О приходе блаженнаго отрока ко игумену.

Божественый же отрок остася от дружины своеа, и обрете время потребно, и приходить к игумену, пад, поклонися ему до земля. Игумен же рече ему: «Кто ты еси, чадо, како име твое, и от коеа веси, и какое требование хощеши от нас?» Юноша же рече к игумену с великым смирением: «Приидох, господине отче, к твоеи святыни, желаю твоего благословениа и молитвы. Веси же есмь оноя Вещеозерьскыя. Имя же мо//(л. 26)е Алексеи нарицаюся. И требование мое се, молю твою, отче, святыню, яко да приат буду тобою в святую сию обитель, служаи на святую братию, елико мога по силе». Игумен же зряше внутренима очима на юношю, видя его смирение и душевную чистоту, и глагол его в сладость послушаше, и разуме хотящую благодать явитися на нем и рече ему: «Хощеши ли, чадо, инок быти и Господеви работати?»

Юноша же отвеща к игумену: «Ей, отче, в истинну желаю, но еще не у время, понеже младу ми сущу, боюся общаго врага, запеншаго прадеда нашего и многых святых поколебавша, егда некогда покрадет мя враг, прельстив, отведет мя от правды Божиа, и уподоблюся нисходящим в ров. Ров же имянуется адово дно и тму греховную. Да не буду в “позор ангелом и человеком” (1 Кор 4:9) и во смех лукавым бесом. И аще, господине отче, // (л. 26 об.) повелит твоя святыни, да пребуду тако служаи на святую братию, искушу юность свою поне за три лета. И Бог же мира (Ср. Рим 15:33) человеколюбием и многою благостию прииметь на наша худыя труды уведанная и на лучшая позовет ны, и тои наша соблюдет душа и телеса чиста и нескверна, и дух непорочен, и живот непременен, нелицемерно братолюбие, девство неокрадомо, поспешение непреложно, добродетель непременну, правду непретыкающуся и надежду неблазнену, и вся полезная устроит. И ныне, святый отче, еже прошу, то и да и получю от твоеа святыни». Игумен же яко услыша не простаречива, но от Писаниа божественых словес, и рече: «Чадо, учился ли еси святым книгам?» Юноша же отвеща: «Мало, отче, измлада отчасти навыкох, но небрежении пребых». Игумен же рече: «И се ти, чадо, будет на велик успех // (л. 27) к твоему спасению».

Игумен же приат его, и благослови, и посылаеть его к казначею, да вдасть ему одеяние и обувение вся потребная. И по том посылает к некоему диаку разумну и искусну, ведущу Писаниа божественная. Добродетельный же отрок, пришед к диаку, и поклонися ему, и рече к нему с великым смирением: «Придох, господине, к тебе по повелению игуменову, да мя накажеши, яко поселянина и невежю». Диак же он, видев его смирение и покорение, и приат его с любовью, и начат его наказати не яко ученика, но яко брата приснаго за многое его смирение и послушание. Божественый же юноша болми нача вздержатися, и постом, и бдением, и молитвами тружаяся, и часто книгы чести, и к церкви по вся дни без лености хожаше, и послушаше пениа и чтениа божественых писании, и внимаше. И учителя //(л. 27 об.) же своего во всем послушаше, и чистяше, ни в чем николи же преслушаше его, но в сладость глагол его послушаше, и не дасть же ни единому словеси его пасти на землю, и научи же ся всякому добронравию, и извыче всему благочинию, и бе правдою и беззлобием украшаяся, наипаче же любляше душевную чистоту, с нею же всяк узрит Господа, поминая Господне речение, еже рече Господь: «Блаженни чистии сердцем, яко ти Бога узрят» (Мф 5:8). Дьяк же он, учитель его, нача дивитися таковому вздержанию отрока и добродетельному житию его, наипаче же взлюби его. Отрок же пребываше в обители, своею службою печашеся, како угоднаа створити, тружаяся по вся дни, делая своими руками, и всех послушаше, и всем угодная творя, и от всех любим бе.

И лету же мимошедшу, празднику приближающуся Кирила //(л. 28) чюдотворца преставлению, той же Никифор прежепомянутый вспомяну сына своего и рече: «Иду аз ныне в Кирилов монастырь, и помолюся Спасу и Пречитой Его Богоматери, и у чюдотворцовы ракы приложитися, и вижю пребывание сына своего, и взму его в дом свой. Аще всхощеть, оставлю его и другое лето тамо пребыти, но токмо да вижю его».

Никифор же пути касается, и малыми деньми путь преиде во обитель, и приходит к игумену, и поклонися ему до земли, и рече: «Благослови, отче». Игумен же виде его человека доброзрачна, и благослови его, и рече: «Бог да благословит тя, чадо». И вопроси его: «Кто ты еси, чадо, и от коеа страны еси, и како имянуешися, и что есть прихожение твое к нам, и кое требование хощеши от нашего смирения?» Никифор же рече к игумену: «Господине отче, от страны убо есмь северныя Белаозера, веси оноя Вещеозерьскыя //(л. 28 об.), Никифор имянуюся, от людей зовомы Ошевен. Приидох, господине отче, во святую сию обитель помолитися Спасу и Пречистой Его Богоматери и у чюдотворцовы ракы приложитися, от твоеа святыни благословение прияти, и от отец молитвы, да аще повелит твоя святыни, да вижю и сына своего». Игумен же рече: «Кто есть сын твой?» Никифор отвеща: «Отче, есть убо сын мои служаи на святую братию в обители сеи имянем Алексеи».

Игумен же по обычаю монастырьскому вдасть ему приставника, да идет с ним к чюдотворцеве раке приложитися и по том к келарю. И повеле игумен келарю, да вздаст достоину честь Никифору, напитает различными брашны и питием доволно от квас житных и от меду (вина же и пива – таковым в монастыре том не обретатися: таков бе закон их от настоятеля) и место особн//(л. 29)о дати ему на почивание от труда путнаго. И приставник же иде с ним в гробницу к чюдотворцове раке и по том к келарю. Келарь же вздаст достоиную честь Никифору, и питаше его различными брашны и питием доволно, и беседоваше с ним полезными словесы. И в то же время повеле келарь приставнику, да, вшед, взвестит диаку Алексею приход отца его Никифора.

Алексей же, услышав, скоро прииде и поклонися образу Спасову и Пречистыя Его Матере и, взем от келаря благословение, и падает на землю к ногам отца своего с умилением и слезами, и просит благословениа и прощениа: «Согреших, отче, не веде твоего прихожениа зде». Никифор же рече ему: «Бог простит тя, чадо». Егда Никифор доволен бяше пища и питиа, и взем от келаря благословение, идет к сыну своему в его пребывание, да тамо почиеть. Келарь же повеле приставнику носити квас к Ни//(л. 29 об.)кифору, елико ему довлеет, и позываше его в трапезу к пению и к ядению.

Никифор же с сыном своим приидоша в храмину, и поклонишася образу Спасову и Пречистыя Богоматере, и видит обиталище сына своего и брежение от игумена и от братии, каковы покои, данный ему. И похвали Бога, и рече в себе: «О Владыко Человеколюбче, слава неизреченнеи милости Твоеи и благоутробию. Что вздам Ти за вся, яже на мне твориши, благая подавая мне, грешному?» Алексеи же, пад на нозе отца своего, и жалостныя испусти слезы, и умилныя глаголы изрече: «О отче, прости мя, прогневах же твою старость и огорчих же твою утробу своим замедлением и небрежением. Но паче надеяся на твое милосердие и чадолюбие, ныне же, отче, не вем, что створити. Что велиши рабу своему? Но токмо хвалю Бога о сих и “вспою Господеви, благодеявшему мне, и пою Богу моему//(л. 30), дондеже есмь” (Пс 103:33), яко сподобил мя еси, Господи, видети родителя моего, да наслажюся видя доброту старости твоеа, да взвеселюся, зря седины твоя, и облобызаю нозе твои, ими же потрудися мене ради. И что, отче, вздам ти противу труду твоему, яко мене ради толик путь преиде, ища своего овчати заблужьшаго или яко чада погыбшаго? Кто виде такова чадолюбива отца, яко же ты, отче, на мне сотворил еси? Не оставил еси, посещая мене, своего изчадиа». И кых жалостных словес и умилных не рече отцу своему и множае сих с многым рыданием слезным?! Отец же его Никифор умилися о реченных от сына своего, и обьем его, и рече: «Встани, чадо». Он же, встав, и облобыза его отець его, и охапив сын отца своего, и мног час плакашеся, и, едва от плача преставше, седоста.

Начат же Никифор сыну своему от жалости с слезами поведати вся по ряду, како «прииде к нам человек тои//(л. 30 об.), иже от тебе посланную грамоту принесе, и, яко услышахом в грамоте писанная словеса, и тако ми болезнено и жалостно бысть, яко не надеяхся уже видети тя на сем свете, чадо мое взлюбленое, тако же и мати твоя от того дне и доныне и ни единого дни не вкусих хлеба без плача и без скорби, аще бы не Господь утешил сердца наша, слыша тебе здрава». Начат же и Алексеи поведати отцу своему бывшая, како остася от дружины своеа, и како игумен приат его с любовию, и каково от игумена и от братии брежение бысть ему и покои. И показа отцу своему одеяния различная червлены, и багряны, и иными различными цветы украшены. И рече Никифор: «Вижю, чадо, Богу поспешествующу тебе, и видение плачь слуха уверяеть. Ныне, чадо, аще хощеши, и другое лето пребуди зде». Блаженный же отрок от//(л. 31)веща: «Не остану тебе, отче. Ты убо, отче, толик преиде пут мене ради, понуди свою старость, и иду с тобою, и утешу печаль матере своеа, и буду с вами до дни живота вашего, угодная вам творя, и хотел бых, отче, еще пребыти зде, но не смею рещи за прогневание твое».

