Житие Александра Ошевенского.

Начало пропущено. РГБ. Унд. 276. XVI в.

О родителех блаженнаго отрока Алексея.

(л. 11) О великыи дародатель Христос, да подаст душе моеи желание и умиление, и сердцу скрушение и смиреномудрие, и уму моему разум и трезвение, и утвержение мыслем и добронравие, и словеси силу и мудрость, и очесем свет и весело зрение, и укрепит мою мышцу ослабленую, и простреть мою десницу скорченую, и уяснит язык мои к глаголанию душеполезныя сея беседы, еже достоит предложити в повесть.

Хощу же и начертати житие преподобнаго отца нашего Александра, ему же звание Ошевнев. Вы же, отци, блаженни во истинну, преблаженни, нудисти мя, грешнаго и недостоинаго невежу, выше бо моея силы дело се, бранит бо мя недостоиньство мое и худость ума моего. Дерзати не смею и глаголати стыжуся, умолчати же бедно мне, ослушаниа боюся, скрыти слова не могу, палит бо мя, яко огнь, внутрянняя моя лю//(л. 11 об.)бовь, еже ко святому, и желание уведениа чюдесем его. Но молюся вам, честныи соборе, христоимянитое стадо и богоизбранное совокупление, святое ополчение, аще уведати хощете и разумне слышати, первие о мне помолитеся, да дасть ми ся слово от Бога, да искомое изрещи возмогу, о Господе помогаем и преподобнаго молитв надеяся. И доброе, отци святии, и братиа боголюбезнаа, и чада о Христе взлюбленнаа, преже поведати о сем блаженнем отроце, от коеа убо области и от каких родителеи.

От области же убо славнаго града Бела от езера в страны северныя. Есть тамо езеро Вещеозеро, тако зовомо. От града же того, яко версть шест десят глаголют, еже и весь, тако же нарицаема Вещеозерьскаа. В тои же веси бе некый человек имянем Никифор, от людеи зовомыи Ошевен. Тои же убо человек Никифор мужествен и имянит бе в стране той // (л. 12). Не от велможь убо, ни саном которым почтен, но славим бе добродетельнаго ради житиа, земледелец бяше. Благочестив убо сый, богобоязнив, нищелюбив же, попремногу в добродетелех сияя и доброденьствуя зело всеми благостынеми, наипаче всеми добрыми нравы, беззлобием и правдою, милостию и кротостью украшаяся, молитвою же и постом, и милостынею богоугожаше.

И поят жену точну себе Фотинию имянем и по закону сочтася. Сия убо всеми благыми нравы последоваше мужа своего, и живяста в всяком благочинии, и чистоте, и в смиринии, и любве безмятежно. Родиша же ся има сыны и дщери, их же божественым крещением просветивше и добронравию наказавше, о Господе радовашеся. И потом же мину неколико лет, и не бысть има прижитиа чад. В скорбе же и жалости им обема велице сущима о сих// (л. 12 об.), и в мнозе желении бяше душа их и унынии о прижитии чада. И сего ради блаженнаа Фотиниа поносима и оскорбляема бываше мужем своим, еже рече ей: «О жено, нечто есть, зазор некый в тебе, рекши грех».

Она же вернаа супруга и благонравнаа, за смирение ничтоже отвещавше, но токмо от жалости и умилениа слезы от очию испущаше. Никифор же виде супругу свою унилу и печалну, ничто же по том о таковых рече ей. Фотиниа же виде мужа своего дряхла и печалию снедаема и, отвергше от себе всю печаль и на Господа Бога надежу взложивше, и на Пречистую Его Богоматерь, и время избравше благополучно, и иде в монастырь места того и, вшед в церковь Пресвятыя Богородица Честнаго Еа Успениа, и на много время пребысть молящася Пресвятей Богородице.

