- •Висьттэз ловья цветтэз (Гора му, 1963)
- •Медодзза пантасьöм (Иньва, 1964)
- •Семьялöн судьба
- •Асъя югытлö паныт
- •Сьыланкыв (Иньва, 1968)
- •Прошинаын тулыс (Пармаын асыв, 1974)
- •Почкаэз оссьöны (Почкаэз оссьöны, 1970)
- •Аканнез (Почкаэз оссьöны, 1970)
- •Тöдiсь (Иньва, 1976)
- •Сюромка гусялiсö
- •Олöм лун
- •Норма понда (1991)
- •Тупöссез
- •«Прикашайтчис»
- •Повессез гажа грива бур юöр
- •Пос дорын
- •Павжун коста
- •Шаньгаэз
- •Гажа грива
- •Вöрын асыв
- •Шоччисьтöн
- •Пиня жугалiс
- •Прошинаын тулыс (1987)
- •Адззисьлытöдз, марина!
- •Ыджыт ваэз коста
- •Романнэз туйвежжез (часть первöй)
- •Глава I
- •Глава II
- •Глава III
- •Глава IV
- •Глава V
- •Глава VI
- •Глава VII
- •Глава VIII
- •Глава IX
- •Ыбшар (Роман куим частьын)
- •Первöй часть
- •Глава I
- •Глава II
- •Глава III
- •Глава IV
- •Глава V
- •Глава VI
- •Глава VII
- •Глава VIII
- •Мöдiк часть
- •Глава I
- •Глава II
- •Глава III
- •Глава IV
- •Глава V
- •Глава VI
- •Глава VII
- •Глава VIII
- •Глава IX
- •Глава X
- •Глава XI
- •Глава XII
- •Глава XIII
- •Глава XIV
- •Глава XV
- •Глава XVI
- •Глава XVII
- •Куимöт часть
- •Глава I
- •Глава II
- •Глава III
- •Глава IV
- •Глава V
- •Глава VI
- •Глава VII
- •Глава VIII
- •Глава IX
- •Глава X
- •Глава XI
- •Орсöтаннэз горадзуль Сизим картинаа драма
- •Медодзза картина
- •Мöдiк картина
- •Куимöт картина
- •Нёльöт картина
- •Витöт картина
- •Кватьöт картина
- •Сизимöт картина
- •Орöмыс оз йитсьы
- •«Курорт»
- •Репетиция
- •Мöдiк картина
- •Рецепт, или колö вöрöтчыны
- •Первöй картина
- •Мöдiк картина
- •Куимöт картина
- •Перестройка жö
- •Миритчöм Öтiк акта трагедия
- •Кывбуррез мамöлö
- •* Ме тэнö эг пантавлы *
- •Ме любитöмсянь тэ он мун
- •* Кыдз бытьтö тэнат *
- •* Ась увгис тöв *
- •* Кытшöм жö тэныт *
- •* Некин оз тöд *
- •* Сибöтчас ар *
- •* Ме кывза *
- •Челядьлö вашиль
- •Кык кока, а оз оськав
- •Уджыс веськöтö
- •Руч да кöч
- •Бичирок
- •Быдыс ас местын
- •Бабывкöт тöвйöм
- •Вовалöн сьöдкай
- •Колана гаг
- •Вот и чож!
- •Лолалан шор
- •Ме оланiсь Гижисьлöн автобиографияись тор
- •Природалöн явленнёэз лолалан шор
- •Ловья лым
- •Öшалан вöр
- •Диво-ключ
- •Лым да цвет
- •Пелькытша кран
- •Гожум шöрнас
- •Енöж картинаэз
- •Столббез орсöны
- •Тулыслöн следдэз
- •Öмидзрöма говк
- •Шер бöрсянь
- •Пресмыкающöйез весöтчись
- •Лягушкалöн тöвйöм
- •Повтöм дзöдзыв
- •«Смертькöт» пантасьöм
- •Насекомöйез кöдзыв туйез
- •Кöдзыввез
- •Сэтöрлöн кöр
- •Гагпыжьян
- •Сюра бабыв
- •Вынсö не одзöстны
- •Кайез сьöдкай
- •Гоголь-шоголь
- •Чавканнэз
- •Чöсмасиссез
- •Кытшöм миян бадьöг
- •Менам ыбшар
- •Хищник-кай
- •Сöстöм чочком бока
- •Сера гора кай
- •Тöвся купайтчöм
- •Зверрез тшакьялiсь ур
- •Вöрмöссэз
- •Сiдзкö, ловья
- •Вельмöм кöч
- •Пöрись кань
- •Сьöдпель
- •Пияна ош
- •Ягöдалiсь мöссэз
- •Вареннё кöр
- •Тшаккез мыртшаккез
- •Ольтшаккез
- •Горттшак
- •Чöскыт тшак
- •Тшак-пушка
- •Кыдзтшак (битшак)
- •Туруннэз гöнагаг
- •Медчöскыт ягöд
- •Пуэз да кустарниккез кытiсь лоис ирга?
