Су қоймасындағы және цистернадағы судың үкімі

Су қоймасындағы және цистернадағы судың көлемі құдық суының көлемімен өлшенбейді. Цистернада бетінің көлемі 49м² , ал тереңдігі 25см суға нәжіс түссе, судың толық төгілуі шарт. Көлемі бұдан көбірек болса, су үкімі нәжіс әсерінің көлеміне байланысты болады. Бұған түскен жануар өлгенімен, әлі шіріп бастамаған күйде шығарылса, бұл сумен дәрет немесе ғұсыл алып намаз оқыған кісі, лайықты көлемде су шығарылмағандықтан, бір күндік намазын қайта оқиды. Жануар ісініп, шіріген күйде шығарылса, үш күндік намазын қайта оқиды. Бұл сумен жуылған киім қайта жуылады.

Ішілгеннен қалған сулар

Ішілгеннен қалған су дегеніміз - адам немесе жануар ішкен ыдыстағы су.

Үкімі: ішілген судың тазалығы - оны ішкен жануардың етінің тазалығына байланысты. Өйткені сілекей еттен бөлінеді. Ішілгеннен қалған су төртке бөлінеді:

1. Таза және тазалаушы

ә) Адам ішкен су. Мұсылман немесе кәпір болса да, жүніп немесе етеккір халде болса да. Әл-Бұхари жеткізген хадисте пайғамбар (саллаллаһу алайһи уа саллам) сүт ішкенде оң жағында бәдеуи, ал сол жағында Әбу Бәкір отырады¹. Сонда пайғамбар (саллаллаһу алайһи уа саллам) сүтті, алдымен, бәдеуиге беріп: «Оң жақтан, оң жақтан»-дейді.

Айша анамыз, Аллаһ оған разы болсын, былай деді: «Мен еттекір күйде болғанымда пайғамбардың (саллаллаһу алайһи уа саллам) ыдысымен сусын ішетінмін. Менің аузым тиген жерге аузын тигізіп, сол ыдыстан ол да ішетін»².

а) Қаны ақпайтын жәндіктерден қалған су.

б) Жылқы және еті адал жануарлар ішкеннен қалған су.

2. Нәжіс

ә) Доңыз, ит, жыртқыш аңдар және еті арам болған жануар ішкеннен қалған су.

Аллаһ тағала Құран Кәрімде айтады:

﴿ قُل لاَّ أَجِدُ فِي مَا أُوْحِيَ إِلَيَّ مُحَرَّماً عَلَى طَاعِمٍ يَطْعَمُهُ إِلاَّ أَن يَكُونَ مَيْتَةً أَوْ دَماً مَّسْفُوحاً أَوْ لَحْمَ خِنزِيرٍ فَإِنَّهُ رِجْسٌ ﴾

«(Әй, Мұхаммед!) Маған уахи етілген нәрседе тамақтанушы үшін өлекседен, аққан қаннан және доңыз етінен басқа нәрселерді арам көрмеймін...»³.

Әбу Һурайра, Аллаһ тағала оған разы болсын, Аллаһтың елшісінің (саллаллаһу алайһи уа саллам) былай дегенін жеткізді: «Біреудің ыдысын ит жалап кетсе, жеті мәрте жусын және біріншісін топырақпен»⁴.

а) Арақ ішкен адам арақтан кейін бірден ыдыстан су ішсе, ол ыдыстағы ішкенінен қалған су нәжіс саналады. Өйткені арақ - нәжіс.

б) Аузы нәжістенген мысық, тауық, түйе және сиыр ішкеннен қалған су.

3. Таза, бірақ, таза болғанымен қолданылуы мәкруһ

ә) Қоқыс аралаған мысық пен тауық ішкеннен қалған су.

а) Жыртқыш құс ішкеннен қалған су.

б) Үй жәндіктерінен болған тышқан және жылан ішкеннен қалған су. Өйткені олардың еттері арам.

Мұндай су тиген киіммен намаз оқу мәкруһ.

4. Таза, бірақ, тазалығында күмән бар

Бұл - қашыр мен есек ішкеннен қалған су. Егер өзінен басқа таза су табылмаса, онымен дәрет алуға болады. Алайда дәреттен кейін таяммум алу қажет.

Тер араласқан судың үкімі ішілген судың үкіміне ереді. Өйткені тер де сілекей секілді еттен бөлінеді.

Үшінші бөлім: Іш дәрет