Muratbay Nızanov Tańlamalı shıǵarmaları

—Qashshan tanısıp úlgerdiń be? — dedi sanitarka maǵan sın názer taslap. — «Ǵarǵanıń bir kózi oqta bolsa, bir kózi boqta» degen...

—Hásseniy, házir doska menen por bolǵanda ma, — dedi Oraqbay sanitarka shıǵıp ketiw boyına quwjıńlap. Izin Aman alıp ketti.

—Rita + Mámbetnazar dep náhán háripler menen jazıp qoyǵan bolar edik.

—Áne, Mámbetnazar jora, bulardıń házilinen qashıp qutıla almaysań. Sen-ám jezdesine aylandıń!

—Nesi bar, bizlerdey qáyinleri bolsa!

—Erteń Gúlshiyra kelsin, ruwın sorayman. Bálkim,

ırastan da jezde bolatuǵın shıǵar.

—Erteń Gúlshiyra kelmeydi, Gulya keledi.

—Búgin Aysara turdı ya? Tuwrı, erteń Gulya keledi. Gulya

awırıp qalıp, ornına keleǵoymas pa eken?

«Qánekey, onda» dep qoydım ishimnen. Qalay degen menen keshegi tún qushaǵındaǵı bir zaman sóylesiw hám palatalaslarımnıń onı gá sınap, gá maqtawları hám izin

ákelip maǵan shógiriwleri kewlimde oǵan degen háweslik oyata baslaǵan edi.

4

Búgingi kún tań azannan ǵalawıt penen baslandı. Erte turǵanlar umıvalnikke bet-qolın juwıp keliwge ǵana

úlgerdi. Keshikkenler dálizge shıǵıwǵa júreksinbedi. Dálizde aq xalat kiygenlerdiń hámmesi gá oyaqqa, gá buyaqqa juwırısar edi. Kimisi tamshı dári úskenesin kótergen, kimisi dári, kimisi taǵı bir nárse. Qullası, jan halatta

juwırıp júrgen adamlar.

—Jabıń qapıńızdı túwe! Haw! Sizlerge tamasha kerek!

—Palatańızǵa kirip otırıń, bereket tapqırlar! Buyaqta

birew janı menen ǵay bolıp atır!

Bul doktorlardıń emes, sanitarkalardıń hámiri edi.

Olar házir ózlerinshe «eń áhmiyetli posttı» iyelep tur. Olar kimdidur ólim tırnaǵınan aman alıp qalıp atır. Olarǵa gáp qaytarıw yaki mise tutpay qaraw jınayatqa qol urıw menen barabar sıyaqlı edi. Sonıń ushın da, nawqaslar

21

jım. Olar bul awhaldıń ózlerinde júz bermegenine shúkirlik etip, demlerin ishine salıp alǵan.

—Biyshara, jáne qısılıp qaldı-á! — dedi Jiyenǵaliy kózleri qıpılıqlap.

—Kim? — dedim men bul jerde hesh kimdi bilmegen-

likten.

— On jetinshi palatada Mátyakub degen bala bar. Júregi kóylegin kóterip taslap soǵadı, — Jiyenǵaliydiń ornına

Aman juwap qaytardı. Ol ústindegi maykasın qolı menen tartıp jiberip, tartıp jiberip nawqastıń halın maǵan túsindirgen boldı.

Men kelgeli emlewxana ishi tım-tırıs edi. Bul jerde keseller emes, jumıstan sharshaǵan adamlar bir-eki kún úy mashqalasınan qashıp dem alıp atırǵan sıyaqlıday edi. Hayallar palatasında túrli jaqtan ótirik-ósekti gújitip, erkekler bette bolsa ishek-úzer anekdotlar aytılıp atırǵan kewi lli dem alıs orayına uqsap edi maǵan bul jer.

Ózimniń oń búyirimde shandırday tartılıp turatuǵın bel tamırımnıń da, kesektey túynegen búyregimniń awırıwın da umıtıp ketken edim. Awırıw doktordı kórip qashıp

ketkendey edi kewlime. Búgin bolsa basqasha. Azan menen hámmeniń kózlerinde húrey bar. Birew-birewine jeńiljelpi gáp aytıp salıwdan tartınadı. Házildiń, oyındálkektiń qobı kelip turǵan joq házir.

Bir máhál dálizden temir degershikli qol arba awır nárseni kóterip poldı dirildetip ótti.

