Дәреттің парыздары

Дәреттің парыздары - төртеу. Аллаһ тағала Құран Кәрімде айтады:

﴿ يَا أَيُّهَا الَّذِينَ آمَنُواْ إِذَا قُمْتُمْ إِلَى الصَّلاةِ فاغْسِلُواْ وُجُوهَكُمْ وَأَيْدِيَكُمْ إِلَى الْمَرَافِقِ وَامْسَحُواْ بِرُؤُوسِكُمْ وَأَرْجُلَكُمْ إِلَى الْكَعْبَينِ﴾

«Ей иман келтіргендер! Намазға тұрар кездеріңде беттеріңді және қолдарыңды шынтақтарға дейін жуыңдар. Бастарыңа мәсх жасап, аяқтарыңды тобықтарға дейін (жуыңдар)»⁶.

1. Бетті бір мәрте жуу. Беттің көлемі - ұзындығы жағынан маңдай төбесінен иектің түбіне дейін, ал ені жағынан екі құлақ сырғалықтарының арасына дейін жалғасады. Қас пен мұрт астындағы тері қоса жуылады. Сақал сирек болса, теріге судың тиюі уәжіп. Ал қалың болса, сақалдың беті жуылса жеткілікті. Сақалдың беттен асқан бөлігін жуу шарт емес.

2. Екі қолды шынтақтарға дейін бір мәрте жуу. Фиқһ ғалымдарының келісімімен екі қол шынтақпен бірге жуылады. Олардың сөзі келесі дәлелге негізделеді: Наъим ибн Абдуллаһ, Аллаһ тағала оған разы болсын, айтады:

(رأيت أبا هريرة يتوضأ، فغسل وجهه فأسبغ الوضوء، ثم غسل يده اليمنى حتى أشرع في العضد، ثم يده اليسرى حتى أشرع في العضد، ثم مسح رأسه، ثم غسل رجله اليمنى حتى أشرع في الساق، ثم قال: هكذا رأيت رسول اللّه صلى اللّه عليه وسلم يتوضأ)

Мен Әбу Һурайраның, Аллаһ тағала оған разы болсын, дәрет алғанын көрдім. Ол бетін жуып дәретті жақсылап алды. Сосын оң қолын білекке (иық бұлшық етіне) дейін жуды, кейін сол қолын білекке дейін жуды. Кейін басына мәсх жасады. Сосын оң аяғын сираққа дейін жуды, кейін сол аяғын да сираққа дейін жуды. Сосын былай деді: «Аллаһтың елшісінің (саллаллаһу алайһи уа саллам) дәретті осылай алғанын көрдім»¹.

3. Басқа мәсх жасау. Мәсх жасау дегеніміз - белгілі бір дене мүшені сулы қолмен сипап өту. Мәсх бастың төрттен біріне жасалады. Өйткені қол алақанының көлемі бастың төрттен бірін ғана қамтиды. Анас, Аллаһ тағала оған разы болсын, айтады:

(رأيت رسول اللّه صلى اللّه عليه وسلم يتوضأ وعليه عمامة قِطرية، فأدخل يده من تحت العمامة فمسح مُقدَّم رأسه ولم ينقض العمامة)

«Аллаһтың елшісінің (саллаллаһу алайһи уа саллам) дәрет алғанын көрдім. Басында Катарда тігілген сәлдесі болатын. Қолын сәлденің астына кіргізіп, басының алдыңғы жағына мәсх жасады және сәлдесін шешпеді»².

4. Екі аяқты тобыққа дейін бір мәрте жуу. Фиқһ ғалымдарының келісімімен аяқ тобықпен бірге жуылады. Нағим ибн Абдуллаһ, Аллаһ тағала оған разы болсын, айтады: Мен Әбу Һурайраның, Аллаһ тағала оған разы болсын, дәрет алғанын көрдім. Ол дәретін жақсылап алды. Сосын оң қолын білекке (иық бұлшық етіне) дейін жуды, кейін сол қолын білекке дейін жуды. Кейін басына мәсх жасады. Сосын оң аяғын сираққа дейін жуды, кейін сол аяғын да сираққа дейін жуды. Сосын былай деді: «Аллаһтың елшісінің (саллаллаһу алайһи уа саллам) дәретті осылай алғанын көрдім»³.

Абдулла ибн Амру, Аллаһ тағала оған разы болсын, былай деді: Бірде Аллаһтың елшісімен (саллаллаһу алайһи уа саллам) бірге Меккеден Мәдинаға келдік. Жолда екінді намазына дәрет алу үшін суға қарай жүгіріскен адамдарды көрдік. Оларға біз де қосылдық. Дәретті асығып алғандықтан кейбірінің өкшесіне су тимегені пайғамбарға (саллаллаһу алайһи уа саллам) көрініп қалады. Сол кезде Аллаһтың елшісі (саллаллаһу алайһи уа саллам) былай деп дауыстайды:

(ويل للأعقاب من النار)

«(Толық жуылмаған) өкшелерге от азабы болады»⁴.