Отец же рече ему: «Чадо, аз убо не искушая, ни лукавьством тебе глаголю, но истинну реку ти: аще хощеши, остани зде. Аз же видев твое пребывание, яко благодать Божия, яже в тебе, не тща будет, и благодарю Бога о сих. И шед в дом свои, взвещу матери твоеи пребывание твое, и отиму скорбь от нея, и утешу печаль еа, и взвеселю братию твою. Ты же, чадо, пребуди зде, донелиже Господь повелит тебе и егда будеши и нам в утешение в скорбех наших». Алексеи же и рече отцу своему: «Аще се, отче, тако, то Бог исполнить любовь твою». И скратиша // (л. 31 об.) о том слово, и скончаша беседу. Никифор же взлеже препочити. Алексеи своею службою печашеся. Мы же сиа почетше, похвалим Бога и на предняя глаголы добре подвигнемся.

О празднице Кирила Чюдотворца и о народном сбрании.

Празднику же приспевшу Кирила Чюдотворца преставлению, множеству народу сбравшюся от различных стран: князи и бояре, и велможи, и сановници, и священници, и крилици, и купци, и земледельци богатии и славнии, и неславнии, велици и малии, стари и унии, мужи и жены, нищи и убозии, болнии и недужнии. И вси радостно праздноваху и духовно веселящася, ликующе друг с другом, купно тржествующе, слышаще божественая пения и чтения святых отец поучениа, видяще славима и хвалима Господа на земли, яко на небеси, со страхом и трепетом. И тако же видяще и слышаще чюдеса Кирила Чюдотворца, кто исповесть нечетную милость щедрот Божиих и кто может // (л. 32) сказати неизреченное человеколюбие благости его? Коликими чюдесы прослави Господь своего угодника на земли чюдес дарованми и болшими дарми почти его, иже не мощно и усты человеческими изглаголати, якоже писание глаголеть: «Яже око не виде и ухо не слыша и на сердце человеку не взыде, еже уготова Бог любящим его» (1 Кор 2:9). Яко же рече Господь в святом Евангелии: «Прославляющаа мя прославлю» (1 Ц 2:30). Тако же игумен с братиею вси купно о Бозе праздноваху, и честно с любовию благодарно хваляще Бога, и молебнаа певше, Господа славяще и гостем же коемуждо достоинную честь вздающе, напитаа их различными ядми и учредив их многыми брашны и питием доволно от квас житных и от медов различных сладостми. Князеи же, и бояр, и вельможь, и сановных дарми почтоша их от вещеи монастырьскых, яко же апостол пишет: «Вздадите убо всем долгы, ему же урок урок, ему же дань, дань, ему же страх, страх,//(л. 32 об.), ему же честь, честь, ни единому же ничим же должни будете» (Рим 13:7).

Празднику же мимошедшу, все же народное множество разидошася кожо во своя си. Вси же идяху радующеся, никто же не изыде тощь, не получив Божиа милости: ин слышав пениа божественаа, благодаря Бога, ин же чтениа святых отец учениа насладився, другый же славя Бога и чюдесем Кирила чюдотворца дивяся, недужнии здрави быша, болнии исцеление получиша, нищи и убози от христолюбец милостыню приаша.

Той же предреченыи Никифор приходит к игумену и просить благословениа, да идет в дом свои. Игумен же, поучив его от божественых писаний и наказав духовными бесадами, и дарми почте его от вещеи монастырьскых, и благослови, и отпусти его. Тако же и сын его Алексеи дарми одари отца своего Никифора, елико ему Бог дарова, такоже и матере своеи посла //(л. 33)дар, елико довлееть. По том же и о братии своеи всем убо по разнеству. Бяше бо братиа его: вящи Амросий, вторый Лукиан, третии Леонтии, а четвертыи, тои Алексеи. Проводив же Алексеи отца своего вдалее пяти поприщь, любезно целовавшеся и умилныя слезы испущаше, разидошася. Алексеи же взвратися в обитель, своею службою печашеся. Никифор же иде в дом свои, радуяся текый, яко забыв старость от радости, яко благо нечто обрете и всприим, и благодаря Бога о сих.

Пришедшу ему в дом свои, и стретоша его домашнии его, и видящи его радостна и любовно к ним глаголюща, тако же и они весели быша. Вшед же в храмину, и поклонися образу Спасову и Пречистыя Его Богоматере, и седе, нимало же помедлив, начат вся по ряду поведати бывшая, како в обитель прииде, и како игумен с любовию благослови его и приставника дасть // (л. 33 об.) ему, и каково келарево брежение бысть ему, и како чин монастырскыи виде и пениа слышав, и чюдеса виде и слыша, и како игумен, поучив его от божественых писании, и благослови, и отпусти, и дарми почти его, и сына своего пребывание, и покои данныи ему, и здравие поведа им. И взем из влалища дары, и да жене своеи от сына своего. Она же, взем, от радости жалостныя испусти слезы, яко сына своего, зряше дар его, тако же и детем своим подаде дары от брата их. Они же в любовь прияша, и поклонишася, и возрадовашеся, слышаще брата своего здрава и славя Бога о сих. По том же Никифор пребывая, благоденьствуя, забы уже печаль о сыну.

Летом же некоим мимошедшим , и повеле Никифор устроити питие, и створи пиршество, и созва//(л. 34)ша си, и прииде, и хощет Богу сосуд избран быти. Божественыи же уноша с многым смирением отвеща к игумену глаголаше: «О честныи отче, яко провидець всяческих Бог, преведя мя к твоеи святыни, спасти мя хотяща и елика аще велиши ми, отче, створити, повеленаа тобою вся сотворю. Но токмо причти мя к братии». И тогда глагола к нему игумен: «Благословен Бог, чадо, укрепивый тя на се тщание. Отселе буди работаа Господеви, служаи братии с всякым терпением и покорением, купно же и послушанием». Се же слышав от игумена божественый юноша, пакы поклонься ему до земля и тако остризает власы главы своеа, вкупе же со отятием влас отлагаеть и долу влекущаа мудрованиа. И нарекоша имя ему Александр, бысть же взраста тогда 25 лет, егда прият иноческыи образ.

Оттоле же //(л. 34 об.) преподобныи Александр весь предався Богу, и вдаваше себе на труды многы, во вся нощи бдяше, и моляшеся без лености во славословениих же сонною тяготу отлагая, во дни же делом телесным изнуряя плоть свою, тружаяся, руками своими делая по вся дни, воспоминая Павла апостола: «Праздный да не ясть» (2 Фес 3:10). Вспоминая же и псаломьское слово: «Вижь смирение мое и труд мои и отпусти вся грехи моя» (Пс 24:18). И пребываше же ту, и тружаяся с братиею, и прилагаше труды к трудом, с всякым вздержанием смеряше си душу. Тело же свое трудом и подвигом томяше, душю же молитвою и постом питаше. И потом блаженны в пекарню посылается и тамо, добре терпя, тружаяся, пещь ражжигая и знои терпя: воду на плещу ношаше, и дрова сечаше, и тесто мешаше, и хлебы печаше, и к братии приношаше // (л. 35) мяккы и теплы, тако же и теплыя молитвы от них приимаше. И створи в тои службе время немало. И потом от настоятеля посылаем бывает в поварню, и тамо тако же своею службою печашеся, яд на братию готовляше строино и потребно. И велми тружаяся, муча тело свое, в день от огня угараем, а в нощи студению померзаем, и оттого умиление велико стяжа.

И пребысть же в тои службе неколико время, повинуяся игумену и братии, и вся службы манастырьскыя заповеданная строино прошед с всякым терпением, и послушанием, и кротостию зелною. И тако же преже всех обреташеся в церкви и, став на своем месте, непоступен сыи пребываше, ни умом мятяшеся, божественое славословие совершаа, и тако последи всех из церкви исхожаше. Тем же и вси, видяще его толикы тру// (л. 35 об.)ды и смирение, не яко человека или яко брата, но яко отца или яко ангела Божиа посреди себе имеяху. Игумену же и всии братии дивитися великому его смирению, и покорению, и толику во юности благонравию, и укреплению, и бодрости, и велми прослависта от себе Бога, и реша в себе: «Что створим, яко тако видим мужа сего подвизающася? А ни что же вещающа с всяцем тщанием, яко раб некый без искупа работая без всякаго прекословиа».

И внят же слухом блаженный Александр, словеса сиа тяшко си вменив себе, и рече к себе: «Что створю аз? Бо грехы моа продахся прародительска осужениа в раи. Сам бо владыка Христос образ положи и подписание сиа повелениа его, еже хранити заповеди его, яко же мощно, сам бо рече пречистыми своими усты: “Иже кто хощет вслед мене и//(л. 36)тти, и возмет крест свои, и воследуеть по мне” (Мф 16:24). Луче ми есть отлучитися, да поне честь приемлю и покои от подобных человек, и всуе труд мои будет, да некако тело изнурив, а мзды лишуся».

«Не может бо град укрытися верху горы стоя» (Мф 5:14), хотящих очима зретися, ни добродетелных мужеи богоугодное житие не возможе утаитися. И впиют Господу в таине и творит их явленны, рече бо: «Славящая мя прославлю» (1 Ц 2:30).

Снедашеся утробою блаженныи Александр, и отселе уразуме себе блаженны, яко велик быти мняшеся, и видя себе чтима от игумена, и от братии, и от всех хвалим, и славу имяше от человек многу. И о сем преподобный, еже славитися, яко студ и грех вменяше. Попечение же имяше много о сем, еже бежати славы человеческиа. И помышляше безмолвиа путь гонити и работати Богу//(л. 36 об.).

О приходе блаженнаго ко игумену, да просит благословениа и отпущениа ити во области Каргопоскиа к родителем.

