Молитвы к 125 угодникам Божиим, ходатаям нашим пред Богом. С указанием на особую благодать помощи в различных нуждах и немощах человеческих
.pdf
МОЛИТВЫ СВЯТЫМ УГОДНИКАМ БОЖИИМ
нии. Моли благость Его, яко да отвратит от нас гнев Свой, праведно по делом нашим на ны движимый, и, презрев безчисленная прегрешения наша, обратит нас на путь покаяния и на стези заповедей Своих утвердит нас. Огради молитвами твоими в мире живот наш, и во всем благом благое поспешение испроси, вся яже к животу и благочестию потребная нам даруя. Якоже древле Великий Новград явлением чудотворныя иконы твоея от губительства смертнаго избавил еси, тако и ныне нас и вся грады и веси страны нашея от всяких напастей и бед и напрасныя смерти предстательством твоим избави, и от всех враг видимых и невидимых покровом твоим защити. Яко да тихое и безмолвное житие поживем во всяком благочестии и чистоте и, тако в мире временное сие житие прешедше, в вечный достигнем покой, идеже сподобимся Небеснаго Царствия Христа Бога нашего, Емуже всякая слава подобает со Отцем и Пресвятым Его Духом, ныне и присно и во веки веков. Аминь.
Тропарь, глас 4
Симеон старец днесь веселится, восприят на руку свою Младенца Превечнаго Бога, от уз плоти разрешитися прося и вопия: видеста очи мои спасение Твое мирови.
231
МОЛИТВЫ К 125 УГОДНИКАМ БОЖИИМ, ХОДАТАЯМ НАШИМ ПРЕД БОГОМ
Кондак, глас 4
Старец днесь отрешитися от юз молящеся сего жития тленнаго, Христа восприят на руки, Зиждителя и Господа.
Величание
Величаем тя, святый праведный Симеоне Богоприимче, и чтим святую память твою, ты бо молиши о нас Христа Бога нашего.
Симеон Верхотурский, праведный
(1694; 18/31 декабря и 12/25 сентября)
Праведному Симеону Верхотурскому молятся об исцелении от болей в ногах (он сам, пеший, совершил свой путь из России в Сибирь, чувствуя изнеможение в своих ногах), об исцелении от болезней глаз.
Молитва
О, святый и праведный Симеоне, чистою душею твоею в Небесных обителех в лице святых водворяяйся, на земли же телом твоим нетленно почиваяй! По данной ти благодати от Господа молитися о нас, милостивно призри на нас многогрешных, аще и недостойне, обаче с верою и упованием ко святым и цельбоносным мощем твоим
232
МОЛИТВЫ СВЯТЫМ УГОДНИКАМ БОЖИИМ
притекающих, и испроси нам от Бога прощение согрешений наших, в няже впадаем множицею во вся дни жития нашего и якоже прежде овым убо от очныя зельныя болезни ни мало зрети могущим исцеление очес, овым же близ смерти бывшим от лютых недугов врачевание, и иным иная многая преславная благодеяния даровал еси: сице избави и нас от недугов душевных
ителесных и от всякия скорби и печали, и вся благая к настоящему житию нашему и к вечному спасению благопотребная нам от Господа испроси, да тако твоим предстательством и молитвами стяжавше вся нам полезная, аще и недостойнии, благодарне восхваляюще тя, прославим Бога, дивнаго во святых Своих, Отца и Сына и Святаго Духа,
иныне и присно и во веки веков. Аминь.
Тропарь, глас 4
Днесь радуется славная страна Сибирь, обретши святыя твоя мощи внутрь себе. Архиереи, священницы и весь сонм людский, духовне веселящеся, вопиет ти: о богомудре Симеоне! Избави нас, иже к тебе прибегающих, от всех бед, просяще подати всем по коегождо прошению и избавитися стране сей и граду от огненнаго запаления и поганскаго нашествия и междоусобныя брани и от всякаго зла: темже и мы вси
233
МОЛИТВЫ К 125 УГОДНИКАМ БОЖИИМ, ХОДАТАЯМ НАШИМ ПРЕД БОГОМ
чтем ныне честных и многоцелебных мощей твоих обретение, новый целебниче, и вопием: слава Давшему тобою всем исцеление.
