Чюдо о некоем юноше, исцелевшем во обители святаго.

Некый юноша Михаило имянем, Пахомов сын, жилище имея недалече от обители святаго, верх тоя же Чюрьюгы рекы. Родителема же его у//(л. 107)мершима, он же остася млад, еще же и нищетою одержим, и прииде в монастырь, и вдася служити на время, и прият бысть. И пребывающу ему неколико время, и случися ему болезнь тяшка, вреду велику быти на нозе его деснеи. И недугом сим зле одержим бе, язвы согнитием. И отеку же велику сущу на нозе его, и на много время трудно боляше, ниже пищи, ни сну причаститися, ни со одра востати. И тако стражушу ему два месяца, Богу тако изволившу и попущающу грех ради наших, и от тяшкаго того недуга скорчися нога его. Он же не ведый, что сотворити. Благый же Бог, иже праведных любя, а грешных милуяи, всех зовыи к спасению, приспевшу же Николы Чюдотворца пренесению мощем его, в навечерии же праздни того, зелне ему болящу и велми стражущу, и начат молитися со слезами к Господу Богу и Пречистеи Его Матери,//(л. 107 об.) и призывая на молитву великого чюдотворца Николу и святаго старца преподобнаго Александра, и рече в себе: «О колика исцелениа Бог творит угодником своим Алекснадром». И начат молитися и глаголати: «Святый Александр, помози ми, избави мя от болезни сея. Вем бо, отче, преподобныи, яко его же просиши у Бога, то подати тебе имать, и не презри мене в болезни сеи». Сиа же и ина многа изрече от жалости сердца своего и со многым умилением и всю нощь без сна пребывая, от лютаго недуга зле мучим. Времяни же приспевше заутренни и клепанию, и всии же людие поидоша к пению. Он же един остася лежа, ничто же ино рече, токмо сие: «Святый Александр, избави мя от болезни сея». И абие легчае ему бысть, и в тои час от тяшкаго оного недуга усну твердо. Скорый же послушатель блаженный Алексанр//(л. 108) приходить, в священническою одежю одеян, и рече боляшему юноше: «Что спиши, востани, и иди в притвор, и приложися у гроба Александрова, и пакы к заутрении иди, и помолися Николе чюдотворцу, и мене призываи на помощь, надеевеся на Бога, всяко исцелееши». Болный же виде старца святолепна и умилна образом и не сме вопросити: «Ты кто еси или како имянуешися?» Но токмо отвеща: «Отче, хотел бых востати, но не могу, понеже нога моя деснаа велми болезнена язвою сгнитием и, отеку велику сущу, и того ради скорчися нога моя». Преподобный же, приступив, взят рукою своею за перьсты болною ногу его и протягну еа, и простреся нога его и бысть здрава, яко и другаа. Болный же согну ногу свою, святый же протяже ю. Се же бысть и третицею тако. Святый же рече ему: «Се здрав еси, ктому не сгрешаи (Ин 5:14). //(л. 108) И яко же преже рех ти, иди к гробу моему, и приложися, и потом иди к заутрении, и Господь подасть ти здравие». И тако невидим бысть. Болный же, взбнув от видениа, никого же виде, толико разуме облегчание болезни своеа и, скоро встав, иде в притворь и, со многыми слезами припадая, молится, хвалу вздая Богови, и рече: «Слава тебе, Христе Боже нашь, яко просветил еси нашу страну северную, дал нам таковаго светилника чюдотворца Александра». И потом благодарение воздая преподобно отцу Александру: «Радуся, преподобне отче чюдотворче, яко такову благодать даровал ти Бог целити различныя болезни и недугы отгнати, и чюдесы своими всех удивил еси. И ныне, отче, славлю, и величаю имя твое святое, и про//(л. 109)поведаю чюдеса твоя, истинный угодниче Божии, неложный чюдотворче, яко не презрел еси мене убогаго, ныне, отче, даруи мне до конца исцеление, яко же рекл ми еси: “Иди к гробу моему и приложися, и Господь подасть тебе здравие”. И ты, отче, сверши реченная тобою глаголы». И сиа же изрече и ина к сим, и, радуяся, иде к заутренему пению, и начат исповедати радостным гласом, и светлым образом, и веселою душею чудное посещение святаго Александра, видяще преславное чюдо – болящаго здрава, яко николиже болевша, иже преже не могыи не двигнутися, ныне же здрав бысть, ходя, и скача, и славя Бога, по глаголющему Исаиа пророка: «Скочить, яко елень, хромый» (Ис 35:6). Мы же сиа слы//(л. 109 об.)шах от уст его, и написах в ползе всем слышащим. И сие убо о сем тако.