Во един убо день приходить блаженный к игумену, и припадаеть, и молит, и просит благословениа, и отпущениа с молитвою, и открывает таиная помышлениа своя, и не таить вину предложениа, и помыслы сердца своего исповедаеть: «Есть ми, отче, помысл, еже итти в области Каргопольскыя, да вижю тамо родителеи своих и прииму от них благословение и последнее прощение». Игумен рече: «Слыши, чадо, апостола Павла, глаголюща: “Изыдете от среды их и отлучитеся и нечисте мере не прикасаитеся. Аз прииму вас и буду вам отець, и вы будете мне сынове и дщере” (2 Кор 6:17-18). Многажды и сам Господь наш по плоти родителя остави и от некых слышав: “Се мати твоя и братия твоя ищут тебе” (Мк 3:32). Вскоре наш Господь учитель бестра//(л. 37)стную ненависть рече – показа нам, рек: “Мати моя и братиа моя си суть, творящеи волю отца моего, иже есть на небесех”» (Мк 3:34-35). Буди тебе отец, иже о бремяни греховнем потрудитися с тобою могыи и хотя, мати же – умиление, отмыти тя от скверны могуще, братиа же – иже к тению горнему споболеваа. И беседуя стяжи сжителницу не отторжену память исхода, чада же ти да будут вздыхаиа сердечная, рабы притяжи свою плоть, другы же – святыя силы, яже в время исхода успех ти могут створити, аще друзи ти будут – сеи род ищущим Господа (Пс 23:6)».

Александр же рече к игумену: «Есть же ми, отче, и другый помысл, дабы негде обрел место наедине седети в пустыни, и безмолствовати, и трудитися». Игумен же подивися неугодному его прошению, никако же попусти сему быти и к нему глаголаше: «Ни, убо, чадо, неполезно ти се, еще уну ти сущу, еже на е//(л. 37 об.)дине седети. Но угодно ти с братиами в общине пребывати. Яко же Иоанн Лествичник в своих писаниих глаголють: “Единому горе, – рече, – яко аще впадет в уныние или сонь, или разленение, или отчаяние, несть и вздвижа и его в человецех”, а “идеже еста сбрана два или трие о имени моем, ту есмь посреде их”, рече Господь (Мф 18:20). В обители живущи, братиа друг друга назидает и друг друга укрепляеть, а егда прилучится недуг или скорбь, брат же убо, живыq с тобою, или ин некый брашно устрояеть, и ядь готовит, и питие подаст, и своима рукама подимет, и на одр положит, нося полезнаа управляет, и всяко послужит. А егда приидет спона некаа от диавола, и братиа вси соборне о тебе Бога молят. Ты же не хощеши у игумена в послушании быти, и ни единаго дня с братиами жити мирно, и на братию послужити, Господа //(л. 38)ради потрудитися и своего ради спасения. А труд, еже есть по Бозе, несть без мзды. И хощеши един седети, а не ведыи кознеи диавольскых, не утвердивше ногу на корени перваго степени общаго житиа послушанием, верха молчанием и единества касатися и без времени своеволне водитися. Все бо подобно в свое время, и ныне убо приял еси помысл, еже изыти из обители. Ненавидеи же добра враг, видев твое повинутие, из монастыря изведет тя, и от братии отлучит тя, и гордостию надмет тя, и величанием возвысит тя, и вложит ти помысл: “Сяди убо зде на едине. Бог питати тя имать. Уже в обители искусился еси и в пустыню уединился еси, никому же работен еси, токмо единому Богу, ни служащаго имея, но пребуди уча люди, и учителскую мзду от Бога приимеши, и доволен //(л. 38 об.) будеши, от того питаяся”. Ты же, повинуяся помыслу сему, яко благу, начнеши безделне пребывати, ни молитвы, ни труда держатися, и учитель хотя быти, ни ученик мога быти. Аще недуг лучится, кто ти послужить или напитаеть? А егда ненадежна некаа от общаго человеком врага или от мужеи крови на пустыни тебе прилучится, и от всех поносими будем, твоеи воли повинувшеся». И тако взбраняеться. Се же не без Бога бывает, паче благости щедрот его изволение.

Блаженны же Александр и о всех повинуется игумену: «Воля Господна на нас, -- рече, – честныи отче, да будет» (Иов 1:21). И бе видети тощно текуща в послушании братии, и всем, иже в нужных работах, помогаа, и много тружаяся, смирениа же ради многаго всем любим бе и удивлен. В дни убо в потребах плотьскых служаше братии, в нощи же в молитвах, и стояниа обно//(л. 39)щная многа имех, яко бесплотна мнети или тело име некако жестоко и одушевлено, и доле легание же, и множеством коленнопоклоняниа умершвяше си плоть. Хлеба же и воды по оскуду вкушаше, юностный изнуряше цвет. К сим же зимою померзаше. Ризою же худою и многошвенною доволен бываше, точию плоти прикровение. Сице творя, немилостивый сый враг бываше телу своему, яко игумену и всеи братии дивитися таковому рвению его и благопременению его, иже тако вскоре жестокаго пути усерьдно шествовати взлюбльша, еже в многих мало обретается.

Пребыл же блаженный неколико время, помышляюще же ему о сем, паче же Богу помагающу и наставляющу на пльзу («творящим заповеди вся поспеется во благое» (2 Рим 8:28), и о сем впиет пророк Богоотец Давыд: «Сердце скруше// (л. 39 об.)но и смиренно Бог не уничижит» (Пс 50:19)).

О приходе блаженнаго ко игумену второе.

И по мале времяни пакы приходит блаженны к игумену, припадает к ногама его, просит благословениа и молитвы от него, да благословен и отпущен будет. Игумен же видев его смирение и умиление, и прозряше, яко благодать Божиа бе на нем, и моление его приемлет, и тако к нему глаголаше: «Бог да благословит тя, чадо, яко Господеви годе, тако и будет» (Иов 1:21). Аможе Богу изволшю, на то и ведяшеся.

Блаженныи же Александр, благословен быв от игумена, радости наполнися, и слезам многым от очию его изливатися. И помолився на мног час Всемилостивому Спасу и Пречистеи Его Богоматере, изыде от монастыря, ничто же взем, разве потребную ризу и мало хлеба немощи ради телесныя. Богу же поспешествующу ему, пути касается, и немногыми же денми плаваниа путь преплы, и достизает до Каргополя, и оттоле приходит//(л. 40) в весь, глаголемая Слобода, да видить и пребывание родитель своих. И пришед в дом отца своего. Никифор же, видев сына своего в такове скорби суща (бе бо лице его изменилося от многа труда и вздержаниа) и, охапився, ем и, плакався горко, едва мало утешився седе. Никифор же начат сыну своему поведати пребывание свое, како преселися в Карголь, и како место то обрете, и в Нов город ходил, и грамоту слободскую взял у боярина оного, и како вселися ту, и «ныне благодарим Бога о сих, яко самовластни есми, а насилия уже не творит нам никтоже, яко уже забых всех прежних скорбеи».

Начат же и Александр отцу своему поведати: «Аз же, отче, яко услышах ваю отшествие в далныя страны, вилми оскорбися о сих, яко и самого того хлеба без слез не могох вкусити, якоже псаломскаа книга глаголет: “яко забых снести хлеб мои, и от глас вздыханиа моего прилпе кость моя плоти моеи” (Пс101:5-6), “и кости моя // (л. 40 об.), яко сушило, сосхошася” (Пс 101:4). “И питие мое с плачем растворях” (Пс 101:10), “яко тысяща лет пред очима моима, яко день вчерашнии, иже мимоиде” (Пс 89:5). “Кто есть человек, иже поживет и не узрит смерти и избавит душю свою из рукы адовы?” (Пс 88:49). И ныне хвалю Бога о сих, яко смирил мя Господь». Пребыв же Александр мало время, пакы в обитель хощеть взвратитися. Никифор же начат увещати Христова слугу: «Чадо Александр, поиди на обону страну рекы нашея и створи себе ту селитву и еже жити на потребу, и спасение да твориши души своеи. И аще Господь всхощет, ты же вздвигнеши храм Божий и по том взградиши монастырь, а место же оно угодно к монастырьскому зданию, токмо да не отлучишися наю, родитель своих. И егда же умреве, ты погребеши тело наю, тогда пакы ввратишися в монастырь свои или, яко хощеши, и сотвориши: шед в монастырь един, //(л. 41) спасешися; зде же, аще Бог повелит, многы душа ко Христу приведеши и спасеши. Ты же, чадо, помысли о себе, кая мзда болши есть – сиа ли, или она, еже спасти себе единого или еже с собою множаишую братию». Александр же, услышав таковаа словеса от отца своего, и абие умилися о глаголех сих, помысли и рече: «Иду и аз, дозрю места оного, аще будет воля Господня, может Бог и дело створити».

Во един же от днии блаженны Александр, встав заутра и взем с собою брата своего стареишаго, и идоша на обону страну рекы, и обьхожаше многа места, и приидоша на некое место, яко Богом наставляеми. И усмотрь, яко угодно бе на лаврьское устроение. Округ же места того инуде блата и дебри, места непроходна. Сие взлюби место преподобныи и постави крест, яже ношаше с собою, и, преклонь колени, моляшеся.

Молитва: «Иисусе Христе, Сыне Бога Живаго, упо//(л. 41 об.)вание всем концем земли, надежа и прибежище мое Ты еси, призри с высоты небесныя, от святаго жилища твоего, и виждь место сие, и благослови е и мене, недостоинаго раба твоего, сотвори мя достоина быти в настоящем месте сем, и прославитися имени Твоему Святому, и в имя угодника Твоего Николы Чюдотворца храм вздвигнути, и обьщии монастырь сздати. Но не яко аз хощу, но яко тебе, Христе, изволшу, и ты, Господи, настави мя. От Тебе бо вся возможна суть, и прославится Твое Пресвятое имя в векы. Аминь».

