöм, и мыччалiм судзöтöм «языккез» вылö. Но кöр нiйö пöрччалiм — казялiм: кыз тушаа фашистыс вöлöм офицерöн и кыскиканым тувдöм. Безбородов лишньöй вын пуктöм сiйö босьтiкö.

Эта операция бöрын дыр сералiсö разведкаись боеццез, кыдз нiя «тувдöм языкöс» кыскисö асладорö».

Чулалiс тöв, локтiс тулыс и вот пондöтчис гожум.

Öтiк лунö капитан Бармин ас дынас корис Краснопёровöс, Шевляковöс, Лологовöс и эшö кык боецöс и висьталiс, что ны одзын — öддьöн ответственнöй заданнё. Операциялiсь подробнöй план сувтöтат пö партизанскöй отрядын.

Кык лун бöртi нiйö самолёт вывсянь лэдзисö Белоруссия вöррезö партизанскöй база вылö.

И вот — плен.

Кöр Лологовлö лоис долытжык, сiйö кутiс досада, что сiя етша воюйтiс, и айыс понда, и вийöм боеццез понда оз вермы вештiсьны.

Мöдiк лунö Лологовöс бöра нуöтiсö допрос вылö.

Керкуын бöра сiдзжö, только содiс эшö öтiк морт.

Лологов аслас думаэзöн шуис: «Эшö öтiк предатель». Капитан, кыдз первöй допроссэз коста, Лологовлö мыччалiс табуретка вылö. Лологов эз и местасис вöрзьы. Сiя видзöтiс öтiк точкаö и синнэзнас кваркыш эз кер.

Капитан юалiс, что пленнöй, натьтö, ештiс думайтны и талун пондас баитны. Лологов лöгöна и чорыта горöтчис роднöй кыв вылын, что сiя нем оз висьтав. Переводчик фашистлö юöртiс, что пленнöй сiдзжö баитö тöдтöм кыв вылын.

«Болван!» — сы вылö рякöстiс капитан. Сыбöрын чуньнас тюкнитiс мöдiк переводчиклань, медбы сiя мыччалiс ассис лингвистическöй способносттез.

Виль переводчик сибöтчис Лологов дынö, вишкыштiс и клуткан голосöн юалiс: «Немецкöй тöдан? Французскöй?»

Медбöрья юалöм бöрын нельки капитан лöгасис, что болваннэз, неужто оз адззö, что ны одзын не француз, а блондин, голубöй синнэза, а чужöм вылас кытшöмкö безразличнöй выраженнё, кыдз чистöй ариец. Фашист öддьöн вежöктiс офицеррезöс и досадуйтiс ас вылас, что сiя арийскöй стандарт вылö оз вачкись. Сiя, грешнöй делоöн, думайтiс, пленнöйыс не немец ли, оз ли сiя отсась советскöй разведкалö? Вот бы вöлi дело!

Капитан кучиксис петiс, что пленнöйлiсь эз вермы кыскыны öтiк кыв. Сiя лöгöн, нёштöм кылöн рякöстiс переводчиккез вылö, и нiйö кыдз тöлöн пöльтыштiс кабинетiсь.

Кöр переводчиккез петiсö, капитан горöтлiс Лологов вылö, грöзитчис, мыччалiс киэзнас, кыдз сiйö пондасö пытайтны, неöтпыр пистолет вайöтлiс Петя кöсичаэз бердö. Гестаповец, кöда пыр шыннялiс капитан вылын, сибöтчис боец дынö и тöдтöма дзарнитiс сы вылö.

А Петя дразнитiс нiйö, аслас роднöй кыв вылын нiйö видiс.

Фашист дикöй лöгувьяс нетшкöвтiс воротниксö, мымда вын гымгис нöш кодь кулакнас пызан кузя, бöбмöм синнэсö лэбтiс потолокланьö и пондiс причитайтны: «Кытшöм страна, чёрт тэнö босьт, кытшöм народ эшö отсалö советтэзлö? Кончитны комедия... тырмас!»

