- •Житие Александра Ошевенского Начальная часть Жития
- •Житие Александра Ошевенского.
- •О родителех блаженнаго отрока Алексея.
- •О приходе блаженнаго отрока ко игумену.
- •О прихожении пришлець и о разношении вещей монастырьских.
- •О скорби инок
- •О собрании поселян и со инокы совокупление о игумене
- •О явлении преподобнаго Александра, како посети игумена Максима
- •О Пиале и о Росоле
- •О попове сыне Кириаке
- •О создании церкви Пречистыя Богородица Честнаго Ея Успениа
- •Чюдо святаго о беснующемся юноше.
- •Чюдо святаго о ином целовеце, такоже беснующемся.
- •О игумене Максиме
- •О новогородце Алексее и о сыну его Семионе.
- •О создании болшои церкви.
- •Явися преподобныи Александр Василию, церковному мастеру.
- •О явлении преподобнаго старцу Тимофею и о написании образа святаго Александра.
- •О Закхеи черньце
- •Ино сказание о преподобнем Александре
- •Чюдо преподобнаго Александра о исцелевшем юноше беснующемся.
- •Чюдо преподобнаго Александра о иноке Игнатии.
- •Чюдо о некоем юноше, исцелевшем во обители святаго.
- •О некоем боярине Иване Михайловиче Юриеве
- •О явлении Николы Чюдотворца и преподобнаго Александра Ивану боярину
- •Чюдо о некоем человеце Ермолае Павло, сыне Иванове.
- •Сказание о новых чюдесех преподобнаго Александра
- •Чюдо преподобнаго о немом отроце.
- •Чюдо преподобнаго Александра о некоем человеце Никите.
- •Чюдо святаго о некоеи отроковице, //(л. 127) како исцеление получи от недуга своего у гроба преподобнаго.
- •О Мисаиле иноце чюдо святаго.
- •О старце Вавиле, како исцеление получи.
- •Чюдо о попе Игнатие.
- •О прежереченнем Семионе, Алексееве сыне.
- •О обретении сребра и о явлении татеи.
- •О житии, и подвизех, и о списавшем житие преподобнаго.
- •О явлении преподобнаго священнику Феодосию 1-е и 2-е наказание и 3-е с прещением и казнию и потом с милостию чюдо.
О игумене Максиме
Игумен же Максим пребысть в монастыре лета доволна, велико тщание сотвори и великы труды и подвигы показа, много деревень от христолюбець к монасты присовокупи, и много угодие пожень к монастырю притяжа, своима рукама делаа, древеса посекаа, и хврастие собирая, и огню предаа, и пожни углажаа. Бе бо человек возрастом немал, телом крепок, неутомлен, иже во многых мало обретаются, яко же сеи. Се же творяше сего ради, дабы потове и подвигы пребыли во прочаа лета по смерти его, еже он приплоди к монастырю. И того ради тружаяся, дабы тем трудом обрести вечныи покои, и своеи душе спасение получити, и мздовоздание от Бога прияти. И не хощу много глаголати о сем тродолюбнем мужи, еже он показа труды, толико Бог весть, како потрудися в юне взрасте: тело трудом и страдою утоми, еже бы чисто соблюсти от скверны, и душю свою схранити от греха, и уневестити//(л. 88 об.) жениху своему Христу; и в свершенне мужестве молитвою и постом телесное ражжение угаси; в старости мастите бдением и слезами душю свою спасе. И жив же игумен Максим в всяком вздержании, никоеа же сладости кроме братии усладився, и потом от житиа своего исходить, держа монастыря того настоятельство лет 40 и 2 и полтретьяго, и добрым исповеданием дух свои предасть Господеви. И бысть же в то время прежепомянуты Корнилии священник, священьствуя в обители, не приим благословениа от архиепископа игуменьства, ни почтен бысть саном настоятельства.
По времяни же некоем прииде в обитель некый старець, а саном священник именем Маркел от иных монастыреи, прият бысть и начат оболщати братию. Неци же крамолници от братиа всхотеша его игуменом, еже и бысть. Инии же от братиа не начаша им прекословити за смирение. Маркел же, ехав в Великый Нов//(л. 89) град и от архиепископа взем благословение настоятельства, игуменьства сан, и взвратися в обитель, и привезе же с собою черньца пришелца некоего. И малу времяни минувшу, Маркел же игумен начат негодовати на Корнилиа, на священника. Корнилии же начат прекословити Маркелу-игумену, и бысть роптание ею ради в братие. Священник же прочее отиде.
Игумен же Маркел пакы начат оболщати братию: «Аз, братие, хощу ехати к Москве плакатися и бити челом царю государю великому князю просити милостыни». Те же крамолници начаша братии глаголати, яко «Бог посла нам отца игумена и строителя, попечение имееть о монастыре, а человек добр, речист, жилец московскои, и весь обычаи ведаеть». Игумен же черньца оного пришелца, иже с ним из Нова града прииде, и слугу тако же пришелца исгласивше с ними заедино, и поят их с собою. Братиа же, избравше старца некоего имянем Иону, и со игуменом послаша. Взят же игумен(л. 89 об.)// с собою от конеи три мерины лучших, выбрав от стада и казны монастырьскыя сребра два десять рублев, от всякаго запасу от хлеба, и от рыбы доволно, и от вещеи церковных, от книг и от риз, яко же прорече святый: «начнут расточати и разнашати». И яко же преже рехом, аще и писаниа божественаа ведуще, а горши неверных творяще, и книгу писанную, еже о житии, и о чюдесех, и о пророчестве преподобнаго Александра, с собою взят и рече: «Аз сиа писаниа пресвященному митрополиту взвещу и покажу. Он же царю и государю великому князю сиа явит». Се же глаголя, льстяще, яко же пророк рече: «Неправду умысли язык твои, яко бритва изощренна, створил еси лесть. Возлюбил еси злобу паче благостыня» (Пс 51:4-5) и прочаа: «Сего ради разрушит тя Бог до конца» (Пс 51:7), яко же и преже рехом, аще кто чюжаа всхищает неправдою, и своя с ними погубит, а ин же и живота зле гонзнеть. Иже //(л. 90) последи и бысть тако.
Игумен же, братию лестьным целованием лобзав, пути касаеться. Братия же, с любовию проводивше его, возвратишася. Игумен же иде в путь свои и, доехав некоего места великого Вожеезера, и начат старца во обитель взвращати. Оному же хотевшу, Маркел же рече ему: «Аще не послушаеши, то скоро умреши, во езере погрузим тя». И вся же отяша у него и, поверьгше его, отбегше. Маркел же, доехав до некоего места, от мужеи кровии злу кончину приат, иже последи инем поведают, а по смерти муку вечную наследит, яко же пророк рече: «Обратится болезнь его на главу его, и верх его вся неправда его сниде» (Пс 7:17).
Старец же Иона возвратися во обитель, и велика скорбь бысть братии о том, яко книгу писаную свезе от них. Они же таковаго дара лишени быша, оставшимся беспаметным житиа и чюдес святаго, и оттоле пребысть без написаниа. Неции же от братиа, иже крамолы деюще, начаша роптати на старца на Иону. Он же, не мога терпети, прочее отиде, но //(л. 90 об.) понеже не мощно бяше обители без настоятеля быти, прииде же во обитель из новогородскыя державы священник саном имянем Васиан, и прияша его, и бысть им игуменом. И сие убо о сем есть.