- •Виль ягöд
- •Гöрд льöмпу
- •Монгольскöй гöсь
- •Маньчжурскöй орех
- •Зöртусьпу
- •Лымьягöд
- •Туригум
- •Льöмпу да таг
- •Мыррез городын
- •Медбасöк клён
- •Статьяэз кык поступок йылiсь (Иньва, 1964)
- •«Шапка пожум» повесть йылiсь (Иньва, 1966)
- •Питю öньö да м. Лихачёв йылiсь (а. Зубов, м. Лихачёв. Бöрйöм произведеннёэз. Кудымкар, 1989) составительсянь
- •Андрей никифорович зубов (питю öньö)
- •Михаил павлович лихачёв
- •Öшмöссэз:
Чöскыт тшак
Миян деревня гöгöр матiсь вöррес унажыкыс вöлiсö томöсь да сораöсь. Шоча позис пантавны кыськö паськытжык везöв, кытöн быдмис бы куш кöз. Эз пантасьлö и куш кыдзовöй рассэз нето сэтшöм жö пипуаиннэз. Быдöс, кыдз лыса вöрыс: кöз, ньыв да пожум, сiдз и листа пуэс — кыдз да пипу, — дзик öтiк семьяись сойез да воннэз, быдмисö сорöн, öтамöд коласын. Кытшöмкö местаын тöдчöмöн унажык вермисö пантасьны листа пуэз, но ны коласын, ась и шочыника, öтiк-öтiк, ньыв-кöзыс да пожумыс сё ни пантасьлiс. И нач мöднёж, сулалiс кö кытöн кöзъя везöв, сы пытшкын бель видзöмöн кыдзыс да пипуыс сё ни мымдакö сорлассис.
Этасянь миян вöррезын и тшакыс пантасьлiс сора. Ордчöн гöрд нето чочком юра грибкöт вермисö быдмыны гоб да мöсгоб, уртшаккöт — ниндуль, гöстшаккöт — путник и сiдз одзлань. Но быдöсся этнася петавлiс эшö öтiк тшак, кöда дынö миянöс челядьсянь кыскис, кыдз магнитöн. Этö сысянь, что сiя годдэзö ми быдкоста вöвлiм тшыгöсь. А тшаксö этö позис сёйны ульнас, сэтöн жö, кытöн сiйö адззин, сёйны быдсöн, кыдз юрсö, сiдз и коксö. Жаль öтiкö, что мöдiккез сьöртi этö тшаксö быд местаись адззыны эз позь. Годiсь годö сiя петавлiс дзир аслас местаын, сэтöн, кытöн сылö гленитчис. Сэтшöм местаэзнас частожыксö вöвлiсö вöр коласiсь öсеккез пöлöн вылынжык, кöсжык да сьöд песока муэз. И вöвлiсö сэтшöм местаэс не öддьöн уна. Öнöдз ме тöдвылын видзсьöны вит-квать, кöднö ми, быд деревенскöй челядёкыс, тöдлiм учöтсянь. И сибавлiс кö тшак ваялан кад, да пондывлiм кö ми ветлыны вöрö, кытöн-кöдöрын бы эг тшакьялö, этна колана местаэсö некöр эг ордйö. Сэтшöминö, лунтыр сьöрна ветлöттöн, ми сибавлiм нельки неöтпырисьöн да эшö öтамöд коласын одзасьöмöн, кин ештас медодз. И кошшисьлiм ми этна местаэзын дырся-дырöн, ветлöтiм öтiклаöттяс и доль, и поперег, и быд оськöв вылын нёджжалiм колана тшаксö, кыдз уськöтöм ем. А пантасьлiс кö кинлöкö кöр кöть öтiк сэтшöм тшак, гажмывлiм, кыдз адззöм няньтороклö. Песока мусис весöтöм бöрсянь сёйлiм тшаксö ульнас, сэтöн жö, кыдз юрсö, сiдз и коксö, тшöтш вуж бердöдз. А эта бöрсянь и ошшасьыштнытö мöдiккез одзын вöлi мыйöн.