Лологов, кöть сылöн быд коска биöн сотчис, юрас шумитiс, чужöм кузяас вир визывтiс, öктiс медбöрья вынсö, пондiс ваксьыны люшмöм завоевателлез вылын. Сiя веськöтчис, юрсö чатыртiс вывланьö и пондiс чеканитны немецкöй кыв вылын: «Эд мырсьö, капитан, ме Советскöй Союзлöн гражданин! Национальность сьöртi — коми-пермяк. Вежöртö, завоевателлез, менчим тi нем одö босьтö!» — и мыччалiс нылö куим чунись комбинация.

Капитан и гестаповец, кöр кылiсö немецкöй кыв вылын сёрни, перво тувдiсö, сыбöрын пымалiсö и вежöртiсö, что пленнöй видзис нiйö бöбöввез туйö.

Чулалiс мымдакö минута. Капитанлöн чулалiс нервнöй шок и кутiс сэтшöм интерес, и сiя кижган голосöн ряксiс-юалiс: «Кин тэ? Чёрт тэнö босьт?! Кин тэ?»

— Ме висьталi ни, кин ме сэтшöмыс, — паныт горöтчис боец.

— Чöв, скотина! — рякöстiс капитан и сы знак сьöртi Лологовлö сöтiсö. Сiя öштiс садьсö, сiйö чапкисö подвалö.

Немецкöй капитан нервнöя шагнялiс джодж кузя. Гестаповец сулалiс öшын одзын и негорöна шутнялiс кытшöмкö мотив. Рядовöй фашист чышкис джодж вылiсь вир воттез.

Капитан сибöтчис гестаповец дынö и горöтчис: «Курт, ме думайта, кöр фюрер пондöтiс война Советтэзкöт, керис неыджыт ошибка — быдкодь национальностя отир Россияын не только эз лэбтiсь асланыс коммунисттэз вылö, кыдз сiя видзчисис, а йитсисö öтiк чорыт кулакö. Вот пример пленнöйкöт».

Гестаповец перыта бергöтчис, горöна шутньöвтiс и строгöя горöтчис: «Да тэ, капитан, политик. Эттшöм кыввез понда тöдан мый вермас петны?..»

— Мый, пондан норасьны центрö? — нето полöмöн, нето иронияöн юалiс капитан.

— Миян семьяын доносчиккез эшö эзö на чужö. Но аслат благополучие понда сэтшöм думаэз видз сизим замок сайын.— Паныт видзис ответ гестаповец.

— А мый тэ думайтан пленнöй йылiсь? — уже лöня юалiс капитан.

— Советтэзöн пропагандируйтöм фанатик, — чорыта горöтчис гестаповец. — Сiдз жö эшö öмугöввезыс абу косьмöмась йöвсянь. Туйö сылiсь быдöс пыркнитны юрсис, мый сiя тöдö.

— Кыдз жö?

— А сiдз. Тэнат метод нем вылö оз туй. Öтiк кылöн шуны, тэнат умöль школа. — Гестаповец шовкнитiс плетьöн голенище кузяас, сибöтчис шкаф дынö, кыскис сэтчинiсь бутылка, голюксяняс пöрöтiс öмас вина. — Колö лоны беспощаднöйöн, кыдз велöтö фюрер.

— Ме не первöй допрос кера. Вöлiсö сякöйöсь, но быдöнныс роччес öткодьöсь! — оправдывайтчис капитан.

— Но тэ одзын не роч, а кытшöмкö бöбöв племялöн быдтас,— орсiс плетьöн гестаповец.

— О, Курт, ми куимöт год ни воюйтам, а Россия йылiсь öнöдз нем ог тöдö, кöть и Москва дынöдз вовлiм, Волгасö видзöтiм. А эшö унажык невежöртана быдкодь народдэз, кöдна олöны Россияын. — Капитан нёджжöвтiс Гитлер портрет вылö, малыштiс кушмöм юр пыдöссö и пуксис пызан сайö.