Молитва: «О Пресвятая Госпоже Дево Богородице Владычице, Ты еси слава небесным силам// (л. 13), родила бо еси нам солнце праведное Христа Бога Нашего. Ты бо еси слава небесным силам и упование земным. Ты бо еси надежа наша и похвала роду нашему и, елико бо хощеши, можеши, Царице Небесная. Ты бо еси молебница к Сыну Своему и Богу Нашему. Умоли, Пречистая, Сына Своего и Христа Бога Нашего, да Твоими молитвами подаст нам Господь прижитие еще чаду мужеска полу, иже будет утешение души нашеи, и наследник нашего достояниа, и жезл старости нашея, на него же руце возложиве, и почиеве. И не нам, Госпоже, не нам, но имяни Твоему даждь славу, яко благословена еси Ты от всех родов и славится Твое пресвятое имя в векы. Аминь». Се же ей творящи не единова, не дващи, но многащи.

Иногда же пришедши и в церковь и, став на своем месте, идеже бе ей всегда обычай молитися, и вздев руце горе, и взрев на образ Пречистые// (л. 13 об.), и горко встенав, и умилно всплакася, и жалостныя испусти слезы, и рече: «О всемилостивая Госпоже Владычице Богородице, не имам иноя помощи, не имам иноя надежа, разве Тебе, Госпоже Богородице. Никто же, притекая к Тебе, бе посрамлен, от Тебе исходит, но просит и приемлет. И ныне, Госпоже, «створи с мною знамяние в благо» (Пс 85:17). Исполни прошение наше, се бо блажат Тя вси роди и в вся векы. Аминь». И пад ниц на землю и от великаго плача и рыданиа, яко в ступлении ума быв или яко в сон сведена бысть. Оле Владычне человеколюбие, оле вера жены, с нею же и о великый всемилостивый Христе Царю, кто толика человеколюбия изглаголеть милость? Или кто толики благостыни изречеть промысл? И кто исповесть милосердия щедроты, якоже солнечнаго сианиа не возможет измерити, ни Христовы благодати исчести невозможно, яко же бо при распетии на кресте едино слово исповеданиа разбоиниче Бога милости// (л. 14)ва створи и спасе, и не токмо спасе и оправда, но и всю породу отверзе ему Господь. Тако и сиа жена, яко падши ниць на землю, и абие видит свет велии сиающь и в свете оном жену некую светлообразну. На образ же лица Ея не мощно зрети, аки на солнечную лучю, а в ризу же оболчена багряну, и множество с нею святых муж в белах ризах и старца некоего святолепна, сединами украшена. Сего показуя перстом и рече: «Добраа супруго и веселитеся. Се убо прошению вашему сим старцем подати вам имать Бог отроча имянито». И Кирил имя старцу прирече. «И о сем отрочати прославитися имяни Господни, и Бог прославит его, и мнози о нем спасение получат». Она же вставше, от радости и ужасти ничтоже нарече. Не уразуме бывшаго в то время, токмо назнамяста время видениа. И по том от зачатиа его начат удержатися законныя любве и постеля отлучитися и особно // (л. 14 об.) в чистоте тела, схранити желающе, обещахуся даже и до конца живота своего.

«Господь, близ всем призывающим, и молитву их услышит» (Пс 144:18), услыша же Господь молениа их, яко прочих праведник, якоже инде пишет. Токмо с верою человек помыслит к Богу, и Бог вселится в сердце его, разумным светом сияя, аки солнце просвещаяя ум его и житие. Времяни же некоему мимошедшу, уреченным днем прешедшим, тогда абие родися има отроча. И нарекоша имя ему Алексей. Роди же ся божественый отрок, яко же уведехом, в лето 6935-е месяца марта в 17 день при державе царя и государя самодержца Росискиа земля, скипетр держаща, великаго князя Василиа Василиевича Всея Росии, при великом князе Белоозерском Андрее Дмитреевиче при митрополи Киевском и всея Росии Фотее. Родителя же блаженнаго отрока зело// (л. 15) возрадовашеся душею, и прославиша Бога, и рекоша: «Что ти имам вздати противу сему (Пс 115:3), Человеколюбче, ли кая благодеяниа приимеши, Милостиве, аще бо и вси уди наши, глагола, всприиму, и вси власи наши всхвалят тя, и все тело наше пениа исполнится. Ни тако достойно воспети тя взможем, но елико взможем, толико и поминаем тя, Пресвятый, да и пророческое слово свершим: “Помянух Бога и взвеселихся” (Пс 76:4), иже не презревшаго молениа нашего».

