Умшлһна текстс

* * *

Сурһульч бурхнд мөргəд, зальврна:

- О-о, хəəрхн! Өцклдүр шүүврин көдлмшт мини бичсəр, Лондон – Дань орн-нутгин хотл балһсн болтха!

* * *

Багш сурһульчнрин өдрлгт бичв: «Цаһан - йир бурмха күүкн, кичəлин туршарт күүкдлə дуһарна». Маңһдуртнь Цаһан эцкин хəрүтə өдрлгəн багштан бəрүлҗ өгнə: «Та экинь соңслт?..»

* * *

- Баав, эсв эсвлхд нанд нөкд болхнчн!

- Чи эврəн ухалвч?

- Ухаллав.

- Ю ухалвч?

- Меддг күүнəс сурҗ авхин тускар.

* * *

Багш сурһульчнриг хəрүлəд, эк-эцкднь ахр бичг бичнə: «Көвүһəн уһатн, энүнəстн му үнр һарна». Экнь көвүһəн хəрү йовулад бичнə: «Та сурһульчнриг үнршлх биш, сурһуль сурһх зөвтəт».

* * *

Негдгч классин сурһульч Байрта школасн хəрҗ ирнə. Экнь энүнəс сурна:

- Чини хаҗуд кен сууна?

- Би медҗəхшв, багш энд-тендəн бичə хəлəһəд бəəтн гинə, - гиҗ Байрта хəрү өгнə.

* * *

- Дегтрəн цеврəр бəрхин төлə яахмб? – гиҗ багш сурна.

- Чи юн гиҗ келвч? - гинə экнь.

- Школур одхларн, дегтрмүдəн гертəн үлдəхм гиҗ хəрү өгүв.

* * *

- Басң, би бек уучкув, ода яахмб?- гиҗ бичкн Баатр уульв.

- Бек бийдəн ивтрəдг цаас зальг, - гиҗ ахнь селвг өгв.

* * *

Өлзəт экəсн сурна:

- Юңгад əмтн хот иднə?

- Өсхин төлə.

- Би хот идəд өсчəнəв. Та иклмт, яһад хот иднəт?

* * *

- Байр, ю кеҗəнч?

- Юм кеҗəхшв.

- Делгүрт одад, тос хулдҗ авч ир.

- Мини ормд кен багшин өгсн герин даалһвр күцəхмб?

* * *

- Би школд одхшв, - гиҗ бичкн Санл келв.

- Яһад?

- Багш бийнь юм медхш, мел маднас сурад бəəнə.

* * *

Физик кичəлин багш:

- Яһад мадн түрүлəд цəкллһ үздвидн, хөөннь оһтрһугин дү соңснавидн, кен меднə?

-Би меддв. Юңгад гихлə, мана нүдн чикнəс өмн бəəнə, Санан Доржиевич, - гиҗ Санл келв.

Мектə сурһульч

- Баав, чи школд сəəнəр сурлчи? – гиҗ негдгч класст эклəд орҗах көвүн эцкəсн сурв.

- Сəəнəр сурдг билəв, - гиҗ эцк ик дурар хəрү өгв.

- Арвнас дола хасхла кедү болх? – гиҗ көвүн сурв.

- Һурвн болх.

- Һурвн деер йис немхлə, кедү болх?

- Арвн хойр болх.

- Меддг бəəҗч. Би ода йовҗ нааднав. Эсвин кичəлд багш өгсн даалһвриг күцəчкүв. Футбол наач болҗана! – гиҗ көвүн бедрв. Юн, ямаран утхта күүндвр болсинь эцкнь ода шиңкн медв.

Амн нурһн зурһалулн, ах дү һурвулн

Кезəнə ах дү һурвн көвүн бəəҗ. Олсн зөөсəн əдл кеһəд эдлчкəд бəəдг болна. Тиигəд нег өлн бəəсн цаглань бичкн дүнь нег хөөнə күзү олад авч ирнə. Бичкн дү аңһучлад йовҗ одсн арднь хойр ик ахнь күзүг чанад, һурвн əңг кеһəд хувахла, хошад нурһн болна. Хойр ик ахнь бичкн дүүһəн медх уга гиһəд, нег нурһ үлдəһəд, бийснь хошад дундур нурһ идчкəд, эс медсн болад бəəцхəнə.

Бичкн дүнь ирəд үлдəсн нурһинь эргүлəд хəлəҗəһəд: - Амн нурһн зурһалулн болдг эс билү? Ах дү һурвулн бидн, хошад нурһ күртхəс, нанд негн яһад күртсмб! – гиҗ келəд ахнран ичəсн болдг. Тенүнəс нааран хөөнə күзүн зурһан нурһтаһинь медсмн. Олна отхнь цецн болдмн, - гиҗ өвгн маасхлзв.

- Дү күн ахнран күндлдмн. Күндлҗəнə гиһəд ахнрнь отхн дүүһəн адлгад, мел зарад, хотын үлдл өгəд бəəхлəнь дү көвүнь – ахин дү болхар, һахан туһл болхнь сəн бəəҗ гиҗ келсмн, - гиһəд өвгн инəв.

Эрнҗəнə Константин (Һалан хадһл)