— Капитан, тэ мыдзöмат. Тэныт колö библия лыддьöтны, а не политикаöн занимайтчыны. Öнi ме понда допроссэз керны. Ме сылiсь веммесö пыркнита, адззылан. — Сiя керис кынымкö оськöв кабинет шöрын и иньдöтчис винаöн шкаф дынö.

Капитан петiс пызан сайись, паськыта серöмтчис и горöтчис:

— Браво, Курт! Вот ме öнi вежöрта, что тэ не белоручка. Настоящöй немецкöй офицер.Только одзлань висьтала, мед тэнат метод сьöртi пленнöйлöн сразу лолыс эз пет, — нето ошкис, нето издевайтчис сiя гестаповец вылын.

Мый видзис фашистскöй изверггезöс сэк жö не вийны Лологовöс, рядовöй боецöс? Мый нiя сысянь видзчисисö?

Капитанлöн ыджытжык начальниккез неöтпыр ни сылö намекайтiсö, что сiя умöля уджалö. Быдлаын öсилейтiсö партизаннэз, дзугисö немецкöй командованнёлiсь планнэз, а нiя нем ныкöт эзö вермö керны. Партизаннэз, нылöн разведчиккез уджалiсö ныр увтын, казнитiсö предателлезöс, а кутны ны коласiсь некин эз шедöтчы. Не öтiк карательнöй отряд ыстылiсö партизаннэз вылö — нем эз пет, сыналiсö вöррез, кытöн, ны сьöртi, дзебсисисö партизаннэз, — след абу. И вот шедiс Лологов. Фашисттэз понда драгоценнöй адззöм. Капитанлö öддьöн ковсис Лологов öмись кыскыны колана кыввез, кöдна бы сiйö реабилитируйтiсö начальниккез одзын. Но сылöн сiдз нем эз и пет.

А гестапоись офицерлöн вöлiсö мöдiк планнэз. Сiйö ыстiсö татчö, неыджыт городокö, видзöтны, кыдз уджалöны абверлöн разведчиккез, öктыны факттэз и медбöрын винитны нiйö, что партизаннэзкöт пессьöмын неудачаэз нылöн умöль уджсянь.

Гестаповец кешитчис абверись капитан вылын, что сiя миндальничайтö пленнöйкöт, умöля керö допроссэз, и сiйöн пленнöй öмись оз вермы кыскыны öтiк кыв.

Курт, медбы мыччавны, кыдз колö уджавны русскöй боеццезкöт, кыдз сiя кужö ны öммезiсь кыскыны кыв, ачыс пондiс керны допроссэз, пыткаэз виль метод сьöртi, но и эта сылö нем эз сет. Пленнöй чöлiс. Нельки пыткаэз коста сiя öмсис öтiк шы эз лэдз.

Сэк гестаповец, медбы удовлетворитны ассис садистскöй чувствоэз, решитiс пленнöй вылын керны страшнöй издевательство.

Капитан гестаповецöс эз падмöт, кöть тöдiс, что если сiя оз кыскы пленнöй öмись кыввез, тшöктасö сiйö иньдыны старшöй начальниккез дынö. Сiя аслыс думайтiс сiдз, что кыдз гестаповец вияс пленнöйöс, вина усяс Курт юр вылö.

Сiя рытö, кöр договоритчис гестаповец капитанкöт мунны кутитны ресторанö, подвалö пырисö ыджыт (дзик бульдоглöн) юраöсь кык солдат да эшö кузь, старуха чужöма кöс морт.

Солдаттэз нырыштiсö Лологовлiсь киэсö и коккесö джодж бердö, öмас сюйыштiсö трепичись кляп. Старуха чужöма гитлеровец кыскис кармансис нето еммез, нето кöрттуввез и пондiсö нiйö мöртлыны кикок гыжжез увтö. Öддьöн зубытсянь Лологов öмись котöртiс вира быг, киэсö и коккесö кöрчитiс ойтöв, öмсис петiсö нёштöм баксан шыэз.

