Орсöтаннэз горадзуль Сизим картинаа драма

ОРСIССЕЗ

ТАИСЬЯ — шöрöт школа бöрсянь том кукань вöдитiсь

ДАРЬЯ СЕМЁНОВНА — сылöн мам

ГАЛИНА — Таисьялöн подруга

НИКОЛАЙ ПОРСЕВ — Таисья сьöрын вöтлiсись тöдса зонка

СВЕТЛАНА ВАСИЛЬЕВНА — зоотехник

ЯКОВ ТЕРЕНТЬЕВИЧ — колхозiсь председатель

МАРИЯ ВЛАСОВНА — сылöн инь

СТЕПАН ВАСИЛЬЕВИЧ — парткомись секретарь

ПРОКОПИЙ ЕГОРОВИЧ — бригадир

ИВАН ФРОЛОВИЧ — фермаись заведующöй

СИЛАНТИЙ — правленнёись сторож

ФЕРМАИСЬ МÖС ВЫСЬТIСИССЕЗ

Действие мунö восьмидесятöй годдэзö

Медодзза картина

Тулысся рыт. Деревенскöй улица. Керку. Посöдз. Öшын увтас скамья. Сы дынö жагвыв сибöтчöны ТАИСЬЯ да ГАЛИНА, негорöн, проникновеннöя сьылöны.

Горадзуль тэ менам, горадзуль.

Томся кадлöн гажöтана цвет.

Горадзуль тэ менам, горадзуль,

Мый жö паныт, мый жö паныт,

Ох, мый жö паныт шы он сет?

Пуксьöны ордчöн скамья вылö, сьылöны одзлань.

Мый жö паныт, мый жö паныт. Ох...

Оссьö öшын, мыччисьö Таисьялöн мамыс.

ДАРЬЯ СЕМЁНОВНА. Тi, горадзуллез, водат, одö талун узьнытö?

Нывкаэз лöньсьöны, чатыртчöмöн бергöтчöны öшын ладорö.

ГАЛИНА. Огö, Дарья тётка. Оз талун миянöс узьöт.

ТАИСЬЯ. Ештам эшö узьнытö. Ашын не школаö, не уроккез вылö.

ДАРЬЯ СЕМЁНОВНА. Видзöт тэ нiя кытшöмöсь. Мезмöмась школасиныс, дак и узьöтны ни абу пондöм.

Öшыныс жагвыв пöднассьö.

ГАЛИНА. А былись эд, кывзы жö, Тайка. Ашынсянь и школаö ни мунны оз ков. Кыдз жö сiдз, а?

ТАИСЬЯ. А сiдз вот... велöтчиссис. Тöдан, он, мый дырна ми этö кадсö видзчисим? И вот сiя... локтiс. Талунсянь школаыс бöрын ни. А миянлö-ö-ö... кинлö кытчö туй. (Чатыртчö, вывлань киэсö нюжöтöмöн.) Позьö нельки этна звездаэз дынöдз. Вежöртан, он, Галка?(Сывьялö öт кинас подругасö.) Бур эд, а? Бу-у-ур!(Гажöна ловзисьö ыш, мечтайтöмöн.) Вот бы вермыны мыйкö вöвлытöмö керны...

ГАЛИНА. Кинлö кытчö туй, шуан, Тайка? А мыля нö ме сiйö ас понда некöдöрись ог адззы? Дас год сьöрна велöтчи, а мый бердö кутчисьны — ог тöд. Эта жö, кывзы, смех. Неужто меным школаыс сiдз нем и эз сет?

ТАИСЬЯ. Галка! Да тэ мый? Кыдз тэ лысьтан сiдз школаыс йылiсь баитны?

ГАЛИНА. А мый, шуан, не сiдз я мый я?

ТАИСЬЯ. А вот и не. Не сiдз!

ГАЛИНА (перыта сувтö паныт). А вот и сiдз. Школаас велöтчытöн невестаö пöри, а öнöдз некытшöм специальность абу.

ТАИСЬЯ. Дак тэнат жö киат аттестат.

ГАЛИНА. Но и мый? Кытшöм сыись прок, аттестатсис? Сiя жö не диплом.