По мале же времяни породиша и второе водою и духом, божественым крещением просветивша и. И убо божественыи отрок крепляшеся духом о Господе и растяше добре. Времяни же учениа достиже, и вдаша и на учение грамоте святым книгам от тамо сущих учителеи диакону некоему. Отроку же спешне некако изучившуся, божественому писанию извыкшу. Учител же // (л. 15 об.) его нача дивитися скорому его учению и спеху и рече в себе, яко да «от Бога дасться ему книжны разум, а не от моего научениа». Се же все бысть по смотрению Божию, «яко всяко даяние благо и всяк дар свершен свыше есть, сходяй от Тебе, отца светом» (Иак 1:17). И в един убо от дний идет освященный отрок Алексее, яко же ему обычай всегда приходити места оного в церковь Пречистыя Богородица Честнаго Еа Успениа, и припадает пред образом Господа Нашего Иисуса Христа и Пречистыя Его Богоматере, но со слезами рече, моля: «Господи Иисусе Христе, Сыне Единородный, яко оставив ложесна отча и небесная царствия, нас ради на землю сниде, всего начала и власти свлекся, во Пречистыя ложесна вселися, и утаився небесных сил, и рабий образ поноси, да спасеши человека. И ныне, Господи, вразуми ум мой, и отверзи очи сердечнии, и скажи ми безвестная и тайная, да разумею от закона // (л. 16) твоего, яко пришлець есмь аз на земли, не скрый от мене заповеди Твоеа (Пс 118:18-19), да подаси ми разум о всем, ищущему Тебе, яко благословен еси в векы. Аминь».

Божественому же отроку на земли лежащу и слезы многы проливающу, и абие явление некое явися ему, глаголя: «Востани, не бойся, а еже еси просил, то приимеши». И то слышав юноша от божественаго оного гласа, скоро встав от земля и благодарныя молитвы Богу воздавая, и отиде в дом свой, зело радовашеся, яко же Иоанн Лествичник в своих писаниих рече: «Сердцу веселящуся, цветет лице». Родители же его, видевше лицем свещася и душею веселящася, проразумеюще, яко от Бога таковому посещению быти, и тако пребывающе, благодаряще Бога о сих. И по том пакы начаша велию любовь к нему имети и несытным желанием по вся дни зряста нань, яко не токмо родителем его радоватися о разуме отрока, но ближним //(л. 16 об.)суседом их глаголати, яко с божественый отрок хощеть быти изряден, в добродетелех сиающи и телесном возрасте и благолепии, мнозеи премудрости. Бе бо отроча благообразно и весело душею, в учении же преспеваа день и нощ, внимая божественых книг чтениа и пребываа в всем повинуяся родителем своим. И тщешеся ни в чем же преслушати их, по божественому писанию, глаголющему: «Чти отца и матерь, да будеши долголетен на земли» (Исх 20:12).

Начат же и вздержатися, зело постом тело свое изнуряя, и в вся дни единою хлебу причашашеся и сего в меру некако и не до сытости. Многая же пища весма отшаяшеся. В нощи же нечто мало сна приимаше, яко дивитися родителем его чюдному вздержанию его. Не бо есть чин таковым сего зелнаго деланиа. Мати же его любезными глаголы увещеваше, //(л. 17)глаголющи: «Взлюбленое мое чадо, почто тако сокрушаеши си тело? Не веси ли, яко многая вздержаниа язву телеси наводит? Паче юну ти сущу и плоти цветущи, и нам сим немалу скорбь исходатаиствуеши. Темже, чадо, не преслушайся нас, но с нами причащайся вкупе пищи и сну, яко и мы». Благоразумный же отрок отвеща, глаголя: «Почто, мати, тако вещаеши ми, отлучая сладкаго ми вздержаниа, его же имущи, ничто же полезнеиши мню быти? Ни бо слышах родителеи чада на зло и неполезно учащих. Плоти бо угающи, удаляются от Бога. Паче же юну ми сущу и плоти воюющу, писано бо есть, яко «брашно и питие не поставит нас пред Богом» (Рим 14:17), но остани убо мене, мати, якоже начах, и свершити тако ми на се, Богу помогающу».