Издевательство кончитчис. Солдаттэз петiсö. А старуха чужöма гитлеровец петiкас бергöтчис, векыштiс нёштöм пиннесö и горöтчис: «Ауффидерзейн, ду рус швайн». Зонка куйлiс садьтöг. А кöр садясис, аслыс баитiс, если бы сiя мезмис ны дынiсь, мый бы только сiя керис гитлеровеццезкöт. Öнi бы воюйтiс умöн, расчётливöя, резiс и паздiс, сотiс, пöжалiс этнö бöбмöм зверресö.

Кöркö бабыс сылö висьтавлiс полан сказкаэз: Кащей бессмертный, лешаккез, ведьмаэз да разбойниккез йылiсь, нылiсь отир вылын кешитчöм да колдовство лэдзöм йылiсь. Да разь сказкаись геройез вермасö равняйтчыны гитлеровскöй зверрезкöт? Озö! Эна морт чужöма зверрезлö нем му вылын святöйыс абу. Этö нечистьсö му вылiсь колö сотны и сотны биöн.

Сiя кадö, кöр гестапоись офицер и абверись капитан пируйтiсö-юисö французскöй коньяк и сур, танцуйтiсö кöс немкаэзкöт, лапкöтiсö ны яйтöм лядьвейез кузя, партизанскöй командир разведгруппаись командиркöт уточняйтiсö виль операция керöм йылiсь план.

Разведгруппаись командир, старшöй лейтенант Петров, докладывайтiс, что операциялöн план думайтöм бура. Операция лоас сьöкыт. Колас керны учöтик маскарад.

Партизаннэслöн командир внимательнöя кывзiс Петровлiсь доклад и юалiс:

— Ноко, голубчик, висьтав, кытшöм кадö назначитöм казнь?

— Москва сьöртi 18-00.

— Кыдз тiянлö кад, лöсялö удачнöй операция понда?

— Югыт эшö. Фашисттэз эта коста содтöны ни туйез вылын и объекттэз дынö охрана.

— Кин руководитö казньöн?

— Гестапоись офицер.

— Кытшöмкö пö виль казнитан метод лöсьöтчöны керны? Кин сэтшöм сведеннёэз сетiс?

— Сiя жö. Миян морт.

— Кытöн пондасö казнитны?

— Городсянь дасквать километр ылына. Вöрок шöрын, сэтчин эм неыджыт кушин.

— Тэрмасьö, одзжык фашисттэзся сэтчин колö шедны.

— И эта йылiсь думайтiм. Миян кык морт тöнсянь ни сэтчин пукалöны.

— А если вежасö места?

— Ми бура тöдам — сэтчин. Муö гарйисö ни кытшöмкö сооруженнё, крест вылö вачкисьö.

— Кыдз пондат бертны отрядö?

— И этö видзöтiм.

— А оз туй гусявны пленнöйöс подвалiсь?

— Ыджыт охрана, ёрт командир. Чуть ошибка и городiсь быдöс гарнизон лэбтасö. Боеццезöс öштам и след колям.

— Но дак ладно, действуйтö.

— Ми готовöсь. Операция лоас сьöкыт. Быдлаын патрулируйтöны фашисттэз. Сьöкытжык лоас бöр бертны.

— Менам медбöрья тэ дынö вопрос, — горöтчис командир,— кин пондас руководитны операцияöн? Лейтенант Зубов?

— Ме ачым.

— Оз туй, — строгöя висьталiс командир. — Тэ сайын быдса разведотряд.

— Только меным позьö. Эта операция не сы характер сьöртi. Эстöн колö точность, и эшö точность, и — видзчисьтöг. Зубовлöн мöдiк масштаббез.

— Ладно. Вежöртi. Только асьтö и отирсö берегит. Действуйтö, кадыс кольччис етша.

