6.6.2 Қарсылас биологиялық қаруды қолданған жағдайдағы жеке медициналық батальонның жұмысын ұйымдастырудың ерекшеліктері

Биологиялық зақымдалу ошақтарынан келіп түскендерді қабылдау кезінде жеке медициналық батальонның жұмысын ұйымдастыруда әскерге және емдеу мекемелеріне жұқпалы аурулардың енуіне мүмкіншілік бермеуге, олардың пункттің ішінде таралуына, сонымен қатар жеке медициналық батальонның жеке құрамын зақымдалудан қорғауға жол бермеу керек. Сондықтан жеке медициналық батальонның жұмысы қатаң эпидемияға қарсы тәртіпке ауысады.

Жеке медициналық батальонның эпидемияға қарсы қатаң тәртібі енгізеді:

• жеке медициналық батальоннан жаралылар мен науқастарды тасымалдауды қарсылас қолданған қоздырғыштың түрін анықтағанша уақытша тоқтату;

• осыған байланысты медициналық көмектің көлемін ұлғайту;

• биологиялық қарудың әсері тимеген бөлімшелерден жаралылар мен науқастарды қабылдауды тоқтату;

• жұқпалы аурулардың клиникалық көрінісі бар жаралылар мен науқастарды медициналық сұрыптау кезінде анықтау немесе оларға арнайы бөлінген оңашалау бөлмесінде медициналық көмек көрсету және қабылдау;

• жұқпалы аурулармен қатынаста болған жаралылар мен науқастарды медициналық сұрыптау кезінде анықтау, оларға арнайы бөлінген обсервациялық бөлімшелерде медициналық көмек көрсету және қабылдау;

• санитарлық өңдеудің 2 бөлімінде биологиялық зақымдалу ошағынан келіп тсүкендерге толық санитарлық өңдеу жүргізу: жұқпалы аурулардың белгілері бар немесе бұл ауруларға күдіктілерге оңашалау бөлмелерінде, ал жұқпалы аурулармен қатынаста болғандарға обсервациялық бөлімде санитарлық өңдеу жүргізу;

• оңашалау және обсервация бөлімдерінде жұмыс істейтін қызметкерлерге 2 санитарлық өткізгіш орнату, бұл медициналық құрам бөлімшелер мен қызмет көрсететін жеке құрамнан жеке жерде орналасу керек;

• жедел профилактиканы жүргізу, қоздырғыштың түрін анықтағаннан кейін барлық жаралылар мен науқастарға, жеке медициналық батальонның жеке құрамына арнайы профилактиканы жүргізу;

• жеке құрамға, оңашалау бөлімдерінде жұмыс істейтіндерге жеке қорғаныс киімдерін қолдану;

• бактериялық заттармен зақымдалғандарды тасымалдағанда қолданған барлық құралдармен зембілдерді, санитарлық көліктерді залалсыздандыру;

• ағымды дезинфекцияны жүйелі түрде жүргізу, ал қатаң эпидемияға қарсы тәртіпті алып тастағаннан кейін барлық заттарға қорытынды дезинфекция жасау және қызметкерлерге толық санитарлық өңдеу жүргізу;

• қарсыластың қолданған қоздырғышының түрін анықтауға науқастардан материалдар алу және оларды бөлімшенің СЭЗ-на жіберу, сонымен қатар армиялық-медициналық бригаданың (майданның) зертханасына жіберу.

Жеке медициналық батальонда екі бөлім құрылады: оңашалау және обсервациялық бөлім.

Оңашалау бөлімінің құрамында қарастырылуы керек:

• келіп түскендерге толық санитарлық өңдеуді қамтамасыз ететін арнайы өңдеу бөлімі және олардың киімдері мен төсектерін дезинфекциялайтын бөлім;

• жұқпалы ауруларға күдік туғызғандарды сұрыптау және диагностикалық бөлім;

• ауырғандарға госпитальді палаталар;

• операциялық бөлімде ерекше жұмыс тәртібі ортанылады, онда әрбір операциядан кейін дезинфекция жүргізіледі, әрбір операциядан кейінгі таңу материалдарын жойып отырады, лизол ерітіндісіне салынған халаттар, фартуктар, жинақталып отырады;

• дәрігерлік және медициналық қызметкерлердің жұмысына арналған медициналық пост;

• палаталарға тамақ тарататын, кір ыдыстардың дезинфекциясын жасайтын және жуатын буфет.

