Добавил:
Upload Опубликованный материал нарушает ваши авторские права? Сообщите нам.
Вуз: Предмет: Файл:
Житие Александра Ошевенского_окончательный вариант для публикации.doc
Скачиваний:
0
Добавлен:
01.07.2025
Размер:
548 Кб
Скачать
☆

Чюдо преподобнаго Александра о исцелевшем юноше беснующемся.

Ино чюдо хощу поведати преподобнаго Александра. В граде Каргополе человек некый именем Александр, древоделатель, иже нашею речию зовется плотник, яко многыми знаемь бе ремесла ради. Бяше же сын у него имянем Иван, юну же ему еще сущу, не вем коею кознею диаволскою, и случися болезнь ему тяжка – лукавым духом обладану быти ему и мучиму. Егда же поразит его нечистый дух, тогда падает на землю, и пены тещит, и оцепеневаеть. Иногда убо неподобнаа дея, не могый глаголати отинюд, иногда же нелепаа глаголаше, яко же немощно слышати. И на много время зле вяжем бываше крепко и растерзаем бегаше, скитаяся в пустыни, и по стремнимнинам убивашеся, и паки обретаем бываше, и многими едва при//(л. 102 об.)влачим бяше в дом свои. И многажды же ему падающу же, убиватися от зелнаго мучениа находящаго беса. И тако на много время сему бывающу. Видевше же, родителие его глаголаху, яко «от Божиа попущениа бысть се грех ради наших». Умилно бе зрение и ужастно видение, доброден бе отрок образом и всем любим, и писанию божественых книг измлада извыче, и пению осмогласному научився, и красну песнь Господеви пояше.

И егда же приидеть тяжкы тои недуг нань, тогда же от диавольска деиства во един час всему изменение бысть, видение страшно и ужаса исполнено: лице развращено, очи искревлене, благолепие отпаде, и вся красота исчезе, гласу пременение бысть. Иногда, яко скот, рыкая, иногда же, яко пес, лаяше, и всем нелепая глаголаше, и всех биаше, и никого же знаяше//(л. 103), и никого же бояся. Родители же его, видевше такое мучение чада своего, недоумешеся, что сотворити, и много же к святым молебнаа повелевше пети, малу ползу обретше. И пакы приасте от Бога добр помысл, помянуша чюдеса преподобнаго отца Александра, началника Ошевеньского монастыря, и начаша его призывати его в молитвах своих к Господу, глаголюще: «Господи, помози чаду нашему, яко зле бесится, молитв ради преподобнаго отца Александра». И абие в том часе отроку Ивану облегчаше ему недуг, и нача смыслено глаголати, и со слезами моляшеся, глаголюще: «Господи, помилуи мя, яко зле стражу. Можеши мя помиловати, аще восхощещи». И потом вкуси брашна, и бысть радость родителем его, и изыде отрок из дому своего. Поведашеся, яко негде ко своим сродником на орудие идяше, и прииде ему помысл идти во обитель,//(л. 103 об.) у чюдотворцова гроба Александрова приложитися, яко да тамо прикосновением ракы святаго до конца получит исцеление. И пути касается, и бысть шествие его скорее коннаго течениа, тако Богу помогающу ему. И приходить во обитель и, вшед во притвор, припадаеть ко гробу святаго, и облобызаеть раку его, и молит прилежно, и слезит тепле, сице глаголаше: «О великый чюдотворче, преподобне Александре, похвала нашея страны, северныя Онежскыя земли, помилуи мя беснующагося, да и аз буду проповедетель чюдесем твоим». И плакася на долг час, и потом приходить ко игумену, и молит игумена, дабы молбы сотворил о нем. Игумен же, скоро шед, молебная свершаеть, и благослови его, и посает его к келарю, да напитает его и дасть ему место на почивание и приставника на б//(л. 104)режение.

И нощи же приспевше, тако же много зла пострада от бесов, многыми бо страшными виды являхуся ему. Отроку же от таковых мучиму, и яко в тонок сон сведен бысть, и видит преподобнаго Александра, в светлых ризах пришедша. И абие от видениа святаго без вести быша бесове, и, взрев преподобныи на отрока, и рече ему: «Аще хощеши, чадо, до конца исцеление получити, то постригыся в нашем монастыри и буди инок, и тако исцелееши». И по сем невидим бысть.

И взбнув же юноша от видениа, и никого же виде, токмо позна себе здрава от болезни и размышляше о видение: «Аще изыду от обители, то в тая же или горша сих впаду и буду непотребен никому же, то лучьше мне быти иноком и здраву сущу». И пребысть тако мало время, и пострижеся, и наречен //(л. 104 об.) бысть Исаиа, и оттоле бысть здрав, яко николи же что пострадав. И по том же пребысть во обители неколико время и прочее отиде, пребываше в великых обителех, бысть клирик, искусен инок и мнозими знаем бе, иногда же в пустынях пребывая, славя Бога и всюду проповедая чюдеса преподобнаго Александра.