Старшöй лейтенант Петров петiс командир землянкаись. Сiя öктiс разведчиккезöс, кöдна мунасö операция вылö, и пондiсö лöсьöтчыны туйö. Нiя пасьтасисö немецкöй обмундированнёö, бура-бытшöма видзöтiсö öтамöдныс вылö, и мый эшö колiс операция понда, сiдзжö лöсьöтiсö тщательнöя.

Кöр пондiс пемдыны, разведчиккез петiсö партизанскöй базаись.

Лологов кулöм не ловья куйлiс кöдзыт джодж вылын. Сiя эз вермы вöрзьöтны не киэз, не коккез — быдлаын доймис.

Сiя öктiс медбöрья вынсö, медбы немецкöй кыв вылын велöтны «интернационал». Думайтiс аслыс, что кулöм одзын эшö вермас сьывны этö гимнсö Тельман кыв вылын, сiдз кувны лоас кокнитжык. Только досада сiйö кутiс, что етша воюйтiс, етша вештiсис айыс понда, быдöс понда, мый керисö фашисттэзлöн ордаэз миян му вылын.

Лологов соралiс кад, кытшöм лун, кыным час. Дзуркнитiс подвалiсь ыбöс и сылiсь синнэсö вундыштiс электрическöй фонариклöн би. Сiйö петкöтiсö öтöрö и сюйыштiсö легковöй машинаö.

Машина чулалiс контрольнöй пункт и гöнитiс ыджыт скоростьöн. Городок сайын сiя чеччалiс нето ямаэз кузя, нето кочкаэз вылöт.

Лологов только öнi казялiс, что сыкöт ордчöн пукалöны автоматтэзöн немеццез. Шофёркöт пукалiс унтер-офицер.

Гöнитiсö джын часся унажык ни. Мыйкö дырна кежö сувтчывлiсö и бöра пондiсö гöнитны.

Лологовлö лоис охота дразнитны фашисттэзöс, сiя вынсьöтчис и немеццез кыв вылын горöтчис: «Господин унтер-офицер, тiянлö не жаль бензиныс? Сiя жö тiян государствоын оз керсьы и етша, медбы сы ылына кыскавны рядовöй солдатöс. Эмöсь местаэз матынжыкöсь. Мый тiянлö висьталас фюрерныт этатшöм бесхозяйственность понда?»

Унтер-офицер бергöтчис мышкланяс и, шысеттöг, мымда вын, сöтiс нöш кодь кулакнас Лологов пиннез кузя, и сы öмись пондiс рудзавны шоныт, солакодь вир.

Локтiсö вöрокö. Вöр шöрын неыджыт кушин. Сы шöрын сулалö пуись сувтöтöм ыджыт крест.

Лологовöс кыскисö машинаись. Киэсö мездöтiсö наручниккезiсь. Вайöтiсö крест дынö. Вывтсис косялiсö нательнöй йöрнöс. Кульыштiсö вешьян и нач пасьтöмö сувтöтiсö крест бердö. Паськöтiсö киэсö и домалiсö крест поперечина бердö. Кöрталiсö коккесö. Öнi сiя вачкисис мученик Христос вылö. Öтiк фашист юалiс, колö ли кöртавны пленнöйлiсь синнэсö? Сылö висьталiсö, оз пö ков, ась пö видзöтö, кыдз вермахтлöн доблестнöй солдаттэз ен сьöртi обращайтчöны советтэзлöн фанатиккезкöт, и мед висьтасьö мöдöр светас эта йылiсь аслас ёрттэзлö, и кузьöна ваксьыштiс.

Лологовлöн кыдз бытьтö веммезыс нач косьмисö, шея вылын öшалö не юр, а пустöй гырнич и гудитö, и гудитö. Тырппез потласьöмась. Пиннезiсь сöдзис вир. Лологов эз ни вынсяв сьöвзьыны вирсö и сiя визывтiс öмугöввезöттяс. Но сылöн юрас невна кежö югдыштiс, боец сёян синнэзöн видзöтiс фашисттэз вылö и горöтчис: «Кончайтö чожажык, вирьюиссез», — но сылöн вöрисö только тырппезыс, а шыэз öмись эз петö.