—Kislorod aparatır! — dedi Jiyenǵaliy.

—«Kópshik» jetpey qalǵan-dá!

—Múyeshte uzın kók ballon turadı da qoyatuǵın edi, ne

eken desem...sol kislorod pa?!

—Usı saparı ketip qalmasa bolǵanı-ǵo...

—Anasına qıyın boldı. Anası kótere almaydı onı.

—Onday deme. Quday basqa salsa hámmesin de kóteredi.

Palatadaǵı aldı meniń menen jas, keyni «palapan» atanıp júrgen jas ballar birden eseyip, kópti kórgen qariyalarǵa usap qaldı. Olardıń qasında tek men ǵana

«jasıman». Sebebi, men bul jerde jańaman. Júregi kóylegin kóterip soǵatuǵın Mátyakubtı da, udayı onıń basında bolıp atırǵan sorlı anasın da tanımayman. Hawa

22

toltıratuǵın kópshikti de, bir múyeshte mudamı súyewli turatuǵın kislorod ballondı da kórmegenmen. Bir sóz benen aytqanda biytanıs jurtqa tosattan kelip qalǵan kimsege usar edim.

Biraz waqıttan keyin dálizdegi juwırıspalar toqtadı. Aspaz hayal azanǵı gúrishli kashanı sırlı shelek penen palataǵa alıp keldi.

—Keselerińizdi tayarlań! — dedi temir shómishin qolaylap.

—Ne qıldı? — Jiyenǵaliy keselerdi tayarlap júrip

bolıp atırǵan awhaldı soradı.

—Qaydem, ballar! Quday ayasın! Bizler oyaqqa jaqınla- maymız-ǵo. Duqtırlar bizlerge «awqatların palatalarǵa tarqatıń, shawqım salmań» — dedi.

Emlewxanadaǵı kewilsizlik túske taman tolıq tındı. Sanitarkalar sipse-shelegin kóterip, palatalarǵa keldi.

—Sırtqa shıǵıń, tazalap alayıq.

—Ne boldı, Matyakubtiń awhalı?

—Alla taala kempir bayǵustı ayadı, jáne bir márte

taslap ketti.

Men birinshilerden bolıp dálizge shıǵıwǵa asıqtım.

Írasın aytsam, ólim halatında jatırǵan bala da, onıń qorqınıshtan janı qıl ústinde turǵan anası da men ushın álle kim edi. «Tuwǵanıńdı kórgenim joq, ólgenińe jılamayman» — degen men boldım usı saparı.

Tústiń aldında apam izimnen awqat alıp keldi. Ol hámmemizdi túwellep bolıp awqat quydı.

—Jep alıń, balnisanıń awqatınıń kúshi bolmaydı,

—dep hár birimizdiń ishkenimizge qumarlanıp qarap otırdı.

—Búyregińdi qayaqta ayazlatıp júrseń, balam-aw?

Apam meniń bóteke awırıwına shalınǵanımdı esitip,

qattı qapa bolıp qaldı.

—Ana birde móldek salıdan aylanıp edim, jalańayaq...

—Há, salısı tússin! Jezdeńniń tawıp júrgeni-ǵo...

Palawlıq gúrishti bazardan alıp jegende jarlı túsemiz be?

Haqıyqatında da, jezdemiz Qarlıbay menen paxta egisten qalıp qoyǵan jerge sheriklesip salı egip edik. Azanǵı shıq penen aylanǵanımda baslap atırǵan salı zeynimdi

23

ashıp, qansha júrgenimdi bilmeymen. Ayaǵımnıń astındaǵı

ızǵar topıraq, paxsaǵa atıwǵa tayar turǵan pisken ılayday tabanıma shılp-shılp jabısar edi. Sonday jaǵımlı edi

ol biraq. Negedur sol jaǵımlı ızǵar bir hápteden keyin kúshin kórsetti. Quwıǵımnan kishi dáretime aralasıp qan tamshıladı.

Bótekemniń nege ayazlaǵanın kelgen kúnniń erteńine Áset doktorǵa maydalap aytıp bergenmen. Aytpasıma qoymadı.

— Bunıń nesin jasırasań?! — dedi ol iynime urıp.

— Men bir buzıqshılıq etken shıǵar desem... Durıs, paxtanıń ornına salı ekkenseń! Erteń awıl keńesti, nálikshini, miliysanı shaqıramız. Salıńdı, úyińdegi malıń-

dı qatlap, boyıńdı jeńilletip beredi.

