Явися преподобныи Александр Василию, церковному мастеру.

И абие видит в хижи своеи свет и пакы видить святолепна и умилна образом, вшедша к нему во храмину со обычною молитвою Иисусовою, в ризу же одеянна священническую, а в руце своеи имея крест. Василеи же, видив, почюдися старца доброте, яко не виде //(л. 93 об.) такова старца во обители, и пад поклонися ему и рече: «Благослови, господине отче». И рече ему старець: «Встани, чадо. Бог благословит тя». И огради его крестом: «Чадо Василие, дерзаи без сумнения на дело, на не же Богом позван. Тебе бо дана бысть благодать от Бога таковаа строити. Бога имеи поспешника и великого Чюдотворца Николу призываи на помощь. А аз готов есмь помогати тебе». Василеи же рече: «Отче святыи, скажи ми ся, кто ты еси, яко видению образа твоего почюдихся, яко зде не видех такова старца образом тем». Старець же рече ему: «Чадо Василеи, аз есми грешный Александр, началник месту сему, быв преже игуменом во обители сеи. Се же, чадо, ныне приидох, да поведаю тебе сие. Егда начнеши здати храм Божии во имя великого Чюдотворца Николы, и одесную страну олтаря створи притво//(л. 94)р и присовокупи ко олтарю, ту бо лежать мощи моа. Над мощьми же моими соделаи раку». И сиа рече и невидим бысть. Василеи же тои, возбнув от видениа, и никого же видев, и от радости начат плакати, радуяся посеще преподобнаго и явлению святаго. Поведа же се токмо единому игумену и диаку, в то время пребывающему во обители Ивану имянем, понеже любовь имея межю собою друг к другу. Тои же диак Иван и мне поведа за еже случися ему с нами служити у единого храма, а иному же никому не поведа, донелиже дело совершися. И потом ясно всем исповедая и чюдо проповедая преподобнаго явления святаго. Церкви же еще не свершенне бывше.

Игумен же Васиан прочее отиде за немощь некую, и бысть по нем ин игумен другый Васиан,// (л. 94 об.) рекомый великый. Тои такоже попечение имеяше о устроении монастырьском, и о создании церковнем, и о украшении святых икон, и о всякых потребах монастырьскых. Василеи же церковь постави велию и перславну и вся устрои, яко же повеле ему святыи. Потом случися тому же Василию церков здати Николы Чюдотворца во имя вместо згоревшиа церкви в прежереченном селе в Надпорожие. Аз же в то время тамо священьствуя. Тои же Василеи сам мне исповедая усты ко устом, и вся ми явление сказа по ряду бывшее преподобнаго и посещение святаго, и потом отиде во своя си радуяся, многа благодарениа воздающи Богу, творящему дивная чюдеса и преславная явлениа своим угодником. Мы же сиа от уст его слышахом и написахом во славу Христу Богу//. (л. 95)

О явлении преподобнаго старцу Тимофею и о написании образа святаго Александра.

И по сем убо игумен Васиан совещает с братиею, како угодно быти о иконах. И призваша из града иконописца Семиона имянем. Семион же прииде к ним по словеси их с сыном с Ываном. Игумен же начат Семиону глаголати о иконном писании. Семион же рече в себе: «Слышу чюдеса преподобнаго Александра, яко не вотще малый труд мои будет, яко да и аз приобещник буду святому сему месту». И рече к игумену и к братии: «Аще Богу угодно будет и преподобному Александру и вам потребно, како Бог поможет и преподобнаго молитва». И взем от игумена благословение и от отець молитвы, и ятся делу. Бе же в то время в монастыре старець некый от древних, имянем Тимофеи, простый человек, книгам не учився, но духовен бяше и трудо//(л. 95 об.)положен. И сему обычен бе всегда на дело и тружатися своего ради спасениа. Иногда же случися ему по вечернеи молитве и по своем келеином правиле взлег мало препочити дневнаго ради труда, и усну легце и абие, аки на яве, видит пришедша к нему старца умилна образом в полыседа и сице глаголюща: «Брате Тимофеи, иди к игумену и к братии и рци им, да повелять написати образ игумена Александра, началника обители сеи, и положат в притворе на гробе моем. Аз есми Александр, яко же мя видиши». И сие рек и невидим бысть.

Старець же тои, яко очюти свои себе от видениа, скоро встав, славя Бога и преподобнаго Александра. И наутрие, шед, поведа игумену. Игумен же по заутрении братии сказа видение оного брата и сведителя//(л. 96) его поставляеть оному видению. Он же поведа всеи братии, и вси прославиша Бога и его угодника, преподобнаго Александра, и повелеша иконописцу Семиону написати образ началника Александра. Семион же иконописець, не ведый, како по образу подобно написати, многа бо лета прешла суть по преставлении святаго, и многу вопрошению бывше от древних инок, в обители пребывающих и по окрестных местех от живущих человек, но никто же самовидець бяше преподобнаго, но токмо от видениа оного старца и прежереченнаго Тимофея уверитися.

Прещедрыи же Бог вся творит, елико хощеть. В то же время прииде в монастырь человек некый Никифор имянем, Филипов сын, посетити братию, жилище имея на Онеге реце в веси онои //(л. 96 об.) прежереченнои Пиале. Тои же Никифор известный самовидець бяше блаженнаго Александра и веру велию к нему имея. Тако же и по смерти преподобнаго братию посещая. Тои же вся поведая игумену и братии иконописцу Семиону о преподобнемь и рече: «Александр бе возрастом средний человек, лицем сух, образом умилен, очи имев лущене, брада не велика и не велми густа, власы русы в полысед». Игумен же, и братиа, и иконописець, яко услышаша от Никифора, и радости наполнишася, яко искомое обретох, желаемое получих. Иконописець же с радостию и со тщанием написа образ преподобнаго, и положиша на гробе святаго, иже есть и доныне, с верою приходящим многа исцелениа бывают благодатию Христовою и молитвами преподобнаго отца нашего Александра. //(л. 97)