Куимöт картина

Сiя жö обстановкаын, кык год бöртi. Рытъяв кад. Осьта öшынöт ылiсянь кылö том отирлöн сералöм-дзульзьöм. Фельдшер, лэдзöм тошока ни, уджалан халата, пукалö öшын подушка вылын, лыддьöтö осьтöм книга. Оссьö ыбöс. Миськасян ведраöн киас приёмнöяс пырö уборщица, сувтöтö ведрасö кок увтас, коссö кутыштöмöн веськöтчö.

ФЕДОСЬЯ. Тэ тай сё татöн пукалан. Некин ни больничаас абу да.

ФЕЛЬДШЕР. Кытчö нö этася воштiсян?

ФЕДОСЬЯ. Мый, бытьтö, и петны ни он адззы кытчö, зонка морт? Тэ жö том. Мунiн бы клубö, нылкаэз дынö. Мый уж мый, а эта доброыс тыр деревня вылас. Бöрйин бы аскодьöмö кинöскö ны коласiсь да гöтрасин. Кöть бы свадьба вылат гуляйтыштiм. Кутшöм сiя зонка мортыслö öткаса олан. А тэ, видзöт то, лунiсь лун сё нигаэзсит мыйкö лыддьöтан. Мыйкö вылö тош öшö сэтчö лэдзöмыт. Стариксявны я мый я öнiсянь мöдан?

ФЕЛЬДШЕР (думайтöв-керö). Оз менö тiян нывкаэз дынö кыскы.

ФЕДОСЬЯ (дивуйтчöмöн). Вот тэныт и на. А мыля бы оз? Мый сэтшöмыс лоис? Мыйöнкö нiя миян умöльöсь я мый я?

ФЕЛЬДШЕР. Ме эг шу — умöльöсь. Томöсь нiя тiян. Ме годсяыс ны коласын некин абу.

ФЕДОСЬЯ. Но и мый, томöсь дак? Тэ кытчöдз тожö не старик. Томжыкыс чожажык бöбасяс, колö кö тэныт тöдны дак.

ФЕЛЬДШЕР (сералöмöн). Но этö тi мыйкö не сiйö ни, Федосья Прокопьевна, баитат.

ФЕДОСЬЯ. А мый-ту не сiйö? Сiйö. Етша разь öнi том отирыс коласын сiдз овлö? Медперво пöттöдз узьласö кытöнкö, а сэсся вöлись гöтрасьöны.

ФЕЛЬДШЕР. Да ме ог и шу — оз овлы. Овлö — и гöтрасьнытö эта бöрсянь оз ештö, бöр янсöтчöны.

ФЕДОСЬЯ. Овлö и сiдз, кышсиныс петöны.

ФЕЛЬДШЕР. А меным сiдз оз ков.

ФЕДОСЬЯ. Сiйöн, натьтö, что перво жö сiдз олны эн понды. А вот пондыл-ко, шуам, öтпыр-мöдöтпыр, дак сэсся сiдз и тöд, султчынытö он ни вермы.

ФЕЛЬДШЕР. Сiдз, натьтö, и эм.

ФЕДОСЬЯ. Мый ме тэныт и баита.

ФЕЛЬДШЕР. Куль ныкöт. (Кинас öвтыштöмöн.) Ась, кинлö кыдз колö — олöны.(Лöсьöтыштö ныр вылас очкиэз, мышкыртчö книга весьтö.)

ФЕДОСЬЯ. А тэ гöтрасьнытö сiдз и он думайт?

ФЕЛЬДШЕР. Ог кытчöдз. Арсяняс велöтчыны муна.

ФЕДОСЬЯ. Эн на разь мыдз велöтчöмсянят? Велöтчöмыт ни да...

ФЕЛЬДШЕР. Етша. Эшö колö.

ФЕДОСЬЯ. Но сэк уж сiдз и тöд, он ни ешты гöтрасьнытö. Сiдз, чунь öтнат свой век и пондан олны.

ФЕЛЬДШЕР (лыддьöттöнняс). Видзöтам сэтчин.

ФЕДОСЬЯ. Видзöт. Ачыт тöдан. (Кватитчöмöн.) Мый этö ме талун басниэсö баита, миськасьны колö да.(Мышкыртчö ведра весьтö, судзöтö да пидзыртö бон, пондö гужгышавны джодж кузя.)