Оңашалау бөлімінің барлық қамтамасыз етілу құралдары (медикаменттер, дайын тамақ, төсек-орын және т.б.) тек таратушы пункттер арқылы ғана жүзеге асырылуы тиіс.

Оңашалау бөлімінің тек диагностикалау бөлімі ғана бокстарға бөлінеді. Бөлімнің жеке құрамы тыныс алу жолдары және тері қабатының қорғаныс құралдарымен жұмыс істеу керек.

6.6.3 Әскери далалық жұқпалы аурулар госпиталінің (ӘДЖАГ) және қарсылас биологиялық қаруды қолданған жағдайдағы әскери далалық аса қауіпті жұқпалы аурулар госпиталінің (ӘДАҚЖАГ) міндеттері мен

жұмысын ұйымдастыру

ӘДЖАГ-нің негізгі міндеті жұқпалы ауруларға мамандандырылған медициналық көмек көрсету және емдеу, оларды бөлімдердің оңашалау бөліміне тасымалдау, жұқпалы ауруларды тасымалдаған көліктерді залалсыздандыру болып табылады. ӘДЖАГ-і жұқпалы аурулардың ауруханаға жатқызылуы мен емделуінің соңғы орны болып табылады. Бұл жерде келіп түскен науқастардың диагнозы туралы бөлімдердің медициналық қызметін ақпараттайды. ӘДЖАГ-де дәрігер инфекционистер, аса қауіпті жұқпалы аурулар бойынша дәрігерлер, клиникалық зертхана дәрігерлері, бактериолог, рентгенолог, дерматовенеролог жұмыс атқарады. Госпитальдің негізгі бөлімшесі санитарлық өткізгіші бар қабылдау-диагностикалық және 2 емдеу бөлімі болып табылады.

Қабылдау–диагностикалық бөлімнен диагнозы қойылған науқастарды арнайы емдеу бөлімдеріне жібереді, ал биологиялық қарумен зақымдалған науқастарды, диагнозы қойылғанша бокстарға оңашалап ұстайды. Емдеу бөлімінің әрбір палатасында тамақ ішетін және жуынатын орындар болады. Әрбір емдеу бөлімінде өзінің дәретханалары және қолдары мен бөліністерінің дезинфекциясына залалсыздандыру құралдары болады.

ӘДЖАГ-і майдандық госпитальді базасында құрылады, басқа госпитальдерден аулақ орналасады. Биологиялық зақымдалу ошағы пайда болғанда немесе үлкен эпидемиялық ошақ пайда болғанда, госпиталь ошақ орналасқан ауданға, оны жою үшін шаралар жүргізуге және науқастарды сол жерде емдеуге жылжиды. ӘДАҚЖАГ-і биологиялық қарумен зақымдалғандарға және жұқпалы аурулармен ауырғандарды емдеуге, мамандандырылған медициналық көмек көрсетуге арналған далалық емдеу мекемесі болып табылады. Оған эпидемияға қарсы шаралар жүктеледі. Оның құрамында емдеу-диагностикалық бөлім, зертханалық бөлім, рентген кабинеті, аптека болады.

Бұл госпитальде аса қауіпті жұқпалы аурулар бойынша мамандар, инфекционистер, бактериолог, рентгенолог жұмыс атқарады. ӘДАҚЖАГ-нің қабылдау-диагностикалық бөлімінде медициналық сұрыптау жүргізіледі, оның мақсаты биологиялық қарумен зақымдалғандарды немесе науқастарды ауруға белгілері жоқ науқастардан оңашалау. Ол үшін қабылдау-диагностикалық бөлімінде бокстар немесе тексеріп қарау палаталары болады. Бұл госпиталь биологиялық қарумен зақымдалған ошақтың жанында немесе бөлім карантинге шығатын ауданда орналасады. Аса қауіпті жұқпалармен ауырған науқастарды тасымалдау тек госпитальдің санитарлық көлігімен немесе санитарлық эпидемияға қарсы жасақпен жүргізеді. ӘДАҚЖАГ-і аса қауіпті жұқпалармен ауырған науқастарды тасымалдаудың соңғы сатысы болып табылады, бұл науқастарды ол жерден тасымалдауға болмайды.