О собрании поселян и со инокы совокупление о игумене

Празднику же пакы приспевшу Пречистыя Богородица Честнаго Еа Успениа, поселяне же веси тоя собрашася, елико же их бяху, и начаша глаголати иноком: «О господне отци, что сее есть ваше пребывание зде? Игумена несть у вас и нам великая нужа о том, священнику не сущу. Ныне убо оставите место сие. Можеть Бог и инде питати вас. Мы же себе начнем добывати священника белого по своему изволению, яко же есть обычеи мирьскым человеком». Тои же прежереченныи старець, имяни же его не яви нам писание, токмо беседу его от слышаниа уведехом и разума духовнаго рече//(л. 71) к поселяном тако: «Лучши есть нам алчюще гладом и жажею умрети зде, на месте сем, нежели оставити святое сие место, и поучение, и наказание отца нашего игумена Александра, надеемся на Бога и на молитвы отца нашего, яко не оставит Бог святых трудов его и ныне, аще хощете, свокупимся заедино. Есть верх нашея рекы Чюриюгы храм молебный, зовомый часовня, и есть старець, живый у храма того, имянем Варлам, а саном священник. И мы ныне позовем его к себе в монастырь жити. И есть у него сын Матфей имянем, а ныне диаком у нас. И мы его начнем увеща, да будет нам игумен и вам священник».

И послаша по Варлама, по старца. Прииде же Варлам к ним по совету их, начаша братиа глаголати к нему: «Господине Варламе, поиди ты к нам в монастырь и пребуди с нами до дни исхода своего, а сына своего увещаи, да будет нам игумен и отець, такоже и миряном будет священник их //(л. 71 об.) ради нужь». Варлаам же отвеща, рече: «Аз убо к вам иду, а сына моего сами увещаите, и аз с вами». Призваша же диака Матфея и начаша глаголати, во едино согласившеся иноци и миряне, рекуще сице: «Господине Матфеи, ты ныне у нас диак, аще Бог изволит и твое будет желание, покажи к нам таковую любов и буди нам отець и игумен». Матфеи же начат отрицатися, яко «не мое есть дело, не могу толика бремяни понести, мал помысл имея и худ разум, еще же сам не научився, како инех не могу наказати? Иже рече Господь в евангелии: “Врачю, исцелися сам” (Лк 4:23). Подобает преже себе научити, таже без зара люди учити. Како учитель хощу зватися, ни ученик мога быти, еще же юну ми сущу? Како отцем нарекут мя – отрок есмь млад? Ныне оставите мя на время». Прилучижеся ту велможа некый, иже бе ключник прежереченныя оноя бояры//(л. 72)ни Настасии, Яким имянем, Яковлев сын, жилище имея в веси некоеи, зовомая Усть-Волга. И тои такоже начат увещати. Матфеи же рече им: «Престаните ныне, донелиже помыслю о себе, и наутрие отвещаю вам». Уже бо бе вечер, и разидошася, и совещавшеся на утрие собратися. И на утрие пакы собрашася, и тако же начат увеща Матфея, якоже и преже. Бе же человек у них в веси тои вящьши в то время Левонтеи имянем, иже бе брат преподобнаго Александра по плоти. Тои же паче всех прилежнее начат увещати Матфея. Матфеи же рече к Левонтию: «Постригы же ся и ты, Левонтие, и буди строя монастырь, то и аз буду игуменом». Такоже и вси рекоша: «Добр есть глагол сеи и благ свет, добро есть послушати гласа сего. Уже подружие проводил еси и не имаши никоеа споны, а дети же своя поручи Богови, доброму строителю».//(л. 72 об.)

О явлении трех святых мужех, како виде Марко земледелатель, и о создании церквеи Божиих, и о устрении монастыря, и о игумене Максиме.

