О новогородце Алексее и о сыну его Семионе.

Потом же мину некое мало время, прииде в монасты из Великого Нова града человек некыи имянем Алексеи и с сыном своим Симеоном рода болярьска. И приходит к игумену, и припадает к ногама его, и тепле молит игумена и всю братию о приатии и о пострижении, дабы его игумен приал и сотворил инока. Игумен же виде веру его к Богу и желание, и приат его с лобовию, и постризает его, и нарече его во иноцех Асафом. Сын же его Семион, мало пребыв, отходит во град Каргополь, и яться купли, и бысть купець. Начат же велию веру имети к преподобному Александру и к монастырю его и часто прихожаше во обитель, посещая отца своего. Игумену же //(л. 91) и братии потребнаа приношаше и присылаше, елико ему Бог дарова в руце его. Всемогый же Бог веде его веру непреложну, и молитва преподобнаго поспеваше ему, еже о нем к Богу всегда бываема. И благослови его Бог, и сугубо дарова ему имение. Елико же он даяше в монастырь, Бог же стократно подаваше ему.

Отец же его Иасаф, пожив в монастыре в всяцем вздержании и благочинии лет 15, и в добре исповедании преставися. Семион же, проводив отца своего, честно надгробная певше, и повеле служи по нем до уреченных днеи. Сам же, много сжалив си по отце своем и о сих благодаря Бога, яко сподоби его Бог погрести отца своего. По сих пакы во град отходить и своеи купли ятся. Наипаче же сугубо и велие прилежание и много тщание имея к монастырю, яко никтоже ин. К игумену же и к братии любов, яко к своему отцу имеяше, и начасте посеща братию//(л. 91 об.), и многу милостыню творяше, и многы монастыря посещая, и милостыню подавая, аки от неистощимаго сокровища, от Бога дарованного ему таланта. Прочаа же о нем добродетели инде скажем.

О создании болшои церкви.

Елма же сим тако бывающим, братьство немало бяше. Церкви же мала еще и ветха. Помышля же игумен Васиан з братиею новую церковь вместо тоя болшую воздвигнути. И размышляше же о том, како мощно будет разрушити церковь великаго чюдотворца Николы, юже сам преподобный Александр святыма своима рукама основал, и составил, и бояся, «да не како в благодеяние место негодование от святаго на себе привлечем». По сих же предреченныи благый свои помысл на Божии воли возложиша глаголюще: «Аще угодно будет Богу и Чюдотворцу Николе, может Бог и дело створити». И повелеша делателем приготовити лес на создание церковное, и бысть тако. Игумен же и братиа в печали бяше о тако//(л. 92)вом строении, яко начаша делати великую церковь. Скорбяше же не токмо древ ради, но и о брашне потребных, зане быти подобно многым делателем, но яко же Божие хотение и преподобнаго молитва, тако и будет. Иже древле в пустыни израилтяны прекормивый, и ис камени воду источив им, и пятию хлебы пять тысящь народ насыти, Тои и ныне малое умножить. И бысть тогда явьствьно чюдо и всеми зримо – Бог дарова молитв ради своего угодника Александра: обычная брашна та же мера, яко же своим по вся дни доволна бяше всем, еще же и изобилно. Скорбяше же пакы и о том, яко древодели не бяше. Таже, аки Богом послан, прииде во обитель древоделатель от лук морьскых некии человек Василей имянем и многими знаем, иже хитр бе плотничному делу, и мудр древоделець, и строен церковному зданию. Игу//(л. 92 об.)мен же з братиею совещають с ним о церковнем здании. Он же никакоже отречеся, но совещаеть с ними, благ свет рече им: «Рад есми таковому Божию делу и вашеи любви, яко же Бог поможет. Токмо о древех попечение имей, а о стронии Бог, Тои и разум подасть, а мзду по делу воздадите ми во время уреченное по труду моему». И совеща с ними приити во подобно время. Повеле жи им церковь старую сносити и место угладити. Сам ж прочее отиде и по мале же времяни пакы приде Василеи во обитель, церкви же ветхой еще на месте. Василеи же рече ко игумену и к братии: «Что есте не сносили ветхой церкви? Или на ино место хощете ставити?» Игумен же и братиа начаша Василиа увещати: «Подтщися, господине, Бога ради, твое се дело, тебе бо повеленно Богом таковаа сзидати. У нас же//(л. 93) несть такова человека на то дернути». Василеи же рече им: «Аз убо совещах с вами новую церковь создати, а не ветхую разоряти». Игумен же и братиа начаша его с любовию увещати. Василий же ятся делу. Бе бо тои Василеи искусен таковому строению и, взем от игумена благословение, и иде в хижю свою, иже дана бысть ему покоя ради, и постися на дни уреченныя, яко дний седмь. Седмому же дню прешедшю и к вечеру приближающуся, Василию же по молитве седшю и помышляющу ему о таковом строении, и воздремався мало труда ради молитвенаго, еже к Господу Богу.