6.5.2 Биологиялық зақымдау ошағындағы жартылай және толық санитарлық өңдеу

Арнайы өңдеу қарсылас бактериялық қаруды қолданған кездегі жеке құрамның санитарлық өңделуі, қорғаныс заттарының, киімдердің, аяқ-киімдердің, құрал-жабдықтардың, техникалық, көліктік және басқа да материалдық заттардың залалсыздандыру шараларының жиынтығы. Қажет болған жағдайда аймақтың, ауыз су көздерінің, азық-түліктің залалсыздандырылуы жүргізіледі. Арнайы өңдеуді бөлім және бөлімшелер командирі ұйымдастырады.

Арнайы өңдеу жартылай және толық санитарлық өңдеу болып бөлінеді.

Жартылай санитарлық өңдеуде жеке құрамды, жеке қорғаныс затттарын, киімдерді, құрал-жабдықтарды, техникалық-көліктік заттарды, күнделікті үнемі қолданылатын заттарды өңдеу жүргізіледі. Бұл кезде дозиметрлі және химиялық аспаптар толық залалсыздандырылады. Жеке құрам жартылай санитарлық өңдеуді бөлімшелер командирінің үкімімен жүргізеді.

Адам денесінің ашық жерлерін (бетін, мойынын, қолын) жартылай санитарлық өңдеу дезинфекциялық ерітінділермен, жеке химиялық пакеттермен, сабынды сумен жүргізіледі. Бригаданың медициналық ротасында жартылай санитарлық өңдеу биологиялық зақымдалу ошағынан келіп түскендердің барлығына жүргізіледі.

Толық санитарлық өңдеу барлық жеке құрамда, бөлімшелерде жүргізіледі. Ол кезде жеке қорғаныс заттарының, киімдерінің, аяқ-киімдерінің, құрал-жабдықтарының, техникалық, көліктік және басқа да материалдық құралдардың дезинфекциясы толық көлемде жүргізіледі.

Толық санитарлық өңдеу арнайы өңдеу күштері мен бөлімшелерде жүргізіледі және ұйымдастырылады. Жеке медициналық батальонда биологиялық зақымдалу ошағынан келіп түскендерге толық санитарлық өңдеу екі бөлімінде: жұқпалы аурудың белгілері бар немесе күдікті ауруларға және жаралыларға жүргізіледі.

6.6 Ықтимал қарсылас биологиялық қаруды қолданған жағдайдағы медициналық ротаның, жеке медициналық батальонның, әджаг-нің және әдақжаг-нің жұмыстарын ұйымдастыру ерекшеліктері

6.6.1 Ықтимал қарсылас биологиялық қаруды қолданған жағдайдағы медициналық ротаның жұмысын ұйымдастыру ерекшеліктері

Ықтимал қарсылас биологиялық қаруды қолданған жағдайда бактериялық заттармен зақымдалған ошақтардан жаралылар мен науқастарға алғашқы медициналық көмек көрсеткеннен кейін, медициналық ротаға немесе жеке медициналық батальонға медициналық қызметтің көліктерімен тасымалданады. Зақымдалғандарды тасымалдау жолдары көзге түсетін белгілермен белгіленуі керек. Жаппай шығынға ұшыраған ошақтардан зақымдалғандарды қабылдауға ең алдымен медициналық роталар және бөлімшелердің медициналық күштері қолданылады.

Медициналық рота мүмкіндігінше зақымдалған ошақтардың шекарасына орналастырылады және қатаң түрдегі эпидемияға қарсы тәртіпке ауысады. Бұл жағдайларда медициналық рота тек қана биологиялық зақымдалған ошақтарда бактериологиялық заттармен зақымдалғандарды ғана қабылдайды, ал жаралылар мен ауруларды, биологиялық шабуылға ұшырамағандарды, медициналық қызметтің бастығының үкімі бойынша көршілес бөлімшенің медициналық ротасына жібереді.