ТАИСЬЯ (нюжвылика, нерöмöн моз). Ах, во-о-от инö-ö мы-ы-ый. Тэныт эшö и дипло-о-ом пондöм ковсьыны?

ГАЛИНА (юрнас öтмöдöрö чукыльтыштöмöн). Но, а кыдз нö тэ эшö думайтан. Кинлö ме дипломыстöг понда ковны?

ТАИСЬЯ. Сэк мун одзлань велöтчыны.

ГАЛИНА (юрнас öвтыштöмöн бергöтчö мöдöрö). Мöда тай вöлi. Мыдзи ни ме эта велöтчöмсянь. Мыла бырис одзлань велöтчынытö.

ТАИСЬЯ. Полан, батi, что сы увья и жöник сайö петны он ешты?

ГАЛИНА (бергöтчö папыт). А мый тэ, Тайка, думайтан? Вермас и сiдз шогмыны. Вот понда ме, шуам, одзлань велöтчыны, а сы коста ме годся зонкаэс быдöнныс и гöтрасясö. Кытчö ме сэк аслам дипломöн понда воштiсьны?

ТАИСЬЯ. Сэк мун уджавны.

ГАЛИНА. Кытчö?

ТАИСЬЯ. Да кöть кытчö. Верман колхозö, верман кытчöкö производство вылö.

ГАЛИНА. Шöрöт образованнёнас? Эг на тай мöдлы. Сы понда разь ме дас год сьöрна школьнöй скамьясö нырыштi?

ТАИСЬЯ. Сэк пет жöник сайö. Ваяв унажык кагаэз и пондан пукавны гортын.

ГАЛИНА (обидитчöмöн моз). Не сiйö тэныт, Тайка, шуöны. Вежöртан, ме бы и уджалi,.. но не колхозын сэтчин или производство вылын, а... кытшöмкö шонытжык местаын.

ТАИСЬЯ (нюжвылика). Ах, во-о-от мы-ы-ый?(Гогинялыштö юрнас.)

Эта коста кытöнкö неылын пондö кывны гармоння вылын орсöм. Мыччисьö ПОРСЕВ.

ПОРСЕВ (сьылö). Сера кай, гора кай, басöка горалö. Зонка ойбытöн ветлöтö, нывкаэз нёджжалö.(Сибöтчö, сувтö нывкаэслö паныт.) Дак вот тi, гулюэз менам, кытöн и ургат. Эг и казяв, кöд коста быдöнныс дынiсь янсöтчöмась.

ТАИСЬЯ. Кöр тэныт вöлi сымдасö казявнытö. Тэ эд талун и ассит кокнырретö ни он адззы.

ПОРСЕВ (паськöтыштö öтмöдöрö киэсö, гажвевйöн). Эшö бы... Выпускнöй рыт чулалiс. Школаö туй кресталöм. Не урок, не звонок сэсся абу нем. Оз кö тырмы одзлань прок — эн жугды юр вем.

ГАЛИНА (гажöн да дивуйтчöмöн). Видзöт тэ, мый миян Порсевным талун керö. Нельки стиххезöн баитны пондöм. Одзжык сымдасö мыйкö ми тэ сьöрын эг казявлö.

ПОРСЕВ. Дак то одзжык. Одзжык сымдаыс вылö образованнё эз тырмы.

ТАИСЬЯ. А öнi тырмö?

ПОРСЕВ. Öнi басни абу. Эшö бы... Öнi менам карманын гербовöй документ. (Тюкöтöв-керö чуньнас моросiсь карман весьтö.)

ГАЛИНА. Кытчö-кöдöрö бы тэныт эта гербовöй документыс туйсö осьтас?

ПОРСЕВ. Да кöть кытчö. Кыдз баитсьö: кытчö син видзöтö, сэтчин кок нуöтö. Вот сiдз вот, öмидз туссез.

ТАИСЬЯ. А сё жö, Порсев?

ПОРСЕВ. Сё жö, шуат? Э-э-э... (Чатыртчöмöн видзöтöв-керö вывлань, сылань жö тшöканас мыччалöмöн.) Думайтла вот Венера вылöдз шедлыны. Ух!(Киэзнас вывлань öвтыштöмöн, чеччöвтышт-керö местаас.) Некин эд, кывсьö, öнöдз сы вылын абу вöвлöм.