Кондак, глас 2
Мира суетнаго отвергся еси, да блага вечныя жизни наследиши, возлюбив незлобие и чистоту души и тела, снискал еси, еже возлюбил, свидетельствуют бо о сем гроб и нетление мощей твоих, и благодать чудотворения наипаче. Точиши бо цельбы всем притекающим к тебе и непросвещенным, Симеоне блаженне, чудотворче предивный.
Величание
Величаем тя, святый праведный Симеоне, и чтим святую память твою, ты бо молиши за нас Христа Бога нашего.
Симеон Столпник, преподобный
(459; 1/14 сентября)
Преподобному Симеону Столпнику молятся о возвращении Церкви отторгшихся от нее по навету диавольскому.
234
МОЛИТВЫ СВЯТЫМ УГОДНИКАМ БОЖИИМ
Молитва
О, священная главо, преподобне отче, преблаженне авво Симеоне! Не забуди убогих твоих до конца, но поминай нас всегда во святых и благоприятных молитвах к Богу: помяни стадо твое, еже сам упасл еси, и не забуди посещати чад твоих, моли за ны, отче священный, за дети твоя духовныя, яко имеяй дерзновение к Небесному Царю: не премолчи за ны ко Господу, и не презри нас, верою и любовию чтущих тя: поминай нас недостойных у Престола Вседержителева, и не престай моляся о нас ко Христу Богу, ибо дана тебе бысть благодать за ны молитися. Не мним бо тя суща мертва: аще бо телом и преставился еси от нас, но и по смерти жив сый пребываеши, не отступай от нас духом, сохраняя нас от стрел вражиих и всякия прелести бесовския и козней диавольских, пастырю наш добрый. Аще бо и мощей твоих рака пред очима нашима видима есть всегда, но святая твоя душа со ангельскими воинствы, со безплотными лики, с Небесными Силами, у Престола Вседержителева предстоящи, достойно веселится, ведуще убо тя воистину и по смерти жива суща, тебе припадаем и тебе молимся: молися о нас Всесильному Богу, о пользе душ наших, и испроси нам время на покаяние, да невозбранно прейдем от земли
235
МОЛИТВЫ К 125 УГОДНИКАМ БОЖИИМ, ХОДАТАЯМ НАШИМ ПРЕД БОГОМ
на небо, от мытарств же горьких, бесов, воздушных князей, и от вечныя муки да избавимся, и Небеснаго Царствия наследницы да будем со всеми праведными, от века угодившими Господу нашему Иисусу Христу: Ему же подобает всякая слава, честь и поклонение, со Безначальным Его Отцем, и с Пресвятым и Благим и Животворящим Его Духом, ныне и присно и во веки веков. Аминь.
Тропарь, глас 1
Терпения столп был еси, ревновавый праотцем, преподобне, Иову во страстех, Иосифу во искушениих, и безплотных жительству, сый в телеси, Симеоне отче наш, моли Христа Бога спастися душам нашим.
Кондак, глас 2
Вышних ищай, нижним совокупляяйся, и колесницу огненную столп соделавый, тем собеседник Ангелом был еси, преподобне, с ними Христу Богу моляся непрестанно о всех нас.
Величание
Ублажаем тя, преподобне отче Симеоне, и чтим святую память твою, наставниче монахов и собеседниче Ангелов.
236
МОЛИТВЫ СВЯТЫМ УГОДНИКАМ БОЖИИМ
Симон Зилот, Кананит, апостол из 12-ти
(I; 10/23 мая и 30 июня/13 июля)
Апостолу Симону Зилоту молятся о счастии брака. (По преданию, Симон сам был женихом на браке в Кане Галилейской.)
