Глава XI

Саймис Таисья, дзик онувья, öтöрас ни, правленнё öшын увтас. Мый нывкалö медодз мыччассис да повзьöтiс, дак эта сiя, что правленнёас неважын лоöмыс йылiсь деревняись отирыс тöдöны ни. И кин бы да кыдз бы эз баит öнi сыкöт пантасьтöн, ас кежас быдыс ны коласiсь думайтiс: «Мый, мироння, брынгисö фермасис? Сымда и вöлöм прокыт уджалнытö? Нельки колкознöй куканнесö пастушитны он чайтчы. Батi, öшö невестаö эта бöрсянь пуксян?» или «Сiдз тэныт и колö. Уна эн тöд. Эн видз подул ултöдззат пиннетö. Эн эргись, кычан, моз, предыскöт. Том öшö кытчöдз ас киння пöрисьжыккесö велöтны». Охота лоис вöйны кытчöкö отир син одзись, мед только нем не кывны да некинöс не адззыны.

Мунны гортö веськыта деревня кузя Таисья öнi эз ни лысьт. Нывка кежис бокись улицаö, кöда петкöтiс деревня сайöдз. Эстöн Таисья вежöртiс, что тэрмасьнытö одзлань некытчö. Жаг оськöввез коста куканьвöдитiсь нёджжасьöв-керис ас гöгöр, но мый вылын бы позис сувтöтны син, эз адззы. Ытшкöм межа весьтын эз кыв малянкаэзлöн тöдса дзингöм да чож кöбывка-скрипаччезлöн гажöн дзуркöтöм-нярьясьöм. Эз тыдав быд рöма бабыввезлöн öтмöдöрö быркайтöм. Гöгöр вöлi ыркыт да лöнь, видзыс мыччассис мыдзöн да гажтöмöн.

Сэтшöм жö гажтöма панталiс нывкаöс и ыб, сiя ыбыс, кöдö Таисья учöтсянь велалiс лыддьыны ассис, кöда дынö быд коста кыскис сьöлöмыс. Вужсялöм, паськалöм да четверть кык сувдöн лэбтiсьöм осяэз, кöдна пондöмась ни пöрны гумö да бытшöма вевттьöмöсь мусö, сулалiсö лöня, вöрöтчытöг, кажитчис, мыйкö увья тöждiсö. Гажтöм вöлi и сысянь, что эз киссьы вылiсянь ыбшарлöн сьылöм. Ойвыв ладорсянь ыб весьтöт дыша да лажмыта кывтiсö сьöкыт руд кымöррез, кöдна бердсянь кадiсь кадö пожнассис-киссис поснит да тшöк зэр. Кок увтын муыс вöлi кöдзыт да ва — пуксьынытö эз позь. Нем эз сайöвт и зэр шогья. Дзир вель ылын межа пöлöн, вöр ладорас сулалiс öткаса, пöрись да лапья кöз. И сiдз кыдз не гортö, не удж вылö, куканнес дынö, нывкаöс эз кыскы, межаыс пöлöн сiя и иньдöтчис.

Неважынся обидаыс сотчыны сы пытшкын быдсöн эз на ешты. Сiя, кыдз баня чад, сё эшö чадитiс юрвем, сьöкыт изöн нырыштiс сьöлöм вылö. И öтiк вопрос: «Мый понда?» — öтлаын сьöктамöм виркöт, кыдз поткöтчан нöш, дугдывтöг вартiс кöсичаэз кузя. Но мымда бы нывка эз жугды эта вылын юр, ответсö сувтöм вопрос вылö сiдз и эз адззы. Этасянь сы пытшкын зорамöм обидаыс не эз чин, не эз кус. Сiя жаралiс да вынсялiс эшö öддьöнжык. Сьöкыт да гажтöм думаэз коласын Таисья сибöтчис öткаса пу весьтöдз, кежис сы увтö. Лажмыта öшалан уввез увтын адззисис непаськыт кöс места, кытчö эз сидз зэр, позис пуксьыны.

