О Мисаиле иноце чюдо святаго.

Бяше же убо некый инок Мисаило именем, постриженик того же монастыря блаженаго Александра, младу же ему сущу и житие имея растленно, к сему же еще желание имеа велие, много пиа пианьственаго питиа, иже бо сие на многых бываеть. И того ради ни душевных, ни телесных орудий исправы несть, и от Бога отлучаеть. Еще же не доволен бяше сим злым обычаем, но и еще маловерием одержим ко святому отцу Александру. Мы же, не судя, глаголемь о немь, но тако реку: «Не даи же Бог, но он сам о собе тако исповеда ми». Господь же Бог не восхоте его в неверии оставити и сим образом показа над ним чюдо не в коеи веси, зовомои Верхьнеи Борок, от обители же верьст десять отстоит на Онеге реце.

Случися ему тамо на пиршестве быти у неко//(л. 128 об.)его христолюбива человека именем Никита, Власиев сын. Тои же христолюбивый человек, достоиную часть воздавая ему, яко же обычаи ему есть гостеи чтити и учрежати. Инок же тои много хотячи пити, леюще, яко во утел сосуд, и от безмернаго питиа яко обьюродев и зло беседоваше, по пирному неподобная дея, и нелепая глаголаше. Не полезно бо писанию предати, срамна бо и скаредна таковая. Нощи же приспевши, и возлеже почити. И абие, возбнув от сна, и воспомянув свое неистовьство, и срамом обиат быв, и смыслив сие: «Отиду прочее, да срама избегну». И изыде ис храма во единои своеи свитке, иная же своя одеяниа во бремяни своем ношаше и не веде, како преиде к другому брегу рекы тоя страшныя и быстрыя. И обвалися в реку и руце его удержашеся мало на леду. Он же//(л. 129) еще не истрезвися от своеа от питиа, мняше сон зрети и, зреся назад, и видит быстрины, лиющеся чрез руце его. И начат вопити великым гласом, но никто же бе то слышаше, всем бо человеком спящим. Он же виде рок живота своего и горкый час смертный, и начат молитися Господу Богу и Пречистои Его Богоматери, и многых святых призываше на помощь. И не бысть ему помощи и, воспомяв же он преподобнаго Александра, и рече: «Преподобный отче Александр, избави мя от горкаго сего часа смертнаго, не сотвори по моему неверию, но соделаи по чюдесем твоим, да аз буду проповедитель великым твоим чюдесем». О велицеи силе Божии, о неизреченнному чюдеси святаго! И в том часе слышит аки подпор некый под ногама своима, изинуся из воды на лед до перси. И не тверду бывшу леду, и обломися. Он же возопи велиим гласом: «Великый чюдотворець Александр, избави мя от напрасныя сеа смерти». //(л. 129 об.) И второе ринуся из воды, и извержеся до пояс на лед, и начат рукама своима иматися и хвататися за снег и за лед, и тело свое отби с руку и с ногу до крови, и ко брегу привалися, и воста на ногах своих бос. Обувениа же падоша с ногу его, не веде како, и доиде пути, и преиде на ту же страну рекы к некоему человеку именем Иван, Яковлев сын. И приат бысть, и показа им руце и нозе свои кровавы, и сказа им всю беду своего потоплениа, и преподобнаго Александра превеликое и страшное чюдо, и помощь, и скорое избавление от горкыя смерти. Они, же слышавше и дивишася несказанному Божию милосердию и великому чюдеси преподобнаго. И на утрии же день светом озарися, и идоша на реку, и обретоша одеяниа его в реце в воде. Единем же рукавом примерзе к леду, того ради не потопе. И измеривше воды глубину и обретоша четыре сажени и вси прославиша Бога и преподобнаго Александра чюдо. Старець же тои иде во обитель, проповедая чюдо святаго Александра.//(л. 130)