Молитва
Святый славный и всехвальный апостоле Христов Симоне, сподобивыйся прияти в дом твой в Кане Галилейстей Господа нашего Иисуса Христа и Его Пречистую Матерь, Владычицу нашу Богородицу, и очевидцем быти преславнаго чудесе Христова, на браце твоем явленнаго, претворения воды в вино! Молим тя с верою и любовию: умоли Христа Господа претворити души наша из грехолюбивых в боголюбивыя: сохрани и соблюди нас молитвами твоими от искушений диавольских и падений греховных, и испроси нам свыше помощь во время уныния и безпомощия нашего: да не преткнемся о камень соблазна, но неуклонно шествуем спасительным путем заповедей Христовых, дондеже достигнем оных блаженных обителей райских, идеже ты ныне водворяешися и веселишися. Ей, апостоле
237
МОЛИТВЫ К 125 УГОДНИКАМ БОЖИИМ, ХОДАТАЯМ НАШИМ ПРЕД БОГОМ
Спасов! Не посрами нас, крепце на тя уповающих, но буди нам помощник и покровитель во всем житии нашем, и помози нам благочестно и богоугодно житие сие временное скончати, благую и мирную христианскую кончину получити и добраго ответа сподобитися на Страшнем Суде Христове: да, избежавше мытарств воздушных и власти лютаго миродержца, унаследуем Царство Небесное и прославим великолепое имя Отца и Сына и Святаго Духа, во веки веков. Аминь.
Тропарь, глас 3
Апостоле святый Симоне, моли Милостиваго Бога, да прегрешений оставление подаст душам нашим.
Кондак, глас 2
Известно премудрости учения в душах благочествующих положшаго во хвалении ублажим, яко богоглаголиваго вси Симона: Престолу бо славы ныне предстоит и со бесплотными веселится, моляся непрестанно о всех нас.
Величание
Величаем тя, апостоле Христов Симоне, и чтим болезни и труды твоя, имиже трудился еси во благовестии Христове.
238
МОЛИТВЫ СВЯТЫМ УГОДНИКАМ БОЖИИМ
Сорок мучеников, в Севастийском озере
мучившихся
(ок. 320; 9/22 марта)
Сорока мученикам Севастийским молятся о благополучном возвращении из дальней отлучки мужа (сына).
Молитва
О, святии, славнии страстотерпцы Христовы, четыредесяте, во граде Севастии Христа ради мужественно пострадавшии, через огонь бо и воду проидосте и, яко друзи Христовы, в покой Небеснаго Царствия вшедше, имате велие дерзновение ко Пресвятей Троице ходатайствовати о роде христианском, наипаче же о почитающих святую память вашу и с верою и любовию вас призывающих. Испросите у Всещедраго Бога прощение согрешений наших и жития нашего исправление, да в покаянии и нелицемерней любви друг ко другу поживше, со дерзновением предстанем Страшному Судищу Христову и вашим предстательством одесную Праведного Судии предстанем. Ей, угодницы Божии, будите нам защитницы от всех враг, видимых и
239
МОЛИТВЫ К 125 УГОДНИКАМ БОЖИИМ, ХОДАТАЯМ НАШИМ ПРЕД БОГОМ
невидимых, да под кровом святых ваших молитв избавимся от всех бед, зол и напастей до последняго дне жизни нашея и тако прославим великое и достопокланяемое имя Вседетельныя Троицы, Отца, Сына и Святаго Духа, ныне и присно и во веки веков. Аминь.
Тропарь, глас 1
Болезньми святых, имиже о Тебе пострадаша, умолен буди, Господи, и вся наша болезни исцели, Человеколюбче, молимся.
Кондак, глас 6
Все воинство мира оставльше, на Небесех Владыце прилепистеся, страстотерпцы Господни четыредесяте, сквозе огнь бо и воду прошедше, блаженнии, достойно восприясте славу с Небес и венцев множества.
Величание
Величаем вас, страстотерпцы святии четыредесяте, во граде Севастийстем мужественно пострадавшии, и чтим честная страдания ваша, яже за Христа претерпели есте.
240