«...Фермаö мунан? Мамыт местö? Шöрöт образованнёнат? Золотöй медальнат? Да эта жö смех! Эд тэ вылын не только отирыс, деревенскöй курöггес серавны пондасö». Этö Галина висьталiс сэк, кöр Таисья юöртiс ёрттэслö аслас решеннё йылiсь. Сэк и Порсевыс содтiс: «Бöбмöм нывкаыт выпускнöй рыт бöрсяняс. Шариккес, тыдалö, мымдакö абу пондöмась тырмыны». Но кин да мый бы сэк Таисьялö эз висьтав, кыдз эз падты да эз полöт фермаись уджöн, йöзыслiсь баснисö нывка эз ни кывзы. Решеннё вöлi примитöм, и бöрйöм туй вывсис ёрттэслöн падтöмыс эз кежöт. Кытшöм бы эз вöв сьöкыт керны медодзза оськöв, нывка адззис вын и керис ас мознас, öнöдз эшö эз вун тöдвылiсь и сiя недолытыс, кöда нач видзчисьтöг кутiс Таисьяöс медодзза лунас, баксiсь куканнез сьöрö шучкöп деревня пыр оськавтöн. Сэк сiя тожö полiс лэбтыны синнэз паныт шедiсь отир вылö. Нывка вöлi оськöв ылына сы дынсянь, мед бергöтчыны, вуджны канава сайö да сайöвтчыны куканнес дынiсь бöр гортö. Но и сэк ни сiя веритiс аслас уджлö, аслыс, адззис вын, мед вермыны пöдтыны ас пытшкын этö неколана недолытсö. И вöлись öнi, лоöмыс бöрсянь, кöр и Галиналöн, и Порсевлöн сэкся басниыс усис тöдвылö, Таисья ас кежас первуись думайтiс: «А бура я ме сэк кери, что нiйö эг кывзы? Колiс я сiдз? Не былись я баитiсö, что менам шариккес оз тырмö да курöггес серавны пондасö? Не сiдз я и петiс? Эд ась нiя и вежöртöны олансö ас мознаныс, не сiдз, кыдз ме, но эд нем нылö этасянь умöльжыкыс абу. Сiя жö му кузя ветлöны, сiйö жö паськöм новйöны, сiйö жö няньсö сёйöны, и олансö сiйö жö олöны, не висьтавны кö, что эшö буржыкö да кокнитжыкö, гажажыкö да долытжыкö. Эд и вöтiс кö, шуам, кинöс умöльыс, дак не нiйö, кöдна кокнитжык удж да долытжык олан кошшöны, а бöра жö менö. А мый понда? Что сьöкытжык бердö эг повзьы кутчисьны? Мöдiккезся буржыка да унажык мöдi керны? Кытöн нö сэк справедливостьыс? Или талун сiя некинлö оз ни ков? А сiдз кö, дак не буржык я и былись öвтыштны быдöс вылö киöн, бергöтчыны да мунны?» Но сэтöн жö Таисья кутiс асьсö сы вылын, что эз кö сiя ешты öвтыштны быдöс вылö одзжык, дак талун сымдасö оз ни ков. Бергöтны да мöдöтны куканнес дынiсь сiйö ештiсö одзжык. И кольччис кö эшö мый, дак дзир мунны, мунны не фермасис ни, а гортiсь, Порсевасис. Кольччыны эстöн удж вывсис вашöтöм бöрсянь и öтiк лун кежö эз позь. «Мунны, мунны», — кышасис нывкалöн думаыс эта кыв бердö. «А кытчö? Кöдöрö? Кыдз муннытö? Шогалiсь мамö дынiсь?» Мед вермыны мездiсьны эта неколана дума шогья, нывка зэркыта пыркöтöв-керис юрнас.

Мунöмыс йылiсь думакöт недыр мыйись Таисья и янсöтчис. А вот мый керны одзлань, эта вопрос вылö ответсö сiдз и эз адззы.

