О явлении Николы Чюдотворца и преподобнаго Александра Ивану боярину

И явися ему Николае чюдотворець, яко же древле царю Коньстянтину, и оружие некое наго имея в руце своеи, и рече: “Аще не покаешися, то зле умреши”. С ним же и преподобный Александр тако же прещаше ему, рече: “Аще не послушаеши святаго Николы и мене, то не будеши жив, скоро//(л. 114 об.) умреши”. Боярин же, видев страшное чюдо и грозное прещение святых онех мужеи, и позна образу единаго от святых отец Николу Чюдотворца и, востенав горко, и с великыми слезами начат молитися: “О великый архиерею Божии Николае, не погуби мене грех ради моих. Другаго же святаго мужа, не вем имене его, како нареку его в молитвах”. Святый же Николае рече ему: “Сего ли ты не знаеши? Его же ты Богом созданною обитель его хвалишися разорити и ученик его Богом собранное стадо хощеши разгнати, тои есть преподобны Александр, началник обители тоя. Того ради прииде, прешаше ти, соблюдая трудов своих монастырь, поят же и мене с собою, тако же ми повеленно Богом хранити место то, занеже церковь во имя мое тамо есть”. Боярин же, слышав, наипаче убояся, и пакы начат обе//(л. 115)ма святыма прилежнее молитися и рече: “О великый Николае чюдотворець, ты еси от древних святых и велиа чюдеса твориши, и вем чюдеса твоя, и молю ти ся всегда, тако же и преподобному Александру. О преподобный отче Александр, отдаи же мне за невежествие мое, понеже не ведах имене твоего, ни слышах чюдес твоих. Ныне же познах, и познаю, и славлю имя твое святое, и проповедаю дивная чюдеса твоя. Истинный рабе Божии, и угодниче Христов, и спричастниче в чюдесех великому Николе Чюдотворцу, и ныне, господина моя, простите мя, Господа ради, понеже, не ведаа сиа, сотворих. Отселе убо Бога сведителя сотворяю и обет свои полагаю ничим же не вредити монастыря вашего, но и помогати рад есми”. Боярин же возбнув от видениа, и весь слезами обливаяся, и чюдеси дивяся, и страхом велиим обиат, и трепен бысть,//(л. 115 об.) славя Бога и святых его чудотворцов Николу и Александра. Аз же приидох к нему. Он же сказа ми сиа вся, яко же и аз тебе поведах. Се ти конець повести моеа. И отселе иди з добром, веселием веселися о Господе и с великым дерзновением иди к боярину, ничто же бояся, ни испытуя. Он же с векою любовию приимет тя, и вся ти сам о себе повесть, и с честию и похвалами отпущен будеши, и с радостию в свои монастырь взвратишися».

И подав друг другу молитву и благословение, и разидошася: священик иде на свое орудие, старець же ехав в свои двор и по том идет к боярину. Боярин же с любовию приат старца, и господином имянует его, и отцем нарицает его, и просить благословениа с прощением, и близ себе посаждает его, и весело беседуеть с ним, и сладко увещает его, и умилно глаголеть ему, и сле//(л. 116.)з источникы изливает, и жастно поведаеть ему все, еже на нем бывшее чюдо святых чюдотворцов Николы и Александра. Вся по ряду сказа ему, тако же, яко священник поведа ему, прирече же и се: «Аще бы ведал аз таковою благодать Божию в вашем монастыре и чудеса святых чюдотворцов, то приехав на град, не ехал бы во двор, во государево жалование, но ехал бы преже в монастырь ваш и помолился бы Спасу, и Пречистой, и Николу Чюдотворцу, и у началника у Александра приложился бы, таже ехал бы во свои двор, во государево жалование». И добре почтив старца, и дарми одарив, и милостыню посла в монастырь доволню, и игумену мир и всеи братии, и отпусти старца с честию. Старець же возвратися во монастырь свои с радостию и похвалами, и поведа игумену и всеи братии бывшее чюдо над боярином, и показа//(л. 116 об.) им милостыню, данное сребро от боярина и иная потребнаа. Игумен же и братиа вси прославиша Бога о бывшем чюдеси по пророку Давиду, «яко избави нища от силна и убога, ему же не бе помощника. Пощадить нища и убога, и душа убогих спасеть» (Пс 71:12-13). И хвалу воздаша чюдотворцу Николе и преподобному Александру. Мы же сиа слышах от самого боярина изо уст его. Прилучи бо ми ся иногда на пирьшестве быти у него со инеми священики. Он же всему собору ясно исповедаа страшное чюдо, благодеяние Божие. Тако же ми старець он поведаа. Аз же сиа обоя словеса слышах, и во едино совокупих, и написах на ползу чтущим и послушающим во славу Христу Богу.