Войнакостася, тшыг челядься кадыс чулалiс важын ни. Бöрья кадö не öтiк дас год сьöрна ни ме ола городын. И тшакьявны этöн каднас усьлiс меным город гöгöр, быд ладорын. Кытшöмкö кадö ме вель уна ветлöтi Лопатина да Харина сайись вöррезöт. Неöтпырись сэтчинсянь усьлiс петавлыны нельки Йöг посад гöгöр деревняэз бердöдз.
Тöда небурика вöррез и Заболотнöй посёлок сайись, кытöн вöвлi тожö унаись. Не öтiк год сьöрна, гожуммезнас, ме керавлi сы ладорын пес да ветлывлi коросявны. А удж коласас и тшакьявнытö кадыс петавлiс.
Бöрья годдэзö тшакьявла частожыксö аэропорт гöгöр да сы сайись вöррезын. Сы ладорö жö ветлывла шочыника и коросявны. И местаэс пантасьлöны интереснöйöсь да гажаöсь, кыдз, натьтö, и быдлаын, и тшакыс, нем баитны, тожö öктынытö адззисьö, но...
Этöн каднас и казялi, и вежöртi, что Иньва ю бассейнын тшакыс невночка не сiя ни, кöда быдмö миян косинскöй вöррезын. Кульбуккес да гуткулантшакыс нiя жö, а сёяна тшакыс — не. Эстöн тöдчöмöн унажык, ежели миян гортся вöррезын, пантасьлö мöсгоб. Бытшöма петöны масляк да рыжык, а куш пипуаиннэзын — гöрд гриб. Эм ельдöг да гöстшак, кöдö буржык бы шуны кöстшакöн. Эм гоб да ниндуль. Часто пантасьлö зеленушка-свинушка, кöда миян вöррезын нач оз пантасьлы и кöдалiсь ме нельки коми нимсö ог тöд. Но сы коста жö эстöн öддьöн шоча пантасьлö сера путник. А лöз путник или ньывпутник, кöда вевдöрсяняс öддьöн вачкисьлö сiмрыжык вылö и мыччассьö тожö öддьöн басöкöн, татiсь вöррезiсь ме эшö и öтпырись эг пантавлы. Öддьöн шоча пантасьлö татöн кызрыжык вылö вачкисян волнушка (вöлнянка, вöвнянка коми кыв вылын), кöда ар гöгöр сюрö öктыны миян вöррезын вель уна, кыдз и лöз путникыс жö. Овлö мукöд коста, что ведратыр öктöм тшакись öтамöд коласын нiя джынысви.
Город гöгöрись вöррезын меным эшö öтпырись эз усьлы пантавлыны белянка. Эта сёр тшакыс радейтö петны нiя жö местаэзö, кытчö и рыжык — чапкöм шутёммез пöлöн, томыник да тшöк кöзъя вöр коласö, дзир рыжыкысся сёрöнжык. Эта увья часто и овлö сiдз — кытiсь öктан рыжык, сэтiсь жö, неделя нето кык бöртi, позяс öктыны и белянка. Тшаквевья годö öтiк местаас сiя петö вель уна, зэв-зэв öтамöд бердсянь, тожö кыдз и рыжыкыс жö, не висьтавны кö, что эшö тшöкжыка, или, кыдз бы шуисö миян косинскöй диалект вылын — парксьöмöн, кöть додь мымда öкты. Вежöртана, что öктыны додь мымда поснит да вöснитик белянкасö, натьтö, и оз позь. Но керку пасьтышта местаись мукöд коста ведра мымда тшак чукöртчö. Часто öктöны белянкасö нельки пужжез коста, кöр некытшöм мöдiк тшак оз ни пет, сiдз кыдз пужмалöмсис белянка полö не сiдз, кыдз мöдiк тшаккез.