Сылö тöдвылас усис зоотехниккöт фермаын неважся сёрнитам, кöр Светлана быдöс коласын повтöг юöртiс Таисьялö и кулöм куканнез йылiсь. «Кватьдас куим юр, Таисья! Вежöртан тэ он сымдасö? Кватьдас куим юр ферма увтас упадьнас катша-ракаыс кокалiсö да деревенскöй поннэс вильöтiсö». Этна кыввес сэк топ печатайтсисö сы ылöсын, вель дыр кежö кольччисö тöдвылас, кыдз полöтан шогöт. Öнi нысянь картинаыс, кыдз горöн китшсьытöн-карзытöн да öтамöд коласын тышкасьтöн, нетшкöны-кокалöны катша-ракаыс упадьöн чапкöм кукань тушаэсö, Таисья син одзын сувтiс вились сэтшöм ятнöя, что нывка нельки повзис сiйö кылöм-адззöмсянь, чепöссис кок вылас.

Чожа мый Таисья сё жö вежöртiс, что быдöс эта öнi дзир кажитчö, но нельки сэк лöньсьыны бöр эз вермы. «Дак кыдз жö сiдз? Кыдз? Мыля? Мыля эта понда былись некинöс оз судитö? Мыля некинöс удж вывсис оз вашöтö? Мыля некинлiсь нельки оз и юалö, кыдз сiдз вермис лоны? А менö? Менö мый понда? Мый ме сэтшöм умöльсö колхозыслö кери? Менам разь кинкö кулiс? Вöйис? Кынмис? Джагалiс? Да эта жö... эта жö...» Борозда дорас сулавтöн Таисья мырсьöв-керис думанас, кыдз бы буржыка этö шуны. Но нем лöсяланаыс сы юрын эз адззись. «Сымдасö эд нельки кыввезöн висьтавны оз позь». — А невночка лöньсьыштöм бöрын одзлань: «Ась. Видзöта эшö, мый зоотехникыс висьталас. Не предыс сё жö, а сiя менö удж вылас сувтöтiс».

Кадыс сибöтчис павжунлань. Зэрнытö жагвыв дугдiс. Эшö неважын лажмыта кывтан кымöррес тöдчöмöн лэбтiсисö вывлань. Ны сайсянь шондiыс кытчöдз и эз на мыччись, но местаыс, кöда весьтын сiя öшалiс, тöдчис ни неыджыт гöгрöса дöмасöн. Öнi вöлись нывка жагвыв иньдöтчис бöр деревня ладорö.

Лажмыт да волькыт ытшкöмпод кузя оськавтöн Таисья поперегалiс ыб дорись межа, сибöтчис асланыс йöр дынö, кутчисьыштiс киэзнас шуравтöм эшö кöдзыт да нильыг вевдöрись потш бердö, сувтчыштiс кокнас шöрись потш вылö, мöднас кокнита вожмöвтiс мöдöрас, но повзьöмувья сьöлöмыс шурк-шарк мунöмсянь вуджны йöрсö эз ешты, öтiк вуджöтöм кокöн дзик кынмис местаас.

Гряддэс коласöт не тэрмасьöмöн сылань сибöтчис мамыс. Дарья Семёновна, тыдалö, дзир неважын ештöм локны гортö, сё эшö туйся паськöмын, кытшöвтiс карчйöр, видзöтiс нылыс киэзöн керöм удж вылö. Таисья увтын потшыс негорöн дзуркнитöмсянь сiя лэбтыштiс юрсö:

— Тайка, тэ?

— Ме тай. Здорово, мама! — и дивуйтчöмсö, и гажсö, и полöмсö öтлаö сорлалöмöн шыасис паныт нывка, сы коста жö, дзик нильдiс, лэдзчыштiс йöр мöдöрас, öтпыр-мöдöтпыр кузя оськöвтiс непаськыт межа пасьта джуджыта лэбтiсьöм турун коласöт, сибöтчис паныт, жмитчыштiс да öшöтчыштiс недырик кежö голя бердас.

— Гажтöмтчин я мый я?

— А то эг ли мый ли? Конешно, гажтöмтчи.

— Кысянь нö сэтчинсянь локтан?

— Ыб дорöдззас тай кежалi.

— Мый нö думайтан, межаэтö он ытшкы? Дöс эд туруныс чорзяс.

— Эг лысьты тай тэтöг. Мыйкö, мыся, эшö неладно керсяс. Важын ни, мама, локтiн?