ГАЛИНА (оча ки долонь горöн шовкöтöмöн). Ура-а! Эшö öтiк космонавтöн унажык лоас!

ПОРСЕВ. Напарникыс вот дзир некин кытчöдз абу. Öтнамлö, натьтö, гажтöмöв лоас туй вылас. Ылын жö эд сы дынöдз, висьталöны. (Таисьялö.) Лэбзям, батi, öтлаын?

ТАИСЬЯ. Мöдiккöт бы кинкöт, а тэкöт... (Думайтöв-керö ас кежас, öвтыштö öтмöдöрö юрнас.)... ог лысьт.

ПОРСЕВ. Мыйись полан?

ГАЛИНА (пильснитö-серöмтчö ас кежас, одзасьöмöн). А сыись, натьтö, что мöдöрö кытчöкö Венераыс местö нуöтан. Сiдз эд, Тайка?

ТАИСЬЯ. Да. Ылööв мöдан лэбзьыны. Пола — туй вылас сунавны пондан да ордсö кытчöкö лэбзян. Не мусö ассиным, не Венерасö эта бöрсянь не адззывны лоас.

ПОРСЕВ (кинас öвтыштöмöн). Тожö меным адззисьöмась! Вот тiянкöт и баитчыны! Вот и кер подвиггесö!(Гогинялыштö юрнас.) Мый нö сэк мöдан керны?

ГАЛИНА (дзик саймöмпонсянь, кватитчöмöн). Да, Тайка, висьтав, ноко, кытчö ачыт думайтан?

ТАИСЬЯ. А меным и думайтны нем. Важын ни быдöс думайтöм. Ме тiянлö унаись ни висьтавлi, что муна фермаö, мамö местö.

ГАЛИНА. Да тырмас тэныт, Тайка, шутитнытö. Ми эд былись тэнчит юалам.

ТАИСЬЯ (лöня, но серьёзнöя). Кытшöм эшö шутитöм? Ме былись тiянлö и висьтала — муна фермаö, куканнез дынö. Эта йылiсь ме и зоотехникыскöт талун баитчи ни.

ГАЛИНА (дзик повзьöмувья вешшыштö Таисья бердiсь, бергöтчö сылö паныт, дивуйтчöмöн). Былись, шуан, Тайка? Да? Тэ мый этö сымдасö? Да тэ кöть думайтан жö, он, мый баитан? Мамыт местö? Фермаö? Шöрöт образованнёнат? Золотöй медальнат?.. Кинсянь, кинсянь бы сымдасö кывнытö, но тэсянь...(Öвтыштö öтмöдöрö юрнас.) Не, не и не. Да эта жö смех! Вежöртан тэ, он сымдасö? Эд тэ вылын жö отирыс серавны пондасö.

ТАИСЬЯ. Но и ась сералöны, кинлöн серöмыс петас. Пöтасö — дугдасö.

ПОРСЕВ (оськöв кыным ылына кежö бокö скамейка бердiсь, Таисья ладорö юрнас öвтыштöмöн). Бöбмöм нывкаыт выпускнöй рытыс бöрсянь.(Чуньнас аслас кöсича бердын бергöтыштлöмöн.) Шариккес, тыдалö, абу пондöмась тырмыны.

ГАЛИНА. Да эта нö мый ни сэтшöмыс чочком свет вылас керсьö? (Перыта сувтö, бергöтчö öшын ладорö, горöн.) Дарья тётка-а! Дарья тётка, мыся! Петав жö татчö!

Вились оссьö öшын, мыччисьö Таисьялöн мамыс

ДАРЬЯ СЕМЁНОВНА (онувья, повзьöмсорöн). Мый сэтшöмыс лоис?

ГАЛИНА (оськöвтö матöжык осьта öшын ладорö). Кывзы жö, Дарья тётка, мый Тайкаыс баитö.

ДАРЬЯ СЕМЁНОВНА. Мый сэтшöмсö?