ФЕЛЬДШЕР. Ме тiянлö ог мешайт? (Пидзöссэзас кусiньтыштöмöн лэбтыштö коккесö öшын подушка вылö.)

ФЕДОСЬЯ (миськасьтöнняс). Мый, поди, öддьöнсö... Лыддьöт, колö дак. Ме эд дзир джоджсö ниртышта.

Эта коста кысянькö öшын сайсянь пондö кывны: «Пельшöр Сиволот! Пельшöр Сиволот!»

ФЕЛЬДШЕР (лэбтыштö юрсö книга бердiсь, кывзiсьö, лэдзö коккесö öшын подушка вылiсь). Кытöн эшö мый лоис?(Пуктö книгасö öшын подушка вылö, сувтö, кывзiсьö одзлань.)

«Пельш-ö-öр! Пельшöр Сивол-о-от!» Öшын сайын пондö кывны горöн ёркöтöм.

ФЕДОСЬЯ (веськöтчыштö). Эта öшö мый сэтшöмыс? Кинкöт мый лоис? Кутшöм нö ни эта олан? Не лун, не ой и зника ни тай некутшöм абу. Татчö я мый я кинкö?

ФЕЛЬДШЕР. Конешно, татчö.

ФЕДОСЬЯ. Дак ме эд игналi ни калиткасö.

ФЕЛЬДШЕР. Осьтö мунö, игналiт дак. Мый нö эшö видзчисят?

Ёркöтчöмыс да горöтлöмыс кылöны одззамоз. Федосья тульснитö-лэдзö ведраö кисис бон, котöрöн уськöтчö ыбöсö.

ФЕЛЬДШЕР. Неладно бöра кинкöткö. (Босьтö сумка, осьтö, видзöтö, сюйыштö сэтчин мыйкö инструменттэз коласiсь, пöдналö бöр, сувтöтö пызан вылас, сюйö киэсö халат карманнэзö, пондö видзчисьны.)

Коридорсянь пондöны кывны гора кокшыэз, оссьö ыбöс. Ременьтöм, шапкатöм, пöрччалöм кизя йöрнöс сикöджöн, приёмнöяс котöрöн пырö ИГНАТ.

ИГНАТ. Ура, пельшöр! Менам зоннэз шогмисö! (Ыбöс колассянь чепöссьö фельдшер дынö, кватитö киэс вылö, янсöтö джодж бердiсь, öтпыр-мöдöтпыр лэбтыштö вывлань.) Ура! Зоннэз! Ура! Вай ме тэнö эта понда окала.

ФЕЛЬДШЕР. Мыйлö бы? Не месянь эд, шогмисö дак. Ассянят, натьтö.

ИГНАТ. Сiдз, пельшöр, сiдз. Но не тэ отсöттöг, дона морт! (Кутö, окалö.)

ФЕЛЬДШЕР. Дак былись ни кинкö эм?

ИГНАТ. Тэ разь меным он верит? Ей богу, кык зон! Вежöртан тэ он, пельшöр? — кык Сиволот. Кыкнаннысö тэ нимöн шуа. Вот адззылан. Гленитчö меным тэнат нимыт. Öтнат жö вöлiн Сиволотыс деревня вылас, дак öнi куимöн лоат. Юам эта понда сто граммöн, а? Кытöн тэнат стаканыт? (Казялö пызан вылiсь стакан.) Да вот жö сiя! Сэтöн и эм!(Вештыштö матöжык асланяс, кыскö кармансис бутылка, кутчисьö пиннезнас тупкöт бердö.)

ФЕЛЬДШЕР. Эн на сiйöн тэрмась. Шоччись, пуксьы да. Мыдз талун, тыдалö.

ИГНАТ. Мыдзкодь, да... Но талун сiя меным нем туйö. Менам жö зоннэз! Зоннэз! Вежöртны колö!

ФЕЛЬДШЕР. Этö ме вежöрта.

ИГНАТ. Сiдз вот, дона менам морт.

ФЕЛЬДШЕР (пызан саяс пуксьытöн). Ме мöдiкö некыдз ог вежöрт.

