1.4.Серпас серти юöртана текст велöдiгöн удж котыртöм да пуктöм.
Йитöса серни сöвмöдöм вылын удж колö нуöдны оз сöмын сочинение гижан урокъяс вылын. Текст лöсьöдöм могысь уджсö колö нуöдны дугдывтöг, öта-мöдкöд йитöдын.
Уджсö котыртiгöн велöдысь мыджсьö принципъяс вылö. Коммуникативнöй принцип петкöдсьö, кор челядь висьталöны ассьыныс мöвпъяс, лöсьöдöны йитöса сёрни.
Гижöда да гижöдтöм сёрни йитöм (текст челядь лöсьöдны гижöм и устнöя, тайö уджъяссö колö сорлавны.)
Текстысь сёрникузяяс интонацияöн йитöм: текстысь аддзыны сёрникузяяс, кодъяс петкöдлöны дивитöм, видöм, да с.в.
Диалога да монолога сёрни сорлалöм принцип.
Текст лингвистикалöн мукöд юкöнъяскöд йитöдын велöдöм.
Ас удж прöверяйтны велöдан принцип: челядьлы колö не сöмын кужны лöсьöдны да гижны текст, но и кужны прöверяйтны уджсö.
Контрольно-оценочнöй деятельность: челядь ассьныс донъялöны удж, пасйöны тырмытöмторъяс.
Индивидуальнöй подход: быд челядь дорö колö матыстчыны индивидуальнöя, медым аддзыны сьöкыдлунъяс.
Деятельностнöй подход: челядь дасьтöны план и сы отсöгöн воöдчöны сувтöдöм мог дiнö.
Сöвмöдан принцип: колö, медым велöдчысьяс сöвмисны быд боксянь.
Мотивация принцип: колö, медым челядьöс ышöдны удж дорö.
Текстö велöдiгöн велöдысьлы колö уджсö пуктыны сiдзи, медым челядьлы окота вöлi уджавны урок вылын, медым велöдчысьяс асласныс тöдöмлунъясöн юксисны мукöд велöдчысьяскöд. Уджö колö пыртны уна сикас приемъяс да методъяс. Колö сöвмöдны челядьлысь сёрнитан кужöмлунъяс да тöдöмлунъяс; медым найö вермисны вöдитчыны быд сёрнисикасöн (гижöда да гижöдтöм), кывзiгöн …
Колö пасйыны, мый удж котыртiгöн ми, дерт, подуласям сiйö тöдöмлунъяс вылас, кодъясöс челядь босьтiсны 1-2 классъясын. Челядь первöй классын лöсьöдiсны гижöдтöм текст, мöд классын – юöртана гижöд сюжет кузя. Коймöд класса велöдчысьяслы быть колö кужны уджавны сюжета серпаскöд. Но челядьöс колö велöдны пыртны юöртана гижöда серпасалöмторъяс. Нёльöд классын – юöртана гижöдö велöдчысь пыртö мöвпалöм. Сiдз жö пасъям, мый удж сикас серти мунö оз сöмын сюжета серпас серти удж, но челядь гижöны и аддзылöм серти текст, пейзажа серпас серти.
Велöдчысьяс тöдöны и кужöны уджавны серпас вылын, тöдöны, мый медводз колö видлавны серпассö, тöдчöдны ас водзын кор да кöнi, мунö действиеыс, кутшöм персонажъяс эмöсь. Челядь сетöны серпаслы юрним, та бöрын лöсьöдöны план, код серти найö кутасны лöсьöдны гижöдсö.
Торъя ин урок вылын колö кольны и рефлексиялы, самооценкалы. Челядь урок помын асьныс петкöдлöны гöгöрвоöмлысь тшупöд, и найö тöдöны нин, кöнi колö пуктыны торъя вын велöдiгöн, мый найö нин бура гöгöрвоöны. Урок кежлö дасьтысигöн велöдысь мыджсьö челядьлöн сьöкыдлунъяс вылö. [Беланова;лекцияяс]
Во чöж велöдысьлы быть колö пыртны гижöда и гижöдтöм уджъяс, сы вöсна, медым челядь сöвмисны уна боксянь.
Видзöдлам торъя уроклысь тэчас.
Конспект.
Уроклöн тема: Серпас да дженьыдик текст серти гижöд лöсьöдöм.
Уроклöн мог: Водзö сöвмöдны челядьлысь тöдöмлунъяс да кужöмлунъяс йитны сёрникузяяс öта-мöдыскöд да вöдитчыны öтсяма юкöдъяса сёрникузяясöн.
Торъя могъяс:
1.Велöдан могъяс: сöвмöдны кужöмлунъяс видлавны сюжета серпас; тöдöмлунъяс текст тэчас тöдчöдöм вылö.
2.Сöвмöдан могъяс: сöвмöдны йитöса сёрни, мышление, память, внимание.
3.Этшö пуксьöдан мог: велöдны öтувъя уджö.
Уроклöн мунöм.