ГАЛИНА. Фермаö шöрöт образованнёнас уджавнытö лöсьöтчö.

ДАРЬЯ СЕМЁНОВНА. Кывзö тi сылiсь ладтöм баснисö — фермаö лöсьöтчас.

ТАИСЬЯ. И некытшöм не ладтöм басни. Ме былись висьталi.

ДАРЬЯ СЕМЁНОВНА (нылыслö). Эн жö ышты. Мый öшин я мый я баснисит? Дугды менö ой кежас грекас пыртнытö. Пыр да вод узьны. А то пета вот часöт, дак ме тэныт мыччала пермасö.(Öшыныс пöднассьö бöр, Таисьялöн мамыс саясьö. Пауза.)

ГАЛИНА (гажöн да перыта чывкнитö-сибöтчö бöр скамейка дынö, пуксьö ордчöн Таисьякöт). Кылiн вот, мый тэныт мамыт висьталiс?

ТАИСЬЯ. Кылi, конешно. Но и ась. А ме тiянлö висьталi, что муна фермаö, и муна, вот адззылат.

ПОРСЕВ (перыта оськöвтö матöжык нывкаэс дынö). Но мый тэ, кывзы жö, эта фермаись бурсö адззöмыт? Тэнö жö кöть кытшöм институтö экзаментöг примитасö.

ТАИСЬЯ. Ме ог и шу, что озö. А уджавны кö меным охота?

ГАЛИНА. Дак фермаас разь дзир уджыс? Позьö кытчöкö и мöдiклаö уджавнытö...

ТАИСЬЯ. А меным вот фермаын гленитчö, куканнез дынын...

ГАЛИНА. Адззöмыт тожö меным гленитчан тор. Висьтав эшö, что сiя тэнат мечта.

ТАИСЬЯ. А мыля бы и не? Оз разь вермы ферманскöй уджыс мечтанас лонытö?

ПОРСЕВ (ас кежас). Висьталi эд ме, что шариккес юрас оз тырмö. Сiдз сiя и эм.(Горöн, Таисьялö.) Да тэнö сэтчин мечтатöг юрöн и кокöн примитасö.

ГАЛИНА. Да! А сюран сэтчин, дак кодя ойлунсö сэсся он ни адззыв. Нять пытшксис некöр он ни петав. Сiдз сэтчин, сирпöртъяс, быдсöн том кадыт и чулалас. Думайтышт жö юрокнат, мый керан, кытчö тэ сiйö пелитан.

ТАИСЬЯ. Но и ась. Ась чулалö! Мый тi менö сiйöн повзьöтлат? Кадсö чулöтны кытöнкö сё ни колö. Весь бы дзир эз чулав. А гажа олансö да шоныт местаэсö кинкö моз кошшыны ог думайт. (Бергöтчö мöдöрö.)

ГАЛИНА (обидитчöмöн). Но и мун! Казялан бöртiжык, да некысь лоас босьтнытö. Сэк вöлись и пондан гырдззаэтö курччавны да юрситö нетшкыны.(Чеччö, обидитчöм увья чатыра юрöн вешшö бокö.)

ПОРСЕВ. Н-н-да-а. (Одз да бöр ветлöтöв-керö скамейка одзын, пуксьö, ас кежас думайтыштöм бöрсянь.) Кывзы жö, Тайка! Тайка, мыся?!

ТАИСЬЯ (лэбтыштö вывлань юрсö, сылань дзар кертöг). Но мый эшö? Ме кыла, баит.

ПОРСЕВ (бергöтчö Таисьялань, вешшыштö зэвжык, негорöн). Весь эд тэ быдöс этö, кывзы жö, весь. Вежöртан, он? Не сы понда дас год сьöрна школьнöй парта саяс пукалiм, мед эта бöрсянь ферманскöй нятьсö лойны. Неужто тэ эта фермася и буржык места ни аслыт он адззы?

ТАИСЬЯ. А меным сысся буржыкыс оз и ков.

ПОРСЕВ (негорöн). Жаль. Öддьöн нельки жаль. Гленитчан тэ меным, Тайка, вежöртан, он? Тöдны бы тэныт сымдасö, кыдз ме...