— Oynap atırman, — dedi soń meniń arqamnan qaǵıp.

— Aytpayman hesh kimge! Ózi, sawatlı adam qorqaq boladı.

Qánekey, hárip tanımaytuǵın qızıldıń arjaǵındaǵı shopan bolar ma ediń. Áy, onday adam awırmaydı-ám!

Apamdı dárwazaǵa deyin shıǵarıp saldım.

—Erteń ne ákeleyin?

—Hesh nárse kerek emes.

Ol dárwazaǵa barıp, jáne izine burıldı.

—Balam, instotta nesiybeńdi salmadı. Búyerde qız kóp eken. Jaynaǵan aq xalat, kózim qızıp ketti. Meni qartayǵanda duqtır kelinli etseń, erteń awırarım bar, sızlarım bar...

—Kórermiz, apa, — dedim kúlip. — Tayarlıǵıń bar ma

edi?

—Bir arsha toltırıp qoyıppan shúberek-sharshıǵa! Bu quraqum awzıńnan táwir gáp shıqtı-ǵo. Barǵan soń jáne bir-bir taqlap shıǵaman. Moda degen bále bar-ǵo.

Apamnıń «qartayǵanda duqtır kelinli etseń» degeninde qıyalımda dárhál Gúlshiyranıń kelbeti payda bolǵan edi.

«Tayarlıǵıń bar ma edi?» degendi de sol ushın isenimli túrde ayttım. Kewlimde Gúlshiyranı hámmeden qızǵanıw, onı tezirek menshiklew sezimi de payda bola basladı.

—Yaqshı, bara ǵoy, balam, duqtırlarıń izlep qalar.

—Saqiev, buyaqqa kel! — Posttaǵı miyirbiyke qız tuw

anadaydan atımdı aytıp shaqırdı.

24

Bardım. Sarı sı nlıdan kelgen, kózleri kókshi l, shashları aqshıl sarı, bir sóz benen aytqanda sóylemese qaraqalpaq qızı dep hesh oylamaysań.

—Azanǵı dárilerińdi ishtiń be? — dedi ol maǵan.

—ishtim.

—Má, mınaw tústegisi. Qosıwıslap urıp jiberme, bólip-bólip ish, arası on minuttan.

Dárimdi qısımlap izge qayttım.

—Mámbet, — dep dawısladı izimnen taǵı. Men izime burılmadım. Kimdur bar shıǵar, «Mambet» degen.

—Saxiev? — dedi keyin jáne izimnen: — Ne shaqırsa

qaramaysań?.

Astapıralla, ne boldı ózi? Birewi Nazar deydi, birewi Mámbet deydi, atımdı qosıp aytatuǵın adam bar ma ózi?!

—Berman kel, bir zat aytaman.

Men izge qayttım.

—Altınshı palatadaǵı qızdı tanıysań ba? — dedi ol maǵan kúle shıray menen sawal berip.

—Kim qız?

—Íras tanımaysań ba?

—Hesh kimdi tanımayman.

—Ha-aw.. Ol sen bılay ótseń-ám, olay ótseń-ám esik-

tiń perdesin túrip izińnen telmirip qarap qaladı-ǵo!

Júrekten urdıń ba deymen?

—Kelgenim keshe bolsa... Hesh kim menen sóylespesem.

—Meni ayttı derseń ele, sen oǵan unap qalǵansań. Há-

zir onıń ábisáreń waqtı, bir jaqsı kórip qalsa delbedey jaqsı kóredi olar. Basımızdan ótti-ǵo.

—Qashan? Jaqın arada ma? — dep kúldim men.

—Ne?! — dep tesilip qaradı ol maǵan. — Qız benen qa-

tındı ayıra almaysań ba? Tuńǵısh qızım ekinshige óttiǵo.

—Usamaysız!

—Xoshamet etpey-aq-ǵo! Mennen saǵan payda joq. Onnan-

sha altınshı palatadaǵı qızdıń atın bilip al.

—Guli! — Bul Áset doktordıń dawısı edi.

—Házir! Shaptım! — dep ol ornınan ushıp turdı. — Bar

endi, ornıńa. Postta kóp tura berme, bizlerge gáp keltireseń. Keshte on úshinshi palataǵa bar.

25

—He?

—Waqtında bileseń.

On úshinshi palatada ne boladı, ne qoyadı, ol maǵan jumbaq edi. Gulyanıń aylanıp keliwin kútiwge tartındım.