И по молитве седоста, и абие блаженый вздремася, и легце усну сном, и слишит с манием глас глаголющь, именем того зваше «Александре, угодниче мои, се ти уготовах место, идеже ныне самозван пришел еси. Сотвори себе селение, и пребуди зде, и спаси душю свою. Се будет ти покои в векы веком. И тобо//(л. 42)ю мнози спасение улучат». И абие в тои час, взбнув от сна, и никого же виде, от гласа же оного радости многы наполнися, и почюдися Божию посещению и оному неизреченному званию, и рече в себе: «Се отныне, Господи, обет мои полагаю, еже пребыти ми зде в вся дни живота моего, и иду в монастырь свои, и взем от игумена благословение, и прииду на место сие. “Се ми будеть покои в векы веком. Зде вселюся, яко же Господь Бог изволи” (Пс 131:14). И иде в дом отца своего радуяся, яко искомое обретох, и в себе дивяся бывшему, и приидоша в дом отца своего, и поставиша им трапезу. Они же, напитавшеся, отец же виде его весела и любовно глаголавша, и начат его впрошати, аще угодно есть к монастыскому зданию место оно. Александр же рече: «Велми, отче, угодно. Но аще воля Господня будет, аз же обещахся, еже быти ми на месте том». Никифор же виде усердие усердие сына своего и любовь к Господу, и прилежнее начат его увещати: «И се ти//(л. 42 об.), чадо, поведаю. Аз не мню быти просто место оно, еже ты виде, но благодати Божии некое и восиати нам светом. Се же не аз един, но и мнози поселяне, живущи близ места того. Многажды слышах иногда звони, иногда же гласи поющих, а иногда лучю некую видех, озаряющу места то. Ты же, чадо, прииди на место сие, на не же Богом позван еси, да церковь вздвигешь, и монастырь споставиш, и братию сбереши Божиею помощью. Аз же радуяся буду работати Богу, на устроение Богом сзданои обители, елико сила наша может помогати. Ты же, чадо, не забуди обета своего». Александр же с клятвами закляся отцу своему, еже не преступити обета, аще Бог произволит. И свещает со отцем своим послати послание грамоту к отцу по времени наяти делателеи, еже приготовити лес на создание церкви,//(л. 43) на поставление келиам, на устроение монастырьское. И пребысть же блаженны у родителеи у своих мало время, и взвратися в монастырь свои. И се убо о семь тако.

О приходе блаженнаго в монастырь.

Блаженныи же, пришед в монастырь, и приходить к игумену, и просить благословениа и о замедлении прощениа, и молить игумена и братию о приятии. Игумен же, ведый житие его богоугодное и добронравие, нимало не истязав, ни в новоначалных поставляеть, благослови его, и прият его с любовию, и устрояет его клирика. Блаженныи же в вящи чин прииде, и вящешии добродетели стяжа, и велико усердие показа, и всех преодоле смирением, поминаа в паметь писанаа, яко «проиду в место крова дивна до дому Божиа в глас радованиа исповеданиа шуму празднующаго» (Пс 41:5), «да насладяться в веселии, вспоите Богу, поите имяни Его» (Пс 67:4-5). И пакы рече// (л. 43 об.): «“Крепость моя и пение мое Господь. Бысть мне в спасение в селех праведных” (Пс 117:14–15). “Гласом ко Господу взвах, гласом моим к Господу помолихся. Пролию пред ним молитву мою и печаль мою пред ним взвещу. Егда исщезаше от мене дух мои”» (Пс 141:2–4). И сие вспоминая на всяк день. И от сего велико умиление бысть ему бысть ему, и о исходе душевнем велми печашеся, и слезным источником изливатися от очию его. И пребысть же блаженный в том чину неколико время.

И потом свещает игумен с братиею, священьству сподобляют его. Блаженны же взят чин священническы и, чисте служа, жертву принося Богу, служаше по неделям, якоже и прочии священници, и, егда прост бываше, и паки в поварню отхожаше или в хлебню и много помогаше братиам в служьбах. Никакоже обленихся, ни превознесеся мыслию священьства саном, не уподобися оному ленивому рабу, не скры в земли дарованного ему //(л. 44) таланта, но сторичныи прикуп хотя принести господину своему (Ср. Мф 25:14–30), и тако пребываа служа пречистым таинам, повинуяся во всем настоятелю своему. Сам же посылает грамоту отцу своему, да повелит готовити лес на сздание церкви и на поставление келиям.

О приходе Александрове к игумену <нрзб>

По неколицем же времяни пакы блаженный приходить к игумену и просит благословениа и отпущениа с молитвою, да идет на преже реченое ему место. Игумен же не всхоте по воле его створити: «Чадо, не остави обета своего, еже рекл еси терпети до последняго издыханиа». Блажении же тепле молит игумена и с умилением и слезами и исповедает ему вся по ряду: звание гласом дивным на место оно и свои ответ и клятву, еже не преступити обета, и отца своего глаголы слышаниа звон и гласи поющих. Игумен же, видев его к Богу желание, и не просто отпущаеть его, посылаеть с ним брата некоего искусна //(л. 44 об.) инока, ведуща добре чин монастырьскыи. И благослови их, и отпусти с молитвою, и вдасть ему на утвержение непобедимую помощницу – образ Пречистыя Богородица, иже есть Одигитриа, на руку имеа Превечнаго Младенца, и другую икону – образ Николы Чюдотворца. Есть же те образы и доныне во обители, Богом блюдоми, в притворе над гробом преподобнаго отца нашего Александра, всеми зрими.

Блаженный же с братом онем, взем от игумена благословение, взя же с собою потребная, пути касаются. Идоша некая веси, зовомое Короткое. И оттуду вседоша в насад, и отплыша в Каргополь, и дошед веси, глаголемыя Слободы, жилища родитель своих. Родители же взрадовашеся о приходе блаженнаго. Он же возрадовася, дошед родитель своих. И поставиша им трапезу, да напитаются и потом почиют от труда путнаго, бе бо уже вечер. Наутрии же блаженный, //(л. 45) встав, нимало помедлив (уже бо бе осень, празднику тогда приспевшу Рождества Пресвятей Богородицы), и иде на преже реченое ему место, и створи сень, и сдела киот, и вложи в нем образ Пречистыя Честнаго Ея Одигитрия и другую икону – образ Николы Чюдотворца. И пад на землю, пред образом Пречистыя со слезами моляшеся.

Молитва: «О всемилостивая Владычице Богородица, Мати Христа Бога, услыши моя молитвы, грешнаго и нестоинаго раба твоего, се ныне прибегаю в твое теплое заступление, требующа твоеа помощи, на Тя бо по Бозе надежю взложих, но сама настави мя и схрани мя от уст пагубнаго змия, зияща пожрети мя, и спаси мя, на сем месте хотяща Богу работати и молитвы всылати к Всещедрому Богу о благоверном царе государе нашем, и христолюбивых князех, и за вся христианы о спасении и о утвержении, понеже убо спасение их и у//(л. 45 об.)крепление, покои бываеть нам и бесчание. Даждь тихо и безмолвно житие поживем с всякою благою верою (1 Тим 2:2) и прославити имя Твое святое в векы. Аминь». И встав от молитвы, и обыде место по лаврьскому устроению и расчинии, и наят делателеи, и начат преже келию ставити. И свершиста вскоре Божиею благодатию, и начат жити в неи в трудех и бдениих, с слезами Бога молити. Наят же делателеи и церковь рубити и созидати, отца своего Никифора нарядчика и дозирателя делу приставляеть, а сам поиде в Великый Нов град.

Старца же с ним прешедшаго молит с собою итти. Брат же он не преслуша вся, поиде с ним и, взем потребнаа, пути касаются, шествие творя к Великому Нову граду// (л. 46).

О приходе преподобнаго к архиепископу.

Бяше бо святому путь благостроен по суху и по водам, и не по мнозе времяни обретеся в пресловущем Нове граде. И приходит к архиепископу, и поклонися ему до земля и вину пришествиа своего исповедает. И рече: «Владыко святыи, архиепископ Иона, в Каргопольскои области есть волостька, Слобода зовома, над рекою над Чюриюгою, и обону страну тоя рекы есть место угодно к монастырьскому устроению. И аще Бог всхощеть и твое благословение будет, и храм вздвигнем. Повели, святыи владыко, дати святость антеминс на освящение церкви. И потом Бог поможет, твоими молитвами составим пустыню или монастырь обрадим, благословени игуменом». Архиепископ же благослови его, и повеле ему сести, и вопрошает его многыми словесы о божественом писании, и о прочих вестех наедине, и о постриже, и о пребывании, и о довольстве земли на устроение монастырьское. //(л. 46 об.) Александр же исповеда ему вся, яко бе о пострижении, о пребывании, о довольстве земли к монастырьскому строению. Архиепископ же поразуме по виду и по зрению разума и смысла его, яко раб Божий бе, и освяти его священьства саном, и сверши его игумена Богом созданнои обители Ошевнева монастыря (тако и прозвася), и вда игумену Александру, яже достоит монастырю на потребу, и грамоту игуменскую настоятельскую настолную, и повеле дати на священие храму святости антеминс, и благослови, и отпусти и с миром. Игумен же, приимше от архиепископа благословение, и отиде прочее.

О приходе игумена Александра к Настасии боярыне.

И прииде Александр ко онои боярыне к Настасии к Ивановьскои жене и к сыну еа Юрию¹. Она же, видев его старца искусна, тихим лицем и смирена взором, и, не проста его мнев, и встав поклонися ему и рече: «Благослови, отче». Игумен же благослови еа. О//(л. 47)на же повеле ему сести и начать его впрошати: «Откуду, отче, и что ради прииде к нам, и которое требование хощеши от нас?» Игумен же начать тихим и смиреными глаголы поведати еи, да бы еи сладко слышати: «Слышах, господыни, о тебе, боголюбная жена, боярыни Настасиа, яко имя твое славно в человецех добродетелнаго ради житиа и яко велию веру имееши к Господу Богу и к святым его. Приидох же аз возвестити тебе сиа. Аз есми грешныи чернец имянем Александр, а саном игумен есмь с Онегы рекь (от вас зовется), из заволочиа Каргопольскыя области. И есть вашея области над Чюриюгою рекою волостка, зовомаа Слобода, и об ону страну рекы тоя есть место угодно к монастырьскому строению и, аще воля Господня будет и твоя вера к Богу, повели нам вздвигнути церковь во имя великого чюдотворца Николы и монастырь стро//(л. 47 об.)ити, даи землици к монастырьскому строению, и от Бога мьзду велику приимеши, да и мы с тобою поне малы жребии по своему труду». Она же боярыни, яко слыша таковыя глаголы от игумена, воистину боярыни верою, юже к Богу имея и к святым его, скоро встав, и паде на землю перед образом Спаса и Пречистыя Его Богоматере, и умилно с слезами начат молитися, и рече: «Слава тебе, Христе царю. И благодарю тя, Господи, о сих, якоже псаломскаа книга глаголеть: “Яви нам, Господи, милость свою и спасение твое даждь нам. Услышу, что речет о мне Господь Бог, яко речет мир на люди своя, и на преподобная своя, и на обращающа сердца к нему, обаче близ боящихся его спасение его, вселити славу в землю нашу” (Пс 84:8—10), яко же мрачныи день преиде и к вечеру доиде, уже к захожению солнца приближаяся, и мрак отимется, и солнцу ясно сияти // (л. 48) и просветити всю вселенную, и обреяти всю землю, тако и мы свое житие изжих в мраце неведениа и в тме неразумея. И ныне, Господи, даждь нам праведное солнце, Христос, освети нашю отчину зарею своего божества, и устрои, Господи, обитель в последняя лета живота нашего в нашеи державе». И обратився к игумену, и весело и умилно возрев на него, и пад, поклонися ему, и жалостию рече: «О отче, благословенна Богом уста твоя, яко такову весть принесл ми еси и таковыя глаголы изрекл ми еси. Аз же не мню тя яко страника и пришелца, но мню яко от Бога посланна посетити мое смирение. И ныне, отче, обьимаю нозе твои, и целую плесне твои. И Господь Бог изочтеть стопы твоя, и по твоему труду вздасть ти мзду».