1.Орг.Момент.
-Видза оланныд,челядь!
2.Урок могъясöн челядьöс тöдмöдöм.
-Талунъя коми кыв урок вылын ми водзö кутам велöдчыны йитны текстын сёрникузяяс, а сiдз жö велöдчыны паськöдны сёрникузяяс.
3.Йитöса серни серти удж.
-Казьтыштам, мый отсöгöн позьö йитны сёрникузяяс öта-мöдыскöд. (нимвежтас отсöгöн, союзъяс отсöгöн, матыс вежöртаса кывъясöн)
-Челядь, а кутшöм кывсикасъяс отсöгöн позьö паськöдны сёрникузяяссö?(…)
-Видзöдлöй пöв вылын сетöм серпас вылö!
-Кодöс сэнi петкöдлöма? (кык зонка да пöч)
-А мый вöчöны найö? (пöч усьöма, а зонъяс отсалöны сылы кыпöдчыны)
-Челядь, тайö серпас дорö сетöма неыджыд текст. (Кык зонка мунiсны школаö. Кык зонка аддзисны, мый усьöма пöч. Котöртiсны и отсалiсны кыпöдчыны). Лыддям гижöдсö. Кажитчис тайö гижöдыс? Мый тi верманныд шуны тайö текст йывсьыс: лöсьыд али абу?
-Вайö видлам вежны тайö текстсö, медым сiйö вöлi лöсьыд, стöч. Медводз устнöя, а сэсся быдöн гижанныд тетрадьясö. (Велöдысь юрнуöдöм улын челядь стöчмöдны текст.)
-Кыдзи позьö заводитны гижöдсö? Мый позьö шуны зонъяс йылысь? Кутшöм сетöм кадакывъяс отсаласны петкöдлыны зонъяслысь действиеяс: котöртiсны, отсалiсны, велöдчисны, ислалiсны, радлiсны. Мый шуам пöч йылысь?(аттьöалiс). А мый ещö вöчис пöч?(сетiс зонъяслы кампетъяс) да с.в.
Отсасьысьяс.
Öтчыд Ваня да Миша мöдöчисны школаö. Туйыс вöлi вильыд. Друг зонкаяс аддзисны, мый туй вылö усьöма пöч. Найö зэв öдйö котöртiсны медым отсавны. Ваня кыпöдiс сумкасö, а Миша отсалic пöчлы.Пöч аттьöалic зонкаясöс и найö мунicны водзö.
Велöдчысьяс висьталöны висьтсö, кывзöны да донъялöны öта-мöдныссö.
-Челядь, урок помöдз коли некымын минут и сы вöсна лыддьöй ассьыныд висьтъяс, видзöдлöй эмöсь ли öшибкаяс.
4.Кывкöртöд.
- Мый ми вöчим урок вылын?
-Кутшöм удж кажитчис?
-Мый выльсö тöдмалiнныд?
Сiдзкö, уроксö лöсьöдiгöн быд велöдысьлы текстö велöдöмын быть колö дасьтысьны, öти боксянь, колö артыштны, мый сетас велöдчысьяслы тайö урокыс, мöд боксянь, кутшöм кужöмлун абу на налöн тырмымöн, кыдзи, кутшöм уджъяс отсöгöн ciйöс артмöдны да быдтыны.
2.Серпас вылын уджалiгöн коймöд класса челядьлысь тöдöмлунъяс да кужöмлунъяс эрдöдöм.
2.1.Челядьлысь серпас серти юöртана текст лöсьöдöмын кужанлунъяс эрдöдöм
Экспериментальнöй уджыс вöлi нуöдöма Усть-Кулöмскöй районын п.Лöгын-яг шöр школаын, коймöд класса велöдчысьяскöд. Эксперимент отсалic нуöдны велöдысь Тарабукина Валентина Васильевна. Уджыс вöлi котыртöма 6 морт костын.
Экспериментлöн могыс-видзöдлыны коймöд класса велöдчысьяслысь текст лöсьöдöмын тöдöмлунъяс да кужöмлунъяс, лöсьöдöм уджъяс могыс вынсьöдны челядьлысь тöдöмлунъяс да кужöмлунъя юöртана текст лöсьöдöмын.
Эксперимент мунiс коми кыв урокъяс вылын. Вöлi нуöдöма эрдöдан эксперимент.
Эрдöдан экспериментлöн могыс – видзöдлыны коймöд класса велöдчысьяслысь сюжета серпас серти юöртана текст лöсьöдöмын татшöм тöдöмлунъяс да кужöмлунъяс серти:
Тема тырмöмöн восьтöм (став геройясö аддзöм);
Текстын юкöнъяс торйöдны кужöм;
Сёрникузяяс паськöдöм;
Синонимъяс пыртöм;
Сёрникузяяс öта-мöдыскöд йитöм;
Öтсяма юкöдъяс пыртöм.
Челядьлы вöлi вöзйöма сюжета серпас.(Содтöд)