«Oyınnıń azı jaqsı». Endi onıń ashıwına tiyip alıwım múmkin.

Kewlim alǵaw-dalǵaw boldı. Gúlshiyra — altınshı palata!

Gúlshiyra — altınshı palata! Men ózi awırıp keldim

be, ya qız kóriwge keldim be? Qanday erme adamǵa uqsap baratırman? Anamdı házir ǵana úmitlendirip jibergen bolsam. Onıń ústine Gúlshiyranıń da ıńǵayı joq emes. Al,

Gulya bolsa xannan qápersiz, ózinshe gáp tawıp tur. Kúndizgi dem alıs saatın kirpik ilindirmey atqardım.

Qıyalımda eki súwret — birewi Gúlshiyra, ekinshisi qandaydur anıq emes súlder. Maǵan belgisiz bolǵan, lekin, ábisereń aq kókirek, úlbiregen jas qızdıń kelbeti.

Kóz aldıma keltirgim keledi. Negedur ol joq. Gúlshiyra kóldeneń turıp aladı. Avtoklab janında sóylesken besaltı awız sózdi tákirarlap esleymen.

—Ásettiń hayalı hind qızlarınday sulıw.

—hind qızları sulıw ma?

—Endi ne? Ritanı kórmeyseń be, Raj Kapurdıń súyik-

lisi.

—Siz de Ritaǵa usaysız?

—Qáyerlerim?

Bunnan keyingi jaǵın eslemewge urınaman. Onıń qapa bolıp, qabaǵı salınıp ketkenin qıyalımda bolsa da kórgim kelmeydi. Endi anamnıń gápleri qıyalımnan ótedi.

— Qartayǵanda meni duqtır kelinli et, awırarım bar, sızlarım bar.

Kóz aldımda jáne Gúlshiyranıń kelbeti payda boladı da, biraq ol awıldı mensinbeytuǵınday, meniń pájmúrde anamdı mise tutpaytuǵınday bolıp kórinedi.

—«Júrisine qaramaysız ba, kóldiń jılqısınday!»

—«Ayaqlarına qara, bir tepkende attı óltiredi»!

Bul gápler palatadaǵılardıń keshe Gúlshiyraǵa bergen bahaları edi. Olar Gúlshiyranıń ǵayratlı nashar ekenin

táriplew menen birge «sen halıńa qara, sendey juwas

26

jigitti múyeshke taqap qoyadı» dep qorqıtıp atırǵanday seziler edi maǵan.

Jáne Gúlshiyranıń keshegi gápleri qıyalımnan ótti.

—Baǵana ózim toydıraman degenim esińde me?

—Túyege jantaq kerek bolsa moynın sozadı.

«Tixiychas» tamam boldı. Dálizde olay-bılay júre basladım. Álbette, altınshı palatanıń aynalı esigin kózden qashırmadım. Aynaǵa kelte ǵana kógis perde tutılǵan edi. Palatadan shıǵıp tuwrı arǵı basqa qaray óttim. Perde qılt etpedi. Qaytıp óttim. Altınshı palatada misli óli tınıshlıq.

Ele diydarın kórmegen bul «ábisereń qız» meniń qıyalımnan Gúlshiyranı quwıp shıqpaqshıday edi. Gulyanıń ol haqqında isendirip kelip aytqan gápleri kewlime ǵulǵula sala basladı. «Qáytse de onı bir márte kóriwim kerek, perde artınan bolsa da...»

izinshe basqa oylar kewlimdegi tatlı sezimlerdi quwıp shıǵıp, ornın kewilsizlik iyeledi.

«Gulya meni ermek etken! Negizinde men erkek emes, tek erkek ılaydan soqqan qurı súldermen! Birewi «seniń kelinshegiń sulıw emes» dep kústanı qıladı, taǵı birewi qayaqtaǵı oyda joq qızdı sırtımnan jabıstırǵısı keledi. hámmesiniki jalǵan! Olarǵa men janlı quwırshaqpan.

Túyip jiberse de jıńǵırlap barıp, jıǵılmay túrgep

otıratuǵın «nebalyashka»man! Júzimde qatallıq joq! iynimde perishtem joq meniń! Sustım joq! Sonıń ushın

da institutta hesh kız qaramay, bos qaytqanman!»

Bir waqta shep jaǵımnan birew iyni menen áste qaǵıp jiberdi. Qarasam, Gulya eken.

