О явлении преподобнаго Александра, како посети игумена Максима

Празднику же приспевшу великого Чюдотворца Николы успению, и Божиими судбами бысть теплота велиа, якоже речеся: «Послет слово свое и растает я, и дхнет дух его, и потекут воды» (Пс 147:7). Снегов же водою раслияшеся, и не бысть путнаго шествиа на возех, но и пешим нужно хожение бысть.

Игумен же Максим в недоумении бысть о сем и помысли в себе, глаголаше, яко «на праздник сеи никто не будет к нам от приходящих гостеи. Мы же убо тщи надежи, якоже преже рехом, яко ни нужная имеяхом, и неколико время ни сеятвы, ни оратвы //(л. 77 об.) не бысть, но токмо от христолюбець приносимыми питахуся. Ныне же убо что створим? Понеже скудость хлеба и мало рыбиць блюдомо на время гостеи ради». И сиа же помыслившу, и всхоте праздник без службы оставити. Се же все бысть Божиим изволением, а не игуменовым хотением, ни леностию. Всхоте бо Бог своего угодника Александра дарми чюдес прославити и игумена от маловериа в веру привести, да и во прочая времяна веровати начнет чюдесем святаго. И бысть же, в навечерии праздника вечерняя пениа певше, братиа же разидошася кождо в келиа своя. Игумен же, шед в келию свою, и седе, помышляше и недоумеяшеся, что сотворити. Абие вздремася мало, и слышит гремение дьскам, и види в видении из гробници исшеша старца светоносна образом, грядуща к келии его. И пришед ко окон//(л. 78)цу келиа, сотвори по обычаю молитву. Игумен же отвеща: «Аминь». Старець же к игумену рече: «Како, брате, хощеши таковый праздник без службы оставити? Не буди того ни помыслити, ничтоже рассужаа, ни размышляя, и не буди неверен, но верен (Ин 20:27). Вся бо недостаткы ваша Бог исполнить. И праздник честне проводивше, еще же изобилуеть, и в прочая времяна неоскудни будете». Игумен же, егда зря святаго и чюдися, едва позна преподобнаго Александра, а многажды его в животе сем видал. И абие взбнов от сна, и не виде никогоже, страхом и трепетом одержим, и чюдеси дивяся, славя Бога и преподобнаго Александра чюдотворца и посещению его радуяся веселою душею. И рече в себе: «Что се будет?», дондеже сбышася вся.

Игумен же, скоро шед к пономарю, и повеле ему просфиры печи. Сам же иде в келию свою, и нача готовитися к службе, и всю//(л. 78 об.) нощь моляся, бес сна пребываше. И в то же время бысть буря велиа, и слани, и снези, и пакы уяснися небо, и бысть тишина велиа, и примерзе снег к мокроте леда, и устроися путное шествие, яко же и прежде. Се же все бысть в мало время. Сия вся устрои Всещедрыи Бог, прославляя своего угодника преподобнаго Александра. Гости же со станов своих идоша, и бысть им путное шествие легко. Шествие же творяху к граду к Каргополю с езер с рыбою, и прииде множество гостеи, и сташа препочити противу монастыря об ону страну рекы. Игумен же повеле по обычаю звонити заутренюю, и начаша пети, и приидоша гости оне, и даша в монастырь множество рыб от всякого рода их малых и великых, свежих и просолных. И даша игумену на молебен кождо их, елико кто мога по силе. Игумен же должнаа молебнаа обещавается к Богу воздати о них, еже и бысть.// (л. 79)

И одарив их благословением, и отпусти их, они же идоша в путь свои. И посем приде множество народа от окрестных стран, везуще с собою в монастырь ин сребра, другыи от хлеба всякого жита, привезоша же и печеных хлебов множество и всяко требование. Игумен же и братиа, радостнии бывше и молебная певше, гостем же всем православным христианом честь воздающе, духовне веселящеся, праздновахом радующеся, друг с другом ликующе. И честне праздник проводивше, и всенародное множество разидошася кождо во своя сии. Игумен же всеи братии исповеда бывшее видение и посещение и вся по ряду сказа им, еже рече ему святыи. Братиа же, слышаще сиа, хвалу вздаша Богови и преподобну Александру, угоднику Божию.