ИГНАТ. Мый сэтшöмсö? (Нёджжöвтыштö бöрланяс, кыскыштö матöжык асланяс стул, пуксьö.)

ФЕЛЬДШЕР. Кыдз сiдз вермис лоны, что иньыт и новйöтчис, и челядясис, а эстöн больницаас ми немись-нем ог и тöдö?

ИГНАТ (горöн ваксьытöн). А-ха-ха-ха-ха! Да сымдасö ме и ачым ог тöд. Сiя жö эз и ноллöтчы. Некытшöм декретö эз петал.

ФЕЛЬДШЕР (дивуйтчöмöн). Да-а. Чудеса да и только.

ИГНАТ. Во-во-во! Ме тожö сiдз думайта. А-ха-ха-ха-ха! Былись чудеса! (Чöлыштöм бöрсянь.) Татчö сэкся вовлöм бöрсянь, но... тöдан эд... кык годöн одзжык — сiя декретсис петiс, уджалны пондiс. Вöрöтчыны, шуö, меным пельшöрыс тшöктiс. Дак тöдан тэ, он, Сиволот, кыдз сiя эта бöрсянь вöрöтчи-и-ис. Не инька, а ош. Кык год сьöрна сымда сiя меным уджсö бергöтiс-монöлтiс, мымда сизим годнас, декретас пукалтöн, эз кер. Этö ме тэныт пöрьясьтöг баита.

ФЕЛЬДШЕР (дивуйтчöмöн). Вот кыдз.

ИГНАТ. Сiдз вот, дона морт. Сiя менам и пессö пыртiс, и васö кайöтiс, и горсö лонтiс, и няньсö пöжалiс, и сёян-юансö лöсьöтiс, и джоджсö миськалiс, и подаыскöт вöдитчис. А подаыс öнi миян карта выла-а-ас! Кöркöся кулаккезнас кöднö шувлiсö, дак нылö сымдаыс и вöтын эз вöтассьы.

ФЕЛЬДШЕР. Эн жö тэ баит.

ИГНАТ. А мый-ту эн баит. Пöрьясьтöг ме тэныт висьтала. Пермер жö ме öнi. Даскуим мöс колкознöйесö гортын чилькöта да аслам Сьöданькаыс даснёльöт. А сэтöн öшö пороз-нетельыс сымда жö да тавося куканнес. Перма да и дöс сэтöн. А сiя менам — пермерка, иньöс ме шуа. Дак веритан — он, пельшöр, дöс и дöс уджсö керö. Ойсö кодьöн оз узь, сё мыйкö гундыртö. Сiя меным и ытшкö, и куртö, и турун зородсö тэчö.

ФЕЛЬДШЕР. И зород, нельки, шуан, тэчö?

ИГНАТ. Кыдз инö тэныт, оз да...

ФЕЛЬДШЕР. И прокмö, бытьтö, мужскöй уджсö керны?

ИГНАТ. Öшö кыдз прокмö.

ФЕЛЬДШЕР. А ачыт нö сэк мый керан, иньыт кö, шуан, зородсö тэчö дак?

ИГНАТ (киэсö паськöтыштöмöн). Чудак тэ, пельшöр, сымдасö он вежöрт. Ме таля. Сiя лэбталö увдöрсяняс, а ме вевдöрсяняс таля.

ФЕЛЬДШЕР. Дак эд сьöкыт жö, натьтö, инькаытлö увдöрсяняс, кöр тэ, мужик морт, вевдöрсяняс, но... зород вылас ме шуа. Батi, мöднёж сэтöн колö?

ИГНАТ (кинас öвтышалöмöн). Не-е-е. Мöднёж сэтöн некыдз оз туй. Думайт вот ачыт, кытчö ме сы сьöкыта öрдöнсö велдöрас лэбта? Сiя жö, сiдз и тöд — му бердöдз зородсö ляпкöтас. А мынас кö, мыйись-мый, шуам, велдöрсяняс?.. Да эшö ме вылö усьнытö инмас? Мый тэ сэк думайтан? Эд шедны кö эта бонба ултö, дак эта бöрсянь и коскаэтö он öкты. Öтiк ва места дзир тэись и кольччас.

ФЕЛЬДШЕР. А сiдз уж, натьтö...