Локтiс эшö öтiк машина. Сэтчинiсь петiсö Лологовлöн палаччез: гестаповец, абверись капитан, тöдтöм офицер и солдат. Гестаповец сибöтчис одзжык локтöм солдаттэз дынö и горöтчис: «Но кыдз, готовöсь? Эй, ефрейтор, вай татчö чачаэсö!»

Ефрейтор котöртiс машина дынö, кыскис салонiсь чемодан и сувтöтiс гестаповец одзö. Офицер осьтiс чемодан и кыскис сэтчинiсь пистолеттэз.

Солдаттэзöс вашöтiсö. Нылö тшöктiсö ылöжык сувтны охранаö.

Куим офицер сувтiсö рядöн. Гестаповец быдыслö сетiс пистолеттэз и висьталiс: «Господа, условиеэз тi тöдатö ни. Расстояннё цель дынöдз дасвит оськöв. Инмöтчыны кымöс вылö. Кин оз инмы, играись петö, сетö лыйны мöдiклö. Медодз понда ме, сiдз кыдз выигрыш усис ме вылö».

Лологов сырлёльсялiс. Сiя эз ни кыв ассис телосö. Вынсьöтчис осьтны синнэсö, но синлоппес бöр лэдзчисисö.

Гестаповец лэбтiс пистолет, коккесö паськöтiс, пондiс метитчыны кымöсö. И только мöдiс лэдзны курок, кыдз вдруг сылöн öмыс нёштöма пиньöвтчис, синнэзыс бугыльтчисö, турйöвтiс, öтiк коксö вылына лэбтiс и берездасис гатш. Гестаповец сивилён вылын тыдалiс пурт ороп. Сэк жö фашисттэзлöн öтiк солдат нёштöма горöтiс: «Партизан, партизан!» — да кинитчис вöрланьö и коккез вывсис пöрис.

Быдлаын кылiс лыйсьöм. А капитан повзьöмсянь бергалiс öтiк местаас и лыйлiс кытчö шедас, и тожö пöрис.

Быдöс кыссис джын часся не унажык. Ыбок вылын öтнас сулалiс крест, кöда вылын гижöма кыв «Наташа». Крест гöгöр валяйтчисö Лологовлöн палаччез.

Лологовлöн бертiс садьыс. Сылöн оссисö синнэз. Ачыс эшö нем эз вежöрт, öмись чепöссисö слабöй шыэз: «Юны, юны!»

Сы синнэз одзын бус кодь туман пытшкын вуджöртчис морт. Морт лэбтiс подушка вылiсь Лологовлiсь юрсö и солдатскöй кружкаись сы öмö жагöника кисьтiс ва. Боец жаднöя, гырись гульккезöн ньылалiс чöскыт, ловзьöтан ва.

Лологовлöн югдыштiс юрас. Сiя адззис волькöттöм, некыз пуэзiсь потолок. Видзöтiс öтмöдöрö: стенаэз сэтшöмöсь жö. Сы бокын эшö сулалöны вевттьöм чорыт сера одеялоэзöн кык топчан. Сiя вынсьöтчис вежöртны, кытöн сiя. Кыдз сiя татчö шедiс? Юрö нем вежöртанаыс эз пыр, и бöра нето сознаннёыс öшис, нето онмöссис. Чожа бöра саймис. Синнэз одзись бус öшис. Только кикоксис чуннес зубыта доймисö. Öтöрсянь пеллезöдз локтiс сёрни тöдса кыв вылын и сылö этасянь лоис долытжык. Дзарнитiс сылань, кысянь пырис югöр. Учöтик баняын кодь öшынок одзын пукалiс сера платьеа нето нывка, нето инька. Лологов сьöкыт юрсö лэбтыштiс и горöтчис:

— Кытöн ме?