ТАИСЬЯ. Тöда. Не первуись висьталан. (Бергöтчö паныт.) Не сы увья я и тшöктан буржык местасö кошшыны? Полан, натьтö, что фермаас уджавтöн пода дукöн месянь пондас вачкыны?

ПОРСЕВ. Да не сыын делоыс. Думайтсис, öтлаын мекöт мунам.

ТАИСЬЯ (дивуйтчöмöн). Тэкöт? Кытчö жö бы?

ПОРСЕВ. Березникиö ме вонö дынö лöсьöтча.

ТАИСЬЯ. Сiдзкö, гортын тэныт не удж, не места оз адззисьö?

ПОРСЕВ. А-а. (Кинас öвтыштöмöн.) Кытшöм ни эстöн удж да места, запутымас. Нять да вöр. И петны кодя мортлö моз некытчö.(Ыш ловзисьöмöн.) Эх!(Пондö орсны,сьылö.)

Порсева, ой, Порсева да неыджыт деревняок —

Кык улича, куим керку, öтiк баня угöлок.

Шуöны, что эстöн гажтöм, гажтöм, ёрттэз, сiдз и эм.

Нюрся, вöрся, сьöд кымöрся гажöтаныс абу нем.

ТАИСЬЯ. А Березникиас? Сэтчин разь öддьöн гажа?

ПОРСЕВ. Березникиас, шуан? Да?.. Эшö бы... Сэтчин — не татöн. Городыс — город и эм. Гöгöр асфальт, некытöн и коктö он нятьöсьт. Ем уськöт, дак и сiйö адззан. И петнытö рытся кадö эм кытчö. Паркыс и стадионыс, дворецыс и кинотеатрыс — мый уж тэныт колö. Сэтчин и уджыс, кытшöм колö, адззисяс. Мунам, батi, сё жö öтлаын, а?

ТАИСЬЯ. Кывзы жö, Колька. Гортын, шуан, тэныт нять да гажтöм? Петнытö кодя мортлö моз некытчö? А не эта я запутымыс тэнö кок вылö сувтöтiс? Не сiя я тэныт шöрöт образованнёсö сетiс? А, ноко, висьтав, мый тэ сы понда бурсö горт деревнялö керин, мед нятьыс эстöн етшажык вöлi да петнытö лоис кытчö? Мед овнытö сэтöн вöлi бур да гажа. Батi, канава öтiкö гарйин? Тротуар нятинас вöвдiн? Или клубсö ас кинат тшупин-лэбтiн? (Пауза бöрсянь.) Тöдан жö кöть, он, кытшöм подвиггез йылiсь школаас велöтчытöн мечтайтiм? А öнi, кöр колана кадыс сибöтчис, деревенскöй нятьсис да ферманскöй уджсис повзим. Гажа да шоныт местаэз пондiм кошшыны? Сiдз я мый я?(Пауза бöрсянь.) А сэтчин... Березникиас, кытöн, шуан, сэтшöм бур да гажа. Сэтчин тэ кöть öтiк кöрттув дорин? Öтiк пу садитiн? Öтiк дворец строитiн?(Пауза.) Эд и сэтчин быдöс сiйö тэтöг керöмась. Не тэ юрöн да не тэ киэзöн. И уж, натьтö, не тэ понда. А тöдан жö кöть, он, кыдз тэ коддес йылiсь отирас баитöны? Ась пö и дворникöн, да дзир городын. И мыйлö только тiян кодьöмыс комсомольскöй билеттэсö кармананыс кыскалöны?(Порсев вылö кинас öвтыштöмöн.) Но и мун! Тэсянь эстöн унасö он ни видзчись.(Сувтö, зэркыта öвтыштö кинас Порсев ладорö, иньдöтчö поспуэс ладорö.) Мун и ов, кытöн тэ понда быдöс керöм-лöсьöтöм.(Поспуэс кузя вывлань кайтöн.) Тöд только, что ме тэкöт некытчö ог мун. Не öткодьöсь миян туйезным. Тэныт — ва ньылат, меным — ва паныт.(Сайöвтчö ыбöс коласын.)

Занавес