— Arjaǵıńa qara! — dedi áste maǵan.

Sonda barıp... Sonda barı-ıp, kóziń jaqsılıq kórsin,

«jerge túsken Ay»dı kórdim. Ol aspannan emes, altınshı palatanıń aynasınan maǵan qaray súzilip qarap turar edi.

Qız meniń burılıp qaraǵanımdı sezip, dárhal perdeni túsirip jiberdi. Lekin, meniń kóz aldımda usı waqıtqa deyin túsimde kórmegen, qı yalı ma kelmegen, hesh bir súwretshi súwretin uqshatıp sala almaytuǵın ájayıp bir perishteniń kelbeti payda boldı.

27

Men altınshı palatanıń awzında qalsha qatıp qalıppan.

—Bılay-bılay júr, uyalmaysań ba? — dep Gulya ekinshi márte iynimnen qaǵıp ótkende barıp ózime keldim.

—Keshte toǵızdan keyin on úshinshi palataǵa bar,

kempirler bul qızdı shaqırıp qosıq ayttıradı, sonda jaqsılap kórip alasań, — dep qosıp qoydı ol.

«Ele qosıq ta ayta ma? Sol sulıwlıǵı azlıq etkendey, qosıq aytatuǵın da hóneri bar ma? Meniń tar mańlayıma jayǵasar ma eken usınsha baxıt?!»

Men toǵızǵa deyin altınshı palatanıń aldınan mıń márte óttim. Lekin, sol kók perde qıymıldamadı. Julıp taslaǵım keldi turǵan jerinen. Perde artında ol qansha jasırın bolǵan sayın, men sonsha ıntıq edim.

Koridor boylap únsiz, qıyal súrip ótemen. Sonda kóz aldımda Gúlshiyra payda boladı.

— Neǵıp júrseń dálizde, bar ornıńa jat! — dep jekirinedi ol maǵan. — Erteń bara bereyin, ol shayanıń qarasın óshiremen!

«Ne degen tiliń ashshı ya, Gúlshiyra! Qız bala da sonday bola ma? Bayı menen urısqan sharbaya qatınlarday bajıldaysań!»

Biyshara Gúlshiyraǵa hesh jerde hesh teńe joq, qıyalımnan ǵáremet sózler jawar edi. Ol endi maǵan dúnyada ózinen basqa nashar atlınıń bárin demi menen kúydirip jiberetuǵın áydarhaǵa usap barar edi. Maǵan ne boldı? Ne qusap baratırman? Jinli bolıp ketejaqpan ba? Saǵan Gúlshiyra da, altınshı palatadaǵı qız da bir nárse degen

joq ǵoy. Bálkim, ol qız seni oylap ta júrgen joq shıǵar? Terezeden qarasa ne bolıptı? Saǵan qarap pa ol? Múmkin, basqa nársege qaraǵan shıǵar!

Qullası, qı yalı mda ǵı mıńsan oylar menen basım meń-zeń boldı. Kún batıwǵa meyil bergende tısqa shıǵıp kettim. Írasın aytsam, saat toǵızǵa taman adamlardıń on úshinshi palataǵa qaray jılısıp baratırǵanın kóriwge, eń qıyını Gulyanıń «júr, saǵan baǵanaǵı qızdı kórsetemen» dep qoltıǵımnan tartıp ketiwinen qısındım. Bul qolınan keledi onıń!

28

Tısta qansha júrgenimdi bilmeymen, aylanıp kelsem meniń tumbochkamnıń ústinde lawabı kesa tolı palaw tur. Ele suwımaptı.

Jiyenǵaliy menen Amannıń krovatınıń ortasında tumbochka ústinde súlgi menen shala-sharpı bastırılǵan tabaq tur. Dógereginde iri-iri tuwralǵan qıyar qaldıqları tarelkanıń ishinde shashılıp atır. Erkek dasturxannıń bunnan artıq qanday sáni bolsın. Soǵan qarap kimnińdur izinen palaw kelgen de, olar meniń qayaqqa ketkenimdi bilmey, payımdı kesaǵa salıp, ózleri payına tiygenin

jep ketken qusaydı.

Awqatqa onsha ishteyim bolmadı. Onıń ústine úyde de bir ózim awqatlanıp kórgen emespen. Geyde túnletip kesh kelsem, apamdı oyataman.

—Apa, men awqat jep alayın, qasımda otır, — deymen jalınıp.