Öшын одзын пукалiсь бергöтчис, югнитiс чочком пиннезнас и юалiс:

— Ловзин? Но, молодец!

— Ме юала, кытöн ме? — чорытамоз бы горöтчис Лологов, но öмись петiсö только гусьöник шыэз.

— Гортын, партизаннэз дынын, — ласковöя горöтчис инька.— Öнi ме тэнö верда, юктала, а сыбöрын лекарствоэз сета и тэ пондан вочмыны. Сувтöтам тэнö кок вылö, и эшö уна воюйтан. Ме партизанскöй отрядiсь фельдшер.

Лологовлö чарньöлöн пырис югыт гаж.

«Ме асланым отир коласын... Партизаннэз дынын!» — Лологов синнэзiсь гажувья быгыльтчисö синваэз и, медбы эз адззыв фельдшер, бергöтчис мышкнас.

Лологов мöдiс чеччыны топчан вылiсь, но фельдшер эз тшöкты: кöр пö вынсялан, сэк вöлись.

Мöдiк лунö Лологовлö лоис долытжык. Сiя вынсьöтчис, старайтчис вежöртны, кыдз сiя татчö шедiс.

Неделя бöртi Лологов сувтiс коккез вылас. Сетiсö сылö партизанскöй обмундированнё.

Лологовöс нуöтiсö партизаннэзлöн командир землянкаö. Ыджыт мыгöра, дзор юрсиэза, сiя совсем эз вачкись командир вылö. Сiя видзöтiс боецöс юрсянь кок увтöдз и горöтчис:

— Ловзин? Но дак висьтась, кыдз воюйтiн, мый керин. Висьтав первöйся лунсянь жö, кыдз мунiн фронт вылö.

Лологов быдöс висьтасис ас йывсис командирлö.

Командир юалiс Лологовлiсь, кытчö воштiсисö операция бöрын группаись остальнöй боеццез. Лологов висьталiс, натьтö пö, рознитчисö вöрö, а сiя сэсся некинöс эз пантав.

Командир тшöктiс корны кытшöмкö Петровöс.

Землянкаö перыта, шумöн, кыдз тöвчикöн пырис том морт. Сiя сибöтчис командир дынö, жвангис сапог каблуккезнас и устав сьöртi сетiс рапорт: «Старшöй лейтенант Петров локтiс тiян приказ сьöртi». Сiя чожа бергöтчис Лологовлань, гажöна серöмтчис и горöтчис: «Миян полкын содiс».

Командир Лологовлö мыччалiс старшöй лейтенантлань и висьталiс:

— Тöдсась — эта тэнат спаситель. И эшö тöдсасян не öтiк партизанкöт, кöдна керисö быдöс, медбы тэнö мездыны фашист киэз увтiсь. — Сэтöн жö юалiс Петровлiсь:

— А кытöн талун Лида?

— Отрядын.

— Мый керö?

— Партизаннэзлiсь паськöм вочö.

— Кытсалö татчö.

Командир эз ешты керны чигарка «козья ножка», землянкаö пырис неыджыт, гöгрöс чужöма нывка. Сiя не устав сьöртi ыбöс дынсянь горöтчис:

— Корит?

— Кори. Тöдсась. Тэнат спаситель. Лологов Пётр Егорович. Нывка кисö нюжöтiс Лологовлö, крепыта няпыртiс сылiсь чуннесö и зэгйис.

— Вот тэ кытшöм вöлöмат!

Лологов вежöртiс, что эта и эм радистка, кöдалö сетiс кад мезмыны фашисттэз киись, а ачыс шедiс. Командир эшö висьталiс:

— Эта учöтик нывка — отрядын öддьöн дона и колана морт, и тэ, кыдз советскöй боец, правильно керин, что эн сет сiйö кутны фашисттэзлö. А сiя отсалiс фашисттэз киэзiсь мездыны тэнö. Вот сiдз. Сыбöрын вежöртан быдöс. Ме, партизанскöй отрядiсь командир, тэныт объявляйта благодарность аскадö правильнöй решеннё примитöм понда, фашисттэз ки увтын мужественнöя видзсьöм понда. А сiдзжö ыстам командованнёлö награда вылö бумага фашисттэзлiсь база уничтожитöмын участвуйтöм понда.

