Ііі. Билиодигестивтік анастомоздар салу арқылы өт жолдарына ішкі дренаж салу
Жедел холециститке байланысты операция жасау кезінде билиодигестивтік анастомоздар салуға тура келеді. Негізгі көрсеткіштері:
Механикалық сарғаюы бар науқастарда жалпы өт өзегінде ұсақ тастар болса
Ұлтабардың үлкен үрпегінде алынбайтын тас болса
Жалпы өт жолының терминальдық бөлімінің тарылуы 2 см көп болса
Жалпы өт жолы қуысынан тастардың толық алынғанына күмән болса
Ұйқы безінің басының операция жасауға келмейтін қатерлі ісігі болған жағдайда
Бірақ жедел холецистит кезінде бауырастылық кеңістікте қабыну процестерінің болуына байланысты билиодигестивтік анастомоз салмастан бұрын дұрыс шешім қабылдау керек. Егер науқаста перитонит болатын болса, билиодигестивтік анастомоз салуға болмайды. Сонымен бірге гепатодуоденальдық жалғамды және он екі елі ішектің қабырғасында қабыну процестерінің әсерінен инфильтрация болған жағдайда да анастомоз салмаған дұрыс. Науқастардың жағдайы қосалқы аурулардың салдарынан өте ауыр болған жағдайда операцияның көлемін ұлғайтуға болмайды. Сондықтан өт жолдарын сыртқа қарай дренаждау өте қауіпсіз операция болып есептеледі.
17 - сурет. Билиодигестивтік анастомоздар
Билиодигестивтік анастомоз жасау негізінен іш қуысындағы процестерге, гепатодуоденальдық байламдағы инфильтрацияның түріне, гепатикохоледохтың және ұлтабардың қабырғасының жағдайына байланысты.
Іv. Холедоходуоденоанастомоз
Холедоходуоденоанастомоз операциясын бауырдан тыс өт өзектерінің кеңеюі, бауыр мен ұлтабар байламында қабыну процестері болмаған жағдайда жасайды. Анастомозды өте кең қылып (2 см кем болмау керек) салады. Ол өт сұйығының және қалып қойған тастардың он екі елі ішектің қуысына қиындықсыз өтуіне мүмкіндік береді.
Холедоходуоденоанастомоз операциясы техникалық орындалуы жөнінен күрделі емес және қауіпсіз анастомоздардың бірі.
Холедоходуоденоанастомозды салуға көрсеткіштер:
Механикалық сарғаюы бар науқастарда жалпы өт өзегінде ұсақ тастардың болуы
Фатеров емізікшесіндегі алынбайтын тастардың болуы
Холедохтың төменгі бөлігінің тарылуының ұзындығы 2 см-ден көп болса
Жалпы өт өзегінен тастардың толық алынғандығына күмән болса
Ұйқы безінің басының ісігі болса
Холедоходуоденоанастомоз операциясының кемшілігі - өт өзегінің анастомоздан төменгі бөлігі «қалта» сияқты болып кеңеюі. Бұл өттің қоюлануына, тастардың түзілуіне, және холангиттің пайда болуына әкеледі.
Холедоходуоденоанастомоз операциясының ішіндегі көп тараған түрлері: Юраш – Виноградов, Флеркен, және Финстерер әдісімен жасау (18 – сурет).
18 - сурет. Холедоходуоденоанастомоз.
а – Киршнер әдісі; б – Финстерер әдісі; в – Флеркин әдісі; г – Юраш – Виноградов
Бұл әдістердің бір бірінен айырмашылығы жалпы өт өзегіндегі және ұлтабар қабырғасындағы кесудің бағыты:
Юраш – Виноградов әдісі – жалпы өт өзегі ұзына бойы кесіледі, ал ұлтабар көлденең кесіледі
Флеркен әдісі – жалпы өт өзегі көлбеулеу, ал ұлтабар ұзына бойы кесіледі
Киршнер әдісі – жалпы өт өзегі көлденең, ал ұлтабар ұзына бойы кесіледі
Анастомоздың диаметрі 2 см-ден аз болмау керек. Оның себебі салынған анастомозда тыртықты тарылу процестері 80% дейін болады.
Егер де іш қуысында қабыну процестері болса, екі қабатты тігіс салынады. Ал бір қабатты тігісті қабыну процестері болмаған жағдайда ғана салуға болады.