Мати же его удивляшеся премудрому ответу, паче же видяще еже по Бозе доброе его произволение, и рече // (л. 17 об.) ему: «Яко хощеши, чадо, творити, твори, взлюблене». И вздохнув, рече ему: «Послушаи, чадо, глагол матере своея, и реку ти, и сиа сказаниа вложи в сердцы своем». И начат ему вся поведати подробну, како моляшеся Святей Богородици и како чюдное видение явися и свет велий сиающь, и в свете же том жену светлообразну и в багряну ризу оболчену и светоносна старца. И сего показуя перстом, и реченныя от Нея глаголы поведа ему по ряду. Блаженныи же отрок, сиа словеса слышав от матере своеа, и удивися, и абие из уст еа слово исхитив, и рече: «О мати моя, слышу чюдо, и дивлюся, и разумею бо жену Пречистую Богородицю быти, но не вем, кто есть чюдный тои старець и где есть жилище его, или монастырь, или пустыни, жив ли или преставился. Не скрыи от мене тайну сию, от своего чада». Она же, осклабившися, умилно рече ему: «Чадо Алексее, како аз хощу у//(л. 18)таити, его же Господь Бог по всеи вселеннеи прослави чюдесы. Есть от нашея веси, якоже слышим, верьсть шестьдесят, глаголют, или мало нечто вдалее о шую страну Бела озера монастырь Кирилов имянуем. Той же Кирил в том монастыре игумен был, и велико житие по Бозе жил, и той монастырь составил, и церкви вздвигнул, и братию свокупил. И есть монастырь тои чюден и славим, и братиа велико вздержание имеют, и сам тои игумен Кирил в созданнем своем монастыре преставился, но не вем, колико лет по преставлении его, но токмо слышим многа чюдеса творит Бог от ракы его, память же преставлениа его творима бывает июня в 9 день. Мнози же и от нашеи веси хожаху на празник тои памяти его и ползу приимаху».

Божественый же уноша, слышав сиа словеса от матере своеа, и скры их в сердци своем (Ср.: Лк 2:19), и начат болми к подвигом по//(л. 18 об.)учатися. И николиже ум его уклонися, яко же обычаи младеньствующим, играти или смехотворнаа словеса глаголати, но в смеха место дряхлое плачевное хожение и, елико попечение о простоте имый, толико питаше ум свои премудростию и насыщашеся всегдашним вздержанием, вменяя в наслажение алкоту, и в время зимное наготу телесную. И бе видети разумом блаженнаго в детьском взрасте удивлен, яко и всем глаголати: «Ново некое знамяние отроча се будет», яко благодать Божия бе на нем, и отуду убо зачало премудрости приимаше – Божий страх (Пс 110:10), свосприимашеся божественыя любве день от дне, огнь ко огню прилагая желанием непременым. Славу же, и богатство, и вся, яже в мире, многомятежную и непостоятельну расужаше: и доброт зримых, и житиа обилие, и вся, елика человеческаа, яко сень вменяше. Много пищи // (л. 19)же, и веселие, и вся, елика человеческая, на земли суетна и не суща разумев, деснаго пути емлется, поучением божественых книг упражняется.

