1488 Г., март

БЕЛОЗЕРСКАЯ УСТАВНАЯ ГРАМОТА¹

Се яз, князь велики Иван Васильевичь всея Руси, пожаловал есми своих людей белозерцов, горожан и становых людей и волостных всех белозерцов: хто наших, наместников у них ни будет, и они ходят по сей по нашей грамоте.

1. Взоежжого корму горожане и становые люди на местником нашим на взоезд что хто принесет, то им взяти.

2. На Рожество Христово наместником нашим дадут корм со всех сох, со княжих, и з боярьских, и с монастырьских, и с черных, и з грамотников, и со всех без оменки, с сохи за полоть мяса два алтына, за десятеро хлебов десять денег, за бочку овса десять денег, за воз сена два алтына; а на Петров день дадут корм наместником нашим со всех же сох, с сохи за боран восмь денег, за десятеро хлебов десять денег. А тиуном корм режественской и петровьской вполы наместничя корму. А доводчиком побор со всех же сох, с сохи на Рожество Христово за ковригу денга, за чясть мяса денга, за зобню овса две денги; а на Петров день доводчиком побор со всех же сох, за ковригу денга, за сыр денга.

3. А наместником нашим у них держати в городе и во станех два тиуна за десять доводчиков: во станех восмь доводчиков, а два в городе; а станы и деревни своим доводчиком поделять.

4. А доводчику ездити во стану без паропка и без простые лошади, своего деля прибытка; а побора им в стану и не брати, имать им свой побор у соцкого в городе; а доводчику из своего розделу в другой роздел не ездити; а где доводчик ночует, туто ему не обедати, а где обедает, туто ему не ночевати.

5. А наместники² тиунов и доводчиков до году не переменяют.

6. А кормы наместничьи и тиуновы и доводчиковы поборы бе­рут в станех сотцкие да платят наместником и тиуном и доводчи­ком в городе: о Рожестве Христове рожественской корм платят и наместником, и тиуном и доводчиковы поборы, а о Петрове дни петровьской корм платят в городе и наместником и тиуном и доводчиковы поборы.

7. А пошлин наместником на Белеозере в городе: явка з гостей, кои гости приходят из Московские земли, из Тверские, из Новогородцкие земли, или откуды хто ни приедет, з болшаго судно, с ватамана гривна, а людей на судне сколко ни будет, ино з головы по денге; а хто приедет в малых судех в гребных на Белоозеро из Московские земли, или из Новогородцкие, ино с ватамана и с людей, колко их на судне ни будет, ино з головы по ленте. А на Волочке на Словенском наместником держать своих пошлинников, а явку емлют з гостей по тому же: кто придет из Московские земли, из Тверские, из Новогородцкие земли, и с Устюга, и с Вологды, ино з болшого судна с ватамана гривна, а с людей, сколко их на судне ни будеть, ино з головы по денге; а в малом судне в гребном хто приедет, ино с ватамана и с людей, колко их ни будеть на судне, ино з головы по денге. А которы гость заплатит пошлину на Волочке, а на том другие пошлины на Белеозере не емлют.

8. А хто придет из Московские земли, из Тверские, из Ново­городцкие земли, изо всех монастырей Московские земли, и Тверь-ские и Новогородцкие земли, из белозерьскых монастырей, из Кирилова, из Фарафонтиева, изо всех белозерьскых монастырей, торговать им всем на Белеозере в городе житом и всяким товаром; а зо озеро им всем торговати не ездити. А по волостем и по манастырем не торговати житом и всяким товаром, опрочь одное волости Углы; а на Угле быти торгу по старине. А кого изымают, хто поедет за озеро, или кто учнет торговати по волостем и по монастырем белозерьским, и они с купца возмут два рубля, рубль наместником, а рубль таможником; а с продавца возмут два рубля, рубль наместником, а рубль таможником; а что у них будет товару, у купца и у продавца, и тот товар у них емлют таможники на великого князя, а их дают на поруце наместник и таможник да ставят перед великим князем. А городьским людем белозерь­ским посажаном за озеро ездити торговати по старине.

9. А будет суд перед наместники и перед тиуны о рубле, а восхотят ся помирити, и они дадут наместником гривну, и с тиуни и с доводчики, за все пошлины; а досудят наместники и тиуны о рубле до поля, а восхотят ся помирити, и они дадут наместником гривну, с тиуны и э доводчики, за все пошлины; а будет выши рубля или нижи, и наместники на них емлют по тому же розчету; а побиются на поле, и наместники велят на виноватом истцово доправити, а на себя велят взяти противень противу истцова, а то им с тиуны и з доводчики за все их пошлины.

10. А доведут на кого татьбу, или розбой, или душегубьство, и наместники велят на виноватом истцово доправити, а тот раз­бойник или душегубець наместником в продаже и в казне.

11. А поличное то, что выимут из клети из-за замка; а найдут что в дворе, или в пустой хоромине, а не за замком, ино то не поличное.