— Локта вот. Керкуöдззас öшö эг на и пырал. Перво жö татчö кежи да. Йöрсис тэнö думайтi.

— Веськалiн жö кöть невночка? — Оськöв кыным ылына Таисья вешшыштiс бöр, видзöтöв-керис мамыс вылö, кыдз бытьтö этадз видзöтöмöн сорасьтöг позис адззыны да тöдны мамыс здоровье йылiсь.

— Ямисö тай то. И висьöмсö топ ог кыл. Да кин сiйö тöдö, мый дырна кежö. — А чöлыштöм бöртi одзлань: — Тэ мый ни эстöн метöг керлан? Бытшöма эд, видзöт жö, калег-капустаыс кутчисьöм. Ме мыйкö эг ни и надейтчы. А гряддэтö, отир смек, мый нö öнöдз он весöт? Дöс тай ёгтуруннас тырöмöсь. Подаоккет кöть лолъяöсь жö?

— Да ловьяöсь. А гряддэсö весöтны эг на ешты. Картовкасö тыртны öдва неважын кончитi.

— Уджалан я мый я кытöнкö?

Эта вопросыс Таисья понда вöлi видзчисьтöм. Нывка и тöдiс, что кöр-некöр эта йылiсь мамыс сё ни юалас. Но мый висьтавны паныт, нывка эз адззись. Сiя вешшыштiс ылöжык мамыс дынiсь, ыш ловзисис гусьöн-пöлöн ас кежас, бергöтчыштiс чужöмнас мöдöрö, лэдзис увлань синнэсö, пондiс думайтны, кыдз юöртны лоöмыс йылiсь. Сайöвтны мамыс шогья небытшöм юöрсö Таисья, вежöртана, и эз лöсьöтчы, но и висьтавны сы йылiсь вöлi недолыт, сьöкыт. Нывка одзлань ни тöдiс — видзчисьны сы понда бурсö нем.

— Мый нö шы он сет? — горöтчис недыр мыйись Дарья Семёновна, не öддьöн рам синнэзöн видзöтöв-керис нылыс ладорö. Этна кыввезын ни, кыдз нiя вöлiсö висьталöмöсь, перытжыка да чорытжыка, кылiс не только кытшöмкö паймыштöм, но и тöдчана лöг. — Неладно разь мый?

— Да, — шыасис Таисья, дзик кытшöмкö неколана тор вылö öвтыштiс кинас. — Эта йылiсь и баитны охота абу.

Дарья Семёновна сэсся эз шыась, сiя видзчисис. А Таисья думайтiс, кыдз кужны-вермыны юöртны быдöс йылiсь сiдз, мед не сэтшöм зубыта дойдны да не сы öддьöн лöгöтны мамсö. Но кыдз овлö сэтшöм кадö, нем коланаыс юрö эз пыр.

— Уджавлi талуння виöдз да талун предыс бöр фермасис откажитiс.

Фермаын уджалöм йылiсь юöрыс Дарья Семёновнаöс, вачкисис, немымда эз дивуйт. Позис нельки думайтны, что этö сiя важын ни тöдö. А вот медзубытыс йылiсь юалiс:

— Вашöтiс, шуан? Пермасис?.. Мыля вашöтiс?

— Кысь нö ме тöда? — Таисья гажтöма ловзисис, мыйкö дырна чöлыштöм бöртi, кыдз позис, бытшöмжыка, бытьтö велöтiсь одзын урок, пондöтiс: — Тэ дынö больницаас вовлöм бöрсянь ме ашынас жö заявленнё гижи тэ местö, куканнес дынö уджавнытö кутчиси...