Игумен же умилися о глаголаных от боярыны и рече: «И встани, господыни боярыни. Аз убо изуме//(л. 48 об.)хся, стоя, мудрым словесем твоим и сладкых глагол твоих вещанию, и аз противу сему не могу что рещи и не мню тя, яко жену, но яко мужа мужествена или яко философа мудра. Аз человек грешен есмь, недостоин и слышати таковых словес, еже изрекла ми еси». Она же рече: «Ныне, отче, не престани от полезныя повести, возми, еже просил еси, дам ти колико угодно будет. Аще хощеши, и волостьку дам ти». Александр же помысли в себе и рече: «Аще испрошу всю волостьку к обители, то оскорблю родитель моих и уничижу братию свою, они же вознегодуют и прочее отидут, – и рече: – Даи ми, господыни, на довольство земли к монаскому устроению и угодная на реке на волоков к пожням. А устроит Бог монастырь, может Бог и питати, а волостьку же сама имеи». Настасиа же рече: «Аз, отче, совещався с сыном, велю написати таковы грамоты, каковы тебе угодны, и дам ти». // (л. 49) И дасть игумену достоиную часть, по вся дни питаше его различными ядми и питием доволно. По мале же времяни Настасиа призва игумена и дасть ему четыре грамоты.

Первою грамоту Настасиа дает и сын еа Юрий дали о том игумену Александру, что дали Николе Чюдотворцу в дом и на монастырьское строение земли и лесу. И игумену тое земли не осваивати, ни окняживати, ни обояривати, ни продати, ни заложити, ни за долг не отдати, что та земля домоваа Николы Чюдотворца и монастырскаа вековаа. Игумену на тои земли поставити церковь в имя Николы Чюдотворца и монастырь строити. А другую грамоту дали о том, что дала Настасиа с сыном земли и лесу Николе Чюдотворцу в дом. И начнет игумен з братиею называти жильцов и садити откуд нибуд, ино с них нет наших по//(л. 49 об.)шлин ни которых, ни нашим пошлинником. А третью грамоту даеть Настасиа о том, что пустых наволоков по Чюриюге по реке и те на волока придала Николе Чюдотворцу в дом и монастырю, игумену з братиею, по тем наволоком пожни расчищити, а «ключнику нашему Лытке и христианом наволоков дела нет». А четвертую грамоту та даеть Настасиа о том, что «есмя придале Николе Чюдотворцу в дом и игумену з братиею деревеньку Лисициньскую, опричь ободные земли. И ключнику нашему в то не вступатися». И дарми одарив игумена Настасиа и брата, с ним пришедшаго, и отпусти их. Игумен же, поклонься соборне и церкве святеи Софеи, и прочим святым церквам, и отходять во сво сии, нося доволное на устроение церковное монастырьскыа потребы. И тако благодатью Христовою строино достизают оби//(л. 50)тели и приходят к отцу своему. Никифор же виде пришествие сына своего, взрадовася и стрете его, и облобызастася и, шедше во храмину, и седоста. И начат Александр отцу своему поведати по ряду приход свои к архиепископу, и како благослови его архиепископ, и грамоту дасть ему настолную игуменьскую, и антеминс повеле дати, и как к боярыне к Настасии ходил, и каку веру боярини к Господу Богу показала и к нему любовь, и грамоты подавала на соружение церковное, и на строение монастырьское, и своеи душе в спасение в вековую милостыню. И те грамоты и доныне во обители суть в память и в похвалу славнои жене онои боярыне. И тако благодатию Божиею свершиша церков и трапезу на собрание братьству, и освяти церковь священием в имя святаго чюдотворца Николы. И тако пребываше, постническое имеа житие, и вздержанию зелному //(л. 50 об.) прилежа и всенощном бдению, посту же и молитве. И кто исповесть, елика он добр мужь исправлениа показа? И многы напасти от бесов претерпе в трудех, и хожении, и потове неисчетнии, еже имея о составлении монастыря, делаше своима рукама, еже на потребу монастыреви.

Малу же времени мимошедшу, брат он, иже пришедый с ним, виде его велии труды, и страдание, и зелное вздержание, и жестокое пребывание, не може понести таковаго труда, и место нужно, пустынно и непроходно, не имея ни коего покоя, и еще же и зиме належаще, всхоте прочее отитти. Преподобныи же велми оскорбися о отшествие брата, но никако же не може его увещати, и о Христе целование друг другу подав, мир же и благословение кождо ею себе испрошь, и тако створи молитву, и отиде в путь свои. //(л. 51)

О уединении преподобнаго Александра.

Преподобныи же Александр остася един уединен на месте том, Давидово воспоминая: «Рех, кто дасть ми криле, яко голуби, полещу и почию. Се удалихся бегая и вдворихся в пустыню, чаях Бога спасающаго мя» (Пс 54:7-9), «ибо птица обрете себе храмину и горлица гнездо себе, идеже положит птенца своя» (Пс 83:4), «всхождение в сердцы своемь положи, в удоле плачевне, в месте, идеже положи» (Пс 83:6-7), «яко лучшии день един во дворех твоих паче тысящь, неже жити ми в селех грешничих» (Пс 83:11), «в законе Господне воля его, в законе его поучаяся день и нощь» (Пс 1:2). Про што чернець инок словет, про то чернец инок словеть – един к единому Богу. Тако же и сеи преподобныи Александр болми на духовное дело, един ко единому Богу внимая и тому являя своя исправления, от Него же и взданиа обилно надеяся прияти, успевая на лучшая, по глаголющему, и радуяся, шестсвуя бес предкно//(л. 51 об.)вениа, вышних ища, (Кол 3:1) и тамо ум свои вперяя, и сердце свое очищая от всех страстных мятежь. И пребываше в всенощных стояниих, неуклонно поучаяся присно в «псалмех, и пениих духовных» (Еф 5:19, Кол 3:16) поя Господеви, «на того бо, рече, упова душа моя» (Пс 56:2) и помощник ми бысть. И пребываше, в плоти сыи, аггелом подобяся и добродетелнаго ради его житиа пронесеся слава всюду о нем, и мнози любовию желающе сжителствовати у него и слышати от уст его слово спасениа по глаголющему пророку: «Жадаеть, яко елень, душа на сточникы водныя» (Пс 41:2), сице и любящих Бога и преподобнаго учениа не токмо словесы учаше, но и делы известно творяше по реченному, «блаженн, иже створит и научит, сеи велий наречется в царствии небесном» (Мф 5:19).

Зимному же времяни минувшу, весне убо наставше, все же добреише и краснеиши бывает. Ныне небо светлеиши и мгле отемшеся, //(л. 52) ныне мраку отшедшу, свету восиавшу. Ныне же ветри бурнии, быстро дыхание движуще по воздуху, снеготучни облаци раздирают и разнашают и небеса прозрачнеиши бывают. Ныне солнце на высоту восходить, и теплоту являеть, и студень отгоняеть, и ледове раставают, и землю сгревает. Ныне же рекы и источникы быстры истекают, силнеиши изливаются, своих уз отрешившеся, и жажу всеа земли напояют. Ныне земля радуется, тяготы снежныя избывше, веселит же ся, жажю свою наполняя и сеяное в неи жито с прибытком взвращает и всякыя овощи плодить и сады, и траву растит, и цветы различныя украшает. Ныне древеса листвие изращают, и теми одеваются, и красуются, и вся тварь обновляется и веселиться, и всяко животно радуеться, и славит сздавшаго, и праславляеть Творца своего. Ветхая //(л. 52 об.) мимоидоша, и быша вся новая, и оттоле цветеша место Христовою благодатию и молитвами преподобнаго отца Александра, якоже рече певец: «Процвела еси пустыни яко крин, Господи», яко рече Господь усты Исаиа пророка, «да взвеселят же пустыни жажущаа, да взрадуеться пустыни и процветет, яко крин» (Ис 35:1), яко проторжеся вода в пустыни, придите и почерпите воду с веселием. От источник спасенных подаст поучение святаго сего мужа и жажущая люди напоит божественых вод, иже есть учении духовных. И ту будет селение многым человеком и водворение иноком, и не будет тамо молва, иже от диавола, ниже звереи лукавых, сиречь злых бесов, но ту будут Богом собранни иноци, избавлении Господом от прелести мирьскиа, и обратяться к Господу в вечныи покои, и приидут в небесныя обители с веселием, радостию, отнюду же отбеже болезнь, и печаль, и воздыхание (Ср.: Ис 35:10, Ис 51:11). «Праведник убо, //(л. 53) яко финик, процветет и, яко кедрь, иже в Ливане, умножится» (Пс 91:13). Бяше бо поистинне человек Божии, яко светило в всем мире сияюще смиренным смыслом и добрыми нравы, и прочими труды подвизаяся, дрова посекаа, и хврастие сбираа, и огнем сожигая, и нивы творя, и землю углажая и змягчая, к сению готовляше, и добре тружаяся, делая своима рукама, поминая и учение великаго Василиа, иже рече: «Или безручни есте? Почто не делаете, якоже прочии человеци?» И от своих потов пищу приемлюще, вспоминая Господне речение, иже рече: «В поте лица своего снеси хлеб свои» (Быт 3:19). И от того нищих и странных кормяше, и требующем неоскудно подаваше, и вся тем доволно бяше, якоже есть писано, «расточи и дасть убогым, правда его пребываеть в век века» (Пс 111:9). Дая же семя сеющему и хлеб в снедь, да подаст и умножит семя ваше, да взвратить жито правды вашея. И сиа вся тем преумножахуся даже и до днесь благодатию Христовою и молитвами //(л. 53 об.) Пречистыя Его Богоматере и преподобнаго отца Александра. И обитель исполняшеся всякым довольством, и место распространяшеся, и братство о Христе множахуся.