Медициналық ротаға келіп түскен зақымдалғандарға мұқият медициналық сұрыптау жүргізіледі, оңашалау бөлмелерінің көлемін ұлғайтады, оны жеке құраммен көбейтеді. Медициналық ротаның жеке құрамына және келіп түскен зақымдалғандарға жедел профилактика жүргізіледі, барлық бөлімшелерде ылғалды дезинфекция жүргізіледі, келіп түскен барлық зақымдалғандарға жартылай санитарлық өңдеу жүргізіледі, ошақтан келіп түскен киімдері мен аяқ-киімдерін 2% монохлорамин ерітіндісімен шайылады, ошақтан зақымдалғандарды тасымалдаған көліктерге дезинфекция жүргізіледі.Медициналық қызметтің жеке құрамы, жеке қорғаныс заттармен жұмыс істейді. Сұрыптау постында зақымдалған ошақтан келіп түскен жаралылар мен науқастар 2 лекке (поток) бөлінеді.

1 лек–зақымдалғандардың ішіндегі жұқпалы ауруларға клиникалық белгілері бар науқастар немесе күдіктілер оңашалау бөлмесіне жіберіледі. Оңашалау бөлмесі лагерлі палаталарға, блиндаждарға, жертөлелерге, екі жұқпа түріне (ауа-тамшы және ішек) арналып орналастырылады. Оңашалау бөлмесінде науқастарды орналастыратын зембілдер (носилка), азық-түлікке және медикаменттерге арналған үстелдер, медициналық халаттар, төсек-орын мен киімдерді сұйықтыққа батырып салып қоятын бөшкелер болады. Сонымен қатар ыдыс-аяқтардың, судналардың, грелкалардың, термометрлердің, төсе-орын, киім-кешектердің дезинфекциясына арналған ыдыстар болады. Оңашалау бөлмесінде науқастармен жұмысты тасымалдаушы фельдшердің жетекшілігімен нұсқаушы санитарлар жүргізеді.

2 лек–ошақтан келіп түскен, бірақ бактериялық қарудан зақымдалған белгілері жоқ жаралылар мен науқастар жартылай санитарлық өңдеу алаңына жіберіледі де, одан кейін сұрыптау алаңына жіберіліп, қолданылатын жалпы әдістер бойынша пункт ішінде сұрыпталады.

Арнайы өңдеу алаңы бактериялық заттармен зақымдалған жаралылар мен науқастарға жартылай санитарлық өңдеу жүргізуге, сонымен қатар киімдерін, аяқ-киімдері мен қаруларын, көлік пен зембілдерді дезинфекциялау үшін арналған.

Жартылай санитарлық өңдеу алаңы медициналық ротаның басқа бөлімшелерінен алыс 30-50м ашық ауада жел жаққа орналастырылады. Жартылай санитарлық өңдеу алаңына зақымдалғандар келіп түскенде дененің ашық жерлері мен киімдері (жеке химиялық пакетпен -8) және В-5 жиынтығындағы дезинфекциялық ерітінділермен залалсыздандырады. Жартылай санитарлық өңдеу алаңынан 50-70м қашықтықта көліктер мен зембілдердің дезифекциясына арналған алаң орналасады.

Қабылдау кезінде және медициналық көмек көрсету кезінде жаралылар мен аурулардың арасында жұқпалы ауруларға симптомдары бар науқастар болса, олар тез арада оңашалау бөлмесіне ауыстырылады. Олармен қатынаста болған жаралылар мен аурулар бақылауға алынып, ол туралы алғашқы медициналық картаға жазылады. Алғашқы дәрігерлік көмекті қажет етіп, өміріне қауіп төніп тұрғандарды таңу бөлмесіне жібереді. Жұқпалы ауруларға симптомдары бар зақымдалғандарды оңашалау бөлмесінен арнайы бөлінген санитарлық көлікпен жеке ӘДЖАГ-не тасымалдайды, ал қалған жұқпалы ауруларға, белгілері жоқ науқастарды жеке медициналық батальонға жібереді. Алғашқы медициналық карточкасында қара белгі беретін жолақ сызады да, бактериялық заттармен зақымдалған уақытын, жерін, жеке қорғаныс заттарын қолданғанын, санитарлық өңдеуден өткенін және жедел профилактиканы жүргізген уақытын жазып қояды.