— Пырам жö, ноко, керкуас, — орöтiс Дарья Семёновна нылыслiсь пондöтöм баснисö, бергöтчис, иньдöтчис гряддэс коласöт калитка ладорö. Таисьялö нем эз кольччы, кыдз кывзiсьны, керны, мый висьталiс мамыс, öшöтöм юрöн, чöлöмöн нывка иньдöтчис сы сьöрö. Керкуас пыртöдз Дарья Семёновна сэсся нем эз висьтав. Неважын миськалöм поспуэз кузя кайтöн сiя босьтiс ны вылiсь сьöрас вайöм сумка, кыскалiс коксис да колис порог дорас шурöтöм могись резиновöй сапоггез, ачыс осьтiс посöдз ыбöс, тэрмасьтöг да öтмöдöрö нёджжасьтöн, пырис керкуöдз. Порог дынсяняс ни Дарья Семёновна видзöтöв-керис омöн керку пасьта, — быдöс я эстöн сытöг ладно, — куш чулкиподдэс вылын оськöвтiс западня весьтöдз, жагвыв, кыдз бытьтö сэтчин мыйкö вермис жугавны, лэдзис кисой вывсис сумкасö. Эз вунöт Дарья Семёновна дзар керыштны перво жö и комись занавеска сайö. Но пырнытö сэтчин эз ни понды, оськöвтiс пызан бердöдз, кöда вылын сулалiс квасöн неыджыт эмалированнöй кастрюля. Кыкнан кинас вуггес бердö кутчисьöмöн Дарья Семёновна юис. А кöр сувтöтiс кастрюлясö бöр одзза местаас, пуксис пызан угöлö, нырыштчыштiс киэзнас лабич дорыш бердö, дзар керыштiс дженытика нылыс ладорö. «Висьтась, мый понда, кодя морт, пермасис предыс гöньдiс?»

Пондöтны Таисьялö небасöк юöр йылiсь баснисö сьöкыт вöлi эшö сэтчин, карчйöрас, пантасьöмныс бöрсянь. Пондöтны сiйö, дзугöмсö ни, мöдöтпырись вöлöм эшö сьöкытжык.

Мыйкö дырна нывка сулалöв-керис коккес вылын пызан мöдöрас, а бöртiжык сэтöн жö лэдзчисьыштiс лабич дорыш вылö, синнэсö лэбтывтöг, вились кутчис бöрйыны тöдвылас нiйö кыввесö, кöднöн буржык да кокнитжык вöлi бы висьтасьны одзлань.

— Пастучитi ме куканнесö кынымкö лун сьöрна пар йöрас, быд пельöсöт новйöтi... — пондöтiс Таисья, — ...и вежöртi, что сёйнытö нылö эстöн нач нем. Лунтыр видзан-вердан, а рытнас нiя гортö тшыгöсь бертöны. А сэтöн правленнёö заседаннё вылö корисö, пондiсö юасьны, кыдз уджассьö. Но и висьталi ме нылö веськыта быдöс йылiсь, кыдз эм. Лэбтiсис подакокувт понда споритöм.

Дзугны нылыслiсь баснисö Дарья Семёновна öнi эз ни тэрмась. Быдöс йылiсь, кыдз да мый лоис эта бöрсянь, Таисья висьтасис сувтчывтöг. А кöр нывка лöньсис, сэк вöлись мамыс и пондöтiс:

— Кин сьöрья-а-а, кин сьöрья тэ ме юр вылö сэтшöмыс шогмöмы-ы-ыт? Кутшöм тэныт дело, кутшöм печаль, кытöн нiя куканнезнысö видзöны да кыдз вердöны-ы? И кытöн öшö нiйö этася видзнытö, кыдз не пар йöрын? Дöс эд подаыс сэтчин олö. Веко-свой тай сiдз вöллi, сё пар йöрын видзлiсö. Да кыдз бы сэтчин эз вöл... Эд кутчисин кö тэ ачыт пермаас, дак кыдз да мый тшöктöны, сiдз и кер. Мыйлö тэныт ылöстöм юртö кытчö оз кол сюйнытö?

Тырппесö жагвыв курччавтöн нывка видзöтiс кок увтас, кадiсь кадö вирскышалiс нырнас, кывзiс. А мамыс одзлань эшö баитiс:

— Не ассит эд, колкознöйö подасö видзан. Кутшöм тэныт дело — тшыгöсь нiя али пöтöсь? Ме тай век пермасиныс эг петал, но кытчö оз кол, некор юр эг сюй. Кытöн тшöктiсö, сэтчин и видзи, мый вайисö, сiйöн и вердi, öтчид тай правленнёöдззаныс эг ветлы.