О прихожении братии к преподобному.

И потом начаша приходити от окрестных стран ереи и диакони, священнодеиствоваху клирици же и иноци; страннии пришелци приходяще овогда един, иногда два и три, хотяще пребывати с ним, ревнующе добродетельному его исправьлению. Преподобныи же помысли и рече, в псалме писанная вспоминая: «Ничто же ино взможно похвалити разве сего, еже жити братии вкупе» (Пс 132:1) и еже и Господь рече: «Идеже будут два или трие собрани во имя мое, ту есми посреди их» (Мф 18:20). Вся же сиа вспоминаа блаженныи, яко чадолюбивы отець всех с радостию приимаше, и любовию утешаше, и телесны покои подаваше. Они же во всем повиновахуся ему, зряще чюднаго ему пребываниа, и начаша ке//(л. 54)лии ставити по чину: и поварню, и хлебню, и ина, елика потребна суть братии ко устроению монастырьскому. И все имуще изобильство и по чину уставному изрядно зело.

Весь чин положи по типику Иерусалимскому во всем монастыри, преже украси церковь иконами и книгами, яко же рещи «свята церкви твоя дивная вправду» (Пс 64:5—6). И по том поставляет братию по службам: первие – типика, потом – пономарха, и келаря, и казначея, иного же в хлебню, а иного в поварню. Вся же сиа устрои чюдыи отець наш чин монастырьскыи: трапеза всем равна, и одеяние, и обувение, и пища, и питие. Заповедает же преподобныи ничто же своим звати, но вся обща, по апостолу, имети (Ср.: Деян 4:32); в церкви никому друг с другом не глаголати, но всем кождо их в своем чину пребывати, молчаще. Тако же и ко Евангелию и ко святым иконам поклонение по уставу//(л. 54 об.) старчества сблюдаху, и к местом исхожаху, и к трапезе идуще по старчеству. На трапезе же кождо их на своих местех седяше, мольчаще, никого же слышати бяху, токмо четца единого. Вставше же от трапезы, отхожаху в келиа своя с молчанием, благодаряще Бога. Тако же и в келиах никако же празным пребывати, но коиждо свое попечение имеяше о келеином правиле и о рукоделии; в время же пениа в церкви обретатися, тако же и на дело монастырьское, идеже аще прилучашеся итти, или на службу, всегда псалмы Давыдовы во устех имети или молитва Иисусова, то и дело благословится и душа освятится. И не бяше в них ни котораго празднословиа и в стретение вашем покланяитеся брат брату, яко же лепо есть мниху. И по павечернеи же молитве никакоже бесед творити. Сице же учаше, глаголаше им: «Братие, о нем же изы//(л. 55)досте, о том и подвизаитеся на всяк бо час подобает нам бодрым быти. “Бдите бо и молитеся, да не внидите в напасть” (Пс 26:41)». Боятися присно и пещися о часе смертнем, ужасатися и трепетати прещениа огня вечнаго утешаше их, глаголя: «Чадо, да не устрашит вас помысл, яко места пустыная и нужная. Весте бо, яко “подобает нам многыми скорбьми внитти в царство небесное” (Деян 14:22). “Нужно есть царство небесное, и нужници всхищают е” (Мф 11:12). Сии суть пощение, молитва от чистота сердца, смирение к всем, яко же Христос глаголя: “Блаженни смиряющеся, блажени алчюще» (Ср. Мф 5:3, Лк 6:20), и любовь по Бозе нелицемерная, яко пишется: «Любы Бог есть” (1 Ин 4:8). Иоанн Богослов глаголеть: “Любяи брата, любит и Бога, а не любяи брата, и Бога не любит” (Ср. 1 Ин 2), милостыня, еже к нищим, “блаженни милостивии есте” (Мф 5:7), и еже посещати странных братию. И сие Христос глагола: “В темнице бех, приидосте ко мне” (Мф 25:36)».

И сиа глагола к ним преподобныи, и понужая их на благоразумие, рече:// (л. 55 об.) «Молю же вы, братие, подвигнемся в малое время, постом и молитвою попецемся о спасении душ наших, отступим от путеи лукавых, еже есть сии: любодеяния, татбы, клеветы, пианьство, обьядение, братоненавидение. Сих, братие, уклонимся, сих взгнушаемся. Не оскверним же сими душа своеа, но поидем по путю Господню, ведущему ны в жизнь вечную, и взыщем Бога рыданием и слезами, пощением и молитвами, бдением и покорением, терпением и послушанием, да тако обрящем милость от Него. Темже и мы, братие, отрекшеся суетнаго мира сего, отвержемся и сущих в нем, взненавидим же всяку неправду, и ктому мирьскых не творим, и не обратимся на первыя грехи, аки пси на своя блевотины (2 Петра 2:22). Како же мы убежим мукы бесконечныя, кончевающе время свое в лености, не имущи покаяния, еже по вся дни каятися грехов своих? Покаяние бо есть путь, //(л. 56) проводя к Небесному Царствию. Покаяние есть ключ царствию, бес того бо неудобь внити в не, покание есть путь, вводя в породу. Того пути, братие, держимся, на том пригвоздим плесне наша. К тому пути не приближается змеи лукавыи. Того пути шествие суть скорбна ныне, последи же радостна и утешна. Тем же подвигнемся, братие, пред не оного, да получим благая она и избегнем всех хотящих быти на ленивых и не в покании живущих».

Святы бо сии наставник сице творяше и учаше братию. Они же, яко благоплоднаа земля, приемлющи семяна, приимаху слово его, приносяще трудов своих плоды к Богу, ов же сто, другый шестьдесят, ин же тридесят, коижда по мера дарованиа Божиа и своих трудов (Ср. Мф 13:23). Нам же сиа почетше, оставлеше в преди писаная, обрящем полезнее первых.

О приходящих человек к преподобному ползы ради

Елма же тако сим бывающим, происходаше слава о нем в области тои во вся // (л. 56 об.) страны. Аки легкым пером, Александрово имя обношашеся повсюду, и славно бе житие его, паче же Богу прославляющу своего угодника. Начаша приходити к нему христолюбивыи мужие от многых стран, ови убо благословение получити желающе, друзи же молитвы прияти хотяше, ини же впросити нечто помышляше, иже имеяше недоразумиа. Прочии же разрешение ищуще некоих словес, коиждо их своего роду имеяше. Преподобныи же поучаше их от святых писании душеполезными словесы и духовными беседами наказая, бе бо видети муж благ, умилен, смирен, незлобив, разсудителен в вещех. Бог бо даде ему слово отверзение устом, Бог слово сый, и еже пророком Давыдом беседоваше: «Пространи уста твоя, исполню я» (Пс 80:11). Тои проведы премудроство сердцу и поучение святому сему мужу, паче же уста его наполнишася разума, и вся им сказая, и коемуждо слову разрешение //(л. 57) подавая, и всем ясно поведая, и всех любовию увещаа, и все благословяше, и не единого тща отсылаше. И вси же радостни, и благодаря Бога, и с веселием в домы своя отхожаху, и “дивляхуся о словесех благодати Божии, исходящии изо уст его” (Лк 4:22) и чюдному разуму его, и премудрому рассужению его, и полезному учению его. И рекоша в себе: «Сии человеци Божие житие живут, могут печалнаго утешити».

И сице убо сущу тому, и пакы множество людеи отвсюду приходити, приносяще, инии же присылаше от имений своих на устроение монастырю, на утешение братии милостыню. Преподобныи же глаголаше в себе: «Аще бы воля Господня не была, то не бы семо приносили потребных». Яко от Бога посланная, та с благодарением от приносимых приимаше о всех приносящих. Посещаху же его родители, и братия его, и сродници, такоже прихожаху, приносяще потребнаа, он же о сих благодаря Бога, яко от своих сродник прияти милостыню сподоби его Бог //(л. 57 об.).

Како преподобныи постриже два сродник своя.

Два же сродника бяше преподобнаго, велию веру к нему имеюще: един бе стареишаго брата сын Амбросимов Никон имянем, другый же Лукианов сын бе Петр имянем. Сии же часто прихождаху к нему и паче всех. Преподобныи же помалу начат их увещати душеполезными словесы и духовными беседами, от святых писании поучая их, еже оставити мир и вся, яже в мире, и отлучитися от родитель, и всприяти иноческое житие, и возлюбити ангельское пребывание, и к Богу присвоитися, и Того единого возлюбити, и Тому единому работати, и Того волю творити. Се же намнозе бывающе, они же в сладость послушающе глагол его и поучению его, велми прилежаше и внимаше, повинувшеся повелению его. Преподобныи же постриже их, Никона рече Никифора, а Петра нарече Порфириа, и устрои же Никифора келарем, а Перфириа пономарха. Слы//(л. 58)шавше же родителие их пострижение чад своих, велми оскорбишася. Брат же преподобнаго стареишии Амбросии человек бе мужествен и яр. Еще и диавол вооружи его, хотя преподобнаго возмутити. И рече Амбросии брату своему Лукиану: «Поидем в монасырь, и разбиемь замки его, и иссечем двери, и возмем дети своя. И что створим злодею нашему – черньцу Александру?! Мы убо его, яко отца, имеяхом, яко господина чтим. Он же, злое нам творя, отлучая от нас чад наших и постризая. И что сего горее, какова скорбь родителем о чадех бывает?! И что сее беды живаго сего нам разлучениа с чады нашыми?! Странных пришелцов черньцов не хотя покоити и держати, понеже не могут терпети великыа страды его, и тяжькых трудов его, и роптаниа, и нужнаго пребываниа, и прочее отхожаху; и ныне нашими //(л. 58 об.) детми хощет монастырь наполнити!»

