Н. Никифоров

10-ти класс

Николай Никифоров

Автор вордскиз 1954-ти арын 21-ти ноябре Татариысь Балтась ёросысь Вуж Турья гуртын. Йылпумъяз Киров улосысь Савальск сельхозтехникумлэсь зоотехнической ёззэ, али но со удысын ик тырше. Улэ Киров улосысь Кильмезь ёросысь Бураши гуртын.

Дунне вылын тросэз егит дыръязы кылбур гожъяны кутско. Озьы ик Николай но та удысын кужымзэ эскероно кариськиз. Со верос гожтиз. Нырысетиез («Туриос») 1972 арын потиз «Дась лу!» газетын. Нырысьёсыз полын ик «Оскисько тыныд» веросэз но, кудзэ «Молотын» печатланы Р. Валишин дасяз.

Автор лыдзисьёслы тодмо. Троссэ кылбуръёссэ но веросъёссэ печатлало удмурт газет-журналъёс, Балтась но Кильмезь ёросысь газетъёс зуч кылын, чузъясько радио но телевизор пыр. Издательствоын коллективной сборникъёсын потизы кылбуръёсыз но серемес веросъёсыз «Асьме киын» (1972), «Йыр вадьсын инбам» (1984), «Выжыос-сяськаос» (1990), «Инзарекъян» (1991), «Чипы лым» (1993) книгаосын.

«Толэзен вераськон» – авторлэн нимаз дасям нырысети книгаез. Н. Никифоров зеч тодэ нылпи психологиез, быгатэ яратись сюлэмъёсты суреданы. Веросъёсаз но повестьёсаз со возьматэ пиналъёслэсь дышетскемзэс, эшъяськон кусыпъёссэс. Озьы ик вера, кыче выль мылкыд вае синмаськем пияшлы яке нылашлы яратон – чылкыт но чебер мылкыд, со вылын возиське улон. Но шумпотон гинэ уг вайы со, куддыр курыт синкылиен но берытске.

Котькуд адямилэн улоназ пыре яратон: нырысь ик пинал адзе шудо синъёссэс анай-атайлэсь, ачиз но соос доры кыстиське. Собере аслыз ярамон эшъёс шедьтэ, синмаське кинлы ке. Берлогес дисьтытэкгес нырысети яратон вуэ. Ог-огзэсты мур гажаса, егитъёс кузпалъясько, семья кылдыто. Тани ма сярысь ти лыдзоды Н. Никифоровлэн книгаысьтыз.

11-ти класс

Лулчеберетэз – калык полы

Калыклэсь ваньмон дырзэ пайдаё кутон вылысь, шулдыръяськон интыос Финляндиын усьтиськылыны кутскизы XX даурлэн нырысети жыныяз. Соку бадзым тиражъёсын потылизы дунтэм книгаос, тумошо-серемес гожъямъёс, учкисез, кылзисез ас палазы кыскон понна вожвылъяськизы нырысети кинофильмъёс но грампластинкаос. 20-ти аръёслэн пумазы Финляндиын 200-лэсь уно кинотеатръёс лыдъясько ни вал. 1929 арын финнъёс миллионлэсь уно грампластинкаос басьтиллям. Та аръёсы ик, радио ужаны кутскемен, грампластинкаосы гожтэмъёс но выль ансамбльёслэн "улэп гуръёссы" шаерлэн портэм сэрегъёсаз волмизы.

Кыкетиез дунне ож (мировой война) мынон дыръёсы но борысьгес культура тужгес пушйиз, калык полы волмиз. Сьор кунъёсысь фильмъёс но джаз пластинкаос вазенгес ке но вуизы, 1940-ти аръёслэн пумазы гинэ калыке паськыт волмизы. 1940-ти аръёсы кунгож сьорысь поп-культураен вуэм эстрада гуръёс полын свинг эктон но вал. Финляндиысь эстрада палэнысь "тулкымъёсыз" шодылиз ке но, аслэсьтыз финн сямзэ оз ышты.

Палэнысь культуралэсь финляндие пычамзэ возьматэ кока-колалэн, 1952 арын Хельсинкиын ортчем Олимпийской шудонъёс дыръя, шаере вуэмез. Нош коня ке дыр ортчыса, финн егитьёс но покчиос тодматскизы "Дональд чож-пиен", "Микки-Маусэн" но Америкаысь мукет комиксъёсын.

Война бере куашкатэм хозяйствоез выльдонэн чош сьорлось культуралы "осъёс" но волак усьтиськизы. Егитьёс шумпотыса пумитазы рок-н-роллэз. Озьы ке но, со кутсконэз гинэ вылэм. 1980—1990-ти аръёсы кунгож сьорысь вуэм культура ньылиз, шуыны луоз, финн калыклэн сямъёсыныз герзаськемзэ.

Финн шаерысь культура палэнысь вуэменыз пачкатэмын ке но вал, чылкак со оз пыдесъяськы. Ваньзэ чидаса, шаерысь эстрада, эсьма, вашкала крестьян культуралэсь вуныны кутскись аспортэмлыкьёссэ но утьыны быгатиз. Таин чош ик вашкала финн калык культура туала дырлэн куронъёсызъя выльдиськылиз. Сое умой возьматэ Каустиненысь национальной музыкая фестиваль, кытчы крезьгурчиосты кылзыны гужемлы быдэ трос калык люкаськылэ.