Екінші бөлім: Судың түрлері

Тазалануға жарамды су алтыға бөлінеді. Олар - көктен жауатын және жерден шығатын сулар:

1. Жаңбыр суы. Аллаһ тағала Құранда былай дейді:

﴿ وَأَنزَلْنَا مِنَ السَّمَاءِ مَاءً طَهُوراً ﴾

«...Және көктен таза су жаудырдық»².

2. Теңіз суы. Әбу Һурайрадан, Аллаһ тағала оған разы болсын, бір кісі Аллаһтың елшісінен (саллаллаһу алайһи уа саллам) теңіз суының үкімін сұрайды, ол былай жауап береді:

(هو الطهور ماؤه، الحِلُّ ميتته)

«Теңіз суы - таза және ондағы өлген жануарлар адал»¹.

3. Өзен суы.

4. Құдық суы.

5. Қар мен бұршақ суы. Аллаһтың елшісі (саллаллаһу алайһи уа саллам) былай дұға ететін:

(اللّهم طهرني بالثلج والبرد والماء البارد. اللّهم طهرني من الذنوب والخطايا كما ينقى الثوب الأبيض من الوسخ)

«Аллаһым, мені қармен, бұршақпен және сумен тазалашы. Аллаһым, ақ киімнің кірден тазалануындай мені де күнәларымнан және қателіктерімнен тазалашы»².

6. Бұлақ суы.

Шариғаттың сипаттауында су бес түрге бөлінеді:

1. Таза және тазалаушы су

Бұл - шүбәсыз таза су. Дәретсіздіктен тазартады және нәжісті кетіреді. Зәмзәм суымен дәрет алып, ғұсыл құйынудың сауабы - өте зор. Аллаһтың елшісі (саллаллаһу алайһи уа саллам) былай деді:

(فُرج سقفي وأنا بمكة، فنزل جبريل عليه السلام ففرج صدري ثم غسله بماء زمزم)

«Меккеде болғанымда төбе ашылып, Жебірейіл түсті. Ол кеудемді ашып, зәмзәммен жуды»³. Алайда зәмзәм суымен астыңғы жақты немесе денедегі, киімдегі, орындағы нәжісті тазалау - харам болмағанымен соған жақын ұнамсыз іс. Өйткені зәмзәм басқа суларға қарағанда қасиетті саналады.

Таза және тазалаушы су жеті жағдайда өз үкімін жоғалтпайды:

ә) Оған түскен жансыз таза нәрсе су сипаттырының ( дәмі, түсі, иісі) бірін немесе бәрін өзгертсе, алайда аққыштығын жоймаса және «су» атауынан басқа атауға өзгертпесе, су «таза және тазалаушы» үкімін жоғалтпайды. Айша анамыздың айтуынша, Аллаһ тағала оған разы болсын, пайғамбар (саллаллаһу алайһи уа саллам) жүніп кезінде басын құлқайыр (алтей) езілген сумен жуғанда таза сумен шаймайтын⁴.

а) Оған араласқан таза сұйықтық су құрамына басым әсерін тигізбесе, су «таза және тазалаушы» үкімін жоғалтпайды. Басым әсері дегеніміз не? Таза сұйықтықтың бір сипаты судың құрамында пайда болуы әсердің басымдылығын білдіреді. Мысалы, суға төгілген сүттің бір сипаты (түсі және дәмі) суда пайда болса, су дәрет алуға жарамайды. Ал сірке суы секілді таза сұйықтық араласып, судың құрамында оның бір қасиеті пайда болса, су «таза және тазалаушы» үкімін жоғалтпайды.

б) Суға қаны ақпайтын шыбын, маса, шаян, тарақан секілді жәндіктер түскенде, тіпті өліп қалса да, су «таза және тазалаушы» үкімін жоғалтпайды. Әбу Һурайра, Аллаһ тағала оған разы болсын, Аллаһтың елшісінің (саллаллаһу алайһи уа саллам) былай дегенін жеткізді:

(إذا وقع الذباب في إناء أحدكم فليغمسه كله ثم ليطرحه فإن في أحد جناحيه شفاء وفي الآخر داء)

«Біреудің ыдысына шыбын түссе, бүкіл денесін оған батырсын, сосын алып тастасын. Расында, оның бір қанатында шипа, екінші қанатында дерт болады»⁵.

в) Суда балық секілді су жануарлары өлген жағдайда су «таза және тазалаушы» үкімін жоғалтпайды. Әбу Һурайраның жеткізуімен, Аллаһ тағала оған разы болсын, бір кісі Аллаһтың елшісінен (саллаллаһу алайһи уа саллам) теңіз суының үкімін сұрағанда, ол: «Теңіз суы - таза және ондағы өлген жануарлар адал»-деп жауап береді⁶.

г) Қолданылған суға араласқан таза судың көлемі басым болса, су «таза және тазалаушы» үкімін жоғалтпайды.

д) Көп тұрып қалған су.

е) Суға түскен бақа өліп қалса, су нәжістенбейді және тазалануға жарайды. Алайда бақаның еті арам болғандықтан ол суды ішуге болмайды.