И взем секиру, скоро поиде. Брат же его Лукиан человек смирен бе, скорее поиде за ним и начат его увещати тихими словесы и смиренными глаголы: «О брате, остави таковая», глаголюще, Давидово воспоминая: “Престани от гнева и остави ярость, не ревнуи яко лукавновати” (Пс 36:8), яко Богу тако изволшу и чадом нашим самем всхотевшим, и сами приидоша к нему, он же не насилием постриже их, но по воле их створи». Амбросии же болма разярися, пришед к келии преподобнаго, начат некая досадительнаа и хулная словеса износити, их же не леть глаголати и слышати, яко же в псалме пишеть: «Несть бо страха Божиа пред очима их, их же уста исполнь, и пути мирнаго не позна» (Пс 35:2). Блаженный же пребывая, моля Бога в келии своеи, ничто же отвеща, ни убояся, ни устрашися, ни смутися, но токмо давидово вспоминая: «Ничтоже возможе суетою своею, аз же яко масли//(л. 59)на плодовита в дому Божии, уповах на милость Божию в векы» (Пс 51:9—10). Лукиан множае начат увещати брата своего Амбросиа: «О брате, како ты не убояся Бога, ни устыдеся святости мужа, таковая гаголюще, яко же пророк рече: “Что ся хвалиши о злобе, силне? Взлюбил еси злобу паче благостыня” (Пс 51:3)? Аще оскорбим такова мужа, таковы труды показавша, церковь поставльша и монасты устроивша, он же не претерпя нашего поношениа, прочее отидет, и примеши клятву, а не благословение, каков от Бога суд приимем? И от людеи же велик срам будет нам, начнут глаголати: “Аще сии такова свята мужа изгнаша, еще же и брата приснаго, кто может пребыти у них странных пришелцов и терпети их суровство и нестроние?” Бог сзидает и собирает, а ты един хощеши разорити… Не спираися с Богом, взем прощение со благословением, идем в домы своя». Амбросий же премолче, ничтоже мог отвещати. Преподобныи же //(л. 59 об.) Александр же, вышед на предсение келиа своеа рече: «Человеци, что смущаетеся о чадех ваших? Уже бо ни на кую ползу вам чада ваша. Быша бо ваша чада, ныне же слугы Божиа суть». И взвратися в келию свою. Амбросии же устыдеся святости мужа и смиренных словес преподобнаго. И умилися, вздохнув из глубины сердца своего, и рече: «О горе, мне грешному! День или утро конець будет, а аз в горшая успеваю». И прешед к келии преподобнаго с великым молением, просяще прощениа с благословением. Преподобныи же, ничто же истязая или поношая, прощение подавая. Они же отидоша в домы своя, славя Бога, чада же своя оставиша на Божии воли. Сие убо о сем тако.

О преставлении родителех преподобнаго.

Малу же времяни минувшу, преставися отец преподобнаго, успе с миром о Господе. По том же не по мнозе времяни преставися и мати его. Погребе же преподобныи телеса родителеи своих, надгробная отпев, “с псалмы и песнми //(л. 60) духовными” (Еф 5:19, Кол 3:16) проводив честно, перьсть отдав перьсти. И помолися над ними, и видев преподобныи, яко родителя его от житиа преставистася, и благодарныя молитвы Богу о сем вздаваа, и много сжаливси тогда ради, и помысли, в себе глаголя: «Тако же и аз смертен есмь, яко же и родителие мои».

И оттоле начат в болший подвиг простирати себе и труды к трудом прилагаа. И держашеся пакы болезненаго вздержаниа, и подвизаяся всяцем образом цела себе соблюсти, и всяк злыи помысл находящь отражати. Братиа же, видевше великые труды его и зелое вздержание, и реша в себе: «Мы странни есмы. Не можем понести таковаго жестокаго житиа». И прочее отхожаху. Инии же, пришедше, мало пребывше, и пакы отхожаху; и мало их обретаются, терпевше с ним. Таковыя труды видевше, бесове бе утесняеми, //(л. 60 об.) и по мале боящеся изгнаниа от места того, видеще чюдное борение его, и глаголаху к святому: «Изыде от места сего, да не зле умреши зде». И многая неизреченная прият от бесов досажениа, их же не возможно изрещи. Святыи же молитвою воружашеся, не убояся, ни устрашися кознеи их, ни сверепаго лаяниа их, видяше бо их некрепкую силу, яко паучину присно раздираему, творяше, благодатию Христовою пребываше невредим от них. Молитва бо изо уст святаго, яко пламень исхожаше. И абие тех попали и невидимы створи.

Диавол же, видя себе поругаема и изгонима от святаго, смысли же вселукавыи ину кознь, еже и сотвори, да святаго возмутит. И вложи злодеи враг сродником его ненависть на святаго. Первие начаша срамитися его и удалятися от него. Он же, разумев пременение любве их, начат при//(л. 61)казая, аки отець, своя чада, и милуя, аки свои уд. Они же, млади сущи, не разумеша сетеи диавольскых, ни учениа святаго нерадиша, болми паче начаша взненавидети его, ни послушати, но еще и пререковати многажды, и реша в себе: «Мы, млади сущи, не можем понести таковыя страды». И совещавшеся оба, прочее отидоша, не веде камо. Мы сиа оставльше, в предписаннаа почтем, иную ползу обрящем.

О скорби преподобнаго о отроцех.

Преподобныи же Александр велми оскорбися, и огорчися о сродницех, и начат плакати, велми рыдати, не могый глаголати ничто же, ниже пищи вкусити, якоже пророк рече: «Весь день сетуя хожах» (Пс 37:7). И нощи же наставше, преподобнии свои руце горе вздев, на высоту простирая, и ста на молитве, и рече: «Господи Иисусе Христе, Сыне Божий, ради честнеишия Матере Твоеа и всех святых твоих, помилуи мя, Господи, да не погыбну, избави мя настоящаго обьстояниа бесовьскаго. Верую, Господи, яко многыя твоя щедроты помогут мне и нау//(л. 61 об.)чюся ходити в путь святых твоих. И прости ми вся грехи моя, аще бо не утвердиши мя долготерпением Твоим, и обрящет же в мне часть некую своих деянии враг, и будет ми сопротивны противяся, “се бо яко лев рыкаа ходит, хотя мы поглотити” (1 Петра 5:8), “вздвигни силу Твою, прииди, да мя спасеши” (Пс 79:3), “блесни молниею Твоею, ражжени его” (Пс 143:6), да убоится и исчезнет от лица Твоего, от лица любящих Тя. Имут бо знамение благодати Твоеа, и посрамлен от них отходит. И ныне, Владыко, спаси мя, к Тебе бо прибегох всегда, и ныне, и присно, и в векы веком». И сиа с плачем исповедаа всю нощь.

Како преподобныи в недуг впаде и явлением чюдотворца Кирила исцеление получи.

И абие слышит гласи множество бесов, зубы скрегчюще, и реша: «Одолел ны еси Христовою благодатию и своим терпением». И пакы без вести быша и потом не бысть ему пакости от бесов и невредим бысть от них, храним непобедимою силою Божиею.//(л. 62)

По сих же времяни некоему малу минувшу, преподобныи в недуг впаде и бе болезнь его тяшка зело, вси уди его ослабиша, ни главы вздвигнути, ни руку взвести, ни ногу двигнути, ни устну отверьсти, ни языком глаголати. И тако ему стражущу велми, ни пити же, ни ясти, ни уснути, ни мало починути. Всеведый же Бог, не хотя видети угодника своего надолзе стражуща, якоже пророк рече: «Не умру, но жив буду и повем дела Господня, показуяи наказа мя Господь, смерти же не предасть мене» (Пс 117:18). Посла же Бог благыи помысл в сердце его, помысли в себе и рече: «Колика Бог творит чюдеса отцем нашим Кирилом! И егда како и о мне умилосердится и помолит Господа Бога и Пречистую Его Богоматерь, яко да облегьчить Бог болезнь мою и подасть ми Господь здравие его молитвами, якоже апостол пишеть: “Много бо можеть молитва праведнаго поспеваема” (Иак 5:16)». И малу часу минувшу и яко в иступле//(л. 62 об.)нии бывшу, и видит святолепна старца, сединами украшена, пришедша к нему в белах ризах и крест в руце держаща. И яко «видевшу ми, – рече, – святаго и позна по образу писанному, бе бо не ведех его в животе». И начат с слезами молитися ему: «О, отче Кириле, избави мя от болезни сея». Святыи же, знамянав его крестом, его же имеяше в руце своеи: «Не скорби, брате, прочее. Аз помолю Бога и Пречистую Его Богоматерь, яко да исцееши, но не забуди обета своего, еже обещался еси, не остави места сего, еже начал еси. И аз буду помогая ти, вкупе моляся Господу и Пречистой Его Богоматере о месте сем». Взбнув же от видениа, преподобныи и разуме, яко болезнь облегчися ему, и, отраду приим, радовашеся.

На утрии же, встав на своих ногах, и иде в церковь молитвами и явлением чюдотворца Кирила, и начат же всем поведати бывшее явление чюдотворца Кирила, и како явлением того исцеление получи. Слыша//(л. 63)вши же вся братиа бывшее посещение святаго Кирила, паче же и видяще игумена отца своего здрава, и разуме Божие дело быти се, яко от великыя болезни вскоре пременися на здравие и от тяшкаго недуга в мале времяни преложися на исцеление, и прославиша Бога, и Пречистую Его Богоматерь, и святаго чюдотворца Кирила.

Раб же Божий Александр пребываше в многых трудех и вздержании, иже память смертную всегда в себе имеяше и поучая себе на деланиа плача, плакашеся своея душа, аки мертвеца. Писано бо: «Взыхание убо и скорбь и се впиют к Господу, а яже от страха слезы, та молят Бога». И тако время живота своего пожив, благочестне в добре исповедании, никогда же преста от трудов и славословиа Божиа, но Господеви сия вся изнуряше и добр образ оставляет пребывающим тамо иноком. И сиа о сем тако.

