Енöж картинаэз

Кытшöмöн дзир оз усьлы адззывны век сьöрна му весьтiсь енöж. Ар да тулыс коста сiя часто овлö гудыраöн, кöр дорсянь дорöдз везтöм руд рöма да сьöкыт, кыдз тшын, лым нето зэр кымöррезöн. Овлö мукöд коста, что шондiыс ассис чужöмбансö ны сайсянь нельки быдса неделя сьöрна оз и мыччав. Эта местö вылiсянь дугдывтöг кисьтö-зэрö нето буждö-усьö лым.

Басöкöн, нельки öддьöн гленитчанаöн, овлö енöж тöвнас, мича да кöдзыт погоддя коста, кöр ой кежö, пыдöстöм да пемыт-голубöй рöм вылын кисьтöмöн петалöны унася-уна звездаэз. Ылынöсь и матынöсь, ыджытöсь и учöтöсь, кöда зэв югыта, а кöда дзир шырби моз, то кадiсь кадö куньышасьöмöн, то тувсинöнмоз, кваркышавтöг, нiя дзиргöны-видзöтöны (сiдз мыччассьö улiсянь) миян мушар вылö. И мыччисяс кö эшö сэтчö жö чарла кодь ли джыння, гöгрöса зеркало кодь ли быдса, медматiсь миян планета — тöлiсь, кöда чапкö мушар вылö аскодяс жö бледыт югöр, видзöтан сэк эта картина вылö, видзöтан и нельки мыдз некытшöмö он тöд. И ась мыччассьö сiдз, бытьтö тöвся мороззэз коста тöлiсь югöрсянь мушар вылас лоö эшö кöдзытжык, примитны да вежöртны сы вылiсь эта югöртöг олан, кыдз и шондiыстöг жö, кöда йылiсь эстöн и баитны нем, öтiк морт оз вермы да оз согласитчы.

Эшö дивуйтанажык овлö енöж гожумнас, кöр сiя вежö ой кежö ассис пемыт-голубöй рöмсö пемыт-лöз бархатнöй вылö. То ли этасянь, то ли эшö мыйсянь сыын звездаэс пондöны мыччассьыны ась и не сэтшöм югыт югöраэзöн, кыдз тöвнас, но сы местö гырисьжыккезöн. Сэк кежö ыждö да вежö ассис рöмсö и тöлiсь. Чочкомыс местö, кытшöмöн сiя мыччассьö миянлö тöвнас, гожумнас лоö гöрд рöма, бытьтö краситчöм. Сэтчö жö тöлiсь тыдалö эшö тöдчöмöн ыджытжыкöн, ежели тöвнас. Лэбтiсьö сiдз мукöд коста ылын вöр сайсянь, дзик баня жар бöрсянь рöмсялöм ыджыт да гöрд тöлiсь и мыччассьö сэтшöм матынöн, что нюжöт киэтö и судзöтчан сы бердöдз.

Эта дивуйтана басöкся гожумнас енöж овлö эшö и полöтанаöн. Овлö, кöр гажа мич да лöнь вылö мыччисьö (частожыксö рытвыв ладорсянь) зэран кымöр. Сiя сайöвтö шондi, пемдöтö югыт лун. Сы одзын полöмсянь лöньсьö му вылын быдöс ловьяыс. Жуй керö, лöньсьö, нельки неловья природаыс: ыб, видз да вöр, пондö видзчисьны — мый лоас. И вот... Гырись да вына электрическöй заряддэз аркмöтöны синбур гусялан чардбиэз, кöдна ньöвьёссезöн шучкöп «бытшкалöны» асьсö жö зэран кымöрсö. Вына заряддэзлöн ас коласын горöн кажöтöмыс аркмöтö сэтшöм жö гора гымалан говк, кöда зэв ёна полöтö быдöс ловьясö. Часто эта гымалöм-вирдалöмсянь, кыдз мячöс, зэгöтö нельки асьсö мусö.