К церкви же по вся дни без лености хожаше, аще и далече жилище имеяше, но близ бяше верою и теплою любовию. Не повреди же его ни кая тварь, ни дневныи вар, ни солнечны зной, ни дождь, ни ярость зимная, ни лютость мразная, ни буря ветреняя, ни сланы, ни снези, по апостолу глаголющему: «Ничтоже не разлучить нас от любве Божиа» (Рим 8:39). И прихожаше, и послушаше божественаго пениа, и сам пояше, и почиташе житиа и поучениа святых отець, и внимаше, и тщашеся та вся собою исправити. Пощение же любляше и сухоядение, празднословиа же, смехотворениа безгоднаго и сквернословесных же и душевредных песнеи юношескаго желаниа, оскверняющих душу до конца, ненавидяше. Бе же благ //(л. 19 об.) и кроток, всеуветлив, нищелюбив же по премногу, наипаче же иноческый чин зело любляше и почиташе. Яко и самемь родителем его дивитися таковаго опасения отрока и благонравия, видяще во юне взрасте и не яко от них роженна, но яко в истинну от Бога даннаго. И яко в меру мужа прииде взраст его и бысть яко лет осминадесяти, и сие убо о сем тако.

О блаженнем отроце Алексее, како восхотеша родители его браку законному счетати.

Родителя же блаженнаго всхотеша его браку законному причтати, и божественый же юноша присно желаше и помышляше, како и коим ухищрением мира избежати и о всех злых похотей к Богу приближитися. И яко слышал бо бе от матери своеа и от инех о монастыре Кирила чюдотворца, и о постящихся в нем братии, и о прочих постынных монастырех, идеже Богу работают и спасаются. Бог же готов к молитве раб своих, сеи же яко от Бога научен, прииде ему //(л. 20)помысл, еже ити в Кирилов монастырь помолитися Спасу и Пречистой Его Богоматери и чюдотворцовы ракы приложитися, еже помыслив, хоте же и делом створити. И к родителем приходит и просит отпущение по обычаю и благословение с молитвою, глаголя: «Господие, аще обрещу пред вами благодать и благословен вами и отпущен буду, есть ми желание, еще же и обет мои положих (ныне и спутникы имам готовы), еже итти ми в Кирилов монастырь помолитися Спасу и Пречистой Его Богоматере и чюдотворцовы ракы приложитися и, аще укоснеть ми ся тамо, не прогневаитеся на мя». Отець же угодне ему творяше. «Господь с тобою, – глаголя, – чадо, да благословит тя и исправит путь твой». Мати же его, яко матерем есть обычаи, обьемши и целовавши и любезно, и отпустиста и с миром, заповедаста скоро взвратитися, не бо видяста и, яко не во ону обитель хощет итти, но яко // (л. 20 об.) источника живаго Христа приобрящет и да напоит душу его заплевшуюся огнем желаниа к Богу любве его.

Божествены же юноша, приим от родитель благословение, и тако исходить от дому своего, не имы у себе ничтоже, разве одежа и хлеба мало немощи ради телесныя. И отшед же блаженны от дому своего мало, и озреся издалеча, и виде дом свои, и рече: «Боже, Ты, рекый Аврааму, рабу своему: “Изыди от земля твоеа и от рожениа своего” (Быт 12:1), Ты же и ныне настави мя в страх Твои. И се убо оставих сый дом свой имени Твоего ради (Ср. Мф 9:29), и не затвори от мене двери царствиа Твоего». И плакався на мног час, и тако устремися блаженны в путь свой, радости наполнися многы. Скоро же и спешне пут шествовавше, и сь путникы своя постиже, и веселяся с подругы своими, течаше и малыми день до обители достизают // (л. 21) и близ монастыря приходять. И узрев же церкви Пречистыя Богородица, преже даже не внити ему в монастырь, пад лицем на землю, помолися Всемилостивому Спасу и Пречистой Его Богоматере.

И на долг час молящуся блаженному с слезами и глаголющу: «Благодарю тя, Господи мой, яко не отринул мя еси грешнаго и недостоинаго раба твоего, сподобил мя еси видети дом Пречистыя Твоеа Матере, и сподоби мя и сожителя быти, и спричти мя избранному Твоему стаду. Ты бо рекл еси в Святом Евангелии: “Приидите к мне, вси тружающеся, и аз покою вы, взмете ярем мои смиренным сердцем” (Мф 11:28). Тем же аз, грешный, надеяся святому ти словеси, “к Тебе прибегох” (Пс 142:9) и “к Тебе привержен есмь от чрева матере моеа” (Пс 21:11) яко ты еси прибежище и сила наша, и на тя уповающи, не постыдимся и яко благословен в векы. Аминь». И встав //(л. 21 об.) блаженный от молитвы, узрев дружину свою мало отшедшу. Он же скорее идяше, абие постиже их, приидоша же к вратом и видеша врята, вне врат стояща, и поклонишася ему, и рекоша: «Господине, скажи нас игумену, хощем от него благословени быти». Вратарь же, прешед, поведа их игумену. Игумен же повеле им прити к себе.