—Balam-aw, námnaǵan jigit bolsań da, qılıqlarıń nárestedey-aw, — dep kúlip qasıma kelip otıradı. Ishkisi kelmese de kewlim ushın bir kesa-eki kesa shay ishedi.

—Úyleneǵoysań balam, anańnan uzaqlasasań! — deytuǵın

edi ol geyde. Apam bul gápti negedur kewilsiz aytadı.

—Nege? — dep sorayman tańlanıp: — Nege uzaqlasaman?

—Kesh kelseń awqat ıńdı kelin j ıl ıtı p beredi.

Qasıńda otırıp shay quyadı. Qayaqqa barıp, qayaqtan kelgenińdi soraydı. Sóytip, áste-áste anańnan uzaqlasa bereseń.

—Yaq, hesh qanday-ám, apa. Bári bir awqatımdı seniń qasıńa kelip jeymen.

—Bárekella, shıraǵım, aytqanıń-aq bolıp qaldı.

Apam bári bir bul gápti isenimsiz aytar edi.

Lawabı kesa tolı palawdı tumbochkanıń ishine qoyar ekenmen, bir máwrit sol waqıyalar esime túsip ketti.

wste dálizge shıqtım. Hámme jaq tır-tım. Emlewxana bir jaqqa kóship ketkendey. Tek dálizdiń arǵı basındaǵı qapısı ashıq turǵan palatanıń awzında onlaǵan adam úymelesi p tur. Olardıń jası úlkenlewleri dálizge qoyılǵan tapshanǵa tıǵılısıp otır, qalǵanları túrgelip

tur. Ashıq turǵan qapıdan qandaydur bir jaǵımlı hawaz qulaǵıma shalındı. Bul baǵanaǵı Gulya aytqan on úshinshi

29

palata hám kempirler shaqırıp alǵan altınshı palatadaǵı qızdıń hawazı edi.

hesh kimge kesent etpew ushın ayaǵımdı sanap basıp, palata aldındaǵı adamlarǵa qosıldım.

—Qayaqqa ketip qaldıń? — dedi Jiyenǵaliy áste.

—Sırtta júrdim.

—ishke kir, Mámbetnazar aǵa, sebep penen qosıqshı

qızdı kóreseń. Gúlshiyra bunıń qasında...

—Ts-s! — Jiyenǵaliy onı toqtatıp qaldı. Bolmasa, quday bilsin qanday teńew aytayın dep turǵanın.

—Áy, ballar, balıq bazardı toqtatıń, qosıq tıńlayıq.

wńgimege sebepshi bolǵanıma qısınıp, esik awzında turǵanlardan bir adım arı ótip kettim. Sol payıt esik bettegi krovattıń erneginde otırǵan Gulya meni kórip qaldı.

—Berman kel, berman kel, ishke kir! — dedi órli-ǵurlı qolı menen ımlap.

—Bar, bar! — Jiyenǵaliy iynimnen iyterdi.

Men náylaj ishke bir adım attım.

Qosıq lappa toqtadı. Sonda men birinshi márte baǵana perde artınan jawdırap turǵan qara kózlerdi anıq kórdim. Onıń shep iynine bir burım etip jiberip qoyǵan qolań shashı tana múyiz kókiregin jasırıp búyirine túsip turar edi. Basqalardıń ústinde olpı-solpı kórinetuǵın emlewxananıń shımshıq kóz shıt kóylegi darayıday iynine qup jarasıp tur. O-o, sonda men nelerdi qıyal etpedim deyseń! Qolımnan kelse bir máwritke shımshıq kóz shıt kóylek bolǵım kelip ketti. Kókiregine túsip turǵan taq burımlı shashları nege bolmayman men?! Aqırı, ol qáyerlerge bas qoyıp jatır?!

Qız nayatıy sulıw edi. Oǵırı jas, úlbiregen, ele hárre qonıp úlgermegen erik gúllerindey hám súykimli, hám appaq! Onıń júzleri móldiregen bulaq suwınday tınıq hám taza edi. Meyli, ol bir zaman qosıq aytpay-aq qoysın, men onıń júzlerine toyıp-toyıp qarap alayın. Ol maǵan azanǵa deyin, yaq, altı ayǵa deyin, bálkim ómirlik azıq bolar! Tatlı sezimlerden biyhush bolıp men sol altınshı palatanıń al dı nan qále-qáleme óte beremen! Kerek bolsa, miyirbiykelerge járdemlesemen, sanitarkalardıń

30