О преставлении преподобнаго Александра.

По сем же разуме преподобныи и отхожение свое к Господу. И ничтоже ино взвести//(л. 63 об)ти могуще разве смерти, видя себе уже к концу приближающася. И призываеть вся братию, елико их бяше тогда, и рече им: «Братиа и чада, се поведа вам, яко уже отхожу света сего. Сердце мое смутися во мне и страх смерти нападе на мя. Боязнь и трепет суда Божиа прииде на мя и покры мя тма (Пс 54:5-6) неумениа. И се же сказаваю вам: искушение некако хощеть Бог послати на вас. По моем отшествии мнози будут пришелци и странници, приходяще к вам, хотяще с вами пребыти, ереи, пастыри, нарекшеся и учителии, тако же и клирици и иноци, обещающеся собрати и исполнити, и ложными глаголы льстяще, якоже пророк рече: «Языкы своими льщаху и яд аспиден под устнами их» (Рим 3:13). Игумени же и ереи и не яко пастыри и наставници будут, но яко волци, расхищающе и распужающе братию, озлобять и оскорбять//(л. 64), тако же и клирици и иноци не токмо сбирати и исполняти, но яко татие и похищници, яко в едино сгласившеся, начнуть разоряти, и расточати, и разнашати ины от книг, другы от риз церковных, ин же от одежь, и обувениа, и от иных вещеи, емлюще и грабяще. И мало пребывше, отхожаху и отношаху, аки никим же блюдомо, ни пасомо, не убояся смерти, ни суда Божиа чающе, еже им подгнета будеть в негасимом огне, еже прияти им будет геона огненая в корысти место, забывше реченнаго пророком, иже рече: “Разумеите же, безумнии в людех, и буии некогда умудритеся, насаждеи ухо, не слышит ли, или создавыи око не сматряет ли?” (Пс 93:9). Яко же рече Господь: “Вы же печални будете, но печаль ваша в радость будет и радости вашия никтоже от вас взметь” (Ин 16:20, 22), яко скорбьным последуют радостная. Вы же да пребудете терпяще в //(л. 64 об.) скорбех и в настех ваших, в искушении Господни, от Него же чающе вздание, яко же в Евангелии рече Господь: “Претерпевы до конца, тои спасен будет” (Мк 13:13). Апостол пишет: “Егоже любить Господь, того и наказуеть” (Евр 12:6). Пророк рече: “Терпение убогых не погибнет до конца” (Пс 9:19)».

Братие же стояху, плачюще с рыданием многым, вси единогласно глаголаху: «Молим тя, отче, не остави нас сирых по твоем отшествии. Ты бо отець нашь, при тленнем сим житии имел еси попечение о нашем смирении. Кто будет нам наставник и правитель к нашему спасению?» Блаженны же глагола им: «Чада, молю, аз убо отхожу от вас. Предаю же вас всемогущему Богу и Пречистеи Его Богоматери. Тои будет вам прибежище и стена от сетеи вражиих, и молебника имеите себе к Господу Богу великого чюдотворца Николу и всех святых, и терпите на месте сем лютыя скорби, яко же преже рех вам, донелиже// (л. 65) Господь посетить вас, тогда вся собереть, и совокуть, и исполнить. А о игумене тако же возложите упование на Господа Бога и на Пречистую Богородицу, егда же Господь посетить вас, тогда пошлеть вам строителя святеи обители сеи игумена и наставника всеи братии о Бозе собраннеи. Но блюдите, братие, прочее, да ничто же оставится от закон монастырьскых от святых апостол, и пророк, и святых вселеньских собор, иже имать церкви Божиа: и на пении соборнем, и на трапезе ястиа и питиа, и весь чин монастырьскыи и обычаи, уставленыи по Бозе нашим смирением. И Господь Бог исправит стопы ваша к деланию заповедеи его молитвами Пречистыя Владычица Нашея Богородица, и всех святых, и чюдотворца Николы. И Господь нашь Иисус Христос и да схранит вы, и да утвердить вас в любви своеи. Аз же аще телесне отхожу от вас, но духом с вами неотступно буду, и о сем//(л. 65 об.) да разумно будеть вам, аще обрел буду благодать пред Богом, то обитель сиа по моем отшествии наипаче умножится, и болма распространится, и всем обильством духовным исполнится, и множество соберется братии о Христе в духовнеи любви, и телесных потребах не будете скуднии. Токмо любовь имеите межу собою. Аще кто имать нечто от общаго житиа и чина разоряти, и игумену не повиноватися, и со братиею прекословити, вы же такого ропотника и крамолника из монастыря изгоните, яко да и прочаа братиа убоятся таковаа деяти».

И тако поучив я доволно, и отпусти, и призва к себе брата своего приснаго по плоти Левонтиа и рече ему: «Брате Левонтии, се уже рок приближися жизни моеа. Тебе же оставляю последнее наказание: имеи попечение обители //(л. 66) сеи, донели же еси в мире, а егда же от подружиа оставишися, и от мира отлучишися, и во обители будеши, тогда болшее попечение и труды покажеши». И вда ему благословение, и отпусти, и по сем пакы призва братию. И вся же братиа приидоша к нему и, целующе его со слезами, и лобзаху умилно, и последняго благословения просяще. Тои же, яко чадолюбивы отець, всех облобызаше, и всех целоваше, и всем последнее прощение оставляше, и от всех прощение прося, и одарив их молитвами, и благословением печатлев. На самый час, вон же хотяше телеснаго соуза разрешитися, святых животворящих таин Христа Бога Нашего причастися и, вздвиг руце горе и знамяна вся животворящим крестом, прекрести лице свое и рек мир всем: «О владыко, человеколюбче, сподоби мя одесную тебе стати, егда сядеши судити во славе Своеи и живым, и мертвым, и вздати комуждо по делом его». И ко//(л. 66 об.)нечное слово рек: «Господи, в руце Твои предаю дух мои» (Лк 23:46), чистую же и священную свою душю с молитвою Господеви предасть. Жив же преподобныи всех лет 52, 5 недель. Возрастом средний человек, образом умилен, лицем сух, очи име веселы, брада невелика и не велми густа, власы русы в полысед. Преставися в лето 6987-е (1479) месяца априля в 20 день, на память преподобна отца Феодора Трихины, рекши власянаго, по Пасце 2 недели во вторник. И братиам же всем сбранном, и на одре честное и трудолюбное тело положиша, псалмопением и надгробными песньми того провожаху ученикы, плачем и рыданием скрушахуся, слез источници изливахуся, наставника лишени бывше, и отча разлучениа не терпяще, плакахуся. И аще бы воля Господня была, умерли бы с ним тогда.

Тако же лице его просветися, и не бяше на нем никое//(л. 67)а черности, ни смягности, яко же есть обычаи умершим, но тако бяху, яко спещу ему, показаа душевную чистоту и еже от Бога мздовоздааниа трудом его. И тако погребен бысть братиею честно с кандилы и со свещами, честное и трудолюбное тело его положено бысть в созданнем от него монастыре о десную страну олтаря, идеже и отныне от гроба святаго здравие приемлють: слепым прозрение, от бесов свобожение, раслабленым стягнутие, скорчющим рукам и ногам простертие, хромым хожение, немым глаголание и всем болезнем здравие подаеть, нищих обогощаеть, и мало имеющих умножаеть, и славных творить, и всем полезная даруеть, не токмо ракы его приближением, но идеже кто имя его призоветь, с верою здравие приемлет, и всяко прошение подаеть полезное, сицевая чюдес приатиа, сице //(л. 67 об.) достоино своего званиа дело отдав, распенся мирови. С миром к мирному Богу отиде и к присножелаемому взыде Владыце, тамо украшеся уготованным ему венцем, Христа видети сподобися, и со Христом быти всегда, и о Христове доброте радоватися, и в живых страну прииде, идеже глас празднующих, идеже веселящихся жилище (Пс 86:7).

Принесем убо иже древле просиявших добродетели житиа и премудрости, и видим воистинну: ничимже от тех скудень бе, от преже угодивших святых отець житиа и сеи преподобный Александр, общему житию правитель, иже в пустыни церковь воздвиже и общее житие состави. И не стяжа ли сеи доброе рассужение? Не прия ли от Бога даров исцелениа? Не име ли сеи благодати чюдес дарованиа, яко же и преже того прославленни? Тако же Бог и сего прослави, и “сотвори именита по всеи земли” (2 Ц 7:9). Мы убо не по//(л. 68)хвалим ли сего, его же Бог прослави в последняя роды наша? И дарова нам Господь такова светилника чюдотворца в похвалу нашея земли Онежьскыя, северныя дальныя страны. Но ты убо, отче, добре течение постничества скончав, преставися, воздание трудов прият, Святыя Троица зарями ясне просвещаем и божественыя благодати неизреченныя наслажаяся. Поминаи чада своя и своих ученик сохраняи, призывающих тя и припадающих к чюдотворному гробу твоему, милостивное прошение подаваи и заступаи присно, и моли о нас, преподобне, яко да твоими молитвами Господь Бог дарует нам прегрешением оставление. Веси бо наше неможение и леность, веси же и лукаваго, еже на нас навет и озлобление, веси же естество наше, удобь поползаемо и ко злобе скоротекущее. Тем же//(л. 68 об.) требуем твоеа помощи и заступлениа и еже к Богу молитвеное и, припадающи молимся: моли о нас Господа Бога и Пречистую Его Богоматерь, яко чадолюбивь отець, еже присно схранити нас от всех видимых и невидимых враг и творити, еже к нему благоугодная, да наставит нас Господь, и укрепит, и подвижнеиших к божественым его заповедем сотворит, и подаст нам вся благая и полезная изобилно, и получим покои и мир, в житии сем безмолвно пребывающе, и тако всяку добродетель исправити возможем, и будущих мук свободимся, и вечнаа благая получим о Христе Иисусе, Господе Нашем.