Они же, пришедше, поклонишася игумену до земля. Игумен же впрошаше вящаго имени и веси и «что есть прихожение ваше к нашему смирению?» Они же поведаша игуме весь ону и вящьшаго именовение, поведаша же и се: «И приидохом, господине отче, в святую сию обитель, помолитися Спасу, и Пречистой Его Богоматери, и чюдотворцовы ракы приложитися, и от твоеа святыни благословении быти, и от отець приати». И вдаша игумену на молебен, елико мога по силе.

Игумен же, егда с ними беседоваше, и часто взираше на оного уношу, рекомаго Але//(л. 22)ксея, и рече в себе: «Что се есть, яко уношу сего, велми взлюбих его? И ноне свем ничтоже» (яко благодать Божиа бе на нем). И не рече ничто же, и благослови их, и вда им приставника, да идет с ними к чюдотворцову гробу, да тамо приложатся. И по том идеть с ними к келарю, да поставит им трапезу и напитает их, и дасть им место особно, да почиют труда ради путнаго. Приставник же иде с ними к чюдотворцову гробу и по том к келарю. Келарь же напита их, место особно и почивание дасть им по повелению игуменову. Празднику же приспевшу Кирила Чюдотворца памяти, собрашася множество народное от многых стран и праздник честне праздновавше, духовне веселящеся и радостне проводивше, все же родное множество разиодошася кождо во своя си. Мы же на предняя взвратимся.

О блаженнем отроце Алексее, како остася в обители и родителем посылает грамоту запечатлену// (л. 22 об.).

Блаженный же отрок Алексее скрыся от дружины своеа и единому от друг своих поведа о себе, яко «хощу зде остатися, да пребуду неколико время». Родителем же своим посылает послание – грамоту запечатленну.

Человек же той, с ним же бе послание послано, приходить в дом Никифоров. И помолився образу Спасову и Пречистыя Его Богоматере, и по том поклонися Никифору до земя, такоже и жене его и рече: «Сын ваю Алексей челом биет». Никифор же вздохнув и рече: «Ох мне и горе мне беды сея. Что бысть чаду нашему? Где остася и почто не прииде с вами? Жив ли, или мертв? Скажи скорее, не медли». Тако же и жена Никифорова жалости многы наполнися и начат с рыданием неутешно плакати, и быв в дому Никифорове плач велий, и вопль мног, и рыдание горько, аки над мертвым. Суседи же приидоша, не могоша их увещати, ни от плача утешити.