12. А у кого что признают татебное, и тот [с] себя сведеть свод, хотя и до десятого своду и до чеклого татя, а наместники у них в том не возмут на них ничего.

13. А самосуда наши наместники и их тиуни емлют два рубля: а самосуд то, хто поймает татя с поличным да отпустит его прочь, а наместником и их тиуном не явя, а его в том уличят, ино то самосуд; а опричь того самосуда нет.

14. А учинится у них в городе душегубьство, а не доищутся душегубьца, ино вины четыре рубли заплатят горожаня; а учинится душегубьство в коем стану или в коей волости, а не доищутся душегубца, и они вины четыре рубли заплатят в стану или в волости, в коей душегубьство учинилося; а доищутся душегубца, и они его дадут наместником или их тиуном, а хрестьаном в том продаж нет. А кого у них в лесе дерево заразит, или з дерева убиется, или зверь сьест, или хто в воду утонет, или кого возом сътреть, или хто от своих рук потеряется, а обыщут без хитрости, ино в том вины и продажи нет.

15. А станов к городу: Городецки стан, да Напорожский стан, да Заозерски стан.

16. А езд в станы и в волости на две версты денга, в городе хоженого денга, а на правду вдвое. А от поруки пристав у них не емлеть ничего.

17. А хто дасть дочерь замужь, из города в волость, или из волости в город, или из волости в волость, и он дасть за выводную куницю алтын; а хто дасть дочерь замужь за рубеж, в Московьскую землю или в Ноугородцкую, и он даст за выводную куницю два алтына; а в городе и во стану и в волости в одной, ино свадебного за убрус две денги, а десятинику владычню знамен три денги.

18. А хто у кого межу переорет или перекосит, и наместники наши и их тиуни возмут на виноватом за боран восмь денег.

19. А наместником нашим и их тиуном без сотцков и без добрых людей не судити суд.

20. А тиуном и наместничьим людем на пир и на братчину незваным не ходити; а хто приедет к ним на пир и на братчину незван, и они того вышлют вон безпенно. А хто у них имет нити силно, а учинится какова гибель, и тому-то платити без суда, а от меня от великого князя быти в казне.

21. А князи мои, и бояре, и дети боярьские, и всякие ездоки, у горожан и у становых людей и волостных людей кормов и подвод, и проводников, и сторожов не емлют. Тако же и гонци, мои великого князя, без грамоты подвод и проводников у них не емлють.

22. А приедеть мой пристав, великого князя, с Москвы, по белоозерца по горожанина и по становаго человека и по волостнаго, и он им пишет один срок в году, на заговение на великое на мясное; а опрочь того сроку хто на них иной срок накинет, а не по их сроку, или хто на них зазывную грамоту принесет, а не по их сроку, и яз, князь велики, им х тем срокам ездити не велел. А хотя хто на них безсудную грамоту возметь, а не по их сроку, а та грамота бессудная не в бессудную. А пристав емлеть у них...¹ ского езду три рубли, а от поруки у них не емлет ничего.

23. А кому будеть белозерцом, горожаном я становым людем и волостным обида от наместников и от волостелей, и от тиунов обида, и от доводчиков, и они сами сроки наметывають на наместников и на волостелей и на их людей.

А через ею мою грамоту хто что на них возмет, или чим изобидит, быти тому от меня, от великого князя, в казне.

А дана грамота лета девятьдесят шестаго, марта.

1497 г., май, 21

БЕЛОЗЕРСКАЯ ТАМОЖЕННАЯ ГРАМОТА²

Лета семь тысячь пятаго, маиа двадесят первы, т царя Констянтина и Оленина дни на год до царя Констянтина до лета семь тысяч шестаго, да двадесят перваго дни маиа, откупили белозерскую тамгу, да пятно коневое Тит Окишов да Есип Тимофеев, да Семен Бобр.

1. А откупа им дати сто рублев и дватцать рублев. А имати у них те деньги часовнику подьячему по сроком, шестьдесят рублев взяти у них на великое заговейно на мясное, а шестьдесят рублев взяти у них на царя Констянтина и Еленин день.

2. Хто привезет городцкой человек белозерець и окологородць и изо всех волостей белозерьских товар свой, и таможником у них имати со всякого товару с рубля по полудензе; да у них же имати с саней, что привезут свою рухлядь, по полудензе за церковную пошлину, что емлють на Москве.

3. А которой белозерець городцкой человек купит себе на лавку мед, или икру, или рыбу, и им имати у них с рубля по полудензе порядного.

4. А купит себе на лавку белозерець городской человек мех соли, или рогозину соли, или пошев соли или бочку рыбы, или кадь рыбы, или бочку селдей, и им со всего с того с одного имати у них по полудензе.

5. А хто мясо привезет на санех, городцкой человек белозерець и окологородець и изо всех волостей белозерских, и им у них имати с стяга по нолудензе.