Но ме тöдвылын енöжлöн картинаэс не только этна. Учöтсянь меным öддьöн гленитчис нёджжавны кымöр палаккез сьöрын. Куйлан, вöвлi, сiдз гатш шоныт да мича погоддя коста небытик деревенскöй луд вылын, кывзан, кыдз дзуртышалöны тэ гöгöр быдкодь шыэзöн кöбывкаэз, гугйöны-лэбалöны цвет вывсянь цвет вылö гöна малянкаэз, а ачыт эта коста видзöтан вывлань, голубöй рöма, сöдз да пыдöстöм енöжö. А сэтчин, вылынся-вылын му бердсянь, уйöны кымöр палаккез. Голубöй рöма енöж и чочком кымöр палаккез. Мый эта сэтшöмыс? Енöжыс? И мыйез нiя сэтшöммес — чочком кымöр палаккес? Пондыв-ко вот, тöд. И вежöртсис кö енöжыс кöть мыйкö сэтшöм быдпырся, быдпасьта да быдпыдына, кöда эм син одзын кöть кöр, луннас и ойнас, рытнас и асывнас, то чочком кымöр палаккескöт вöвлi нач мöднёж. Нiя вермисö вöвны, а вермисö и не вöвны. Мукöд лунö эта быдпырся, быдпасьта да быдпыдына енöжын öтiк дзирыт югöра шондiся сэсся нем эз и мыччась. Сiя быдпасьтöн вöвлi прос, сэтшöм прос, что и синöн кышасьны нем бердö. А то петавлiсö луннэз, кöр сыын усьлiсö син вылö чочком кымöр палаккез. Мукöд коста нiя мыччасьлiсö кокниттэзöн, дзик ватаовöйöсь. Мукöд коста вачкисьлiсö лымовöйез вылö. А вöвлi, кöр нiйö жö позис примитны йыовöйез местö, кöдзыттэзöн, сьöкыттэзöн да чорыттэзöн. И позис кö бы судзöтчыны сэтшöммес бердöдз да вачкыны вевдöрсянь ыджытжык молотокöн, нiя, мыччассис, вермисö бы нельки пазавны гырись и поснит торрез вылö да сiдз киссьыны му вылöдз. Но öшалiсö кымöр палаккес öддьöн вылына му бердсянь и молотокöн вачкöм понда судзöтчыны ны бердöдз некыдз эз позь.

Сэтчö жö кымöр палаккес öтiк местаын мылякö некöр эз сулалö. Нiя дугдывтöг кывтiсö то öтöрö, то мöдöрö. Öтпырись дженытика дзарнитöм коста сымдасö казявнытö и эз позь. Сэк нiя вермисö мыччассьыны кынмöммезöн öтiк местаын. Но минута кыным сьöрна видзöтöм коста позис казявны, что кымöр палаккес öтiк местаын оз сулалö, нiя дугдывтöг кывтöны, кöр чожажык, а кöр жагöнжыка. И мый интереснöйыс эшö этася, дак этö сiя, что сiдз кывттöнняныс нiя вермöны вежсьыны асланыс формаöн: жмитчыны нето паськавны. А эта коста вермасö примитны сэтшöм причудливöй да интереснöй очертаннёэз, что адззывтöг, одзлань и висьтавны оз позь. Сiдз чочком кымöр палакыс син одзын вермас пöртчыны аслас очертаннёэзöн да пондыны вачкисьны то ли баран вылö, то ли чочком ош вылö, слон вылö нето пон вылö.

Войнабöрся кытшöмкö гожумö ми, деревенскöй челядь, казялiм öтпырись кымöр палак, кöда вачкисис понöн да пишальöн вöралiсь морт вылö. Мортыс кисянь поныс голя бердöдз кыссис нельки поводок. Кинкö пöрисьжык да тöдiсьжык миян коласiсь нимтiс сiйö пограничникöн.

Адззылöмыс йылiсь рытнас ни кинкö миян коласiсь висьтасяс аслас аймамлö. А сы увья ашынас жö омöн деревня пасьта паськалiс, бытьтö бы челядьыслö блазнитöм енсянь. Эта некыдз виль война одзын.

Вежöртана, что некытшöм блазнитöм эстöн эз вöв сiдз жö, кыдз эз вöв ачыс и виль войнаыс. Но шумыс деревня пасьта лэбтiсьлiс отир коласын вель ыджыт, кöда асьнысö жö отирсö и полöтiс неделя кыным сьöрна.

Сёрöнжык меным этна кымöр палаккезлöн очертаннёэс мыччасьлiсö не только пишаля мортöн. Нiя часто вачкисьлiсö нельки танккез да пушкаэз, самолёттэз да корабллез вылö, но, кыдз баитсьö, слава Богу, быдöс адззылöмыссянь некытшöм война кытчöдз эз лэбтiсь.

Челядькадся вопроссэз: мый сэтшöм енöж, тöлiсь, звездаэз да чочком кымöр палаккез, öтiккез кöдна коласiсь ойись ой, куньышасьöмöн, дзиргисö-видзöтiсö мушар вылö, а мöдiккез лунiсь лун (да и ойезнас тожö) кывтiсö кытчöкö сы весьтöт, жагвыв вунiсö тöдвылiсь. Естествознаннё учебникись лоис вежöртана, что голубöй рöма енöжыс не мый мöдiк, кыдз ру, кöда вель кызöн видзсьö миян мушар гöгöрын. Этöн рунас ми не только лолалам. Сыöт жö ми лэбалам самолёттэз вылын.