ИГНАТ. Мый ме тэныт и баита. (Чöлыштöм бöртi.) Дак юыштам, батi, сто граммнас? Ме эд натодиль тэ понда.(Пондылö кутчисьны бутылка бердö.)

ФЕЛЬДШЕР. Сiя оз китсась. Ештам, вайин дак. Тэ висьтась, висьтась одзлань.

ИГНАТ (кватитчöмöн). А, но, вунöтчи эд, забыль. Сiдз вот кык год сьöрна сiя менам — иньöс ме шуа — лунiсь-лун и вöрöтчис... Но и ойезнас, конешно... ачыт вежöртан... тожö.

Фельдшер гогинялыштö паныт юрнас.

ИГНАТ. И талун асывсяняс сiдз жö. Медперво ытшкисим час кыным сьöрна, а сэсся куртiм, тэчим. Сiя лэбталiс, а ме тали. Тонна етш, натьтö, зородалöмыс лоас. Рытъявыл, видзöта. Колö гортö мунны. А сiя ольсалiс зород бердас менчим плащ, водiс да и шуö: мун пö лэдзчыл туиснас шор дорас ваысла. Юаныс пö бырсис, а менам пö горш косьмö. Но ме и мунi.

ФЕЛЬДШЕР. Сэсся нем йылiсь эз и казьмöт?

ИГНАТ. Эз топ кыдз. Нем тай тöдвылам эз кольччы. Лэдзчылi ме шор дорöдззас. Ачым мисси да юи, и сылö туиснас кайöта. Сибöтча сiдз зородö дынö, а сэтчин тай кыдз пон позын, чива-уляыс няргöны. Менам сьöлöм кок пятаэзöдз, юрси кышöпöн, а ачым сiдз и кынми местаам. А иньö сэтöн и шуö: вот пö, видзöт пö, кык зон пö тэныт вайи. Видзöта — и былись кыка плащ вылас куйлöны, и былись зоннэз.

ФЕЛЬДШЕР. Чудеса да и только!

ИГНАТ. Чудеса, конешно. Но эта эшö не быдöс.

ФЕЛЬДШЕР. А мый эшö?

ИГНАТ. А кывзы вот, одзлань висьтала. Кыдз нö ме, мыся, тэнö ныкöт гортöдз вайöта? Этö ме иньöлö сiдз. А сiя меным: етша пö кыкыс, дак верма пö эшö куимöтö вайны. Дак веритан, он, пельшöр, кыдз тай ме кылi сымдасö, сiдз сэтöн садьö и бырис.

ФЕЛЬДШЕР. Повзин я мый я сыöддьöн?

ИГНАТ. А мый тэ думайтан?

ФЕЛЬДШЕР. Мыйсянь бы?

ИГНАТ. А куимöтыссянь. Мый, думайта, сысянь, пон мыгöрыссянь, босьтан. Кутас вот да былись куимöтö ваяс.

ФЕЛЬДШЕР. А мый сэтöн умöльыс? И ась бы вайис. Кык ли, куим ли, сё эд быдмасö. ИГНАТ. Но не-е-е, пельшöр. (Кинас öвтышавтöн.) Эн баит сымдасö. Отирыс жö смех вылö лэбтас. Некинлöн эшö деревня вылас сэтшöмыс эз вöвлы да.

ФЕЛЬДШЕР. Эз вöвлы, дак вот и лоис бы.

ИГНАТ. Сiя-ту бы сiдз. Да кинкöт нö ме сэк узьлынытö понда? Нiя жö, сымдаыс, мамнысö кöсöдз нималасö, öшöпекöдз косьтасö. А ме сы дынö небытик дынö сё жö велалi. (Чöлыштöм бöртi кватитчöмöн.) Дак мый, юыштам, батi, невночканас?

ФЕЛЬДШЕР. Некöр ни öнi. Ковсяс сё жö ветлыны, видзöтны кагамамсö да зоннэтö. Неладно бы нем ныкöт эз вöв. (Сувтö, босьтö киас сумка.)

ИГНАТ (гажвевйöн). Но мый жö, кум... Гöсьöн сэки лоан. Мунам, ас синнат вежапиэтö адззылан. А этö...(босьтö бутылкасö пызан вывсис.) ...сэки ми гортын ни джагöтам.(Кыкöн петöны.)

Занавес