Человек же той,//(л. 23) с ним же бе послание послано, ничто же успевая рещи, но токмо лица своего пот отираше, бе бо зной велий того дни и скораго ради путнаго шествиа его, аки река лиашеся пот его, но токмо рече: «О Никифоре, не плачи, не печалуй, сын ваю Алексей жив есть и здрав остася от нас». И сяг рукою своею в пчаг свой и взем грамоту посланную, и дасть Никифору. И Никифор же, взем грамоту, и вдасть ю диаку. Диак же начат чести в грамоте писанное: «Господие мои, родителие, сын ваю мнии Алексее, челом бию, не прогневаитеся на мя, да зде пребуду, служаи в обители сеи неколико время, и паки к вам взвращуся, угодная вам творя. Ведете, господее мои, яко николиже ослушахся вас, ни прекослових. Мнози бо суть от бояр, ини от вельмож и от простых людеи во обители сеи служаще, Бога ради тружаются, и, аще укоснет ми ся зде, не взбра//(л. 23 об.)ните на мя и о Господе здравствуите, господее мои». Никифор же, яко услыша таковое послание от сына своего, и велми оскорбися, и огорчися, с великою болезнью сердечною рече: «Аз убо скоро иду в монастырь той и, шед, с великым бесчестием возму его и, привед в дом свой, и тяшкая заповедаю ему делати, да не будет ми яко сын, но яко злыи неключимыи раб. Мы убо хотехом его браку законному сочтати, дабы с нами был до дни исхода нашего, и покоил бы старость нашу, и наследник бы был достояния нашего, и спожитиа, и спрятал бы кости наша. Аз же, егда питах дети своя и печаловах има, како вскормити в добре наказании и научити, не имея покоя ни во дни, ни в нощи, яко раб у господина без искупа работаа, хотя честь получити. И имениа своего не щадих, угодная им творя. И ныне, кто не посмеется нашему безу//(л. 24)мию и старости? И реку: “Сей человек в пустошь изжих дни своя”. Дети вспитах и распустих. Сеи же тамо отиде, а ин онамо. Кто покоить старость нашу? Или кто накормить нас или напоить? И кто спрячеть кости наша? Сын наю извыче Писаниа Божественая, а уму свершениа разума не имат, забыв писаниа святых отець: “Тогда сын свободен будет, егда спрячет кости родителя своего”. Сеи же сын наю от нас родися и вспитан, и от нас отиде, и нами не хотя пещися, и не хотя нас покоити, и празден хотя по вся дни ходити. А ведый писаниа святых отец, яко всяко зло по розности ражаеться». Сиа же вся изглагола Никифор от великиа жалости и тугы, не ведый, что створити.

Таже и жена его плакашеся и рече: «О чадо Алексее, что се створил еси? Утаил еси от отца помысл свои//(л. 24 об.). Почто ми не поведа, матери своеи, да и аз бых помалу увещала мужа, господина своего, отца твоего, да не скрушил бы сердца отца своего, не навел бы еси скорби мне, матери своеи? Ныне же аз двоего плача достоина, видящи господина мужа своего, печалию снедеема и истаема, и тебе, своего чада, лишаема. Уже не вижу тя на трапезе с нами седяща, ни с братиями веселящася. Ни слышим от уст твоих божественых словес прочитающися, ни смиренных твоих глагол вещающих, отринул еси любовь родитель своих, оставил еси в унынии братию свою». Сице изглагола плачевную песнь доброгласная ластовица. Бе бо видети позор жалостен и умилениа достоин. Кто бо весть, какова скорбь родителем о чадех бываеть? Скрушаеть сердце жалость, снедает печаль душу.

В то же время бы сын его стареи Амбросии, делая на селе своем с братиами и с // (л. 25) отрокы, и рече братиам своим: «Видите, братиа, яко день уже преклонился к вечеру. Солнце вечернюю постиже годину. Поидем в дом свои». И приидоша в дом свои, не ведый бывшаго, и слыша в дому своем плачь и рыдание, и ужаснушася, и реша в себе: «Что се есть? Яко нечто из незапы прилучися, беда некаа». И внидоша в храмину, и видеша родителя своя дряхлы, и унылы, и сетующа, и уведеша бывшаа, и начаша увещати родителя своя: «Господее наю, что смущаетеся? Что помышляете? Что скорбите? Почто ся еста печалию утомила. Сын ваю не на зло подщася, ни помысли зла, но благое изволи, не хотя погубити, ни скрыти в землю Богом дарованнаго ему таланта, но хотя им прикуп створити. Того ради преселися в святую обитель, да вящьшая навыкнеть, и болшая обрящет, и лучшая получит». Родителие же, яко услышаша тако словеса от чад своих и рекоша// (л. 25 об.): «Добрь глагол и благ свет сеи, добро есть его послушати. О Прещедрыи и Премилостивыи Владыко Царю, яко всегда богатно изливаеши милость свою на ны, идеже конечное изнеможение, тамо и болшую посылаеши благодать и недоумение, иже разрееть Господь, радости сердца наполняет». Никифор же, всю печаль на Господа взложив, и сына своего остави на Божии воли. Мы же сиа оставим, о нем же нам слово, о том побеседуем.