Лологов устав сьöртi горöтчис:

— Служита Советскöй Союзлö!

Командир недыр ветлöтiс одзлань-бöрлань землянка джодж кузя, дзарнитiс Петров вылö, сыбöрын локтiс Лологов одзö и юалiс:

— Лологов, тэнат нерввез озö орö?

— Старайтча, командир, медбы эз орö. Эта бöрсянь, мый ме терпитi, нiя стальнöйöсь лоисö.

— Видзöтам. — Петровлö висьталiс: — Вайöтö татчö. Лологов думайтiс, мый эшö командир сылö лöсьöтiс? Кинöс мöдö вайöтны?

Землянкаись оссис ыбöс. Осьта ыбöсын мыччисис немецкöй мундира офицер. Кöр сiя пырис совсем, Лологов казялiс ассис мучительöс, капитанöс. Этасянь перво сылöн нельки синнэзас пемдiс, сыбöрын синнэс гöгрöссялiсö и сотiсö немецöс. Капитан тожö казялiс Лологовöс, и сiя дзирыт синнэз увтын чукыртчис, кусiньтчис и синнэсö лэдзис увлань.

Командир öвтыштiс кинас немецлань — вашöтö пö. Фашистöс нуöтiсö.

— Вот кыдз, мучитель тэнат ловья. Только голяыс ранитöм. А сведеннёэс сылöн донаöсь, — кыдз бытьтö аслыс горöтчис командир. — Но, талун кежö тырмас. Лечитчы и шоччись, Лологов.

Кынымкö лун бöртi сылöн эшö вöлi гажа пантасьöм.

Операция бöрын бертiс партизаннэз базаö Михаил Шевляков, смев боец, группаись подрывник, кöда öтлаын Лологовкöт ветлiс тыртны заданнё враггез тылын. Сiя висьтасис, что кытшöмкö чудо сылö отсалiс, ештiс пышшыны фашисттэз ныр увтiсь, сыбöрын куим неделя шатласис вöррезын и шедiс партизаннэз дынö.

Лологов веськалiс. Сылöн содiс вын, ловзисö и чорзисö мускуллэзыс. Партизанскöй отрядлöн командир юöртiс штабö, кöда ыстiс группасö уничтожитны фашисттэзлiсь база, что кык боец бертiсö сы отрядö. Командованнё висьталiс, ась пö кольччöны партизаннэз дын особöй распоряженнё вотöдз.

Распоряженнё эз лок. Но вовлiс Особöй отделiсь капитан. Сiя юасис Лологовлiсь, кытöн сiя чужис, быдмис, кин аймамыс, киннэз родняэз, кыдз лоис разведчикöн, кысянь тöдö немецкöй кыв, кыдз шедiс пленö, мый йылiсь допроссэз вылын юасисö немеццез. Эта пантасьöмсянь Пётр Лологов сьöлöмö мöртчис жель ― сылö озö веритö!

Пётр кольччис партизанскöй отрядö. Воюйтiс. Унаись ветлiс быдкодь заданнёэз вылö. Неöтпыр сiйö караулитiс смерть, но кольччис ловья.

Кöр советскöй войскоэз пондöтiсö ыджыт наступленнё, партизаннэзлöн отряд йитсис регулярнöй армиякöт. Эстöн Лологов командуйтiс неыджыт разведгруппаöн.

Öтпыр, заданнё вывсянь бертiкö, Лологовöс ранитiсö. Эта ответственнöй операция понда Лологовöс наградитiсö орденöн.

А öнi Лологов лечитö ранаэсö госпиталлезын.

1994