В то же время бе ту человек Марко именем, зовомый Спица, тоея прежереченныя веси зовомыя Усть-Волгы, иже бе знаем Акиму оному велможи, жилище имея единоя веси. Отозва же Якима от сонма и в таине наедине начат Якиму Марко поведати: «Господине Аким, аз видех в нощь сию чюдно видение, и дивно зрение, и ужаса исполнено, и неизреченно сказание, и страшно поведание. Видех, господине, на монастыре и коло монастыря множество древес великых и малых и множество людеи, делающих человек: секуть, рубять, тешуть, колють, церкви вздвизають, келии ставять, монастырь огражають. Аз же видех сиа, ужаснухся и страхом одержим, и стоях, зря, и чюдихся страшному видению, и помысли и рече в себе: «Что есть се, откуду се толико народа в пустыни сеи?» И мало позрех, и видех три мужа ходяща. И два бе//(л. 73) в них светоносна образом, сединами украшена. Един же в них в святительскую одежю одеян, образом взльк, власи главни, аки волна чиста, браду имея круглу, а в руце держа крест и крестом же огражая и благословляя место и делателеи. Другый же светоносныи старець, такоже сединами украшен, браду имея немалу, яко до перси, тои же хожаше, имея в руце своеи воду святую, и окропляя, и благословляя тако же место и делателеи. Третии же старець взрастом среднии человек, и тои бе образом умилен, власы имея русы, брада невелика и не велми густа, в полысед. Сеи же в руце имеа кадило, тои же пакы хожаше, покажая место, и делателеи, и благословляя такоже. Четвертыи же мало вдалее последи их хожаше, сеи млад бе, взрастом немал, и приидоша же близ мене. Аз же зрех и почюдихся доброте ею и светлости лица их, и, пад, по//(л. 73 об.)клонися има до земля, и востах, и познах третиаго в них, иже среднии возрастом, игумена Александра, началника месту сему. Он же, видев, и позва мя к себе. Аз же, пришед, поклонихся ему и рек к нему: “Повежь ми, отче, истинну, да услышу от неложных твоих уст, кто еста сиа святая светоносная мужа, иже зрак ею удиви мя, яко николиже тацех мужеи видех образом тем в житии моем, якоже сия”. Преподобныи же Александр тихо рече ему: “Сего ли не позна, иже есть первыи тои, иже ты пред образом предо стоя, всегда молишися ему? Тои ест славныи и великый в чюдотворцех Николае”. Аз же рех: “Да что бе дело ему зде и почто прииде семо?” Преподобныи же рече ко мне: “Како не разумееши, яко есть зде храм в имя его? Он же прииде посещати храма своего. Господь же повеле ему снабдети монастырь тои, хранити место то”. Аз же рех: //(л. 74) “Не взбрани ми, отче, еще вопрошу тя, скажи ми: другый же святоносны тои, иже воду святую ношаше, кто есть и како имянуеться?” Александр же рече ему: “А то есть преподобныи игумен Кирил, зовомый Белозерьскый чюдотворець”. И Марко рече: “Отче, и сеи убо что ради прииди семо, толик путь преиде и кем позван бысть?” Александр же рече ему: “А то есть отець нашь, и наставник, и учитель, понеже пострижение имех яз в его монастыре. Того ради ученик его имянуюся. Аз же, егда бех в тленнем житии, он же многажды мя посещая и укрепляя на подвигы, а иногда же в болезни посети мя и молитвами его здравие получи. И ныне же молих его, да приидет посетити место сие”. – “А сеи убо младыи старець, и сего же аз не вем, повежь ми, отче, и се”. Александр же рече ему: “А се есть диак Матфеи, живый во обители сеи. Ныне по Божию изволению отци наши устрояют его и благословляють//(л. 74 об.) во обители сеи в мое место игуменом быти и предают ему монастырь” и Марко рече: “И еще, отче, не прогневаися на мя воспросити единаго словеси. Аще ты ми не повеси, от кого увем истинну? А се, отче, толико народа в пустыни сеи… И откуду сии собрашася и кто можеть сих препитати?” Александр же рече: “Чадо Марко, Бог, сздавыи сих и совокупивый их, и посла к нам на помощь, можеть тои и напита их. Ты же, чадо, не дивися чюдесем Божиим неизреченным, иди Богом в созданную обитель сию, в нашь монастырь, и постригыся, и буди тамо до дни исхода своего. И устроят тя пономархом, иже есть стражь церковныи (еже и бысть по словеси святаго), се, чадо, поведаю ти, аще кто стерпить на месте сем, благодаря Бога со многым смирением и покорением, надежю имам на Господа, не лишен будет милости Божиа. Тако же и ты, //(л. 75) чадо, приимеши жребии с нами и мздовоздание от Бога по своему труду”. И сиа рек, прочее отиде. Аз же, взбнув, и не видех никогоже, и начат дивитися великому тому сну и страшному видению, и сие убо помыслих тебе поведати сиа».