Эг пантавлы ме город гöгöр вöррезiсь и ошмасляк, кöда вачкисьö вевдöрсяняс мöсгоб вылö. Сылöн дзир юрыс увланьсянь рышкытжык да сулалö нитш коласас вöснитик кок вылын. Кыдз гриб, гоб да мöсгобсö жö, миян отирыс öктöны ошмасляксö косьтыны тöв кежö, сьöд тшак вылö. А город гöгöрись вöррезын сiя сiйöн и оз пет, что эстöн абу пожумника кöс яггез.
Мый медöддьöн оз тырмы татiсь вöррезын миян косинскöй вöррез сьöртöт, дак этö уртшак. Кытшöм местаэзöт да мымда бы ме эг ветлöт, быдлаын пантасьлö дзир öтрöма бурöй уртшак да лöзур, кöр миян косинскöй вöррезын эта тшакыс петалö-быдмö быд рöма. Сiдз пöрись да тшöк кöзъя вöррезiсь торья куртинаэзöн позьö пантавны вежтшак, кöдалöн юрыс сöстöм веж рöма, кыдз горадзуль цвет, мыйöн сiя эшö ылiсянь усьö син вылö. Сiя жö уртшакыс вермас лоны эшö и гöрдöн, кöда и шусьö гöрд уртшакöн. А этна кык рöмаэс коласын петавлö эшö гöрд-виж рöма, кöдö одззаэскöт некыдз он сорав. Но некытшöм уртшак этна коласiсь город гöгöрись вöррезын он пантав.
Мый эшö позьö йитöтны этна нетырмана тшаккез дынö татiсь вöррезын, дак этö сiйö чöскыт тшаксö, кöдасянь и пондöтчис эта рассказын миян басниыс. Петö сiя, кыдз одзланьын вöлi висьталöм ни, не нитша да уль кöзъя вöр коласын, а вылынжык, кöсжык да югытжык местаэзын, кушамтöдз тальсьöм да топамöм сьöд песока му вылын. То ли этасянь, то ли эшö мыйсянь и ачыс тшакыс сэтшöм жö зумыт да ён, топ-топ кыдз и гöстшак жö. И кыдз коксö чегтöн, сiдз и юрсö торйöттöн, ки увтын кылö ёна кропнитöм.
Некыдз оз позь соравны мöдiк тшаккез коласын сылiсь и рöм. Му пытшксис чöскыт тшак пыр мыччисьö чочкомöн. И дзир лун нето кык бöртi, сетасö кö сылö тшакьялiссес сулавны сы дырнасö, вевдöрсяняс сiйö мичöтö небурика какао рöм. Некытшöм мöдiк тшак сэтшöмыс вылö и матын оз вачкись. Оз сорась чöскыт тшак мöдiк тшаккез коласын и увдöрись рöмнас. Кыдз дженытик да зумыт кокыс, сiдз и шляпка увтiсь пластинкаэс (комиöн висьтассяс — пиннес) сылöн сэтшöм бель вачкан, сэтшöм сöстöм чочкомöсь, кытшöмöн талун вермас лоны дзир деревенскöй лым. Сiйöн нельки корзинаö öктöм бöрсянь мöдiк тшаккез коласiсь сiя янсалö медодз этöн лым кодь бель видзан чочкомнас, сiйöн жö усьö и син вылö. Вот сэтшöм сiя и эм миян косинскöй вöррезын чöскыт тшак, кöдö позьö сёйны сэтöн жö, адззöмыс бöрсянь, сёйны, кыдз вöлi висьталöм ни, быдсöн, юрсянь и кокöдз, и некытшöм курöтöм и воть мымда он кыв.
Уна год сьöрна ни город гöгöрись вöррезöт тшакьявтöн, смекайта ме этö чöскыт тшаксö. Но то ли климатыс невночка не сiя ни, то ли вöра местаэс не сэтшöмöсь, — кытшöм местаэзын бы этöн каднас эг вöвлы, некытiсь ме сiйö нельки öтпырись сiдз и эг пантав. Но тöда учöтсянь и тöда бытшöма, что сэтшöм тшакыс эм. И эм сiя не кытшöмкö море сайись йöз странаэзын, а ас му вылын, менам неылiсь да учöтик гортын, кöда менö чужтiс да эта чöскыт тшак сорöн сувтöтiс кок вылö. И сiйöн öнi, кöр тöдвылö усьö челядькадся чöскыт тшак, вежöртана, что öтлаын сыкöт усьö тöдвылö и учöтик гортö. А эта не мый мöдiк, кыдз сытöг гажтöмтчöм.