О прихожении пришлець и о разношении вещей монастырьских.

По преставлении же преподобнаго отца нашего Александра неколику времяни минувшу, и быша мнози расколници и крамолници, пришелци странии, ереи и диакони, клирици и иноци, мало пребывше, и отхожаху, ин от книг, а ин от риз церковных, а другый от одеж, и обувении, и от иных вещеи, видящи никим же блюдо//(л. 69)мо, ни брегомо, не убояся суда Божиа, ни вечних мук не устрашихся, аще и писаниа божественая ведуще, а горши неверных творяще. Мнози убо и погани спасаются, а сии ведущи закон, немилостивно осудятся. Аще кто чюжая восхищаеть, неправдою и своя с сими погубит, а ин же и живота зле гонзнеть, тако же и сии, вся сиа забывше, аки татие и похищници, вся разграбивше, и разидошася, и разнесоша. Братию же оставиша в велице негодовании, и скорби, и сетовании, яко ни нужная имеяху в мнозе стужении – алчнии, и жаднии, и назии. И от великиа нужи разидошася, толико пять их осташася на месте том, но и те престаревшеся денми бяше, а инии болнии.

Поселяня же веси тоя, видевше место то, никим же бремо, ни блюдомо, тако же прелстившеся, и начаша угодия монастырьскаа осваивати, и к своим угодиям присовокупляти. Иноци же в велице уничижении и нужи бяху//(л. 69 об.), видевши церкви Божии запустение, иерею не сущу, и место оскудение, яко уже ни оратвы, ни сеятвы не бысть, но токмо от христолюбець приносимыми питахуся. И пребысть же тако по преставлении преподобнаго множае осмих лет, тако изволившу Богу.

О скорби инок

Иноци же, стуживше сии велми, и начаша к себе с плачем и рыданием глаголати сие: «Что сотворим, яко уже изгибаем? И како сядем, и что имамы ясти и пити, и во что одежемся? (Мф 6:31)» Брат же некый в них, ни святым книгам учився, ни писани ведущи, но исполнен разума духовнаго, начат увещати братию, сице глаголаше: «Слышесте ли, братие, иже рече Господь в святом Евангелии: “Не убоитеся малое мое стадо, яко благоизволи отець вашь дати вам царство” (Лк 12:32). Мы же со Иевом речем: “Аще блага прияхом от Бога, злых ли не терпим?” (Иов 2:10). Еще же и се поведаю вам: егда убо отець нашь и наставник преподобный Александр поведа нам свое к Господу отхожение, тогда вся сиа прорече нам стра//(л. 70)нных пришельцов прихожение, и отхожение, и разграбление, и разношение, и еже на нас от них озлобление и уничижение. И терпети повеле нам на месте том, донелиже последнее речение пророчества святаго исполнится, еже и бысть по смотрению Божию. Мы же плакахомся, глаголюще: “Сам, отче, ко Господу отходиши, а нас сирых оставляеши”. Он же обещася неотступно духом с нами быти, мы же тогда не велми внимахом, ныне же уведехом, яко вся пророчествиа святаго на нас сбышася». И ина многа старець ко утешению братии глаголаше: «Еще мало претерпим, да надежи не погрешим. На Господа надежу возложим».

Како восхоте Бог преподобнаго Александра дар <обрезано>

Восхоте же Бог болми своего угодника дарми чюдес прославити, аще не восхоте святыи славы человеческыя в животе и по смерти, но крепкая десница Господня прослави его, иже бо рече Господь: «Прославляющаго мя прославлю» (1 Ц 2:30). //(л. 70 об.) И сего святыя его помощи в забвении не оставит Господь, да и храм великого чюдотворца Николы бес пениа не пребудет и место святых трудов его не оскудеет, яко же прорече святыи: «Аще обрел буду благодать пред Богом (Быт 18:3), то не оскудеет святое сие место, но и болми распространиться по моем отшествии», еже и бысть строением Вышняго Бога.