Ино сказание о преподобнем Александре

Поведа ми тои прежереченныи Иван диак многая же и знамениа, и явлениа преподобнаго отца нашего Александра, еже слышах в монастыре в том от живущих в нем древних инок, яко начасте посещаше преподобный. Егда хотеше к Господу отити, тогда рече им: «Аще телом отхожу от вас, братие, но духом с вами неотступно буду». И тако бысть. Того ради многажды являяся во снех, видяще его, овогда казну посещающа, иногда на мелницу идуща и пакы в монастырь возвращающася. Иногда же недостаткы некоих потребных в монастыре, братиам же скорбящим о недостатцех, святыи же аки на яве являяся некоим от братиа и сих утешая, рече: «Не скорбите, братия, прочее вся пакы Бог исполнить, токмо смирение имеите межю собою». Егда же спона некая от диавола придет наносимыя ско//(л. 99 об.)рби на них, Василие от властеи и от злых человек озлобление некое, преподобный же тако же являяся, повелевая им Господу Богу и Пречистои Его Богоматери молбы простирати, и Николу Чюдотворца призывати на помощь, еже о них молитися.

И пакы она скорбная ни во что же быша, яко паучинная сеть раздирашеся. От всех скорбеи и бед молитьва преподобнаго отца Александра заступает и избавляеть. Многажды же и роптаниа некая, бываемая во обители от неискусных инок, от ненаказаных человек, но и тогда святый не оставляше, пакы являяся, повелевая от таковых предстати и любовь имети другу с другом. «Аще не престаните, – рече святыи же, претяше им, – искушение некое навести на них, еже и бывает грех ради наши//(л. 100)х овогда пожаром, а иногда гладом, иногда же скотом падение и инеми бедами скорбьная наводя, не злое нам содевая, но наказая нас от злых удалятися и благая делати, аки чадолюбивый отец, наказая своя чада, и якоже мати некая разумная в женах, своя младенца научая, греха ради невежествиа лозою казнить, а добра ради милуеть и утешаеть его, тако же и сеи преподобный отець Александр наказая нас, своя чада, и снабдя святое сие место, и утвержая обитель своих трудов, и сохраняя от всех злых наносимых напастеи диаволим наветом. Святый же не наших ради грех, не оставляя нас, но своего ради святаго и славнаго имени и своя прославляя великыя чюдеса, всегда по//(л. 100 об.)могает Александрова молитва.

И аще кто неверовати начьнеть, то возми писание о святом, и почти житие преподобнаго, и увеси вся о блаженем отце, известно по ряду испытно начертанная, и позри написанных чюдес его. И тамо ползу обрящеши, и не буди неверен, но верен (Ин 20:27). Аще ли прежним не веруеши многых ради лет прехожениа, то поне нынешним веру ими, прииди во обитель, и вопроси пребывающих инок и во окрестных весех живущих человек, и сам воспроси, над ними же чюдеса бывша. Или не веруеши и ты украшение обители святых, в них же святых икон украшение и божественых писаных книг начертание? И вся си уведев, и разумно зри, не Господь ли Бог деиствует вся сиа, прославляя своего угодника, преподобнаго Александра? Ниже царства бли//(л. 101)з, ниже градов великых, ни князеи силных, ни бояр поместных, ни велможь богатых, окрест обители живущих, иже бы от них доволная даяниа и приношения потребных приносили, ниже сел имея, ниже куплю деюще, ниже угодеи ловитвеных езер, ни рек рыбных, но вся сиа вижь и почюдися неизреченнеи благодати Божии, яко на пусте месте устрои Бог такову обитель и толико инок пребывающих и служащих человек, тружающихся Господа ради и своего ради спасениа. И всех Бог питаеть молитвами преподобнаго отца наша, началника и игумена Александра. Ты же отложи неверие и всяко сумнение и иди во притвор, идеже лежать чюдотворныя мощи святаго, и припади ко гробу преподобнаго, и облобызаи раку его, и умилися, и просле//(л. 101 об.)зися, и о прежнем неведении проси прощениа, и во прочая не не веруи, да не тако же постражеши или горша таковых, увы, яко же и аз, окаяный. Или еще не веруеши, аз ти покажу иного такова инока Мисаила именем, аков же и аз маловерен, иже вопреди почетши, тамо обрящеши о немь писание. И мы, аще умолчим, то сами чюдеса о них вопиють, их же ради Бог того прослави. И аще кто диаволим неверием одержим, то аще и весь мир во сведетельство постави ему, ни тако веру иметь, ты же отиди с веселием и радостию и проповежь чюдеса святаго иже прибегая к преподобному с верою, не изыде тощь, не получив Божиа милости. Мы же о всех сих прославим Бога и преподобнаго отца Александра чюдотворца.// (л. 102)