— И бура, думайтан, мама, керин?

— А тэныт я öшö, налязгалö, менö судитны — бура ли умöля? Кыдз бы эг кер, тэнö моз, куим лун бöртi, пермасис некин эз вашöт.

— А тшыгйöн кöбы куканнес кулiсö? Сэк мый?

— Но и ась чазьнитöны! Колкознöйыслöн юрыс абу дона! — А чöлыштöм бöртi: — И кулiсö. Эн думайт — эзö. Мымда ме дырни колкознöй подаыс усис — и лыддьыны оз туй. Öнi пермаэзаныс лолъяыс сымда оз öксьы, колö кö тэныт тöдны дак.

— А кыдз нö, мама, тэнö эз судитö?

— Мый понда öшö?

— А подаыс понда, сымда кö, висьталан, кулiс дак. Эта понда жö судитны вермисö.

— Колкознöйыс понда? — дивуйтчыштiс Дарья Семёновна. — Мый то тэ, ылöстöм, сымдасö и баитан. Да кин нö сы понда тэнö судитны пондас? Некинöс тай öтiкöс эз судитлö, нельки эз и штрапуйтлö. Быдöннысö колкознöйыс понда судитны, дак öння виöдз Порсева вылас и öтiк морт ни бы эз кольччы.

— Да-а, — дивуйтчöмсяняс нюжвылöн шыасис Таисья мамыс висьтасьöм вылö, гогинялыштiс юрнас, ловзисис зэв пыдына да сы вылын и лöньсис. Эта дженытик басни коста нывка казялiс ни, что быдöсын сыын, мыйын вöлi охота, мамыс сiйö эз вежöрт. Öтiк и сiя жö тор вылö нiя видзöтiсö ылын не öтмоз, и быдыс ны коласiсь правöн лыддис дзир асьсö. Эд мый бы Дарья Семёновна эз висьтав нылыслö колхознöй подасö видзöм йылiсь, согласитчыны сыкöт Таисья некыдз эз вермы, нельки эз и думайт. Первуись ас оланын нывка адззис мамсö нач не сэтшöмöн, кытшöмöн бы сылö колiс, кытшöмöн примитiс сiйö пыр учöтсянь да кытшöмлö веритiс öнöдз. И дзир талуння басниыс топ саймöтiс, осьтiс сылiсь синнэсö. Таисья вежöртiс, что сорасис, сорасис медматiсь мортын. И эта сорасьöмсянь обидаыс вöлi нельки ыджытжык да курытжык, ежели фермасис вашöтöм шогья.

Споритны колхознöй подасö видзöм-вердöм понда одзлань мама-ныла сэсся эз ни пондö. Нывка тöдiс — мымда бы нiя ас коласын эз споритö, некин оз вермы, быдыс ны коласiсь ас мознас кольччас правöн. И кöр Дарья Семёновна юалiс нылыслiсь, кытшöм чужöмöн сiя мöдö мыччисьны отир син одзö, мöдыс, лöгувьяс, дзир орöтiс-висьталiс:

— Кытшöм эм — сэтшöмöн и мыччися.

— Мый нö одзлань пондан керны?

— Районöдз тай ашын мöда ветлыны.

— Мый тэ сэтчин вунöтiн?

— Нем эг. Школаö мыйлöкö корöны. Письмо тай локтiс.

Эта вылын мама-ныла коласын басниыс и баитсис.

Ас кежас дивуйтчöмöн Дарья Семёновна мыйкö дырна эшö хлопöтöв-керис киэзнас боккес кузя, а сёрöнжык чеччис пызан сайись, иньдöтчис комö, пондiс лöсьöтны сёйны.

Таисьялö, натьтö, колiс бы отсавны мыйынкö: петкöтны, шуам, джоджулiсь квас нето вайны пызан вылö да шöравны нянь. Но кынöм сималöмсö нывка талун эз кыв, а кутчисьны мыйкö бердö киэз эз лэбтiсьö, охота эз вöв. Сiя шыасьтöг петiс керкуись, иньдöтчис куканнез дынö.