Тöлiсь да звездаэз, этö миян мушар кодь жö, часто не öтгырися, ылiсь и матiсь планетаэз, кöдна коласiсь мукöдыс унаись ыджытжыкöсь миян мушарся, а кöдна, кыдз тöлiсь, поснитжыкöсь.

Чочком кымöр палаккес — миян мушар вылiсь ва, кöда шондi югöррез увтын пакмöмсянь пöртчöм парö да лэбтiсьöм вывлань. Эта парыс ас коласас öтлаасьöмöн и аркмöтö нiйö чочком кымöр палаккесö, кöдна дышöтчытöг уялöны миян мушар весьтын паськыт енöж пасьта, кöдöрö нöбöтö тöв. Вылын енöжыс быдкоста кöдзыт. Сiйöн эта парлöн öддьöн поснит, кыдз бус, да сэтшöм жö кокнит тороккес кынмöны, пöртчöны йыö да лымö. И кöр вылiсь кымöр палаккесö ми адззам чочкоммезöн, дзик йы нето лым, некытшöм сорасьöм эстöн абу, былись сiдз и эм.

Енöжас уявтöн ни этна бус кодь поснит пар тороккес öтлаасьöны öтамöдкöт, лоöны сьöкытжыкöсь да пондöны лэдзчисьны лажмытжыка му бердö. Гожумнас, кöр матын му бердас руыс шоныт, эстöн нiя сылöны да усьöны зэрöн. Кöдзыт тöв коста сывны му весьтас нiя оз вермö да сiдз лымöн и усьöны. И ась этна чочком кымöр палаккезлöн природаыс ме понда важын ни тöдса, любуйтчыны ны кывтöм-уялöмöн ме öнöдз эшö эг дугды. И вот...

Кынымкö годöн одзжык, гожумся мича кадö, рытъявыв, кымöр палаклiсь очертаннёсö усис адззывны сэтшöмöн, не висьтавны кöда йылiсь некыдз оз позь.

Казялi ме сiйö садын уджавтöн, сэк, кöр кымöр палакыс лунвывланьсянь жагвыв кывтiкö, öшалiс тшöтш город весьтын. Вежöртана, что сiя вöлi чочком да ыджытся-ыджыт и вачкисис медперво скальнöй утёс вылö, кöда му вылын сулавтöн вермис бы лоны джын километр сувда, а то и вылынжык. Но матöжык сибöтчöм коста сiя жагвыв вежис ассис очертаннёэсö, пондiс вачкисьны кытшöмкö важся замок вылö. Шондi ладорсянь сылöн бокыс мыччассис унажык чочкомöн. И дзир одзланьсянь перспективаöн тыдалан пельöсыс, кыдз торйöнмоз лэбтöм башня, нюжалiс медвылына. Но меддивуйтанаöн мыччассис «замок» вуджöра одзсяняс, кытчö шондi югöррес сидзнытö веськыта эз ни вермö. Эстiсь позис адззыны башня увтö пыртан ыбöс, а вывланьын, сiя жö башняын, неыджыт öшыннэз. Сiя жö картинаыс вöлi и вуджöрись стенакöт. Быд этаж вöлi янсöтöм пытшклань вештыштöм уступпезöн, кыдз строитöмöсь Москваын кынымкö высотнöй керку. Быд этажлöн жö, ась и не сэтшöм симметричнöй да öтвесьтын, тöдчисö и унася-уна öшыннэз.

Эта дивуйтан картина увья, кöда сэтшöм видзчисьтöг оссис син одзын, мыйкö дырна кежö ме нельки вунöтi аслам удж йылiсь, а сы бердiсь и синнэз калькöтны эг вермы. Жаль только, что любуйтчынытö сiйöн усис недыр.

Кытшöмкö кадö, веськыта син одзын, эта картинаыс пондiс разьсьыны. Замок пельöсiсь башняыс, кöда мыччассис медвылынöн, нюжалiс вывлань эшö одззася вылынжыка да пондiс кольччыны бöрлань. Сы коста жö башнялöн увтыс одзасьöмöн иньдöтчис одзлань. Жагвыв пиньласисö öтмöдöрö да пондiсö öштыны неважынся очертаннёэз и замоклöн этажжез. Этасянь быдсöн сiя вились пондiс вачкисьны аскодьöм, виль очертаннёа керöс вылö, а эта вылын и одз ладорыс сайöвтчис син одзись. Бöрсяняс кымöр палак вöлi, тыдалö, рышкытжык да вачкисис гырись тшакыллеза чочком тшын вылö. Сэтшöмкöт ме сыкöт и янсöтчи. Но джуджыт башняа замокыс и öнöдз эшö тöдвылын.