6. А хто коровы пригонит, и им имати с коровы по полу ж дензе, а десять полот стяг мяса, дватцать гусей стяг же мяса, тритцать поросят стяг же мяса, тритцать утят стяг же мяса, десять борапов стяг же мяса, тритцать сыров стяг же мяса, дватцать зайцов стяг же мяса.

7. А привезет хто белозерець городцкой человек и окологородець и изо всех волостей белозерьских лен, лук, чеснок, орех, яблока, мак, золу, деготь, и им у них имати с воза и с саней по дензе, а повезет з Белаозера белозерець городцкой человек и окологородець и изо всех волостей белозерьских бочку рыбы, или кадь рыбы, или мех соли, или рогожу соли, или пошев соли, и им у них имати со всего с того по полудензе.

8. А с служилого человека, которой поедет бес товару, и с того пошлины не имати. А хто служилой человек поедет, а имет каким товаром торговати, ино с того имати тамга и все пошлины по тому ж, как и с торгового человека.

9. А хто купит человека в полницу, и ему давати наместнику ставленого з головы по алтыну, то и с приставом. А диаку имати, которой грамоты полные пишет з головы по алтыну, а таможени-ком имати з головы по алтыну ж.

10. А хто купит лошадь в рубль или менши рубля, и им имати у того от пятна с лошади но дензе, а хто продасть лошадь в рубль или менши рубля, и им у того имати с лошади по дензе.

11. А всем торговцем белозерьцом городцким людем и около-городным и изо всех волостей белозерьских, и изо всее Московские земли, и из Тферьские земли, и из Новгородцкие земли Великого Новагорода являти товар свой таможником, не складывая с воза и из судна. А не явя таможником сложит товар свой с иоза и из судна, и он то нротамжил, ино товар его ему назад. А будет того товару на два рубля или колко нибуди боле двух рублев, ино с него протамги два рубля: рубль намеснику, а рубль таможником. А хто нротамжит своего товару на рубль, ино товар его ему назад, а с него протаможья тритцать алтын без гривны, четыре гривны намеснику, а четыре гривны таможником. А хто протамжит своего товару боле рубля, а менши дву рублев, или менши рубля, ино товар его ему назад, а с него протаможье имати намеснику и таможником по тому ж по розчету, как емлют протаможье по колку с рубля.

12. А хто продаст лошадь или купит хто, а не яви таможником ни пятня, ино с него заповеди пропятенья два рубля; рубль намеснику, а рубль пятенщиком.

13. А белозерець городцкой человек на Белеозере в городе купит товар или продасть, ино с него тамги не имати, а продасть или купит судно городцкой человек белозерець и окологородець, и изо всех волостей белозерьских, и им у них имати тамга, как у них и с ыного товару емлют с рубля по полудензе.

14. А с московитина и изо всех городов Московских, и из вотчины братаничев великого князя, и из всее Московские земли, и из Тверские земли, и из Новогородцкие земли, со всех с тех имати тамга по старине с рубля по алтыну, да у всех же у тех имати с саней по полудензе за церковную пошлину и за гостиное, что емлют на Москве.

15. А купит хто судно или продаст, и им у них имати тамга у всех по тому ж, как у них емлют с ыного товару, с рубля по алтыну.

16. А придет хто с товаром на судне из Московские земли, и из Тферьские земли, и из Новогородцкие земли, и колко у него будет людей на судне, и им у них имати со всех с тех з головы по дензе; а хто приедет из Московские земли, и из Тверьские земли, и из Новогородцкие земли, и изо всех манастырей Мос­ковские земли, и из Тверьские, и из Новогородцкие, и из бело­зерьских монастырей, ис Кирилова, и из Фарафонтьева, и изо всех белозерьских манастырей, всем им всяким товаром и житом торговати в городе на Белеозере, а за озеро всем им торговати не ездити, а по волостем им и по манастырем не торговати ни житом, ни всяким товаром, опроче одные белозерьские волости Углы, а на Угле быти торгу по старине, а тамга имати у них по тому ж, как емлют на Белеозере в городе.

А кого изымают, хто поедет за озеро или хто учнет торговати по волостем и по манастырем по белозерьским, и они с купца возмут два рубля: рубль намеснику, а рубль таможником, а с продавца возмут два же рубля: рубль намеснику, а рубль таможником. А что у них будет товару у купца или у продавца, и тот товар емлют у них таможники на великого князя, а их дают на поруки намесники и таможники, да ставят перед великим князем.

17. А городцким людем белозерцем и посажаном за озеро ездити по старине торговати, а имати им тамга и церковная пошлина и пятно с великого князя селчян, и с великие княгини селчян, и с митрополичих, и с княжих, и со владычных, и с манастырь-ских, и з боярьских, и з грамотников и со всех без оминки, чей бы хто ни был.

СУДЕБНИК 1497 г.¹