Яким же яко услыша сиа глаголы от Марка, и вздохнув, и рече: «Благо тебе, брате Марко, яко не лиши тя Господь милости своеа. И блюди сиа словеса в сердце своем, и не забуди наказаниа преподобнаго отца Александра, и свершаи делом повеленная словеса святаго, а на месте же сем восиаеть великая благодать Божиа, церкви вздвигнет Господь, и место распространиться, и обитель умножиться, и всем довольством исполниться по словеси святаго», еже и бысть. И пришед пакы Яким в собор, и начат прилежнее увещати Матфея и Левонтиа, еже пострищися обема, и обещается помогати монастырю . Левонтии же, слышав //(л. 75 об.) таковая глаголы от Якима, ничто же не помедлив, ни отлагая, и рече: «Аще Бог изволит, а аз готов есмь на таковое тщание». Тако же и Матфеи, совещавшеся оба пострищися – Матфеи и Левотеи.

Яким же, дав в монастырь от скот своих, от конеи двое и от доилиць двое млека ради, и вда им хлеба от всякого жита, иже бы им доволно и до новаго хлеба, вда же им и семян на довольство их, и всякыми нужными вещми помогати им хотяше и посещати их начасте, и вда им милостыню, и, взем от них благословение, и отиде в своя си. Левонтеи же остави сына своего вящьшаго в своем пребывании. Сам же иде в монастырь, взем с собою два сына – Максима и Конана. И вдасть Максима служити на братию, а Конана же вдасть на учение святым книгам диаку некоему, во обители пребывающему, Семиону имянем. И абие спешне ему научившуся, //(л. 76) и было писаному грамоте горазд и потом пребыв в тои же обители диак время немало. Матфеи же и Левонтеи постригостася оба, постриже их Варлам старець священиик саном, преже постриже Левонтиа, нарече его Левада имянем, потом постриже сына своего Матфея, нарече его имянем Максима. Леванид же остася в монастыре, попечение имея о обители.

Повеле же Леванид клириком и диаком писати житие преподобна Александра, понеже он ведый известно святое житие его, и чюдеса виде, и пророчествиа святаго вся збышася, клирици же писаша памяти ради. Максим же поиде в великый Нов град, абие пути емлется. Бысть же ему путное шествие строино по суху и по водам Божиею помощию, и не по мнозе времяни обретается в великом граде и приходить ко архиепископу. Архиепископ же Сергии, видив, и благослови его, и повеле ему сести, и вопрошаше его многыми словесы о монастыре, и довольстве, и о устроении. Максим же исповеда ему вся о себе и о монастыре, яко место нужно бе и пустынно. Архиепископ же, видев его млада суща и смирена, проста мужа и незлобива, //(л. 76 об.) и, ничтоже истязав его, освяти его священиа саном, и сверши его игумена, и поучив его от божественых писании, и духовными беседами наказав, и дасть ему грамоту игуменьскую. Игумен же Максим, взем грамоту и благословение от архиепископа, и отходит в монастырь свои и тако благодатию Христовою доиде до обители.

Варлам же, и Леванид, и вся братиа стретоша его. Игумен же благослови их всех и о Христе целование дав им, и внидоша в церковь великого чюдотворца Николы и, молебная певше за праславного царя великого князя, и за архиепископа, и за все православное христианьство, и возведен бысть на место игуменское. И поучив братию доволно, и разидостася кождо во своя келиа, бе бо уже приспе вечер. Игумен же Максим начат пребывати в монастыре.

Малу же времяни мимошедшу, есени минующе и зиме належаще, водам и блатом померзающим, //(л. 77) яко же рече: «Противу лицю мраза его кто постоит?» (Пс 147:6). Снегови и слани на землю падающе, якоже реченно бысть: «Дающаго снег свои, яко волну и мглу яко пепел посыпающаго» (Пс 147:5), яко же и всегда бывати Божию строению, человеком же купцем преходящим сюду и овамо, на возех тружающимся, куплю деющим, мала же нам о том беседа, впред почтем и тамо ину ползу обрящем.